هيثم مصطفى .. عضوا في سودانيزاونلاين ..

Quote: ياخ المرة الفاتت في مباراة الهلال وهلال كادوقلي .. الرشيد بدوي عبيد قال بالحرف الواحد .. هيثم مصطفى (خلع) بشـة .. ودي مفردة براءة الاقتراع فيها لي عمر الفارووق

Quote: إنت جااادي كده !! إنتو رايحا ليكم بطولات وللا شنو

Quote: قلت لي باص يخلع دي براءة إختراع عمر الفاروق ؟؟؟؟!!! فلان خلع فلان بي باص وللا تمريرة دي مفردة عمر فاروقية وكمان الرشيد سارقها من سودانيز أونلاين وتحديدا من مشاركة عمر الفاروق

.. هي ما مشاركة بوست راسو عديل كدا .. تعرف لو ما الرشيد سرقه من عمر الفاروق دي تعتبر ورطة كبيرة بالنسبة ليك .. ولو سرقة من عمر الفاروق دي أورط ورطـة ممكن تدخل إنت فيها .. وإنت كزول موثقاتي بتاع فيديوهات مرة بالقزازة اللي هي القارورة .. ومرة بي قراءة الشفايف والترجمة الفورية .. مفترض طوالي تكلم شيبا وتفتشو لينا الفيدوهات بتاعت الباصات الطولية والعرضية حسب الاحداثيات وخطوط الكنتور داخل الميدان .. قالو الطلبة بتاعين المساحة بتاعين جامعة الخرطوم في السنة الأولى بقولو ليهم:
ادخلوا مباريات الهلال وشيلو معاكم نضارات المساحة تابعو بيها باصات هيثم مصطفى البينيه وجيبو الرفع المساحي من باصاتو لي سادومبا وخلعاتو لي بشــة..
ورطاتك الاتنين:
الأولى .. لو ما الرشيد سرقه من عمر الفاروق :
بمعنى قاطعه من راسو .. هنا تظهر عبقرية الشوف من زول محللاتي كالرشيد بدوي عبيد خلينا منك إنت وأرصد جلال وشيبا وانا القدامك دا كناس بنشجع ساااي كدا ... اتفاق الرشيد علي كلام عمر أو قول مثلا ما سرقه من عمر الفاروق .. تبقى دي هنا مسالة اتنين كان قالو ليك راسك مافيش فتشو .. وإنت عارفين إنو فعلا راسكم في .. والعجيبه إنكم قاعدين تفتشو فيهو في باصات هيثم ..
التانية: لو الرشيد سرقة من عمر الفاروق:
ودي الرواية الأرجح .. خلينا نتبلى على الرشيد ونقول سرقة .. تفتكر دي حاجة كعبه يعني الرشيد يدور ليهو مفردة (حساسة) زي دي ؟؟
بعدين إنت جادي إنو هيثم ما بيخلع ..؟

Quote: أتمنى من الجهاز الفني لفريق الهلال بعمل ساعة يومياً من الحصة التدريبية للتعود على باصات وتمريرات هيثم مصطفى سيدا .. إهدار الفرص ليس سببه تهور مهاجمي الهلال ..السبب بكل بساطة الخلعة البتصيب اللعيبة ديل من باصات هيثم .. هيثم بيخلع ...والله بيخلع .. باقي لي باصاتو ما باصات نوووو ..هيثم اظنو بيقول ليك ووووووه .. هيثم بيخلع المتفرج جوة الملعب.. بيخلع المشاهد في التلفزيون ..بيخلع المعلق..بيخلع المدرب..بيخلع اللاعب ..اذا اراد الهلال الإستمرار في البطولة عليه بتعويد اللاعبين على تمريرات هيثم .. يقول ليهم هيثم ده مكار اتوقعو منو اي شي .. ما تتخلعوا يا اولادي دي باصات عادية ما بتعضي..

.. هيثم مصطفى سبب المشاكل في الهلال
بالمناسبة:
ااكد ليك واجزم ليك إنو بعد كل باص لي هيثم .. اكان إنت واللا ارصد جلال .. واللا هارون دياب .. واللا عمر عثمان البوليص لو ما عملتو زي الحركة العمله ابراهومة دي والله ما تكونو مريخاب
طبعا ابراهومـة اتخلع كدا دا ..

خليك من الرشيد كدي عليك الله انا بديك نموذج باص كانت فيهو جتا(ص) بتعادل جيب تمام (س)3 + (م ن)8 وعايزك تجتهد وتجيب لي (ظل) اللاعب بقع وين لما يلقى الكورة قدامو مقشرة .. والقون منبطح والشبكة فاضية
ممكن تطلع (ظتـا) قطر الكورة من راس خط ستة .. شفت العلم دا كيف ..؟ قلنا ليكم المسالة رياضيات وحساب مثلثات ..

ملحوظة:
كان عايز تجيب لينا نموذج لي اي باص لي هيثم .. شوف ليك جدول لوغريثمات اعمل ليهو اتاشمنت في البوست دا معانا ناس خريجين فلسفة ونظرم ضعيف .. بشوفو هيثم دا العجب .

Quote: للأسف من يجاهر بتشجيع فريق أجنبي ضد فريق من وطنه لا يمكن أن نتوقع منه خير.

Quote: لا اظن حملة الغرض والمرض ستؤتى اكلها خصوصاً بعد حديث معتصم جعفر وبلعت قرار محمد سيد احمد ووقفة الشجعان من اولاد الهلال بمثل ماجاء فى هذا البوست.

صفرنا الدولي دا قيمتو الغذائية مرتفعة جدا على الاقل بيعمل للجماعة ريجيم كلما الهلال يدخل ليهوفي بطولة
الريجيم المقصود .. هو ريجيم طبيعي بعدم النوم والسهر المتواصل والدعاء في السر والعلانية بأن الصفاقصي يا الأهلي القاهري يعادل مع الهلال داخل أرضو .. ويطلع بي اقل خسارة ممكنة من جوه المقبرة .

Quote: عاين .. يا عباس .. أنا زول مريخابي .. يعني أنتمي للصفوة .. وكلمة صفوة دي ما جات من فراغ .. مقصودة بي أي معنى يخطر في بالك لكلمة صفوة وماهاأنزل للمستوى بتاع تعال شوفو داك قبضوهو سكران وللا داك قبضوهو في إنداية قلت ليك - لو فاهمني كويس يعني - سلوكيات أي زول خارج المستطيل ما بتهمني في أي حاجة لا من قريب ولا من بعيد ..يعني - سيدنا هيثم - ده لو قال الكلام إياه للعجب في أي حتة تانية والله ولا كان هببتو .. فبالله ما تحرف لينا البوست

Quote: والله يا محمد عمر يا صفوة .. ضيعتو عليكم فرصة كبيرة خلاص .. القزازة الشاتة هيثم دي لو درجة الحماس بتاعت المشجعين عالية في السودان .. حسع القزازة دي كان بتتباع في مزاد علني مع قميص ميسي أو قميص عامر أو (كــدارة) بيليه .. يا لوحة الموناليزا .. يا آخر كورة اتلعب بيها في ختام المونديال

Quote: كتير مع اسماعيل عثمان السيد وبصراحة هيثم علي درجة من التهذيب تفوق التصور ودا طبعا بالاضافة لكونه لاعب حريف وحريف جدا

Quote: من حيث رايحة لينا بطولات دي يا عمر واسعة شوية

Quote: خليك من الرشيد كدي عليك الله انا بديك نموذج باص كانت فيهو جتا(ص) بتعادل جيب تمام (س)3 + (م ن)8 وعايزك تجتهد وتجيب لي (ظل) اللاعب بقع وين لما يلقى الكورة قدامو مقشرة .. والقون منبطح والشبكة فاضية ممكن تطلع (ظتـا) قطر الكورة من راس خط ستة .. شفت العلم دا كيف ..؟ قلنا ليكم المسالة رياضيات وحساب مثلثات ..

Quote: والحاجة المهمة التانية أنا من أول مشاركة لي في البوست ده ما جبت سيرة فنيات هيثم واللي هي برغم اعترافي بيها لسة .. ما بتصل مرحلة عالمية ولا حتى على مستوى أفريقيتنا المسيكينة دي .. والدليل على كده تمريرات – سيدنا هيثم – الكنتورية دي ما جابت حقها ولا أكلت الهلال عيش حاف إلا مع ناس هلال كادوقلي وكتور جوبا والأرسنال شندي .. – سيدنا هيثم – ليهو 15 سنة بلعب لا خلى كاس أبطال لا بطولات عربية ولا حتى الكونفدرالية الما جايبا حقها دي ما عمل شئ .. ولا كانت تمريراتو البتخلّع ليها عمر الفاروق دي عندها أثر واضح وظاهر في مسيرة النادي .. وده كلام علمي بالمناسبة .. آي علمي .. يعني بعيد عن المهاترات الاعلامية المجانية .. – سيدنا هيثم – عندو موهبة .. عادية جدا .. بس الاعلام عمل ليهو فقاعة صابون كبيييييرة وشوية مناوشات مع الحكام ومع اللعيبة عشان يعمل لي نفسو كاريزمية القائد محبوب الجماهير والقلبو حار وبغير على الشعار .. و .. و .. و إلخ

دا بالاضافة لي الفيدوهات حقتك الجبتها .. لي شيبا .. وشيبا دا معروف لدى الموقع دا لمن كان بيكتب هنا دا .. ومعروف السبب الخارجو من المكان دا .. لانو لو كان قاعد لحدت الآن احتمال كان هيثم مصطفى سجل في الارسينال .. وكان الهلال شال ليهو كاس من كاساتكم الكتيرة الشلتوها دي ..

Quote: شفت النوع الزي ده انا طوالي عندي ليهو تصنيف جاهز..

يا علاء ما قصرت
كفيت ووفيت