لم يكفهم أنني بقيت طوال الليل أتنقل بين كمبيوتري و كتبهم الدراسية... أشرح لهذا و أطبع مواضيع من الكمبيوتر و أرسم تكوين السحب و أنواع الخلايا... التلفاز مغلق حتى لا يشغلني و يشغلهم و يبقى هكذا حتى يناموا... لا فيس بوك و لا سودانيز أون لاين و لا حتى تلفون... لا تكية ضهر و لا انبطاحة و لا بطيخ كما يقول اخوتنا السوريين... لم يكفهم كل ذلك... في الصباح أكون بين مطرقة بص المدرسة و سندان الدوام... أي تأخير في مواعيد الصحيان و لا في حمام..لبس..صلاة تيتبعها تأخير في الاتنين... معادلة يجب أن تكون كل أطرافها موزونة تماما و الا اختلت النتيجة... نتحرك كالروبوتات حركة آلية منتظمة مرتبة... لم يكفهم كل هذا... هذا الصباح و أنا أصحي مهند ضرب على جبهته و قال لي يا بابا نسيت... الأٍستاذ قال لينا جيبوا ورقة اكتبوا فيها الاسم و تاريخ الميلاد و الفصل... و كمان لصقوا فيها صورة... يا الله وين انت كنت أمبارح بالليل..ما أنا قاعد ملصق جمب الكمبيوتر ده الليل كله.. أفتح الكمبيوتر بسرعة..الكمبيوتر مارس معاي دغالة زي بتاعت واحد صاحبنا... مواعيد البص قربت و الكمبيوتر ما فتح... قلت ليهو شوف يا ولدي..الكمبيوتر ده باين عليهو لسه نعسان... و لا كمان يكون زهجان عشان قاعدين تساهروا بيهو الليل كله... قول للأستاذ بتاعكم حأجيب ليك الورقة بكره و أمشي ألحق البص... لحق مهند ببص المدرسة و تأخرت أنا ربع ساعة عن الدوام...
انتو جلال ده قاصد منو بمساخة ناس كده دي... أنا غايتو لو قاصدني ما بخليهو... حأوكل منصور يآخد لي حقي منو... و لو منصور قال ما بيقدر حأنتظر لحدي ما يرجع موسى عيسى من السودان... غايتو يا موسى سويته شتره المره دي... ياخي ما معقول..لا بتقول أنا ماشي السودان... و لا عارفنك جيت و لا ما جيت... و لا كمان بترد على تلفوناتنا... عافي منها أم العيال و الله... تعليمات في منتهى الصرامة...
دي بيضة الديك بتاعت اليوم... الله يجيب الديك...
12-07-2011, 06:41 AM
زهير الزناتي
زهير الزناتي
تاريخ التسجيل: 03-28-2008
مجموع المشاركات: 12241
يا رشدي صباح الخير ..... اول ما شفتك آخر المتداخلين .... قلت أجي اقول ليك ياخي ما تزيدنا شوية من بيضة الديك ... اها جيت لقيتك عارف المسالة وفايتة قعر اضانك ...... ورحم الله امرء عرف بيضة ديكه ... اها انا الليلة عندي مزاج مع ناس البوست ديل ... تعرف يا رشدي ... انا اولادي ديل لمن أصحي بيكونوا هم في الحصة التانية ... المذاكرة مع أمهم ... القضايا الصغيرة دي زي ما قال واحد من جمعيتنا ما بتهموا ... يهتم بالقضايا الكبيرة ... زي السلاح النووي الإيراني والإنتخابات في روسيا .. وأزمة الدين في الإتحاد الأوربي .... معقولة بالله أوعي كمان تقول لي شاغل نفسك بحاجات تانية ... ياخي كل ما يخص البيت والعيال ده من مهام بت الشيخ ... بما فيه القرارات المصيرية ... يعني عليك تدفع وأنت ساكت ....
12-07-2011, 07:12 AM
الرشيد بابكر
الرشيد بابكر
تاريخ التسجيل: 01-24-2009
مجموع المشاركات: 5002
Quote: .... قلت أجي اقول ليك ياخي ما تزيدنا شوية من بيضة الديك ... اها جيت لقيتك عارف المسالة وفايتة قعر اضانك ...... ورحم الله امرء عرف بيضة ديكه ...
يا أبو الزوز هي عرفة الليلة... من زمان عارف و مستريح..العارف عزو مستريح... أنت مواكب للتغيرات التي حدثت مؤخرا في المنطقة.. تبعتها تغييرات في القضايا نفسها.. فالقضايا الصغيرة أصبحت كبيرة و العكس صحيح... ستات البيوت الكانوا بتآكل عشاهم الغنماية تأثروا بالربيع العربي... فعملوا انقلابات بيضاء كانت نتيجتها الغاء الونسة بتاعت الأصحاب و النادي و غيرها... بقينا نصرف و نشتغل في البيت و نذاكر مع الأولاد... و في رواية أخرى..نورق الملوخية كمان... لا أرى أي بشائر انعتاق في الأفق من هذه الأعباء...
الله يلعن الديموقراطية و يلعن يومه ياخي... ماله الديكتاتورية مالو حكم الفرد..عيبو لي...
يا ناس الزقازيق صباح الخير مبروك لبننا محمد عصمت دفع الله هذا التفوق الممتاز
توفي بالامس والد زميلنا وود حلتنا مالك السكي خريج الزقازيق كلية البيطرة المرحوم حاج السكي من اعمدة حي الدرجة بالابيض رجل لايمكن ان تفتقده في اي ملمة مبادر لفعل الخير اللهم ارحمه واجعل الجنة مسواه وانا لله وانا اليه راجعون تلفون شقيق مالك خالد هو 0912162344
12-07-2011, 06:59 AM
جلال عثمان
جلال عثمان
تاريخ التسجيل: 09-13-2008
مجموع المشاركات: 1735
لما توريني الديك في الاول بوريك انا قاصد منو يعلم الله القاصدوا يكاد يقول خذوني...
بعدين ما شاء الله على مهند هدي ورضي ربنا يحفظوا هاك نوع دا ... محمد ولدي الاسبوع الفات كان في اجازة كدا عشان امطار وشنوا كدا ما عارف تاني يوم من الاجازة دي وكالمعتاد صحينا وروتينا ياهو روتينكم زاتو ... مع الفارق انو سواق باص المدرسة هو انا زاتي ... المهم ياحبيب محمد قال لي بابا سوري نسيت اقول ليك انو اليوم عندنا في المدرسة (الفروت دي) اها وطيب الفهم شنو يعني ... التيتشر قالت كل واحد يجيب معاهو نوع من الفواكه وطبق بلاستيك ومعلقة وشوكة طيب اسا نحضر ليك الحاجات دي من وين ... يلا بشتريهم ليك من بندة ولا العثيم ولا اي داهية ونحن ماشين لا لا انا عاوزن هسي دي عشان لازم ماما تغلفهم لي ... ياابن الكلـــ.... ومعاك فلهمة كمان يلا ياخ ... ما تأخرنا على المدرسة ... بابا اقول ليك حاجة انا زاتو ما ماشي المدرسة لانو الاجازة بتاتنا يومين وحلف برأس ابوهو ما يمشي وقد كان ... ياربي الولد دا بكون طالع لي منو من اعماموا ديل؟
جبريلا تحياتنا ياخ وطمنا على صحة الوالد بالله ونسأل الله ان يتمم شفاؤه ويدثره بثوب الصحة والعافية
والله ما شاء الله ابوي عثمان منور البوست وجمل شيل والله ما بتقصر ...
ياخوانا مسئولين من الخير عبدالدائم وين؟ مشتاق للزول دا انا والله
12-07-2011, 07:36 AM
عبد الدائم سيد أحمد
عبد الدائم سيد أحمد
تاريخ التسجيل: 10-28-2006
مجموع المشاركات: 4220
ان تأتي محملا ... خيرا من أن تأتي مثل ... زهير الزناتي ...
============================== انتو مدارس اولادكم ديل ماصارفين ليهم Daily Book ده بكتبو فيهو كل الملاحظات والواجبات والمطلوب عملها ... واهما المطلوب احضاره وده طبعا خاص بالمدارس المديرها " تفتيحة" عشان عارف شقاوة الاولاد ولازم يتم امضاءه يوميا من اولاء الامور ... وخاصة لو فيهو ملاحظة لابنكم او درجات اختبار ... شفوي ... وعليه كل يوم بت الشيخ عليها الاطلاع عليه ... وانا على شراء المطلوب ... ودايما بعد صلاة العشاء ... بكون بتحاوم بالمكتبات والدكاكين ... والمخابز ...
وعندنا أولاد بس ... عشان مشاكل تسريح البنات من الصباح ...
طارق جبريل ألف حمدلله على السلامة .... ربنا يحفظ والدكم ...
=================== و د جادين بقي زي ود الزناتي ... يفك لينا خبر الموت ... ويمشي ....
12-07-2011, 11:24 AM
طارق جبريل
طارق جبريل
تاريخ التسجيل: 10-11-2005
مجموع المشاركات: 22555
* طلات عثمان ادارة المنتظمة الأيام دى , وعليه ان يعرف ان عليه ديون كتييييييرة * عودة ابو الجل للبوست * كونوا عم جبريل حالته مستقرة * لفلفة باسر نجيلة بين المكتبات والسيوبر ماركتات بعد العشاء , على ان يورينا بحل مشكلة الباركنغ دى كيف مع الوقوف المتكرر * مهند الرشيد , كونه لقى فرصة فى ابوهوالما لاقيهو ليهو زمن , وخلاهو يرجع يذاكر المذاكرة الما ذاكرها زمااااااان * احساسى بانو نجاة حوفى ارتاحت من دور الأب ده شوية , اردموهو يا مهند وامو , ردمو جن * كونه زهير الزناتى نسى الهندسة الفراغية , ومتفرغ للمهام الجسام تاركا صغائر الأمور مثل المذاكرة وما شابهها , لى بنات الشيوخ ومن لف لفهم * كونه جلا , ما قاعد يسرح شعر انتصار , لأسباب تتعلق بتصنيف المهام ما بين (جسيمة وصغيرة ) * كونه ياسر نجيلة ينفذ اوامر الديلى هوم ويرك بووك , مع انو ما قاعد يشوفها , ناسيا انه ممكن ينفذ اوامر ما منصوص عليها فى الكتاب , بدليل انو بيغشى السوبر ماركت بعد المكتبة (المخابز دى قاطعها من راسو براااااهو ) *كونه محمد جلال نفذ فى ابوهو نظرية عادل امام , ثم انا معنديش تلفون !!!!!جيب لى التفاحة وخلى ماما تلفها لى , مع انى ما ماشى المدرسة الليلة * كونه انو الكوتش , يمر علينا ويصبح كمان و لأيام متتالية مما جعلنا نشعر بالأمان * كون الرشيد بابكر ينتج انتاجا نوعيا ممتازا فى مربع كاى , امر عليه ما استطعت , واستمتع به كان استطعت او ما استطعت * مجرد وجود مبارك جادين , مشاركا او حتى لو بس ضمن الحضور
بت آى دونت لايك آت اووول
* غياب الريس معتصم جعفر اللى عرفنا انو والدته بى صحة حبتين , اتصلو بيهو يا جماعة * انشغال ريس الداخل عننا لأسباب نعلمها , ولكننا لا نحتمل ان تغيب عننا دعواته الصباحية حتى ليوم واحد * نعزى زميلنا السكى فى مصابه الأليم ,وهذا حال الدنيا * غياب كمال الشادى عن البوست , حكمنا عليهو بى اغنية جديدة * انا زااااتى آى دونت لايك ماى سيلف الأيامات دى , المود بتاعى كان كعب خلاث , بس احس بيهو بادى يتصلح * انتو البادى ده , ما لقيتوهو لينا ؟؟؟ * محمد عيد زااااتو وينو ؟؟؟ * عبد الدائم خالى البوست ده بدون غنا مالك , فى اغنية سألك منها الكوتش فى مكان ما , ايوا حقت منى الخير ؟؟ يمين محرقة لى روحى بشكل , جيبها عليك الله , كل ما اقرب امسكها , تروح لى تانى
12-07-2011, 06:04 PM
الرشيد بابكر
الرشيد بابكر
تاريخ التسجيل: 01-24-2009
مجموع المشاركات: 5002
يا منص ياخي أشكرك على الدعاية المجانية لمربع كاي... و على الاطراء يا حبيب... استغربت عدم مرورك لعدة أسابيع بي هناك... لكن ما كتبته اليوم أكد لي ان ما كنت أعتقده كان صحيحا... كلما كان يزيد عدد القراء أقول أكيد منص واحد منهم... ياخي من هنا دعوة لكل الذين يمرون من هنا... تعالوا لينا في مربع كاي و لو لمرة واحده.. و اذا لم تجدوا ما يسركم لا تحضروا تاني... شفتو الثقة بالنفس دي كيف...
الحكاية بتاعت كون عاليه والتي ابدعها منصور ذكرتني كتاب امل وبدر (طبعا انحنا قرينا امل وبدر وناس جلا قروا حسن البطل ) وفيها موضوع اسمه اين واين وهذا يشبه كونيات منصور الراقية اضم صوتي ليهو للبحث عن الريس معتصم جعفر
يا الرشيد دعوتك مقبولة ونجيك في مربعك
12-08-2011, 01:11 AM
طارق جبريل
طارق جبريل
تاريخ التسجيل: 10-11-2005
مجموع المشاركات: 22555
تراجع و انهزم كل عشقي لكرة القدم و متابعة مبارياتها أمام سطوة التعب و النعاس مساء البارحة... و فشلت كل محاولاتي في مشاهدة و لو خمسة دقايق من أي مباراة في الليق الأوروبي... قاومت بكل ما أملك من قدرة على المقاومة... تجنبت تغطية نفسي لأن ذلك يشجع و يسرع بالنوم... استلقيت على جمبي و واجهت التلفزيون... رغم ذلك غفوت غفوة قمت على اثرها لأجد أن الساعة قد بلغت الثالثة صباحا... و كل مباريات الشامبيونز ليق قد انتهت فسحبت الغطاء و واصلت نومي... استيقظت صباح اليوم على صوت المنبه فقمت... دخلت الى الحمام فوجدت أنه لا توجد صابونة حمام... ذهبت الى المطبخ و أخذت صابونة ثم عدت الى الحمام... في الحمام شعرت لأول مرة بالملمس الخشن للصابونة... نظرت اليها فاذا بي قد ألقيت الصابونة في سلة القمامة و أخذت الغلاف...
حسه ديدو يجي يقول ليك الزول ده بقى شكاي كده مالو... دي شكية دي يا أخوانا... أنصفونا...يا منص فون...
12-08-2011, 07:46 AM
أحمد إسماعيل
أحمد إسماعيل
تاريخ التسجيل: 09-10-2009
مجموع المشاركات: 1375
سلام يا كرام السلام عليكم الأخ طارق حبريل نسأل الله الواحد لأحد الفرد الصمد الذي لم يلد ولم يولد أن يشفي ويعافي والدكم ويكمل شفائه وعافيته ويقدره على تجاوز مصابه وإن شاء الله حسنة وأجر
Quote: في الحمام شعرت لأول مرة بالملمس الخشن للصابونة... نظرت اليها فاذا بي قد ألقيت الصابونة في سلة القمامة و أخذت الغلاف...
سلامات رشيدنا الظاهر الحكاية دي في الحلم وليس في العلم
12-08-2011, 08:02 AM
جلال عثمان
جلال عثمان
تاريخ التسجيل: 09-13-2008
مجموع المشاركات: 1735
والله يا الرشيد بلغ بك الامر مبلغا... ياحليلك والله بقيت تنوم تخلي الكورة وتستحمى بالورقة وتخلي الصابونة عليك الله دي مش ياها "تجليها ثابتة زاتها"
بس يكون في علمك ياحبيب انو دي حالة عامة وزي ما كان بوصينا استاذنا المربي الفاضل عبدالرحمن قرشي "سنار الثانوية" اذا جاء الامتحان "امتحان الشهادة" صعب فاعلم ان الطامة عامة وحاول ان تنقذ ما يمكن انقاذه دحين يا اخوي حاول جرب الانقاذ ده
12-08-2011, 09:18 AM
ياسر نجيلة
ياسر نجيلة
تاريخ التسجيل: 08-30-2006
مجموع المشاركات: 1798
مـــمــو القليب ما قادر ألمو أصلو مجروح جاري دمو ضربو زايد..قاسي همو قالوا سبب الرجفة والموت الحليو الأسمو مـــــمــو وأصلو مـــــمــو.... كمو كطو وكطو كمو أبوها بابي ومامي أمو من الجماعة الكل يوم قاعد استحموا والعطر خمسيـــــــــن متــــر حـــرّم تشمو ولما تقدل بس تقول تقلع ترابا البتمشي فيهو عديل تخمو طبعو رقه لونو منقه في أوروبا مارادونا وفي بلدنا مافي زيو الا تنقا و أصلي مما شفت مـــــمــو قلت يا ناس دي الملائكة؟ ولا خلقه قالوا خلقه قلت انو.. ما أظنو وأصلي مما شفت مــــــــمــو عقلي فرّ وقلبي دقه وبنطلون الجنز طقه أي عجور ضقتو بعدو لقيتو منقه باكو السجاير جوه جيبي لقيتو حــقـــه الفنيله اللونا أبيض فجأة جيت!! ولقيتا زرقاء ياريتني لو من مويتو ألقى ليــا بقه ان شالله حتى لو فيها شرقه ياريتني لو في بحرو ألقى ليــــا غرقه كنت بغطس و ما بدور لي تاني مرقه تاني أمرق؟ وين أقبّـــل؟ للبعاعيــــــت؟ عليكم اللــه ديا خلقه مـــــــمــو يا ناس ما أزانا بي خدودو البرتكانه مــــــــمــو يا عالم جمانه لا أكل يوم زي عشانا كسره بي لبن البطانه ولا شرب من زير مغبّـــر زي فلانه وفرتكانه مـــــــــمــو مافيـــــــــش منو اتنين هم مخلوقين براهم ونحن مخلوقين برانا الفرق........!!!!!!!! نحن بنعوس كسرة في الصاج وهم رغيفم بيشتروه من أجزخانه الفرق..........!!!!!!! هم بيمشوا عديييل أفوتو ونحن نترجى البكاسي ويومي نتلفت ورانا الفرق..........!!!!!!!!! هم عندهم توليت مكندش ونحن عندنا أ..........خانه مــــــــمــو حنّـــي عليكي بابا تعالي نعمل حبكانه يمكن أتعلم أحب ناس هاي وأروق بدله فاخره واستكانه غايتو حأقول ليكي حالي كان نفع قولي أوكي مانفعت قولي ما نافع معانا عندي شده وبنطلون واحد مرقع حالو حالنا ومستوانا أبوي مزارع يحفر الطين بالطواري عرقو نازل في هجير الدنيا في الصيف والسخانه شان ألقط لقمه...لقمه شان يتمتم لي...عشانا شان يشوفنا نقرا نتعلم برانا عمي ترزي...وكان تمرجي ولادو دسته وكلهم ساكنين معانا مـــــــمــو يا الجو المكندش شوفي كتاحة هوانا وأصلي عارف بكره يظهر مغترب ناكل النيم والزلط وانتو بتلوكو اللبانه ونحن بنكابد نجابد ونبقى في الآخر ضحية الشواكيش كع....كرع التقول بس بندقيه والمآسي الفي جوانا كل يوم بتزيد شويه الا بس أصبح عزانا طيبة القلب البينزف وكتين الناس بتشحد زكل أطفال التشرد لما يمشوا عشان يرقدوا ينوموا في نص الشوارع يعني ما يلقوا المكانه الا بس أصبح عزانا طيبة اخلاصنا ووفانا وكتين أولاد المدارس موت يدافرو..في طريقهم شان يكتبوا الحصة في حينا وزمانا الا بس أصبح عزانا حب بلدنا حب وطنا منبع الخير و الوداعة ريحة الطين و الزراعة حب تقاليدنا وطباعا و فوقا ما بنرضى المهانه
الرشيد يبرى من الأنقاذ يا جلال عارف ليه لأنو ببساطة حالتو متاخرة الزول ده انا خابزو وعاجنو نومو صعب , وقومتوا اصعب من نومتو مادام بقى ينوم حتى وهو ما متغطى والمنبه العااااادى ده , بقى كمان يصحيهو معناتا الزول ده خلاث , بيتكى من حالة ادونا ليها زماااان اسمها النكوص لى شنو كده ما بعرف يا ربى الطفولة , ولا الكهولة , ولا يمكن اعترته حالة فولترونية شيكى على الزول ده يا نجاة ما يكون اتحول لينا لى قوة ثلاثية الأبعاد ثرى دايمنشن يعنى لأنى عارفو , مرحلة , الهاى ديفنشن دى (HD) فاتا زماااااان اقول ليك حاجة يا زول افتح الديلى هومويرك بتاع مهند قبل ما تنوم حق امنية ما عندك شغلة بيهو اها كلمتك تقوم تطير منو ليك ابرة خياتة ولا صحن بتاع تدبير منزلى تنكص بيك للشيخوخة توصلك الزهايمر قبل يومك ما تاكلش سمك ولا بيض !!!!!
* احمد اسماعيل مشتاقين * اتدفق يا طارق جبريل , عامل قميصك الكاروهات داك !!! * مبارك جادين فى , عوجة مافى * كدى بس يا عثمان ادارة وبا ميسرة وبا محمد عيد ما تظهروا الليلة ارشكم ؟؟!!!
12-08-2011, 10:07 AM
الرشيد بابكر
الرشيد بابكر
تاريخ التسجيل: 01-24-2009
مجموع المشاركات: 5002
أنا ثري دايمنشن يا منص... بعد صحبة العمر ده كلو أنا ثري دايمنشن بس... ياخي أنا الثري دي فتها زماااااان... أنا حسه الدايمنشن بتاعي زاتو ما معروف... ما بتقاس زاتو... دي ذكرتني علاقة الطول و الوزن... يقولو ليك طولك أنقص منو 100 ده وزنك المناسب... أول ما جينا هنا كنا كل ما يسألوني أنقص طولي عشان يناسب وزني في الوقت داك... بعد داك بقيت أزيد في طولي كلما يزيد وزني... حتى أصبحت المعادلة مختلة تماما... يعني براحة ممكن تصل لي مترين و مترين و نص عشان تظبط... أنا الدايمنشنس حقتي دي لو نقصت منها ألف بتبقى ... ثري دايمنشن...
تعرف يا منص أول مرة أعرف انو الحمام بي ورقة الصابونة ما بيعمل رغوة...
يا جلال ياخي ما تستضيفوني شهر عندكم... بس أبعد مني الشباب.. و لا أقول ليك أٍسبوع مع نجيلة هنا في الشارقة.. أنا بحب حوامة المكتبات و المخابز بعد صلاة العشاء... و أسبوع مع أحمد اسماعيل.. و أسبوع مع منصور... و الأسبوع الأخير معاكم... ديل بقو كم..واحد يجمع أنا بقيت ما قادر...
12-08-2011, 10:23 AM
عبد الدائم سيد أحمد
عبد الدائم سيد أحمد
تاريخ التسجيل: 10-28-2006
مجموع المشاركات: 4220
الأخ عبد الدائم كيف أنتم لكم أجمل التحايا وأطيب الأماني ياخي مع عالم الهت دوغ والبيرغر ومختلف أنواع السندوتشات قصب السكر والعنكوليب وأم عباط والنبق والدوم والدليب حتكون قصص كان في قديم الزمان فالبركة في أبو الرشد يذكرنا شوية من التراث وأيضا ول نجيلة بتعليقاته الجديدة دي ، ولو ما أخاف الكضب لقى ليه مذكرات ضايعة في حجتو( حجا مبرورا وسعيا مشكورا) شي بكي وسيلان دموع وبسم الله وسورة فيل ومنديل وصارقيل وخروف عيد ######لة وعيون صيد وأصلة وغمزة وضحكة وفول وكوارع والشطة في الفتة وأخيرا ممو والقليب ما قادر المو
12-08-2011, 04:48 PM
عمر المهدى
عمر المهدى
تاريخ التسجيل: 11-08-2009
مجموع المشاركات: 403
سلام مربع للجدعان نهايه اسبوع طيبه للكل وان شاء الله كل ايامكم عنكوليب العنكوليب ذكرني قصه واحد عتالي في السوق بتاع مشاوير مره واحده شيلتو قفه وفيها خضار وملغمه فيها بنقو الراجل سجنوه بدون اي سبب لما طلع من السجن اول زبون حاجه كبيره ياولد تعال شيل القفه دي قال ليها قفه مانشيل عنكوليب بس
12-08-2011, 05:53 PM
أحمد إسماعيل
أحمد إسماعيل
تاريخ التسجيل: 09-10-2009
مجموع المشاركات: 1375
ود المهدي سيبوية بتاع منبر الزقازيق 00مشتاقين والله يسهلهامعاك كما سهلت على عيوننا الكتابة وهذه هدية للمبتعدين عن البوست بقيت جافي نسيت الخوة كلام مافي القليب شن سوى
وين يا شباب .... صاحبي بتاع بيضة الديك شايفو اليومين ديل أختفي حتي الفرمالة الصباحية بقت مافي .. غايتو رادارتنا رصدت طائرة في الخرطوم تحمل بت شيخه عشان كده بقت كل الأعباء المنزلية علي راسه ..... ونتوقع البيضة بعد اسبوع من تاريخه ....
12-09-2011, 08:14 PM
الرشيد بابكر
الرشيد بابكر
تاريخ التسجيل: 01-24-2009
مجموع المشاركات: 5002
صحي يا أخوانا أبو سنينه بيضحك على أبو أربعة سنون... أمشي أرجع ليوم الخميس شوف في كم بيضة يا بتاع الرادارات انت... بيضة يوم الجمعة دي بقت قاسية شويه لأسباب فنية... أهمها ان يوم الجمعة مافي زول بيجي يقرأ... أقوم أضيع أفكاري في الفاضي عشان شنو... عشان كده يوم الجمعة ده خليناهو للناس الما بتجي باقي الأسٍبوع... زي صاحبنا بتاع الرادار... بت الشيخ في الخرطوم منذ يوم الأحد الماضي للاطمئنان على والديها... رغم انها تركت فراغا كبيرا الا انني و عيالي استطعنا تدبر أمورنا...
12-10-2011, 06:54 AM
زهير الزناتي
زهير الزناتي
تاريخ التسجيل: 03-28-2008
مجموع المشاركات: 12241
جاني مهند ولدي أمبارح قال لي انت يا بابا بكره الكلاسيكو... بين البارسا و الريال... طبعا مهند برشلوني... ما عايز أقول أنا ريالابي... يقوموا المتربصين و بتاعين الرادارات يقولوا لي ريالابي و مخرف كمان... قلت ليهو أيوه..قال لي الساعة كم المباراة... قلت ليهو والله ما عارف... ان شاء الله تكون بدري عشان أحضرهايا بابا... ان شاء الله عشان أبوك زاتو يحضرها... يعني لو بقت متأخره ما حتحضرها يا بابا... قلت ليهو انت يا ولدي قايل الحاجات في يدي... يعني ممكن براحة أقعد انتظر الكلاسيكو و تبدأ المباراة... و أقوم أنوم في الربع ساعة الأولى... أقوم أشوفها في الأخبار... يا حليل أيام كنت بحضر مباريات البرازيل البجيبوها أربعة صباحا ديك...
12-10-2011, 07:36 AM
زهير الزناتي
زهير الزناتي
تاريخ التسجيل: 03-28-2008
مجموع المشاركات: 12241
والله يا الرشيد حالتك بقت تحنن .... بالمناسبة بسألك بتعرف الفنان الأمريكي فيفتي سنت ياخي ده رهيب .. بالمرة نزل لينا ليهو أغنية عشان يسمعوها معاك باقي الشلة .... منصور ، ميسرة ... محمد صديق ... ياسر نجيلة ... عثمان إدارة (ودي كمان عا########ي كدي نخلي ليها فرصة تانية) .... جلا ....معتصم ... وعووووووووووووووووووك بس انا وجلال بنسمع وردي ولو عايزين الأغنية بالتحديد ممكن تقولوا 18 سنة عمر الزهور عمر الهنا .... هاك الفيفتي دي
12-10-2011, 08:16 AM
الرشيد بابكر
الرشيد بابكر
تاريخ التسجيل: 01-24-2009
مجموع المشاركات: 5002
عارف يا أبو الزوز صناعة النجم في أمريكا من أسهل الأشياء... شريطة أن يتوفر لديه الحد الأدني... الحد الأدني ده كان الصوت... لكن حتى الصوت أصبح ممكن التحكم فيه بواسطة التقنية.. عالم الراب ده في أمريكا عالم عجيب حسبما أراه من متابعاتي... أعتقد انه مرتبط تماما مع المافيا و تجارة المخدرات و غيرها... ففي التسعينات أثار مغني الراب الشهير توباك شوكور ضجة كبيرة... ووجد معارضة كبيرة في أوساط المحافظين و غير المحافظين... لأن ألبوماته تحوي الكثير من العنف و تصوير المرأة بصورة لم تقبلها المرأة الأمريكية... رغم انه كان موهوبا و كان بمثابة الدجاجة التي تبيض ذهبا لكثير من المنتجين... و باع ملايين الألبومات و أصبح ثريا جدا.. من موزع مخدرات في عمر صغير الى واحد من أغنياء أمريكا... ثم حدثت في التسيعنات الحرب الشهيرة بين مغني الراب في شرق و غرب أمريكا... و التي انتهت باغتيال شوكور في نهاية التسعينات... فيفتي سنت مثله مثل شوكور.. بدأ كموزع مخدرات في عمر صغير و تم تحويله لنجم... كان يملك الحد الأدنى من أسباب النجاح ألا و هي الموهبة... لكن الراب و حتى الهيب هوب ارتبط دائما بالمخدرات و البغاء و الجريمة...
12-10-2011, 08:23 AM
عبد الدائم سيد أحمد
عبد الدائم سيد أحمد
تاريخ التسجيل: 10-28-2006
مجموع المشاركات: 4220
كلما أعاين للساعة ألقاها راجعه لي وراء... دوام الليلة ده الظاهر عليهو ما حينتهي... المطولو كمان زيادة الثقالة بتاعت ناس البوست ديل... من الصباح مافي زول ظهر.. غير أبو الزوز جاء مسحنا ببوهيات المهندس حقتو دي و مشى محل مشى... وين جلا يا أخوانا و الله أنا مفتقده بي شده... و في الليلة الظلماء يفتقد البدر...
12-10-2011, 02:56 PM
زهير الزناتي
زهير الزناتي
تاريخ التسجيل: 03-28-2008
مجموع المشاركات: 12241
ماشاء الله تبارك الله الرشيد مجومس في البوست الله يقويك زي صاحبك وقت قطع قيدو وخرج من السودان ، لكن الظاهر اليومين دول معاوده حنين العودة ، وود اللمين قال ليك ما أصل الولف كتال
12-11-2011, 06:44 AM
الرشيد بابكر
الرشيد بابكر
تاريخ التسجيل: 01-24-2009
مجموع المشاركات: 5002
المداخلة دي لو فيها أي حاجة كده و لا كده أعذروني... لأني مطشش و ما شايف القدامي من الكلاسيكو الانتهى صباح اليوم ده... واحد صاحبي ساعدني عشان أساهر.. قعد يشتشت معاي لحدي قريب مواعيد الكورة... كمبيوتري علق قلت امكن جاهو شد عضلي... ما قدرت أواصل مع صاحبي و باقي من الزمن قليل مافي مشكلة... قعدت أتفرج في الأستوديو التحليلي... صحيت من دقسه فجائية كده على كواريك حفيظ دراجي العالية... قبل ما أستعدل كريم بن زيمة جاب قون الريال... قلت الليلة الريال حيلقن ليك البارشا درس لن ينسوه... لكن اكتشفت ان البارشا فرق من كوكب آخر... بأجسامهم الضئيلة تناقلوا الكرة بحرفنه و رشاقة و اتقان غريب... خلوني آمنت بالكورة... لم تمنعهم صعلكة بيبي و لا راموس من ممارسة هوايتهم في التفنن... الناس ديل زيادة على كونهم محترفين فهم يحبون كرة القدم... في رأي المتواضع ان نجومية المباراة تذهب الى انيستا... رغم ان لاعبين البارشا كانوا كلهم نجوم الا أن أنيستا كان الأكثر لمعانا... ظن مورينو أن فريقه بلغ من الانسجام ما سيمكنه من هزيمة البارشا.. فظهرت خيبة أمله على وجهه عندما وجد أمامه بارشا آخر... لا يفوتكم انني أشجع الريال و لكن قبله أشجع اللعبة الحلوة..
صاحبي ما عارفو حضر المباراة و لا ما حضرها... أمبارح كان عامل لي فيها ملك السهر...
انتو وين جلا يا أخوانا...
12-11-2011, 07:01 AM
أحمد إسماعيل
أحمد إسماعيل
تاريخ التسجيل: 09-10-2009
مجموع المشاركات: 1375
اللهم إنا نسألك خير هذا اليوم فتحه ونصره ونوره وبركته وهداهـ ونعوذ بك من شره وشر ما بعده اللهم بك أصبحنا وبك أمسينا وبك نحيا وبك نموت وإليك النشور اللهم فاطر السماوات والأرض عالم الغيب الشهادة رب كل شيء ومليكه نشهد أن لا إله إلا أنت نعوذ بك من شر أنفسنا ومن شر الشيطان وشركه اللهم إنا نسألك العفو والعافية في ديننا وأهالينا ووالدينا
12-11-2011, 08:59 AM
محمد آدم النور
محمد آدم النور
تاريخ التسجيل: 05-03-2009
مجموع المشاركات: 1993
التحية و التجلة يا رش و كتر خيرك إنت عارف الجمعة و السبت إجاااااااااااازة و ثانياً في زول كان معانا هنا في السودان و سافر بالمناسبة الزول دا دخل معانا في صندوق و كمان دخل أحمد إسماعيل بي نفرين و شال الصرفة الأولى و فرتك الختة 750 جنيه سوداني في الشهر الصندوق مكون من 15 نفر أنا داخل بي 4 أنفار الكوتش بي نفرين قلنا ليهو دخل جلال قال ما بقدر يضمن غير أحمد إسماعيل كان لقيتوهو قولو ليهو الصرفة التانية مواعيدها جات
12-11-2011, 09:00 AM
محمد صديق
محمد صديق
تاريخ التسجيل: 05-03-2009
مجموع المشاركات: 3990
يا رشدي حضرت المباراة في النت في النهاية ختيت اللابتوب في تربيزة وقعدت في الواطة عشان أحضرها ... كنت متوقع زيادة غلة الأهداف ... فعلاً انيستا لاعب من طراز فريد وهو مظلوم إعلامياً ياخي الزول ده مهارات خرافية .... في كل المباراة كانت عنده لمحات جمالية خرافية ... عمل ليهو حركتين كده في واحد آخد ليهو مقاس جلابية لعيد الكريسماس والتاني متأكد بيكون جاهو إنزلاق غضروفي ... فعلا برشلونة فريق من كوكب تاني ...
12-11-2011, 10:07 AM
محمد صديق
محمد صديق
تاريخ التسجيل: 05-03-2009
مجموع المشاركات: 3990
Quote: كان لقيتوهو قولو ليهو الصرفة التانية مواعيدها جات
أول حرف في اسمو شنو... عشان نجيب ليكم حقوقكم... انت قلت لي الكوتش داخل بي كم واحد... هو زاتو ما عارف نفسو داخل بي 3و لا 5 و لا 2...
يا كوتش أنا عندي احساس انك فارق معاك زهير شديد... أنا مستعد أقنع ليك زهير يرجع السودان مخصوص عشانك... و بي ألفين دولار بس في الشهر... ألحق العرض ده لأنه مدته محدودة... العرض الجاي ما معروف بتين... امكن المره الجاية يكون فيها السكن و العربية و تعليم الأولاد..
يا أبو الزوز قلت لي اتحكرت ليها في الواطه... و قاموا أولاد البارسا ديل حيروك... و الله فهلا ما يتحير الا محكر...
التحية للأبله سناء الصباغ رغم اننا دفعة... جينا الزقازيق سوا.. كانت بنية أم درمانية صغيرونة مسكينة... لابسة شراب مع الجزمة زي بنات الروضة... بعد داك بقت تضحك على البنات البيلبسوا الشراب و الجزمة زي ست بيتي... رغم ان سناء أصبحت بعد ذلك سياسية شرسةلا يشق لها غبار... الا أنها كانت تحمل و ما زالت نفس قلب تلك الفتاة الأم درمانية الوديعة... اشتقنالك يا أبله...
12-11-2011, 11:40 AM
زهير الزناتي
زهير الزناتي
تاريخ التسجيل: 03-28-2008
مجموع المشاركات: 12241
Quote: يا جماعة عندي حاجات كتيرة عايز اكتبها لكن غالبني اسوي شنو
تخت الرحمن في قلبك و تتحكر زي حكيرة أبو الزوز دي... ما تمشي أصيلة..البرد ده بيعمل ليك التهابات ساكت... خليك مرابط في الرباط حقتك دي و أربط وسطك و أقعد أكتب.. ما تخلي ليك حاجة ما تكتبها...
12-12-2011, 05:58 AM
الرشيد بابكر
الرشيد بابكر
تاريخ التسجيل: 01-24-2009
مجموع المشاركات: 5002
يا رشدي ما عايزه ليها شطارة .... غايتو ما عندي سماعات مكتوب فيها تائه الخصل جبتها ... اوعي تطلع ليكم مدحة ولا أغنية حقيبة ناس التلفزيون ديل ما مضمونين ....
بعدين تائهة الخصل أشمعني متذكرها اليومين ديل طبعاً انا قاصد الأغنية والله من وراء القصد
12-12-2011, 07:37 AM
الرشيد بابكر
الرشيد بابكر
تاريخ التسجيل: 01-24-2009
مجموع المشاركات: 5002
Quote: بعدين تائهة الخصل أشمعني متذكرها اليومين ديل طبعاً انا قاصد الأغنية والله من وراء القصد
شكرا يا أبو الزوز ياخي...
طلعت تايه الخصل فعلا...ناس التلفزيون ما خذلوك...
أكتر ما يعجبني في الأغنية من ناحية لحن و كلمات.. الحتة بتاعت ..
شلناك شمعة نسقيها الحنان
غصونها ضوها ما فتر
وغنيناك كأشواق شاربة روعتنا وحنان
همساتنا روعتنا وحنان
همساتنا لابسة ضيء القمر
أما عن سؤالكم أصلح الله حالك عن لماذا تائه الخصل هذه الأيام... جرت العاده أن لا نرد على أسألتكم الا باستفاضة.. فمثلكم لا يختصر و لا يستحق الا الكلام المعتبر.. و لكني منكم أعتذر... فالوقت وقت عمل و أنا بالأوراق منشغل... لذلك فانتظرني بعد المغيب و انت متحكر في (العنقريب)...
12-12-2011, 08:19 AM
أحمد إسماعيل
أحمد إسماعيل
تاريخ التسجيل: 09-10-2009
مجموع المشاركات: 1375
الله يسلمك يا صديقي... شغلتنا أموالنا و أهلونا عنكم فلكم العتبى حتى ترضوا... المذاكرة مع أمنية تستهلك وقتا أكثر مما كنت أتصور... قلت لست بيتي محتجا (زمان الرجال تلقاهم في النادي و لا مع أصحابهم)... حسه محكرين زي حكيرة زهير الزناتي لكن بس في المذاكرة... عشان ما تجي تقول لي شايف كلمة متحكر دي عاجباك الأيام دي... أقول ليك أنا كده لو مسكت في حاجة ما بخليها بسهولة... يعني زي عبارة بين المطرقة والسندان عا########ي... تقوم تجي أيام كده أخت ليك أي حاجه بين المطرقة و السندان....
Quote: حاسب يا زول , الصورة بتاعت المرايات صورة غير حقيقية الأبعاد لذا فان الأجسام الظاهرة , قد تبدو ابعد مماهى عليه حقيقة انت متأكد انها جبنة مضفرة ؟؟؟
أول حاجة سعيد انك مشيت نكت الجبنة المضفرة من لغاليغه... دي صورة رباعية الأبعاد يا حبيب... في الهندسة و الرياضيات هنالك ثلاثة أبعاد و البعد الرابع افتراضي... البعد الرابع نتاج أبحاث علماء الرياضيات و فلاسفة... كل ينظر له من زاوية اهتمامه... أنا يهمني فيه الجانب الفلسفي... مثله مثل الرابط العجيب...
12-13-2011, 06:57 AM
ياسر نجيلة
ياسر نجيلة
تاريخ التسجيل: 08-30-2006
مجموع المشاركات: 1798
الريس ميسرة و كيمو الجاهز و ديدو و ود المهدي و محمد عيد... السيمفونية الخامسة.. نغم جميل على مسرح الساوث مول... تقبل الله عمرتك يا كيمو... هل يجوز يكون الاحرام ملون يا جماعة؟ لأني شايف كيمو لابس احرام برتقالي... و لا بيتخيل لي ساكت... سلامة النظر....
انحرفت السيارة الانفنيتي السوداء فجأة و دخلت في المسار أمام سيارتي... تجنبتها بصعوبة بالغة... ثم تجاوزتها و حاذيتها لتأنيبها على فعلتها... كنت غاضبا جدا و في غاية الانفعال... قلت ان بدت غير مهتمة فسوف أسمعها أغلظ كلمات التأنيب... عندما حاذيتها كانت قد أنزلت الزجاج... و رفعت نظارتها الشمسية... و نظرت الي و رفعت يدها معتذرة بلطف... سامحتها على الفور... لا لأنها اعتذرت بلطف و أدب... و لا لأن هكذا أشياء تحدث في أعرق المدن و أحسن الطرقات... بل سامحتها لأنها... لأنها كانت تشبه أمي...
أيه رأيك يا صديقي في بيضة الديك المكنة دي...
12-14-2011, 07:03 AM
ميسرة سيد أحمد
ميسرة سيد أحمد
تاريخ التسجيل: 09-13-2008
مجموع المشاركات: 3175
Quote: في جلسة الساوث مول صاحبك عبدالدائم قال عيان وبتعالج
عندك شنو؟ قال عنده فليته وكمان بيمشي المستشفى السعودي الألماني
اكيد الدكتور المشي ليهو النضيف ده حنكوش .... بعدين ياخي الثلج ده عايز ليهو دكتور .... ولا الفليتة عايزه ليها علاج طبيعي ... قلت ليهو يا النضيف أتشعلق في أقرب باب ولولح كرعينك قال لولح يعني شنو ... والقي باب أتشعلق فيهو وين ... قلت لي ياخي امشي أقرب ميدان بتلقي عراضات أتشعلق فيهم .... بالمناسبة زمان كان المساج في البيوت ... ما عارف هسه بقي في العيادات ليه ....
ربنا يكتب ليك السلام يا النضيف ... والله يا جماعة النضيف ده شايفه يشكي من أيام عيد الفطر لمن كنا معاهم في جدة ....
12-14-2011, 07:07 AM
ميسرة سيد أحمد
ميسرة سيد أحمد
تاريخ التسجيل: 09-13-2008
مجموع المشاركات: 3175
يعدين يا جماعة كمال الشادي ده هارب من برد الرياض لدفء جده بجوها الدافئ بحرارة الإستقبال والضيافة حقيقي ناس جدة اجدع ناس .... وتاني أجدع ناس يكفي انهم بقيادة الريس ميسرة ... والكبير كبير ... ده اكيد ما ما حا يقلل من قيمة ناس الرياض بقيادة الريس منصور ..... ياخي انا ناس الرياض ديل مشتاق ليهم عديل ... يا جماعة عليكم الله أعزموني الرياض عشان ألقي لي سبب أجيكم بيهو ... اها نرجع لناس جدة والريس ميسرة .... واركان حربه النضيف وعيد (ودي علي مضض) ود المهدي ... وبقية العقد النضيد (ودي عشان الرشيد ومحمد صديق بتوعين العربي) ... والنبي فيكم يا كوتش كما سلمت علي صديقتي خالدة قسم الباري وقول ليها ما ناسي الوصية .... كل ما اجي بمحل ال.... اتذكرك (شايف ابتهاج بتقول لي كضاب يوم واحد ما جيت ماشي بجنبه ... اها تاني نرجع لناس جدة .... تقاطع الطرق لقلوب ناس الزقازيق ... الجاي من الجبل والجاي من الجريف ... دي تحية صباحية لناس جدة ... الما قدرنا نكتب عنهم لغاية هسه ...
دي مداخلة تقليد لكتابة منصور ... حيث يشرق ويغرب ثم يعود ... فهل يكون حسن ساردية كأبو داؤود .. حسن ساردية ده منو ...
12-14-2011, 07:22 AM
عبد الدائم سيد أحمد
عبد الدائم سيد أحمد
تاريخ التسجيل: 10-28-2006
مجموع المشاركات: 4220
و ناس ابو الزوز وطارق جبريل و محمد عيد شــــــــن عرفهم بالجاكوزى عشان يعرفو ليك حمام التلــج .... ديل من زمن حمام ( الحــي وووب ) بتاع الجردل والكوز ...
اها يا ميسرة اليوم انا باخد ليك صور من داخل الغرفة ..
قال الساوث مول قال ... كل مرة ساوث مول ساوث مول اصــو ما فى حتة تانية نتفسح فيها ..
12-14-2011, 07:22 AM
زهير الزناتي
زهير الزناتي
تاريخ التسجيل: 03-28-2008
مجموع المشاركات: 12241
طبعاً لو جيت ماري بيجاي وما هبشت الرشيد بتمسكني حمي ... كنت عايز اعمل تشبيه لكن غيرت راي ما في داعي للمشاكل من الصباح ... اها يا بتاع الإنفنتي ... عجبتك الإنفنتي ولا السايقاها .... عالم ########ة قال تشبه أمي .... تشبه أمي يا كبير .... غيرتو الكمش في البيت ولا شنو ... شكلكم جبت كمش كبيرة .... زمان في الخرطوم كنت قايل الإنفنتي دي زي العربات الكيا ولا مجهولة النسب ديك ... لكن جيت لقيتها الشئ ليها شنة ورنة في البيت ... طوالي أتذكرت انه للسفر سبعة فوائد .... منها تعرف العربات السمحة ... وبعدين يا رشدي ... ياخي راجين البرد ده يروح ونجيكم زيارة سرية زي زيارة كمال الشادي لجدة التي لم يعلن عنها في حينها إلا الناس شافتها في المنبر .... انا ما عارف حكاية الزيارات السرية دي شنو ... الناس خايفة من الامانت والوزن ولا شنو ... يا كمال يا شادي ... اها كان قلت لي ماشي جدة كان قلت ليك عايز لي دكوة وحلو مر وتمباك ... وشوية عجيب مر علي الاقل الواحد كان لقي ليهو سبب يجي بيهو الرياض ... اها يا كمال الشادي جايينا متين ... يا جماعة نحن عازمين كمال الشادي الدمام وعايزنكم تخشوا لينا واسطة النبي فيكم اي واحد يجي يدي لينا كمال ده سطر ... بعدين قلت لي شنو يا الرشيد تشبه امي يا ######## ..... نصيحة لي الله كل زول لو بت الشيخ قال ليهو عايز كمش في نوع بلاستيك كده خفيف وبيتحمل النار ... وما يجيب دم ... عشان تتفرجوا في الأنفنتي علي راحتكم ..
12-14-2011, 08:05 AM
الرشيد بابكر
الرشيد بابكر
تاريخ التسجيل: 01-24-2009
مجموع المشاركات: 5002
أنا يا جماعة من ما جيت البلد دي و لحدي حسه الفليتة دي ما فارقتني... و ما أنا براي أنا و أخوي الكاشف (ست بيتي)... أنا راقد أشعر بيها و أنا جاكي و لا ماشي و لا طبعك من طرفو نعسان... اشتركت في جم أنا و صاحبي حمزه سليمان... نمشي من البيت لحدي الجم و نعمل الرياضة و الساونا و حتى التلج عملناهو... لا الكرش نزلت و لا الفليتة راحت... أنا قلت الشي دي ما فليتة امكن تكون حاجة تانية... أمشي ليك للدكتور بتاع القلب..يا دكتور عندي طعنة هنا...هنا قصاد القلب... هاك يا اختبارات بتاعت الجهد و بتاعت ECG ..مافي شيتا ظهر... في الآخر الدكتور قال لي أسمع دي فليتة ساكت... من يوم الليلة بمشي أشوف لي خشم باب و لا عراضة في أبو ظبي دي أتشعلق فيها... و ألولح رجليني...
يا سلام عليك يا ريس..فعلا يخلق من الشبه أربعين...
Quote: اها يا بتاع الإنفنتي ... عجبتك الإنفنتي ولا السايقاها .... عالم ########ة قال تشبه أمي .... تشبه أمي يا كبير .... غيرتو الكمش في البيت ولا شنو ... شكلكم جبت كمش كبيرة
يا أبو الزوز لكن ما عصرت علي شديد ياخي... هي لو كانت كمش بس ياخي ما كان اتحفظت و كان قلت كل حاجه... أنا خايف من الجزم الكعبه مسمار ديك... دي بتفلق و مرات بتقد الجمجمة عديل كده...
Quote: وبعدين يا رشدي ... ياخي راجين البرد ده يروح ونجيكم زيارة سرية زي زيارة كمال الشادي لجدة التي لم يعلن عنها في حينها إلا الناس شافتها في المنبر
ده أحسن وقت لي الزيارات السرية يا أبو الزوز... الجو جميل جدا و نحن ما عندنا برد زيكم... بعد شوية بتسخن و بتبقى زي قدرة الفول...
12-14-2011, 09:15 AM
محمد صديق
محمد صديق
تاريخ التسجيل: 05-03-2009
مجموع المشاركات: 3990
البارح انا وقصبه مدالق السيل * في ونسه وضحك لامن قسمنا الليل قسمنا اليل صحيح في ونسه وضحك برضو صحيح لكن ليس مع قصبه مدالق السيل بل في صحبه من اهوي اجدع ناس الريس ميسره وشادينا وعبد الدايم *****من ولدوه الشكره هيلو في ضيافه العيد الجاب الناس يارشا قلت لي شبه امك الخالق الناطق مش كده برضه لكم الموده جميعا نجيله ابو الزوز الرافع القزاز عثمان الجيلي اختفى من ليل جده في ظروف غامضه ما اتعودنا غيابو
12-14-2011, 11:14 AM
محمد صديق
محمد صديق
تاريخ التسجيل: 05-03-2009
مجموع المشاركات: 3990
انتو ما عندكم غير الساوث مول , وبعده طوالى العمرة ؟؟!! ديل شنو ديل ؟؟ احسن اسم ليهو فعلا باب الحارة , لأنو من تسعة اجزاء ومفكرين فى الجزء العاشر عمرتك مقبولة يا كمال , وغنيتك الجديدة , بتاعت بدر الدين حسن حاجة ما تخلص النضيف اختلط عليه حمام التلج , مع كسير التلج مش اى زول على كيفو مرة نكسره , ومرة نستحم بيهو بس بتاعت الأنفنتى البتشبه علوية مامون دى , قوية جنس قوة وانت ما صدقت طوالى , عملت فيها بابكر سيد احمد وكمان بتكون قايل نفسك فى بابنوسة والله يا هو ده الفضل بمناسبة الجم دى , وينو حاتم جبارة , ولا لسه بيعانى من انعكاسات انفلاته الأمنى يعمل حسابه الزول ده , واسال عبد الدائم من (الأنفلاتات دى ) لا كمشة زهير ولا قرض ود جبريل , (قادرين على ان يمسحوا اثره) يا زهير ما تجينا عمرة الرياض ياخ (صورة مع التحية لى ست الكمشة )
* اول مرة اشوف لى بتيخة دايرة على حل شعرها الواحد لو الله لماهو فى بتيخة زيها مستعد يشيل معاها لغاااااية انبوبة الغاز
12-14-2011, 08:40 PM
محمد صديق
محمد صديق
تاريخ التسجيل: 05-03-2009
مجموع المشاركات: 3990
يا جماعة أنا مش قبل كده وصيتكم... عملتو لينا شنو في الوصية... مش قلت ليكم... قولو للنيل ضفة ضفة والعشيات لما تصفى والنسيمات البتاخد من عفاف ريدتنا عفة انو شوقى يفيض بحر شوقى شوق انسان معذب عذبو الليل والسفر...
(المتور) نفسي وشوقي الأيام دي دعايات MTN... دعايات دافعين عليها دم قلبهم زي ما بيقولو... صورة..موضوع..اخراج..تلقائية..كلها عالية الجودة... من الدعاية بتاعة الحج..مرورا بي بتاعت أصحابي ناس قدورة... لحدي ما نوصل لي MTN قرايب وين... أنا طبعا رغم انها ما بتهمني العروض كتير... لكن أول ما تجي الدعايات دي تقوم تلمس ليك شغاف قلبي... شغاف قلبي دي عشان أبو الزوز... و ترجعني ليك السودان مع الوالد و الوالدة و الأخوان... حتى الريحة بشمها... تدخلني ليك الأستاد (المساطب الشعبية) مع الكوتش و أبو الزوز... التسالي و كباية قهوة على كباية شاي... تطلع من الكورة و انت تكون ما شفت فيها غير ربع ساعة بالكتير... قهوة عند جلا في المكتب...و لا سمك في نادي الربيع.. عضه كاااربة عند نهلة و لا الريس معتصم..يصدح فيها أحمد عوض.. عصيدة خالده الما خمج و أم رقيقة بهجة الرهيييبة.. حنك مع عواطف دفع الله في بنك المزارع.. و لا قعدة جمب النيل فيها الريس معتصم و معاوية يحي... محمد العوض..عبد الرحمن مضوي..ماجده عبد الرحمن..و محمد سيد... يحليها محمد المرتضى بضحكاته و قفشاته... ضباح..كسرة بي ملاح... ده الفي الرياض.. و ده في جده... و ده الفي الدمام.. و ده الفي الدوحة.. و ده بكري حامد.. و دي سناء الصباغ.. و ده الفي مسقط.. و ده الفي أمريكا.. و مال وين عمر نملة...
قولو للنيل ضفة ضفة.. والعشيات لما تصفى والنسيمات البتاخد من عفاف ريدتنا عفة انو شوقى يفيض بحر شوقى شوق انسان معذب عذبو الليل والسفر...
12-15-2011, 06:59 AM
الرشيد بابكر
الرشيد بابكر
تاريخ التسجيل: 01-24-2009
مجموع المشاركات: 5002
Quote: غايتو يا الرشيد دي خوفة ما تصيدني قلت لي بتشبه امي ياخي بت الشيخ موش مسافرة فتو ياخي
يا طارق دي ما زي حكاية الهمباتي ربط للناس في ليلة خريفية ظلماء جات واحدة ماشة بهرشة قال مين الماشي ، قالت : حليمة الهمباتي قال ليها عندك بخت ، إسمك طلع زي إسم أمي لو ما كدة كنت اشوفك نجوم ا لقايلة واحد آخر جاي خلف حليمة أيضا جاتو الهرشة مين ، قال أنا حميدة لكن بدلعوني بقول لي (حليمة) شفت كيف يادودي مرات إسم الدلع بأكل عيش
12-15-2011, 01:41 PM
طارق جبريل
طارق جبريل
تاريخ التسجيل: 10-11-2005
مجموع المشاركات: 22555
يا ود جبريل أمك الله يرحمها ويدخلها الفردوس الأعلى من الجنان أنا بقصد أمك تظل تحميك إلى أن تموت نسأل الله أن يكرمهن دنيا وآخرى والحق يقال رشا صريح وواضح ، إنزعج شوية وعدل مشيتو والمثل بقول ( العترة بتصلح المشي)
12-15-2011, 11:19 PM
طارق جبريل
طارق جبريل
تاريخ التسجيل: 10-11-2005
مجموع المشاركات: 22555
أماني ما قاعد يعجبني الجداد وكتين يكون صايدو الهيم وتلقاهو ممدد جنحينو للشمس.. ومرة مرة الجدادة تتمردغ في الترى وتكشح فوق ضهرا الرملة.. زي أم الحسن وكتين تكون غاتسي في الشملي..
Quote: أماني ما قاعد يعجبني الجداد وكتين يكون صايدو الهيم وتلقاهو ممدد جنحينو للشمس.. ومرة مرة الجدادة تتمردغ في الترى وتكشح فوق ضهرا الرملة.. زي أم الحسن وكتين تكون غاتسي في الشملي..
ياي يا جبريلا... جداد و هيم... حسي في ذمتك دي تنقلنا من بحلقة أصيلة... لي حكحكة الهيم... كان ما الفطير القنقروش بتاع الوالدة رحمة الله عليها... كان رسلنا ليك ناس النظام العام...
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة