|
Re: مدرســـــة المســاكن الشعبيــة الابتدائيــة جنــوب (Re: وليد عبد اللطيف)
|
ورسالة من دكتورة روما
Quote: كزبه كبيرة اخوي عز الدين عباس الفحل كميه من النقاء في وصفك لي ذكرياتك ويا اخوي كلنا اكلنا القرع وما بيفوتك خالتك ليلى المصريه من اشد المعجبين بالقرع لدرجه كانت بتعملوا لينا مربي يعني في الفطور سندويتش المربي بتاعت القرع دا اساسي وفي الغداء ملاح القرع ولم تتجلى تعملوا لينا محمر مع فلفليه زي سلطه لدرجه كنا قالين انو القرع هو المحصول الوحيد عندنا زوجت عمنا وعمتنا في نفس الوقت الحجة ناديه الحاج ادم الله يطول لينا في عمرها كانت بتقول لينا لو عصروكم بتطلعوا قرع
واتاثرت بي كلامك ووفائك لي الاستاذ المرحوم فضل ربنا يوسع ليه قبره ويتقبله قبولا حسنا هو وكل استاذ ساهم في تعليم الناس واصل لينا السرد الجميل لذكرياتك في المدرسه
عجبتني قصة الفيران وما تزعل نقول وبلغة اليوم انو صاحبكم كان من احدى هوايته تربية الفيران وممكن يقدم ليه على قرض يفتح ليه بيت شووب محترم
اخوي وليد كيفك وكيف بناتك والاخت زوجتك ما قصرتا في قصه البت مع حنان النيل انا متا بالضحك ومبروك عليك دروس الكمبيوتر شايفاك متقدم يعني بعد شويه نسمع عن وليد غيت على وزن بيل غيت وماشا الله عليك يا وليد ربنا يبارك ليك كمان وكمان خلاص افتح لينا في البوست دا فرع لمحو الاميه النتيه تحت شعار لا للاميه الكمبيوتريه في حلتنا الشعبيه
اخوي عادل عثمان شكرا ليك وربنا يجبر بي خاطرك يارب وعندي ليك قصة بمناسبه هل كان عندنا كزابين ولا لا
اسمعوا يا جماعة والدتي الحجة ليلى من مصر واحنا ما حصل مرة جونا خالاتنا او خيلانا وكل الناس الفي الشعبيه عندهم خلات وخيلان وعمات واحنا بس اهل ابوي وكانوا مقلين في الزيارة لاننا كنا بنزورهم نحنا في حله حمد او حله خوجلي او في الصافيه حتى ناس عمي المرحوم بابكر مقبول والد ناس ذو النون واوس وويه ابو هريرة البيتهم ملاصق لي عمنا مصطفى شريف كنا علاقنتنا بيهم ما لانو ابوهم وابوي الله يرحمهم اولاد عم لا كانت علاقتنا بيهم قويه لاننا من الشعبيه
المهم نحنا مستغريبن ليه ما عندنا خيلان وخلات مرة طقت لي في راسي لانو البنات كانوا مجنيني وين خلاتكم وكدا المهم عشان اتخارج كزبتا وقلتا ليهم انو خالتي انا ح اجيب ليكم صورتها بكرة ولما رجعتا البيت من الهم ما اتغديت وقاعدة افكر وادعيت لي ربنا انو بكرة ما يجي لاني ما عندي اي صورة لي خالتي المهم كوركت لي ما جدة ساتي اخت اخونا شمس الدين ساتي وقالت لي اجي امشي لي سميه خلات ناس بلقيس احمد البشير بت ماما احسان ساكنين جنب الحديقة المواجهة لي المركز الصحي عشان ارجع ليها المجله بتاعت حواء المهم شلتا المجله وفي الطريق كان اشوف ليك صورة سميه الالفي في الغلاف وطبعا ما فكرتا ولا لي ثانيه واحدة لانو زي اللقيت لي كنز وشي ح ينجدني من الحلاقيم المفتوحه البيتسال كل يوم عن خالاتنا وقلتا خلاص الله جابها لي وشحتا عم سليمان الرترزي مقص واداني ليهو ومشيت قعدتا في بيتنا براي وقطعتا الصورة وكل صورة لقيتها لي سميه الالفي جوا المجله ورجعتا المقص لي عم سليمان الترزي ومشت وديت المجله لقيت اميمه اخت بلقيس اديتها المجله وجريت البيت واميمه تكوروك لي قالت لي انها ما ح تودي المجله لي خالتها سميه عشان خالتها هاجت فيها لانها ما سرحت هيفاء بت خالتها المرحومه
طول الليل عايزة بكرة الصباح يكون حسا لاني عندي صور ومشيت المدرسه اول زول مشيت بدري وما كان في جمعيه وهو نظام نجي بدري نراجع مع بعض الدروس و لا كانت في حصه صباحية ودي حصه بتكون قبل الطابور المهم راجيه ليك بنات الفصل ولما جوا قلتا ليهم انتو قايلني كزابه اها دي صورة خالتي وهي ح تزرونا قربيا وهم بيقوا يسالوني هي صحي سميه الالفي دي اخت امك بس ما بيتشابهوا وليه خالتي ليلى دي ما مثلت زي اختها طبعا الكزبه جرت ليها كزبه تانيه وعاشرة وانا بقيت نجمه في المدرسه والكل عايز يتصاحب معاي وكل ناس بيفتوا مع بعض عايزني افت سندويتش المربي بتاعت القرع او الفول البيكون مطبوخ بي الصلصه والتوم معاهم ولو دايرة لي استيكه بالقي عشرة ايدين ما دينها لي المهم وريتهم الصور وكل مره تجي كورجت بنات يعني مجموعه من البنات عايزين يشوفوا الصور وما خليت زول يقرب من الصور يعني العرض من بعيد وكل مرة اخت ايدي على قلبي لانو لو في معلمه درت ح تسال امي وح اطلع كزابه ومعدتي تقرصني من الخوف وكل ما معلمه تجي داخله الفصل انا قلبي يقع في بطني ويدق انا خلصتا اليوم الدراسي كيف وكل ا شهرتي تذيد خوفي يذيد لانو لو اتبرع اي زول من الفصل والكلام وصل لي معلمه او لي ناس بيتنا ح يشوفوا شغلهم معاي
ومشت الحكايه على كدة نرجع لي موضوع المجله طبعا اميمه احمد البشير اخدت ليها علقه محترمه من خالتها لانها جابت المجله مقطعه لما كبرنا اعتذرتا من اميمه وطلبتا منها تسامحني واتسامحنا في الاحفاد اميمه كانت دفعتين قدامي وضحكنا يومها
نرجع لي كزبتي الشهيرة في يوم فجاة اشوف ليك جيش من الشفع بتعرفوا بيت ناس خالتنا زينب عطا ايمان بت علويه بتها كانت بتقرا معاي اتخيلوا كميه من الشفع بنات واولاد جارين من هناك جري نضيف وكواريك وقاطعين السهلة واحنا كنا قاعدين جنب المدرسه المهم على التعترتها على ولي شقاوتي من كل الممثلات الفي الدنيا ما تجي في السودان الا سميه الالفي بذاتها بشحمها ولحمها وكانت في فليم بتصور فيه وليه جابوها عند ناس زينب عطا لغايت الان ما لاقيه لي اي تعليل وطول حياتي ما قاردة اسال لاني متخيلة انو كزبتي ح تنكشف لو سالتا - الحرامي على راسو ريشه - المهم الجماعة جوا وقالوا لي تعالي خالتك جات طبعا انا كزبتا الكزبه ونسيت . وصدقتا انو فعلا تكون واحدة من اخوات امي تكون جات بالجد ومن الهباله جريت معاهم بيت ناس زينب عطا وكتها ولدها عمنا عبد الرحيم وزوجتو ليلى وبناتو ناس نجاة واخواتها ساكنين معاهم وفي باب كبير تخش منو وفي زي برندة واوضه وباقي البيت
لقيت ليكم امه لا اله الا الله متواجده هناك والشفع شي بالشباك شي بالحيطه وطبعا فسحوا لي درب ما انا بت اختها والشفع متخيلين اننا مصريون يعني ح نتقابل بالاحضان ونبكي وانا اقدم رجل وااخر عشرة رجلين ويارب الارض دي تتشقا وتبلعني او يجي طوفان او زلزال المهم اي شي يخليني امرق من الموقف دا واشوف ليك سميه الالفي ملبسنها توب وقاعدة طبعا انا قربتا اغمر لانو مافي اي طريقة ارجع ولا ازوغ غايتو ربنا سترها معاي لانو الشفع الاعمي قايد المكسح وهاجين والكل عايز يتكلم بلغايت لما خالتي دريه بت زينب عطا طردتنا كلنا كانت احلا طردة في الدنيا ومرقتا مع المطرودين ويا فكيك جريت بيتنا وهناك ليقيت امي قلتا ليها شفتي في ممثله مصريه عند ناس زينب عطا وتعالي نمشي تشوفيها وقامت جات معاي والحمد لله الشفع شافونا خاشين اكيد افتكروا انو امي جات تسلم على اختها ودخلوني مع امي وسلمنا عليها وبعد داك مشت سميه الالفي
من يومها اتعلمتا انو حبل الكزب قصير وربنا ستر على لانو كان ح تكون فضيحه بي جلاجل وكانوا ح يزفوني وهاك يا تريقه وكانت ح تكون فضيحه لي جنا الجنا زي ما بيقول المثل الله سترني يا ناس ومنها اتعلمتا انو الكزب دا شعرا ما عندي ليهو رقبه وبقيت ادعا لي ربنا واوعد اني تاني ما ح اكزب ولو كزبتا ربنا اغرق امي وابوي في البحر زي ما كنا بنحلف لكن وبعد اقل من ساعة جو الشفع بيتنا اشوفوا هل خالتنا معانا وكان لازم اكزب انها سافرت عشان جدي عيان ولما سالوني هي ليه ما جات عندكم قلتا ليهم عشان هي بت ابو امي وانو امهاتهم متشاكلين
وتقول لي يا عادل عثمان ما كان عندنا كزابين لما جيت السودان السنه الفاتت لقيت كلمه ماسورة البتعني انو فلان دا كزاب اختكم معاناتا بي لغة اليوم والمقاييس بتاعت المواسير انا كنتا الهيئة القوميه للمياه ل في الكزبه الكزبتا على زميلاتي في المدرسه
دقيقه النحكي ليكم عن كزبه تانيه مرة كان في موضوع انشاء وقالت المعلمه نكتب اي موضوع وانا كتبتا عن عيد ميلادي والغربيه عيد ميلادي شهر مارس المهم البنات قالوا صحي الليله عيد ميلادك وقلت ليهم ايي والغريب كنا في شعر اكتوبر المهم العصر اذن ويادابك رافعين صينيه الغداء ولسه ما فرشنا الحوش ولا طلعنا السراير الا والباب يدق وكل شافعه معاي في سنه رابعه جارا معاها اخوها او اختها الصغيرة وجاين عيد الميلاد وكل واحدة جايبه ليها باكو بسكويت كرم البيكون فيه 3 قطع ولافاها في ورق جرايد وبدوا في التوافد في اقل من نص ساعة كان في البيت اكتر من 50 شافع وشافعة طبعا بقيت في حيص بيص امي قالت لي استني يا بت يا روما ايه الهباب دا طيب لما يروحوا وانبي لاطلع البلا على قدتك - جدتك - المهم قلتا ليها اعملي فيني اي شي المهم عليك الله يا امي ما تدقيني قدامهم وكانت معانا باتذكر منال عباس الصحفيه الان وكان وقتها بتدرس مع ناس حنان اختي ونادينا حنان طه المحاميه الان بالحيطه جاتنا متلبه وبقوا يفرشوا في الحوش والشفع طبعا شايلين ليك البيت على فرد صرخة ما موجبين معانا بالبسكويت
وقالوا لي الشفع تعالوا البرندة العلي الشارع
وقد كان وشالوا منهم البسكويت وامي عملت ليهم كفترية شاي بي لبن كبيرة واكلوا الشفع البسكويت وانا نكتوا لي لبست العيد وجزمة العيد بي الله ويامين ولبستهم الجزمة كانت بدت تضيق لكن ما قادرة اعترض وكبيت من الكلونيا ال 555 بتاعت ابوي الكان بيستعملها في المناسبات وغنوا لي الاغنيه التاليه
هابووو بي زيتون يووو
هيبوو بي زيتون روما
هيبوو بي زيتون يووووو
وطبعا مافي تورته ولا كيكه ولا حتى بسكويته محشيه توحد الله يومها اكلوا بسكويتهم وكان في بلح غلسلوهو ليهم وامي رسلت جابت ليهم حلاوة نعناع
اكلوها واتشاكلوا واتصالحوا وكانت في نيه شكله تانيه لكن صوت عمنا ساتي حسم الموضوع لما رفع اذان المغرب وانفض السامر
ما تسالوني عن الحصل بعديها اخدتا لي علقه اقدر وبكل شجاعه اوصفها انها اكتر من محترمه ما ح اقدر انساها طول عمري وكل ما تجي ذكرى عيد ميلادي الحقيقي باتذكر وباضحك و كل ما اشوف لي عيد ميلاد سواء قدامي لايف يعني او في التلفرزين باموت من الضحك لااني باتذكر اول واخر عيد ميلاد اتعمل لي
العيد ميلاد ما ترك بس الذكري البيتضحكني ولا العلقه الاخدتها كان من اثاره اني ملزمة امشي كل العيد ميلادات وارجع البسكويت الوجبوني بيهو لما يجي عيد ميلادهم الحمد لله مافي زول عمل عيد ميلادو
وتقول لي يا عادل لو كان عندنا كزابين ولا لا
اخواني فتكم بالف عافيه ووين ما تكونوا ربنا يسعد اوقاتكم انتو ومن يعز عليكم روما |
| |
|
|
|
|
|
|
Re: مدرســـــة المســاكن الشعبيــة الابتدائيــة جنــوب (Re: عبدالوهاب علي الحاج)
|
الدكتورة روما
حياك الله
* اولا لك كل الشكر علي المداخلة الجميلة وهي طار من الذكريات في حلقة الذكر و الدرويش الهائم مترنح بين حاضر العولمة وماضي جميل رغم شقاوة طهر ذلك الزمن الرائع . * وما زلت حتي الان احب ( ملاح القرع ) و ( الكســرة بالسخيـــنة ) والحمدلله لم يغير الاغتراب في شئ * والقــــرع في ارض المهـــــجر غالي شديد وتادر جدا وفي المواســم فقط . * وفي اي اجازة للســـودان الحبيب اجد متعة شديدة وانا بين القـــرع والسخــــينة ومــوية الزيــر والتجــــــوال المستمر بين احيــــاء بحــري وخــاصــة الشعبية وشارع المدارس . ومحــــراب المدارس الامـــيرية ( 2 ) وبحــري الثانوية والغالية ( مدرســة المســاكن الشعبيــة الابتدائية جنوب . * وافتــــكر زملائي في ارض المهجر علي نفس هذا المنوال .
مــــع خالص الود
عزالدين عباس الفحل ابـــــوظبـــــي
| |
|
|
|
|
|
|
Re: مدرســـــة المســاكن الشعبيــة الابتدائيــة جنــوب (Re: عزالدين عباس الفحل)
|
دكتورة روما يا ذاكرة الشعبية. ما شاء الله على حيويتك واسلوبك المتدفق. شكرآ ليك على الحكايات وعليك الله ما تقيفى. قتى لى سمية الالفى خالتك؟ ههههه. حافتش الانترنيت اشوف موضوع الفيلم الخلاها تزور الشعبية ده.
عزالدين عباس الفحل سلام جاك. لاقيت اخوى كمال الشايقى فى ابوظبى؟ هو قضى هناك زهرة شبابه مغتربآ ولكنه عاد اخيرآ مع اسرته واستقر فى بحرى. ربنا يرد غربة الجميع. مع إن الغربة ممكن تكون جوة البلد. ما سمعت محمد الامين ( هى إلا الغربة نتغرب . نخلى ديار ونمشى ديار.. ما هو الليلة متجاورين وعايشين غربة جوة الدار ). لقيت ليك صورة فضائية لمدرسة الشعبية جنوب وجانب من الاميرية2 ومدرسة البنات (عشمانة) ومدرسة الشعب الوسطى.
| |
|
|
|
|
|
|
Re: مدرســـــة المســاكن الشعبيــة الابتدائيــة جنــوب (Re: عزالدين عباس الفحل)
|
مدرســة المســاكن الشعبيـــة الابتدائيــة جنـــوب
بعــد اعلات نتيجــة الشهادة الابتدائية ذهبنا الي مدرســة الاميــرية ( 2 ) ، لكن قلوبنا كانت معلقة بمجراب مدرســــة المســاكن الشعبيـــة الابتدائيــة جنـــوب ، فكنا نزورها كلما سنحت لنا فــرصــة وفجاءة دعــــانا الاستـــــاذ طـــــــه عبد الرحمـــــن فــي وليـــمة عظيــمــة في دارهـــم فـــي شمبــــات وكـــان معـــي المهنــدس خـــالد حســـن ابراهيــم ( جــردل ) والدكـــتور احمـــــد علـــي خالد والاخ حــــــاتم عباس حســن التـــوم ( هو الان مســئول كبيــر فــي بنك فيصــل بالخرطــوم ) والاخ مجدي ( مــن ابتاء المزاد ) والاخ حســــام الدين عبدالله وجمــــع مــــن الزمــــلاء ، كانت لفـــة بارعــــة مــــن الاستـــاذ طـــــه ، وكانت اول مرة فــي حياتي اجلــس فـي صينــية واحــدة اكل مــع استاذ مــن شدة خوفنا مــن الاســـاتذة انــذاك ، والصــينــة كانت كبيــرة ومــن الرهبــة انا اكتفيت بالصحن المــوجود امامي جوار صحــن الشطــــة ، بعدها عرفنا الاستاذ طــه باهله فــي البيت ، والجمـــاعة احترمــونا اشـــد الاحتـــرام رغــــم صغـــر سننا ، لكـــن الهـــامات كانــــت عاليــــــة..
عزالدين عباس الفحل ابــــوظبـــي
| |
|
|
|
|
|
|
Re: مدرســـــة المســاكن الشعبيــة الابتدائيــة جنــوب (Re: عزالدين عباس الفحل)
|
مــدرســـة المســـاكن الشعبيـــة الابتدائيـــة جنـــوب
العبقــــري اخـــي عــادل عثمــــان
حيــــاك الله
لــك جــــزيل الشــــكر علـــي اللقطـــة الفضـــائية لمحــراب مــدرســـة المســـاكن الشعبيـــة الابتدائيـــة جنـــوب ومدرســة الاميــرية ( 2 ) وكمان مدرســة الرائدة ( عشمــاتة ) وصحيـــح الفـــربة اقـــسي نضـــــال . والواحــد فــي شــوق ان تعــــود عجـــلة الزمن الــي الوراء لــــكن هيهـــــات هيهـــات بين زمــن الفلاش مـــومــري والمـــــس كـــــولات و مــــكــر تــــوم انــــد جيـــــــري ، الا ليــــت الـــــزمــــان يعــــود و دهـــــرا تــــولــي يا بثينـــــــة يعـــــــود ....
عزالدين عباس الفحل ابــــــوظبـــــي
| |
|
|
|
|
|
|
Re: مدرســـــة المســاكن الشعبيــة الابتدائيــة جنــوب (Re: عزالدين عباس الفحل)
|
مــدرســـة المســـاكن الشعبيـــة الابتدائيـــة جنـــوب
العبقــــري اخـــي عــادل عثمــــان
حيــــاك الله
لــك جــــزيل الشــــكر علـــي اللقطـــة الفضـــائية لمحــراب مــدرســـة المســـاكن الشعبيـــة الابتدائيـــة جنـــوب ومدرســة الاميــرية ( 2 ) وكمان مدرســة الرائدة ( عشمــاتة ) وصحيـــح الفـــربة اقـــسي نضـــــال . والواحــد فــي شــوق ان تعــــود عجـــلة الزمن الــي الوراء لــــكن هيهـــــات هيهـــات بين زمــن الفلاش مـــومــري والمـــــس كـــــولات و مــــكــر تــــوم انــــد جيـــــــري ، الا ليــــت الـــــزمــــان يعــــود و دهـــــرا تــــولــي يا بثينـــــــة يعـــــــود ....
مـــــع خـــالص الـــود
عزالدين عباس الفحل ابــــــوظبـــــي
| |
|
|
|
|
|
|
Re: مدرســـــة المســاكن الشعبيــة الابتدائيــة جنــوب (Re: عزالدين عباس الفحل)
|
مــدرســـة المســـاكن الشعبيـــة الابتدائيـــة جنـــوب
العــــروس مديــــنة ابـــوظبـــي تمــد زراعيـــها فــي دعــــة العاشــــق الولهات ومنطــقة كــاســر الامـــواج والشـــاطئ الممتـــد بهـــدوء الاضــــاءات الخـــــافتــه وسنـــدوتشـــــات الشــــاورمــــة المحــلاة بدهـــان الثــوم وعلـــب العصــــائر الطازجــــة وحبــــات العنـــب تبــل الفــــؤاد ، تــذكــرت الاستــاذ مصـــطفـــي بهـــامتــه العاليــة وعضـــــلاتــه المفتـــولة بذلــك الــــوجه الصبـــوح المبتـسم دائما والصــــوت الجهـــور المجلجل كالرعــد ، كــان يجلســــنا فــوق الكنــب عنـدما يحــكي لنا فصــة ( فاطمــمة السمحــة ) وقصــص ( علــي يايا والمليــون حــرامي ) ، كنا نحــــب الاستــاذ مصـــطفـــي اشـــد الحـــب لانــه ما كـان يميـل للعقــاب ابدا فقط عفــابه قرصــــة بسيــطة علــي الادن ، وتكفــي هامتــه الطويلـة ان تفرض قـــوة شخصيــته ، كان يغــير قسمات وجهه وصــوته حتــي نندمج معــه ويقذف بقطع الطبشير الي اخــر الفصــل فيكــون الجميــع فــي ملكــــوت الخيــال الخصــب نحـــلق في الفضــاء كالقماوي ، كان الاستاذ مصـــطفـــي طيــب المعــشر حــلو اللســان غالتدريس عنــده كالعبــــادة ..
عزالدين عباس الفحل ابــــوظبـــي
| |
|
|
|
|
|
|
Re: مدرســـــة المســاكن الشعبيــة الابتدائيــة جنــوب (Re: صلاح شكوكو)
|
Quote: وجميل أن يتحرك إنزيم الزعل الجميل في دواخل النفس لأنه يدلل على عشم تجاه الآخر .. وقديما قيل أن اللوم إستلطاف ولفت نظر |
رغم العزاب واللوم في اللحظة ديك تغمرني سعادة المحروم اطرب لي الفاظك واتهنا بعتابك ما دام بجيبك لي ياريت عتابك يدوم
_________________________ شكوكو شقيقك شهاب حبيبنا وهو يعلم ماذا اكن له من الحب والتقدير
| |
|
|
|
|
|
|
Re: مدرســـــة المســاكن الشعبيــة الابتدائيــة جنــوب (Re: وليد عبد اللطيف)
|
Quote: شوف ياوهبة .. الشغلة فضل فيها شوتين تلاتة .. اها تجى نتفق ولا .. طبعا وليد برضو مفضى خانة ومنتظر الباص على راس الخط وعمدة برضو .. |
عزيزي عبدون يا حليل عمدة ناس الاحصاء طلعوا روحو بقى طلة صغيرة ويقوم جاري وهبة دا ما بتقدر عليه لبد ليك في لفة شارع الشعبية جوه الاجزخانة واول ما الصفحة هدنت نط وصلها أخر محطة وقلب صفحة جديدة ومشى البيت تحياتي وسلام تربببببببع للجميع
| |
|
|
|
|
|
|
Re: مدرســـــة المســاكن الشعبيــة الابتدائيــة جنــوب (Re: وليد عبد اللطيف)
|
ورسالة من دكتورة روما
رفعت معنوياتي
اخوي عادل عثمان ربنا يبسطك انا انتبهتا الليله لي تعليقك عليك الله اربط لي في العشرين سنه دي وباوعدك ما ح اكبر اكتر من كدا ولا اقول ليك اول نزله لي السودان باخد البوست دي دليل وباجيك تمشي معاي لي ناس الاحصاء ونطلع ديك يا شهادت التسنين البي العشرين سنه يطعمك ربي وما يحرمك يا رب طبعا انا جني وجن الكبر ولما جيت السودان الغريبه مافي زول واحد بيقول لي خالتو بس اسمي سادة
امس ضرب لي ود اختي باتكلم معاه و فجاة الساعة اليقول لي يا خالتو روما انا فجاة انتبه وبقا يعتزر قال لي انتي عارفه انا ما بحب اقول ليك خالتو لانو ما جايه معاكي وما تزعلي ما باقدر اقول ليك خالتو تخيلوا وضحكنا قال لي ولا تزعلى ح اقول ليك يا مانا يا شخصه يا حبه
طبعا يا جماعة الى الان مافي زول من اولاد اختي ولا اولاد صحباتي الهنا بيناديني بي خالتو الكل يا روما او رمرم يعني يا كافي البلا ما شايفني خاله ولا شنو ولي يوم الليله لما واحد منهم يجي يتكلموا موش العيال لما يلقوا ليهم زول كبير بيقطعوا الكلام انا لما اكون قاعدة هم بيجوا المكان البكون فيه وبيتكلموا عادي كاني ما موجودة
في اخر زيارة لي شهر نوفمبر الفات قاعدات بنات اخواتي بيتكلموا وجات صحبتهم وبدت تتكلم وفجااه انتبهت لي وبقت تعاين اتخيلوا بنات اختي في صوت واحد قالوا ليها لا كملي عادي دي روما كملي يا زوله يعني ما عاديني خاله ولا شنو العيال ديل
حتى اولاد بنات عمانتا واعمامنا يعني في الحسبه انا خالتهم وفي الفي الحسبه انا حبوبتهم والله مافيهم البيقول لي خاله كلو بي اسمي فقط بدون لا خاله ولا يحزنون عملت بت عمي نوال احمد السيد حفله بمناسبه تخريج بتها من كليه الطب ومشينا مافي زول بيقول لي خالتو وكلو بيحكي وبيتونس معاي اخر الحفلة التلفون اتملا بي تلفونات الناس الصغار الجيل الما حصل لي شفتهم الا اليوم داك وما قعدتا مع الناس الكبار لاننا مشينا الصاله التانيه وهاك يا ونسه معاهم بيني وبينكم احسن كدا الواحد يصغر ليهو عشرين سنه هو انا لاقيه
اضحكم لما قام لي ضرس العقل وبقا يوجعني وانا باشكي منه وقلتا خلاص انا عقلتا لسه ما تميت كلامي الا اجو اصدقائي اكبرهم ناس جنا عرب اولاد ماجدة بت عمنا على المدير وقالوا لي تاني ما اتكلم مع ناس معلم بزة ود عبدة واننا لازم نقاطع معلم بزة عشان هو بقا مفتري عليهم لانو ابوهو عمل ليهو حفله كاربه في ختانه ومن ما سيروه بالحصان بقا مغرور والشباب ديل كلهم عمرهم اقل من 6 سنوات وانا بت خريجه وقتها قلتا ليهم طيب ما باقدر اجي معاكم لانو ضرسي واجعني وبعديهم طولي جوا ناس شذى بت ليلى ساتي ورانيا بت على الحوري عشان يشوفوني من وجع الضرس ديل المدرسه ما كانوا خشوها لسه وبنتنا لينا حجله في الحوش قام ابوي الله يرحموقال لي انتي ما بتعقلي موش لو قام ليك ضرس عقل لو قام ليك ناب فيل زاتو
لما اتخرجتا من الاحفاد وبديت في الماجستير كنتا اجي من الشارع القى شفع الحله ولا باكزب لو في اي لعبه مدورة انا فيها ولي يوم الليله لو لقيت لي شفع بالعب معاهم
حسا في شغلي لما يجوا اولياء الامور طبعا لازم اعمل فيها جادة واعيش عمري الحقيقي والبس وش الجديه وبيني وبينكم باكون باضحك في سري لانو احلا شي الزول يرجع شافع مرة تانيه
الاخ عبد الوهاب الحاج ماشا الله الصفحة قلبتها لينا معليش سؤال منو الاموره الفي بروفايلك ماشاء الله عليها عيني باردة
اخواني في البوست مبروك ال73 وعقبال ال73 بعد المليون يارب
اخوي خالد درق ماشا الله كاننا معاكم في الرحله شهيتنا الكلوري الكعك البي السمسم ينفعكم وعجبنتني صورة الورد شديد ربنا يسعد ايامكم
اخوي عبدون مالك على شمسي دا دا وجيه الحله عندنا وسيد الكرم كلو بالجد المكاواة دي انا بانتظرها في البوست لانها فاكهة البوست
الوجيه شمشي ود ساتي عبد الحفيظ مالك مختفي يعني رجلي حارة ولا شنو اظهر يا شمشي يا شمس الدين مسئول من الخير وين ناس عثمان ود سيدة بت المازون وين الحي بيهو ووين ناس نجيب ود عمتكم شتله وناس تحيه جلال وربيع شريف واحمد عكاشه واحمد التاني الساكنين جيران ناس عمنا محمد عمر في شارع ناس الفحل ووين عصام الفحل زاتو
ليكم كلكم سكان او من سكن او من سيسكن الشعبيه الله يحفظكم انتو ومن يعز عليكم
روما
| |
|
|
|
|
|
|
Re: مدرســـــة المســاكن الشعبيــة الابتدائيــة جنــوب (Re: وليد عبد اللطيف)
|
العزيزة روما
والله أنا كنت بقرأ بس يعنى متابع الكتابة
أقول شنو يعنى غير ما نقرا ليك يارائعة
نجيب جلال طبعا إستقر بمدينة بورتسودان
وتحية شقيقته تزوجت من أحد أبناء الهجرة ولديهم منزل بالهجرة ..
محمد ود المأذون أظنه بغرب السودان وشغال فى التخليص الجمركى
عصام الفحل نزل المعاش من البنك ومن ضل لى ضل ...
ربيع محمد شريف برضو نزل المعاش ويسكن حاليا بالدروشاب
ويعمل فى التجارة مع أحد أشقائه..
أحمد عكاشة برضو نزل المعاش من الجيش وكان معانا هنا
بقطر لكنه إستقال ورجع السودان لمشكلة صحية تواجه إحدى بناته
(أظن ثقب فى القلب).. أحمد الثانى دا ما عرفته .. لو بتقصدى أحمد
بنقز شقيق نادية ..موجود بالإمارات ...
شذى بت أختى ليلى تخرجت من جامعة الخرطوم وحتعمل بالجامعة معيدة
وإبنتى أمل نزلت السنة الثانية بالجامعة وموجودة مع شقيقتى ماجدة
أبدون دا ما تشتغلى بيهو كتير أصلوا فاطى سطر من يوم الخمسة المباركة
تحياتى
| |
|
|
|
|
|
|
Re: مدرســـــة المســاكن الشعبيــة الابتدائيــة جنــوب (Re: شمس الدين ساتى)
|
ورساله من دكتورة روما
لما اتغندر القرع
اخوي الراقي عز الدين عباس الفحل
اول ما جيت هنا كان شتاء وعزمونا ناس يونانين بمناسبه اني جيت وست البيت قالت لي الليله نحنا عاملين ليك فطاير وطنيه
طبعا انا شمرتا عن الاكمام عارف تطلع فطائر شنو فطاير قرع طبعا قربت اتلب ليها بالبلكونه وبالمناسبه القرع هنا غالي بصورة ما بتتخيلها يعني الكيلو منه بيوصل لي 20 يورو في الموسم ناهيك لما ما يكون الموسم
انا قلتا ليها بالمناسبه نحنا القرع دا صديق دائم للاسرتنا حتى كنا بنفتكره من العائله وهي افتكرت انا يا ما هنا يا ما هناك لانها خاته في راسها انو غالي عندنا
عارف احلا شي شنو ملاح القرع لما يكون بايت وتديها كسرة وشطه وليمون معاهو وياسلام لو قطعتا ليك طماطم دقاق
السخينه انا كنتا مشهوره بيها وما زلتا لما غزالتي تكون سارحه باشد لي سخينه بصل ودكوة وطماطم كلهم مع بعض بالخلاط وخليهم يغلوا واديهم في النهايه توم بسيط
يا جماعة الويك اند دا حالفة ومتندرة اشد لي ترمس نفسي فيهو من زمن ولقيت لي في دكان عربي بلح سوداني يعني ح اعمل اعادة تاهيل للعضام الترمس وصلني امس ضمن طرد مفروض كانت يصلني في رمضان يادابك وصل امس ما يفوتكم كل البهارات ريحتها دخلت على بعض لكن الترمس موش لو ريحتو بهارات برضو ح اشده ح اشده
انا لما جيت المرة الاخيرة في السودان ما قدرتا اخد راحتي في الاكل لاني كنتا لسه في مرحله العلاج لكن اول نزله لي لو ربنا مدا في الاجال ح اكل لي كرتونه منقه هنا المنقه مافي ولو جابوها بتكون خضراء وحامضه اخير عدمها ونفسي في اقاشي وبزيانوس يعني ح اجي تحت شعار الاقاشي والبزيانوس والمنقه خمو وصرو هنا مافي رجله مستحيل تواجدها ولا الملوخيه الطازة بس في ناشفه انا بحب الرجله بيننا ود كبير وعشم مره هنا جبتا السبانخ فرمتها واديتها رز وعدس وطلعت زي الرجله نظام غشيت روحي وكده
لو قلتا ليكم الهنا غاليه شنو ما بتصدقوا الحلبه وبيسموها هنا -تري قووو نيلا- ال10 جرام منها بي 30 يورو يعني اغلا من الدهب ولا شنو وبيعتبروها شي مقدس
برضو الغالي ونادرا نشوفو هنا الليمون الاخضر بتاعنا والنعناع الا تزرعوا انت في البلكونه مرة كنتا في سوق البقوليات وبقيت ادعك عيوني لقيت ليكم الفتريته بتاعتنا بس اخير كنتا امشي اشتري لي خاتم ولا حلق دهب لانها غاليه جدا وهم فاهمين قيمتها الغذائيه العاليه
ما بيعرفوا البلح ولا التمر بالرغم من انو اسمه موجود في اللغه اسمو خوماذا دي البلحة الواحدة والجمع خورماذاس لكن بنلقاه بس في المحلات العربيه طبعا هم اي شي بيذكرهم بالاتراك بيكجنوه لانهم كانوا مستعمرنهم اكتر من 420 سنه لذلك رابطين قصة البلح مع الاتراك
الي الجميع دمتم بخير انتم ومن يعز عليكم
رروما
| |
|
|
|
|
|
|
Re: مدرســـــة المســاكن الشعبيــة الابتدائيــة جنــوب (Re: وليد عبد اللطيف)
|
خالد كراكه صلاح كراكه خالد درق مجدي نقد دكتورة ستنا محمد حسن التريبيل ياريت تكتبوا رساله موجه لبكري مباشرة كما فعلت اختكم روما وان شاء الله الشغله اصبحت بسيطه يعني ما واسطات زي زمان وعلاقات وحقيقة الدكتورة روما صغيرتنا في البوست وفنانه جدا وليها في حكاوي الشعبية وناسها الكثير
----------------------- مشكور يا بكري ابوبكر على هذا الكرم
| |
|
|
|
|
|
|
Re: مدرســـــة المســاكن الشعبيــة الابتدائيــة جنــوب (Re: مريم عبد الله)
|
الدكتـــــورة الغاليـــــة مريـــــــــم عبــدالله ( روما )
حيـــــاك الله
الـــــف الــــف مبروك علـــي العضويــــة . والله انا امــــــس القريـــــــبة كان عنــــدي احســــاس قــــــوي انك ح تاخـــــذي العضـــــوية بجـــــدارة . والــــف مبــــــــروك الـــــف الــــف مبروك .
عزالدين عباس الفحل ابــــوظبـــــي
| |
|
|
|
|
|
|
Re: مدرســـــة المســاكن الشعبيــة الابتدائيــة جنــوب (Re: مريم عبد الله)
|
الدكتـــــورة الغاليـــــة مريـــــــــم عبــدالله ( روما )
حيـــــاك الله
الـــــف الــــف مبروك علـــي العضويــــة . والله انا امــــــس القريـــــــبة كان عنــــدي احســــاس قــــــوي انك ح تاخـــــذي العضـــــوية بجـــــدارة . والــــف مبــــــــروك الـــــف الــــف مبروك .
عزالدين عباس الفحل ابــــوظبـــــي
| |
|
|
|
|
|
|
Re: مدرســـــة المســاكن الشعبيــة الابتدائيــة جنــوب (Re: عزالدين عباس الفحل)
|
اكرر ما قاله الاخ وليــــــــد ، نتمنــي ان ينضــــم الينا نفــــر كــــرام اعـــــزاء علـــي النفــــس :-
1 - خالد كراكه. 2 - صلاح كراكه. 3 - خالد درق. 4 - مجدي نقد. 5 - دكتورة ستنا. 6 - محمد حسن التريبيل.
يا جمــــاعة شدوا الهم فقط ايميل للمهندس الفاضـــــل بكــــــــــري .
والله ولي التوفيق
عزالدين عباس الفحل ابـــــوظبـــي
| |
|
|
|
|
|
|
Re: مدرســـــة المســاكن الشعبيــة الابتدائيــة جنــوب (Re: عزالدين عباس الفحل)
|
الاخ عز الدين الفحل بالنسبة للدكتورة الله ريحني منها وباقي لي الدكتورة التانية ستنا بت خضر ---- بالنسبة للفنيات ممكن تمشي في نهاية شريط الوان الخطوط يساراوتجد كلمة ( اكواد ) وهنا ممكن تعرف الكثير واذا واجهتك صعوبه نحن تحت الخدمة ياطيب وانا لا ابحث عن الماده مقبال الحصص بل الدعاء ياشيخنا وربنا يرحمنا ويرحمكم
----------------- ياوهبه تعال شوف تلميذك النجيب ورايك شنو نفتح مدرسة مع بعض زي امين عثمان شقيق استاذ عادل عثمان والاخ عبد الرحيم عثمان عشان تكون منافسه لمدرستهم
| |
|
|
|
|
|
|
Re: مدرســـــة المســاكن الشعبيــة الابتدائيــة جنــوب (Re: وليد عبد اللطيف)
|
شمشي اخوي وولد جيرانا هيتا بالهيتا ابارك ليك تخريج البينيه وزواجها وزواج عزو قول يا مين
كان قصدي لي احمد التاني يا هو بنقز. وسلامتها بت احمد عكاشه ربنا يتوالاها بالعافيه ومبروك على شذويه لو قلتا ليك اخر مرة شفتهم فيها تقريبا قبل 14 سنه ماشاء الله اتخرجت
ومبروك عليها وما مستغرب انو ليلى ساتي بتها تكون معيدة لانها اكيد ورثت النجابه والذكاء من والدتها المتفوقه اختنا الكبيرة ليلى ساتي وما ننسى خالها الرشيد ساتي وتفوقه الدراسي
واخبار احمد قلوبه شنو عليك الله وسحر وسارة بنات ماجدة ساتي وين بيدرسوا والاء بت الرشيد اتخرجت ولا وين بتدرس وماشاء الله عجبني لي المهندسه هديل بت اعتماد
اختك روما
| |
|
|
|
|
|
|
Re: مدرســـــة المســاكن الشعبيــة الابتدائيــة جنــوب (Re: مريم عبد الله)
|
يا ناس من ما استلمتا العضويه كرهتا وليد عبد اللطيف وماشا الله عليه استحملني وما قصر معاي في الشرح الله يعدلها عليك يا ابو اسيل
ما اتحرم منك ولا من شرحك واعلن من هنا افتتاح اكاديميه ولي لتعليم مبتدئي البوست
والاكاديميه متبعه شعار المرحله - محو الاميه الانترنتيه في بوست الشعبيه - وانا اول زول مسجله
يا جماعة لو جيتوا تفتحوا المتصفح ولقيتو ليكم زير مويه وعنقريب ديل حقاتي لاني ح اسكن في البوست وبدل ما ادفع ايجار قلتا نوفر ونجي نسكن في البوست
وشكرا ليكم كلكم لانكن سعيتوا لي لي نيل العضويه زي ما سهلتوها على ربنا يوقف ليكم اولاد الحلال وين ما تقبلوا
اخواني في بوست الشعبيه صباحكم خير وعافيه ليكم ولكل من يعز عليكم
روما
| |
|
|
|
|
|
|
Re: مدرســـــة المســاكن الشعبيــة الابتدائيــة جنــوب (Re: عزالدين عباس الفحل)
|
الاخ عــــزام حســــن فــــرح
حيــــــــــاك الله
ســـــــــلام وافتكـــــر مـــــرة وجــــــــــــدتك فـــي مكتبـــة قـــــريبنا البروفيســــــور اســــامــة red]اســـامــــــة الخــــــــواض شاعـــــــــر موهــــــــــــــوب يتــــــــكئ علــــــــــي ينــــــــــابيع الابداع .اســـامــــــة الخــــــــواض يحـــــمل فـــــــــي يـــــده قنـــــــــــاديل مــــــــن الخيــــــــــال الخـــــــــــــجول البــــــــــــــــتول البكـــــر
عزالدين عباس الفحل ابـــــــــوظبـــــــي
| |
|
|
|
|
|
|
Re: مدرســـــة المســاكن الشعبيــة الابتدائيــة جنــوب (Re: عابدون محمد عابدون)
|
الاخ عابدون محمد عابدون
صبــــــــاح الخيـــــــر
صـــــــــــور جميـــــــــلة جدا للاخ خــــــــالد درق . نتمني ان يظهر في القريب عضـــــــــوا فـــي البوســــت ، هذا الشخص احببته قبل ان اراه وهـــو جارنا في دبي . * الاخ كمال الشايقي شقيق الاخ عادل عثمان انا زاتي وجدته صدفة وتعرفت عليه وهو شخص خلوق جدا وورع ومتدين شديد احببته من ادبه الجم .
مــــــــع خالص الود
عزالدين عباس الفحل ابـــــــــــوظبـــي
| |
|
|
|
|
|
|
Re: مدرســـــة المســاكن الشعبيــة الابتدائيــة جنــوب (Re: وليد عبد اللطيف)
|
مبروك لأختنا الدكتورة مريم دخولها عبر بوابة سودانيز أون لاين!
والعقبى للأخ الباشمهندس مجدي نقد والدكتورة ستنا وبقية الإخوان!
وقال عز الدين:
Quote: عنــــدي ثلالثة معضــــلات هـــي :-
1 - تكبيـــر الخط . 2 - ادخال الصـــور . 3 - استعمال الالوان . |
وهناك معضلة رابعة يا عز الدين، ألا وهي تكرار المداخلات، كثير من مداخلاتك مدبلة!
باشمهندس وليد، ما شاء الله، بقيت سنير!
| |
|
|
|
|
|
|
Re: مدرســـــة المســاكن الشعبيــة الابتدائيــة جنــوب (Re: Adil Osman)
|
الاخ الاستاذ صلاح شكوكو مشكور على كلامك اللطيف الذى لا استحقه. وشكرآ لقلمك الذى ينثر الدرر والحكمة
Quote: أجمل صور الحياة أن تكون وفاءا وعرفانا .. فكثيرون أخي لايملكون من حطام الدنيا إلا كلمات صادقات تقال في سماء الوفاء تكون ثروة حقيقية تحول الحياة كلها سعادة .. ولتعلم أنني سأكون حريصا لإيصال هذه المعاني لأنني أدرك أنها كنز من أقيم كنوز الحياة .. |
يا سلام يا استاذ صلاح على الكلام الذى اتمنى ان يفهمه ذوو العقول الفهيمة والوجدانات السليمة إن تقديرنا لابائنا وامهاتنا وجيراننا واساتذتنا إنما ينبع من إحترام المرء نفسه
| |
|
|
|
|
|
|
Re: مدرســـــة المســاكن الشعبيــة الابتدائيــة جنــوب (Re: Adil Osman)
|
اقابلك في زمن جاي وزمن ماشي وزمن لسه ------ الرجل الهميم الحنين ما عارف وردي لما اسمعوا بيديني شعور غريب جدا حتى واذا كانت اغنية عاطفية طوالي برجع لحال البلد الواقف وما هي وصلت اليه والله يصلح الحال
استاذ عادل عثمان امس في اتصال مع صديقي شقيقك عمر عثمان وهو بخير وكل الاهل على مايرام
-------------------------- مشكور عادل ود الدكتور للهدية وانت تثير فينا الانتفاضات ................... مشكور الاستاذ عزالدين الفحل على الاتصال
| |
|
|
|
|
|
|
Re: مدرســـــة المســاكن الشعبيــة الابتدائيــة جنــوب (Re: مريم عبد الله)
|
الاخ الفاضـــل عــزام فرح حســن
حـــــياك الله
شكرا علي العزومة ، والحمدلله انا نزلت في مطار الدوحة بقطر كثير جدا بحكم الاغتراب والبروفيسور اسامة الخواض راجل قريبنا وهو مبدع ، وكنت اجلس معه كثيرا نتناقش في منطقة كبــــــوشية في حوش جدي ود سليمان . واســامة الخواض راجل خلوق جدا ومؤدب لدرجة الشفافيـــــة[B بــس عايز منك انك كيف بتعمل الخط كبير وسميك والظاهر عليك انك راجل فنان . وانا منتظرك علي حر من الجمر ، وياريت يكون بالتفصيل حتي تعم الفائدة للجميع . .
مــــــــــع خـــــــــالص الود والاحترام
عزالدين عباس الفحل ابــــوظبـــــي
| |
|
|
|
|
|
|
Re: مدرســـــة المســاكن الشعبيــة الابتدائيــة جنــوب (Re: عزالدين عباس الفحل)
|
ورسالة من المستشار خالد عثمان (كراكة )
Quote: الأخ وليد وأبناء الشعبية الأكارم ، تحية طيبة وسلامي للجميع، وبصفة خاصة للدكتور أمير قناوي والأخ عابدون والأخ عبدالوهاب وأبلغهم تحيات أخي صلاح عثمان وسلامه وأهنيء الدكتورة مريم بنيل العضوية. ولكن يبدو أن الأخ عبدالوهاب بذكره انه كان دفعة أخي الأكبر ودفعتي قد يغري المتربصين به في الفضاء الاسفيري للكيد له بأنه كثيرا ما كان يتم اعادته من فصل الى آخر وقد يجنح أحدهم الى انشاء بوست باسم (عبدالوهاب علي الحاج دفعة من لا دفعة له) وآخر تحت عنوان (عبدالوهاب دفعة الجميع) ، وقد يجنح بعض المستظرفين لايراد نكات حول من يتم ارجاعهم من فصل لآخر، مثل نكتة ولد الرباطابي الذي أتى لوالده يشكو له بأنه تمت اعادته من الصف السادس الى الصف الثالث فقال له والده ( انت دة سلم تعليمي ولا سلم وثعبان)،وغيرها، وبما أنني من العارفين بفضل شيخنا عبدالوهاب وتميزه الأكاديمي ، فأرجو أن يفسر لنا كيف يكون دفعتي ودفعة أخي الأكبر الذي يكبرني بعشر سنوات . ذكر الأخ عزالدين الفحل أن الأستاذ الذي قابله بعد غياب سنوات طويلة قد سأله عن الطالب الذي كان يصطاد الطير بمحاذاته للحائط ثم يقوم فجأة بالانقضاض عليها ولم يتذكره عزالدين وأفيده بأن أخي صلاح عثمان قال لي بأن الطالب المقصود هوميسرة أو توحة ابن مربعنا وهو الآن يعمل سباكا بجامعة الخرطوم، وهكذا فالبعض يذكر بالأكاديميات المتميزة ويذكر البعض باجادته للتشريك للطير وكل ميسر لما خلق له. وبذكر مدرسة الشعبية جنوب أذكر أن أحد الأخوان ولنرمز له بالحرف (س) منعا للاحراج وفي حصة التربية الاسلامية وجه الأستاذ سؤالا مضمونه (من هو الصحابي الذي يعيش وحده ويموت وحده ويبعث وحده) ، فرفع (س) يده بحماس بالغ مطقطقا أصابعهأ فانبسطت أسارير الأستاذ من معرفة (س) للاجابة ورفعه ليده لأنه خلال أربعة سنوات لم يرفع يده الا للاستئذان للذهاب لشرب الماء، فأطنب الأستاذ في مدح (س) وكيف أن مستواه تطور وأن تعبنا فيه ما راح ساكت وحقو (س) يكون قدوة ليكم ، أها يا (س) قول الاجابة، فتقدم (س) قائلا (الشيطان الرجيم يا أستاذ). |
| |
|
|
|
|
|
|
Re: مدرســـــة المســاكن الشعبيــة الابتدائيــة جنــوب (Re: مريم عبد الله)
|
الأخوة والأخوات نهنئ أنفسنا أولاً ونهنئ أختنا روما ثانياً بنيلها العضوية . ونشكر الأخ بكري لكرمه الفياض على شعبيتنا ونشكر أنشط الأعضاء وليد الزول الحبوب المضياف. وبقول للأخت روما ما تشغلي نفسك بموضوع تزين المداخلة وتلوينها فدي أمور بتجي مع الوقت ، واصلي الإبداع ولو تكتبى بفحمة.
عزام عاد الحبيب المنتظر. ماشايفك رديت علي رسالتي عبر الإيميل ؟ . على كل حال سمعنا إنك بطلت الحوامة الما بتجيب غير وجع الراس. وفي بعض الروايات قالوا بت إبراهيم لبدت ليك بإيد الهون وعاجلتك بضربة خاطفة بعد الإطلاع على مداخلة في أحد المنابر. إن شاء الله يكون الكلام إشاعة ، وإذا كان صاح إن شاء الله تكون الضربة ما جات في الوش. عزام أنا خايف أكتب المداخلة دي تقوم تختفي تاني . وحاسي زي الكجنتني. أتمني أكون غلطان في ظني وتخليك مع الناس البتعزك.
تحياتي للجميع.
أخوكم أمير قناوي
| |
|
|
|
|
|
|
Re: مدرســـــة المســاكن الشعبيــة الابتدائيــة جنــوب (Re: مريم عبد الله)
|
يامراحب دكتورة مريم نورتي وشرفتي بوست الشعبية نجمة
أخواني وأخواتي اعذروني لانني نشأت وترعرت في حي الدناقلة جنوب وسكنت في الشعبية جنوب
لفترة بسيطة ثم سافرت للسعودية عشان كده مشاركاتي معاكم قليلة نوعا ما مقارنة مع بوست بحري طراوة .
من خلال مشاركات الدكتورة مريم السابقة وسردها الرائع لمجتمع الشعبية تاكدت من مقولة الحاج حمد بان الشعبية فعلا طحنية
وكثيرا من مشاركاتها الرائعة لم يتم التعقيب عليها من الأخوان وأتمنى ان يتم الرجوع لها مستقبلا .
تحايا متواصلة للجميع
| |
|
|
|
|
|
|
Re: مدرســـــة المســاكن الشعبيــة الابتدائيــة جنــوب (Re: Emad Ahmed)
|
Quote: الاخ عماد وزير التوثيق انت اهلُ لتلك الكلمة وصدق من لقبك يها وشكرا علي التوثيق الرائع للاستاذ الراحل المقيم محجوب عبد الحفيظ ،منذلهم كان علي مقربة منا لم اعرفه كثيرا ولكن ربطتني علاقة بأبنائه ، خاصة ياسر لصداقته لاخي الصغير شرف ، رحم الله الاستاذ محجوب واسكنه فسيح جناته |
الأخت دكتورة ستنا شكرا ليك وكلمة وزير التوثيق اطلقها ناس بحري من أجل التحفيز والتشجيع ولسه بدري علينا
لكي نستحقها . . والتحية عبرك للأخوان شرف وعاطف والرحمة والمغفرة للراحل محجوب عبد الحفيظ طيب الله ثراه .
بالمناسبة سبق وأن ذكرتي في مشاركة سابقة بان لكم صلة قرابة بالبروفسير حربي محمد سعيد مدير المواصفات
والمقاييس وهوايضا يمت لي بصلة قرابة وقريبا سنوثق له في بوست بحري طراوة . . وفي انتظار دخولك بالباب
مع الباشمهندس الأديب مجدي عبد الحليم نقد قريبا جدا .
| |
|
|
|
|
|
|
Re: مدرســـــة المســاكن الشعبيــة الابتدائيــة جنــوب (Re: عابدون محمد عابدون)
|
د. أمير قِناوي ...
صباح/مساء الخير ...
Quote: عزام عاد الحبيب المنتظر. ماشايفك رديت علي رسالتي عبر الإيميل ؟ . على كل حال سمعنا إنك بطلت الحوامة الما بتجيب غير وجع الراس. وفي بعض الروايات قالوا بت إبراهيم لبدت ليك بإيد الهون وعاجلتك بضربة خاطفة بعد الإطلاع على مداخلة في أحد المنابر. إن شاء الله يكون الكلام إشاعة ، وإذا كان صاح إن شاء الله تكون الضربة ما جات في الوش. عزام أنا خايف أكتب المداخلة دي تقوم تختفي تاني . وحاسي زي الكجنتني. أتمني أكون غلطان في ظني وتخليك مع الناس البتعزك. |
في التبادي خليني أثبِت ليك حقيقة ... أنا زول بريدك مِن قديم وحوش حاج حمد فَعَل الريده القديمة وظهرا ... أنا ما بكجِن أي زول مِن بحري خليهو يِكون مِن الشعبِية ... يا زول ناس الشعبِية ديل أكان سلمت على زولاً فيهُم بصلي صلاتي بلا وضوء تلاتة أيام بِلَياليها ... مره قالدني واحِد في الغُربة في رمضان فوقو 25 يَوم وطلع مِن شمبات الهِجرة ، طوالي وقفت الصِيام وصِبحت مُعَيِد ...
رِسالتك الرسلتها لي بِقت لي مِتِل رِسالة الرسول محمد (ص) لأبو سُفيان المُرازي ... ما مؤمِن بيها وما قادِر يِتلِبا تِتِلِب ... خفت أوعِدك وأخلِف ... خفت أرُد وأزعِلك لأني كُنت حقول ليك < مُحسِن خالِد > ماني عاتقو تب ، لأني زرتو < سارِق > فِكرة < الوعي > مِن مؤلفات دِكتور / محمد عابِد الجابري ، وأوردت نص < مُحسِن خالِد > ونص د. الجابري بِإسم الكِتاب والصفحة ... بس في سودانيز أون لايِن الزول البِسووهو طَوطَم بِظل طَوطَم حتى لو سوا السبعه وزِمتا ... والسبعه وزِمتا مِتِل الأمثال السِرِية الجمعا مُحسِن خالِد مِن الشارِع وكشحا في الإسفير ... مِتل المثل النجرو لي خاصةً ... ما علينا ... الزول مُدعي ... يِمكِن عِندو إبداعات ... لكِن هل ده بِسمح ليهو إنو يِسرِق نُصوص غيرو ويِدعي إنها مِن بنات أفكارو ...
الحُوامة ما هجست عنها ... حايِم وحاتك في المنبر وبنضُم في أي بوست بِخارِج معاي ... وبقول رأي وما بعايِن كتير لإسم البرُد عليهو ولو عاينت ما بتأثر بِجاهو الإسفيري أو عمرو في كَوكب الأرض أو عُلُو شِهادتو الأكاديمِية ... بكتِب الدايِر أقولو والمؤمِن بيهو في لحظة الكِتابة ...
بِت إبراهيم حِليلا ... الفُندُق وايدو فارقتو فُراق الطِريفي لِجملو ... مِن رِكبت صقر الحديد وجات قطر بِقت تهرِس توما بِخلاط خاص ... ما عادت تستخدِم -لِحُسن حظي- الفُندُق وايدو ... الأيام الفاتت إنشغلت شوية بِزِيارة بنتي ايمان عزام حسن فرح ... غادرتنا قبُل يومين لِجامعتا ... علشان ما يِتخابث المُتخابِثين ، أنا تزَوجت مِن أول ماهِية إستلمتها وكان عُمري (19) سنة ...
| |
|
|
|
|
|
|
Re: مدرســـــة المســاكن الشعبيــة الابتدائيــة جنــوب (Re: وليد عبد اللطيف)
|
عادل عثمان × روما ( و" الكضاب ما بنريدو والسكين تقطع ايدو"..) عندما ذكرتها (روما ) سرحت مع نفسي وقلت هذا الكلام ماغريب عني وكأن حصل لي تحفيز ذاكرة واثارة الاشجان مره اخرى وتدغدق العواطف والمشاعر الجميله واجمل ايام عمرنا في حبيبتنا الشعبية ومهما اختلفت الاجيال فأن للشعبية بصمة
وكان هذا ما كتبة الاستاذ عادل عثمان بتاريخ 12/4/2007
الحاج حمد: الشعبية الكبارة ولا الشعبية السغارة؟ هكذا كان ينطق بها بعض اهلنا عندما يطوفون فى زيارات الاقارب زمان الاعياد والمآتم والافراح. ما الدنيا؟ الدنيا امكنة عزيزة. ولذيذة. وحكاوى.. صوانى الخبيز فى رحلة التجهيز للعيد فى فرن سوق السيد على/المرغنية. اللمة تحت عامود النور. لعب الاطفال. وصراخهم وزعيقهم. الدافورى وقون المغربية اخير من مية. و" الكضاب ما بنريدو والسكين تقطع ايدو".. والمدارس. وشارع المدارس. وبنات الجيران. والحب. والمظاهرات... عندما وعينا على التقسيم الاجتماعى فى المدينة وكانت الشعبية تحيط بها العمارات والفلل مزح احد الاصدقاء بوصف من علوم الجغرافيا. وصف الشعبية انها تقع فى ظل المطر! وبالطبع يقصد مطر الثروات! ولكن فى الشعبية ثروة ندر ان تشبهها ثروة اخرى. راس مال لا نظير له. الانسان. وللشعبية اسم اخر: بيوت البلك. فهى بنيت من البلوكات الجاهزة. cement blocks التى كانت تصنعها ماكينات مخصصة لهذا الغرض. سوف اساهم معكم ايها الاخوة الاكارم. فالحكايات كثيرة. والشعبية وطن الوجدان. ولها ننتمى. وبها نفخر ايما فخر..
| |
|
|
|
|
|
|
Re: مدرســـــة المســاكن الشعبيــة الابتدائيــة جنــوب (Re: عابدون محمد عابدون)
|
Quote: هسة فى زول قال حاجة ياعزام .. انا غايتو خشمى .. اقصد كيبوردى بقدر عليهو بس امسك زولك بتاع قطر المعاك داك خشمو فاكى |
قلتا لى عمرك كان كم يا عزام 19 سنة عمر الزهور
ياخ تخ زى ما بقولو.. أها أنا من المتخابثين والمتخابثات
أسمع عندنا هنا بزازة ممكن نسلفك ليها .. ياخ إنتا دفعتك ياهم الجلاكين
ناس دفعة من لا دفعة له ..عرفتو
| |
|
|
|
|
|
|
Re: مدرســـــة المســاكن الشعبيــة الابتدائيــة جنــوب (Re: وليد عبد اللطيف)
|
ورساله المهندس مجدي نقد
]Quote: أيام الفرح بالشعبية
أيا جمع الأحبة شرفونا *** و اسقونا كؤوساً من مودة لكي نأنس بكم و تؤانسونا *** و خير الأنس تشريف الأحبة
د.مريم عبد الله
لك التحية و أنتي تلبين دعوة الإخوة بالانضمام إلى منبر الشعبية , و لك التحية و أنتي توشحين البوست بذكريات صادقة تضمد جراح غربتنا و لك التحية و أنتي ترين بصيص ضوء في نهاية النفق يبشر بعودة الشعبية إلى سابق عهدها...فهل تعود..و لهم التحية الإخوة الأعضاء و هم يتخيرون أفضلنا ليمثلنا خير تمثيل.
مبروك العضــــــــــــــــــــــــــــــــــــــوية لك و للشعبية..عقبال د.ستنا خضر و مشكورة على الرد , و كمان خالد درق و ما شاء الله على البراعم الصغار و الصور و اوع يطلعوا أشقيه زيك يا درق , أما الكسالى مثلي و صديقي حسن مضوي يمتنعون..
مجدي نقد ,,
تخريمه :أنت يا الوليد بالله دكتورة روما دي كانت بتفكك مكن قدر دا؟؟ ياأخي ما بالغت عدددديل كدا!! سمية الألفي مرة واحدة!!! ما كان ظاهر عليها...وصيها و قول ليها ممنوع تمشي بوست تاني إلا و معاها واحد من أولاد الحلة..اااااااااااي ما عندنا بنات يمشوا براهم..ههه..
لكم كل الود,,] |
| |
|
|
|
|
|
|
Re: مدرســـــة المســاكن الشعبيــة الابتدائيــة جنــوب (Re: وليد عبد اللطيف)
|
ورسالة من دكتورة روما
المظاهرات في شارع المدارس
Quote: عادل عثمان اظن الفليم كان اسمه رحلت عيون ولا شي كدا فتشوا واتاكد لي من اسمو لانو من ضمن الورثه بتاعت العائله لكن لقيتني كيف
عز الدين عباس الفحل التحيه لاستاذكم الفاضل طه عبد الرحمن ولكل طه عبد الرحمن في بلدي ومعليش الجاتك في صحن الشطه سامحتك متخيله المنظر
الليله نتكلم عن المظاهرات في شارع المدارس طبعا لما كنا في الابتدائي في الشعبيه شمال ولا بنعرف المظاهرت ولو في مرة عرفنا شي بيكون بثقافة السمع بعد ما دخلتا المتوسط وبقيت من الطلاب في شارع المدارس اختلف الامر طبعا اليوم بيكون عادي لكن بعد الفسحة الاولي ما بتسمع الا فليق بالطوب في العرش البيكون زنكي وما تسمع الا صوت البنات بيصرخوا وكل معلمه تمشي المكتب تاخد شنطتها وتمشي بيتها
اليوم الدراسي بيكون خلاص الله يرحمه انا يا جماعة واعترف كان عندي جبن رهيب ما بحب الزحمة ومن ما يرموا اول حجر في الزنكي باكون طبلتا درجي ويا فكيك على البيت بقوا جاراتنا لما يشوفوني راجعىة البيت بيعرفوا انو في مظاهرات وانو اولادهم ما جوا بقوا ناس شارعنا الطلاب العندهم هوايه ارتياد المظاهرات يقولوا لي ما ترجعي البيت لو بتخافي امشي اقعدي في اي حته ما ترجعي الحله وتجيبي لينا الكفوة وني اختي ومحود اخوي شكله كبيرة عريضه معاي لانو امي بتمرق تكوسهم لو انا جيت وهم ما جوا وانا كل مرة اوعد ومع اول طوبه في الزنكي انسى الوعد وصوف اجري على الحله
من مرتادي المظاهرات كان محمود اخوي واختي منى وفي يوم ابوي راجع بي عربيه المطار و جوا مارين بشارع المدارس وكان في الله يكرمكم صندوق زباله مقلوب وبت وولد طالعين ينططوا فوقو ويفلقوا وابوي رحمة الله عليه نضارتو الكل عارفها ما قعر كبايه لو في وصف اكتر من كدة كنتا قلتو بقا يقول حسا الولد والبت دي وين اهلهم ديل اولاد منو والمعاه في البوكس شايفين انو البنططوا وقالبين صندوق الزباله ديل منى اختي ومحمود اخوي طبعا كان يوم ما طلعت ليه ملامح بالنسبه ليهم
اتذكر في قصه لي بت اسمها امنه المال كانت جنها مظاهرات وهي من بنات المذاد يلا جا البوليس وهي جرت وكل زول دخل ليهو على شارع هي مالقت ليها اي لفه وقامت دفرت اقرب باب ليها ولقت الحمام قدامها قامت مكفكفة البنطلون وشالت الطشت وجابت حجر الكرعين وبقت تدعك في كعب رجليها قام البوليس جا داخل البيت لقاها بتدعك في كعب رجليها قال ليها ما جوا هنا طلبه من ناس المظاهرات قالت ليهو لا وربنا لا كسبتهم قليلين الادب ديل البوليس مرق وجات مرت ناس البيت قالت ليها منو انتي وحكت ليها القصة قامت ست البيت قالت ليها طالما انتي فاضيه وبتاعت مظاهرات تعالي غسلي معاي وما خلتها تمرق من البيت الا بعد ما نشرت معاها الهدوم دي كانت من القصص البطوليه التي تتداول وقتها
اي حصه ما اخدناها يوم المظاهرات لازم نذاكرها برانا ونجي حالين التمارين براك لانو المدرسات ما ملزمات يشرحوا لينا تاني وكان الناس الما بيرجعوا بيوتهم كانوا بيمشوا في الكونار بتاع شارع المدارس في مقابل مدرسه الشعب الفي ضهر عشمانه ومدرسه الشعبيه في كافتيريا عليكم الله الطاري اسمها اقولوا لينا كانوا بيمشوا هناك او البنات بيمشوا سوق سعد قشرة او سوق الزنك كما يحلو للبعض ان يسموه او تمشي مع واحدة صحبتك بيتهم تقعدوا تتونسوا
مرة جات المظاهرات وانا جريت وبعد ما جيت قريب من شارع ام درمان وانا جايه من عوض ساتي جا الكومر من شارع ام درمان وانا جاريه وفكوا بنبان والله ما عندهم شغله حسا شكلي دا شكل مناضله خسارة البنبان ودخلتا عند ناس عادل بوضيا وكانوا اهل لي بنات ساكنوا جنبنا ناس سلافة وحكمه مصباح وادوني مويه اتذكر المرحومه امهم وانا اشيل واغسل في عيوني بالمويه وعيوني تسخن من البنبان وما قادرة افتحهم تاني اتعلمتا من ديك لما اجري ما اجري في سهله اجري في وسط الشوارع البتكون فيها بيوت
طبعا شمتا ناس ابله ظاظا فيني وكل الابلوات والكباتن ناس المظاهرات لانو الكانوا بيقولوا لي ما تمشي البيت ما ضربوهم بالبنبان وانا الما بامشي في المظاهرات اضربتا بالبنبان المفروض اتاجر بالمساله دي رايكم شنو اعمل لي موتمر صحفي وانزل لي في اليوتوب كلبين تلاته واهو الزول يسترزق برضو
اخواني وين ما تكونا اتمنى ليكم مساء سعيد انتم ومن يعز عليكم
روما
|
من بقايا الدمار الشامل
| |
|
|
|
|
|
|
Re: مدرســـــة المســاكن الشعبيــة الابتدائيــة جنــوب (Re: شمس الدين ساتى)
|
ناسي واهلي الشعبيياب وين ما تكونوا
صباحكم خير وفرح وصحه
اليوم يا اخواني حانا ماجزة وشديت الترمس واهو دا خاتاهو قدامي يعني ح اعمل ليكم وجود مكثف
والليله يا انا يا الاجازة واكيد النتجيه ح تطلع انا ووب علىك روما يسا بت ليلى صغيرة وجاهلة البرونيا الجاتني دي شنو
من هضربتي بالشعبيه حلمانه اني سافرتا السودان واني في الشعبيه وعايزة اكتب في البوست من هناك قولوا امين
صباج النور عليك يا زهور صباحكم يوم يقاس بي دهور
روما
| |
|
|
|
|
|
|
Re: مدرســـــة المســاكن الشعبيــة الابتدائيــة جنــوب (Re: مريم عبد الله)
|
ورساله من دكتورة روما
Quote: عادل عثمان ارحمو عزيز قوم ذل
عادل عثمان شفتا خالتي سميه الالفي عليك الله ما بتشبهنا تقول انا قطعه منها
سنت كم دي على قول ناس الودع خليها حمدو في بطنو طبعا ح انكر الكلام دا كان سنت كم لاني زي ما عارف من مواليد سنت 2000
اها عليك الله بالهيلمانه دي انا ما كان عندي حق اخاف يكشفوا كزبتي لو شفتا منظرها قاعدة عندناس زينب عطا ولابسه التوب انا الفيني كملت والله ومن يومها بقيت امشي بشعار المرحله اذا كنت كذبوا فكن ذكورا ومن عندي اقتبس اذا كنت كذوبا اوعا تتشبك في سميه الالفي يعني انا ينطبق على الكلام الاتي
حظي الهبيس الهردبيس
الناس يرك فوقها الحمام
وانا في راسي يبرك لي كديس
وعلى قولتهم في الفشفاش لقيت العظم يعني لو كنتا اخترتا ام كلثوم كان مالو او كريمه مختار بس ربك كمل ستره معاي
لما كنتا باكتب ليك كنتا في المستشفى وزميله لي شايفاني اكتب واضحك وحكيت ليها طبعا كميه النورة والفرهدة والانبساطه وحسا لما فتحتا البوست لقيتك منزل الرابط رسلتو ليها عشان تشوف خالتي سميه الالفي برضو الزول يتفخر بي اهلو موش الاهل عز والعز اهل
خلاص النك نيم بتاعي ح ابقيه بت اخت سميه الالفي ولا رايك شنو في حفيدة الالفي او الالفي جدها اختار لي واحد من الاسماء و انا موافقه
تسلم على صورة ة الاقمار الصناعيه عليك الله كان ما نزلتا لي مدرسه عوض ساتي وبحري القديمه النقدة في ايدك يا عادل عثمان يا اخوي
اها النقوم نشوف ترمسي دا بدا يغلي العضمه كبرت يا اولاد ابوي الله يدينا العافيه
اقعدوا طيبين انتم ومن يعز عليكم
روما الشهيرة ببنت اخت سميه الالفي
|
من بقايا الدمار الشامل
| |
|
|
|
|
|
|
Re: مدرســـــة المســاكن الشعبيــة الابتدائيــة جنــوب (Re: مريم عبد الله)
|
الدكتور امير قناوي
مشكور وتبارك ليك السعادة والايام الطيبه
لو ما انتو فزعتو معاي ما كنت ح اقدر اجي بالباب كنتا ح اكون زي لما العروس بتكون بترقص تلقا دايما في ناس بيتاوقوا بالحيطه
والعروس هي الشعبيه والمعازيم هم حبر كمبيوتراتكم وبيت العرس في قلب كل زول بيكتب او بيزور بوست الشعبيه
اخوي ولا خط ولا يحزنون انا بحس لما اكون هنا اني قاعدة في بيتنا في راكوبتنا وطالعه بالحيطه اتونس مع الجيران
انا عندي فحمة جبتها معاي معاي من الفحامة الفي الشعبيه وغيرنا البيت من 96 لغايت الان 3 مرات وهي دايما معاي
( جن رسمي ) وما بعزها عليكم بيس حرام جير بوست الشعبيه الحاج حمد ضربوا لينا للعيد خليه يقدم شويه الجير
وانا املاهو ليك شخبته لكن لو في واحد مننا الله فتحها عليك واترفعت قدمو
للحج ما ح اشخبط عشان الحيطه تكون فنانه كدا ولما يضربوها جير ابيض ويرسموا عليها رسمت الكعبه المشرفه ويكتبوا فيها
يا داخل هذا الدار صلي على النبي المختار
او حجا مبرورا وسعيا مشكورا يا حلاج فلان
قولوا امين يا جماعه يسمع مننا الله ونمشي الحج
روما
| |
|
|
|
|
|
|
Re: مدرســـــة المســاكن الشعبيــة الابتدائيــة جنــوب (Re: مريم عبد الله)
|
اخوي عماد احمد
ابارك ليك كل البيسر البال ويفرح العم والخال
والنعم فيك وفي حي الدناقله انا درسوا معاي زميلات من حي الدناقله وماشاء الله على الذوق والرقي
وحباب اي زول من بحري ست الهوى المن غيرها مالي دواء
اولا بالتبادي ( الجمله دي جاتي الليله من وين ما علينا ) اهنيك على التوثيق للمرحوم
محجوب عبد الحفيظ ان شاء الله في ميزان حسانتك
تاني شي اهلا بيك وبي كل ناس بوست بحري ومرحبابكم وبي اي
مشاركه توديها هناك او تجيبها لينا هنا بيشرفنا ومسموح اخوي
واتوقع مننا ان نزوركم لاننا بندوركم
شكرا على صورة الخاله سميه الالفي عليك النبي وحلفتك ختيت ليك الزومه في رقبتك
ما بتشبهني الخاله عليك الله ما فوله وانقسمت نصين ما قصرتا معاي ولا مع خالتي
شرفتني اخوي
روما
| |
|
|
|
|
|
|
|