|
Re: (مطبـخ رمضـان) بطولة:- مريم بت الحسين, ماما دوما, سناء خالد, سمارت, وجن, ... وأخريات :) (Re: سارة علي)
|
وصفة بيض وكركدي و بطيخ في يوم واحد؟ يادي الهنا يادي النور هههههههه
بركة جاه النبي ياساره,, تتعلي ماتتدلي, ويديك لمن يراضيك اللانام ولا أكل الطعام ,, ويفتحها عليك محل ما تقبلي,, قولي اَمين..
| |
|
|
|
|
|
|
Re: (مطبـخ رمضـان) بطولة:- مريم بت الحسين, ماما دوما, سناء خالد, سمارت, وجن, ... وأخريات :) (Re: Amany Elamin)
|
السندا يا أخوي كيفنك,,
Quote: البيتابع البوست لغاية رمضان حيلاقي وزنه زائد ب 3-4 كيلو عليه السُمان يبتعدون. |
تصدق بالعكس ؟!!! أنا واحده من الناس بعد ما أطبخ ما بقدر اَكل خالص,, وفي ناس كتار كده, مجرد ريحة عمل الأكل والوقفه في المطبخ بتقفل شهيتهم تماما !!
شكرا علي الاقتراحات :) حنتابعها :)
أخونا كمال حسن,, مساعي وصفة الرقاق بالفرن جميعها بايئه بالفشل :( صحبتي أمّها في العمره,, لكن ما زالت المحاولات جاريه,, داليا الكبّاشي ما منّها خبر ؟
| |
|
|
|
|
|
|
Re: (مطبـخ رمضـان) بطولة:- مريم بت الحسين, ماما دوما, سناء خالد, سمارت, وجن, ... وأخريات :) (Re: سارة علي)
|
الأخت ساره علي
Quote: المقادير:- عدد 3 بيض زيت رشة ملح رشة فلفل
الطريقة:- تختو الزيت في الطوة ..اكسر البيض في اناء خارجي واضربو لمن يتماسك لمن الزيت في الطوة يعمل طق طق ختو فيه الخلطة ولمن يمسك في الطوة اقلبوهو لمن لونو يبقى اصفر وهو متماسك فضوهو في صحن وادوهو رشة الفلفل.. نسيت الملح لكن مافي مشكلة ختوهو في اي مرحلة تعجبكم حتى ولو مع مرحلة الزيت وهو بيطقطق |
لوووولز
نحن غايتو منتظرين منك وصفه للبيض المسلوق لأربعة أشخاص
الأخت أماني الأمين ياخي الصبر اليبل الآبري ده كملناهو لغاية الآبري زاتو إتبل وإتشرب كمان ورمضان أهو ربعو مضى ولغاية هسه ما وريتونا وصفة (الرقاق) إنتو ما قعد تتسحرو والله شنو؟ نحن أصلنا بي نفطر وما بنتعشى عشان كده سحور خفيف زي شوية رقاق بي اللبن كده بتكون مناسبه
| |
|
|
|
|
|
|
Re: (مطبـخ رمضـان) بطولة:- مريم بت الحسين, ماما دوما, سناء خالد, سمارت, وجن, ... وأخريات :) (Re: Rawia)
|
ازيكم ياناس المطبخ,,
خليل تسلم علي رفع البوست,, أها أم خالد رجعت وللا لسه صايم عزّابي؟ وجربت الوصفات وللا لسه؟ :)
الحبيبه وجن,, حمد الله علي سلامة الباسوورد في سودانيز,, وبركه بالشوفه :) حنتايع مطبخ الشيف وجن في الفيس بوك, وانت مره مره جيبي لينا وصفه أو نصيحه هنا,, خلينا ومتابعين البوست يستفيدوا من خبرة الشيف المعلم :)
| |
|
|
|
|
|
|
Re: (مطبـخ رمضـان) بطولة:- مريم بت الحسين, ماما دوما, سناء خالد, سمارت, وجن, ... وأخريات :) (Re: Amany Elamin)
|
فوووق عشان خاطر رشا بكره عندها عزومه وعايزه تعمل بوفيه,, عايزين اقتراحات ووصفات بسيطه وسريعه,,
راويه تسلمي وفي انتظار باقي وصفات الرز منك,, قبل يومين قلت أجرب البرياني,, رز وخضار وفراخ,, طلع خطير ومناسب مع الصيام بالذات لما تقدميه ساخن,, ناس بيتنا حبوهو جددددا :) حأكتب الوصفه يمكن رشويه تحب تجربه,, :)
| |
|
|
|
|
|
|
Re: (مطبـخ رمضـان) بطولة:- مريم بت الحسين, ماما دوما, سناء خالد, سمارت, وجن, ... وأخريات :) (Re: Tabaldina)
|
تبلديهم,, 45% نسبه مقدره خالص,,
شوف وصفة البرياني دي يمكن يوم تكون ما عندك مزاج لسلاح المظلات :) :
المكونات صدور دجاج,, خضار: بطاطس+ كوسه + جزر للصوص: كاس زبادي+ 3بصل+ 2طماطم+ توم+ صلصة طماطم+ بهار حار كاسين أو تلاته رز حسب الكميه المطلوبه,,
يشوّح الخضار في الزيت تحمير خفيف ويزاح علي جنب,, يحمّر البصل في نفس الزيت وبعده يشوّح الثوم,,
في خلاط يتم تحضير الصوص من البصل المحمر والتوم المشوّح وعصير الطماطم وملعقتين صلصه, وكاس زبادي وملح وفلفل أسود وأي بهار حار ممكن,,
تشوّح قطع الفراخ في نفس الزيت لحين اكتسابها لون أصفر ذهبي,, يضاف الصوص لقطع الدجاج المقطعه في شكل مكعبات صغيره,, ونتركه في النار لبعض الوقت, (الأفضل انه الفراخ ما يشرب الصوص تماما يعني يكون Juicy عند اطفاء النار),,
يسّوي الرز تسويه متوسطه علي النار,,
في قدر كبير علي البوتوجاز نضع طبقه رز ثم طبقه خضار محمر ثم نضع الفراخ بالصوص في النص ثم طبقه خضار أعلي منه ورز من أعلي وعلي وشه ممكن نضيف زبيب,, برضو نضيف زعفران وكركم للرز لاكتسابه اللون الأصفر الجميل,, نضيف ماء للاناء بارتفاع سنتمتر واحد من سطح الرز, ونتركه في نار هاديه ولازم يغرف من الاناء بطريقه عموديه عشان الطبق يحوي كل الطبقات والمكونات ,
يقدم حار وهو أصلا طعمه سبايسي بيطلع خطييير,,
ممكن للأطفال نضيف ليهم في أطباقهم كاتشب لأنهم بيحبوهو خالص,,
وممكن لو ما طلع سبايسي خالص نضيف للراغبين شطه من الجاهزه دي:
علي فكره في طريقه تانيه وهي انك تسلق الفراخ أوّل وتسوي الرز في شوربة الفراخ,,
وده شكل الطبق: (الصوره ما حقتّي, بتاعي ما صوّرته)
| |
|
|
|
|
|
|
Re: (مطبـخ رمضـان) بطولة:- مريم بت الحسين, ماما دوما, سناء خالد, سمارت, وجن, ... وأخريات :) (Re: Tabaldina)
|
.. .
Quote: سناء خالد,, شكرا علي العصيده بالصور,, تبلدينا اختفي في ظروف غامضه وما جاء ورانا ظبطت معاهو وللا لسه :) في انتظار الملاح بالصور ياحبيبه :)
|
ابدا يا امانى تصدقى وصفات سناء خالد دى اكتر حاجة بطبق فيها .. وكانت الانجح نسبة للصور .. خصوصا مع الخمار البقى فى التلاجه دا وطبعا لا ننسى كبدة دانية المكى :) شكرا سناء على الوصفة بالصور شكرا ..دانيه شكرا امانى اسمارت بت الحسين ..راويه .. هويدا .. وجن ..رشا .. ما اكون نسيت واحدة من الطباخات ديل ..
اها بصراحة فجاة لقيت اخوانى الاولاد كلهم معاى فى البيت كدا بس جاهم مزاج يأجزوا و يتلموا فى الشهر الصعب دا .. قلت يا ربي اليتامى ديل نعمل ليهم شنو حسي ؟؟ بقيت اطبع فى الوصفات واخليهم يجهزوا المقادير واجى انا اعمل فيها الشيف تبلدى .. والواحد يستعين بكم تلفون داخلى .. للمراجعة .. والله العظيم رمضان دا من غير امراة ( أم / اخت او زوجه ) والله مشكلة .. ما عندكم لينا حل فى العيد
-----------
انتو سارة هلى دى بتفطر فى المكتب ولاشنو ؟؟ وصفاتها كلها جك كركدى وبيض بالطوة ..
هاك دى : رطل من ثمار التبلدى .. تسمى القونقليز جردل نظيف به 2 لتر ماء تنقع الثمار فى الجردل من الصباح حوالى 4 ساعات قبل الافطار بساعتين .. يضرب الخليط بكمشة / مفراكة / معلقة ..مسواط وط ايفر ويصفى فى جك اخر .. ويضاف السكر .. واحيانا يصب الخليط فى الخلاط .. ويخلط لمده 5 ثوانى مع وضع 3 نقاط من روح الفواكة موز / فراولة .. يوضع المشروب فى الثلاجة ويقدم باردا .. مع الافطار مع وضع مكعبات ثلج ملون .. فى الكباية
للاكل : توضع 4 بيضات فى الغلاية ويضاف اليها قليل من الملح ( عشان ما تشقق فى الماء ) بعد 15 - 20 .. تطفئ البوتجاز وتقشرى البيض .. وتجيبى ( قصاصة ) البيض وتختى البيضه وتضغطى عليها وتنزل حلقات .. تشتتى عليها شوية شمار وملح وزيتون اسود واحيانا بعض الجبن ..
دليشز بالجد ... الوصفات دى خاصة بساره على لانها فطورها القطر قام وكدا ما بتاعت عصيدة وبسبوسة .. زى وكدا ..
| |
|
|
|
|
|
|
Re: (مطبـخ رمضـان) بطولة:- مريم بت الحسين, ماما دوما, سناء خالد, سمارت, وجن, ... وأخريات :) (Re: فادية اليمني)
|
يامنوش و كل الحبيبات، والاولاد العزابة وخاصة (تبلديهم اليتيم)
انا بكتب ليكم بكمية بسيطة وانتوا بعدها زيدوا على حسب عدد الضيوف.
منوش واحاتك انا جنى وجن المقادير دى بعرف بالسنس (يعنى اسه انا اتقطعت) بعد الشهر ده لو ما اتعلمتى (السينس) تبقى مشكلة كبيرة لوووول
اها اديكم وصفة الدجاج المشرب
المقادير:
- فرخة - بصلة متوسطة - خضروات بمقدار قطعتين متوسطات(بطاطس، جزر، فلفل اخضر،شطة خضراء، كرافس)
- بهارات (ملح،كسبرة، توم، قرفة، فلفل) رشة من كلا يا منوش اوووع يديك ما تزوغ - 2 ملقعة كبيرة صلصلة (طماطم مخلوطة ان وجدت) - زيت
الطريقة: - تقطع الفرخة لقطع صغيرة و تسلق مع الكرافس وملح وقرفة. - تقطع البصل لحلقات والخضروات بطريقة دائرية وتحمر. - تضيفى الصلصة للزيت وتحل بقليل من الموية او شوربة الفرخة وتتبل بالبهارات و تخليها لم تتماسك (صوص). - تشلوح قطع الفرخة بسيط او تقلب فى الزيت. - تضاف كل الخضروات المحمرة + الفرخة وتوضع فى النار لم تتسبك.
تزين ببقدونس مفروم وتقدم ساخنة
حاتعجبكم ان شاء الله بالهناء
شيف فدو
(الصورة نزلت كبيرة عشان كده سحبتها)
| |
|
|
|
|
|
|
Re: (مطبـخ رمضـان) بطولة:- مريم بت الحسين, ماما دوما, سناء خالد, سمارت, وجن, ... وأخريات :) (Re: SHIBKA)
|
.. .
Quote: : الله يعينك بتتعبي في المطبخ شكلك
|
قرقر قرقر قرقر .. يا جماعة ساره دى المطبخ دا ما شايلاهوا .. بتاكل تيك اوى ولا دليفرى .. ما فاضية لشغلتكم دى ..
Quote: لما قلنا جيبوا خمار من اي جارة ولي اخت ولي نسيبة قلتو امرقوا من البلد |
نعمل شنو يا شبكبك .. المعاناة تولد ( التوار ) .. شبكتهم ليك الخمار ..الخمار .. قالو ما تكون قصدكـ التوار .. الشئ دا عندو كم اسم ؟؟ وبكم لهجة ؟؟
----------------
غايتو المطبخ بقى لمه ونسه .. حاسبوا نا تحرقوا الشيش كباب
| |
|
|
|
|
|
|
Re: (مطبـخ رمضـان) بطولة:- مريم بت الحسين, ماما دوما, سناء خالد, سمارت, وجن, ... وأخريات :) (Re: Sana Khalid)
|
سلام يا رشا.. أنا بحب البوفيهات.. و يا ريت لو قريت كلامك دا من بدري يمكن كان ساهمت معاك بشوية أفكار.. لكن المرات الجاية إن شاء الله..و أكيد انت براك ما قصرتي.. و على رأي راوية يمكن في الوقت الضيق الواحد أحسن ما يشتت أفكارو.. نحن برضو في انتظار تشركينا بأفكارك تنفعنا في عزومات المستقبل إن شاء الله
___________
تبلدينا لا شكر على واجب و أنا مبسوطة انها نجحت معاك.. دي أسهل من مهمة تفتيش العروس:))..
_____________
أها يا جماعة الخير.. كل ما ربنا يهون حنساهم معاكم.. انتو ما تحرمونا.. و علييييكم الله خبايز العيد.. أنا تلميذة بليدة في الخبايز :(( لأننا هنا لا بيجونا ناس يباركو العيد و لا غيرو.. فما بنخبز أصلاً.. لكن مرات مزاج بقوم أجرب عشان أحسس الأولاد انو في شيء جديد.. و وصفات الكعك و اللانكشير و البتيفور العندي كلها موضة قديمة.. بس عندي فرمالة بجيكم بيها إن شاء الله
بعيد عن الخبايز مشاركة اليوم واحدة من الريسيبيز المفضلة عندي.. لأنها سريعة في عملها و نتيجتها مرضية للضيوف و لناس البيت..
فطيرة التفاح أو Apple Crumble
لوازم العجينة: 2 كوب (300 جم) طحين.. 3/4 كوب (175 جم) سكر بني 1 كوب (200جم) زبدة قطعيها مكعبات و خليها في درجة حرارة الغرفة.. (لما أكون مستعجلة بطلعها من التلاجة و بشتغل مباشرة و ما بحس بفرق!!) ذرة ملح رشة قرفة
لوازم الحشو: 2 تفاحة حمراء كبيرة.. حوالي 450 جم مقشرة و مقطعة مكعبات صغيرة 3 م ك (50 جم) سكر بني 1م ك طحين رشة قرفة
شوية زبدة لمسح طبق الفرن.. حتقدميها في نفس الطبق عشان كدا زي صواني البايركس أو الفخار (الصيني) بتكون مناسبة.. تقريبا مقاس 24 سم الطريقة: سخني الفرن على درجة حرارة 180 درجة في وعاء كبير أخلطي السكر و الطحين و ذرة الملح و القرفة خذي قليل من الزبدة المقطعة و اخلطيها برؤوس أصابعك في الطحين.. و كرري العملية بالتدريج مع كل مقدار الزبدة.. حتى يتكون عندك عجين في شكل كريات صغيرة .. أو فيما يشبه فتافيت الخبز إذا اتلبكت العجينة و أصبحت متماسكة مش مفتتة.. أربطيها في كيس نايلون و ختيها في الفريزر حوالي عشرة دقايق.. بعدين طلعيها و أبشريها بمبشرة الجزر (أو مبشرة الجبنة؟)!
في وعاء آخر أخلطي مكعبات التفاح مع السكر و الطحين و القرفة و ضعيه في صينية الفرن الممسوحة بالزبدة مسبقاً
أنثري فتافيت العجينة فوق التفاح (أو أبشريها فوقه مباشرة لو كنت جمدتيها) و دخليها الفرن و أخبزيها لمدة 40 إلى 45 دقيقة.. لحدي ما يحمر سطحها..
قدميها دافئة أو باردة..
| |
|
|
|
|
|
|
Re: (مطبـخ رمضـان) بطولة:- مريم بت الحسين, ماما دوما, سناء خالد, سمارت, وجن, ... وأخريات :) (Re: Sana Khalid)
|
عشان حركاتكم دي الفطور اجلناهو ليوم الخميس.
دانية وين الوصفات؟
ويا سناء عجبتني فطيرة التفاح دي حاجربها
بعدين ولو ظبطت نعملها يوم الخميس..
لغاية هسه الmenu بتاعي بيتكون من الآتي:
سمبوسة
فطاير بشكلين مختلفات
محشي ورق عنب(جاهز من السوق عشان مايجيني زول يقول لي وصفي)
سلطة خيار وجزر بالزبادي والمايونيز
سلطة تانية(مفروض تلقو لي وصفتها)
ملاح روب بالعصيدة(عصيدات صغار وكتار في قوالب القصدير)
ارجل دجاج محمرة(لانها ساهلة في الشيل وممكن تتزين بطريقة لزيزة)
صينية بالباشميل(لسه محتارة اعملها مكرونة ولا خضار)
سمك بصلصة الاناناس(دا سمك فيلية بيتحمر ويتغطس في صلصة حارة مع
الجنزبيل والجزر والفلفل الاخضر وحلقات الاناناس) خرااااااااافي
باقي الشوربة برضو ما عارفة ارسي علي شنو؟
اها اللستة دي قابلة لتعديلاتكم واضافة التحليات المناسبة
العصاير عادية..حلومر وبرتقال وتبلدينا ههههههههههه
| |
|
|
|
|
|
|
Re: (مطبـخ رمضـان) بطولة:- مريم بت الحسين, ماما دوما, سناء خالد, سمارت, وجن, ... وأخريات :) (Re: رشا سالم)
|
ازيكم يا سيداتي... وفيك الخير يا سناء السألتي منّي وفقدتيني... ههههههههه.... انا خفست امريكا، في اسرع سفرية في التاريخ... مشيت مؤتمر وجيت راجعة... ومشتاقة ليكم شدييييييييييييييييييييد
رشوية... انا حأستفيد جزئياً من قائمتك، لانه عندي فطور الاسبوع الجاي... وحيكون فطور ضخم، لعدد كبير، عشان كده ما كل وصفاتك حتنفع معاي...
Quote: سمك بصلصة الاناناس(دا سمك فيلية بيتحمر ويتغطس في صلصة حارة مع
الجنزبيل والجزر والفلفل الاخضر وحلقات الاناناس) خرااااااااافي |
دي جذبت انتباهي عشان اعملها خلال اليومين الجايات ديل، الحقينا بالوصفة، ولو كتبتيها بدري بكره، حأعملها.. عندي سمك... منتظراك
حأشوفكم عملتو شنو بي وراي، عشان انا جيت راسي شاطب من االافكار بتاعت الفطور زاتو
| |
|
|
|
|
|
|
Re: (مطبـخ رمضـان) بطولة:- مريم بت الحسين, ماما دوما, سناء خالد, سمارت, وجن, ... وأخريات :) (Re: مريم بنت الحسين)
|
مريم حمدلله على السلامة.. دي غيبة محمودة.. و انجاز حلو .. موفقة دايماً يا رب..
أها يا ناس العزومات..مريم و رشا.. دي برضو واحدة من الثوابت بقت عندي في العزايم لأنها ما بتاخد وقت و في نفس الوقت بتعجب الناس و بتنفع للبوفيه أو للسفرة المعتادة.. أموني الوصفة دي إهداء خاص ليك.. برضو لأنو عارفاك بتحبي المشاوي..
شية السيخ بالفرن: (طبق سوداني) دي أصلاً وصفتنا لشية الجمر أو الباربيكيو المعتاد.. مرة من ذات المرارير يا قول عزاز.. بعد ما جهزتها عشان أعملها بالجمر وصل الضيوف قبل الموعد بأكثر من ساعة .. و اتزنقنا في الوقت فدخلتها الفرن.. و من يومها ثبّتها في منيو العزومات و ما ولعت ليها جمر تاني.. و ما أظني أولعو إلا إذا كنا في رحلة أو العزومة أصلاً باربيكيو ما غيرو! تحتاج اللحمة نقع في الخلطة لمدة ليلة كاملة حتى تطرى اللحمة و تطعم.. أو على الأقل انقعيها في التتبيلة أو الخلطة لعدة ساعات.. بس كلما قعدت أطول كلما بقت أحسن و بتريحك لما تجهزيها من بدري في العزومات
2 كيلو لحمة بصلة 2 كوب زبادي أو (400 جم زبادي) 1 م ك ملح (عشان المقاس يكون مظبوط المقاس دا بالملعقة الاستاندرد Tbspأو Table spoon ..و في الحقيقة أنا بوزنها بالجرام.. لكل كيلو من اللحمة 8 جم ملح) ا م ك كزبرة 1 م ك شمار ناشف 1/2 م ص فلفل 3 أو 4 فصوص ثوم
الطريقة: قطعي اللحمة مكعبات بحجم يصلح لسيخ الشواء ضعي مكونات التتبيلة في الخلاط و اخلطيها جيداً ثم صبي الخلطة في اللحمة.. ضعيها في وعاء ذو غطاء محكم (عشان ريحة البصل) و ضعيها في الثلاجة ليلة كاملة على الأقل.. (لما تكون لحمتك طازجة و ما مجمدة قبل كدة ممكن تعملي الخلطة دي و تحتفظي باللحمة في الفريزر لشهر أو اتنين!)
أغرزيها في سيخ قصير..(النوع المعدني تماماً ما فيه أطراف خشب) حوالي خمسة أو ستة قطع (نصيب الواحد) للسيخة
أدخليها الفرن على درجة حرارة عالية ( في فرني بعملها ب230 درجة) لمدة 15 دقيقة طلعيها من الفرن و قلبيها بسرعة و رجعيها الفرن مرة أخرى لمدة خمسة دقائق
قدميها مع الرز أو السلطة و شطة الدكوة طبعاَ :))
نفس الطريقة تصلح للدجاج.. أحذفي البصل من الخلطة و تبليهو ببهارات مختلفة زي الكاري.. و الملح للدجاج أقل بمقدار 7 جم للكيلو.. يعني نقصيهو ذرة عن اللحمة و ممكن تستبدلي الزبادي بكباية واحدة مايونيز أو نص كدا و نص كدا
| |
|
|
|
|
|
|
Re: (مطبـخ رمضـان) بطولة:- مريم بت الحسين, ماما دوما, سناء خالد, سمارت, وجن, ... وأخريات :) (Re: Sana Khalid)
|
ازيكم ياحبايب :) الشيف سن سن (سناء عبد السيد) وينك غايبه؟, ساره علي مارجعت بوصفة سلطة الدكوه ولا البيض المسلوق لغاية هسي !!! :( المهم بنعذرها لأنه واضح انها هلكانه في المطبخ باعيني وما لاقيه وقت خالص
شيف فدو ,, تسلمي علي وصفة الفراخ وعلي تحلية الفواكه,, عظمه علي عظمه يا ست بس بطّلي تكاويني بموضوع السنس ده وصفي لي زي سناء خالد كده, كم غرام ملح, وكم مل زبادي .. وهكذا
نداء الي دانيه المكي, رشا في انتظارك, العزومه اتأجلّت للخميس, هل تسمعني؟ حوّل
تبلدينا,, ماقصرت بخصوص وصفة الكركدي والبيض المسلوق,, هسي ساره تجي توصف لينا شنو تاني ياربي؟
سنويه حبيبة قلبي,, شكر خالص علي وصفة الشيه بالسيخ بالفرن, حأجربها في أقرب فرصه انشاء الله, وأوريك الصوره :) ومبسوطه لأنك كتبتي لي درجة حرارة الفرن والزمن, عارفه لما يكون عندي حاجه في الفرن ما بعرف أقدر الحراره ولا الزمن, وعادة بقعد أفتح الفرن كل خمسه دقايق
علي فكره عايزاكي لو سمحتي توصفي لي الرز الخطير ده بتظبطيهو كيف؟ أنا مع اني بعمل بطريقة مقدار رز ومقدارين مويه, لكن برضو ما بيطلع مفلفل ورزايه رزايه زي بتاعك الخطير ده, يعني ما بيطلع معجن خالص لكن ماسك في بعضه شويه وما مفلفل عندك حل؟
ووين راويه وباقي وصفات الرز, أنا أصلا الرز ده مجنني وطاير لي في راسي لووووووووول
مريومه حمد الله السلامه ونورتي البوست برجعتك,, حد يروح أرميكا يومين؟ كان تزوّغي شويه من مطبخ رمضان لووووووول (نادر ما يسمعنا) ههههه
| |
|
|
|
|
|
|
Re: (مطبـخ رمضـان) بطولة:- مريم بت الحسين, ماما دوما, سناء خالد, سمارت, وجن, ... وأخريات :) (Re: Amany Elamin)
|
Quote: غايتو الواحد بدل ما يجى يشوف ناس الشارع عملو شنو فيما يتعلق بحملة ( المكشاشة ) حيضرب على الغداء .. ويعسكر للعشاء .. |
لووووووووووول@تبلدينا,,
تبلدينا ياخ دي سناء خالد والأجر علي الله,, علي فكره بتعمل كباب خراااافي,, حنّسها توصفه لينا :)
--- سنويه صحي عندي سؤال فيما يتعلق باللحمه, في ناس بيضيفو ليها باكنغ باودر عشان يهششها, رايك شنو في الحركه دي؟
| |
|
|
|
|
|
|
Re: (مطبـخ رمضـان) بطولة:- مريم بت الحسين, ماما دوما, سناء خالد, سمارت, وجن, ... وأخريات :) (Re: Amany Elamin)
|
Quote: غايتو الواحد بدل ما يجى يشوف ناس الشارع عملو شنو فيما يتعلق بحملة ( المكشاشة ) حيضرب على الغداء .. ويعسكر للعشاء .. |
هوووووي يا تبلدينا.. تشوف شنو؟ انت تعهدت بشيل المقشاشة معانا إيد بإيد..خلي داير تبقى الناظر.. ما فينا نط!
بعدين بعد ننتهي من الكنس و النضافة.. نقعد نشوي.. و أنا أتعهد بتظبيط الشية زي الصورة و أحسن كمان
ثم انت المرة الفاتت تسألني لو قادة مطبخ..و هسة تجي تقول لي صور مجلات (هرشك) الصور (المختومة) حقتي (قول ما شاء الله).. بعدين دا الشغل الساهل.. الله يرحمها حبوبتي وكت كانت تتحسر على صحتها و تقول: ياااا حليلي أنا وكت ما برقد أتكرفس .. وكت ما بمرق أتخفس.. ياااا حليلي أنا وكت ماني خميلة .. وكت بعوس الكيلة..
أها أنا هسة بقول: ياااا حليلي أنا وكت فيني يدين بيلفّن.. و يقطّعن و يرصّن..وكت بشدّ القدور.. وكت بعزم الفصول..
أختك بقت حبوبة بدري بدري.. إييييييييه.. يا الله حسن الختام
| |
|
|
|
|
|
|
Re: (مطبـخ رمضـان) بطولة:- مريم بت الحسين, ماما دوما, سناء خالد, سمارت, وجن, ... وأخريات :) (Re: SHIBKA)
|
سلام يا جماعة.. مشاركة من خارج الحدود من شقيقتي سحر..
Quote: أمااااااني الأميــــــــــــــــن ... و ناسها الحلوين ..
رمضان كريــــــم و كل سنة و انتو كلكم طيبين و تصوموا و تفطروا على خير يا رب
متابعة البوست دة من اول يوم يا أماني و ما شاء الله عامر بالأفكار و الحاجات اللذيذة البتساعد الواحد كتير في شغل المطبخ
يديكم العافية كلكم ماشاء الله خطيرات ، كل وحدة فيكم بلمساتها الخاصة ..
* الأخت العزيزة مريم بنت الحسين .. عملت كم حاجة من تطبيقاتك و طلعو مية مية .. تسلم ايديك يا رب..
و بالمناسبة انا كمان عندي عزومة افطار الاسبوع الجاي ان شاء الله و لعدد كبير .. ممكن اشوف المنيو بتاعك الاول وبعدين أقرر؟؟
وسجلت كم حاجة من لستة الدكتورة رشا سالم و منتظرة أشوف وصفة السمك ب الاناناس .. و طريقة التقديم ..
* و يا سناء .. يمكن أماني تقصد اضافة الكورن فلور للحمة مش البكنغ باودر.. فعلا اضافة القليل منها للدجاج او اللحمة بخليها هشة ..الحاجة دي اتعلمتها من الآييي بتاعتي..
أماني .. لو سناء بقى عندها روح لي .. حأتلحكم بالايميل ..اعمل شنو فقيرة انا ما عندي باسوورد
اتحملوني.. اووكيي.. في أمان الله ))
سحر خالد
|
الآييي دي أنا قريتها الآيبي في الأول .. وقلت محمد معانا شهاب ما يغشانا (الترجمة : آييي - شغالة) ما عندك مشكلة يا سحور.. أأجر ليك الباسوورد.. رخيييييص.. توب حرير كل تلاتة مداخلات.. و لو فيها صور يمكن الموضوع يقلب ستاير
أها معلومة الكورن فلور دي ذاتها جديدة علي.. انت شكلك بقيتي تذاكري من وراي :)
أمون .. المعلومة الصينية دي كيف؟ و لا مفروض أسأل ماما دومة؟
________
رشا كيف كانت العزومة؟ أنا برضو مستنية وصفة السمك بالأناناس.. الأكلات ال sweet and sour مفضلات عندي منتظرينك
_______
شبكة ..جربي الشية بإذن الله حتعجبك.. نسيت أقول ليكم ختو الأسياخ فوق الجزء الشبك أو السلك من صينية الفرن.. و خلي الصينية تحته مباشرة عشان تتلقى الدهن و السوائل النازلة من اللحمة
| |
|
|
|
|
|
|
Re: (مطبـخ رمضـان) بطولة:- مريم بت الحسين, ماما دوما, سناء خالد, سمارت, وجن, ... وأخريات :) (Re: Sana Khalid)
|
أمون.. بخصوص الرز.. الرز الياباني ما بيتفلفل.. نوعه sticky و دا البخليهو بيتشال بالهاشي.. أو الchop sticks و يتشكل في شكل كرات عشان السوشي و كعكة الرز.. يعني أنا لي اتناشر سنة ما فلفلت رز.. بنجضو بحلة الرز الكهربائية
و دي مقاسها للرز و الموية بالكباية مظبوط.. عشان كدا صعب يبوظ ليك رز.. و مستحيل يحرق!! بعملو رز أبيض عادي.. و بعدين بخلطو بالخلطة دي..
بصلة جزرة بطاطس حسب الحجم لو كبيرة قطعة واحدة كفاية توم
قطعيهم ناعم .. و ختيهم في طوة في شوية زيت و خليهم يحمرو شوية.. بالذات لبصل و البطاطس.. بعدين أضيفي ليهم شوية موية و مكعبين مرقة و زبيب و البهارات.. أي بهارات بتحبيها.. في الصورة الفوق واضح اني استعملت بهارات كاري.. لكن سحنت ليها زيادة حبهان و عودين قرنفل و قرفة و حبة كاملة ليمون أسود (لومي) الخليجيين بينجضو الليمونة السوداء بطولها مع الرز.. لكن أنا بحب نكهتها و طعم الحموضة بتاعتها و بكون عايزاه يظهر كويس في الرز.. فبسحنها ناعم جدا.. مع البهار.. و بضحي باللون لأنها طبعاً بتغمقو.. بس لذيذة
بعد ما تبلت الخلطة دي و دوبت المرقة كويس بطعمها بملح زيادة حبتين عشان يطعم الرز كويس و بخلطها معاه و برجعه النار شوية عشان يتشرب الخلطة..
معليش لأني ما عندي مقادير ثابتة للوصفة دي.. لأني ما بلتزم ليها بمقدار.. بس زي ما قلت ليك أعملي الرز الأبيض براه بعدين أضيفي ليهو خلطتك.. نكهة البصلة التوم و البطاطس المحمرين.. مع أي بهارات انت تختاريها.. و ظبطة الملح.. بتطلع ليك رز لذيذ.. أتمنى زول تاني يفيدنا في فلفلة الرز
| |
|
|
|
|
|
|
Re: (مطبـخ رمضـان) بطولة:- مريم بت الحسين, ماما دوما, سناء خالد, سمارت, وجن, ... وأخريات :) (Re: Sana Khalid)
|
ازيكم يا شباب (و معاكم حبوبة سناء)? كتابة الوصفات صعبة عديل كده. انا اسهل لى انظر بس.
Quote: سنويه صحي عندي سؤال فيما يتعلق باللحمه, في ناس بيضيفو ليها باكنغ باودر عشان يهششها, رايك شنو في الحركه دي؟ |
مونى...ما سمعت بموضوع الباكنغ باودر للحمة. لكن المعروف (شدى حيلك للتنظير) .....عشان تهششي لحمة ختى فيها اى حوامض(طبعا ما خامض الهيدروليك المخفف) (ناس علوم ...بتكونوا فاهمين الكلام ده كويس) . لو عصرتى فيها ليمون بيهشش اللحمة. و الزبادى بيعمل نفس المفعول. و اللحمة اللى فيها شحم دائما اطرى (و اغلى) من اللحمة الصافية.
| |
|
|
|
|
|
|
Re: (مطبـخ رمضـان) بطولة:- مريم بت الحسين, ماما دوما, سناء خالد, سمارت, وجن, ... وأخريات :) (Re: smart_ana2001)
|
انتو يا جماعة! ده مطبخ رمضان ولا ركن بتاع اورينتال فود في كارفور...ده شنو الاستلاب الغذائي الحاصل ده دي شنو اللغاويس البتركبوها في النار علي قول جد عمران اصلو انتو الله ما فتحها علي وحدة تقوم تشتغل ليها قراصة تركين أو (ملوحة)... انزل ليكم مانوال؟؟ بالدكوة في وبالصلصلة في وساده في وشكل بيتزا وفطائر ذاتو في
انزل؟؟
رز شنو البياكلوه في الافطار...نحن كنا صايمين اصلو ولا معزومين في وادي الدواسر
_ رمضان كريم للجميع ..اصلو الأذان لو أذن وفي بلح وموية الباقي كله هين
| |
|
|
|
|
|
|
Re: (مطبـخ رمضـان) بطولة:- مريم بت الحسين, ماما دوما, سناء خالد, سمارت, وجن, ... وأخريات :) (Re: GamarBoBa)
|
دى وصفة حلو جميلة جدا. كيكة بكريم كرمل. فى ناس بيسموها "بقدرة قادر" و السبب ان الكرمل بيكون فوق الكيكة و بينجضوا مع بعض. المقادير: لكريم للكرمل: * علبة لبن مركز...طاعم. * اتنين و نص كوب ماء مغلى *٥ بيضات *٢ ملعقة صغيرة فانيلا للكيكه* كباية دقيق * ٣ بيضات * نصف كباية زيده * ملعقة صغيرة بيكن باودر * ربع ملعة بيكن صودا الطريقة *اعملى كرمل صوص بحوال تلاته ارباع كوب سكر فى قالب كيك. *لخبطى كل مكونات الكريم...لخبطيهم سمح...كبيهم براحة فى قالب الكيك فوق الكرمل. *لخبطى كل مكونات الكيكة و اضربيها بمضرب لمدة ٤ دقايق. كبى عجينة الكيكه براااحة فى الكرم (فى النص تماما) * ختى قالب الكيك فى الفرن فى حمام ماء (يعنى ختى القالب فى حلة اكبر منه فيها موية و دخليهم الفرن) خليهم فى الفرن حوالى ٤٥ دقيقة ل ٥٠ دقيقة فى درجة حرارة ١٢٠ درجة * طلعيها من الفرن ...خليها تبرد...دخليها التلاجة ساعتين تلاته. * اقبيها و قدميها * شكلها عجيب و طعمها خرافى ـــــــــــــــ___ حقيقى ما عملتها قريب. لكن ح احاول افتش صورة من النت.
| |
|
|
|
|
|
|
Re: (مطبـخ رمضـان) بطولة:- مريم بت الحسين, ماما دوما, سناء خالد, سمارت, وجن, ... وأخريات :) (Re: Dania Elmaki)
|
سحر خالد شخصياً... ما تتصوري مشتاقين قدر شنو، والزول زي البعرفك من زمااااااااان... والله انا سعيدة جداً انك متابعانا والله البوست ده بوفّر على الواحد اكعب حاجه، وهو التفكير في انه يعمل شنو... الليلة عملته my version من الشية بتاعت اماني، بعملها بي صدور الدجاج... لزيزه شديد وصحية خالص... تقريبا نفس التتبيله البتعملها اماني... بس بعمل صدور.. وبستخدم السيخ الخشب عشان اقدّمهم بيه... بكون شكلها جذّاب وظريف خالص... الصور دي ما بتاعين الليلة، لكن نفس الطريقة مافي فرق
ده شكلها قبل ما تستوي
وده شكلها بعد ما استوت
برضه عملته سلطة حلوه وبحبها جداً، وهي سلطة السبانخ... لزيزه جداً... وده شكلها بالخطوات اول شي تعمل خبز محمّص في الفرت مع زيت زيتون... يكون بقرمش.. ونكبه في الصحن التقديم
بعداك في الطوه، نقلبه بصله مقطعه وتوم مع السبانخ وليمون وملح وفلفل (انا بستخدم السبانخ المثلج، بس بعصره من المويه الفيه)، ونكبه فوق الخبز
بعداك نعمل صوص بي زبادي وليمون وتوم وملح وفلفل... روووووووح الصوص دي الليمون، ونكبها فوق السبانخ والخبز، الخطوة دي قبل التقديم عشان الخبز ما يبقى لين بالزبادي .. ونكب فيها شوية زيت زيتون....
في من نفس السلطة دي نسخة بي الرجلة... بس الرجلة تكون نيّة من غير ما تتنجض.... روعه، صحية، ومصدر مباشر للحديد..
بالنسبة للعزومة بتاعتي يا سحر، انا ما عارفه حتكون زي حقتي ولا لأ... لانه انا بعملها للجمعية بتاعت المحس (نسابتي) ههههههههه نادر محسي طبعا، وعاملين ليهم جمعية.. يوم يكون الفطور علي، بعمل ليهم الاكل بكميات وبوديه، وطبعا عزّابة بس، مافي سيدات... على اي حال.. so far، الاكل حيكون كالتالي
فول مظبوط (بحب اعمله فول وابشر فيه جبنه... وبقطّع معاه بصله وطماطم وجرجير صغاااااار وزيت سمسم) ما بحب اعمل ليه برامج كتيره... شوربة (محتاره، السنة الفاتت عملته ليهم mushroom creamy soup وعجبتهم شديد، ما عايزه اكررها.. لكن ما عارفه البديل) سلطة روب (زبادي خيار وجزر) دمعة دجاج (هم بحبوا القراصة وبرموها براهم) كبدة او لحمة مقلّبة
الحلو، أم علي
عايزه اعمل بيض، ما عارفه بيض اسكتلندي ولا اعمل ليهم سلطة بيض (برضه عملتها السنة الفاتت ولاقت استحسان كبير)...
ورينا قائمتك يا سحر عشان نستفيد من افكارك.... معليش يا سناء، الله يعينك على العتاله هههههههههههههه ليك اجر المناولة...
الوصفة رهيبة يا سمارت.. عجبتي شديد... بس انا بقت عندي عقدة من الكيك... for some reason بقيت يا حرقتها يا طلعت ما نجيضه!!! يدي فكّت من الكيك، يا حليلي... زمان كيكتي بالاحساس ساي بتظبك... :(.... غايته عجبني فيها برضه انه الدقيق بتاعها شويه، وما محتاجه دلع .. جني وجن الكيكة البدلّعوها....غايته بغمّض وبعملها
| |
|
|
|
|
|
|
Re: (مطبـخ رمضـان) بطولة:- مريم بت الحسين, ماما دوما, سناء خالد, سمارت, وجن, ... وأخريات :) (Re: مريم بنت الحسين)
|
سحوووووره,, ازيك ومشتاقين والله, وحلوه جدا طلتك في البوست ومتابعتك :) كيف حمودي ومازن؟ وعامله شنو مع رمضان والعيال :) موضوع الباكنغ باودر, أنا متأكده انه باكنغ باودر والله, ماعارفه موضوع الكورن فلور ده, لكن شكلها نظريه صينيه مشابهه, والصينيين ديل أنا ما بستهون بيهم نهائي, ناس عندهم حضاره وخبره وجنّهم أكل
سنويه أنا رايي تدي الباسوورد لسحوره طوالي, ولا ايميل ولا توصيله ولا تياب حرير خليها تشاركنا بخبرتها ووصفاتها, وأهم حاجه الصور طبعا :)
| |
|
|
|
|
|
|
Re: (مطبـخ رمضـان) بطولة:- مريم بت الحسين, ماما دوما, سناء خالد, سمارت, وجن, ... وأخريات :) (Re: Amany Elamin)
|
Quote: عشان تهششي لحمة ختى فيها اى حوامض(طبعا ما خامض الهيدروليك المخفف) (ناس علوم ...بتكونوا فاهمين الكلام ده كويس) . لو عصرتى فيها ليمون بيهشش اللحمة. و الزبادى بيعمل نفس المفعول. و اللحمة اللى فيها شحم دائما اطرى (و اغلى) من اللحمة الصافية. |
ههههههه, قلتي لي (HCl (dil مابينفع؟ H2SO4 كيف طيب؟ هههههههه ذكرتيني اللابات بتاعة الكيمياء لوووول
تنظيرتك سليمه لأنه في ناس بتضيف الخل (حمض الخليك لوووووووول) للحمه عشان يهششها برضو, موضوع الباكنغ باودر ده برضو مجرّب وحقيقي سريع ومفعوله فوري, جربيهو وورينا الأكيده :)
شكرا خالص علي كيكة الكراميل,, شكلها جميل خالص و tasty :) برضو شكلها عاوزه حرفنه وشغل معلّمين
(عدل بواسطة Amany Elamin on 08-27-2010, 10:18 AM)
| |
|
|
|
|
|
|
Re: (مطبـخ رمضـان) بطولة:- مريم بت الحسين, ماما دوما, سناء خالد, سمارت, وجن, ... وأخريات :) (Re: Amany Elamin)
|
قمربوبا,,
Quote: اصلو انتو الله ما فتحها علي وحدة تقوم تشتغل ليها قراصة تركين أو (ملوحة)... انزل ليكم مانوال؟؟ بالدكوة في وبالصلصلة في وساده في وشكل بيتزا وفطائر ذاتو في انزل؟؟ |
هسي نقول التركين مافي ثقافتنا الغذائيه نبقي في سين وجيم, كفايه القراصه خلّت عمو رغيم شخصيا فتح لينا بوست هزّأنا بسببها بعدين تعال, تركين في رمضان ده كيفنّو, الفطور تركين بالصلصه وحفّاظة مويه وللا كيف؟
غايتو شايفه مريم قالت نادر محسي وبتعمل لنادي المحس عندهم دمعه للقراصه, يبقي أكيد موضوع التركين ده حيتطلب منّها في يوم, تعال نزّل وصفتك خليها تتعلم التركين في شكل بيتزا وفطائر للزمان,, :)
مريومه قمربوبا ده محسي رطّاني درجه أولي, خليهو يشففك أكلات المحس لو لسه ما اتعلمتيها :)
-- موضوع الاستلاب الثقافي واللغاويس ده بخليك لسناء خالد,, هسي بتجيب مقشاشتها أقصد مفراكتها وبتجيك
(عدل بواسطة Amany Elamin on 08-27-2010, 11:13 AM)
| |
|
|
|
|
|
|
Re: (مطبـخ رمضـان) بطولة:- مريم بت الحسين, ماما دوما, سناء خالد, سمارت, وجن, ... وأخريات :) (Re: Amany Elamin)
|
والله يا موني الباس ويرد موجود بس المزاج مافي عموما انا جاية اشكرك جدا جدا جدا على ملاح الروب الرهيب دا على قولك ملاح معلمين مع العصيدة طلع شي خرافي نحن ماناس عصيدة لكن عملتها لجاراتي اتبسطوا منها جدا وحتى زوجي اتكيف ليها مع انو ما من رواده وماما قالت لي عصيدة العيد عليك السنة دي طيب وطبعا عاوزة اشكر سناء خالد برضو على العصيدة الظريفة والساهلة انا عملتها اول بطريقة رشا سالم تقريبا مش كده البزبادي بس كان طعم الزبادي طاغي وطلعت لينه شديد وعاوزة فتره عشان تتماسك اما بطريقة سناء خالد ظريفة وساهله بوست ظريف بشكرك عليه انتي وكل المتداخلين بفك الحيره :)
| |
|
|
|
|
|
|
Re: (مطبـخ رمضـان) بطولة:- مريم بت الحسين, ماما دوما, سناء خالد, سمارت, وجن, ... وأخريات :) (Re: وجن)
|
Quote: غايتو شايفه مريم قالت نادر محسي وبتعمل لنادي المحس عندهم دمعه للقراصه, يبقي أكيد موضوع التركين ده حيتطلب منّها في يوم, تعال نزّل وصفتك خليها تتعلم التركين في شكل بيتزا وفطائر للزمان,, :)
|
وحاتك القراصة اخدته الcertificate بتاعتها من شهرين بس، قبلها كنت ممنوعه اعملها لأي زول من خارج المنزل... لكن خلاص اخدنا الشهادة وبقينا معلمّين... انا اهلي ما بياكلوا القراصة ولا بدوروها، وانا حسي لما اسويها بكون ضامنه لي اكل غيرها، في خشمي ما بدخّلها... وحاتك، لحدي اللحظة دي ما شفته لي تركين... ما تعملوا لينا فضايح... غايته المعلومة الجديدة انه قمر بوبا طلع من نسابتي ههههههههههه
ياخوانا منتظرين افكار العزومة، خلونا ننستر مع النسابه ديل
| |
|
|
|
|
|
|
Re: (مطبـخ رمضـان) بطولة:- مريم بت الحسين, ماما دوما, سناء خالد, سمارت, وجن, ... وأخريات :) (Re: smart_ana2001)
|
سمارت
كدي عن بقدرة قادر تعالي بيجاي
Quote: الطريقة *اعملى كرمل صوص بحوال تلاته ارباع كوب سكر فى قالب كيك. *لخبطى كل مكونات الكريم...لخبطيهم سمح...كبيهم براحة فى قالب الكيك فوق الكرمل. *لخبطى كل مكونات الكيكة و اضربيها بمضرب لمدة ٤ دقايق. كبى عجينة الكيكه براااحة فى الكرم (فى النص تماما) * ختى قالب الكيك فى الفرن فى حمام ماء (يعنى ختى القالب فى حلة اكبر منه فيها موية و دخليهم الفرن) خليهم فى الفرن حوالى ٤٥ دقيقة ل ٥٠ دقيقة فى درجة حرارة ١٢٠ درجة * طلعيها من الفرن ...خليها تبرد...دخليها التلاجة ساعتين تلاته. * اقبيها و قدميها * شكلها عجيب و طعمها خرافى
|
عايزة تفاصيل اكتر ما فهمت صوص الكرامل
| |
|
|
|
|
|
|
Re: (مطبـخ رمضـان) بطولة:- مريم بت الحسين, ماما دوما, سناء خالد, سمارت, وجن, ... وأخريات :) (Re: SHIBKA)
|
وقالت بنت الحسين
Quote: ياخوانا منتظرين افكار العزومة، خلونا ننستر مع النسابه ديل |
طالما النسابة ديل محس لا فكاك من القراصة كطبق رئيسي كان بشهادة او بدونها وقد يكون البديل الرقاق الخليجي إذا انتي في منطقةالخليج الرقاق الخليجي اشبه بالكسرة الحلوة في السودان اي السلابية عند الحلفاويين او الايدي ويرا عند المحس ناس قمر بوبا وكبديل قد يكون اسهل واخف واحلى مع دمعة الدجاج واضمن ليكي رضا النسابة 100%
بالمناسبة ما في رطاني بياكل ملوحة او تركين في رمضان
| |
|
|
|
|
|
|
Re: (مطبـخ رمضـان) بطولة:- مريم بت الحسين, ماما دوما, سناء خالد, سمارت, وجن, ... وأخريات :) (Re: SHIBKA)
|
مريوم ....جربيها الكيكة دى. دانية....انا بعمل لبن مركز و يكون مطعم. SHIBKA....الكريم كرمل (الحلو الواحد ده) مكون من الكريم و من الكرمل. الكريم كتبته مكوناته (البيض و اللبن و كده). اما الكرمل (او الكرمل صوص) فعمله ما ساهل. و ذى البشمل....عاوزه ظبطه. اختى السكر فى حلة فى النار و ختى ذى ملعة او ملعقتين موية و افتحى نار متوسطة. ما تبعدى من النار ولا حتى ثانية واحده. خلى عينك على النار وقلبى السكر. ح يبدا لو السكر يتغير. مهم انك تفضلى تقلبى عشان اللون يكون متماسك. او ما (يقرب) يبقى لون الكرمل اطفى النار و ارفعى لحلة و كبى الصوص فى قالب الكيك بتاعك. خلى الصوص يتمسح فى القاع و الحيطان بتاعة القالب كلها. و اعملى الكريم و الكيكة حسب الموصفات.
| |
|
|
|
|
|
|
Re: (مطبـخ رمضـان) بطولة:- مريم بت الحسين, ماما دوما, سناء خالد, سمارت, وجن, ... وأخريات :) (Re: smart_ana2001)
|
يا سيدات... بعلي العزيز عيد ميلاده بكره، وعايزه اعمل ليه فطور غير... لحدي حسي القائمة كده:
كفته دجاج (دجاج مسلوق مع بشاميل، بتعمل شكل كفته ويتقلب في شوية زيت) كريب مع لحمة مفرومة (كريب بتلف جواه لحمة مفرومه وفوقهم صوص بتاعت صلصة مع توم) سلطة حمّص بالطحينة بطاطس بالكريما (بطاطس وبصل مع اعشاب وكريما، في الفرن)
الحلو حأعمل بقدرة قادر، كيكة العيدميلاد وحلاوة جبنة بالقشطة وكيري، لقيت الوصفة في وصفات جبنة كيري بنزلها ليكم لما اعملها
حأعمل عصير جنزبيل مع سفن اب، لقيت وصفته في المطبخ السوداني في فيس بوك
ناقصاني حاجة تكون بتتغمّس او مع رز... ادونا افكار بالله... جنزيد خمسه كيلو، لكن عايزه احتفل بيه والله، كل سنة قاعد يحتفل بي ويفاجئني... ما دايره اتلوّم والله ههههههههههههه
وبنزل ليكم الصور كلها بكره
| |
|
|
|
|
|
|
Re: (مطبـخ رمضـان) بطولة:- مريم بت الحسين, ماما دوما, سناء خالد, سمارت, وجن, ... وأخريات :) (Re: smart_ana2001)
|
وجن ياحبيبه,,
Quote: عموما انا جاية اشكرك جدا جدا جدا على ملاح الروب الرهيب دا على قولك ملاح معلمين مع العصيدة طلع شي خرافي |
بالهنا علي قلبك ,, الوصفه علمتني ليها رحاب صحبتي, وهي شغلها كله بتاع معلمين وحياتك
مريومه كل سنه ونادر وانتو طيبين مستنيين معاكي سمارت ووصفتها :) بعدين نزلي لينا الصور أهم حاجه,,
ساره علي,,
Quote: .بدل تنجضن اكل امشن نجضن بالنقة رجالكم نق نق نق وبالتالي تضمنوا حياة زوجية طويلة المدى ولا شنو يا اماني..؟؟ |
مافي طريقه غير دي؟ النقه دي بتنجضني أنا قبال ما تأدي مفعولها في الطرف التاني ههههههه والله ياساره مابكره حاجه في الدنيا قدر النقه والكلام الكتير,, بعدين الرومانسيه بتاعة مريم دي مالها؟ عيبيها لي؟!!! أعياد ميلاد ومفاجات والموضوع بيمشي عليك الله ياساره الا النقه , فكّري في حاجه معقوله شويه
| |
|
|
|
|
|
|
Re: (مطبـخ رمضـان) بطولة:- مريم بت الحسين, ماما دوما, سناء خالد, سمارت, وجن, ... وأخريات :) (Re: Tabaldina)
|
Quote: يا طباخات انتو ... بالمناسبة البخلى كفته البطاطس تتفتفت شنو ؟؟ رغم وجود البيض دقيق الفينو ؟؟ |
والله يا تبلدينا ياخوي انا زاتي بتحصل لي الحاجه دي، كل مره اعمل كفته بطاطس تواجهني المشكلة دي، غايته كل فترة لقيت لي وصفة شكلها سمحه... احتمال اعملها بكره... غايته دي الوصفة.. من المطبخ السوداني في الفيس بوك
Quote: * المقادير: 1حبة بطاطس كبيرة مسلوقة 1 معلقة جبن سائل مالح (يعطي الدسامه وبديل الملح) فلفل اسود رشه 1بيضة كمية من البقسماط (خبز ناشف مطحون) بقدونس مفروم ناعم زيت للقلي
* الطريقة: 1. تهرسي البطاطس ناعم وتضيفي الجبنه السائله والفلفل والبيضه . تضيفي البقسماط شوية شويه لحدة ما تحس العجنه اتماسكت شويه تدخليها الثلاجة لمدساعة عشان تتماسك اكتر بعد كده تبدي تلفيها اصابع ..ويكون جمبك شويه زيت تمسحي يدك وانتي بتلفي عشان ما تتلصق ليك وتاني تغلف بالبقسماط ولحدة ما ينتهي المقدار. وعلي زيت حار وغزير لحده ما تاخد اللون الذهبي |
ده اللنك بتاعها http://www.facebook.com/topic.php?uid=323845690385&topic=13666
*ملحوظة: والله وقت وصلت كفته البطاطس، معناها ما عندك عوجه هههههههههههه
سمارت ازيك، طبعا ما شفته وصفة الكسكس إلا بعد وقت متأخر جداً... قبل ساعة من الفطور... انا بحب الكسكس جداً... نادر ما خالص معاه... لكن طبعا بقدرة قادر طلعت هههههههههههه اسكتي ساي بس... غايته الكريم كرميل نزل بالجنبات اول ما قلبتها... وجيت شايلاها وزعلانه.. غايته نادر طيّب خاطري، قال لي كل ما الزول يكبر كيكته بتبقى مكرمشّه .. لكن طعمها طلع خرافي، حمودي الما بياكل كيك اكلها... طعمها حلو... بس شكل الكريمه نازله بالجنبات كده يبكّي... اعتقد انا غلطه في اني استخدمته قالب مخروم من النص...
اما الصور، فما تحلموا بيهن ، ما لحقت صورته اي شي، إلا الكيكه صورتها، بنزل ليكم صورتها.. طبعا عملته مع الحاجات الفوق دي قراصة بي دمعة لحمة...
| |
|
|
|
|
|
|
Re: (مطبـخ رمضـان) بطولة:- مريم بت الحسين, ماما دوما, سناء خالد, سمارت, وجن, ... وأخريات :) (Re: مريم بنت الحسين)
|
ازيكم يا جماعة
آمون و مريم .. لسة ما لامة في سحر من اليوم داك.. و يا سحور ياخي تعالي نحن مستنينك.. نداء عبر سودانيز.. بالله دي حالة دي!
وجن.. لا شكر على واجب و آنا سعيدة بكلامك عشان سترني مع آبو حسن.. و دعم موقفي بشآن تصوير الحلة و هي بتغلي.. باقي لي خالد دا الالكترونيات عندو زي وليداتو :))
...
عن اذنكم عندي كلمة سر مع قمر بوبا..
آول حاجة كل سنة و انت طيب يا قمر.. تاني حاجة برااااحة كدا الناس ما يسمعوني.. التركين دا ملاح شنو بالضبط؟ عليك الله آكان تضحك علي.. آنا و الله لحدي الويكاب و الكول البيفتوه بفوقو بعرفو .. لكن التركين ما بعرفو و الله.. الملوحة برضو ما حصل شفتها و لا جربتها.. بس بسمع بيها من زمان في المسلسلات المصرية قبل المنبر دا و عرفت انها حاجة زي الفسيخ.. مش كدا؟
لكن آنا معاك في قصة الرز في رمضان دي.. آنا كان ما عزايم العرب ما بعملو في رمضان.. لآني الفطور المثالي بالنسبة لي عصيدة حااااااارة بتقلية.. لكن آعمل شنو دا طلب آماني صاحبتي.. قعدت سنة واحدة في الصين قلبت آسيوية.. :)
ــــــــــــــــــــــــــ
اللقيمات (المظبوطة يا قول دانيا)
4 كبايات دقيق 3 م ص خميرة 1و 1/2 (واحد ونصف) م ص ملح 3 كبايات موية
اعجنيها و خليها لحدي ما يخمر العجين و يفور حوالي ساعة لساعتين حسب الجو حيلزمك تعمليها في طوة غريقة و كمية وفيرة بتاعة زيت ..لو ما عندك طوة غريقة آو صاج صيني يبقي آحسن تستعملي حلة من انو تكون طوة مفلطحة! راعي انك لما تجي ترمي اللقيمات في النار.. لازم.. و تاني بكررها.. لازم.. تعجني العجينة كويس بيدك بعد ما فارت عشان تطلعي كل فقاقيع الهواء الفيها.. آثناء الشغل برضو و بين كل رمية و التانية كرري العملية دي.. لآنك لو رميتيها في الزيت بدون ما تطلعي الهواء الفيها فاستعدي لقنابل و مفرقعات حارة بتاعة زيت ممكن تحرقك انت و الجنبك.. لا سمح الله
عشان اللقيمات تطلع لذيذة و مقرمشة .. لا نية من جوة و لا شاربة زيت.. حتحتاجي انك توطي النار و تعليها آثناء الشغل كم مرة.. خليها هادية آول ما ترمي اللقيمات و لحدي ما تقرب تنضج.. بعدين عليها بالتدريج و خلي الزيت يكون حار جدا قريب النهاية عشان ما تطلع شربانة .. الحاجة التانية بتحتاجي تكوني بتقلبي بصورة مستمرة بمقصوصة عشان نضج اللقيمات و لونها يكون واحد في جميع الجهات.. الناس الما اترسلو في طفولتهم يجيبو اللقيمات من ست اللقيمات دغشاً بدري.. فات عليهم طقس في منتهي الروعة.. غايتو ست اللقيمات بعد ترمي رميتها ما كان بتطلع المقصوصة من الصاج.. تقعد تقلب فيها لامن تنضج..
الكمية الفوق دي بتعمل ليك كمية لقيمات معتبرة.. الآسرة الصغيرة.. اتنين و تلاتة .. يا اما تفرزني الباقي.. آو من الآول تصغري مقاس الكباية و تبعاً ليهو مقاس الملعقة الصغيرة .. لو راعيتي النسبية دي بتطلع ليك عجينة لقيمات مظبوطة
ــــــــــــــــــــــــــــــــــــــــ
آها يا جماعة الخير نلاقيكم في بوست الكعك :)
...
عندي كيبورد لسة ما اتعودت علي حروفه و همزاتو.. سامحونا
| |
|
|
|
|
|
|
Re: (مطبـخ رمضـان) بطولة:- مريم بت الحسين, ماما دوما, سناء خالد, سمارت, وجن, ... وأخريات :) (Re: Sana Khalid)
|
مريومه,, امبارح جربت الفراخ بالباشميل والخضار بطريقتك,, بصراحه تحفه, عملت صدور الفراخ بطريقتك انتي يعني قطعتها مكعبات وبدون سلق شوحتها شويه في الزيت مع البصل والتوم وبهار وبعدين دخلتها الفرن مع الخضار والباشميل, حقيقي طعمها طلع جميل وحاسه بيها وجبه متكامله, يعني لو عملتي معاها بس سلطه وطلعتيها من الفرن سخنه وقدمتيها كفايه جدا :)
تسلمي علي الأفكار الحلوه ,,
| |
|
|
|
|
|
|
Re: (مطبـخ رمضـان) بطولة:- مريم بت الحسين, ماما دوما, سناء خالد, سمارت, وجن, ... وأخريات :) (Re: رشا سالم)
|
Quote: مريومه,, امبارح جربت الفراخ بالباشميل والخضار بطريقتك,, بصراحه تحفه, عملت صدور الفراخ بطريقتك انتي يعني قطعتها مكعبات وبدون سلق شوحتها شويه في الزيت مع البصل والتوم وبهار وبعدين دخلتها الفرن مع الخضار والباشميل, حقيقي طعمها طلع جميل وحاسه بيها وجبه متكامله, يعني لو عملتي معاها بس سلطه وطلعتيها من الفرن سخنه وقدمتيها كفايه جدا :)
تسلمي علي الأفكار الحلوه ,, |
هنيئاً يا اماني، معليش ما شفته تعليقك ده إلا حسي....
رشا... سفرتك حلوه... واكلك حلو، وعدّتك حلوه... ربنا يديم عليك النعمه.. وعامرين ان شاء الله
| |
|
|
|
|
|
|