|
|
 Re: واجعني في البحر السكات ... عاطف خيري هو شاعر جيلي (Re: معتصم ود الجمام)
|
1)
الجسد مُصلاية الروح ,
الروح المفوته كم وكِت
الوكت الموهط في النزوح
طالع أعالي الفوق تحت
تحتك ينقز في سطوح
رهن الأصابع ومتلفت
فالت إذا كنت الجنوح
وحدك منادي ومنفلت
(2)
كان القلب..مضيفه,
والألم,
كماعضَّ الطفل
ثدي امو
صار ج ب انه في البلد
البقت ما أمو
والفاتوني
في طرف البحر ينْحَمو
أو شالو الحجر وانْحَمو
لي قمريه من فَرْط الشجر صاحت
إلى قمري وأجاب
منْ ثمْ
هدر دمو
(3)
يا خيل..
يانبي.. يابراك
ياليس من مُرضِع بَلاك
لو شفتَ جوه النار جنين
فاطِنو من سقية هلاك
كان شفت جوه الجنه طين
بالِنو لى آدم سواك,
وكان تكفي جقمه من الحنين
وتقنع من الموج الهناك
وماكُنا في جوف الكمين
غنينا غُنوات الفِكاك
صنارة العدم السنين
صارقيلا وحشه وارتباك
(4)
يا غربه نحن مشينا وين
من طَلعتِك نخلة هواي
ومديت أصابعي على المَدين
فتحت ما شايف سواي
غمضنا.. الله ادانا عين
كورَكتي آدم..دم..دم في الغياب
إتصنَّتك كل الجراد الفيني
مسغبة الرتيلا..
الطحلب .. الشوك..اللُعاب
لسان الواطه يتعَرَفْ على طعم الخطايا
اللغه في زريبة ربها
تعجِن حنوط المعنى في قرع السكوت
أتَر البهايم في التراب
تَحلِب بصيرة الراعي من شوفتو اللبن
هسيس توب يرقه
قلعت خوفا في شط النوايا
إبليس حبيس العِلّه في كلمة سجود
والدود يجيك من شَدّه في لفظة تخمُر
تسمع حنين الشمس لي ضل البيوت
همهمة الجرِح لحظة تعود
من غُربة الجسد الخلايا
لَجَنَة لسان الضو إذا نطق الزوايا
ودُخلَة الكاف الصبي
على نون اليّرِن خلخالا في قلب النبي
وتسمع زغاريد العدم
(5)
تشوف الغيمه
في مقلة مراية السَهَلَة راخيه رموشا
تنَتْ في ام شديده القهوه
جاتا الدوشه
في طاقة منام هلواسا لاوذ ود قُزَح
طربان وشايلا الهوشه
خَطَفت توبا
قالت... أخ!
نِست باب حوشا .. فاتح
والمطور الليله كيف مَلبوشه
دسيهو منك فيهو
أو سميهو في الخيل الصحاب
البِخشو الحَضره دون مانوبه
من غير ما يدقوا الباب
البَدَسو الفكره في ضحكة بنات نَعَشْ
البِنادَن قمره, تغسل جمره,
في ريق السحاب
البحرسو الخمره, في النخل
البَصَحي التمره, نص الليل
إذا نقص الشراب
دِسيهو منك فيهو
أو همباتي
غارِز في أتّر شوفتِك
على رمل المناظر ناب
دسيهو منك فيهو
جملة أولياء النحت
سابقين الحواس بي ركعه
نهاضين وينقِفوا من حلوق الشوف
حصان في ضحكتك مربوط
مرق من ليلى ليلك جَنَ
من دُبُرْ اليقين مقدود
كل ما الموج راودك عن نفسو
تعطشي فيني؟!
تفتحي أطلس الخوف
كل ماالليل زاد نجمةفي كتف العسس
جرت العصافير المطار
دخل الشِعِر وَكَر المباشره
والبنات ..
طَفوا الرتاين و....وَلَعَنْ؟!
الخَمَروك فتحوك إنداية ومَشَنْ
الكلما صابحتهِن
سرقَن نهارك ومغربن
الفي صدور هرطقه
واشلاق حليب
بت الذين أحبهم
أنة صريف في كُرنُق الروح
المطر ما ببقى لي زول
المغارب لابسا أقصر من خيال المُفترِي
ونحن مديونين نسيم
تلقاها في أول شريعتا غافيه
فارده شرودا
في الموج الحَتَلْ في بالا ظنّهَاطافيه
غامْتَه حنانا
في إيدا وينقع عافيه
تشبه في الوقع من عشو,
خوفو إذا يطير,
لا يلقى قِبله
لا طفل في إيدو نبله
ولا غصن ذو شوك رحيم..
والبادي أجمل
(6)
حنيت لوجه الله
مسقط غربتي
وخارب طبع هذا المجاز
لدودي لي الغياب
مُشرع ضلمة بقَتي
حتفي..
حبيبي..
ومشتهى أسفي
محاذاتي..
وعلوقي إذا أهنقْ
وفطمتني !
شكرا حزينا
جل من يسهو, ويغمِض فيكا غاية يشبهَك
جالبني في وادي الضريسه
القلبِ فرناغه
وسألتك ذات مشيمه:
_ النهر أعوج من قفاي - أعفيني
من هادي البلاد الذهلله
أعفي الجبال منَ الصدى
والشارع التحتاني من خمج النسيم
أحلاك مكندك في أَمَسَ الإلفه
بالزول الغريب
أجمل من المركب تَطَلْوِح فِلقه
آه أجمل من الخطا
صاح.....شنو؟!
الدم دميره,
النار تَجَقلِب مالا؟!
ماطَعْم الرياح تِنجَم!!
صلي على الهجيج كالنيل
مسك خصر البلاد
ورقص الرقيص الما بيتسمى
طرد من بالو نقنقة البوابير,
لايوق الأغاني
يغازل في البيوت,
غمَر كل الكماين
وما جناهوالعاشق المخبول من قيف الحبيبه
وصاح:
قُعادنا هو مرقة النتن القديم
والجندب الوطني
إذا لابد من هذا الكنيف.
|
|
 
|
|
|
|
|
| العنوان |
الكاتب |
Date |
| واجعني في البحر السكات ... عاطف خيري هو شاعر جيلي | معتصم ود الجمام | 09-20-10, 03:11 PM |
| Re: واجعني في البحر السكات ... عاطف خيري هو شاعر جيلي | معتصم ود الجمام | 09-20-10, 03:19 PM |
| Re: واجعني في البحر السكات ... عاطف خيري هو شاعر جيلي | معتصم ود الجمام | 09-20-10, 03:37 PM |
| Re: واجعني في البحر السكات ... عاطف خيري هو شاعر جيلي | محمد حيدر المشرف | 09-20-10, 09:20 PM |
| Re: واجعني في البحر السكات ... عاطف خيري هو شاعر جيلي | معتصم ود الجمام | 09-20-10, 11:40 PM |
| Re: واجعني في البحر السكات ... عاطف خيري هو شاعر جيلي | عليش | 09-20-10, 11:58 PM |
| Re: واجعني في البحر السكات ... عاطف خيري هو شاعر جيلي | معتصم ود الجمام | 09-21-10, 00:10 AM |
| Re: واجعني في البحر السكات ... عاطف خيري هو شاعر جيلي | عبد اللطيف عبد الحفيظ حمد | 09-21-10, 02:37 PM |
| Re: واجعني في البحر السكات ... عاطف خيري هو شاعر جيلي | معتصم ود الجمام | 09-23-10, 03:42 AM |
| Re: واجعني في البحر السكات ... عاطف خيري هو شاعر جيلي | معاوية عبيد الصائم | 09-23-10, 04:08 AM |
| Re: واجعني في البحر السكات ... عاطف خيري هو شاعر جيلي | معتصم ود الجمام | 09-23-10, 04:20 AM |
|
| |
معتصم ود الجمام
فيس بوك
تويتر
انستقرام
يوتيوب
بنتيريست