الشعبية نجمة تزين سماء مدينة الخرطوم بحري

Quote: من ذاكرة ليالي الشعبية :- الشعبية والطرب الجميل الاصيل وعندما يسدل الليل ستاره ويغطي على عصريات الشعبية تجد كل شباب الحي مشتتين زي الودع اتنين اتنين واخوي واخوك وحبيبي وحبيبك يتفاكرون ويتسامرون ومجموعات موزعة حسب كل حله . مثل حلة المارد . حلة الصداقة ........ الخ .نقوم نجي حلة الهدف وشلتهم والله الجماعة ديل انا كرهتم والله يسامحنا.وكان يقال لهم حلة المثقفين وتتكون من الاستاذ محمد موسى والاستاذ احمد عثمان ود المازون وشقيقه محمد بوذا وشرف وعز الدين عبد اللطيف والمرحوم السر نسيب كمال الزبير وكمال الزبير واحيانا يتحفوهم بالزيارات كل من شمس الدين ساتي والمستشار حسن طه وينضمون اليهم اصدقاءهم من مناطق اخرى .فيتمجلسوا في الحجر ويتمايلوا و يتكلموا مره في السياسة ومره في الادب ومره في القضايا الحياتية .وانا على علم بتكون كيف الجلسة ونهايتها ومن انا صغير بحب غناء الكاشف ( الليل ما بنومو لاني انا حارس نجومو + وحجبوهو من عيني والا من قلبي ماقدروا حجبوه ) وانا عشان ما انضم اليهم اجيهم ليك بوهمة مسألة مستعصيه عندي فيقوم واحد فيهم يمشي بي نور العمود ويبتدي يشرح وانا بكون مركز مع الجماعة الهناك يعني الناس ديل كانوا في قمة الطرب والتطريب و بعد ما تشاوروا وتفاكروا قالوا وليد بدل ما يجينا من بره وفي يوم يكون عامل سلاح الطيران احسن يكون جالس معنا وتحت عينا ومع وضع تحذيرات بعدم اهمال الدراسة واخوكم يقوم ينخرط معهم وجدته عالم اخر ولقيت عز الدين شقيقي صوته جميل ولكن دمر النظرية التي تقول كل فنان باستطاعته ممارسة كرة القدم بكل سهوله لان كلها ايقاعات وهو حب كرة القدم وفشل فيها فشل زريع ونصحته بالدندنه فقط .وكل واحد له اغنيات مفضله واثناء الغناء كثيرا ما تسمع يالله + وجع + ما منعونا ماحرمونا + ياسلام + وهنا الشاعر كان يقصد كذا تجدهم يتمايلوا كالطيور عندما تسبح في الفضاء وبحركات عناق السحاب مع بعضها البعض وهم يعانقون قمة النشوه والطرب ومن اغانيهم . (1) الفني في البرهه القليله فارقني ما بين يوم وليله مشهد كان يمثل غيث يوم لاقى ليله بالحب المؤكد والعاطفه النبيله ـــــــــــــــــــــــــــــــــــــــــــ (2) ذبت وجدا في هواك ياحبيبي ولم اذل عايش على سفح الامل يامن صليتني بنار هواك ورفعت قدري لمستواك والحكمه يازينة علاك تزداد جمال وازيد هلاك ــــــــــــــــــــــــــــــــــــــــــــــــــ (3) في ربوع بحري لاقيتو بسم حيني حيتو في ربوع بحري لاقيتو وما كان املي القاهو فتح قلبي وسكن فيهو بخمرة حبو اسقاهو ،،، قلبي على الاسى تعلم وحين ما اذكرو اتألم وما بسلاهو يا احباب مهما فؤادي اعياهو طالعين كنا في نشوه على البلدية مرينا ناجينا الطيور في الروض وقلنا ليها سامرينا سامرتنا بالتغريد ووريناها معنى الريد قمنا وقالت اطروني وقلنا ليها اطرينا حضرنا الكبري والكبري راجعين بقعت ام درمان مزجت دموعي بدموعها والجو كان امان في امان ودعتو ورجعت براي لا روح لافكر لا راي وين قلبي التركتو وراي غايب عني ليهو زمان وانا قلبي تركتو هناك في الشعبية وبهدي الباقي من عمري ليكم ياحسان الحور (شباب الشعبية ) واشرح ياعابدون للشباب اين موقع البلدية زمان للماعارفين . ومن ونستهم عرفت جلساتهم كانت ممتده تارة في البلدية ومره في نادي النسيج ومره نادي العمال وانا اقول الناس ديل مالهم اليوم غائبين لان فرصتي الوحيده معهم في الشعبية .بالجد كوكبه عجيبه وتعالو شوفوا لم يغنوا الكواكب احتفلوا بالقمر تقول القمر واقف قدامك وشوفوا الوصف . الكواكب احتفلوا بالقمر ام دي روضة درية السمر الطريف شبك رشرش العمر العيون سيوف تقضي ما امر ،،، ديسو للقديم وصل الخبر الصدير برز قلع انتبر النهود رخص لسع ماجبر قلبي هج وطار عنو ما صبر ،،، الشعر نزل للدروع ستر زحم القديم ليهو كم عتر الصدير قلع والرديف نتر الضمير تعب حالتو في خطر ،،، العشق نصيب الغرام قدر والقلوب تطيع امرك الصدر نارنا ما انطفت شوقنا ما فتر ضعنا والنفد فينا ما نــــــــدر ــــــــــــــــــــــــــــــــــــــــــــ (4) ياحمام الايكي سجعة نسأل ان الله رجعه ياسلام يالزان جمالك الكساك اسباب كمالك خدك البنريدو مالك خاتو في كفك شمالك ،،،، ديمه في فكرك سهودي ديمه غارق من رهودي انت اظن عاجبك سهودي مسلمه وقلبك يهودي ،،،،، ديسك للمشاطه قلك يسترك لو كان مكلك ريدي لغيرك مقلق مالي والخط المعلق ـــــــــــــــــــــــــــــــــــــــــــــــ وكسرات غريبه ومع كسرات شعباوية نقول الرحمه كل الرحمه والدعاء لاخونا حسن صالح هجان والجقدلي فنان من الطراز الاول وامثالهم كثر وهذه طبيعة الشعبية وامسياتها وكما معروف ان الانسان بيتطبع بالطبيعة وكما قال الفنان خضربشير في لقاء صحفي له .سألوه ماذا تهوى . فرد والرد موجز ومختصر ( اهوى الزهور في تبسمه واهوى الطيور في ترنمه واهوي الطبيعه الحالمه )وهذه كانت طبيعة الشعبية البهية ولنا لقاء في حله اخري ودمتم في رعاية الله .