الشعبية نجمة تزين سماء مدينة الخرطوم بحري

Quote: أخي العزيز الحاج حمد , أخوتي الأعزاء السلام عليكم ورحمة الله حادثت قبل أيام الوالدة ستنا عباس (ربنا يديها العافية) وأبلغتها تحياتك وسلام قريب القرابة أخونا صلاح شكوكو وضممت صوتي لصوتك مطالبا" بإرسال قراصة (تلاتة بوصه) بأول طائرة لوفتهنزا وستكون مفاجأة للشفع وأظنهم أول مايشوفوها حيسألوا عن مجال وطريقة الإستخدام والولية الألمانية أول شئ حتفتش في الكرتونة عن الكتيب المرفق , الذي يحتوي على إرشادات وتنبيهات , مثل مدة الصلاحية وعمر الأشخاص المسموح ليهم بتناولها ....الخ . أتمنى إنو الحاجة ما تغيب عليها النقطة دي. سلام كتير ليكم من الحاجة , سلام موصول للأسر في الشعبية وفي بلاد الشتات ولكل رواد البوست العامر دائما" بإذن الله . أبلغتني الوالدة أنها كانت قبل أيام في الشعبية بمناسبة زواج أخينا العزيز الفاتح عبدالله الأمين إبن الرجل المناضل عبدالله الأمين , الذي عرفته منابر العمل العام بالشعبية جنوب وهو من جيل العطاء الذي لاينسى. وإذا ماعرفته ياحجوج أوصف ليك بيته وهو مقابل لبيت ناس العزيز المرحوم عادل حسن العوض (الشايقي) وأخوته مجدي وحاتم ومحمد أحمد (لهم ولوالديهم ولبقية الأسرة التحية والحب). التهنئة للفاتح وأن شاء الله بيت مال وعيال. شكراً للعزيز صلاح لصورة عصام والفريق الفني وأجمل مافيها مايبدو فيها من إهتمام التيم بالشغل ووراهم عصام يرقب الأداء بعين الخبير. وياحاج الزمن دا مافي دعاية مجانية وبصراحة 10% دي إكرامية لصاحبك وود دفعتك ما فيها أي كلام . وبالمناسبة أنت عينت ليك مترجم ولا عندك قاموس نوبي-عربي؟ أخي عادل محمد عثمان لك الشكر على كلماتك الطيبة طيبة بلدنا وقد أجملت في كلمات ما أسهبـت أنا في سرده وأتيت بخلاصة ما كان يجيش في النفس وأنا أبحث (مع معناة) عن الحروف , فالشعبية العتيدة قلعة للخصال الحميدة ومنبر لمعاني الأنصهار , ومجتمع قدوة , لو حذا حذوه بقية السودان لما رأينا ما نرى ولا قرأنا ما نقرأ من المهازل. حفظك الله وحفظ كل غيور على تراب النيل الغالي. ويا أخي لو كنت ترى فيما كتبته نفعا" للمنبر ففعل به ماشئت فشخصي الضعيف وما يكتبه ملك لأهلي ولوطني االحبيب. أخوتي أولاد دفعتي صلاح , بدرالدين وعزام الصورة دي أمتحان أظن أنو مابمر فيهو. أولا" ماعرفت غير 2 من 11 , يعني النتيجة (أعد) لو كان إمتحان إنشاء. ومن سياق كلام بدرالدين فهمت أنو أنا مع الناس الفي الصورة وأنا ما شايف نفسي في الصورة , معقول تكون الداكرة خربت للدرجة دي ؟ . وعزام عايز يساعدني عقد الأمور زياده. الزول القاصد إنو شهاب مرسي ده أنا أعتقد أنو أسامة الغزالي. على كل حال أنا عملت العلي وكتبت ليكم لسته طويله (من الذاكرة) وماشايف واحد فيكم عدل فيها حاجه. يعني كلها صاح ولا مجاملة ؟ .. خايف تكون مجاملة وإكرام ضيافة وبعدها تكبوا لي الحقيقة مرة واحدة. رفقا" فما هو إلا إجتهاد ومحاولة للوفاء لذكرى أيام عزيزة. في إنتظار حل " لغز الصورة الغامضة " لكم مني خالص الود. وقبلما أختم أرجو من صلاح أن يبلغ الأعزاء متوكل وخوجلي ومحمد أبناء جارنا المرحوم العم أحمد علي فريد الذي علمت بوفاته وأنا أتصفح صفحة سابقة من صفحات البوست , لعمنا أحمد علي نبتهل لله العلي القدير أن يدخله مدخل صدق وأن يضاعف في حسناته وأن يتجاوز عن سيئاته وأن يلهم أسرته الطيبة الصبر وحسن العزاء ...آمين أخوكم أمير قناوي 27ـ8ـ2008