كابتن الهلال هيثم مصطفى .. ماذا كان يقول للعجب كابت المريخ ؟

Quote: يا وليد .. كدي اول حاجة مبروك ليكم فكيتو بورتكم .. حسابات كدا باقي ليكم اربعة على شرط يكون فيها غلب وقلع من جووه المقبرة ما درون .. غايتو كان امس غلبتونا وقلعتو الكاس دا وحيات ابتسامتك انا كان بقيت مريخابي راسي عديل واستقلت من الأمن.. بعدين دقيقة يا وليد .. أنا بتكلم معاك كلاعب كورة إنت ولعبت درجة .. في حاجات مفترض تكون عارفه كويس جدا وما غايبه عنك: فيما يتعلق بالممبر هنا دا في مجموعة متخصصة في هيثم مصطفى .. كان مد يدو لي اي زول للسلام ممكن بكرة يجو يكتبو ليك هيثم بعدما سلم على فلان الفلاني عمل ليهو حركة بي اصبعو ما كويسة .. كدي بس عاين قدامك وفي اتنين تلاتة انفار خليني من اسماهم بس فتش البورد دا والارشيف الوراني بي اسم هيثم مصطفى بتلقى البشيب الراس .. بالنسبة للكلام الفي الميدان .. نحن لعبنا كورة يا وليد وبرضو درجات ولعبنا مع لعيبة كبار وعارفين اخلاقيات الكورة والبيحصل جوه الميدان .. وأنا متاكد تماما إنو الناس البتكتب عن هيثم مصطفى في المكان دا .. والله الواحد كان دردقو لهو كورة علشان يشوته احتمال كبير جدا يقع على ضهرو قبال ما يشوته .. لذلك .. وقبل محاكم التفتيش بتاعت سودانيزاونلاين .. في حاجات مفترض الانتباه ليها: Quote: يا اخوانا انتو جادين قبل ما تعقدوا محكمة التفتيش دي متاكدين انو ما رد على العجب بنفس الشتيمة .. Quote: وللامانة العجب هو البادي لكن لان هيثم كان في مواجة الكاميرا ظهرت كل انفعلاته و ما لاحظة الاخوة او ما تراى لهم ليس صحيحا لان حركات فم هيثم لا تدل على انه تفوه بمثل تلك الالفاظ ربما كانت كلامات غضب وهي رد على ما قاله العجب ومثل هذه المشاحنات دائما ما تصدر من اللعيبة داخل الملعب ولا تنسوا ان الهلال وقتها كان متاخرا بهدف عن المريخ وهذا ليس دفاع عن هيثم ولا يعفية عن ما بدر منه اللقطة اسفل توضح وضع الاثنين امام الكاميرا ويظهر لعيبة قريبين جدا من الموقع الحدث بالتاكيد سمعوا كل ما دار بينهما ياريت يا وليد بس لو كنت حقاني شوية ايوة ما عندنا مشكلة نكربن بعض لمن الدنيا تنقلب .. في النهاية الكورة لازم فيها غالب ومغلوب نكربنكم الليلة بكره تكربننونا نقلبكم خمسة مرات الليلة تقلبو مرة واحدة .. لكن كمان التأويل والكلام البتعمو فوقو دا والظلم دا وحركات بعض الجهلاء هنا ما ظابطة .. هيثم يشوت القزازة .. يشوت النص ما مشكلة الناس تجيب ليهو فيديو وتعمل ليهو البتعملو .. كلو ماشي في عالم الكورة .. لكن كمان علشان الناس ما لقت ليها طريقة تفرح بيها بشكل كامل تجي تفتح ليها مليون بوست مهاجمة لي هيثم مصطفى كابتن السودان ..؟ والسبب ..؟ العجب صاحبو ..؟ وندو في الميدان .. وود حلتو ..؟ اسمع كلامي الجاي دا كويس يا وليد وارمي نصو البحــر .. يوم الأحد كان في حلقة في قناة النيل الأزرق جمعت بين كابتن هيثم وبين كابتن فيصل العجب .. كانت حلقة سخيفة جدا .. وأنا لو كنت في مكان هيثم والعجب ما بمشي اسجل الحلقة دي .. الحلقة كان فيها كمية اطراء غريب جدا .. كل واحد بيمدح في التاني .. الاسئلة عبيطة جدا .. وفيها كلام ما مفترض يتقال خارج نطاق الميدان .. يعني خاص بالميدان فقط زي لما تحكي ليك نكته بايخه والناس ما اتفاعلت معاها .. تقوم تشرحة ليهم.. الشي المهم وليهو ارتباط بالبوست دا .. وربما الحاجة المهمة والحاجة الواحدة المفيدة في الحلقة .. سال سعد هيثم وفيصل .. سؤال واحد: لما تسلمو على بعض جوه الميدان في كلام كدا بتقال بيناتكم الناس ما بتكون سامعاهو .. انا بكون دائما متحير فوقو بتقولو شنو لي بعض .؟ الغريبة إنو اصرار هيثم وفيصل العجب .. كان عالي جدا بعدم البوح عن المسالة دي .. برغم محاولات سعد إنو يطلع بي اي حاجة من هيثم تحديدا .. فهيثم كان بيضحك ويعاين للعجب والعجب بي نفس الطريقة .. هيثم قال مرات العجب بقول لي كلام مرات بردو ليهو في وقتو ومرات بكون لاميها ليهو لظروف تانية .. والشئ البتقال لي من العجب وانا بردو ليهو قال انا مستحيل اقولو الآن دي حاجة بيني وبين العجـب .. والشئ الغريب العجب أمن على الكلام دا .. فيا وليد كدي خليك من الناس الما بتلعب كورة إلا في سودانيزاونلاين دي .. كم مرة جوه الميدان اتقالت ليك حاجات ما بتتكتب إلا بالنقط .. من خصمك في مباريات حساسة وغير؟ كم مرة قلت حاجات ما بتتكتب إلا بالنقط .. لي خصمك في الملعب في مباريات حساسة وغير حساسة .. أقول ليك حاجة .. خليك من اللعيبة الفي الميدان .. حسع دي مش انتو شلتو الكاس واي حاجة ..؟ في ناس كان دورناها ح تقرا البشيب الراس .. علشان كدا الحركات البيض البيعملو فيها جماعتكم وجيت يا وليد للاسف فتحت ليك بوست كامل ليها .. وزي ما شايف كتااار جدا منتظرين الفرصة دي في هيثم مصطفى علشان يطلعوهو ما بيعرف اسمه زاتو .. الحركات دي ما كان تفوت عليك .. انا شخصيا كنت داخل هنا الليلة علشان اتكربن لمن اعرف حاجة .. لكن بالجد القاعدين تعملوا فوقو دا يا وليد صدقني خلاني اكره ليك حاجة اسمها تشجيع وحاجة اسمها كورة .. وحاجة اسمها قدم .. حسع دي لو العجب دا جا قال كلام تاني غير الاستعراض البتعملو فوقو دا .. وقال لي الناس البتقرا الشفايف دي .. ياخ الحصل بيني وبين هيثم قاعد يحصل كتير .. ودا ميدان كورة .. إنتو قبل كدا زيدان دا مش بقى حيوان عديل ونطح متريزي في كاس العالم والكاس بره دهب والعين بتشوف والدنيا دي كلها بتحضر .. هل الطليان جو قالو زيدان دا (تــوور) بعد حصل الحصل متريزي عمل نايم في لحظته وشال الكاس من فرنسا بعدما نجح في استفزاز اخطر لاعب في العالم وطلعو بره .. بالاحمر .. طيب لو حسع دي جايين هنا عاملين لينا فيها بتاعين قراية شفايف وقراية بدون دق .. منو فيكم كان اقرب من الحكم في الميدان .. من المراغبين البره مش المراغبين ديل مفترض انهم يكونو مراغبين الكم وعشرين لاعب ديل ..؟ طيب مالم ما كلمو الحكم يطرد هيثم ..؟ متريزي دا زاتو .. بعدما الأمور هدت .. مش جا قال انا شتمت زيدان بي شرف امو واللا اختو ما عارف ؟؟ أنا لو كنت منظم للبطولة كان اديت متريزي دا كاسين زي كاسات العالم دي .. كاس انو نجح يطلع زيدان من طورو ويفقد الفريق عنصر مهم جدا .. وكاس تاني انو بالرغم من طول المسافة قدر يصرح بالكلام دا .. وبقلع كاس العالم من ايطاليا وبديهو لي زيدان في مباراة تكريم خاصة جدا .. واجيب متريزي او مترازي جوه الميدان لي زيدان ويحاورو في فنجان قهوة فوقو نجوم .. والفنجان يجيبو مترازي معاهو .. يتحاورو فوقو ويغسلو ويرجعو تاني الفضية .. دا علشان شنو يا وليد ..؟ دا علشان زيدان ما جا قال والله مترازي شتمني بي امي وقال لي كلام فاحش .. السعودي بتاع المريخ دا قبل كدا يا وليد .. الحركة العمله للجمهور بي يدو .. دي مش مفترض يقطعوا ليهو يدينو الاتنين فيها ..؟ ولي منو للجمهور كمان ..؟ إنتو نسيتو الحاجة دجي واللا علشان يعني السعودي دا ما كابتن السودان وهيثم البرنس سفير النوايا الحسنة ...؟ يا وليد عاين .. جماعتك ديل العايزين يطلعوا هيثم دا كعب وما بيعرفه .. قول ليهم احسن ليكم شوفو ليكم طريقة افرحو بيها بي اول كاس للممتاز بعد خمسة سنوات ودي خطوة كويسة .. لكن البتعملو فوقو دا .. ما ليهو علاقة بالكورة ولا بالتشجيع .. ويعجبوك ابطال الديجيتال في سودانيز .. طوالي طلعوا الفورمات بتاعت العنصرية .. وقاعدين يعبو فيها .. واحتمال كبير يكونو مودنها لاهاااي .. ياخ والله الواحد فوقم في (حرينـا) تلقاهو كانما مخلي ليهو ام زول خادم ولا عب حايم في الحلة .. مضحكين حد الامتاع .. عالم مضحكة جدا. البتقال في ميدان الكورة .. يبقى قاعد قبلو في ميدان الكورة دي حاجة بيعرفوها الناس اللعبو كورة .. ناس سكج بكج ديل .. يمشو يشوفو ليهم شغله تانية دي كورة ما اللعبة بتاعت الليمونة البختوها في الملعقة ديك ..