الشعبية نجمة تزين سماء مدينة الخرطوم بحري

Quote: اخوناعادل محمد عثمان ومحنة الشايقية ياحاج مالو عادل مجافينا طول ماطل علينا وهذه الايام ايام محنة والفه وشوق وقول ليهو شيل wanted ورجع صورتك (وفيها ايه لما انسان بعزك لما يحفظ ليك صوره فيها . قامتك . وابتسامتك . وسحر عينيك الخجوله ) تعرف ياود الدكتور والله لو ما الخواجات عملوا الكمبيوتر كنا اسقطنا صورتك من الذاكره الخربه ياخي اهلك الشايقيه حنينين بالحيل قلنا كان ممكن تكتب لينا عن عيد الام وتتحفنا ( يايمه رسلي لي عفوك وانجيني من جور الزمان ) وزمان بقدر مانسمع كل انواع الغناء نجي ونقيف عند الطمبور ونلقاهو شي يحير فيهو حنية متدفقه والم وفرحه اليوم داك كان طبعا لما يكون في طمبور عند ناس جل اخو عبد الواحد اولاد الخليفة واصلا كان قريبهم شيال لود اليمني وذكرنا ليهو ياحاج حمد يعطيك العافيه اها من بدري الواحد يكون مسجل حضور في بيتهم وتسمع غناء غناء ولو ما الواحد حسه الكلمه وعاشها لايتمتع بها وكأن اهلك ديل خلقوا للفن للشعروالحب وهذا لبساطة كلماتهم وعفويتها وصدقها بلهجتهم الحلوه معبرة عن واقع معاش وسمعت عندهم اغنية حكوا لي قصتها وقالوا واقعية ولا من المعلقات السبعة تقول اوبريت تخرج الاهات والزفرات وتهز المشاعر وتلمس الاوتار الحيه وتسيل الدموع . ( والقصه هي ) قالوا شايقية اصيله اخلصت لحبيبها وفارس احلامها وافردت له كل مساحات قلبها. سافر بعيدا عنها في سبيل تحقيق احلامها ولم يكن حلمها سوي الحبيب نفسه تجاذبه الحديث وسط النخيل نهارا وعلى الرمال تحت ضو القمر ليلا . تخيلوا المنظر المبدع الجميل وكانت رسائل الشوق تاتيها عن طريق صديقه ( امينه) وبعد سنوات انقطعت الرسائل وعاد الحبيب بعد فترة وتهيا الكل في القرية الوادعه لرؤية لقاء الاحبه الذي ليس من بعده فراق وكانت المفاجأه طلب الحبيب يد الصديقة الامينه التي كانت تراسله سرا فبادلها الاسرار والعواطف وتزوج الحبيب الصديقه ( الامينه ) بعد كده قمت الفن والابداع بلسان ولهجة الفتاه المخدوعة . (1) حبي انا ليك كان زادي كان جوه الحنايا دفين كنت بضاري من الناس وخايفه عليهو من العين عليه انا كت بصوم وافطرعليه بكـــابد النـــــارين كت بحسب سنين الغربه لما تعود تجيني متين كت برجاك فوق النار لما وكت لقانا يحين نونس في براءة اطفال من الحب نروي ننهل زين وكل ما يوم يزيدالبينا لما بقينا غاب قوسين _________ بعد كده المخدوعه تصف للايام الخوالي موجه اللوم للحبيب التافه بعد اكتشاف قدرة . (2) اتاري انا كنت فيك مخدوعه وكم من زي مخدوعين ما قايلاك حبيب الاف وقلبك قبله للضالين ما قايلاك تنسى حبيب صبر راجيك تسعة سنين كيفن هان عليك تنساه زولا كان عليك حنين وتشغل بالك الاشواق لمن تذبل الياسمين كت دايراك بسمه عريضه في وش الزمان الشين وكت دايراك ساعة الحارة ......................... وكت دايراك مقنع حوبه وكت المضاري يبين وكت دايراك فارس احلام تشاركني ونتم الزين وكت بحلمبك انت معاي مجرتق بالعديل والزين وانا الابحرت راكبة الموج اكيد مرساي بين موجتين ______ بعد كده المخدوعه تودع الحبيب القذر وهنا يصور الفان بصوته الحنين الم الفراق . (3) وداعا وداعا وداعا ياسراب خداع محال مابيروي عطشانين وداعا ياحلم عابر يسعد ويفرح النايمين وداعا ياكلام معسول حدو ومكمنو الشفتين وداعا يا قلب قساي لا بيحن ولا بيلين وداعا ياسحابة صيف شايله مطر ضليل ورهين تبشر بي خريف جايينا ياما الناس رجوه سنين كل زولا يفكر فيها ما معروفه تنزل وين ____ ترجع المخدوعه تطيب خاطر قلبها ومكمن اشواقها بالله الحيوان ده بستاهل قلب زي ده ياعبدون. (4) والف سلامه عليك ياقلبي مسالم وديمه طبعو حنين يتاورو الشوق ويلعب بيهو تنحر في حشاه السكين تعاودو الذكرى تنخر جوه وحالو يحنن المسكين ______ في الابيات التاليه ود الدكتور تشوف قمة الوفاء والاكرام للمابستاهل شوف (5) واخيرا الف سلام قبل ماتجف دموع العين بخيت وسعيد عليك ان شاء الله يبقالك عمار وبنين قلبي انا خلي في اناتو بعدك ياما راجي انين ____ وهنا قمت تصوير الم المخدوعه ونسيت منها ابيات وتقسم على قلبها ان لايحن ثانيه (6) لو كان ياقلب حبيت بعدو بعد حلفت يمين ان شاء الله ما ينتم ليك مراد لاتضوق حلو لازين وعمرك ماتجيك سعاده ماتتهنا قول امين وتاني الحب عليك حرمان وعد الحر امانه ودين ____ الله ياود الدكتور نفسي قام عشان تعرف السودانيين حنان ولكن الشايقيه احن واخر جلسة طمبور كانت سنة 96م في الشعبية جنوب في بيت ناس محمد احمد الشايقي خلف دكان جوبي . برضو تقول ياعبدون ايام الجامعه عشان نبقى في الكلام ده عشان كده بارينا مجدي كنه والكوره وناس ما بتفرق بين ضرية الجزاء وضربت الشمس . بالله ياعادل عثمان ما تنقطع وشوف تعبتنا كيف ومن الطرائف اخوك عمر في محاثة تلفونية قال لي ياوليد زمان كنت بتضرب ولا شنو سامحه الله وانا للان ما حافظ جدول الضرب . ومن هنا ابعث تحياتي لام الكرابيج الدنقلاوية الطيبه متعها الله بالصحه والعافية بمناسبة عيد الام وكل سنه وكل امهاتنا الطيبين طيبين .والبركه في بوست الشعبية جمعنا مره اخرى وتوقعنا حاجه من عزام بهذه المناسبة بس خزلنا .