صديقتي رفضت خطيبها لأنها اكتشفت أنه يتعاطى الخمر ...

Quote: فنحن السودانين كشعب معروفين من اكثر الشعوب العربيه شربا للخمر,بينما نحن الاقل عنفا مع اسرنا...بينما العنف المنزلي ظاهره واضحه في بقة الدول العربيه من الخليج لبلاد الشام مرورا بالمغرب العربي كل هذه الشعوب 99%من الازواج بيضربوا نسائهم,تخيلي بقى الشعوب دي بتضرب من غير سكر ومال لو سكروا حتعموا شنو؟؟

الزول العايش تحت سطوة العنف لحد انه متنازل من حقوقه العادية ده أخير منه البضارب بالشبشب

زمان كنت طيبة زيك كده وبقول الرجل السودانى ايه ما تعرف ..والرجل الافريقى شنو داكا والرجل العربى ...

مافى عنصر أو عرق متفوق على التانى جينيا ..لكن التخلف وعدم التعليم والتطرف المعتقدى ..والعادات والتقاليد بتحكم السلوك ..

انا شايفة نسبة العنف فى كل بلد للتانية لغاية الآن ما مرصودة رصد صحيح، بس الخواجات غلبونا بالتشخيص والمؤسسات ..

حسة فى رجال مثقفين ..زيى زيك ..كده ..الواحد مرتو دى بس بعاين ليها بعينو كدى ..تانى ما بتفرفر ..ده عنف يا أخت ..عنف غير مشخص

عندنا وعندو مسميات تقليدية اسمها "طاعة الزوج" ..وما الى ذلك ..ياخ البورد ده قبل كده نزل فيه بوست امسه، هل ترضى لاختك او زوجتك ان تكون عضوا بالمنبر؟ أها ده عندكم اسمه شنو هناك، فى كندا .. سطوة ؟ كنترول ؟ دومنيشن؟ غايتو عندنا هنا فى امريكا الشماليه اسمو .. ياهو العنف ..

أما لاصدقائى وصديقاتى المندهشين والمندهشاتى فأقول لهم معليش بس انا تجربتى مع النساء ديل خلتنى أكجن الشراب والشاربين ، ومش تجربتى مع النساء فقط ب مع ل أطفالهم .......مناظر حزينة وتفكك وزعل وطلاقات وملاجىء ..وأطفال فى منعطفات قاسية مطالبين بالتشرد والعيشة مع أمهات وحدانيات آه آه دى اقسى حاجة لاقتنى فى تجاربى معاهم.

دى ما عندها بعد "كوزانى" كما تراءى للبعض ..ولا اتغشيت فيها يا مرتضى جعفر...أنا مؤمنه بالحريات الشخصية ، الانسان له حرية ما يعتقد ، وما يسلك وما يختار يسكر سكر راقى ولا ينعطن و"يطرش" على كيفو ..لكن لما يجى يرتبط بى زول تانى ، يركز ويستحمل رأى الزول فيه، صاح؟ الليلة البت دى كان قالت انا ما بحب السكر لكن بحب الزول ده وعندى نية أقنعو ، ما بنلومها، لكنها قالت بيسكر ما دايراه، مبروك عليها الاختيار، ونأيدها ونشد من ازرها عشان الاسباب آنفة الذكر (دى وجهة نظرى أنا الداهشكم شنو.؟؟ .. )

طبعا مرات عنف المتدينين بيكون( أعنف) من عنف السكرجية والمتدينين فيهم سكرجية والعكس صحيح، انا بتكلم عن علاقة السكر بالعنف الاسرى كما هو واضح من طرحى ..ومن واجبى أن أشير ليه اشارة واضحة ..فى منبر عام زى ده ..طالما الكلام جاب الكلام.....وطبعا مافى تعميم ...