|
Re: لست مناضلاً ولكنني ..... جزء من سيرتي الذاتية ( بالضرورة ) (Re: بخاري عثمان الامين)
|
Quote: قلت له بالله ولحقت المحاضرة مصير حلقة التلاوة فقد كانت اخر
محاضرة لي ... |
بالله دى بس مفروض تكتبها "بلااااااى؟؟" ههههه
أول مره أقرا البوست ده..
أها فى النقطة الوقفت فيها ، ومن شدة ال suspense ، والبكا والضحك وقراية خلف السطور، مشيت اتشاغل بى حاجات ما مهمة شديد، بس دايرة اديك وقت كفاية عشان تواصل وتكتب زيادة (ونحن نجى نلغف من المتعة)
ياخى انت ما مناضل كلو كلو ...
.انت( ولكننى )دى بس....مافى غيرها
| |
|
|
|
|
|
|
Re: لست مناضلاً ولكنني ..... جزء من سيرتي الذاتية ( بالضرورة ) (Re: مهيرة)
|
Quote: أها فى النقطة الوقفت فيها ، ومن شدة ال suspense ، والبكا والضحك وقراية خلف السطور، مشيت اتشاغل بى حاجات ما مهمة شديد، بس دايرة اديك وقت كفاية عشان تواصل وتكتب زيادة (ونحن نجى نلغف من المتعة)
ياخى انت ما مناضل كلو كلو ...
.انت( ولكننى )دى بس....مافى غيرها |
أنا رأسي بقي كبير وخائف بالجد الغرفة دي ما تشيله .. تماضر شخصياً كيف انت
وما هي اخبار عرائس النيل ..
ياخ كلموهم انا لست مناضلاً ولكنني ......
ساكتب بس الدنيا ذي خمست وكده ومفروض اعمل شتات لعوالم ما فيها تقرير ومدير
وأعود لك بعد ال WEEK END
ولد دا بالانجليزي كمان ... زمان بتكره الخميس لانه بتعقبه جمعة والمدارس مقفلة
وبيع الطعمية بدني .. والله يا ود بشرية أيامك
| |
|
|
|
|
|
|
Re: لست مناضلاً ولكنني ..... جزء من سيرتي الذاتية ( بالضرورة ) (Re: بخاري عثمان الامين)
|
ويك اند كامل يا ود بشرية؟؟
وتجى تلقاهم أرشفوك؟؟ غايتو الله فى، استمتع بويكندك.
Quote: وما هي اخبار عرائس النيل ..
ياخ كلموهم انا لست مناضلاً ولكنني ...... |
بكونوا عارفين
بس يا نميرى انت كيف ترخس!!
زى النكتة لو ما عارفها أقولها ليك
فى واحد تعبااان زمن نميرى وفى القهورة كان الراديو فاتح وهو طالب قهوة مرة ...الدعاية بتاعة "اسبرو اسبرو.."
قاليهو: ما سبرنا كتير يا نميرى بس انت كيف ترخس ؟؟(بتشديد الخاء وكسرها... كسرها بلا يخمها)
| |
|
|
|
|
|
|
Re: لست مناضلاً ولكنني ..... جزء من سيرتي الذاتية ( بالضرورة ) (Re: Tumadir)
|
Quote: 3. الاحتجاج الذي قمنا به ... |
كنا الدفعة رقم 2 لمعسكرات الطلاب بالدفاع الشعبي
وطبعاً المعسكر دا مقصود منه اعادة صياغة عديل فكل
الانشطة به عبارة عن بناء وتجنيد لصالح الجبهة الاسلامية
القومية وبالمناسبة في نهاية المعسكر يوقع كل طالب علي
تعهد كده بأن يعمل علي دعم وتمكين الحكومة وعدم التظاهر
ضدها .. الدفعة التي سبقتنا تظاهرت وخرجت من المعسكر ووصلوا
الخرطوم مشياً علي الارجل ولاحقاً تم معالجة أمرهم أما احتجاجنا
فقد كان بسبب سوء معاملة احد العساكر لاحد الطلاب ، تمردنا داخل
المعسكر وهتفنا ضد الجبهة الاسلامية وضد سياساتها وعلمنا بعد ان هدا
الوضع من احد العساكر بأن ضابط امرهم باطلاق الذخيرة الحية علينا
ولكنهم رفضوا الانصياع له والمعسكر دا فيه حاجة غريبة كانت فالضباط
من الشرطة والتعلمجية والعساكر من الجيش ( يا ريت جنابو عمر لو جاء شرح
لينا الحكمة كانت شنو من الهرمية دي ) ...
الدرس الذي استفدته من الاحتجاج ان سياسة الحكومة لاعادة الصياغة ليست مؤثراً
كثيرا وان برنامج ( الجبهة الديمقراطية ) أقرب الي وجدان الطلاب من برنامج
( الجبهة الاسلامية ) وتيقنت اننا سننازل سلطة شرسة في المحافظة علي مقاعدها
وما خاب ظني فيهم فقائمة شهداء الطلاب في التسعينيات خير دليل .. اللهم اسكن
شهدائنا عالي الجنان : بشير ، سليم ، طارق ، التاية ، محمد عبد السلام ..
| |
|
|
|
|
|
|
Re: لست مناضلاً ولكنني ..... جزء من سيرتي الذاتية ( بالضرورة ) (Re: محمد على حسن)
|
Quote: عبد اللطيف مالك قائم بنمرة اربعة ؟
اها ما فطيتك شوف لك زول تاني احرد له ..
ياخ معقول افطك .. والله بتكون سهواً ولك العتبي حتي ترضي |
كويس انها كانت سهوا ، كنت قايلها تعمد!
اصلو الشيوعيين علمونا نظرية المؤامرة( ربنا يجازيهم!!)
ـــــــــــــــــــــ
بعد دا ممكن اقول ليك :بوست ممتع !
وطرح افضل من خط الحزب كلوا!
| |
|
|
|
|
|
|
Re: لست مناضلاً ولكنني ..... جزء من سيرتي الذاتية ( بالضرورة ) (Re: عبداللطيف حسن علي)
|
خالد العبيد:
Quote: العام 86 / 87 كنت مدرسا في مدرسة الديم شرق "4" ومديري كان فقيدنا الغالي صلاح اسماعيل شفت انا محظوظ كيف يا ابو ساندرا |
مليون رحمة تتنزل على قبر الشاهق الراحل استاذنا صلاح إسماعيل
فعلآ أنت محظوظ يا ود العبيد ، فأستاذ صلاح مدرسة قائمة بذاتها بل مدارس انا ما حظيت بشرف التتلمذ على يديه في فصول الدراسة لكن رافقته عن قرب ايام كان مسئول عن دائرة الديم والعمارات و وكيلآ للأستاذ محمد إبراهيم نقد ، عملنا سنويآ ساعات طوال كادت أن تكون كل اليوم في بعض الأيام وتعلمت منه الكثير
| |
|
|
|
|
|
|
Re: لست مناضلاً ولكنني ..... جزء من سيرتي الذاتية ( بالضرورة ) (Re: بخاري عثمان الامين)
|
Quote: مليون رحمة تتنزل على قبر الشاهق الراحل استاذنا صلاح إسماعيل
فعلآ أنت محظوظ يا ود العبيد ، فأستاذ صلاح مدرسة قائمة بذاتها بل مدارس انا ما حظيت بشرف التتلمذ على يديه في فصول الدراسة لكن رافقته عن قرب ايام كان مسئول عن دائرة الديم والعمارات و وكيلآ للأستاذ محمد إبراهيم نقد ، عملنا سنويآ ساعات طوال كادت أن تكون كل اليوم في بعض الأيام وتعلمت منه الكثير |
الخال عبد الرحمن بركات ازيك ... وانا تتلمذت علي يد الراحل صلاح
ولي شرف كبير ان رباني الحزب الشيوعي السوداني فرع الديم وعلمني
معاني الشهامة والرجولة والنخوة والنضال بيان بالعمل من أجل شعبي
انا هنا اكتب سيرتي ولكن هي دون شك سيرة كثيرين و90% من الديامة مروا
بذات التجارب اتمني ان تفترع لنا خيطا للحديث عن شخصيات من الديم ..
كان المرحوم عماد الامين كثيرا ما يطلب ذلك وبقول لي انت يا بخاري تكتب
تحديدا عن مجانين في الديم لانك مفروض تكون منهم او قريب شديد لهم .. يلا نحدثهم
كمبال بنقس وقعر بابور وابراهيم توم وعزو وعبد الله العريس وفائز
| |
|
|
|
|
|
|
Re: لست مناضلاً ولكنني ..... جزء من سيرتي الذاتية ( بالضرورة ) (Re: محمد أبوالعزائم أبوالريش)
|
الحبيب بخاري قرأت ما كتبته في هذا البوست المميز، انت صديقي الذي ورثته عن اخي الاصغر (مرتضي) و غريب أن يرث احدنا اخيه الاصغر، نجلاء اختي الصغيرة و تلميذتي تعلمت منك الكثير في هذه الكتابة، تعلمت منك "أن الرواية العظيمة هي ليست اكثر من تجربة حياة" سنلتقي و نفكك مغاليق هذا الرمز المكتوب بالاحمر ! سنلتقي قبل ان يموت احدنا من اجل هذا الرمز
لا اريد اغراق البوست بذكريات و لكن يجب ان تسمح لي يا بخاري من باب الصداقة ان احكي هذه الحكاية
التقيت بخاري في يوم ما من عام 1996 في نهايته ربما ديسمبر و كنت في طريقي الي القضارف للمكوث مع امي لانجاز فترة حبسها بعد وفاة ابي في القضارف ، كنت وقتها معلما في الخرطوم القديمة الثانوية و كان بخاري خريجا يتهيب ظلامات الخدمة الوطنية و ارذالاتها و كان بخاري في حوجة ماسة لمكان يمضي فيه فترة الخدمة الوطنية بسلام ، كانت اسرتي حينها في القضارف و هي من النمط الذي لا تقف امامه العوائق الادارية مهما تكلف الامر من انقاذ!! او سلطة اخري . محبتي لبخاري جعلتني اقول له ان الحل لمشكلتك سيكون هناك في القضارف، انضم الينا( الهام و انا) في القضارف في ذلك الحين بخاري و نجلاء كصديقين . المهم التقينا هناك و كان الوقت خريفا و لسوء حظ بخاري فقد نزل بيننا ضيفا اواون الخرسان و كان قصف الرعود و بهرة البرق ، ما كان يخيف بخاري هو ليس المطر و لكن تلك القطية التي تم استئجارها علي عجل في بيت احد المعارف ، كان بخاري قلقا و كنت اكثر منه في القلق بفراسخ ، الهام و نجلاء تتآنسان مع امي اوان المطر و ليس عندهما خبر عن القلق ، قلت لبخاري سيضيء البرق عبر شقوق سقف القطية !! احتمينا بالمشروب من عسف الاحتمالات ثم ضحكنا الي ان عبرت العاصفة
اعجبتني هذه الكتابة يا بخاري فهي كتابة الحياة و اصدق الادب و اجمله هو القصة الحقيقية
لكم حبي و تقديري يا الحبيب ، الي لقاء
اخوك طه جعفر
| |
|
|
|
|
|
|
Re: لست مناضلاً ولكنني ..... جزء من سيرتي الذاتية ( بالضرورة ) (Re: بخاري عثمان الامين)
|
Quote: اعجبتني هذه الكتابة يا بخاري فهي كتابة الحياة و اصدق الادب و اجمله هو القصة الحقيقية |
طه جعفر الخليفة طه الريفي .. ضربت اهم القصص: القضارف
والله عارف .. عموما جاطت لك بعض التواريخ ( الكبر حصل )
عموما يا ناس المنبر ويا كل القراء هذا الرجل المدعو طه جعفر
والجميلة الهام عبد الخالق سيرد أسمهما كثيرا في قائمة الذين
ضخوا الدم في شرايين علاقتنا انا ونجلاء ..
بالمناسبة يا طه انا اول بوست كتبته في المنبر كان بعنوان : جعفر الخليفة طه الطود الاشم
وكنت اكتب باسم :
bukhary el amin
ساعود لك يا طه ...
| |
|
|
|
|
|
|
Re: لست مناضلاً ولكنني ..... جزء من سيرتي الذاتية ( بالضرورة ) (Re: بخاري عثمان الامين)
|
عن الجامعة :-
عدت من المعسكر يوم الخميس برفقة صديقي محسن قرافي الذي صار اليوم دكتور بيطري ..
ومحسن من أسرة دنقلاوية قطنت الخرطوم منذ زمن بعيد ولكن حبوبته لامه حاجة زينب لها
الرحمة والمغفرة لم تستطيع التحدث جيدا بالعربية وكانت تناديني ( بخاري تعالي أمشي جيبي )
بالمناسبة يا ابو ساندرا دي والدة الخال أحمد البدري بتاع السهم الذهبي ...
لنا مع حبوبة زينب طرفة جميل فقد كانت لها غنماية وانجبت هذه الغنماية سخلة وهذه السخلة قاتلها
الله كانت مزعجة جدا.. ولانها مربوطة في شباك الغرفة التي نراجع فيها دروسنا امتعضنا من وجود السخلة
وحزمنا امرنا وتوجهنا لحاجة زينب وخيرناها بيننا والسخلة فاختار السخلة دون تردد ولمن رجعنا البيت
بالمساء عشان ننوم لقيناها اي الحاجة اغلقت كل منافذ الدخول ولم تستجب لدق الباب الا بعد مسافة
شنو يا حاجة قفلتي ؟ انتو موش قلتو لي يا نحنا يا السلخة ، جيتو ليه ؟
| |
|
|
|
|
|
|
Re: لست مناضلاً ولكنني ..... جزء من سيرتي الذاتية ( بالضرورة ) (Re: بخاري عثمان الامين)
|
Quote: عدت من المعسكر يوم الخميس برفقة صديقي محسن قرافي الذي صار اليوم دكتور بيطري .. |
نمت الجمعة باكملها ولي خال ينتمي للجبهة الاسلامية ، جاء المنزل بعد صلاة الجمعة وكنت نائماً
انتظرني حتي صحتني حاجة فاطمة والتي ربتني واناديها يمة .. سألني الخال ما صحيت للصلاة ؟
قلت له انا تعبان جدا وشالتني نومة .. امتعض وقال لي : مفروض المعسكر يكون عودك تصحي تبدري
وتكون اتغيرت في حاجاتك .. استفسرته حاجاتي شنو ؟ رد يعني تكون مصر علي الصلوات الخمسة في المسجد
مثلاً..... أسقطت في يده لمن قلت له: المعسكر دا كشف لي سوء الجبهة الاسلامية خالص وعمق لي فكرتي بأن
الدولة العلمانية هي الحل .. وأنا هسه علي اتم الاستعدادا اصادم الحكومة لابعد درجة .. ولست مناضلاً ولكنني .......
| |
|
|
|
|
|
|
Re: لست مناضلاً ولكنني ..... جزء من سيرتي الذاتية ( بالضرورة ) (Re: بخاري عثمان الامين)
|
الله علي الحكي الطاعم يا بخاري، وزي كتيرين، متابع، أضحك وأبكي، واتمنى السرد ما يخلص ، من أول دخلة لي للعاصمة، واحنا ولاد أقاليم، حبيت المكان الاسمو الديم ده، عشقت ناسو وبيوتو وزقاقاتو وفسحاتو العجيبة، وبالاخص مجانينو، ودراويشو، بالله لازم تخلي الكلام عنهم مشروع كتابتك الجاية، وما تنسى تضيف للمجموعة الذكرتها أعلاه "حليمة العضاية". بالله جوابات عبد الله "كديس" أو العريس، دي براها ما مشروع رواية؟ ، واصل يا حبيب
| |
|
|
|
|
|
|
Re: لست مناضلاً ولكنني ..... جزء من سيرتي الذاتية ( بالضرورة ) (Re: بدري الياس)
|
يا بوخ ، يا إبن أخت كثف الحكاية بالشخصيات الباهرة التي عرفت كيف تصنع الحياة في مساحة ضيقة محدودة ولكنها ضاجة بالحياة وبالصخب ومتعتعة جمال تحدث عن إنتفضات ناس شارعكم عندما يحاول الأمن إصطياد ميرغني عطاالمنان تحدث عن يوم تشييعنا للشهيد علي فضل وكيف الزميلات إقتحمن المقابر شاركن ، وهتف علن ، هتفن علن تحدث عن المآتم والصدمة تعتري كل أحياء جنوب الخرطوم حزنآ على الضباط الميامين ، عصمت ميرغني طه ورفاقه
تحدث عن الجدران التي كم صبغناها بالأحمر الزاهي والشعارات المجيدة التي يستقبلها الديامة بفرح وبأمل
تحدث عن الديم ، وعن الحزب في الديم عن الرياضة وعن الفن وفرقة جاز الديم عن ترب بلاع وسينما النيلين وثنائي ديم القنا عن أرض الحيوان عن الرعد والنجوم والنجم الأحمر والكفاح والربيع والمجد والمؤتمر عن سهم العسيلات وسهم العمارات والبرنس والطليعة والدينمو والإتحاد والعاصفة والنصر والوطن والإستقلال والأمل فرق كان الشيوعيين قلبها النابض وأمكنة كانوا خميرة وعيها ولبنة صرحها
أحكي ياخ
| |
|
|
|
|
|
|
Re: لست مناضلاً ولكنني ..... جزء من سيرتي الذاتية ( بالضرورة ) (Re: أبو ساندرا)
|
Quote: تحدث عن إنتفضات ناس شارعكم عندما يحاول الأمن إصطياد ميرغني عطاالمنان |
ما كانوا بالجرأة تلك لاعتقال ميرغني بالنهار داهموا الحلة نهايات الليل ..
بس يا خال تلك الملحمة كانت تخص اعتقال جمال عبد الرحمن ..
انا في البيت جاني زول قال لي جمال ناس الامن بسألوا منه وقال لك تعال ليهو ، قابلت جمال في بيت
تاني وبالمناسبة للناس الما من الديم انا ممكن ادخل من اي باب من بيوت الديم واحوم جواها كلها بدون
ما افتح اي باب تاني بالذات مربع 3HE والحركة دي طبعا ميزة للديامة لاننا كلنا اسرة واحدة وبيت واحد
وبتاع الامن بجئ يحرسك قدام باب انت دخلت بيهو وبتكون من الغالي طلعت في حجازي ولا ديم القنا ..
عموما ( كلمة عموما دي البفكني منها شنو ؟ ) جمال قال بس محتاج لزمن لانه عايز يعرف رأي الحزب انه
يمشي مع الامن ولا ما يمشي ؟
سواصل ملحمة جمال ..
| |
|
|
|
|
|
|
Re: لست مناضلاً ولكنني ..... جزء من سيرتي الذاتية ( بالضرورة ) (Re: rani)
|
عارف يا بخاري.. بالجد شوقتني للونسة معاك.. كان دايماً يحدثني عنك هشام سيد احمد ورشاد.. كانو دايماً بيقولو لي " انت يا راني بس لمن تمشي السودان قابل بخاري ومجدي بحر.. وما بتزهج" طبعاً الكلام دا كان بيقولوه لانو كنت كل ما امشي السودان برجع زهجان وبقول ليهم السودان دا انا زهجت منو وما ماشيهو تاني، اقعد اربعة شهور اقوم اتشالق تاني واقطع لي تزكرة امشي السودان واجي زهجان كالعادة ، البرنامج دا مدور كده لمدة التلاتة سنين الفاتت دي.
المصيبة اليوم القابلتك فيهو كنت انا راجع كندا تان يوم منو، الكلام دا كان في حي النخيل، امدرمان بيت ناس عم سيد احمد الشيخ ، الله يرحمو. كنت راقدلك في عنقريباً، ويبدو انك مرهق شديد، " ربما، تفاصيل ما بعد الغروب" فقلت ما ازعجك. وخليتك.
يارتني كنت عارفك حكاي كدا.
المهم ياصديق.. اسعدني جداً.. اسلوبك الراقي في سرد تفاصيل كيف انك " ماك مناضل". واكتر بكتير تفاصيل تشابه بيع امي للخضار بسوق الندي، شرابي للبنقو في سن مبكرة والاقلاع عنه بنفس الطريقة، شغبي الشديد الذي لازال يتكلم عنه حي امتداد الدرجة التالتة، دخول المعسكر وكل التفاصيل التي ذكرت.
ياصديق.. نحن محتاجين نقعد نشبع روحنا من روح بعض.. او منك.
انا جاي السودان بعد اسبوعين.
تليفونك كان معاي، لكني ضيعتو.. رسلو لي بالماسنجر لو امكن. حقي تلقاهو في البروفايل.
سلم لي عليهم... نجلاء سيد احمد، ضياء الدين ، احلام ناصر، ميرغني عطاء المنان، مجدي بحر... وكل الناس الحالهم زين.
ودي راني السماني
| |
|
|
|
|
|
|
Re: لست مناضلاً ولكنني ..... جزء من سيرتي الذاتية ( بالضرورة ) (Re: rani)
|
Quote: فكرت ووجدتها وقلت له بنديك زمن يا فردة تلاتة اربعة ساعات |
مشيت لي بشرية قلت ليها سوقي اللول ( اللول كانت طفلة ) واغشي معاك نسوان الحلة كلهم
اي واحدة تسوق معاها اطفالها عايز اكبر كمية من الاطفال .. تمشوا تقعدوا في حصيرة عزة
أم جمال لانه بتاعين الأمن عايزين يسوقوه .. واول ما بتاع الامن يقرب علي الباب تصرخوا باعلي
صوت وفعلا بعد مدة قصيرة الحصيرة كانت عبارة سوق ام دفسو .. ضابط الامن عايز ينزل من عربيته
الكواريك بدت وشوية شوية اتحولت لهتافات ضد الجبهة الاسلامية والعار العار يا كيزان ويحيا نضال
الحزب الشيوعي السوداني وهكذا .. ولاحظنا استنجاد الضابط بقوة اخري ، في زول يا اخوانا بعتقلوها
بقوة فيها كم بوكس وكم عربية احتياطي مركزي هل تصدق ، عموما جمال قال ح يسلم نفسه وفي اللحظة دي
ضابط الامن كان بهدد عبر مكبر صوت : يا جمال لو ماسلمت نفسك انا حا اضرب بمبان والناس دي ح تتأذي !!
طلع جمال وحبيبته هدي بكت سكتتها رشاد ميرغني وبدأت رشاد بالزغاريد وانطلقت الزغاريد مسيرة العريس
جمال ،، عزة قالت له يا جمال اقيف عايز اقول حاجة وخطبت في الحشد : امشي عافية منك وراضية عليك
لا سرقت لا نهبت والناس الهنا ديل كنت بتخدمهم عشان كده مستعدين يموت لك .. ودوي من النساء هتاف
واحد : ارجل منهم ، ارجل منهم وجمال حكي لي ان الهتاف كان بصله لمسافة كم شارع ..
ولست مناضلاً ولكنني .......
| |
|
|
|
|
|
|
Re: لست مناضلاً ولكنني ..... جزء من سيرتي الذاتية ( بالضرورة ) (Re: بخاري عثمان الامين)
|
Quote: المصيبة اليوم القابلتك فيهو كنت انا راجع كندا تان يوم منو، الكلام دا كان في حي النخيل، امدرمان بيت ناس عم سيد احمد الشيخ ، الله يرحمو. كنت راقدلك في عنقريباً، ويبدو انك مرهق شديد، " ربما، تفاصيل ما بعد الغروب" فقلت ما ازعجك. وخليتك. |
عارف يا راني الشعب السوداني كله ما عدا الكيزان .. وما كل الكيزان لانه فيهم
ناس حالهم من حالنا ربنا ينورهم ويهديهم ، مع نهاية اليوم بنكون اشبه بالجثث
من التعب وكده الجري وراء المعايش ..
| |
|
|
|
|
|
|
Re: لست مناضلاً ولكنني ..... جزء من سيرتي الذاتية ( بالضرورة ) (Re: بخاري عثمان الامين)
|
Quote: ولكن بعد ان قلبتها يمنة ويسرة وحسبتها تمام قررت ان لا ادخل الجامعة
فقد كنت احد الشغيلة بالمنزل ودخلي يسير جزء من دولاب الاحتياجات اليومية
للبيت خصوصا انني الكبير وقلت نجتهد في الشباب الصغار مازن وندي واللول |
محمد عبد الله صديقي وقدوتي وافخر به جدا .. أقنعني بحاجتين :-
الاولي عدم التفكير في الاقلاع عن التمباك نهائياً لان هذه الفكرة تؤثر في الثقة بالنفس !!!
قلت له كيف ؟ رد انه التمباك من أقوي العادات للانسان وكل ما تحاول تقلع عنها بترجع لها تاني
وكده ممكن ثقتك في نفسك تهتز .. خلوني من دي وعموما سمعت كلامه ، اقنعني محمد بالذهاب للجامعة
وعمل المقابلة الاولي واحتمال الرسوم تكون معقولة .. ولكن اعتراضي كان ان الدراسة مع العمل صعبة
شوية ، اقنعني انه لم يكمل الجامعة وهو يعمل ومحمد كان معلم نقاشة خطير ..
مقابلة الجامعة :-
اواصل بعد حين
| |
|
|
|
|
|
|
Re: لست مناضلاً ولكنني ..... جزء من سيرتي الذاتية ( بالضرورة ) (Re: بخاري عثمان الامين)
|
انتظرت في صف المعاينة ودخلت بعد حين .. قابلت دكتورة
من بنات بدري لكنني لا اتذكر الاسم الاول الان .. لطيفة وفي
غاية الذوق .. نظرت الي ملفي والله ما شاء الله من الديم موش
مبروك الدخول للجامعة .. لو الله قسم لك تستمر عايز تخصص شنو ؟
اجبتها مباشرة : علوم سياسية .. سألتني ليه ؟ نظرت كتير كده ،وعموما
كنت شاعر ان دراسة العلوم السياسية ممتعة بالاضافة الي انني كنت اصبو
ان اصير لاحقاً السكرتير السياسي للحزب الشيوعي السوداني ! بعد الونسة
قتلتني بسؤال ( البعولك منو ؟ ) سكتت مسافة بالزمن قصيرة ولكن كثافة الذكريات
شريط قد يمر علي انسان غيري في ثواني : تذكرت أمي عائدة من سوق الديم والقفة تقيلة
عليها تظن انها ثرية وبالقفة ما لذ وطاب من لحوم ولكن تقلة القفة عائدة الي انها ملئية
بالكبكي والفول المدروش للطعمية ، تذكرت ادعيتها لي قبل بزوغ الشمس اصحي افرم الطعمية يا بوخ
بكرة تكبر تدخل لينا الجامعة وتبقي لي وزير .. تذكرت وتذكرت ولم اتمالك نفسي .. سألتني الدكتورة
معليش في شنو ؟ رميتها لها طوالي : نحن بنعول نفسنا بي نفسنا وبنبيع طعمية وفسيخ واذا مصاريف
الدراسة كتيرة أو أنت عايزة اثبات علي بيع الطعمية انسيني من الفيلم دا كلو وطلعت من مكتبها علي
الديم .. والعايز دمو يروق ديامه شارع السوق
| |
|
|
|
|
|
|
Re: لست مناضلاً ولكنني ..... جزء من سيرتي الذاتية ( بالضرورة ) (Re: بخاري عثمان الامين)
|
Quote: الدراسة كتيرة أو أنت عايزة اثبات علي بيع الطعمية انسيني من الفيلم دا كلو |
حددت اللجنة المكلفة مصاريف دراستي كطالب بجامعة الخرطوم
كلية الاقتصاد والدراسات الانسانية بمبلغ 2350 جنيه يعني أقل
من علبة برنجي هسه ... طبعا وقطع شك ما كان عندي مبلغ ذي دا
وحاولت أمي الدخول في ختة وفشلت ...
عموما عندما تبقي للتسجيل يوم واحد فاجاتني أمي بمبلغ خمسة جنيه كاملة
يا حليلها قالت لي سجل واشرب بارد في الكلية وخلي رأسك عالي ، سألته :
من أين لك هذا ؟ انا ببساطة ممكن افتح فيك بلاغ يا بشرية في نيابة الثراء الحرام !
رفضت الاجابة .. لبست وقعدتها معاه للقهوة عشان أطلع لاحظت غياب ( عديلة ) عن مكانها
الذي اعتادت ان تقف فيه وتنظر لي .. عملت مسح سريع بي نظري لبقية الزوايا امكن واقفة
في حتة تانية لم أجدها .. ختيت القهوة في الواطة ووقفت من البمبر وسألت أمي :-
عديلة وين ؟ تشاغلت عن سؤال .. مسكتها من يدها ، بشرية بسأل فيك عديلة وين ؟ لم تستطيع الكلام
العبرة كانت خانقاها ، حضنتي وقالت لي: فداك فداك يا وزيرنا ويا مديرنا ويا كبيرنا ...
سألت مشت لي منو ؟ ردت : الامين ...
سال سيل من السباب مني لامي وللجامعة وكلت هذا الامين بوافر اللعنات ، وكنت بقول لها : أمي العن ....
ضحكت قالت لي : ما ممكن كلمة أمي بعدها العن ........ بين دموعي قلت لها طيب يا بشرية العن ......
ما ماشي الجامعة ولا حاجة وحا امشي اجيبها من الامين واجئ ، قالت لي سفرها الجزيرة قبل شوية وقال
دي ما غنماية سوق دي مفروض تمشي تسقي اولادي .. وعديلة كنت اشعر بها حقيقة مثل اخت لنا ...
| |
|
|
|
|
|
|
Re: لست مناضلاً ولكنني ..... جزء من سيرتي الذاتية ( بالضرورة ) (Re: بخاري عثمان الامين)
|
كلما حاولت الكتابة عن فترة الجامعة تجيني المدة التي قضيتها
معكوسة ففي السنة الاخيرة قابلت ( زميل ) في السقما بكلية الاقتصاد
وتجاذبنا اطراف الحديث قال لي كلام لن انساه ابدا .. قال لي : انت يا باخ
ما عشت الحياة الطلابية كما يجب وقضيت الجامعة كلها عمل سياسي ، سألته الحياة
الطلابية قاصد بيها شنو ؟ لو اكاديميات انا تمام محقق درجات كويسة .. ولو قاصد
حب وخلط وونسة انا لمن بي هناك لانني تزوجت وانا طالب ببداية السنة الرابعة
ولست مناضلا ولكنني .........
ساعود لتفاصيل ما حدث بالجامعة ، وذي ما قالت لي بشرية يوم رجعنا انا وامين بشري
مدقوقين دق العيش ، انتو يا اولادي دخلتو الجامعة ولا دخلتو حرب الله يجازي الكيزان ..
| |
|
|
|
|
|
|
Re: لست مناضلاً ولكنني ..... جزء من سيرتي الذاتية ( بالضرورة ) (Re: بخاري عثمان الامين)
|
Quote: الاول ان الجبهة الديمقراطية تفرز بين اعضاءها |
كنت ومعي الزملاء الدهنون وغازي أعضاء لجنة الفرز النهائي ممثلين للجبهة الديمقراطية
والفرز كالعادة يتم بمباني الاتحاد أظن ان تلك كانت انتخابات 93 .. عدة احداث حصلت داخل
قاعة الفرز ، ساروي ما تسعفني به الذاكرة .. أما رأي زميلنا من تنظيم مؤتمر الطلاب المستلقين
فساعود له بعد نهاية الفرز .. وصلتنا ورقة صغيرة من الجبهة الديمقراطية والمسمي تحبباً ( ج د )
مكتوب بها :( ما ح نقدر نوصل لكم اي اكل ، الامن سيعتلقكم بمجرد خروجكم من دار الاتحاد) ..
زهجت جدا وقلت طيب الطريقة الوصل بيها الزميل الورقة دي موش كان ممكن الورقة تكون ساندوتش وبعد
الاعتقال اصلا عملهو لمنو موش لينا نحن ؟ مررت الورقة علي الدهنون وغازي .. طيب بعد ده ( الكنتة )
شنو ؟ والكنتة كلمة نتداولها وتعني الرأي شنو ؟
ساواصل
| |
|
|
|
|
|
|
Re: لست مناضلاً ولكنني ..... جزء من سيرتي الذاتية ( بالضرورة ) (Re: بخاري عثمان الامين)
|
Quote: والكنتة كلمة نتداولها وتعني الرأي شنو ؟
|
الجوع ما مشكلة اي اكل يدخل القاعة دي ان شاء الله بتاع الكيزان نشيل منه ..
بس قصة الاعتقال دي نحاول نتفادها وقد تأكد لي اننا لا محالة من الدار للسجن
همس احد الكوزات لمدير الجلسات وهو محمد خير فتح الرحمن ( ان شاء الله اكون كتبت
الاسم صاح ) قالت له : الشيوعيين ديل اصلو ما يطلعوا من هنا حيين ..
قررنا اننا لن نخرج من دار الاتحاد ليلا مهما كلف الامر يجب ان نقضي ليلتنا كلها داخل الدار
ومع التنظيمات السياسية الاخري ونطلع الشمس برة عشان الطلاب يشكلوا لينا حماية هذا من جانب
ومن جانب اخر نزيد عددنا ما امكن ولم يكن مسموحا بدخول الطلاب الا الذين يأتون مع الصناديق
وهكذا زاد عددنا بأن يقوم الزملاء بتسليم الصندوق والمكوث بالقاعة وان لم تخن الذاكرة كان
من بينهم زميل البورد علي عجب والذي كان يدرس حينهابكلية التربية ...
| |
|
|
|
|
|
|
Re: لست مناضلاً ولكنني ..... جزء من سيرتي الذاتية ( بالضرورة ) (Re: بخاري عثمان الامين)
|
Quote: الجوع ما مشكلة اي اكل يدخل القاعة دي ان شاء الله بتاع الكيزان نشيل منه .. |
ولم يخيب ظني دقائق قبل صلاة المغرب وجاء كيس عضة كبير لجماعة انصار السنة
وقام شيخهم بادياً باليمين بتوزيع الساندوتشات وكانت بتاعت كبده وطبعا عمرنا كله
في الجامعة ما اكلنا كبده .. كنا نجلس نحن ممثلي الجبهة الديمقراطية جمب انصار
السنة بس علي يسارهم .. دهمتني المفاجاة عندما وصل الينا شاح ( بسندوتشاته ) بعيدا
طوالي ( قلعت ) الكيس واديت الشباب ساندوتشات ، سألته : ليه كده يا شيخنا نحن موش طلبة
معاكم ؟ رد لي بس انتو شيوعيين وما بتصلوا .. قلت له نحن ذاتنا ما شيوعيين جبهة ديمقراطية ساي
وحقيقي لم يكن لا الدهنون ولا غازي اعضاء في الحزب الشيوعي ..
| |
|
|
|
|
|
|
Re: لست مناضلاً ولكنني ..... جزء من سيرتي الذاتية ( بالضرورة ) (Re: بخاري عثمان الامين)
|
واستطعنا جرجرت الزمن وطلعت النتيجة الصباح حوالي ستة ونص
بفوز الاتجاه الاسلامي بفوز ساحق رفضنا التوقيع عليها ضحك محمد خير فتح الرحمن
وقال لينا عندكم واحد منكم هنا ح يوقع وفعلا في واحد مننا وقع عليها ( خ ) ..
طلعنا الشارع تقدمنا خطوات فتحرك بوكس خلفنا في تلك اللحظة وقفت عربة مرسيدس
بجانبي ظننت انها تابعة لجهاز الامن ولكن ركب فيها احد قيادات الطلاب المحايدين
طبعا لم افكر لحظة طوالي وجدوني معهم بداخل العربة سألني الشخص الذي يقود العربة
ماشي وين يا ابو الشباب ؟ قلت له اي حتة خلاف مباني جهاز الامن ... صديقنا من مؤتمر
الطلاب المستقلين افتكر ان العربة ارسلت لي شخصياً لان بقية زملاء ج د لم يركبوا بها
فظن ان ج د تفرق بين عضويتها ان شاء الله يكون عرف ان القصة تصرف ومخارجة مني فانا
اكره ان يتم اعتقالي او تعذيبي ...
| |
|
|
|
|
|
|
Re: لست مناضلاً ولكنني ..... جزء من سيرتي الذاتية ( بالضرورة ) (Re: فيصل محمد خليل)
|
Quote: يا بخاري تضحك سنيناتك زي ما بقول محسن خالد .. لكين التحت دي بالغت فيها عديل:-
Quote: يعني انا رضعتو من شطر باعوضة عشان تجيني ملاريا ما كان في داعي لحقنتك دي ...
سردك ممتع عن جد,, ليه تذكرت الكاتب المغربي محمد شكري وأنا أقرأ هذه السيرة الذاتية لك؟
تحياتي للأسرة |
حسن الجزولي بعيداً عن الصداقة انت مشهود لك بأنك كاتب ... وانت بهذا الحديث
تضع قلادة شرف افخر بها ...
ربما جمعني معي كاتب الخبز الحافي الفقر في كلا الحالتين ولكنه عاش ظروف اسوء مني ...
شكر يا حبيب وتحياتك وصلت لنجلاء والشباب
| |
|
|
|
|
|
|
Re: لست مناضلاً ولكنني ..... جزء من سيرتي الذاتية ( بالضرورة ) (Re: أحمد ابن عوف)
|
Quote: متابعين يا حبيب
محطات كثيرة بحكم الجيل والسن الواحد توقفت معك بها القطينة الجامعة انتخابات 93 المبيت بدار الاتحاد حينما كان ابليس يعبث باصواتنا المراقبة (كنت في لجنة علوم) المحايد ابو بنز (هم اتنين بالمناسبة هندهم بنزات) وبعرفهم الاتنين
واحد محايد، وليحمدوا ربهم اننا الآن لسنا مناضلين |
يا دفعة ياخ خش لي جوه واحكي معاي ...
| |
|
|
|
|
|
|
Re: لست مناضلاً ولكنني ..... جزء من سيرتي الذاتية ( بالضرورة ) (Re: امير مصطفى احمد)
|
Quote: بخاري قطعت قلبي ربنا خلقك علشان تخلص |
والله وشرف سيدنا محمد لو فهمتك يا محب الحس المكوة حارة ....
عموما مكتوب في شهادة ميلادي :-
أسم المولود : بخاري أسم الوالد : عثمان الامين جامد أسم الوالدة : بشرية عباس عبد الرحمن الديانة : مسلم
Quote: ربنا خلقك علشان تخلص |
تخلص : تكون وفي
تخلص : تنتهي من عمل ما .
تخلص : تلحق امات طه ...
أختر الاجابة الصحيحة واذا كانت الاولي فانا ابذل مجهود خارق لاجلها
واذا كانت التانية البوست وتعني بها البوست فممكن تجلي الموضوع برمته وشوف لك بوست آخر ..
واذا كانت التالتة فكل ابن ادم يوما ما علي الة حدباء محمول ...
وبرضو لك ودي
| |
|
|
|
|
|
|
Re: لست مناضلاً ولكنني ..... جزء من سيرتي الذاتية ( بالضرورة ) (Re: زينب بدر الدين)
|
Quote: باخ ماعايز اهاجمك لانك مثل ملايين السوادنه مسلم ولكن الشريعه ماعاجبه التقول الشريعه كعبه انت محمد دا مش نبي الاسلام ومؤسسه? ياخ الانقاذ ارحم وعلي الاقل مستغلين الدين ويعني لو طبقوا الاسلام الصحيح كانت مرقتك منه.. طالما السوداني مقتنع بان الاسلام سمح وزين لن تقوم دوله علمانيه .. وصدقني انا اكن لك محبه ويسوع مخلصك الوحيد ..انا بس دغري |
محب يا عسل ساعود لك مطولاً ...
| |
|
|
|
|
|
|
Re: لست مناضلاً ولكنني ..... جزء من سيرتي الذاتية ( بالضرورة ) (Re: عاطف اسماعيل)
|
Quote: أشهد أنك مبدع ومناضل وإبن مناضلة فخرا لكل من يعرفها ناهيك عن من ينتمى لها لم أبكى كما بكيت لكتابة كما بكيت فى إعتقال جمال.. وفى معاينة الجامعة ضحكت وأنا أتذكر تقديم البعض لى بالمناضلة أين نحن منك يا إبن بشرية أصبحت أحتاج لتعريف واضح لكلمة مناضل التى تجمعك ب يالها من سيرة حياة وسيرة نضال وسيرة أم |
ويا لك من امراة يا ام ولاء اول انثي تتقلد منصب رئيس اتحاد
اعرق جامعة سودانية ( جامعة الخرطوم ) ..
جمال زهرة شباب الديم يحس باوجاع اهله ومشاكلهم ،
احاول انتقاء اجمل الكلمات للرد عليك ولكنني للاسف لم املك ناصية لغة الضاد
لكن اوعدك لمن اقابلك احكي كتير عن جمال عبد الرحمن ..
تحياتي للولد والبنية
| |
|
|
|
|
|
|
Re: لست مناضلاً ولكنني ..... جزء من سيرتي الذاتية ( بالضرورة ) (Re: محمد مكى محمد)
|
Quote: ومتوقع تفاصيل عن عملك فى البنيان !!!
|
عاطف في الاول مرحب بك في وطن من لا وطن له وبوصيك هنا عاين فقط للنصف الممتلي من الكوب ( معليش الهمزة قلعتها كلارا )
تخرجت من قسم العلوم السياسية بجامعة هي الافضل وكان عددنا بسيط جدا مثل اصابع اليد وظنت ان من حقي ان اكون موظفاً بحكومة جمهورية السودان
التي احفظ نشيد علمها ( نحن جند الله .. جند الوطن ) والتي يتلصق جنسي بها متي سألت : جنسيتك فارد فخوراً : سوداني
فتقدمت لثلاثة معاينات الاولي لبنك وقفلت الامتحان وقفلت تعني احرزت الدرجة الكاملة .. وذهبت للجنة القبول وقالوا لي عايزين فقط خرجيين تربية قلت لهم انا
ممكن ادرس ما عندي مشكلة ( وممكن اجيب شهادة خبرة ) ما بين القوسين لك انت يا عاطف وليس للجنة فشهادة الخبرة هي في تدريس كورس المرشحين للحزب ..
لكنهم رفضوا .. والثالثة كانت لوزارة الخارجية وقابلني كوز من الجامعة قال لي : دي بالغت فيها معقولة شيوعي يشتغل في الخارجية ...
عموما لم يتصل بي البنك .. ووزراة الخارجية كنت انتظر منها فقط الاعتذار كي احكي به لابنائي ولكنهم فتحوا لي ...
حا اديها قفزة كده من تاريخي عشان اجيك لتجربة البنيان :
اسوء احساس في الدنيا تكون متزوج وعاطل .. كنت انوم قليلا رغم انني في الديم بين احبابي واصدقائي .. صحيت بدري جدا وقلت الليلة شغال شغال مهما كانت طبيعة الشغل
| |
|
|
|
|
|
|
Re: لست مناضلاً ولكنني ..... جزء من سيرتي الذاتية ( بالضرورة ) (Re: بخاري عثمان الامين)
|
Quote: يا سلام يا باخ مناضل وستين مناضل ولسه معاك 90 فى الميه من شعب السودان. فى بلد الواحد يعيش فيها يوم جديد ده فى حد زاتو نضال. لاتحتاج الذهاب إلى كوبر أو شالا . أنت داخل سجن كبير فى أى بقعه فيه. واصل ياخ وسلم على نجلاء والشباب فى أمدرمان. |
ياخ انت وين لبته كده مالك تعال تلقانا نحن يانا نحن
وتحياتك وصلت لنجلاء وام در كلها .. وانا ام درمان
| |
|
|
|
|
|
|
Re: لست مناضلاً ولكنني ..... جزء من سيرتي الذاتية ( بالضرورة ) (Re: بخاري عثمان الامين)
|
Quote: الاول ان الجبهة الديمقراطية تفرز بين اعضاءها
والثاني انني بخاري واحد ج ب ا ن جدا فمن اين وصل الي هذا ؟ |
وما جعل صديقنا ( مؤتمر طلاب مستقلين يوقن بانني ج ب ا ن )
عندما اعلن ان البشير سيزور الجامعة .. اجتمعت التنظيمات السياسية
ومن ضمنها ج د ( الجبهة الديمقراطية ) اها سا شباب عمكم البشير دا
قرر يجينا الجامعة ! مؤتمر الطلاب المستقلين قال : يدخلها مشياً علي ( جثثنا )
لابد ان نتصدي له عند البوابة وما يدخل الجامعة خالص .. وكان رأي انا علي النقيض
البشير يدخل الجامعة ونستفيد من زيارته اعلامياً .. لقاء البشير ح يكون في الميدان
الشرقي نقوم نحشد كل الطلاب في علوم والميدان الشرقي ما ح يكون فاضي لانهم ح يجيبوا
كوادرهم من جامعات تانية لذا نجهز شعاراتنا بحيث يصل هتافنا لاعلي من صوت المايك بتاع
البشير وكل الاعلاميين الجايين للقاء البشير ح يندهشوا ان هنالك اكثر من خمسة الف طالب
متواجدين بغير مكان اللقاء هم طلاب جامعة الخرطوم الحقيقيين والطلاب الديكور بالاضافة لطلاب
الاتجاه الاسلامي بالجامعة اقلاها يعرفوا حجمهم الطبيعي .. زميلي بمؤتمر الطلاب المستقلين قال لي
انت اصلا ما زول مواجهات و ج ب ا ن قلت له معليش المعارضة ( تاكتيك ) يا فردة .. وجاء القائد
المفدي والرئيس الاعلي عمر حسن احمد البشير وفشل اللقاء بهتافنا المتواصل وحدثت ربكة والبوليس
فك البمبان وقعت واحد من البمبان جمب الرئيس وعمل شتات ... بالمناسبة في صحفي سأل اذا كان
الطلاب مع ثورة الانقاذ طيب البهتفوا ديل منو ؟
| |
|
|
|
|
|
|
Re: لست مناضلاً ولكنني ..... جزء من سيرتي الذاتية ( بالضرورة ) (Re: بخاري عثمان الامين)
|
Quote: من أول دخلة لي للعاصمة، واحنا ولاد أقاليم، حبيت المكان الاسمو الديم ده، عشقت ناسو وبيوتو وزقاقاتو وفسحاتو العجيبة، وبالاخص مجانينو، ودراويشو،
|
بدري اليأس معليش للتأخير يا فردة
ناس الديم بتحبو والله بتحبو يا بدري ...
الديم مقسم مربعات وكل مربع فيه فسحة في نص المربع
وكل كم مربع فيهم ميدان كبير لكن هسه اختلف الامر ومكان الميدان
في كميات بتاعت اسمنت اتخت وكانت المتنزهات والفسحات دي رئات للناس
لانه مساحة البيوت ضيقة جدا 200 متر مربع للبيت ..
عموما ربنا يرد غربتك وتجئ تشتري بيت في الديم
| |
|
|
|
|
|
|
Re: لست مناضلاً ولكنني ..... جزء من سيرتي الذاتية ( بالضرورة ) (Re: محمد أبوالعزائم أبوالريش)
|
ناس الديم بتحبو والله بتحبو
تعرف يا بخاري اول مرة اجي الخرطوم من عطبرة مشيت الديم من محطة السكة حديد الخرطوم للديم مباشرة بيت جدي احمد ادريس بركية يمكن سنة 74 م ، ومن ما اذكرة ان اليوم داك كان اول مرة في حياتي اشوف تلفزيون، اول حاجة عملتها مشيت خلف التلفزيون عشان اشوف الزول القاعد بيتكلم وراء الصندوق دة ، لانة لم يخطر ببالي وقتها سوي ان الشخص مندسي خلف الصندوق وبيتكلم تحياتي
| |
|
|
|
|
|
|
|