|
|
|
 Re: من هم اولاد البندر في سودانيز اونلاين؟ (Re: الطيب شيقوق)
|
قريماااااااااااان
اصلو ما تجيب طارى اسمى
ليه يا الطيب شيقوق ؟ هو انا بقيت من أهل النفاق و الشقاق و لا شنو ... ؟
ههههههههههههههها عجب!!! حت ناس القيقر الصارو لا لامين على الشمال ولا الجنوب عايزين يدعوا البندرية
ات فاكر البندرية دي ساهلة ساى ؟
| |
  
|
|
|
|
|
|
|
|
Re: من هم اولاد البندر في سودانيز اونلاين؟ (Re: عبدالرحيم أبراهيم العبيد)
|
عبد الرحيم
اول حاجة جدك العبيد ومن اليلفون خلاني اشك بوجود علاقة بينك والاخ مامون الطيب العبيد المحامي والمقيم معنا في مسقط
فضحك ونظر الي الشيخ ود المجذوب الذي كان يجلس بجواره عليه رحمة الله
فقال كلمه ما زالت عالقه ديل أولادنا لكن أتبندروا
يا سلام على هولاء الرجال العظاء
ربي يديم المحبه والاخوه بيننا جمعيا
وأتمني أن يجمع شملنا
امييين
| |
|
|
|
|
|
|
|
|
|
Re: من هم اولاد البندر في سودانيز اونلاين؟ (Re: الطيب شيقوق)
|
الطيب اخوي
في بوست كارب بتاع قضايا هامش جاء زميل ونيته والله صافيه، بس عنده تساؤل
كيف يكون زول دي اقتباساته من (الاقتباسات من البوست دا) وعامل فيها زول
واقف مع الجنوبيين والمهمشين وقضاياهم الثورية؟؟؟!! ووهو زول ترعرع بين
صالات المريديان وبرندة القراند هوتيل؟؟
الراجل والله منطقي، لكن نسوى شنو، الشقاوة بس
مافي شيء يا حبيبن لا تنزعج ولا حاجة، بس قلنا نشاغلك ساي
لكن عليك الله في زمتك، الغلطان منو هسع، انا وللا ناس الهامش العملوا ثورات ديل؟؟ ههههههههد
| |
|
|
|
|
|
|
|
|
|
Re: من هم اولاد البندر في سودانيز اونلاين؟ (Re: أحمد ابن عوف)
|
ود شيقوق ..
لحين النظر فى طلبات الاحاله قيد بحثى, ساورد تلك الخاطره القديمه ونحو الخرطوم, مدينة من حنان داكن
"النيل بعض هباتك – سيدتى - بعض هداياك الانيقات .. فأى سخاء سخاؤك هذا المبذول على الدنيا , وأى عطاء فينا ترتكبين ؟.. منذوره انت للبهاء ..لاقداس الشموس الاستوائيه العظيمه .. لاعراس المياه السماويه الوعد .. لاحلام الصبايا السمراوات سمره وجهك الموسوم بالطيبه .. للاناشيد تحمل بشراك .. الله الله يا خلاسيه المكى ابراهيم
يا حانه مفروشه بالرمل ..
يا مكحوله العينين ..
يا مجدوله من شعر اغنيه ..
يا ورده باللون مسقيه ..
بعض الرحيق انا .. والبرتقاله انت
يا مملوؤة الساقين اطفالا خلاسيين
يا بعض زنجيه ..
وبعض عربيه ..
وبعض اقوالى امام الله ..
يأتى اليك العاشقون .. فى شارع النيل , تورد لون الصباح .. بصوت وردى ينطلق فى المذياع , نديا فى حافلات الركاب الذين انتظموا وجدا بالنشيد ..
بتطلعى انت من غابات ..
ومن وديان ..
ومني انا ..
ومن صحوة جروف النيل .. مع الموجه الصباحيه
بتطلعى انت .. من صوت طفله .. وسط الزحمه منسيه ..
يأتى اليك المرهفون .. منك , من عقاله ينفلت الشعر .. يرتكب جريمه التفرد عامدا .. اسمر لوحته نار المجاذيب .. تقيا عمدته خلاوى القرآن .. ساحر ينطلق من طفوله إفريقيه معربده .. حييا يتخفى تحت عمامه بيضاء .. هو موسم للهجره الى الشمال .. موسمين للعوده .. ومواسم اخرى تخص الالتقاء .. فعند هذا المقرن العظيم .. النيل ازرقٌ .. النيل ابيضٌ .. وفى ذات الهنا نيل ثالثُ هو بعض هباتك سيدتى .. بعض هداياك الانيقات .. فأرجع البصر هل ترى من فطور .. سبحانه
كانت لحظه اللقيا تجلجل فى فناء الروح ..
كان الحب يرقص عاريا .. متجاهلا كل الخرافة ,
والمعانى السافله ..
كالنيل حين يضج بالايقاع ينفذ وحدة ..
عبر الصحارى القاحله ..
طوبى ..
اذا احتملت شرايينى هدير القلب حين اراك ..
( اى مشارق تغازل فى شموسها الان ايها التاج .. السر .. جعفر .. الخليفه .. طه .. الريفى , يا لصوفيه هذا الاسم)
يأتى اليك المادحون .. الخرطوم تقيه المدائن .. عذراء فى الليل تصلى فى محراب الهجرة الاولى .. تمدح الرسول .. تهفو للمدينة والبقيع .. مشجونة بالفراق وهى تودع الحجيج ..
يا راحلين الى منى بغيابي ..
هيجتموا ..
يوم الرحيل فؤادى ..
طارات البرعى تدوى فى لياليك الطاهرات .. أولاد الماحى يترنحون وجدا وانجذابا .. والسمانى احمد عالم – فى القبه – يسامر الحلاج , ينشده .. وأبن عربى يستأذن فى الدخول على شيوخ العركيين .. أين محمود محمد طه ؟؟ .. مدد .. يا الله , مدد
يأتى اليك المتعبون .. للزقاقات الاليفه الغباش .. لغبار شوارعك الحميم .. لاشجار اللبخ تظلل عشاقك .. لمداخل الحزن الرحيم .. يا بوابات العشق والطين والسنط .. ويا شبابيك الحبيبه .. هدهدينى بأحاديث العميرى وعلى المك .. خبرينى عن امجاد بعانخى وحرفنه كمال عبد الوهاب ومشروع الجزيره وآبار البترول .. ثم
خبئينى بين جدران المسام ..
قبلينى ... مرة فى كل عام ..
فأنا .. اشتاق ان اولد فى عينيك طفلا من جديد ..
ارتدى اللون البنفسج .. اعتلى شكل الهويه ..
ضيعتنى مريم الاخرى سنينا .. فى انتظار المجدليه ..
اه لو تأتين .. آه
من عميق الموج .. من صلب المياه
كالرحيل ..
كالترقب .. وانتظار المستحيل
رحم الله مصطفى سيد أحمد .. أى غناء نازف كان يغنيه هذا الرجل الحليق الكف .. الداكن الحنان ؟؟ , وللحنان طعمك الداكن يا خرطوم .. وشكرا حزينا عاطف خيرى اذا انبهمت علينا مسالك الحنان"
( محمد المشرف, الدوحه, 2001 )
(عدل بواسطة محمد حيدر المشرف on 12-01-2010, 03:17 PM)
| |
|
|
|
|
|
|
|
|
 Re: من هم اولاد البندر في سودانيز اونلاين؟ (Re: Abdlaziz Eisa)
|
Quote: خرتوم الترك زي ما كان بسموها أهلنا ...أها الخواجات جو وكملوا الناقصة ...بس ساكنين براهم وبكلابهم في الحي الأوروبي ...هسع وين الحي الأوربي يا ناس البندر الجدد ؟؟
عجبتني لاماني بت اللمين |
أقول ليك كانو بيجو يلعبو جولف عندنا تقول لي:
| Quote: ومن أفقر الأحياء الشعبية بالمدينة حي (هبوب ضربانى)، ومن الأحياء الشعبية ايضاً (حى الكارة) و(حى الطوبجية).. |
| |
|
|
|
|
|
|
|
|
|
Re: من هم اولاد البندر في سودانيز اونلاين؟ (Re: أحمد ابن عوف)
|
ابن عوف
بس قلنا نشاغلك ساي
لكن عليك الله في زمتك، الغلطان منو هسع، انا وللا ناس الهامش العملوا ثورات ديل؟؟
انت الغلطان شنو الوداك ناس الهامش انت عارف ديل الواحد تلقاهو بارم سكينو وخامش عكازو المضبب داير ليهو زول بندر يقول ليهو سيك ميك عشان يسجمو دقيقة مافي
| |
|
|
|
|
|
|
|
|
|
Re: من هم اولاد البندر في سودانيز اونلاين؟ (Re: أحمد ابن عوف)
|
Quote:
بس العرس مالو عيب لي ؟
مسنوح عايز تفتنا مع البندراب
|
طريت القدال فوصاني ليك بهدية...عشان البنية الفنجرية
************
سمحة وسمرية
محبوبتى ولفتاتة غزالة
خضرة ومسقية
وجنب النيل مشتولة النالة
بهواك يا بنيـّة كتبتو قصيد
وبقولو مقالة
بتفتحى فيـّـا معانى غناى
تديلة مجالا
************
زهرة وبرية
بشوق الأرض عيونا كُحالة
تريانة ندية
بعرق الناس والناس فى بالة
يا خوفة علىّ عقل وثبات
ماهـا الولوالة
************
من فرحى البيـّا
قلعت الخوف وكستنى بسالة
قت ليها النية متين نتلم
والحال بطالة
قالت لى غنية وإنت معاى
مستورة حالة
بت سودانية محبوبتى
ولفتاتة غزالة
| |
|
|
|
|
|
|
|
|
|
Re: من هم اولاد البندر في سودانيز اونلاين؟ (Re: Amany Elamin)
|
أسمع الغنا الما جادّي ده عن البندراب فرع الخرطوم بحري : (الغنيه اسمها: حبّينا في بحري)
هازوله ، والله الغنيه سمحه طب ، كان الغنا الماجادي كلو متلها زيدينا،
بس ما تنسينا من إمكانيات الحفظ..
غنيه نضيفه ومسنوحه بالحيل يا بت اللمين ،
الله يديك العافيه.
| |
|
|
|
|
|
|
|
|
|
Re: من هم اولاد البندر في سودانيز اونلاين؟ (Re: الطيب شيقوق)
|
اماني الامين والله ريده في الله والرسول من زمن كنت بتاوق من فوق االحوش وعشان تعرفي انه متابعاكي اول بوست ليك كان عن الهيمنه الذكوريه
ولقد تردت كثير بخصوص طلباالاقامه بهذا الحوش لكن انتي واخريات شجعتنني بالدوخول وكنت اول من ارسلت ليه رساله احتمال اكون ماعرفت استخدم الماسنجر
يله فهمتي ليه لمتك
المسنوح عزرا مكان عندي حل وانت عارف البتجي من السماء بتتلقاها الوطا
| |
|
|
|
|
|
|
|
|
|
Re: من هم اولاد البندر في سودانيز اونلاين؟ (Re: mona altom)
|
الاماني المسنو.............حة
Quote: نقول ليك جولف تقول في الوحل؟
صحي ضهاري * لوووووووول |
القال ليك منو انا من الضهاري انا ود عمك لزم - ما شايفة كلامك الفوق دا انا بقرا فيهو ومشنق طاقيتي فووق في الهامة؟
Quote: بالمناسبه البوست ده عارفينك عاملو حباً في زملاء الدراسه حبايب قلبك مولانا المرتضي وصحبه,
لكن قلنا نعمل ليك شوية فوضي اسفيريه هههههههه |
ديل يا اماني جبناهم كرموز بندرية صافية ونقية
| Quote: أسمع الغنا الما جادّي ده عن البندراب فرع الخرطوم بحري : (الغنيه اسمها: حبّينا في بحري) :) |
وحاة الله فاطة سطر عديييييييييييل
----
| |
|
|
|
|
|
|
|
|
|
Re: من هم اولاد البندر في سودانيز اونلاين؟ (Re: الطيب شيقوق)
|
بت التوم
| Quote: اماني الامين والله ريده في الله والرسول من زمن كنت بتاوق من فوق االحوش وعشان تعرفي انه متابعاكي اول بوست ليك كان عن الهيمنه الذكوريه |
احسن ليك تفكي دربا دى ما عندها شغلة غير النت - باقي لي بت بندر مرتااااااااحة يسوا ليها في الاكل ويجيبوهو ليها في طاولة اللابتوب يد في الكي بورد والتانية مع الساندوتش . وانتي بت الضهاري وحاة الله تتابعي المسنوحة دي تلقي كل يوم بصلتك حرقت .
| |
|
|
|
|
|
|
|
|
|
Re: من هم اولاد البندر في سودانيز اونلاين؟ (Re: وليد عبد اللطيف)
|
ود الجيلي
Quote: سلامات يا مولانا شيقوق {المسنوح}
غايتو بعد إقتنعتّ إنو الدندراوي بقى بندرابي
معناها العبد الفقير لله بندرابي بالفطرة والسُلالة |
كويس احسن ليك البندرية دي عشان نجيكم هناك نشتري منكم حلاوة لا لوب !! ونبيع ليكم حلاوة عنكوليب!!
لا لوبكم مقشّر؟ !!
| |
|
|
|
|
|
|
|
|
|
Re: من هم اولاد البندر في سودانيز اونلاين؟ (Re: الطيب شيقوق)
|
ولدو
Quote: ياخي ود شيقوق ممتع حد المقصورة
متابعة مان تمان
ماتقول لي ياشيقوق جنك تيوه |
مرسييييي مرسييييييي - حكي بندري من النوع المنغنغ
| Quote: ياود يشقوق بالله لما تستلم سيدهات شاكيرا من قريبي (ود البوب ) ورينا رايك شنو |
لا قول لقريبك كتر خيرك - انت من زمن الفلوبيات والسيديهيات نحن شغالون بالامبي ثري MB3 عديل كدا
| |
|
|
|
|
|
|
|
|
|
Re: من هم اولاد البندر في سودانيز اونلاين؟ (Re: الطيب شيقوق)
|
أهلا مني التوم,,
وألف مرحب بيك في البورد,,
Quote: اماني الامين والله ريده في الله والرسول من زمن كنت بتاوق من فوق االحوش وعشان تعرفي انه متابعاكي اول بوست ليك كان عن الهيمنه الذكوريه
ولقد تردت كثير بخصوص طلباالاقامه بهذا الحوش لكن انتي واخريات شجعتنني بالدوخول وكنت اول من ارسلت ليه رساله احتمال اكون ماعرفت استخدم الماسنجر
يله فهمتي ليه لمتك |
يا ستّي أحبك اللذي أحببتني فيه, وكتر خيرك علي الإطراء,
ونتمني نعرف عنك أكتر ونقرأ ليكي ونتداخل في مواضيعك والبورد نوّر بحضورك,
معليش ردّي الأول ما انتبهت لتاريخ التحاقك بالبورد, وافتكرتك من الناس المختفيه عشان كده ما عرفت اسمك,,
بعدين يا حبيبه ما حصل والله استلمت منك ماسنجر اطلاقا, والّا أكيد كنت رديت ليك دون شك,,
شكرا علي حسن ظنك, وسعيده بقراية كلماتك جدا :)
---
مولانا ود شيقوق,,
| Quote: احسن ليك تفكي دربا دى ما عندها شغلة غير النت - باقي لي بت بندر مرتااااااااحة يسوا ليها في الاكل ويجيبوهو ليها في طاولة اللابتوب يد في الكي بورد والتانية مع الساندوتش . وانتي بت الضهاري وحاة الله تتابعي المسنوحة دي تلقي كل يوم بصلتك حرقت . |
هههههه ياريت والله,,
أنا لو فايقه ورايقه كده ما بقعد قدّام اللاب توب من أساسه,
بمشي للريال لايف تو انجوي ماي تايم,
أنا حابسني قدّام اللاب توب شغل, ويومي الأخلص منه ببيع اللاب توب زاتو ههههههه
| |
|
|
|
|
|
|
|
|
|
Re: من هم اولاد البندر في سودانيز اونلاين؟ (Re: Amany Elamin)
|
والله يا ود شيقوق الدندراوى
أجمل بوست عن اولاد البندر والبنبر والعنبر وبالذات لما يجى الكلام من واحد من خارج دائرة البندر (موش دائرة الدندر بتاعة ناس ود العجب!)...
البندر كان لحم راس (نيفة) لحدى ما جوهو ناس الخليل ونضفوهو
بين جناين الشاطى وبين قصور الروم
حى زهرة روما وابكى يا مغروم
وفى الضواحى وطرف المداين
وعازة فى هواك
الخ الخ يا ود المرتضى...
جينا من ضهارى الشمال وغزونا قلعة ام در ومرينا بسوق الشجرة وحسين ابومرين ونقلتنا عربات الجيش الى وادى سيدنا الثانوية ومنها واصلنا الغزو الى جامعة الخرطوم ثم التحقنا بالخارجية ومازال اولاد البندر يصفوننا باولاد الأقاليم فتركنا لهم الجمل بما حمل ورمينا عصا التسفار (حلوة تسفار دى!) فى البر الأمريكى منذ عشرين عاما ومازال فى نفسى شيئ من الأقلمة... أموت وفى نفسى شيئ حلفا..
نورالدين منان
| |
|
|
|
|
|
|
|
|
|
Re: من هم اولاد البندر في سودانيز اونلاين؟ (Re: mona altom)
|
وليد يا صاحب ..
مسكتنى هوشة العموديه التى خلعها علينا العمده ودشيقوق ..
فقلتا اتفنن فى الخط وأتماهى فى التداعيات كعمده خطير جدا ..
استرعى انتباهى -كعمده - حديث سعادة السفير منان عن أثر الريف السودانى فى تليين قساوة الخرطوم بالاشعار النديه ..
"من جناين الشاطى ولى زهور الروض
حيي زهره روما"
الى آخر ذلك الكلام الفاره الخمجان ..
وتساءلت
ترى لماذا لم يكتبوا مثل ذاك هناك قبلم ( قبلهم )
اقصى شمال خط البندر؟!.
او ..
الجابم شنو ؟!.
كان كل زول يلزم عموديته ويكتب ما شاء من أشعار فى حدود بناتها..
وليبكوا مغرومون بالذى هو فيهم واليهم.. هذا إن كان ليستدر أدنى قليل الدموع و .. هناك قبلم ( قبلهم )
محمد المشرف
عمدة تحرير الخرطوم ..
| |
|
|
|
|
|
|
|
|
|
Re: من هم اولاد البندر في سودانيز اونلاين؟ (Re: الطيب شيقوق)
|
سعادة السفير منان
شكرا شكرا يا سعادتك على هذه الطلة البهية
Quote: أجمل بوست عن اولاد البندر والبنبر والعنبر وبالذات لما يجى الكلام من واحد من خارج دائرة البندر (موش دائرة الدندر بتاعة ناس ود العجب!)...
البندر كان لحم راس (نيفة) لحدى ما جوهو ناس الخليل ونضفوهو
بين جناين الشاطى وبين قصور الروم
حى زهرة روما وابكى يا مغروم
وفى الضواحى وطرف المداين
وعازة فى هواك |
ظني يا سعادتك ما كان للخليل ان يتغنى (ببين جناين الشاطي وبين قصور الروم) ان لم يأتوا به الى البنادر ويطوفون به على البراري ليتنسم عبيرها ويرى عيون المها والحدائق المعلقة حتى يذوب رقة ولطافة .
| Quote: حمل ورمينا عصا التسفار (حلوة تسفار دى!) فى البر الأمريكى منذ عشرين عاما ومازال فى نفسى شيئ من الأقلمة... أموت وفى نفسى شيئ حلفا.. |
التسفار لقطة بس - لكن اوع البر الاميركي تكون ضهاري امريكا كمان؟
| |
|
|
|
|
|
|
|
|
|
Re: من هم اولاد البندر في سودانيز اونلاين؟ (Re: الطيب شيقوق)
|
ابو بكر قسومة
| Quote: عوووووك يا ناس البندر والضهاري,,ود شيقوق بيعتذر ليكم وبيقول ليكم هو بيصادف مشاكل في الدخول للانترنت حاليا,,وسيسعي جاهدا لحل هذه المعضلة سريعا والعودة اليكم.... |
كتر خيرك ما قصرت طب لكن شربوتك مش مشمم وبس ، شربوتك لقيتو الشي ذااااااااااااتو .
قال شربوت قال !!
| |
|
|
|
|
|
|
|
|
|
Re: من هم اولاد البندر في سودانيز اونلاين؟ (Re: الطيب شيقوق)
|
ناس البندر سرقوناوسرقوا لغتنا وخلونا نبرطم بلغة قريش يا شقاشق (على وزن نقانق) وليس (شباشب) على قول الحلمنتيشى بروفيسور جاغوم بن بلاع رحمه الله عن سيد بشبش: (بس خازوق الناس تتلخبط * مرة تقول لسيادتك شبشب) وطبعاالإقليمى لمان يجى البندر لازم يصاب بصدمة حضارية ويرجع لأهلو فى الإجازة ويحكى لأصحابو عن عجايب البندر(ومما جينا للخرتوم *** أكلنا المنقة والأنناس *** وخليناهو كد الدوم)...ويتأفف من القمشة ويخرج من جيب جلابية التترون المكوية علبة بنسون ويقدم السجائر لأصحابه قائلا: شمو نكهة التبغ الفيرجينى اول !!! لا ينافسه إلا الروثمان!!! ويحكى لهم عن الكاوبويات والمارلبورو ومارلين مونرو و هولى وود (وينطقها هولى يود) وبعد ايام تراه تحول لشامبيون ثم البرنجى وأخيرا يتحول الى القمشة ثم يتحول الى بالتمباك قريب نهاية الإجازة ويوم السف للبندر يودع اصحابو ويقول ليهم: والله اشتقناللخرتوم و للبنسون... مصائب البندر بارتنا حتى بعد تضخمها وازدياد حواريها من امبدات وكلاكلات وصحافات وثورات واختلط حابل ناس الأقاليم بنابل ناس البندر وانتقل الإقليم للبندر وصاروا جيرانا مثل الديم والعمارات:
بين الديوم والإمتداد
شارع زلط للعين يبين
لكنو وناس المطافى ما حصلوهمفى الحق موهو شارع
ديا آلاف السنين
عندما يعبر ود الديم الأغبش شارع الزلط ويختف الإيسكريم من حنكوشة العمارات الذى يقول لأمه ان الغنماية ختفت الإيسكريم ... ويعرف الراعى بأنه الزول البفسح الغنم وان المك نمر عمل بارتى لاسماعيل باشا وأثناء ما الديسكو شغال ولع فيهم النار وتخيل ناس المطافى ما حصلوهم فانقرضوا كلهم...
شقى يا ود شيقوق... فتحت باب اكبر من بوابة عبدالقيوم وبالمناسبة عبدالقيوم دة منو الخاوتننا بيهو ناس امدر... ناس كوستاوى وود المرتضى ومن لف لفهم...
نورالدين منان
| |
|
|
|
|
|
|
|
|
|
Re: من هم اولاد البندر في سودانيز اونلاين؟ (Re: حيدر امين)
|
أولاد البندر وأولاد الضهاري
وقوفا من اليمين إلى اليسار:
1- محمد الطيب محمد السعيد المحامي
2- محمد المرتضى حامد المحامي
3- نادر سعد أبو العلا المحامي
4- الطيب شيقوق المستشارالقانوني
5- دالي رحمة الله الحبوب المحامي
أسفل الصورة ملك الضهاري
حيدر عبدالله أبوشنقره المحامي
هييييع، يمين تاني الكلام معاكم إلا عن طريق سكرتيرتي،
| |
|
|
|
|
|
|
|
|
|
Re: من هم اولاد البندر في سودانيز اونلاين؟ (Re: Asma Abdel Halim)
|
Quote: سجمي سجمي! مرتضى الصلعة شنو؟
عيني باردة نادر سعد يمشي صغير ما بمشي كبير ياهو ده ود البندر اللى يوم الليلة ما شاف جدادة حية.
وده دالي ولدنا؟ |
أستاذتي العزيزة د. أسماء،
تتذكري في موضه حلاقه طلعت زمان إسمها كارل لويس بيحلقوا فيها الشعر بالجوانب ؟
أها هسه هنا في موضه مدوّره ليها زمن بيحلقوا فيها الشعر من فوق ويرسلوه بالجوانب
الموضه إسمها قلف ستايل متخصص فيها حلاق إسمو الزمن ، وانا طبعا مع الموضه 
طبعا نادر لازم يكون ماشي أسغر ، عيني عليهو بارده ،
جانا من لندن إجازه وهذه المرة بدعوة من الحكومة العمانية بمناسبة إحتفالات السلطنة
بالعيد الوطني الأربعين.
سبحان الله الطيب شيقوق زاتو ماشي أسغر بس ( بالَقلَبَه)،
أما حيدر فكما ترين ، سغير وجاهل ، أصلو ما بيكبر ، تقول قاعد في تيرمِس.
نعم ، ياهو دالي ، أجارك الله الأيام دي متبني تسريحه إسمها إنشتاين زي ما شايفه،
إنشتاين .. وماسك في أنا ما بقطف زهورك بعاين..
قبل فتره كان دايمن بيغني رائعة إبراهيم عوض (المصير) تلاقيهو في المحكمة يدندن:
تاني ما تقول انتهينا،
الصوره اللي فوق دي في بيت حيدر أبو شنقره في غداء جمع أيضا عزيزنا يوسف أبكر وأحمد هاشم،
والله بس كان ناقصا قاضي ومتحري.
طبعا المتهم شيقوق.
| |
|
|
|
|
|
|
|
|
|
Re: من هم اولاد البندر في سودانيز اونلاين؟ (Re: محمد المرتضى حامد)
|
اماني سلام سوف اعمل بالوصيه بعد شويه
المسنوح الموسم بتاع ام كمبش وستيب عليك امان الله املي ليها المخلايا تب
اه انت لزوم البندره داير اي نوع من العطور البارسيه علشان تستوفى الشروط اصلي ناويه انزل البلد قريب لكن ليك امان تسليم الهديه علا في الضهره مافي مرسال بوسته او بندر
| |
|
|
|
|
|
|
|
|
|
Re: من هم اولاد البندر في سودانيز اونلاين؟ (Re: mona altom)
|
سعادة السفير نورالدين منان،
السلام يا روح البدن،
زولك العريبي دا جاب لي الكلام في صمّة خشمي،
رغم أني من مواليد المسالمه لكنني أكثر المتداخلين هنا (ضهاري) ساي،
والله يا سعادتك عشت سنين عددا في مواقع لا يعرفها ودشيقوق المسنوح ولا قوقل إيرث،
هسه قول ليهو التبون وكجوريا والضعين وتنقلاني وابيي المجلد بابنوسه ودعشانا تندلتي النهود ودالسيد الشرق
القضارف صقع الجمل ودبنده الخوي مركب غبيش وغيرهم ديل شافهم؟
لم أذكر له المدن الكبيرة لأنها أقام بها كثير من الأعضاء وهي معروفة لكن ، والحمد لله ، لم أترك مدينة لم
أزرها من حدودنا الشرقية إلى الغربية ومن الشمالية حتى الرنك..
زولك دا شاف الدندر وسنار ويكيل في الإتهامات من عيار بندر و السعودي وما تجود به قريحته من موليتا،
لكن ، والحق يقال ، أهلكم ناس حضاره ، عشنا معهم وكانوا قمة في الرقي رغم مقاطع الرطانة،
قال لي أستاذي الراحل أبوبكر أبو الريش الذي تدربت على يده ويد أستاذتي د. أسماء،
قال لي إنه لم يقع حادث قتل واد في وادي حلفا، أها في تحضر أكتر من كدا؟
تعال شوف ناس هييييع ديل ،
يسلِّموا عليك والسكين في الضراع،
دي حاله دي !!
| |
|
|
|
|
|
|
|
|
|
Re: من هم اولاد البندر في سودانيز اونلاين؟ (Re: Asma Abdel Halim)
|
عفوا يا اخوانا لدى مشكلة فنية ولم استطع الدخول الى النت - محاولاتي جارية لاصلاح العطب
كتر خير واحد هندي جيت فيه بالصدفة قلت ليهو (كان آي شك ماى ايميل؟) لولح راسو قال بليس بليس - المسكين صدق واخوكم طوالي اتلهم سودانيز عشان يبل شوقو وكتبت ليكم هذا الاعتذار .
ساعود اليكم فردا فردا وشكرا اخي المرتضى (ابو أكرم) على تغيير صورة البروفايل واخراجها بصورة تلامس اطراف وجاهة ناس البندر .
| |
|
|
|
|
|
|
|
|
|
Re: من هم اولاد البندر في سودانيز اونلاين؟ (Re: الطيب شيقوق)
|
لعلك طيب
ساعود اليكم فردا فردا وشكرا اخي المرتضى (ابو أكرم) على تغيير صورة البروفايل واخراجها بصورة تلامس اطراف وجاهة ناس البندر .
ياداب فهمت سر صحبتك مع مولانا ود المرتضى قلت لي دى كلو عشان تتحصل علي لقب البندر
ليك كلمه من ناس الضهاري اسمعها واعيها ان العيش لفه وجا الطاحونه مانا مدينو وش
افهما ذي ماعايز
| |
|
|
|
|
|
|
|
|
|
Re: من هم اولاد البندر في سودانيز اونلاين؟ (Re: mona altom)
|
يا الله بسم الله نبدأ
الاستاذة اسماء
| Quote: ما هو الفرق بين ود البندر والحنكوش |
السؤال مهم ومنتج جدا لا سيما لناس الضهاري الذين غالبا ما يخلطون بين المفردتين
قبل ان يفكر السودانيون في الاغتراب وعندما كان اولاد البندر منغنغين ومبسوطين كانوا يسمون بالحناكيش - بمعني ادق المفردة كانت تستعمل Interchangeably ولكن بعد تفشي ظاهرة اولاد وبنات الشهادة العربية صار لقب حنكوش يطلق على هولاء فقط .
| |
|
|
|
|
|
|
|
|
|
Re: من هم اولاد البندر في سودانيز اونلاين؟ (Re: الطيب شيقوق)
|
سيدي منان
| Quote: (ومما جينا للخرتوم *** أكلنا المنقة والأنناس *** وخليناهو كد الدوم) |
ههههههههها بالله انتو عندكم كد الدوم ؟ بالله يا اخوانا اتفرجوا الضهاري ذاتها خشم بيوت هم عندهم كد الدوم ونحن عندنا كعكول الطلح وعود الطلح يا سيدي . نملك من الموارد الضهارية ما تسيل اليه لعابات ( جمع لعاب - كدا صاح ؟ ) سكان الابراج العالية الذي طوروا اداوت الاستعمال لمواردنا الطلحية . فما عادوا في حاجة الى المحافير والكواريق والتربات وانما عندهم مجرد لمسة على زر كهربائي تخلي الدخاخين تعكل في السماء ونامن صفارة ناس البندر تكورك من غملة الدخاخين .
| |
|
|
|
|
|
|
|
|
|
Re: من هم اولاد البندر في سودانيز اونلاين؟ (Re: الطيب شيقوق)
|
حيدر ود اللمين
Quote: حسع انا اسمى ما لقيتو
من باكر بنلغى ليك تصريح الاقامه فى الخرطوم والعاصمة المثلثه
شوف ليك درب تانى للضهارى بتاعتك ديك |
يا اخي انت ما قريت اماني بت اللمين كاتبة شنو ؟
قالت المحس ناس بري وتوتي هم اساس البندرية
هسع جاى ناطي تشاكل بدون تقرأ يا مسنوح
| |
|
|
|
|
|
|
|
|
|
Re: من هم اولاد البندر في سودانيز اونلاين؟ (Re: محمد المرتضى حامد)
|
سعادة المستشار ود المرتضى مستشار الزمن الجميل
وقبل ان ينقلب المستشار الى منشار ينجر فى جسد الوطن وفى زمن السقوط المدوى لحضارة ام در فى أيدى التتار... وقضوا على الحضر والمدر والبندر وحط جراد الإنقاذ على سنابل البندر .. فتساقطت اوراقه كأوراق الخريف ... وبدأت هجرة عصافير الخريف... بل هروب العصافير... فقد هجم الرخم وبغاث الطير على جثة البندر... قد نقرأ نعيه فى العاشر من يناير القادم على صفحات وجوهنا... اليوم يخرج يودع البندر ابناءه ويرحل الى اودية الغربة ليرعى مع غنم ابليس... فلا خليل ولا جليس ... وابكى يا مغروم... فلن تجد مكانا تقدل فيه يا مولاى حافى حالق ... فقد اختفى الترام والإحترام من أزقة البندر ... لا حول و لا قوة إلا بالله وبالبندر...
اين شبابك يا بندر؟؟؟
شبابك تشابك كثير الزحام
أراهم وراهم غبار الحياة
وصديقنا ود شيقوق يسعى الى خلق بندر اسفيرى لا لون ولا طعم ولا رائحة للوطن فيه... بندر خال من الريفيرا ولسان طلعت والسبكى ومحطة مكى وقهوة الزيبق وابوالعباس والعشرة الكرام... رحل البندر مع وصول الأمويين الجدد ورعاة الشاة الى بندر الخرطوم ... جاؤوا من بيوت الجالوص وانتهى بهم الأمر الى قصور الروم فى كافورى والمنشية وجزيرة النخيل ...
اتذكر إذ لحافك جلد شاة *** وإذ نعلاك من جلد البعير
فسبحان الذى أعطاك ملكا *** وعلمك الجلوس على السرير
وتقول لى بندر يا شيقو؟؟
نورالدين منان
| |
|
|
|
|
|
|
|
|
|
Re: من هم اولاد البندر في سودانيز اونلاين؟ (Re: الطيب شيقوق)
|
عزو
شكرا على الفيديو بس ما شغال عندي
المرتضى
Quote: سبحان الله الطيب شيقوق زاتو ماشي أسغر بس ( بالَقلَبَه)،
أما حيدر فكما ترين ، سغير وجاهل ، أصلو ما بيكبر ، تقول قاعد في تيرمِس.
نعم ، ياهو دالي ، أجارك الله الأيام دي متبني تسريحه إسمها إنشتاين زي ما شايفه،
إنشتاين .. وماسك في أنا ما بقطف زهورك بعاين..
قبل فتره كان دايمن بيغني رائعة إبراهيم عوض (المصير) تلاقيهو في المحكمة يدندن:
تاني ما تقول انتهينا، |
الله يجازي محنك قلت حيدر تقول قاعد وين؟ هههههههههههههههها
صحيح يا اسماء المرتضى مش مصلع وانما هي الحلاقة العصرية التي يطلق عليها اصطلاحا القلف استايل
| |
|
|
|
|
|
|
|
|
|
Re: من هم اولاد البندر في سودانيز اونلاين؟ (Re: الطيب شيقوق)
|
منى بت خالي التوم
| Quote: المسنوح الموسم بتاع ام كمبش وستيب عليك امان الله املي ليها المخلايا تب |
هههههههههههها بالغتي عديل - والله انت استحقيتي عمودية الضهراب كوووولهم
فعلا موسم الستيب يا منى الميع متروس موية الستيب ورتابو مطبطب ثممممممح في الموية
بس بت اللمين ما بتعرف تشدو ليك في النار علا تجيبيهو ليها منجض ومستوى .
| |
|
|
|
|
|
|
|
|
|
Re: من هم اولاد البندر في سودانيز اونلاين؟ (Re: الطيب شيقوق)
|
اميرة السيد
بيتنا نور وكلو زينة
| Quote: أظن ده أحسن وصف لاولاد البندر.. عشان اولاد البندر ما بشوفو إلا الجدادة المشوية والجاهزة.. وما عندهم حيشان بيربو ا فيها الجداد الحي |
صحيح - والله اسماء بت عبد الحليم ما سبقها زول على الوصف دا - دي اتوبيا البندرية مش حناكيش مضغ كصب السكر والتسالي في بوابات الكلوزيوم
| |
|
|
|
|
|
|
|
|
|
Re: من هم اولاد البندر في سودانيز اونلاين؟ (Re: الطيب شيقوق)
|
| Quote: هي انا ما نسيت الطيب يعلم الله صغير وجاهل انامن ال vocabulary حقته كنت قايلاه من زمن Tannenbaum |
اتصلت فيني ام عبد الله قالت لي البنية الكتبت الكلام دى منى بنهرة كمان ؟
قلت ليها لا لا يا ام عبد الله ما تخافي دى اخت فولي كومتيد وفلي استابلشد.
لقيتيني كيف؟
| |
|
|
|
|
|
|
|
|
|
Re: من هم اولاد البندر في سودانيز اونلاين؟ (Re: الطيب شيقوق)
|
salam
ود شيقوق عمودية غيرك ما ليها طعم وان في زول عشمان فيها نحن نسوان الضهاري والله علا يسبقنا جري ناس عكاكيز ساي
اه انرجع لموضوع بت المين قلت لي مابتعرف شغاليتنا دي خلاص ان نجيب ليها عجور اصفر (ام ليبينه) ولا رايك شنو يا ود الخال
| |
|
|
|
|
|
|
|
|
 Re: من هم اولاد البندر في سودانيز اونلاين؟ (Re: mona altom)
|
| Quote: زمااان جدى بابكر المشرف الله يرحمو كان ما بياكل بسطرمه الا من محلات الخواجه بنايوتى فى المحطه الوسطى |
كدي النوقع لك الكلآم يا ود المشرّف،
اولاً بالتبادي، الصرمة دي بيلبسوها، ما بياكلوها،
وبعدين بيشتروها من دكان باتا، ما من بُكانك القلتو
ده، وعندنا في البلد بتمشي توقي كراعك لابكدوك،
بيواسي عليها وينجرلك قدرا بالضبط. بعدين هي
زاتا شِدة ما قوية، عندنا في البلد هناك البقرة
ما بتقدر تمدُغا...
| |
|
|
|
|
|
|
|
|
|
Re: من هم اولاد البندر في سودانيز اونلاين؟ (Re: معاوية المدير)
|
اولا الف سلامه للعمده ودشيقوق ..
وثالثا يا معاويه المدير ..
الباسطرمه بتاعت جدى خلها آ زول .. رايك شنو فى ( الشيفروليت ) بتاعت جد ابوى ؟!
من باتا برضو ؟!
ود شيقوق ده عندو نظره ثاقبه جدا خلتو يخلع علينا العموديه ..
والكلام ده ما ساى ..
وهو شرف لن يحوزه غيري فى هذا المكان رغم محاولات أمانى الامين المستميته ..
ورغم تكأكأك المريب على آثاري منقبا عن فطور .. فارجع - يا هداك الله - البصر فينا كرتين
ينقلب اليك باذخا وهو جميل
تحياتى يا معاويه
ولو ما تشابهت على البوستات الف مبروك الزواج .. وبالرفاء والبنين
| |
|
|
|
|
|
|
|
|
|
Re: من هم اولاد البندر في سودانيز اونلاين؟ (Re: محمد حيدر المشرف)
|
احد اهم واجباتنا الوظيفيه تصحيح المفاهيم الخاطئه والمتصوره عن المدنيين فى خيالات اولاد الريف حينما تداعبهم الامانى المرهقه قبل نومهم والى حين قيامهم المرهق من نوم لا نوم فيه من اثر البعوض والحشرات والضبان الصباحى الكبير واحلام البنات الفارهات ..
وليسمح لى اخى ودشيقوق ان اجزم أن الحناكيش طبقيا هم أعلى بكثير من مجرد شهاده عربيه, فى الواقع كونك شهاده عربيه يقدح كثيرا فى انتماءك لطبقة الحناكيش ..
والجدير بالذكر ان الحناكيش ليسوا بطبقه تتراتب بالمقدره الماليه.. فاغنى اغنياء السودان من اولاد الريف لن يستطيع ادخال اولاده فى زمرة الحناكيش يا هداكم الله .. فالحنكشه سلوك وتربيه وآداب وثقافه, وهذه اشياء لا تشتري ..
واحد ابوه سفير وامو سفيره وجدو سفير كما واحد الاصدقاء بالتأكيد حيطلع حنكوش بما لا يقارن ب ود ود فلان ولا ود ود الحته الفلانيه مما امتلأت بهم المدينه كراهة .. واحده بسيطه جدا جدها كان باشا ولا سير ولا موظف كبير فى الخدمه المدنيه وبيتو فى العمارات وابوها كان فى هندسه لمن امها كانت فى طب الخرطوم .. دى حنكوشه عن جداره واقتدار ولن تستطيع بت الملياردير الضهرابي فلان رئيس النادى الفلانى ان تبزها فى الحنكشه ابدا ..
ده براهو وده براهو يا ود شيقوق .. وبينهما برزخ لا يلتقيان .. ولا نتحدث عن ادعاءات الحضاره وانما عن الحضاره نفسها ان جاز التعبير ..
كان الناس فى المين روود فى التسعينات يميزون بسهوله بالغه بين الحناكيش والمتطفلين عليهم من ابناء الشهادات العربيه واغنياء الزمن الغلط ..
هذا ما لزمنا التنويه اليه
محمد المشرف
" عمدة المناطق المحرره ثقافيا فى البندر .. والمناطق غير المحرره ايضا |
| |
|
|
|
|
|
|
|
|
|
Re: من هم اولاد البندر في سودانيز اونلاين؟ (Re: محمد حيدر المشرف)
|
Quote: محمد المشرف
" عمدة المناطق المحرره ثقافيا فى البندر .. والمناطق غير المحرره ايضا |
|
ياعمدة
حتى في امدرمان يعتبرون اولاد امدرمان القديمة وتقسيمتها هم اولاد البندر
واما التوسعة التي حصلت بسبب السيول والمجاعات ديل مابحسبوهم مع اولاد البندر
رايك شنو ياعمدة ومثلها في الخرطوم وبحري
| |
|
|
|
|
|
|
|
|
|
Re: من هم اولاد البندر في سودانيز اونلاين؟ (Re: الطيب رحمه قريمان)
|
موضة الحنكشة (ناس حنكوشة ناس حنتوشة فاكين الشعور منفوشة) أظهرها جهابذة حلمنتيش فى مطلع سبعينات القرن الماضى (بالله بقينا فجأة من القرن الماضى) يا شيقوق وصارت الحنكشة موضة قديمة بعد ان غزا اوباش الأقاليم والضهارى البندر وضاقوا الآيسكريم واللكوم والكتوف اتلاحقت واستطاع حنكوش الضهارى ان يقلد الحنكوش الأصلى ويتفوق عليه خاصة وأن بعض حناكيش الضهارى استطاعوا ان يغزو البندر وينافسوا اهل مكة... وفى هذا يقول جاغوم:
وأحبها وتحبنى * ويحب شنطتها كتابى
وأطرحها وتجمعنى * وعشانها أترك صحابى
ونخلط بعضنا خلطا شديدا * فأنسى جوة جزمتها شرابى
حنكوش الضهارى يمكن ان ينسى بنطلونه وليس شرابه فقط...
حتى الراحل متوكل (إسكافى الجامعة) كان لا يرضى ان يناديه الطلبة بالنقلتى ويقول للبلومات انه إسكافى وليس نقلتى... ود البندر إسكافى وود الضهارى نقلتى وفى رواية اخرى صرماتى...
يا ربى نحن بقينا اولاد بندر بعد عشرين سنة مرمطة فى امريكا ام ان لعنة الضهارى مازالت تطاردنا...
كان صديقنا المتغوبش الخلوى يفتخر بأنه من اولاد الضهارى:
أنا المتغوبش القمصانو شاش
أنا الدرش العلم درشا دراش
انا الفلسان تملى وخالى كاش
انا الطالب الدخل للجامعة داش
والبلومات بحبن النوع الحمش دة لأنو كبكابة وجرسة...
خليناكم بعافية يا بنادرة..
نورالدين منان
| |
|
|
|
|
|
|
|
|
|
Re: من هم اولاد البندر في سودانيز اونلاين؟ (Re: محمد حيدر المشرف)
|
ود شيقوق حمد الله علي السلامه وماتشوف شر إنشاء الله ,,
العزيزه مني التوم,,
والله كلامك لذيذ بشكل, اتخيلت ليك منظر العكاكيز هههههه
| Quote: اه انرجع لموضوع بت المين قلت لي مابتعرف شغاليتنا دي خلاص ان نجيب ليها عجور اصفر (ام ليبينه) ولا رايك شنو يا ود الخال |
عايني, انتو الحاجات العايزين تجيبوها لي دي الزول بيعمل بيها شنو مثلا؟
يعني ديكور في البيت وللا بيستحمو بيها ولا بيستخدموها في شنو بالضبط؟
| |
|
|
|
|
|
|
|
|
 Re: من هم اولاد البندر في سودانيز اونلاين؟ (Re: Amany Elamin)
|
عمدة التحرير,,
Quote: ود شيقوق ده عندو نظره ثاقبه جدا خلتو يخلع علينا العموديه ..
والكلام ده ما ساى ..
وهو شرف لن يحوزه غيري فى هذا المكان رغم محاولات أمانى الامين المستميته .. |
ده كلام؟
عايز تشمّت فينا ناس الضهاري اَاَاَ ود المشرّف, (دايرهم) يقولو متشاكلين (فوق) العموديه؟
(حرّم) العموديه (هيلتك) (قطع شك),
| Quote: احد اهم واجباتنا الوظيفيه تصحيح المفاهيم الخاطئه والمتصوره عن المدنيين فى خيالات اولاد الريف |
حقيت اللسم يا العمده الأرباب,,
مداخلتك التانيه دي عجبتني (بالحيل)
أنا الزمن ده كلو قايله روحي (بت بندر) ساي,
(إلّا) بعد تصنيفتك الأخير ده طلعت كمان حنكوشه أبا عن جد لووووووووول
انت قايلنا العموديه دي أديناك ليها من هين؟
ما عشان تصنيفاتك الدقيقه دي,
| Quote: والجدير بالذكر ان الحناكيش ليسوا بطبقه تتراتب بالمقدره الماليه.. فاغنى اغنياء السودان من اولاد الريف لن يستطيع ادخال اولاده فى زمرة الحناكيش يا هداكم الله .. فالحنكشه سلوك وتربيه وآداب وثقافه, وهذه اشياء لا تشتري .. |
من أوّل البوست (فترت) أقول (لي) ود شيقوق, القصه ما قروش وراحات,
المعيار بنعرفو نحن ناس الخرطوم ديل برانا,
جيت يا عمده وقعتها ليهو (تب)*
* تعبت لووووول كلام ناس الضهاري ده عنيف بشكل
| |
|
|
|
|
|
|
|
|
|
Re: من هم اولاد البندر في سودانيز اونلاين؟ (Re: محمد حيدر المشرف)
|
بت التوم
| Quote: ود شيقوق عمودية غيرك ما ليها طعم وان في زول عشمان فيها نحن نسوان الضهاري والله علا يسبقنا جري ناس عكاكيز ساي |
هلا هلا هلا ود المشرف البنية عارفاكم ما ناس فزع طب - لكن ليك على بحاول اوريها انو ناس البندر ديل يدهم لاحقة تكنولوجيا مش سكاكينيا ولا عكازيا - الواحد بالرموت كنترول ساى بلحق العدو امات طه .
| |
|
|
|
|
|
|
|
|
|
Re: من هم اولاد البندر في سودانيز اونلاين؟ (Re: الطيب شيقوق)
|
| Quote: . فالولد الذكر وسط عشرة شقيقات ربما يكون حنكوشا فيما اذا انصب اهتمام شقيقاته العشرة لتدليله وتدليعه ولا يقدح في ذلك كونه من الضهاري او سهول البطانة او من البطاحين او الشكرية |
No يا ود شيقوق
فالحنكشة ما عندها علاقة بالدلع
الحنكوش هو ذلك الشاب الذي يفضل ان لا يركب المواصلات للمسافات القصيرة نسبيا ويفضل السير
وان كانت في حر السودان الفظيع داك، تحسبا لالتقاط احد الامراض المستعصية في زحمة الدفار او الباص
الحنكوش لا يشرب في السوق الا ما علته غطاء بقول (طق) عند فتحهيعني بيبسي او كولا
| |
|
|
|
|
|
|
|
|
|
Re: من هم اولاد البندر في سودانيز اونلاين؟ (Re: أحمد ابن عوف)
|
Quote:
اولا الف سلامه للعمده ودشيقوق ..
وثالثا يا معاويه المدير ..
الباسطرمه بتاعت جدى خلها آ زول .. رايك شنو فى ( الشيفروليت ) بتاعت جد ابوى ؟!
من باتا برضو ؟!
ود شيقوق ده عندو نظره ثاقبه جدا خلتو يخلع علينا العموديه ..
والكلام ده ما ساى ..
وهو شرف لن يحوزه غيري فى هذا المكان رغم محاولات أمانى الامين المستميته ..
ورغم تكأكأك المريب على آثاري منقبا عن فطور .. فارجع - يا هداك الله - البصر فينا كرتين
ينقلب اليك باذخا وهو جميل
تحياتى يا معاويه
ولو ما تشابهت على البوستات الف مبروك الزواج .. وبالرفاء والبنين |
العمدة ود العُمد ود المشرّف، سلآم.
ليك ولي زمآنك، ود شيقوق ده ما عمدة، الزول ده ود ملوك، وفي الحِسبة
ود اعماً لي.
البين قوسين دي قدُر ما وديت وجبتَ فيها ماعرفلها صايب!!! أفصح يا هداك الله.
لم تتشابه عليك البوستات، إنما تشابه عليك البقر. رفاء شنو، وبنين شنو؟؟؟
وطي ضوتك ما تسمعك أُم الوِليدات تجي خافسة فوقنا. العريس وكيل، وانا
مدير.
الحنكوش ربما تجرحه الورقة، والأغبش يلزمك تحفر ضهر إيدو عشان
تصل الجِلِد. ده برضو مِعيار...
| |
|
|
|
|
|
|
|
|
|
Re: من هم اولاد البندر في سودانيز اونلاين؟ (Re: الطيب شيقوق)
|
منان
Quote: أنا المتغوبش القمصانو شاش
أنا الدرش العلم درشا دراش
انا الفلسان تملى وخالى كاش
انا الطالب الدخل للجامعة داش |
هههههههههها والله بالغت فيها - يا اخي كتلني بضحكة
تعرف دكتور منصور يوسف العجب ممثلة دائرة الدندر في البرمان ايام ديموقراطية ابريل
والله يا سعادتك اصلو ما فارك للجرادة نار - كان بتحكّر وسط اولاد البندر في البرمان وبيحلف ليهم مليون طلاق ويروح يتغنى بالدندر قائلا :-
الدندر صعيد كعب البزمو ..لالوبا كثير نبقا تخمو ..كاعكولا كبير ينسى الجاهل امو..
| |
|
|
|
|
|
|
|
|
|
Re: من هم اولاد البندر في سودانيز اونلاين؟ (Re: الطيب شيقوق)
|
اماني
Quote: عايني, انتو الحاجات العايزين تجيبوها لي دي الزول بيعمل بيها شنو مثلا؟
يعني ديكور في البيت وللا بيستحمو بيها ولا بيستخدموها في شنو بالضبط؟ |
قولي ليها جيبي لي كعكول وعنكوليب ديل الحاجات السمحات عندنا وبيعملن نظافة للكلي
| |
|
|
|
|
|
|
|
|
|
Re: من هم اولاد البندر في سودانيز اونلاين؟ (Re: الطيب شيقوق)
|
ابن عوف
والله انت مسنوح مالك عايز تجرد الناس ديل من الكلام السمح
اماني
Quote: المعيار بنعرفو نحن ناس الخرطوم ديل برانا,
جيت يا عمده وقعتها ليهو (تب)* |
قوليهو لينا - نحن فتحنا البوست عشان نعرف المعايير دي يا مسنوحة
| Quote: * تعبت لووووول كلام ناس الضهاري ده عنيف بشكل |
ههههههههههها ضحكتيني يا بت البنادر واله مسنوووووحة نامن غلط
| |
|
|
|
|
|
|
|
|
 Re: من هم اولاد البندر في سودانيز اونلاين؟ (Re: الطيب شيقوق)
|
ياخ الغنية الفي الصفحة الرابعة دي شديدة شدة!
------------------
أي واحد كان بحشو ليهو جبنة مضفرة وزيتون في الابتدائي يرفع يدو
وأي زول جدو كان بوصلو المدرسة بالمرسدس يرفع يدو
قال خليفة بتاع الدكان كتب في الضلفة "علب تونة"! لووووووووول
شيقوق رجل حاقد، بوستيك لوري بيدفورد
| |
|
|
|
|
|
|
|
|
|
Re: من هم اولاد البندر في سودانيز اونلاين؟ (Re: الطيب شيقوق)
|
أمانى الامين ..
يا عزيزتى الفهم المغلوط للحنكشه يتنزل من ذاكره خياليه مضغوطه بالهزيمه المسبقه أمام هذه الطبقه .. أصحاب هذه الذاكره المهزومه يلجأون الى الخيال كمتسع يتنفسون فيه قليلا بحريه قبل اشتغال خيالاتهم ببناء خطوط دفاع وهميه ومصدات ذاتيه من ضغيان حضور وتفوق الآخر المختلف ثقافيا والخالى من البداوه وغلظة الطبع الانسانى ..
محمد المشرف
عمدة الخرطوم المحرره بإذن الله ..
| |
|
|
|
|
|
|
|
|
|
Re: من هم اولاد البندر في سودانيز اونلاين؟ (Re: محمد حيدر المشرف)
|
العمدة ود المشرف حبابك
بعض التصنيفات البندرية
1- شهادة ميلاد ( يا حبذا لو كانت مستخرجة من الدايات)
2- التعليم القبل المدرسي روضة ( ما خلوة)
3-الإحتفاء سنويا" بعيد الميلاد
أنا و صاحبي الكاشف(شيقا) قرينا في الخلوة ومن مواليد 1 يناير , و عيد ميلادنا بحتفل بيهو كل السودان( عيد الإستقلال)
يا عمدة لكم بندركم ولنا دندرنا.
| |
|
|
|
|
|
|
| |
الطيب شيقوق
حسن طه محمد
أحمد ابن عوف
محمد حيدر المشرف
Abdlaziz Eisa
mona altom
محمد الجيلى
وليد عبد اللطيف
محمد الشيخ أرباب
محمد عمر جبريل
Mannan
ابوبكر قسومة
Asma Abdel Halim
حيدر امين
عبدالفتاح أبوشيمة
محمد المرتضى حامد
معاوية المدير
الطيب رحمه قريمان
محمد يوسف الزين
عبدالمجيد المقابل
فيس بوك
تويتر
انستقرام
يوتيوب
بنتيريست