الشعبية نجمة تزين سماء مدينة الخرطوم بحري

Quote: طبعا يا جماعة ولوقت طويل انا كنتا قايله انو ما عندنا اهل لانو من صغار واحنا في الشعبية كل الجارات خالتانا وعماتنا وكل الجيران اعمامنا وخيلانا واولاد الحي اخوانا طبيعه مجتمع الشعبية انها تغنيك عن اقربائك لانك في منطقةالشعبيه ما بتحس بالغربه او البعد عن الاهل لانو كل بيت هو بيتكم وممكن تاكل وتشرب وتغسل هدومك في كل بيوت شارع بيتكم وتعزم ضيوفك كمان عند جيرانكم عادي ومافي شي اسمو انو الحاجه دي ابوي جابها لينا برانا لازم تتوزع على اولاد الجيران ومن اكتر المناظر الراسخة في مخيلتي ان كل خالتنا الجيران لما يجيك ضيف بتكون جايه وتحت توبها مغتيه ليها شي جايباهو عشان تستر بيه الحال قدام الضيف وما كان شي غريب لما تدخل بيت جيرانكم وتاخد حلة الملاح او كسرة او عيش وتمشي بيتكم ولا غريب لما تحتاج لشي كنا بندخل ناخدو من الجيران حتى لو ما قلتا ليهم لانو الحالة واحدة لما كان يحصل عرس في الحلة وقبل ايام منو تلقونا كل البنات اتجمعنا وبدينا في النضافه و امهاتنا جاراتنا في عمل الريحة والتجهيزات والخبيز ومشواير السوق الجماعية ونخيط هدوم زي بعض لدرجة ما بتعرف منو اخوات العورس او العريس من بنات الجيران وكتير لبسنا مع بعض الهدوم وباتذكر انه لو كان في واحدة من بنات الجيران اشترت ليها شي جديد وهي عارفه انك عندك مشوار عادي كان تديكي الهدوم بتاعتها الجديدة وشباب الحلة بيعملوا نفير يبدوا في اصلاح بيت المناسبة وبيضربوه جير وقبل العرس بيوم كل خالتنا الجارات بيبتوا في بيت العرس للصباح بيساهروا في نضيف الخضار وكل واحدة بيتكون عليها حله ملاح تشدها ويومها مافي زول في الحلة بيطبخ لان الكل مدعو للمناسبة ولما مثلا السيرة تجي من برا الحلة بيوت الجيران بتكون مفتوحه ليهم ياخدوا واجبهم وبيكرموهم كانهم في بيت ناس العروس واكتر باتذكر كيف كان بيت المناسبة مليان بالناس ولو دايرين شي بينادوا على اي بت من الحله لانها بتكون عارفه وين الحاجة الفلانية مختوته وبتلقا انك بتفتش على ناس الحله لانهم اقرب ليك من الاهل وهم الكانوا معاك و كان بنتفق على الرقيص وكان ولاد الحي كلهم اخوانا وما بيقدر اي غريب من بره الحلة يقوم يرقص البنات الكل بيعرف الكل كل زول بيعرف في شنو في بيت جاره وعادي لما نمشي السوق تكلم بت جيرانكم تمشي معاك وعادي لو ما عندك قروش تاخد من جارتكم لحين ميسرة حليل كلمه خالتي فلانه او عمي فلان وكنا بنحسها طالعه من جوانا وكان عادي ولد الجيران يوصل بنات حلته لو لقاهم ماشات مكان وعادي احد الاعماما يوجه ملاحظة لاولاد الجيران ومافي زول بيزعل لانه عمهم