|
دعواتكم لزميلنا المفكر د.الباقر العفيف بالشفاء العاجل
|
|
 Re: مكتب تسجيل الأجانب شمال عمارة الفيحاء الخرطوم ده فيهو حاجات عجيبة بتحصل ، ده شنو ده؟ (Re: منتصرمحمد زكى)
|
أها ،،، تقوم تمشي وراهو للبرندات الجنب المكاتب ، تقوم تتفاجئ مفاجأة تافــــــــــهه جداً تزعلك ، وهي إنو البرندات الجنب المكاتب بااااااااااااردة وهوا المكيفات يلفحك ويقول يا ليل ، تقوم تعاين جوا المكاتب تلقي ليك ضباط نضااااااف ونايرييييين يلمعو زي صحن الصيني المتمر ، ويعاينو ليك شذراً كأنك دخلت عليهم في صومعة تعبد مقدسة لا يدخلها الإ كل ذو حظ عظيم.
في اللحظة دي بتكون نسيت إنت جيت البرندات دي لي شنو ، لحدي ما بتاع الصورة يديك نهرة يطير ليك الاستمخاخة بتاعة المكيف من راسك ، يقول ليك "ياخينا" أقيف خلينا نصور ونشوف شغلتنا بتتلفت كده مالك إنت؟
| |
 
|
|
|
|
|
|
|
|
Re: مكتب تسجيل الأجانب شمال عمارة الفيحاء الخرطوم ده فيهو حاجات عجيبة بتحصل ، ده شنو ده؟ (Re: معاذ حسن)
|
يقوم ياخد ليك الصورة و"فللي" يرجع لي الراكوبة المسخنة ويهدم ليك لذة الهوا الصااااااقط ، وتقوم تمشي وراهو زي السايقنك لي مشنقة ، أها يقوم يديك التمنية صور وبي زهج شديد وعامل فيها زعلان وعايز يطرشق وده كلو عشان ما تقولو ليهو الباقي بتاعي وينو؟ تقوم تعمل فيها مجنون وتقول ليهو الباقي يا خينا ، يقرب يطقك بالكاميرا الشايلها ويقول ليك تعال لما تخلص بديك ليها ألف جنيهك دي "يقولها ليك بي طرف نخرتو ومعاها بزغه سريعة كده في الواطة". دااااااام مان!
| |
|
|
|
|
|
|
|
|
|
Re: مكتب تسجيل الأجانب شمال عمارة الفيحاء الخرطوم ده فيهو حاجات عجيبة بتحصل ، ده شنو ده؟ (Re: Mohamed Abdelmotalib Hassan)
|
أها تقوم ترجع لي عمكم أبو طاقية وعراقي ، تقول ليهو أها تاني شنو؟ يقول ليك أمشي جيب ليك دمغة بي ستة ألف من الشباك داك ، طبعا الجواز معاهو ، أها تقوم تشمي للشباك ، تلقي ناس واقفين والزول المفروض شغال في الشباك مافيش ، تنتظر وتنتظر وتنتظر وتنتظر .... وكده ، أها يقوم يجيك صاري وشو ويتمغا ويتثآب ويعاين ليكم كداااااا و يقوم تاااااني يطلع برا ، وتاااااني يجي خاشي تقوم لما تصل الشباك تديهو عشرة ألف ولاعشرة جنيه ما عارف ، يقوم يديك الدمغة ويعمل نايم ، تقوم تقيف شوية وتعاين ليهو في عينو ، يقوم يعمل فيها بفتش في حاجة في الدرجة ، ويدنقر تحت التربيزة وبعد شوية يرفع راسو ويعاين ليك ويسألك وكأنو بيتكلم مع زول ما أداهو عشرة ألف علي إعتبار إنو أنا الزول الواقف وراي وإنو عامل فيها تفيتحة لمن غلط ، تقوم تعكلت شديد وتقول ليهو الباقي ، يقوم يقول ليك ما في فكة ، لما تخلص تعال شيل الباقي.
| |
|
|
|
|
|
|
|
|
|
Re: مكتب تسجيل الأجانب شمال عمارة الفيحاء الخرطوم ده فيهو حاجات عجيبة بتحصل ، ده شنو ده؟ (Re: Mohamed Abdelmotalib Hassan)
|
تقوم تشيل الدمغمة و تمشي لي عمكم أبو عراقي ، تديهو الدمغة ، يقوم يقول ليك أمشي صور لي الجواز من المكتب داك وصور لي معاك جواز الضامن بتاعك ، تقوم تمشي المكاتب الجنب البرندات حيث التراطيب والبرستيج العجيب والهوا الصااااااقط والناس المتمرة ، تقريباً دي أكثر حاجة كانت بتكيف الزول من عمكم أبو طاقية لما يرسل الزول للبرندات المرطبة دييك ، أها تقوم تمشي للبت البتصور الجواز ، تقوم تصور ليك الجواز تقول ليها كم؟ تقول ليك تلاتة جنيه ، تقوم تديها خمسة ، تفتح الدرج ما فهيو ولا هللله ، مع انو المكتب مليان بشر جوا وبرا ، يعني الناس ديل دفعو شنو حصاص مثلاً؟ تقوم تقول ليك تعال لي بعد تخلص شيل باقيك.
| |
|
|
|
|
|
|
|
|
|
Re: مكتب تسجيل الأجانب شمال عمارة الفيحاء الخرطوم ده فيهو حاجات عجيبة بتحصل ، ده شنو ده؟ (Re: Mohamed Abdelmotalib Hassan)
|
Quote:
يا محمد والله كلامك كلو صاح
انا بديت من المقرن بناء على الاحالة من ناس المطار
ناس المقرن قالوا حولوني الفيحاء
جيت الفيحاء قعدت في الراكوبة بتاعة الزنكي القلتها
واخوي خلص الاجراءات,,
الموضوع اخد مني يوم واحد بس!!
ملحوظة: دفعنا مية ما دزعين الف,, |
يا معاذ : بالله إنت أجنبي؟ إنت مش في السعودية؟ السعودية برضو فيها أجانب وكده؟ولا كيف؟
الظاهر الناس ديل دقسوك ، لكن هم علي حسب الأجنبي ، يعني لو شافوك أجنبي تفتيحة بدفعوك تزعين ولو شافوك أجنبي تغميتة المية محمداك.
الله يعوضك في عشرتك.
| |
|
|
|
|
|
|
|
|
|
Re: مكتب تسجيل الأجانب شمال عمارة الفيحاء الخرطوم ده فيهو حاجات عجيبة بتحصل ، ده شنو ده؟ (Re: Mohamed Abdelmotalib Hassan)
|
| Quote: تقول ليهو أسمع أنا عايزك تصورني أنا مش الجواز ، يقول ليك : ما عندي خلفية عشان الراكوبه مفتوحة والناس ماشة وجاية ، تقول ليهو خلاص صورني في البرندات الجنب المكاتب ، يقول ليك ما بقدر أمشي هناك عشان الناس دي واقفة ، تقوم تعكلت معاهو شديد في النهاية يوافق علي مضض مع طنطنة تحت تحت كده. |
والله ياسعادة المستشار عليك محن الدنيا ...
يازول عشان تعرف ا ان السودان ممتع لازم تمر بكل هذه المراحل
بس سودانير دي اختاها تب الباقي كلو هين
واحد حكي عن الاجراءات في دبي القريبة دي اتخيلت نحن في كوكب اخر
| |
|
|
|
|
|
|
|
|
|
Re: مكتب تسجيل الأجانب شمال عمارة الفيحاء الخرطوم ده فيهو حاجات عجيبة بتحصل ، ده شنو ده؟ (Re: وليد عبد اللطيف)
|
تعرف يا محمد .. الموضوع ده عجبني شديد ..السنة الجالية الواحد يمشي ياخد ليهو
جواز أجنبي إن شاء الله من الجنوب ..للزمن داك بنفصل ..وبجيهم جاهز بكيس مليان فكة والجواز
مصور وأنا مصور برضو ..وعمك ابو عراقي وطاقية حمرة ده ..بقول ليهو عليك ربك دي أخلاق وهندام
تقابل بيهم أجانب ..وأصلي من جنبو ما بزح .. أي زول عايز فكة بفك ليهو ..وبتاع الكمرة
ده خلي ساكت ..بجي بكمرة دجيتال ثمانية سلندر .. والتصوير بخمسة جنيه بس ..وبتاع الدمغة بمد
ليهو الثلاثة جنيه وما بشوف ليهو ذاتو ..
تحياتي ..
| |
|
|
|
|
|
|
|
|
|
Re: مكتب تسجيل الأجانب شمال عمارة الفيحاء الخرطوم ده فيهو حاجات عجيبة بتحصل ، ده شنو ده؟ (Re: بشير جبريل علي)
|
Quote: تعرف يا محمد .. الموضوع ده عجبني شديد ..السنة الجالية الواحد يمشي ياخد ليهو
جواز أجنبي إن شاء الله من الجنوب ..للزمن داك بنفصل ..وبجيهم جاهز بكيس مليان فكة والجواز
مصور وأنا مصور برضو ..وعمك ابو عراقي وطاقية حمرة ده ..بقول ليهو عليك ربك دي أخلاق وهندام
تقابل بيهم أجانب ..وأصلي من جنبو ما بزح .. أي زول عايز فكة بفك ليهو ..وبتاع الكمرة
ده خلي ساكت ..بجي بكمرة دجيتال ثمانية سلندر .. والتصوير بخمسة جنيه بس ..وبتاع الدمغة بمد
ليهو الثلاثة جنيه وما بشوف ليهو ذاتو ..
تحياتي .. |
يا بشير،،،
هههههه ، فكرة والله ، لكن :-
عارف لو عملت كده واطاتك صبحت ، حيقولو ليك الصور المن برا غير معتمدة ، وإنو تصوير من خارج المكتب غير مصرح به ، بعدين أكيد الناس ديل متفقين مع الناس الجوا ، ده لو مافي صلة قرابة ولا مصلحة ، وإحتمال كبير جداً إنو ماكنة التصوير والكاميرا تكون تابعة لي واحد مسئول جوا ، غايتو جرب وأدينا خبر.
عارف يا بشير أكتر حاجة بتحير الزول شنو؟ إنو الفورمات البتتملئ محتكرها عمك أبو عراقي ده ، وده غلط المفروض الفورمات دي تكون قاعدة في التربيزة والناس تجي تشيلها مجاناً وتملاها وتعمل باقي أجراءاتها.
ما قادر إتخيل إنو فورمات مجانية يسلموها لي زول يتاجر فيها!!
| |
|
|
|
|
|
|
|
|
|
Re: مكتب تسجيل الأجانب شمال عمارة الفيحاء الخرطوم ده فيهو حاجات عجيبة بتحصل ، ده شنو ده؟ (Re: Mohamed Abdelmotalib Hassan)
|
Quote:
عارف لو عملت كده واطاتك صبحت ، حيقولو ليك الصور المن برا غير معتمدة ، وإنو تصوير من خارج المكتب غير مصرح به ، بعدين أكيد الناس ديل متفقين مع الناس الجوا ، ده لو مافي صلة قرابة ولا مصلحة ، وإحتمال كبير جداً إنو ماكنة التصوير والكاميرا تكون تابعة لي واحد مسئول جوا ، غايتو جرب وأدينا خبر.
|
طبعا دي أكيد يا محمد لازم تعمل أي حاجة عندهم ..وإلا التلتلة حتحصل ..دي ما عصابة ..أنا أخشى تجي بفكتك ..يقولوا لع ..لازم تكون ماعندك فكة ..ده نظامنا كدة أمنع النقاش ..ههههههه
تعرف أنا أكتر حاجة غايظني عمك ابو طاقية حمرة ده ..ماسك ليهو فورمات وتاريخ إصدار وإنتهاء الجواز وين .. والإسم وين ما عارفم ..ومتكرش طاقيتو وصاري وشيشو ..التقول في حفلة ..مرض
| |
|
|
|
|
|
|
|
|
|
Re: مكتب تسجيل الأجانب شمال عمارة الفيحاء الخرطوم ده فيهو حاجات عجيبة بتحصل ، ده شنو ده؟ (Re: Mohamed Abdelmotalib Hassan)
|
Quote: تعرف يا محمد .. الموضوع ده عجبني شديد ..السنة الجالية الواحد يمشي ياخد ليهو
جواز أجنبي إن شاء الله من الجنوب ..للزمن داك بنفصل ..وبجيهم جاهز بكيس مليان فكة والجواز
مصور وأنا مصور برضو ..وعمك ابو عراقي وطاقية حمرة ده ..بقول ليهو عليك ربك دي أخلاق وهندام
تقابل بيهم أجانب ..وأصلي من جنبو ما بزح .. أي زول عايز فكة بفك ليهو ..وبتاع الكمرة
ده خلي ساكت ..بجي بكمرة دجيتال ثمانية سلندر .. والتصوير بخمسة جنيه بس ..وبتاع الدمغة بمد
ليهو الثلاثة جنيه وما بشوف ليهو ذاتو ..
|
ههههههههههههههه
بوست لذيذ بشكل !!
| |
|
|
|
|
|
|
|
|
|
Re: مكتب تسجيل الأجانب شمال عمارة الفيحاء الخرطوم ده فيهو حاجات عجيبة بتحصل ، ده شنو ده؟ (Re: Mohammed Awad)
|
Quote: ياأخ عبدالمطلب باين عليك فعلا بقيت اجنبى .ياشيخنا فى حاجةاسمها حلقات الحفظ والتلاوة داخل مكاتب الدولة وفى اثناء ساعات العمل والدوام الرسمى .
وانت سيادتك عايزهؤلاء الزهاد العباد او بالأحرى تريد القوى الأمين يخلى العبادة عشان يديك دمغة؟
امرك عجيب ياخى .. |
يا قلقلو،،،،
ياخي كويس ، التلاوة ما بناباها ، هي ذاتها بتجيب البركة ، لكن اليرجعو لينا باقينا .لأنو ما معقول تتلو وتتلو وتتلو وبعد ده كلو تعمل نايم بالباقي ، ولا إحتمال يكون عندهم فلسفة عميقة للقصة دي ، ألحقنا بالتخريح يا رعاك الله.
| |
|
|
|
|
|
|
|
|
|
Re: مكتب تسجيل الأجانب شمال عمارة الفيحاء الخرطوم ده فيهو حاجات عجيبة بتحصل ، ده شنو ده؟ (Re: Mohamed Abdelmotalib Hassan)
|
Quote:
اصلآ دفع لى دفع امشى البينية
اهو كلو لحس فى لحس
بس داك معاهو كنداشة
شايفك السخانة فى بُرى عذبتك |
البينية دي منو كمان؟ وين؟ وموضوعها شنو بالله؟
عارف مع إنو الأجنبي المفروض المكان معمول بإسم الأجنبي ، لكن الأجنبي مهمش داخل في محل ((التأجنب)) ظاااااطو.
بري؟ تصدق يا مؤمن بري دي الراكوبة العفييييينه بتاعة الفيحاء ما تلم فيها ، تكون لافي الشارع لحدي ما راسك يلف حتين تعرف إنو مفروض تمشي المقرن ، في البداية ما بقولو ليك جنب الفيحاء ، المقرن بس ، أها تمشي المقرن يقولو ليك الفيحاء.
بالله نورنا علي الزولة القلت إسمها فوق دي.
| |
|
|
|
|
|
|
|
|
|
Re: مكتب تسجيل الأجانب شمال عمارة الفيحاء الخرطوم ده فيهو حاجات عجيبة بتحصل ، ده شنو ده؟ (Re: doma)
|
لوووووووووووووووول انت عارف انا لما امش بيقوموا يمشوا معاي ناس البيت لانهم عارفين اخلاقي ساكنه فيها بالايجار وبشيلوا مني المواضيع وبجروا من شباك لشباك ويكتروا لي في البارد عشان ما الخبتها ليهم و يرحلوني في ظرف 24 ساعه . اولا انا للان حكايه انه عندي حواز اجنبي دي ما داخله في راسي بجي ادخل ولا بعاين قالوا شنو في الباسبورت اها مره مشيت عشان امدد الفيزا دا طبعا قبل اعمل بطاقه اجانب فلما مشيت ليهم شباب ظريفين
قالوا لي وين الزول الاجنبي دا قلت ليهم ما انا زاتوا
ضحكوا شديد
قالوا لي يا حاجه انت اولا ما سجلتي في جوازات الاجانب
قلت ليهم والله ما كنت عارفه وصحي انا ما عارفه حكايه التسجيل دي كنت فاكره من ختم لي الدخول معناتوا سجل عنده اني دخلت البلد وللفتره الفلانيه
قالوا لي جوا الفيزا الادوك ليها في المطارمكتوب تسجلي خلال اسبوع اظن
قلت ليهم والله ما فتحتو لا شفتو من يومي الجيت
قالوا لي معليش يا حاجه اسه ادفعي عشرين دولار او ما يعادل وما في مشكله اها بعد داك مشينا للصاله الحاره دي وحقيقي المكيفات كلها عطلانه لكين مكيفاتهم جوا شغاله لكين ما ياهو حالنا والاهمال في صيانه المرافق العامه من حمامات مطار الخرطوم الدولي لاي مرفق حكومي
انا غايتوا ما شايفه حل غير يرحلونا بي سلامتنا يجدعونا في ارض جرداء يا اتعلمنا عملنا شئ في الارض الجرداء دي
ولا انتهينا كامه لا تنفع الا للنقه
ويجيبوا الصيننين او الخواجات ليعمروا السودان
| |
|
|
|
|
|
|
|
|
|
Re: مكتب تسجيل الأجانب شمال عمارة الفيحاء الخرطوم ده فيهو حاجات عجيبة بتحصل ، ده شنو ده؟ (Re: doma)
|
مريت بهذه المسخرة تمام
بدأت ببري مرورا بعفراء و انتهيت بالفيحاء
اتصلبت هناك في الشباك و الجو لم يكن حرارا كما هو موصوف الان
و لكن دخلت لتلك المكاتب و استرخيت معظم الوقت.
شعرت بالتماطل المتعمد و لكن لم اعره اهتمام
في النهاية بعد وش جامد و مثابرة و الحاح اخذت جوازي الاجنبي و مختوم فيه ارقام جواز اخر!
بهذه السبهليلة في التعامل في اوراق رسمية!
السؤال
اليس التسجيل اوتماتيك عند دخولك للبلد؟
ما معنى هذه الرحلة و هذه الرسوم؟
تحاياي
| |
|
|
|
|
|
|
|
|
|
Re: مكتب تسجيل الأجانب شمال عمارة الفيحاء الخرطوم ده فيهو حاجات عجيبة بتحصل ، ده شنو ده؟ (Re: قلقو)
|
طارق
| Quote: وكذلك الفكة متوفرة لترجيع الباقي |
زمان في المغتربين بتاع ماكينة التصوير كان برجع الباقي لبان قمت قلا لي كرار التهامي لو رجعنا لبتاع ماكينة التصوير بي اللبان دا ما بصور لينا!! باين بقوا يرجعوا الباقي!! دي كويسة برضو لكن اكل الباقي دا شلئع عند الصرافين خاصة الجهات الحكومية!! مما يقول ليك تعال للباقي أعرف الحكاية أكل ، بعدين الباقي دا ما يورفوهو هم من بنك السودان لو عاوزين يرجعوهو!!
| |
|
|
|
|
|
|
|
|
|
Re: مكتب تسجيل الأجانب شمال عمارة الفيحاء الخرطوم ده فيهو حاجات عجيبة بتحصل ، ده شنو ده؟ (Re: Mohamed Abdelmotalib Hassan)
|
Quote: قصه الباقي دي انه اي زول يلم في التاني يحلب
البلد دي ماشه بي كدا
الحكومه تحلب فيهم وهم يحلبوا في بعض
وانت كمان جاي من برا ومغترب وشايل جواز اجنبي يتفننوا في الحلب .
نحن محتاجين اعاده خلق مش صياغه . |
هي لكن يا دومة مفروض يخلوها حلوة شوية ، يعني يكون في تنسيق في عملية الحلب دي ذاتها ، لأنو ما ممكن عمك أبو عراقي يحلب ، والجنا بتاع المكامرا بتاع البزاغ يحلب ، والمتمغي بتاع الدمغة يحلب ، البنية بتاعة التصوير تحلب ، يخلوها حلوة رأفة بالأخ الأجنبي ، ياخي ده أصلو أجنبي ولا صلاح إدريس أصلو؟
عارفة يادومة :
اللذيذة في قصة الحلب العشوائي التراكمي ده إنو البت بتاعة التصوير بت سميحة ومتشنطة من النوع البعطش الجيم ويمُحِن الراء داك ، يعني تجي عشان تسأل من باقيك تقوم تسألك إنت "جاي" للباقي ، "إتنظر" شوية ، بعدين بيكون في ناس قاعدين جنبها شغالين معاها بتونسو جنبها ، تقوم تلقي نفسك محرج جداً ، في النهاية تعمل نفسك جاي لي حاجة تانية وتسألها : بالله ألقي عندكم دباسة؟
| |
|
|
|
|
|
|
|
|
|
Re: مكتب تسجيل الأجانب شمال عمارة الفيحاء الخرطوم ده فيهو حاجات عجيبة بتحصل ، ده شنو ده؟ (Re: Mohamed Abdelmotalib Hassan)
|
Quote: السؤال
اليس التسجيل اوتماتيك عند دخولك للبلد؟
ما معنى هذه الرحلة و هذه الرسوم؟
تحاياي |
ده الكلام الكنت عايز أقولو في نهاية البوست ده ، إنو مفروض يكون في موظف منهم موجود في المطار ، علي مدار الأربع وعشرين ساعة ، تسجل بمجرد دخولك ولا مانع من فرض رسوم إضافية ، لأنو التلتلة بتاعة جيب معاك ضامن دي حكاية مقرفة جداً ، خاصة إنو الضامن مفروض يكون معاهو بطاقة شخصية والسودان تقريباً تمنية وتسعين في المية ما عندهم بطاقة شخصية ، الغريبة عرفت مؤخراً أنو ممكن يقبلو بي جواز سفر من الضامن ، ومن المفارقة إنو تمنية وتسعين من السودانيين شايلين جوازات سفر وراجين السفر لكن لي وين؟ الله أعلم!
شكراً.
| |
|
|
|
|
|
|
|
|
|
Re: مكتب تسجيل الأجانب شمال عمارة الفيحاء الخرطوم ده فيهو حاجات عجيبة بتحصل ، ده شنو ده؟ (Re: Mohamed Abdelmotalib Hassan)
|
Quote: محمد كيفك والله ضحتنى بجد وانت بتحكى فى القصه وانا متخيل
المنظر بتاع عمك السافى والبزغه السريعه
وبعدين ياخ انت مالك جلده كدى عمك عشمان فى الباقى ما تخليه
ليه والله جنس جلاده عليك
----------------------------
تعال زمن السقط وبرضو بتعانى من التراب |
المحترم المحرب ،،،
حبابك ألف،،
هههه ، والله بطني بااااردة علي الباقي الشالوهو ، حلال عليهم ، عارفين البير وغطاها ’ بس قلنا ندور بيهم شوية ناس الأجانب ديل أكان يعملو للناس مكيفات ويصلحو الراكوبة الملهلبة ديك.
غايتو السقط الخوف مع الباقي يقولو دايرين بدل بطاطين ويزيدو الرسوم ، تبقي عوجة والله.
| |
|
|
|
|
|
|
|
|
|
Re: مكتب تسجيل الأجانب شمال عمارة الفيحاء الخرطوم ده فيهو حاجات عجيبة بتحصل ، ده شنو ده؟ (Re: Mohamed Abdelmotalib Hassan)
|
الاخ محمد سلامات
البوست يفتح اكثر من نافذةن بوست مميز حقا
نبتدئ من الاصل
رسوم تاشيرة الدخول لاي بلد كافية فلا هم حقا يحتاجون لجلب موظفي الراكوبة جوار الفيحاء للمطار للتحصيل الاضافي.
الزيارة للراكوبة تلك تتم في حالة الرغبة في تمديد الاقامة بانتهاء مدة الاقامة المعينة في ختم الدخول او في حالة تغير وضعية الاجنبي من سائح لمقيم او من طالب لمتزوج من مواطن بالبلد مثلا.
ثم بمجرد عبور الاجنبي لضابط الجوازات و الهجرة مسموح له بالدخول و مرسوم ذلك في جوازه يكون تسجل لدي السلطان في البلد في كافة مستوياتهاآليا. فما معنى فصل التسجيل عن التسجيل الاولى عند نقطة العبور؟
للحكومة السودان مبرر و مبررات
اهمها انها دولة جباية كيف ما اتفق. تسعى للتحصيل من اي كائن حتى و لو كان اجنبي عابر. فقد تفننت في الجبايات في حق مواطنيهافستمرأت و ادمنت الجباية فلحقت الاجانب بدون اعتبار لخطورة ما تفعل. و هو جد يترب عليه الكثير.
ففي العادة تسعى الدول لراحة الزائرين قدر الامكان و ليس التضيق عليهم لاعتبارات اقصادية و علاقات عامة بالشعوب و الامم الاخرى.
هذا اولا
| |
|
|
|
|
|
|
|
|
|
Re: مكتب تسجيل الأجانب شمال عمارة الفيحاء الخرطوم ده فيهو حاجات عجيبة بتحصل ، ده شنو ده؟ (Re: ثروت سوار الدهب)
|
أقول ليكم سر
كتير من المغتربين
اول ما يرجعوا من اجازة السودان
يصرحوا تصريح خطير جداً
أنا البلد ديك ما راح اقدر اعيش فيها !!!
والسبب الحاجات العجيبة البتحكو فيها
ده مشت إنتقاد
لانو السودانيين الواحد ممكن ينتقد وضوعو بكل وضوح
بس يجي زول من ( بره ) ينتقدو ليهو
يبقى أسد
ويدافع عن حاجاتو
يا أخوانا في حاجة إسمها الحكومة الالكترونية
وهي بإختصار إلغاء التعامل المباشر مع الحكومة وحصره على مواقع الانترنت بس
أحق الناس إنهم ينفذوها فيهم ( الاجانب )
عشان لمن يرجعوا بلدهم يتكلموا عن البلد الكانو فيها بإحترام وإيجابية
تصدقوا من يومين قلت لواحد من أخواني في السودان
أدخل موقع وزارة الخارجية السعودية
وأدخل البيانات الرسلتها ليهو وهي بإختصار رقم الاقامة بتاعتي في السعودية
يلقى ورقة
يطبعها
يمشي بيها السفارة السعودية بالخرطوم
هم راح يدهو تأشيرة الزيارة لامي إن شاء الله
لا مشيت وزارة الخارجية
ولا وقفت في صف
ولا راكوبة ولا حر
ولا غيرو
دخلت النت كتبت طلب
ردوا علي بالموافقة
والاهم من كل ده ما دفعت ولا مليم أحمر ولا أخضر ولا فوشيا كمان
عارف ليه
لان الحكومة هنا
عارفاني كوييييييييييييييييييييييييييييييييييس
وحافظا اسمي
عندهم صورتي
وعندهم بصمة اصابع يديني ورجليني وحاجات تانية حامياني
ولو عملت مخالفة في الشارع ولو حمرت ليك لي زول ساكت
مكتوبة على النت وعارفنها
عشان كده قدمت وانا قلبي جامد
ردوا علي بالموافقة
وانا هنا بقول إنهم عندهم إجراءات محترمة وانهم ناس محترمين
وانا هنا ( أجنبي )
وأياك اعني فأسمعي يا جارة
| |
|
|
|
|
|
|
|
|
|
Re: مكتب تسجيل الأجانب شمال عمارة الفيحاء الخرطوم ده فيهو حاجات عجيبة بتحصل ، ده شنو ده؟ (Re: كمال الشادي)
|
ثانيا
قلنا بأن التاشيرة السامحة للدخول للبلد كافية كرسوم و هي من اغلى التاشيرات على فكرة. تتجاوز ال100 دولار.
و لكن فنفترض ان هناك حوجة لرسوم اضافية عند التسجيل لماذا لا تضاف لقيمة التاشيرة الاصلية؟ او كما ذكر الاخ محمد لماذا لا يتواجد موظف الراكوبة في المطار ؟ فيتم هذا الاجراء الثنائي في نقاط العبور و المطارات و الموانئ؟
الاجابة تكمن في عقلية و طريقة إدارة الدولة السودانية اليوم.
الشاهد انها دولة حزب. دولة كونتونات دولة دكاكين و تدار بعقلية تجار المخدرات او اسر المافية الصقلية. كلو زول او جهة شغال على كيفه.يحصل في جبايات.
فهذه الرسوم الاضافية تخص جهة معينة في الدولة او اشخاص بعينهم كبند تمويل{نقاطة} خارج إطار تحصيل الفيزا و الاقامة و التي من المفترض أن يكون شان الاجانب فيها تابع بشكل رئيسي لإدارة الجوزات و الهجرة في وزارة الداخلية او كقسم منها.
إذا هذا الفصل متعمد. هذه الجهة التي تحصل في مكتب الراكوبة لا تريد دمج ميزانيتها مع المحصل في المطار او نقاط العبور او يكون مدموج في محصل التاشيرة في السفارات. يعني في جهة ما فارزة عيشتها و دايرة قروشها من النقاطة براها بدون مجابدة مع قسم ما او ادارة ما.
هذا هو التفسير المنطقي الوحيد لهذا الأجراء الشاذ.
هل اطلعتم يوما على تفاصيل الميزانية العامة للدولة او الولائية او البلدية؟
في الدول المحترمة تجد اشارة واضحة لمثل هذه الرسوم و اين تذهب.
| |
|
|
|
|
|
|
|
|
|
Re: مكتب تسجيل الأجانب شمال عمارة الفيحاء الخرطوم ده فيهو حاجات عجيبة بتحصل ، ده شنو ده؟ (Re: ثروت سوار الدهب)
|
ثالتا لماذا المكتب مجهول لبقية الجهات الرسمية؟
لماذا تصله عبر محطة محطين خطأ؟
Quote: أول حاجة عشان تعرف محل المكتب ده وين عايزين ليك يوم كامل ، أول تمشي بري يقولو ليك نقلوهو المقرن جنب البنك الزراعي تمشي هناك يقولو ليك لالالا ، ده خاص بالأجانب الدبلوماسيين ، أمشي جنب عمارة الفيحاء ، تقوم تمشي هناك......
|
الفرضية الاولية تقول بانه مكتب متنقل قد لا يحس به المواطنين كثيرا لعدم تعاملهم معه بشكل يومي فهو يخص الاجانب. و لكن هل هو مجول او صعب التحديد على رجال الشرطة في مركز بري حيث ارشدوني لمكان بالقرب من الفيحاء لنكتشف انه جوار الفيحاء في النهاية؟
و لو كان متنقل لماذا هو متنقل؟
و لو ثابت لماذا تصله عبر محطات و مشاوير لا داعي لها؟
الفرضية الضمنية تقول: إن اجهزة النظام الامنية غير متناسقة و تعمل كل على حداها و مفككة الاوصال، يغيب عنها الترابط و الانسجام، و غياب المعلومة عن بعضها البعض حتى في تحديد موقغ لادارة من ادارات وزارة الداخلية.
بمعنى اخر تكشف هذه الفرضية حقيقة باهرة: ضعف النظام و هوان اجهزته(نظام قاعد في الصقيعة) نظام يسهل صرعه بقليل من العزم و المسؤولية و التنظيم.
لكن تبقى قوته و دافعه للاستمرار بهذه الاجهزة المتخلفة و البطئية هو ضعف معارضية!
تحاياي
| |
|
|
|
|
|
|
|
|
|
Re: مكتب تسجيل الأجانب شمال عمارة الفيحاء الخرطوم ده فيهو حاجات عجيبة بتحصل ، ده شنو ده؟ (Re: Deng)
|
Quote:
أنت يا كوز يا إرهابي برضو عندك جواز أمريكي؟
كرهك الى أمريكا والغرب ده ليه ما خلاك تحتفظ بجوازك السوداني يا كوز؟ |
الغبي صبي الجيش السبهللي المعقد ويعاني من مركب نقص:
في الكلام ده كلو وين أنا قلت أني عندي جواز أمريكي؟
أنا عارف إنك جاهل وفاقد تربوي وما عندك أي مؤهلات أكديمية أو أخلاقية ، وقاعد في المنبر ده بإعتبارك من ذوي الإحتياجات الخاصة وكنوع من التعاطف والدعم النفسي لك ، بإعتبارك تستحق التعاطف ومعاملتك معاملة مختلفة وهو ما يبرر السكوت علي ترهاتك وســـــخـــفك في هذا المنبر ، فهمت يا غبي يا سبهللي يا معقد؟
إنت مش قلت ليك انك مجرد شخشيخة في يد بعض المسيطرين عليك ذهنيا ، يضقلو بيك ويخلوك تعمل الدايرنو وتقول الدايرنو وإنت منوم مغنطيسياً ، مش حدتثك يا ساذج؟
متي تفهم؟
| |
|
|
|
|
|
|
|
|
|
Re: مكتب تسجيل الأجانب شمال عمارة الفيحاء الخرطوم ده فيهو حاجات عجيبة بتحصل ، ده شنو ده؟ (Re: Deng)
|
Quote:
كلامي حرقك تمام يا م ن ح ط مش كده؟ وهو المطلوب تماما.
منافق زيك ده لازم نفضحوا ولازم نعريه تماما. قاعد في أمريكا وبتساند في الارهاب وتساند في ق ر ف و ع ف ن الكيزان.
الله يقرفك ويقر يومك يا عنصري . أوعك تفتكر ولو لي لحظة نحن نسينا الفيديو بتاعك الفضيحة داك. تغيب وتجي وقايل ح ننساك؟ |
المعقد نفسياً الغلام المعتوه:
بالعكس لما تجي بوستاتي ده يوم المني ، الواحد وين لما يلقي واحد جاهل عديم الحيلة والمؤهلات زيك عشان يضقل بيهو يوري الناس هنا إنت منو؟ وشخصيتك المريضة المهزورة دي ، يوريهم كيف غلامك زيك بتتم السيطرة عليهو ويخليهو يقول أي كلام عايزنك تقولو؟ ، وإنت بسذاجتك وسبهلليتك المعهودة تجي واقع علي نخرتك وتتفرتق زي صحن الصيني الواقع من سابع دور.
فهمت يا غبي؟
تعال ورينا وين أنا قلت عندي جواز أمريكي؟
لو ما جاوبت حأخلي اللي ما يشتري يتفرج يا معقد يا عنصري يا سافل يا منـــحـــــــط.
ههههههه.
رزقاً تكوسو ، ورزقاً يكوسك ، وقعتك سودا في البوست ده يا عنصري يا جلف ، إنت بديت قلة الأدب وحأخليك عبرة لمن يعتبر ، بس أوع تمشي تبكي وتقول عملو لي وسو لي زي الشفع.
| |
|
|
|
|
|
|
|
|
|
Re: مكتب تسجيل الأجانب شمال عمارة الفيحاء الخرطوم ده فيهو حاجات عجيبة بتحصل ، ده شنو ده؟ (Re: Deng)
|
شايف يا عزيزي القارئ كيف أنو المعقد نفسياً الأراجوز الغلام صبي الجيش الممسح بتتم قيادتو من أضانو ويقوم يردد الكلام اليتقال وبالحرف زيو زي أي ببغاء؟ مش قلت ليك يا عزيزي القارئ إنو هذا المعقد بيتم تنويمو معنطيسياً بمنتهي السهولة؟ مش قلت ليكم إنو المعقد ده سبهللي يفتقد لأي مؤهلا أخلاقي أو أكاديمي؟ شوف العبارة التحت ديا عزيزي القاري عشان يقع ليك كلامي كويس :
| Quote: كيف حضرت الى أمريكا وماذا تفعل فيه أيها الارهابي الوقـــــــــــــــــــح |
ههههههه ، أراجوز تحفة والله ، الله يخليهو لينا ونضقل ونضحك علي السذاجة.
الليلة موعودين بي سهرة ضاحكة وفنجرية علي شرف كيبر معقدي البورد ، فكونو معنا.
والله البوست ده جاب ليهو صيدة مسلية جداً ، كمان حرامي تموين وسكر؟
هيييييييييييييييييييييع.
| |
|
|
|
|
|
|
| |
Mohamed Abdelmotalib Hassan
منتصرمحمد زكى
معاذ حسن
وليد عبد اللطيف
بشير جبريل علي
عمار عبدالله عبدالرحمن
فايزودالقاضي
قلقو
Mohammed Awad
doma
ثروت سوار الدهب
خالد المحرب
الحاج حمد الحاج
كمال الشادي
Deng
فيس بوك
تويتر
انستقرام
يوتيوب
بنتيريست