الو الو منو معاي عاد اقول ليك شنو يا فاطمة ردحي معاك مريم طربمة فاطمة ردحي :- تهي تهي يا اختي شفتي بشة عمل فينا شنو مريم طرمبة :- بشة الله يجازيهو اول مرة اشوف لي قون بالتعشيكة الخلفية الراجل ضربنا شبال بالخلف فاطمة ردحي :- الشبال ساهل وينهضم كمان لكن حكاية صحبو كاريكا والباص بتاعو ده والولد الاسمو بشة جا من وين وسط غابة السيقان الحمراء دي وحشر ليك لرمزي طلعو ليك راكوبة مقدقدة اكثر من بتاع الاردن داك تهي تهي تهي مريم طرمبة :- عاد يا اختي ما صدقنا نسينا بسرعة واصلا متصلة عليك انو الهلال تصديقي اليوم لعب بتشكيلة جديدة وغلب الخرطوم 4/1 يعني الناس ديل برضو بنقابلهم يوم الثلاثاء فاطمة ردحي :- غايتو يا مريومة اختي انتي نظرية المريخ بمن حضر دي كانوا قاصدين بيها الهلال ولا شنو الناس ديل اي 11 فيهم يرشوا الجماعة من ثلاثة لفوق خدرونا اعلامنا السالب بأنصاف المواهب والجوع والفلس والله طلعنا نحنا انصاف المواهب ومفلسين وجعانيين احي يا الوالي دايرنك رئيس طوالي مريم طرمبة :- غايتو الله يسهلها يوم الثلاثاء الناس ديل لو دبلوها تبقى فضيحة مجلجلة ويروحوا فيها الجماعة كلهم حتى ابو الهول العاجبنا ده يمكن يروح في ذاتو يصبح في خطر فاطمة ردحي :- غايتو يا خيتي الله يكضب الشينة على قولة سنيتو ووووووب علينا من كاريكا المبكينا انتي تشكيلة الهلال يا مريومة كانت كيف قدام الخرطوم مريم طرمبة :- جمعة في حراسة المرمى واحتياطيهو الدعيع والمعز بره التشكيلة وكمان باري ديمبا وكاريكا ومهند وبشة الحلاق وخليفة الجاب الغضروف لموسى الزومة ديل تصديقي ما لاعبين وكمان سيف الهلال المسلول تم تبديله في الشوط الثاني ودخل صدام بديلا عنه وكمان برنس الكرة السودانية تم تغيره بالنعيم وبكري المدينة تم استبداله بنادر الطيب والله ما تحسي انو في تغير حصل يا ربي انتي مزمل ابو القاسم وقت قال المريخ بمن حضر كان قاصد الهلال باطنيا فاطمة ردحي :- اووووووووب علي طيارتنا من يوم الثلاثاء وما عارفه مزمل لو اتغلبنا المرة دي يتكلم في شنو يا مريم اختي في هتاف جمهور الهلال ضد راجي ولا في التحكيم الاشادو بيهو الجميع إلا مزمل استشاري التخدير السالب غايتو ما عارفه الزول ده حا يقول شنو وداعية الله ينصر المريخ عشان مزمز ده راسي ما يطلع اصغر من السمسمية مريم طرمبة :- يكتب شنو تاني بعد رد الفاتح النقر ليهو يا مزمل سيبك من الخرطوم انتا ليه ما بتهزم الهلال بنفسك وفلاحتك داير الخرطوم تهزموا ليك ولا رد محسن سيد قال فرق الممتاز دي كلها كوم والهلال كوم براهو زي ريال مدريد في كوم وناس اتلاتيك ومايوركا والبقية الباقية كوم اها دايراهو عاد يا فطمة ردحي يكتب شنو غير التحكيم والخرطوم فريق حمام قدام الهلال والبرمجة والانسحاب ومازمبي والاسماعيلي رايح جاي والله البقرأ ليهو يقول المريخ ده ما اتغلب 7 من الوحدات و 3 من زيسكو و3 صائمات من الترجي ورباعية من الصفاقسي في ام درمان ولا حكاية سيكافا واتراتكو ولا الجياشة يا اختي فضائح في اقل من 24 شهر بس فالح ليك ويخدر ويعمل غسيل مخ للجماعة بحكاية مازمبي والاسماعيلي والله الجمل ما شايف عوجة رقبتو المصدر
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة