الشعبية نجمة تزين سماء مدينة الخرطوم بحري

Quote: من ظرفاء الشعبية جنوب :اخونا مصطفى ابوقرجة او ابوقرجة الصغير كما يحلو لاخيه الاكبر ابوقرجة عضو البورد وبوست الشعبية المعروف الذي لم يعد الرجل الوحيد بالبيت قبل ايامات دا. لكن في الحقيقة الاسم بتاع ابوقرجة هو فعلاً بتاع ابوقرجة الكبير لكن اشتهر به مصطفى جداً يعني هسه لمن نقول ابوقرجة طوالي بيكون المقصود مصطفى ابوقرجة الصغير واحيانا نضيف كلمة الكبير لمن يكون المقصود ما مصطفى ،انا اعزي المسألة دي (تغول الاخ مصطفى على الاسم ) نسبة لسفر ابوقرجة الكبير واغترابه فترة طويلة وانا ما عارف الدعاء ( رد الله غربته ) دا دعاء كويس ولا ماكويس في ظل الظروف التي نعيشها وربنا يصلح الامور ويولي من يصلح . والصاق صفة الصغير على اخونا مصطفى انا شخصيا اعتقد انها تهميش انقاص لقدر صديقي ( صاحب المقام الرفيع ) طويل الباع وبمناسبة البــــاع اخونا مصطفي احسن زول يشتري خروف وهو صاحب نظرة فاحصة وصبر كبير على عرب الخرفان ومجابدتهم والحلة بتعتمد عليه في المسألة دي وايام الضحية سوقو بيكون حار جداً. وايضاً اخد خبرة كبيرة في دفن الموتى (اطال الله اعمار القراء ) وناس الشعبية جنوب كلهم تقريباً بيدفنوا في مقابر حلة حمد والمقابر زحمة ومافيها اي طريقة لمقبرة جديدة لكن لو كان ضمن المشيعين بجازف واحد وبيرقد ليك زولك مرتاح اخد الخبرة دي من العم عمر ابكر مؤذن مسجد الحي ( اطال الله عمره وحفظه ). وطرائف ابوقرجة كثيرة ومنها : في يوم من الايام حصلت وفاة في الحلة وكان من ضمن المعزين اخونا الاكبر حيدر الجقدلي والفراش كان في حلة الزهرة (ودي من مناطق نفوذ ابوقرجة وهو زعيم الحلة وسكرتير ورئيس ومدرب الفريق وحامل اختامه وشهادات الميلاد المزورة الخ......... ) والزهرة كما هو معلوم من اضعف فرق رابطة الشعبية ستات وسبعات وخمسات طواااااااااااااالي وتحلق اولاد الزهرة حول الاخ الجقدلي ورحبوا بيه ترحيب كبير موية باردة وشاي مسيخ حسب طلب الجقدلي .انا استغربت من الترحيب المبالغ فيهو دا المهم في النهاية عرفت انو ناس الزهرة عندهم مباراة مع الميرغني و مفروض يكون الجقدلي الحكم ولاعبي الزهرة دايرين ليهم مدخل وفهموا من الجقدلي بعد نقاش مع احد المعزين انو بيميل لليسار وسب ولعن الاساليب الفاسدة المتبعة في قصة تسجيل الناخبين وناس الزهرة وقفوا مع الجقدلي ضد الضيف الاخر المهم الجقدلي انبسط من موقفهم جدا وقال ليهم ياناس الزهرة بالله انتو شيوعيين. فردوا كلهم بصوت واحد : آآآآي . و قال ليهم والله انا لو عارفكم كدا كان عكستها ليكم كورنرات وبلنتيات ) واخونا ابو قرجة استغل الموقف وقال للجقدلي هسه ما فات شي بكرة الميرغني دا كيف الجقدلي وعدهم بانو حيقيف معاهم ولم يوف بذلك وانتهت المباراة بنتيجة اربعة اهداف مقابل هدفين والزهرة كالعادة مغلوبة والسبب الرئيسي في هزيمة فريق الزهرة في تلك المباراة المدافع الجديد السجلوه من رابطة الدناقلة (بدرالدين اسحق) عضو بوست الشعبية . ولا تعليق