|
|
 Re: العائد -سيناريو فيلم سوداني (Re: فتحي البحيري)
|
المــــــــشهـــــــــــــد رقم (3) ليل / داخلي []
15 لقطة متوسطة حفصة تطعم طفلها تامر (نفس الطفل ذو العامين في المشهد رقم 1) طبقا من الأرز باللبن ، ويبدو عليها التأفف من رائحة كفيها ، في حوالي الـ25 من عمرها ، تهتم بمظهرها بشكل لافت ، تجلس على سرير حديد سنقل والطفل إلى جوارها ، جهاز الموبايل ملقى بإهمال ظاهر على السرير ، بأحد طرفي الكادر نافذة مفتوحة بينما تدخل عليها عفاف (نفس بائعة الشاي في المشهد رقم 2 ) من الطرف الآخر حاملة صينية بها صحن كبير وملاعق (cut)
16 لقطة كبيرة لوجه عفاف بابتسامة عريضة تضع الصينية على التربيزة أمام حفصة (cut)
17 لقطة كبيرة لوجه الطفل تامر ويد أمه ممسكة بمنديل ورقي تنظف فمه وأنفه (cut)
18 لقطة متوسطة حفصة تساعد تامر على النزول من السرير ، يخرج تامر من الغرفة ، حفصة تتشمم يديها بضيق ظاهر، عفاف تتحدث إلى حفصة وهي لا تزال واقفة
عفاف : البصل ولا شنو ؟؟
حفصة : وفي غيرو ، قدر ما قت للحاجة تديني أي شغلة تانية غير تقطيع البصل أبت ، ناسنا ديل غير المكاواة ما عندهم حاجة
عفاف : تعرفي يا حفصة لو سمعتي كلامي وحرقتي قشر البصلة وبخرتي بيهو يدينك ...
حفصة : عليك الله خلينا يا عفاف .. هو في بصل بعالجوهو بالبصل ؟(cut)
19 لقطة كبيرة لوجه عفاف وهي تتناول ملعقة من الصينية وتوجه حديثها لعفاف ولأمها (بالخارج) في آن معا
حفصة : اقعدي ياعفاف ، انت ذاتك تعبتي معانا الليلة شديد ، يمّااه ، يمّه .. أرحكاكي(cut)
20 لقطة متوسطة عفاف تجذب كرسيا من الجهة غير المرئية من الغرفة وتجلس عليه يسار حفصة بينما تدخل الحاجة نفيسة حاملة في يدها اليمنى مسبحة وفي اليسرى سجادة مطبقة تضعهما في طرف السرير قريبا من جهاز الموبايل وتجلس على السرير يمين حفصة (بذات الموضع الذي كان عليه تامر) يبدأ ثلاثتهن الأكل في صمت لا تلبث حفصة تقطعه موجهة الحديث إلى أمها وغامزة بعينها لعفاف
حفصة : أسي عليك الله يا أمي ولدك المتفلهم دا خواجية شنو دي المعرِّسة دي ، أسي عليك الله عفاف دي مالا ؟؟ ما بت حلتنا و نديدتو وقرت معاهو كمان ؟؟
حاجة نفيسة : اجي يا بتي ، اسي داكلام تقولي في يوم زي دا ، الحمد لله الجا بالسلامة ،انحن كنا لا مين في رويحتو دي (cut)
21 لقطة كبيرة لوجه الحاجة نفيسة وهي تغمز لعفاف (cut)
22 لقطة كبيرة لوجه عفاف وهي تدير وجهها تغالب الضحك (cut)
23 لقطة كبيرة لوجه الحاجة نفيسة وهي توجه حديثها لحفصة ولعفاف ثم لحفصة مرة أخرى
حاجة نفيسة : بعدين انتي اظنك ما كلموك ؟ لي يا عفاف ما كلمتوها عليكم الله ؟ غايتو انا غلبني اقول ليها (cut) :
24 لقطة كبيرة لوجه حفصة وقد بدت عليها دهشة أقرب للفزع وهي تتلفت يمنة ويسرة محاولة الحصول على إجابة (cut)
25 لقطة كبيرة لوجه الحاجة نفيسة وهي تنظر للأسفل متصنعة الجدية ...
حاجة نفيسة : الخميس الجايي ابوك وصاحبو حاج النور ناويين يعقدوا لي روحم في الجامع بعد صلاة المغرب انشاء الله ... اجهزي انتي وصاحبتك ... عندكن اربعة يوم بس(cut)
26 لقطة كبيرة لوجه حفصة وقد أوشكت على البكاء
حفصة : دي ما أول مرة ابوي يقول داير يعرس ، ليهو عشرة سنة تقريبا يقول داير اعرس داير اعرس وما بحصل ... بعدين يا يمة النفرين ديل عمرم أكثر من سبعين سنة المعرسين ليها شنو بعد دا ؟؟ ثم تانيا الموضوع دا يا أمي علاقتو بينا انا وعفاف شنو ؟؟(cut)
27 لقطة كبيرة لوجه الحاجة نفيسة وهي تنظرلحفصة متصنعة الدهشة ...
حاجة نفيسة : كيفن علاقتو بيكم شنو ، ما إنتو العروسات (cut)
28 لقطة متوسطة ، حفصة تهب واقفة كالملسوعة ، عفاف تغالب ضحكتها الكظيمة
حفصة : (تصرخ) عرووووسات ؟ كيف يعني ؟؟!
حاجة نفيسة : (تجد صعوبة في الاحتفاظ بوقارها وجديتها) الله .. يعني أبوكي حيزوج عفاف وحاج النور حا يزوجك انتي (cut)
29 لقطة كبيرة لوجه حاج الفاضل ممتلئا بشرا يدخل الغرفة مسلما
حاج الفاضل : السلام عليكم .. اتعشيتن خليتني ؟؟ (cut)
30 لقطة متوسطة : عفاف تدير رأسها للناحية الأخرى وهي تغالب الضحك ، حاجة نفيسة تغلبها الابتسامة بينما حفصة تخاطب والدها بدموع ودلع ظاهر
حفصة : شوف يا ابوي كونك تعرس ما تعرس دي حاجة بتخصك انت ، لكن أنا ما دايرا عرس ما دايرا .. ماديرا
حاج الفاضل : بسم الله الرحمن الرحيم ... القاليك أنا داير اعرس ولا انتي تعرسي منو هسا ؟
حاجة نفيسة : (تنفجر ضاحكة) اصلها بتك كدا يا حاج .. تبد ا الهظار والكلام المايا هو وبعدين يبقى ليها بمبي
عفاف : (تهم بالخروج) انا اقول ليكم مع السلامة ، تصبحو على خير (تخرج بسرعة قبل أن تنتظر ردا )
حاج الفاضل : (ضاحكا) الحصل شنو يا حاجة ، النسوان ديل مالن معاك ؟؟ كدي احكي لي
(يخرجان معا الحاجة تحمل معها الصينية) (cut)
31 لقطة كبيرة لمسبحة الحاجة نفيسة بجوار موبايل حفصة على السرير ، الموبايل يرن بنغمة أغنية ( نشوة ريد احساس اكليل)
32 لقطة متوسطة ، حفصة التي أصبحت بمفردها في الغرفة ، تتناول الموبايل بلا مبالاة تنظر لبعض الوقت في هوية المتصل دون أن يظهر على وجهها أي تعبير ، تستلقي ببطء على السرير ، مزيحة السبحة وسجاة الصلاة بإهمال وبشكل آلي رتيب ، تضغط زر الاتصال وتضع الموبايل في أذنها صامتة
(cut)
|
|
  
|
|
|
|
|
| العنوان |
الكاتب |
Date |
| العائد -سيناريو فيلم سوداني | فتحي البحيري | 01-19-11, 05:32 PM |
| Re: العائد -سيناريو فيلم سوداني | فتحي البحيري | 01-19-11, 06:24 PM |
| Re: العائد -سيناريو فيلم سوداني | فتحي البحيري | 01-19-11, 06:34 PM |
| Re: العائد -سيناريو فيلم سوداني | فتحي البحيري | 01-20-11, 08:27 AM |
| Re: العائد -سيناريو فيلم سوداني | فتحي البحيري | 01-20-11, 08:48 AM |
| Re: العائد -سيناريو فيلم سوداني | فتحي البحيري | 01-20-11, 08:48 AM |
| Re: العائد -سيناريو فيلم سوداني | فتحي البحيري | 01-20-11, 10:32 AM |
| Re: العائد -سيناريو فيلم سوداني | عاطف عبدون | 01-20-11, 11:52 AM |
| Re: العائد -سيناريو فيلم سوداني | فتحي البحيري | 01-20-11, 07:03 PM |
| Re: العائد -سيناريو فيلم سوداني | فتحي البحيري | 01-21-11, 01:11 PM |
| Re: العائد -سيناريو فيلم سوداني | فتحي البحيري | 01-21-11, 02:48 PM |
| Re: العائد -سيناريو فيلم سوداني | فتحي البحيري | 01-21-11, 02:56 PM |
| Re: العائد -سيناريو فيلم سوداني | فتحي البحيري | 01-21-11, 07:49 PM |
| Re: العائد -سيناريو فيلم سوداني | فتحي البحيري | 01-24-11, 11:10 AM |
| Re: العائد -سيناريو فيلم سوداني | فتحي البحيري | 01-26-11, 08:30 AM |
|
| |
فتحي البحيري
فيس بوك
تويتر
انستقرام
يوتيوب
بنتيريست