|
|
|
 Re: هونوو شوية.... وصلو علي النبي .... إستراحة أيها المحاربون (Re: خالد علي محجوب المنسي)
|
قال الشاعر كدكي وهو يصور قصة أسرة هاجر أبنهم الوحيد للبندر ( بلد الترك ) كما كان يحلو لأهلنا الشايقية تسمية الخرتوم... وإنقطع خبره لا جواب لا قريشات برسلن ... قال فيه
زولّن يضرب بوبو المثل
من الله خلقّو
قام مع سلوكتو ماضاق السفر
طول عمرو في برود يزح
ويقعد يداير في البقر
زمن السقط
يعملهن كر من فلق وروبه وشدر
لكن وليد
كان زمان تعبان عليهو
يقري في
وإيديهو ليهو بلا المطر
دقش المدينة واشتغل
دي أُربع سنين وفوقن شهر
راقد قفا وقاطعْ الخبر
من عندو قلالة آب تصل
خلا أمو قالبي مالّي
تسوي جولّو رهيف
دحين داير القفر
هنا حُمد أحمد
فكرو بي الحيل إنشغل
مرات يقول لها آ وليِّ
أصبري ماخاب من صبر
ومرات يقول لها
إمكن راقد موجعو شي
كان وِردّي ولا وجع ضهر
مرات يقول لها إبقّى راح
بارّى الهواليق والسهر
صُح غايتو
قلبي علي جناي
وقلب جنايا علي حجر
ونواصل مع الكدكي بإذن الله
| |
 
|
|
|
|
|
|
|
 Re: هونوو شوية.... وصلو علي النبي .... إستراحة أيها المحاربون (Re: خالد علي محجوب المنسي)
|
بسم الله الرحمن الرحيم
سلام ياهلنا...
مسدار ستيت
...........
عبدالله أحمدأبوسن
.................
من ستيت نويت عابيلي خترة
فوق ظهر البشاري الدومتو تترى
يسلفق في الخبيب ما جابلو عترة
جلوس ام خد هناك كل ساعة بطرى
...
مسكتو الدرب ونشتو وقفي شارد
تقول كلبا سلوق لي صيدتو طارد
بعنف الكور صحيح ما نقي بارد
مشيرع البير صباح إدلى وارد
...
شرب مايا قليل بسراع جبدتو
كربلو المحقبة وشديت غردتو
عدل ركبي المعاي بي الدرب زردتو
طريت اللي الجمال بالحيل نقدتو
.....................................
ونواصل
.
.
تحياتي...
حاتم هاشم.
| |
|
|
|
|
|
|
|
|
|
Re: هونوو شوية.... وصلو علي النبي .... إستراحة أيها المحاربون (Re: حاتم هاشم)
|
نواصل مع الكدكي
ومن ميسو داك لفّه علي كريمي
وخشا تووش ركب القطر
لابسلّو مركوباً نصيح
وحاقب لو شنطة اللّت صفيح
لملم هدومّو من الحبل
شكّاها فيها كُسر كُسر
وسدّاها بي فقشة جريدتّن يابسي
عارضه زي كُشر
وقالك كدي أتحكر قعد
حكيرة جد
وجرا من حرفو المتمّر
زين كمان قلّم فطر
وقطرو دا يسوي توت توت توت
كو نتر
وكشح ألمي تب ماخلا جر
وانفكا إجري جري الرماد
في القضيب يشكي العجل
عود السلك دا يسوي زن زن
الدغفلي وقلبي انقطع
الدغفلي وقلبي انقطع
الدغفلي وقلبي انقطع
وكان لي العجاج إعمي البصر
| |
|
|
|
|
|
|
|
|
|
Re: هونوو شوية.... وصلو علي النبي .... إستراحة أيها المحاربون (Re: خالد علي محجوب المنسي)
|
بسم الله الرحمن الرحيم
سلام ياهلنا...
ونوصل
مسدار ستيت
................
قبل أوشام قطع سيتيت مجري
غشيت ود الحسن شيخنا البقري
قت يا خوجلي أبو الجاز وبري
توصلني أم شليخ تبرد لي حري
....
ترى أم دالات قطعها التيس وغرب
تقول ديك هضلما بالخيل مسرب
طريت الصاغ سليم ماه المكرب
متل هسع بخاف كبريتو عرب
....
غشيت أولاد نمر بدي التحية
فتق لو الشد هناك ساعة شوية
حسارات أم قبيل زادن علي
فلانة الفي البنات سلكة وصبية
....
فوق الدرب لبس توبي المعشرن
زملنا مخنقات كل حين يدشرن
رقادكن يا جمال عن زولي أبشرن
وجيها منطرح ماهو المكشرن
.........................................
ونواصل
.
.
تحياتي...
حاتم هاشم.
| |
|
|
|
|
|
|
|
|
|
Re: هونوو شوية.... وصلو علي النبي .... إستراحة أيها المحاربون (Re: خالد علي محجوب المنسي)
|
الألآف دَرجِن وَلدّن نجيض ماك ني
البجرجر في ام صقير وحدي
غني وشكريهو الليلة آبنية
تمساح الضهاري الضارب الليّه
سمعْ ننا خبرن في الهلالية
خمشطاشر جاد سكّن تسُعْمية
من قومة الجهل مابخُوفوك بي أُخْ
تور بقرّن جواميسن رقابن لُخْ
نقرو لو ام هُبك البربخانه يبوخ
قرنك بِفتح الهامة وبجيب المُخْ
مابحركّو الكشكيش
القلب إن ثبت مابنفع الحِريش
الجِنيات وراك في الحلّه آفة عيش
ودالمك راجلّن بِعزم علي المافيش
أنا قولي ليكا صحيح
ياركاب علي الشُلق بنات الريح
الجدري النزيلة الدم كَرف في القِيح
إدريس صاقعة التلب المقابل السيح
| |
|
|
|
|
|
|
|
|
|
Re: هونوو شوية.... وصلو علي النبي .... إستراحة أيها المحاربون (Re: خالد علي محجوب المنسي)
|
الألآف دَرجِن وَلدّن نجيض ماك ني
البجرجر في ام صقير وحدي
غني وشكريهو الليلة آبنية
تمساح الضهاري الضارب الليّه
سمعْ ننا خبرن في الهلالية
خمشطاشر جاد سكّن تسُعْمية
من قومة الجهل مابخُوفوك بي أُخْ
تور بقرّن جواميسن رقابن لُخْ
نقرو لو ام هُبك البربخانه يبوخ
قرنك بِفتح الهامة وبجيب المُخْ
مابحركّو الكشكيش
القلب إن ثبت مابنفع الحِريش
الجِنيات وراك في الحلّه آفة عيش
ودالمك راجلّن بِعزم علي المافيش
أنا قولي ليكا صحيح
ياركاب علي الشُلق بنات الريح
الجدري النزيلة الدم كَرف في القِيح
إدريس صاقعة التلب المقابل السيح
| Quote: البجرجر في ام صقير وحدي |
القصيدة طبعاً في مدح وشُكر الشيخ الأدريس ودالأرباب .. كان رجل بي كل ماتحمل كلمة الرجولة في الكرم والجود والفروسية والسماحة والحكمة
يغشى الوغى الفرسان كرا وفر وقد رمز لها الشاعر ( ام صقير وحدي ) اي الساحة التي يكثر فيها الجدي والصقور لتجد قوتها من جثث الموتى
كان إجرجر بين صفوف الفرسان وعلى مهل دون خوف عاد دي مي الرجالة ذاتها في الحروب والكل على عجل الفارس والجبان هم على عجل وهو إجرجر وإتبختّر بين صفوفها
| Quote: تمساح الضهاري الضارب الليّه |
التمساح عادة ما يظهر بالليل لكن التمساح العشاري المنشر وحارس جزايرو يعرف بي تمساح الضهاري أي بظهر في الضهر وفي الليل وكمان ضارب الليّه وهي مكان عميق من البحر
| Quote: من قومة الجهل مابخُوفوك بي أُخْ |
عادة أهلنا الجاهل بخوفو واقول لو أُخ عشان إخاف ... من ماقام صغير مافي زول خوفّو بي أُخ
| Quote: نقرو لو ام هُبك البربخانه يبوخ |
ام هبك هي النحاس في الحرب وفي اليوم داك النحاس ضربتو بكون ليها بوخ
| Quote: قرنك بِفتح الهامة وبجيب المُخْ |
الهامة هي منطقة في رأس الإنسان في الوسط بالضبط
| Quote: ياركاب علي الشُلق بنات الريح |
الشلق بنات الريح : الخيل
| |
|
|
|
|
|
|
|
|
|
Re: هونوو شوية.... وصلو علي النبي .... إستراحة أيها المحاربون (Re: خالد علي محجوب المنسي)
|
بسم الله الرحمن الرحيم
سلام ياهلنا...
.
ونواصل.. ستيت
خبك يا جمل مالو بيكسل
بشوف العاج ورا الدومات معسل
بنيتا ما بتجيك واردة بتغسل
حسارها زاد علي والقلب بفسل
...
خبك مو مشيك الليلة مالك
تتقل في اليمين وتجر شمالك
بنيتا لي شيومها بشني حالك
رقادا دونا قط لا تسيهو بالك
...
قطعت الليد عرق حلة كنانة
زملنا الكرت يجابدن في الرسانة
طريت مردين كديس قوز البطانة
خشيما ما بجيب كلمة عفانة
...
بعد صليت ركب شاقي الصقيعة
قطع بت ناصر الليد الوسيعة
طريت أم شرشرا يحجا الوقيعة
ذويا حر صحيح خاتي النديعة
...............................
ونواصل
.
.
تحياتي...
حاتم هاشم.
| |
|
|
|
|
|
|
|
|
|
Re: هونوو شوية.... وصلو علي النبي .... إستراحة أيها المحاربون (Re: ibrahim fadlalla)
|
نواصل مع الكدكي
يومين مِصنقر في الخشب
لامن عِسم مانام شخر
هي بي وين أنوم
دا قطر كريمي
مو ملان لاعينو ديمي
إن جا التمر مكمود كمد
والمنقا ديك وكيتين تستوي
تلقاها لي الوكاي زرب
كُل زول معاهو ألفين طرد
كترت كُلف قايل شنو
ابا مايشيلنا ود منو
عفشن كُتار والدنيا حر
جرا حُمد أحمد عرقو تر
وكتين يجي الكُمساري مار
تلقاهو بي النطيط فتر
تلقى الشَكَل
لكن قُبال يصل الكجر
الناس تعود لي القرقراب
تلقى الآكل سوا والشراب
| |
|
|
|
|
|
|
|
|
|
Re: هونوو شوية.... وصلو علي النبي .... إستراحة أيها المحاربون (Re: خالد علي محجوب المنسي)
|
بسم الله الرحمن الرحيم
سلام ياهلنا...
.
ونواصل .. ستيت
قبوب ود زايد الحلالو باين
يجيهو التيس يصبق في الكماين
طريت بريبة الوادي أب عساين
تريع القلب صحيح وكتين تعاين
...
كربت يا جمل الخب أفرقو
اكسر الهيشة والتباس أمرقو
جنية الحكمو لا دارفور وبرقو
حسارها زاد علي والقلب تحرقو
...
مما قم صغير المال بصرفو
أنا شكر البنات بالحيل بعرفو
ذويا بالتلاتة بيضوي سرفو
تجيني العافية يوم ادني واكرفو
...
هديك الطلحة بانت لي زريبة
ترى القضروف دحين بقيت قريبة
أرح يا الفي العلوق معاك ويبة
رقادك يا أب مرار عند الحبيبة
....................................
.
ونواصل
.
.
تحياتي...
حاتم هاشم.
| |
|
|
|
|
|
|
|
|
|
Re: هونوو شوية.... وصلو علي النبي .... إستراحة أيها المحاربون (Re: خالد علي محجوب المنسي)
|
بس غايتو كدي كدي في القطر
حاج حُمد أحمد قضّى يومين خير وشر
ولمالّو في ولدّن بيعرف ولدو
في حقّو أنستر
وراهو درسو مع بعض
الليلِي جيري جوار بعض
ويوم التلات مع الصباح
إنفكّو من قطر المرض
وداهو لبيت ولدو
داك البي هناك بلا خبر
تاريهو فات قُبال يجي
بس مافي ثانية علي العمل
وخلاهو روح داير ينوم
فعلاً غمد
وتلاتة دقت بي هناك
كان وقف طولو إنسند
وناس المكاتب لا ورا
تب مافي واحدّن إنكرم
وكان ولدو عاد من جُملتن
للسوق غشى وشال الرِزم
ودافس ركب باصن يئن
لامن وصل
| |
|
|
|
|
|
|
|
|
|
Re: هونوو شوية.... وصلو علي النبي .... إستراحة أيها المحاربون (Re: حاتم هاشم)
|
بسم الله الرحمن الرحيم
سلام ياهلنا ...
.
ونواصل ... مسدار ستيت
بشوف قضروف سعد حلولها طارن
زملنا أتباشرن بالتيه وغارن
زويلي الفي الظلام عينيه نارن
علي خرت الألوف أماتو شارن
...
هكع سرف البوادرة الكير منوي
متل صقر البليب وكتين يخوي
ورحك يا أب مرار فوق هادا دوي
قرب يا تيس أم علي أب فاترن بضوي
...
من الحيضان مسكنا الدرب مشينا
ختم كرتوب عرق حلة روينا
جنية لي سعد تالاها جينا
وصلنا الفي البنات سالكة وحسينة
...
بكان نوخ كرف ريحة جلادها
فلانة أم قرقدا عنف الوسادة
أمانة يا جماعة وفي الشهادة
منو الغير زولي حاق مسداري هادا
................................................
ونواصل
.
.
تحياتي...
حاتم هاشم.
| |
|
|
|
|
|
|
|
|
|
Re: هونوو شوية.... وصلو علي النبي .... إستراحة أيها المحاربون (Re: خالد علي محجوب المنسي)
|
نواصل مع الكدكّي
يقدل عليك ياالله
طق للباب دفر
شايلّو أكياسّن غُلاد
طوسته وعنب باسطة وعسل
شيتّن كتير بالحيل
يأكّل كمين نفر
لقى أبوه قدامو إنهجم
أا ؟ ابويا
يابا مو معقول الجابك شنو؟
يا ولد تنقطع ريحتك
باقيلّك بلاكي انتَ منو ؟
يعني مستغرب
كني بلا خبر جيت
وفتحتّك لي الباب
لقيتني أنا معاكا جوه في البيت
أت مادام يا اب الضراع
كم إجازي غبيت
شن أسوو
تراني قمتا معاكا طبيت
| |
|
|
|
|
|
|
|
|
|
Re: هونوو شوية.... وصلو علي النبي .... إستراحة أيها المحاربون (Re: خالد علي محجوب المنسي)
|
نواصل مع الكدكي
أنتَ مادام يا اب ضراع
كم إجازة غبيت
شن أسو
تراني قمتة معاكا طبيت
ليكَ اربع سنين
قمتة جيت مركب على الله
أنا يا الخزين
عندي قليّبّن
عليكا كيفن حنين
وماااب تخبرو
بلا تسويلك بطينين
قمتة ساكت
إلا الله سهل لي الطريق
وجيت مخصوص
غير أشوفك مابفيق
صُح رفيق المولى
مابعدم رفيق
وفي القطر لماني
ولدّن ليك صديق
جابني بي عربية
صاحبك كلو زوق
وفات وقال بجيك
أقيف اسمعني روق
قال لي قاري
معاكا كُلية الحقوق
وبيتو منك جبدّي
ساكن قبلي فوق
| |
|
|
|
|
|
|
|
|
|
Re: هونوو شوية.... وصلو علي النبي .... إستراحة أيها المحاربون (Re: خالد علي محجوب المنسي)
|
الدود
في لغتنا العامية كثيراُ ما نسمع وتقع في أضانا كلمة الدود .. بالذات في الغناء القديم
الدود في العامية السودانية هو الأسد
* قالوا الدود قرقر حبس الدرب
* الدود النتر صحّا المرافعين كوم
* والدود صار أسم وصار لقب ... يوسف الدود ... والدود عبدالكريم الدود
الدود المربعن:
اي له اربعين يوم حبيس العرين.. وعادة عندما تضع اللبوة صغارها الاشبال تخرج للصيد لكي تغذي صغارها ويبقى معهم الدود حارس لهم اربعين يوم ويقال عندما يخرج الدود في اليوم الأخير من هذه الفترة يكون في أوج شراسته لذا جرت العادة تشبيه الرجل القارح الضكران بالاسد المربعن
* الأسد المربعن حارس جبال قري
نتراتّو الفي بارا مسموعا في بري
ما بعرف كلام الهشكي والهبري
وكت الصُح يبين يا ام خد بجيك خبري
* اب رسوة اب هرش الضارب الوكرّه
تمساح دار كلي البمرق مع الهجعّه
ابو شما اللزوم كم درج العاطلّه
هو الأسد المربعن دونو الرجال قاصرّه
| |
|
|
|
|
|
|
|
|
|
Re: هونوو شوية.... وصلو علي النبي .... إستراحة أيها المحاربون (Re: خالد علي محجوب المنسي)
|
نعود للشاعر الكدكي
هيي يا جنا
إتقونن شويِّ
أوعك من الدْين
هسي الخميتو جبتو دا
كلو من وين ؟؟
لا تقنب خِدمتك تبقى الدلاقين
المهم في البنكي
وفر لك ملالين
تبكي أمك ذاتا كانت جايِّ
لكن بيتنا مابنفات
وأخيانك سغيرين
ما سمعتا غُناها
ليكَ البي الجرانين
الشي نضمّن كلو
جيت اسوقك لي العرس
لا تقول لي ملحوق
يا خي امك ديك هناك
مقليه قلي بي الشوق
لا متين تقعد كدي
وراسك دا مطلوق
البكان بندر
وكمان عيشتك من السوق
يهرد في المصارين
مرة بيهو تنوني
مرة تحصنك زين
تقرأ آية الكرسي
ومعاها ياسين
جيت
| |
|
|
|
|
|
|
|
|
|
Re: هونوو شوية.... وصلو علي النبي .... إستراحة أيها المحاربون (Re: خالد علي محجوب المنسي)
|
Quote: عرش دود الأربعين
ياالمكدك نايبك سنين
الليل بوبا
ياالفوتك مو دحين |
الريحانة سلام
اي بالحيل غير خالد بن الوليد ما ليو تنين
وعرش دود الأربعين
بنقول ماشاءالله يا الريحانة على الآذن الموسيقية التي تسمع صاح
لاحظت أن هناك الكثير من السودانيين وبالذات في الأغاني القديمة يسمعوها مغلوطة اي بكلمات تفقد القصيدة معناها
وللأسف الكثير من فناني اليوم
من يقول
عرش دور الاربعين
مستنكر ماذا أدخل الدود ( القرف ) في الأغنية
لك الشكر الريحان علي المرور الجميل يا ذات الذوق الجميل
تحياتي
| |
|
|
|
|
|
|
|
|
|
Re: هونوو شوية.... وصلو علي النبي .... إستراحة أيها المحاربون (Re: خالد علي محجوب المنسي)
|
Quote: وللأسف الكثير من فناني اليوم
من يقول
عرش دور الاربعين
مستنكر ماذا أدخل الدود ( القرف ) في الأغنية |
خالد غير خالد ماليك تنين
أعجبنى حديثك عن الدود والشعر الذى أوردته كذلك عن التمساح والدود، يسألنى كثير من الناس عن أب كريق ( عرش ياأب كريق على البمارسو قليل ) وبالتأكيد هم على ثقة من أن الدود هو الدود الواحد دا !
عندهم المدردم كلو ليمون !
فعلا هناك بعض الفنانين لايهتمون بصحة كلمات النص وليس لديهم حس أدبي يميزون به اللحن فى القول ..
وعلى ذكرى الكلام التراثى ، لى ولد بقدر ماهو طيب شعت شعاتة شينة خلاس كان جيتو خاتى الله يحلك منو ، حبوبتو معجبة بيهو عجب شديد ومكنياهو بـ ( المر ) الحنضل المابنلاك ، فكتبت له :ـ
الـمُـر
بجُـر كـلامي فـوق المُـر
أب رسـوة خصيـم الجُحُــر
أب درقــة وكتـيـن يـكـُر
الصّـاقعـة وكتـيـن تـخُــر
حـلــواً سُـــكـّر قـطـُر
شـــوفـتــك ليـلــة القـدر
محراتـك في الصـُم بـجـُـر
ســيلك مابحبـسُـو الكـسـر
الكـازاك من حـالـُو كـُر
حـتـمــاً سـكـنـُو الـقـبـُر
فــارس الوقعـــة أم لطام
صنديد الخيـل أمـّات لجــام
جـدودك الغـُـر الكـــرام
مدخورين لى يـوم الزحـــام
سمية الحسن محمد طلحة
| |
|
|
|
|
|
|
|
|
|
Re: هونوو شوية.... وصلو علي النبي .... إستراحة أيها المحاربون (Re: سمية الحسن طلحة)
|
Quote: بجُـر كـلامي فـوق المُـر
أب رسـوة خصيـم الجُحُــر
أب درقــة وكتـيـن يـكـُر
الصّـاقعـة وكتـيـن تـخُــر
حـلــواً سُـــكـّر قـطـُر
شـــوفـتــك ليـلــة القـدر
محراتـك في الصـُم بـجـُـر
ســيلك مابحبـسُـو الكـسـر
الكـازاك من حـالـُو كـُر
حـتـمــاً سـكـنـُو الـقـبـُر
فــارس الوقعـــة أم لطام
صنديد الخيـل أمـّات لجــام
جـدودك الغـُـر الكـــرام
مدخورين لى يـوم الزحـــام
سمية الحسن محمد طلحة |
تسلمي يا سليمة الزوق
ريحانة الحسن
استخدمتي كلمات قد طمرها فيضان 1946 سنة التساب
* الكازاك ::: يا سلام طال البعاد من سماع مثل هذه الكلمة ( يا ما تكازي واسمع الكلام )
* الوقعة ام لطام ام كاع وكف
أعجبتني جداً القصيدة وجمع الموصوف فيها صفات كلها كريمة وحميدة ولكن تبدو من سياق كأنها أضداد
في زمن صار الشكر (( مياعة ))
ربنا يديك العافية وتسلمي يا الريحانة
لك احترامي وتحياتي
| |
|
|
|
|
|
|
|
|
|
Re: هونوو شوية.... وصلو علي النبي .... إستراحة أيها المحاربون (Re: خالد علي محجوب المنسي)
|
التلـــــــــــــــب
هو الجمل ... سفينة الصحراء ذاك الحيوان الضخم الذي كرمه المولى تعالى وأودع فيه كم من اسراره سبحانه .. الحكاوي كُثر في الجمال سوف تأتيكم بي العجب فيها بنية وريحانة الحسن ودطلحة من الجدع والحق وبنت لبون إلى وصف جمال تميزت في البطانة والبادية.
* لا يميل ولا يكل من أحمال مهما كانت
* قدرته على تحمل العطش لأيام عدة
* أدبه في الجماع للتكاثر فلا يفعلها كما بقية الحيونات
و و و و
كله ومنتظرين الريحانة .. هي ما تخافو والله بتجيكم وتوريكم شيتن ما كنتو عافنّو تب
التلب اللزوم مدخور إشيل العايلة
إقدل بي مهل فوقو الحمول الهايلة
| |
|
|
|
|
|
|
|
|
|
Re: هونوو شوية.... وصلو علي النبي .... إستراحة أيها المحاربون (Re: سمية الحسن طلحة)
|
وقفّة وتعظيم سلام لتلك الصورة الجميلة فينا
حبوبة .. حبوبة .. هاكي الشاي .. إتّي منو السارة حبيبتي هَيْ يا بت أمي كوتي وين من الصباح عيني ماوقعت فيك ضنيتك نايما... أمسكي يا حبوبة الكباية فوق إيدك علا حارة أخُتهاليك فوق التربيزا .. أاي .. يا بت أمي العوينات مارقدن ستا والله القطرة البكبها ليهن دي الرمادة مابتسويها.. بس التقول علي لبن عشر تعمي فيهن زيادة ودميعة اليتم دي حالفة ماتقيف .. هي ياحبوبة تنقط الدميعة كيف وانتي حد تقشي فيها بطرف هدمك القديم دا الكل ما أقول ليك جيبي النغسلو ليكِ تابي .. أنا من بكرة بمشي اشتري ليك مناديل من المحطة ..( مع ضحكة رنانة قالت لها ) هي المناديل إطيرّن المناديل الما شفتهن في عرسي بدورني اتقشقش بيهن الليلة كفاني طرف هدمي ياهو من يومو مقشتي وتوب مسوحي من شبابي ووسادتي وحد ما ادور انوم كان ما كرفتو كدي زين عيني دي ما بتغمد والله يا السارة بت علي ولدي التوب دا شريتو أبقى لي في سنة التساب السنة الطمرت موية البحر الاخدر واليابس وانقدت السماء فوقنا مطرن رعدو التقول رصاص من دكان ناس حبشي النقادي بي اتنعشر قرش ونص قرش ينطح قرش ولفا لي في ورقة بيضا ابقى لي لليلة قاعدي فوق السحارة اللتي كان ابقى الجنى الهبشة سعد ايدو ما صلته.. الجنى دا اليوم كلو ابحت فوق سحارتي دي التقول دافن لو فيها لقية
| |
|
|
|
|
|
|
|
|
|
Re: هونوو شوية.... وصلو علي النبي .... إستراحة أيها المحاربون (Re: فيصل محمد خليل)
|
وقفّة وتعظيم سلام لتلك الصورة الجميلة فينا
هَيْ أصبري لي النحدثك داكي الليلة مسكتة الفتيل الليل القطرة وكبيتو في عيوني .. القطرة الجابها لي ود مُحمد من الخرتوم والله السارة وماكي رايداني حليفة قطرتّو حارتن التقول ناس البندر خاتين فوقا شطة اللت قبانيت هرست هرست فوق عويناتي وباقي لي هي الخلت العونيات شارات زي ماسورة حوش ناس ود كروري
هَيْ يا حبوبة أشربي الشاي ما يبرد.. سويت ليكي الشاي البعجبك داك شاين مو خمج بي هباهانو تقيل وكبايتو متمرة وترقش زي نيشان الضباط ... سمح بشربو يا بتي العديلة شاحدة ربي الكريم يسعدك ويعدل مُشهادك آ المبروكة بس اللهات بقن ما بحملن الشاي الحار والله زمان آ السارة كنا الكباية وكت نختها فاضية إكون بوخا يلوي عاد ما كنا فوق عافيتنا وعديلنا كنا نقعد وكت الضهير والرجال في الزراعة بعد ما ننضف بويتنا ونشد ملاحنا ونملى ازيارنا ونعدل مشهادنا تب نقعد للشاي وشراب البن في التبادي نبدأ بي الشاي بعد داك تعقبو القهوة ريحتا دي وكتين يلقوها تجيب الضهبان مودّر .. وماكنا زي حروم اليومين ديل بلا قلنا وقالوا من عندهن شغلة كانت المحنة بيناتنا حروم الفريق لاحدهن نتشايل ونتعاون لاعند النفُاس مافينا واحد بحتاج لي امها ولا اختها في شان تجي تنفسا والله الجارة وتقضي لا تكل لا تمل كان الزمن زين يا الحبيبة والله يمرن اليومين والتلاتة وليداتي ديل ما بتقع عيني فيهم لكن لا بشيل هم خبرانة بيهم معا رفاقتهم اتغدا عند فلان ويفطر عند فلان وان بقى نعس ينام بي هناك عند ناس فلان .. كان زمن بالحيل زين وكنا مبسوطين ضحاكين سبة وبلا سبب
| |
|
|
|
|
|
|
|
|
|
Re: هونوو شوية.... وصلو علي النبي .... إستراحة أيها المحاربون (Re: خالد علي محجوب المنسي)
|
مافي المقامُ لذي عقلٍ وذيِ أدبٍ
من راحة.. فدعِ الأوطان واغتربِ
سافرْ تجدْ عوضاً عمّنْ تفارقهُ
وأنصبْ فإنَّ لذيذ العيشِ في النصبْ
إنيّ رأيت وقوف الماء يفسدهُ
إن ساح طابَ وإن لم يجرْ لم يطبْ
والأُسدُ لولا فراقُ الأرض ما افترست
والسهمِ لولا فراق القوس لم يصبِ
والشمس لو وقفت في الفلك دائمة
لملّها الناس من عُجم ومن عربِ
والتبر كالتّرب ملقي في أماكنه
والعودُ في ارضه نوع من الحطبِ
فإن تغرّب هذا عزَّ مطلبه
وإن تغرّب ذاكَ عزَّ كالذهبِ
الأمام الشافعي رضي الله عنه
| |
|
|
|
|
|
|
|
|
|
Re: هونوو شوية.... وصلو علي النبي .... إستراحة أيها المحاربون (Re: حاتم هاشم)
|
بسم الله الرحمن الرحيم
سلام ياهلنا ...
.
ونواصل ... مسدار ستيت
حايدانا الأمانة النشدة حارة
عجيلتك ها الوكيت فوق جيلها تاره
عناق الأريل الفوق قوزها فاره
هباب ما فرهدت ما قالو داره
عناق أم سومري المرعاها جبرة
تحدثني حديثا كلو عبرة
أن جنيت تاني ما أظني ببرة
بلا عناب جناين وادي شبرة
مشيت وجيت لقيت دلو السلوقي
يجوني الناس يعجو يقيفو فوقي
شاكي الغلبة لكن جد شوقي
متل جمل العلوق كل حين أهوقي
فتحت الباب دخل عجلان عليها
لقيت أم خد تنور زي حليها
بنيتا من زمان شويمنا ليها
بشوف خلق الجمال مجموعة فيها
لقيت الكولا فوق لحفاتها نايمة
بكان ما تحس تخنق العبرة قايمة
جنية البي الغرب مردانو حايمة
ندهت الصالحين تبقى لي دايمة
تقول لي يا ولوف طول غيابك
تلاتة شهور تمام ماسكين حسابك
دحين وكتين حضر والمولى جابك
تعال لا تلجلج النوريك عتابك
.............................................
.
ونواصل
.
تحياتي ...
حاتم هاشم.
| |
|
|
|
|
|
|
|
|
|
Re: هونوو شوية.... وصلو علي النبي .... إستراحة أيها المحاربون (Re: ibrahim fadlalla)
|
بسم الله الرحمن الرحيم
سلام ياهلنا...
ياحليل رياضنا الغناء
.......................
ابراهيم العبادي
.......................
ياحليل رياضنا الغناء
وصداح هزارها تغنى
يا ليل حظوظنا الجنة
ظرفك علينا تجنى
اخرجنا من الجنة
و فى نار هواها سجنا
يا حليل رياضنا الغناء
عمل الدهر دى العملة
و جاء جرد على الحملة
فارقت دورن جملة
تفرغ عيونى و تملا
يا حليل رياضنا الغناء
مر يا نسيم بجارى
و احكيلو كل الجارى
قول ليهو دمعه الجارى
فى خدوده سوى مجارى
يا حليل رياضنا الغناء
ذكرى الحبيب عاطرانى
كبت دموع ماطرانى
الذمة والاطرانى
سيان لو يطرانى
يا حليل رياضنا الغناء
شلخه الحسامى و خالو
ورمز الصليب فى خالو
بروحى لو اسخالو
سيد عين حياتى اخالو
يا حليل رياضنا الغناء
فقتى الحضر والبادى
فقتى الختم والبادى
سهمك برق عبادى
يمطر جمر فى اكبادى
ياحليل رياضنا الغناء
يا مى خيالك جانى
جنح الظلام ناجانى
هيج على اشجانى
و الجانى ياناس جانى
يا حليل رياضنا الغناء .
...................................
تحياتي...
حاتم هاشم.
| |
|
|
|
|
|
|
|
|
|
Re: هونوو شوية.... وصلو علي النبي .... إستراحة أيها المحاربون (Re: خالد علي محجوب المنسي)
|
والله يا السارة يا يبتي زمنا كان عديل بي الحيل تب مو زي زمنكم دا كنا حولنا ( السنة ) كلو نقضي بي جلابتين وانتو بسموها شنو؟؟؟ ( فوستاان ولا شنو فُستان ) وحيدة في الحبل والتاني فوقنا في جلدنا... وتوبين وحيد الليل مرقة بين الجيران والحبان ( توب الليل زراق ) واللاخر لي المرقات بكون الليل كِرب سادة ولا ملون .. وتوب الليل مسوح وفركة قرمصيص. وديل عند بت العز التهز وترز هسع والله ووحات شيخي تور الجريف اب عنقريباً طار وركا عند باسبار جبتن لكن شي جنقل جنقل وكفتو رما وكمان الشي داك مابعرفو اسمو شنو بس معلق فوق وريك الواحدة.. ان بقى دنقرت تكنس جدادا كلو يسرح وما يفضل سوسيو واحد.. نقلتنّو وجبتنّو من التلزيون الداهي الليل الشيطان دا والله داكي الليل مشيت لناس ود نفورة بتي ولقيتم مشغلين الداهي دا الاسمو التلزيون دا والله في وحيدة كدي مرتّن قاهر بي الحيل كفتت راجله كف لامن رمتو علي قفا ... أها تقعدن تعاين في جنس الشي دا ... باكر تسونّو في رجالكن ... والله غايتو جنس محن دخلن علينا بي النصيبة دي شيتن لا شفنا عند اماتنا لا حبوباتنا ... والله بي الليلنا سمحين وزنين بس انتن جاريات ورا الناس البُيض ديل ان بقا دخلو ورقدو في الكدمبس تدخلو وراهم وتقولّن والله مريح وسمح .. داكي الليلة مشيت لي محمد نور اشتري لي حرجل ومحريب جات وحيد كدي فاركة وشيها بي ألون شي احمر وشي صفار زي ظق العتود مولود اليوم ... والله خفتا عليها من تصب ليها المطر قبُل تصد بيتها تبشتن ليها وشيها علي البشتنه المسواها فيهو .. وينو يايمة كربريتنا.. وينو يايمة دخانا ودلكتنا.. ووينو يايمة خمرتنا ... ووينو يايمة كُحلنا .. ووينو يايمة حنتنّا ووينو احي حرقّو ووينو يا يمة حب النجيمات
غايتو يا السارة يا بتي بسون ليكن في محن غلبتن الواركن والقدامكن بس نسكت نعاين ليكن كدا ... هَيْ يا حبوبة نحن في عصر الانترنت والعولمة ... هَيْ المنتر مت الاكسر رويساتكن ديل ... المنتر مت دا جنسو شنو مصرية من اللات التلزيون دا البكافتن في رجالن ديل ... ولا خواجية مي محسون
| |
|
|
|
|
|
|
|
|
|
Re: هونوو شوية.... وصلو علي النبي .... إستراحة أيها المحاربون (Re: خالد علي محجوب المنسي)
|
أولاً بي التبادي يا حبوبة الشي دا ما أسمو المنتر مت .. اسمو الأنترنت ودي شبكة لتواصل البشر وتسهيل المعلومات والعالم بقى زي القرية ... يعني بالسليقة كدي كان دايرة تعرفي اي شي ممكن فقط تدخلي علي الانترنت تجدي ما تريديه ... هوي يا بت هوي ان بتلعبي بي كيفن عاد اي شي موجود في الداهي دي قُتي شنو شبكة زي الّت السماكة دي ... هي لا يا حبوبة الشبكة دي يا حبوبة زي مابجي صوت الناس في الرادي وزي مابجي صورة الناس وصوتهم في التلفزيون الشبكة دي برضو بتجيب المعلومات ... والله يا السارة شغلكن دا شغل جن وشواطين يا بت أرعي بي قيدك وخلي الطرطشة دي وابقن داب مشهاد امتاتكن وحبوباتكن ما تجيب لينا كفوة.
هي عاد افهمك كيف العالم تطور .. يا بت طورة جمل فوق رويسك دا
| |
|
|
|
|
|
|
|
|
|
Re: هونوو شوية.... وصلو علي النبي .... إستراحة أيها المحاربون (Re: خالد علي محجوب المنسي)
|
حبوبة شربتي شاهيك ؟؟ كان كدي كدي النقوم اغسل الكباية دي ... حبوبة انا مارقة أجيب كراس من سعاد واجي كان ابوي جا قول لي السارة هسي بتجي ... امشي آبتي الله يعدله عليك واديك الفي مرادك باقي ات بت زينة والله بلاك القعدة في الدنيا ماكان بقت لي تب بعد رحول الفارس القارب العشرين سنة رجعت من تاني لي ترنيمتها المحببة تدندن بها بصوت يسلب اللب حزنا ( يا حليل ايام .. أيام هنايا ... أيام كان الخزين معايا )... وفوق بُكانه داك أخدت ليها غَمدي زرفت فيها من خلال النفس كل آهات ألام البين والفراق للحبيب وأخوانها وأخياتها
| |
|
|
|
|
|
|
|
|
|
Re: هونوو شوية.... وصلو علي النبي .... إستراحة أيها المحاربون (Re: خالد علي محجوب المنسي)
|
على صوت عالم الرياضة من إذاعة امدرمان موسيقاه المميزة صحت وبدأت تجر كراع وراء التانية .. الكرعين التي أضناها آلم الرطوبة اللعينة بي حبيبات الدكاترة ابت تروح بي الكي أتعقلن زيادة وصار علاجها الوحيد مِسيد السارة لها وفي كل ليل قبل النوم تجبدن ليها بي دهينة من الكركار ياقي الضحية ... السارة يا بت السارة تعالي يا المبروكة انتي رجعتي ... هي يا حبوبة أنا رجعت لي ساعة ونص لكن لقيتك ضاربة النومة وماحبيت ازعجك ... تعالي عليك الله عصري لي كرعاتي ديل ماني حاسة بيهم ضُمه .. ااي والله يا بتي بس تقول نمل وجاري فيهن افتش في رزقو .. حبوبة جعانة ولا بترجي لما اخواني اجو وناكل كلنا ... برجى اخيانك بدور الجمعة بحس فيها عزي بيكم آ المبروكين يا أولاد الحنين .. كدي قولي لي الكُراس الجبتي من سعاد دا شنو الليل تعليم القطبة ولا المنسج .. هي يا حبوبة قطبة شنو ومنسج شنو دا كراس كيمياء بتاع المدرسة ... ها آبت ادرسنك الشبعنات علُوق أنا داكي الليلة ما قتا ليك خلي الداهي المدرسي دي وامشي لي زينب مراة صديق تعلمك المنسج والقطبة
| |
|
|
|
|
|
|
|
|
|
Re: هونوو شوية.... وصلو علي النبي .... إستراحة أيها المحاربون (Re: خالد علي محجوب المنسي)
|
والله يا حبوبة أقول ليك هسي الكلمة ديك الما بدوريها وبتحرقك ... ( بضحكة مجلجلة وصوت معشرق قصدك انتي خرفتي بدوري تقولي لي ... قدت اضاني منكن يا بناتي علا عارفاها مي من قلبكن بس بتشغالني بيها ) دحين السارة أمك أن شاء الله مسويا ليها ملاح أخدر الليلة فتر ضُمه من الزيوت دي بقت ما بترقد في البطينة دي ... بختك يا حبوبة أنا شفته أمي الصباح وهي بتورق ليها في سباروق وقطعت باميتو للملايقة البامية المي خمج من جروف جنينتنا .. جيدلنا جيدلنا الليلة نملخ إدياتنا في الخدرة البتقول ليها مرت خالد الخواجية ... ملاح لُبانة...ويني أخيتك مار جعت من المدرسة لي هسي ماله ... لا هي الليلة قالت مقيلة مع صاحبتها في حلة قِدام
| |
|
|
|
|
|
|
|
|
|
Re: هونوو شوية.... وصلو علي النبي .... إستراحة أيها المحاربون (Re: خالد علي محجوب المنسي)
|
وكت عصيرن بدري والبرود هبه نسامو من تاله الجنايين يسبقه ذاك الخليط من الروائح العطرة جوافة وموز ومانقو وبرتكان وليمون بلح وريحة لوبي وبرسيم وديس وبروس تكرف قدر ما تكرف وتلمئ رئتيك منها وتسمع بي عضمت اضانك طق طق طق تتفتح شرياين الرئة ... قامت السارة تسبقها في يدها اليمنى مقشاشتها الطويلة وكنست الحيشان المفروشة بي الرمل الدقاق ورشتهن وعبق الخليط من نسام الجنايين مع ريحة خليط الرمل بالماء والجو عبق ... اتشالبت السراير والعناقريب مع اخيتها فوق حوش النسوان وفوق حوش الرجال ... كانت تهتم دوماً بالعنقريب الخاص بي الحبوبة وتحرص على وضع ملاية مغسلة ومكوية يوماً عليه بعد ان تضع لها الطقطاقة البتخت فوقها الموية وحقة الصعوط ولا تنسى الكرتونة وفوقها رملة تبصق فيها الحبوبة سفتها كانت السارة تحسها وهي تحس السارة ونشأت بينهم حب عميق غير معلن لكنه كان احساس تجاذب قوي بينهم وهن به سعيدات
| |
|
|
|
|
|
|
|
|
|
Re: هونوو شوية.... وصلو علي النبي .... إستراحة أيها المحاربون (Re: خالد علي محجوب المنسي)
|
بسم الله الرحمن الرحيم
سلام ياهلنا ...
الخال ابؤاحمد ..سلامات .
ظروف الدنيا قطعتنا منكم شويه
بس الي اجل قريب انشاء الله .
قـال عـكيـر الـدامـر في مـدح الـشـيـخ الجـعـلـي :
حباب الكوكب ال لي كل شر حباس
حباب السره من ناس همزه والعباس
طريق ديمه المنيل ونادي خاتي يباس
قباب نور الزمان البق من كدباس
...
يافرع الطهاره الصافي من ادناس
بعيد قلبك من الوسواس والخناس
جبل الرحمة يا مشرع جميع الناس
تعيش قبلة صلاح لي كافة الاجناس
...
البنا ما بقيف يا سيدي من غير ساس
ياسر حاج حمد بركه وندى واحساس
صوطك لي المرض من العضم حساس
يخرج بي عجل ذي طلقة الرصاص
...
احياك الله لي الاسلام ركن حراس
عرق دم الرشيد سيد العلم ميراث
تعالج بي النظر لا محايه لا كراس
وبي موية الوضوء بتطرد جنون الراس
...
حبتك السعاد اهل العقول النايره
بي جنحات صقور جاتك مخويه طايره
والد المعتصم يالجعلي سيد الدائره
احياك الله يا درع القواسي الغايره
...
بدر الكمال ايام زيارتك حالية
صاحب المرتبه المن الله جاتك عاليه
شريان العباده ال في الدراويش ماليه
ملفات الزكر دامت عليك متواليه
...
ياعينة الرخا الوجت برقها الشايله
وفقك الله بازلها كالسيول السايله
يا جبل التكيه وابو الجيوش الهايله
شاة جابر طعامك فيي المسا و في القايله
...
خصاك الله بي التقوى النظيفه الصافيه
بالحياة طلوع ثم الصداقه الوافيه
يد ذو الفقار لي كل شر متلافية
فلتحيا وتعيش وعليك تاج العافيه
...
كم وفقت ناسا طولت متعاديه
كم ارشدت عالم في الحضر والبادية
سفينة نوح صحبتك في الامان متهايه
نعم البها فاز وحياته صبحت ناديه
...
رايتك في المنام واخذت جلسه وهانيه
واليوم الله جاد بي شوفتي ليك التانيه
لكل كتاب والدنيا اصلها فانيه
نعم الجالسك لو كان دقيقه وثانيه
...
اشكر خالي مجذوب لي هون قاسيه
صدق لي الرؤيه ثبتت راسيه
يا نسل النبي الضو الليالي الماسيه
اقبلها من عكير الجاب ليك متواسيه
...
بدر الكمال ايام زيارتك حالية
صاحب المرتبه المن الله جاتك عاليه
شريان العباده ال في الدراويش ماليه
ملفات الزكر دامت عليك متواليه
...
ياعينة الرخا الوجت برقها الشايله
وفقك الله بازلها كالسيول السايله
يا جبل التكيه وابو الجيوش الهايله
شاة جابر طعامك فيي المسا و في القايله
...
خصاك الله بي التقوى النظيفه الصافيه
بالحياة طلوع ثم الصداقه الوافيه
يد ذو الفقار لي كل شر متلافية
فلتحيا وتعيش وعليك تاج العافيه
...
كم وفقت ناسا طولت متعاديه
كم ارشدت عالم في الحضر والبادية
سفينة نوح صحبتك في الامان متهايه
نعم البها فاز وحياته صبحت ناديه
...
رايتك في المنام واخذت جلسه وهانيه
واليوم الله جاد بي شوفتي ليك التانيه
لكل كتاب والدنيا اصلها فانيه
نعم الجالسك لو كان دقيقه وثانيه
...
اشكر خالي مجذوب لي هون قاسيه
صدق لي الرؤيه ثبتت راسيه
يا نسل النبي الضو الليالي الماسيه
اقبلها من عكير الجاب ليك متواسيه .
تحياتي ...
حاتم هاشم .
| |
|
|
|
|
|
|
|
|
|
Re: هونوو شوية.... وصلو علي النبي .... إستراحة أيها المحاربون (Re: خالد علي محجوب المنسي)
|
مسدار ابوالسرة لليانكي
الشاعر محمد طه القدال
أُماتي القبيل بي حنهن ربني
كرفه وقلده
كيف شوق اللبن رجنّي
حزنن جاني فيما يعصبه يلجنّي
وأطلع يا جلدي المنمل مني
وأطلع مني يا حزنن بقى مكجني
وخلني ابدا مسداري
وودي قفاي لي داراً بقت مي داري
جيتا وجلدي بينو وبين عضاي الشحمة
إلا النار بقت قدامي
جلدي الليلة بينو وبين عضاي المافي
إلا تراني شوال الكِبس
نفيخ جرابيب الورم هدامّي
في جلد الورم قولن لي
ولا صحي الورم عضاني
| |
|
|
|
|
|
|
|
|
|
Re: هونوو شوية.... وصلو علي النبي .... إستراحة أيها المحاربون (Re: خالد علي محجوب المنسي)
|
نواصل مع الشاعر محمد طه القدال
ومسدار ابوالسرة لليانكي
سفريتّك مي في النية
ماها الكانت محريّة
خابراك عِريف
زمْ العربان
ولا قيام الورديّة
مالّك تريان ومندّي
كاسي الكتان والهندي
قولك كيكيف
ترجى البيشان
ولا الغربة بالذندي
برقاً عبدلي الوزني
يا طاش يا جاب المُزني
فرّق يا الضيف
فعل الغضبان
أم فرفيرات الحزني
وشن القعدة ياابوالسرة
شن القعدة ياابوالسرة
في ضل العمارة
اب كمرةً برّه
ضقنّا الحنضل اليانكي
وبلعنا المرّه
كملت كوته التمباك
صقعنا الجِرّه (( الجِرّه هي سفة التمباك يكرر سفها عدة مرات يعني تسف وترجع في الحقة ))
وكت إتقفلّت شقّيش قَبَل بي المرّه
نرمي أمرنا لي بلد المعاني الحرّه
نواصل لي قدام يا حبايب بس انتظرونا
| |
|
|
|
|
|
|
|
|
|
Re: هونوو شوية.... وصلو علي النبي .... إستراحة أيها المحاربون (Re: خالد علي محجوب المنسي)
|
نواصل مع مسدار ابوالسرة لليانكي والقدال
الشم خوخّت وبردن ليالي الحرّه
والبراق برق من منّا جاب القِرّه
شوف عيني الصقير بي جناحو كفت الفرّه
تلقاها ام خدود الليلة مرقت برّه
مرقت برّه يابوالسرة تغلي مديدة الحِلبة
التسمن رِدفها
السمن المبستر يانكي
والويقود بعيرات الدُخان في العين
يسوي عمايلّو
وشن فايدة مديدة الحِلبة
والويقود بشيلّو اليانكي
ويابوالسرة قامت من دخاخين العما
تلمع وشيها
كان اليانكي مستنيها
في مراية السجم في الليل
لقيته متل فريخ الطير
رجافة المزم الحمى
وقعت عندي
صدرها بغلي
شفته اليانكي في ود عينها
| |
|
|
|
|
|
|
|
|
|
Re: هونوو شوية.... وصلو علي النبي .... إستراحة أيها المحاربون (Re: خالد علي محجوب المنسي)
|
وريقات من كتاب الصحفي عبدالرحمن مختار عليه رحمة الله
خريف الفرح
يقول فيه :
مشكلة الشعب السوداني، أنه شعب يحب السياسة ويهوى النقاش والمجادلة،فالعامل البسيط والجزار والفكهاني والتاجر والموظف يعرف مايجري في نيكاراقوا وسان سلفادور وكمبوديا قدر معرفته بما يجري في العالم الافريقي والعربي والمحلي ... وهو مولع بالندوات والتحليلات والأستنتاجات قدر ولعه بأنتقاد الرؤساء والوزراء والساسة ... ومناقشة بيانتهم وتصريحاتهم وتقييم كل مايصدر عنهم مهما كان تافه وصغيرا ... ومع كل هذه الزحمة الغارق فيها الشعب السوداني حتى آذنيه، فأنه يتابع ايضاً بشقف شديد أنباء الرياضة ونجومها وتحركات أهل الفن والغناء والأدب والشعر الخ
السير جيمس روبستر حاكم نيجيريا السابق وآخر سكرتير بريطاني للسودان قد أمضى في السودان معظم سنوات شبابه وزهرة عمره فعرف السودان شبرا شبرا وشيخاً شيخا وزعيماُ زعيما.. قال عن السودان في أواخر ايامه وقبل ان يبرحه قولته المشهورة (( ان السودان بلد صعب لا يستطيع أن يحكمه... ( ألا نبي أو غبي)... )) وقال ايضاً أن السودان بلد معقد ومتشابك وصعب للغاية وانني ومن داخل قلبي أرثي وأشفق على الذي يحكمه.
دي ورقة من وريقات حا نواصل يا احباب
| |
|
|
|
|
|
|
|
|
|
Re: هونوو شوية.... وصلو علي النبي .... إستراحة أيها المحاربون (Re: خالد علي محجوب المنسي)
|
نواصل مع مسدار ابوالسرة لليانكي ... القدال
شلتها لي البحر
إمكن أغسّل عينها من اليانكي
فتنّا الحجرّه بي الكتّا
وغتسنّا مســــــــــــــافة
تجي قدر مسالك الريد
ما لِقينا من يغبانّا
في البحر الفدر تحتانّي
ناس عارفاها
ناس عرفاك
ناس عارفانّي
ناديت القعوي والبلطي
قرقور السمك وداني
لي دابي الخُشش نادينّا
عُمال الطمي الصارقيلّه
والقرموط وود المويه
وفتنا عليها
كانت نايمه
بين حجرين
وضل ساسويّه
| |
|
|
|
|
|
|
|
|
|
Re: هونوو شوية.... وصلو علي النبي .... إستراحة أيها المحاربون (Re: abdulgafar mohd saeed)
|
قالو اذا همَّ الحبيب بالزيارة فرشنا البيت ورود فما بال الحبيب لو كان غالي
ومتقّل بالدهب ... اسعدتنا كلمك الحلو يا عبدالغفار محمد سعيد... وطنَّ في الدقنيس
وتير وصحا ذكريات تراكم عليها غُبار السنين المر
فعلا بدور لي مرة بقندتو ومويس تفرك العضيمات التي اوهاها الجليد والقُر
تعرف قضيت في ضيافة ابناء عمي عمر وعماد وفتاح وعصام
ايام جميلة في الامارات اجترينافيها صدى الذكريات الحلوة في ربوع شندي والامتداد
وكنا دوماُ في ذكراكم آل الامتداد الطيبين
لك التحية حبيبنا عبدالغفار
خالد
| |
|
|
|
|
|
|
| |
خالد علي محجوب المنسي
ibrahim fadlalla
حاتم هاشم
فيصل محمد خليل
abdulgafar mohd saeed
فيس بوك
تويتر
انستقرام
يوتيوب
بنتيريست