خالد الحاج ،الطيب القلب(سودانيز اونلاين/سودانيات) في العناية المركزة مستشفى الزيتونة دعواتكم له

Quote: سارة خالد "سبعة أعوام" تحاضر عن دارفور ولا إجابات؟؟ (إعلان في صحيفة محلية لجمع المساعدات لدارفور) يوم السبت الساعة12:30 منتصف النهار..كعادتي "حاضن" الكمبيوتر ،سارة وجعفر يشاهدان مسلسل تلفزيوني،جرس الباب يرن بإلحاح ألتفت نحوهم : يا ود ما سامع الجرس ده أمش أفتح الباب ..مستدركآ : لو ديل ناس "جوهوفا وتنسس" قول ليهم بابا مشغول!! ينزل جعفر أسمع صوت الباب ثم حديث مبهم ثم :يا بابا في زول عايزك..أنزل السلم أكاد أصطدم بجعفر صاعدآ بسرعة للحاق بالمسلسل .. بصوت منخفض ده منو يا جعفر ناس جهوفا؟ لا يا بابا ده شحاد..شحاد؟؟ شخص مهندم جدآ "كان شحاد ما عارف" يحمل حصالة مغلقة بقفل "طبلة" (Dag) داخ _نهارك سعيد_ الرجل :إسمي فلان ممكن أخد من وقتك خمسة دقايق؟ أرد متجهم الوجه قليلآ _أسوأ شي أن تبدأ ونسة مع عجوز يحكي لك عن الحرب العالمية الثانية- بخصوص؟ دارفور!!! قالها وكأنه مولود في أم درمان.. أحس بيد سارة الصغيرة تمسك بيدي، لم ينتظر الخواجة حتي آذن له وبدأ في السرد : نحن نجمع تبرعات لضحاي الحرب في السودان دارفور ..موضحآ أكثر غرب السودان..سارة محاولة أن تتكلم "قرصة صغيرة مني في يدها أسكتتها" الخواجة مواصلآ السرد : هنالك آلاف اللاجئين ومرضي وأطفال وعجائز يحتاجون معونات عاجلة جدآ وأي مبلغ يجمع سيكون مفيد جدآ!! يا إلهي كم أحس بالضآلة!! مالذي يدفع بخواجة في العقد الخامس من عمره ليحمل "قرعة" من أجل إقليم في أقصي المجاهل الأفريقية.. إستطراد : Quote: صرح د.صابر محمد الحسن محافظ بنك السودان لصحيفة الرأي العام في عدد اليوم 8/يوليو/2004 إن تكلفة بناء المقر الجديد لبنك السودان 22 مليون دولار أي 22.000.000 دولار بالعملة المحلية الدينار = 5.742.000.000 بالجنية السوداني = 57.420.000.000 ملحوظة : سعر الدولار حسب سعر الصرف في البنوك =261 دينار ، 2610 جنية سوداني (نقلآ عن الزميل SSD ) . أخذ الخواجة بعض المال وذهب في حاله ، قفلت الباب لينفتح علي باب "جهنم" أسئلة سارة : يا بابا عمو ده قال في "أورلوخ" -حرب- في السودان ؟ طيب عايز تخلينا نمش هناك برانا ليه؟؟ إجابة : الحرب يا سارة في دارفور وإنتوا ماشين الخرطوم. دارفور دي وين بعيدة؟.. إجابة : بعيدة جدآ يا سارة من الخرطوم -ملاحظة مساحة السودان توازي مساحة هوولندا 77 مرة- . طيب يا بابا هم عاملين حرب ليه ؟؟ إجابة.. بلا بلا بلا.. غير مقنعة لها وكيف لي أن أقنعها وأنا نفسي أبحث عمن يقنعني!! طيب يا بابا الأطفال ليه ما لاقين ياكلوا وليه قاعدين في الشارع أبوهم وين؟؟ سؤال فسؤال فسؤال...وإجابات مني محاولآ أن لا أستخف بعقلها الصغير وفي نفس الوقت أن أكون مقنع بقدر الإمكان..جعفر يتدخل للمساعدة و "أطلس" الخرائط وأهرب أنا إلي الكمبيوتر.. لم تتوقف المسألة هنا إذا بسارة تنقل الموضوع برمته إلي المدرسة وإقتراح من مدّرسة الفصل أن تحكي سارة عن دارفور للفصل ويحضر ناظر المدرسة ويقوم بتصوير "المحاضرة" ولم تستطع سارة الإجابة علي أئلة الطلاب الكثيرة فعادت نصف غاضبة عليّ : يا بابا إنت ما بتعرف حاجة !! ليه الناس ديل عاملين "أورلوخ" -حرب- ... تاني يا سارة ؟ هل من يملك فيكم أن يجيب طفلة عن أسباب القتل وسفك الدماء في دارفور ؟ أنا وسارة ننتظر. (سارة تحاضر ) (عدل بواسطة خالد الحاج on 15-07-2004, 03:23 ص)