الشعبية نجمة تزين سماء مدينة الخرطوم بحري

Quote: هاكم الزمن الجميل يا بت خضر وهنا بالذات لازم نجردكم من الالقاب و مهما تصلوا درجة عالية من التعليم إنتي وكل زميلاتك وزملانك لما نتكلم عن الثروه الموجوده في الشعبية وهي ابائنا وامهاتنا يرحمهم الله الاحياء منهم والاموات . بس كده اقعدن وركزن معاي ولما اكون بتكلم مابحب الونسات الجانبية . وارفعن طرحكن ديل قبل كل شي عشان شنو . عشان بتكلم عن اسياد الادب والذوق .و ديل يابناتي مدرستهم كانت الحياة وعلّمهم الزمن وكوّنوا اجمل اوركسترا في تاريخ الاجيال زي اوركسترا ناس (عاطف بلو )والحياة عندهم ساقوها بالنوته الموسيقة وزمان الواحد فيهم بيعول عشرة في بيت الشعبية واليوم العشرة ما قادرين يعولوا امهم وابوهم واليوم انتي تفضلتي و ذكرتِ اسم واحد منهم وهم من جرعونا كأس حب الشعبية وعلمونا الادب معقول يمر مرور الكرام وهو من اعمدة سوق الشعبية (العم نوري)والايام ديك انتي صغيرة وساكة الاكاديميات وكان السوق يعج ويهج بالناس وكانوا بجوهوا امك واختك او واحد من اخوانك . وياستنا داك زمن تاني ما بحيى وتاني ما برجع مثله ( والعم نوري ) الرجل الفاضل الكريم وياما كان بيأكّل الناس العندهم قروش والما عندهم في سوق الشعبية من غير حساب ومن ثقافتهم الحساب عند الله سبحان وتعالي . واليوم داك السوق كان ليهو رونق والناس جميله وحلوه والسيره تجي قالعة من حلتكم بقيادة ام ناس عدلي وخالد المبشر ولما يحصلوا عم عابدون تعالي شوفي التحايا الجميلة شي عربي وشي رطانه الى عم أبدون (مِنبو . ساير ) وبالعربي معناها (انت وين وعامل كيف )وكتبت (أبدون) كما كان يحلوا لاهلنا الدناقله وأبدون في ذلك الوقت داك راشي البرسيم بالموية وتعالي شوفي الرائحه الطيبة لما تمشي عكس الهواء والصغار حوله بيشرّكوا للطير والناس تأكّل البهايم والصغار تشرب لبنها و تنوم نومه هنيئة واحلام مكرره والزمن ده البنات بقولوا ياماما ويابابا الغنم ده شي ما حضاري وبوسخ البيت لمّن البيوت جاعت وحتى كلمة يمه وابوي المدفقة حنية خلوها. اها يقومن يجتمعن مع زينب العطا وبناتها ويكرن على السوق عليك الله يا ستنا شفتي حريم زمان ديل كانو سمحات كيف يعني ناس الحقيبة لما غنوا ليهن ما خاتين وبالذات عن شلوخن وفصيداتن قالوا . والشلوخ مطارق جوز البرتكان الكان في قلبي حارق بيني و بينو بس ميه و الف فارق يا قمر دورين ضوا للمشارق برّد نار أبوه ـــــــــــــــــــــــ الناعسات عيونن نور جبينٍ هللا مابين تبري صافي واخدراني اللون مفدوعات اديهن والحشى المبروم _____________ عامت الفرخّة .... تفجع الوزّه وداهيه في اللخه تنطوي برصه .... تعلى تتمخى والفصيدة تقول .... للزُمام إخّ وطبعا زي ما عارفين اللخه هي عجين القمح ( اللخوخه ) وتستعملها النساء ( للدلك والعرك ) نواصل. الناس بعد داك تقوم تشتري التسالي والفول من حجة زهره ويدخلن الحريم على الفحّامي (حسن )وتعالوا شوفوا النقه يا حسن فحمك دقه كده ليه ويا حسن الطلح والشاف بتاعك ده قديم ومسوس وطبعا للنظافة والجيه والحريم كانوا بيجن السوق على سنجة عشره التقول ماشين حفله والله كانن مرتبات ترِتيب . وتعالي شوفوا بعد داك المقالده والسلامات والحنية ويعرفن احوال بعض فلانه عرسوها .فلانه اليوم ختان ولدها .واليوم سماية فلانه . وفلاني ما جاملتني ما بجاملها ودفعت لي في كشف طهور ولدي واحيانا تسمع حاجات غريبة .وده كلوا وسطهم ياعم نوري جيب خدره شابة او طماطم سلطه وتكون حمره وقويه وكمان طماطم ملاح وتقوم (خجيجه ) ام خاطر المرحوم تقول (لمجذوب )الخدرجي عشان عامل خنفس يابوقجيجه وحجات تضحكم وعم عبد الكريم بناحية تانية حريم كابين معاهو النقة ياريت ياعبد الكريم الدنقلاوي تكون جبت لينا (كداد ) وهي تعتبر اكلة دناقلة وبيشلوها ناس شهاوه و عشة وفاطمة المحسية و نفيسة ويغشن سندس الحلبية ويشيلن منها الفسيخ والملوحه من زوجة عباس . وبنات الزمن ده والله ياماما الفحم بتلف اظافري والتوم ما بقشروا لانه بغير ريحة اليد ومع العلم يقال عن التوم بفتح شرايين القلب وعشان كده حريم زمان قلبهم طيب وحنين وبهناك حريم يناقشن امورن وصناديقن لمساعدة ازواجهم عشان يشيلوا معاهم الشيلة التقيلة عشان الولد يبقى دكتور والبنت مهندسه ويغنوا ليها . (بكره تخشي المدرسة وتبقي لي مهندسه وتبني لي عمارة مكندشة ) ووحدات منهن مع (خلف الله الجزار ) وماقلت ليك اديني فخدة عجالي وياريت لو تفرمها لي عشان اعمل منها كم حاجة ومنهن مع (كمال الجزار ) ياكمال شكيت على الله اسع ده لحم شنو تديني جلافيط وعم دهب هناك بيعمل في ( الربيت ) من الشحم وبواقي اللحمة ولما يخلص الصغار يطلبوهوا منه ويجيبوا الشطه وبعداك (اسكتِ ساكت )وعم دراج العجلاتي عامل مناظر وصوت الحديد . كرو. رو . وازعاج شديد وياولد مالك تأخرت في ايجار العجلة اذاً عليك غرامه . والناس تمشي دكان التوابل عم عبد الرحيم وبشير وفقيري والولي والهادي ومحمد سعيد وحاج علي اليماني وبالقرب منه الفلاتيات ينضفن العيش و عبد الله ابوصلعة (الحلاق ) ودكان التلج عشان يطفوا بيهم قلوبهم البتنحرق في تربية الاطفال وياولد انت امشي شيل القمح للطاحونة ويطحنوا ليك قداموا قمح وراهو قمح . والزمن داك السوق فيهوا ناس تتوزن بالدهب في السوق وحتى في النهاية لم ينسوا العمل الخيري العظيم وختموها بأدخال الاطرش الاسلام و اتفقوا على ختانه في المسجد وعملوا ليهوا كشف شاركوا فيهوا الحريم قبل الرجال . وبعد كده ممكن تجيبن الفته وبالله وصي بنات نوري يكترن البصل والطماطم واكيد الحاجات موفرها الرجل العظم ( نوري ) لاني خلاص جعت . وبالله يادكتورة احكي لينا عن السوق الان . ( مرفق صورة احدى زبائن العم نوري حجة عشة مع المرحومه ووليد ) ودمتم ........ وليد عبد اللطيف

(عدل بواسطة الحاج حمد الحاج on 05-20-2009, 09:15 AM)