|
|
|
 Re: ناس الزقازيق ... أجدع ناس (4) .. (Re: ياسر نجيلة)
|
أشكركم يا جماعة من جوه قلبي...
شكرا عثمان الجيلي...أنقص زي 30 سنه حتعرف الرقم..
يا ريس يديك العافية و تسلم على الدعاء الطيب..
شكرا يا كوتش دي كانت مناسبة تكتب فيني قصيدة فوتها ساكت...
شكرا يا ديدو رغم اني زعلان منك بسبب الأغنية النزلتها للكوتش و ما إشتغلت بينا...
شكرا يا حاج ياسر انت قايلني بدس عمري كمان..
أنا السنةالفاتت لو متذكر احتفلت بالثلاثين...
زيد واحد ولا ما أدوكم جدول واحد...
و الشكر مرة اخرى للحبيب محمد عيد...
| |
 
|
|
|
|
|
|
|
|
Re: ناس الزقازيق ... أجدع ناس (4) .. (Re: Hatim Gubara)
|
يا رشيد القوم
| Quote: شكرا يا ديدو رغم اني زعلان منك بسبب الأغنية النزلتها للكوتش و ما إشتغلت بينا... |
اغانى العرضة دى خليها لناس رفاعة وود المهدى
انت يوم عيد ميلادك تلبس ليك شورت موووف مع تى شيرتى بمبى
مع ميوزك رومانسى تقعد فى ركن هادى
وتطفى شمعتك الواحد وتلاتين ..
امشى فى حيطتك فى الفيس بوك بتلقى البعجبك .....
ومن امس كمان ....
قبال حقت الكوتش ..
| |
|
|
|
|
|
|
|
|
Re: ناس الزقازيق ... أجدع ناس (4) .. (Re: ميسرة سيد أحمد)
|
اولاً بالتبادي التهانئ للولد الرشيد .... ولد دي كناية عن صغر السن بالنسبة لينا .... وربنا يديك الصحة وطولة العمر .. ويخليك لست بيتك ويخليها ليك ويخلي ليكم عيالكم ... اكيد عيد الميلاد جا في وقت جميل ... بس ما شايف اي احتفالات .... زي السنين الفاتت أكيد يا رشدي دي ضريبة القعاد في ابو ظبي ... يعني بقيت زول بيت .... وما في طريقة دلع ... غايتو نحن زعلانيين ليه مافي حفل عيد ميلا يا نجاة حوفي صاحبنا ده هين ولا هين ....
ثانياً الف مبروك الحجة يا نجيلة ... انشاء الله حجاً مبرور وذنب مغفور ... والله دقت في العراضة وكان نكون اولاد حجة معاك ... وقت ما أتشرفنا نكون دفعة في الكلية كان نكون اولاد حجة لكن إنشاء الله تعيش وتحج مية مرة تاني ونلاقيك في الحج ونحقق أمنيتنا ... تحياتنا لبت الشيخ والتهانئ ايضاً موصولة ليها .... بس ليه ما سقتها معاك الحج .... اكيد دي خيانة منك ...
وش فاتن حمامة كبير لناس أبو ظبي .... غايتو الليلة بنفتح ليك الحدود مع السعودية لطلب اللجوء ....
سعيد برضو بعودة عثمان الجيلي للتواصل مع الناس ,,,, وده انديكشن لأخبار كتيرة جميلة وكويسة .... يا ابو عفان ... وربنا يديم الحاجات الكويسة علي الناس كلها ....
بعدين شنو يا ناس جدة شابكني انت وين وما ظاهر مالك ... هوي يا جلاكين البسوا نضاراتكم بتلقوني قاعد في حناياكم وجواكم ... يمين ما غبت عنكم يوم واحد ... امشوا شوفوا الغياب ناس جلا ... ومنصور ومن لف لفهم ....
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: محمد عيد)
|
اسامينا
منصور ولا محمد عيد , نجيلة ولا الرشيد
محمد صديق ولا جلا , ميسرة ولا منى يونس زاتو
ان شاء الله تكون زهير الزناتى , ولا كمان عبد الدائم سيد احمد
فيروز قالت , فى لحظة شدو
(بالمناسبة وين كمال الشادى )
اسامينا , شو تعبو اهالينا (تلقوها )
وتقصد بعاميتنا التى تبدو فصيحة , اسامينا , بالله شوفوا كيف تعبوا فيها اهالينا
عشان يلقوها
ولد ده
يمين لا تعبوا لا شافوا التعب
الما حمدوهو ولا عبدوهو عندنا , جروا ولصقوا ليهو يا اسم جده , يا اسم حبوبتها وستها
المهم فى الموضوع , قول لينا بتحب اسمك ولا لا
ولو بتحبوا كيف وليه , ولو ما بتحبوا , عشان شنو
باختصار كده , علاقتك مع اسمك شنو ؟؟
ولا بس متصالح معاهو , وكل البيربطك بيهو , انك قمت لقيتو لاصق فيك ؟؟؟
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: منصور عبد الرازق)
|
والله يا منصور
من قمت لقيت اسمى لاصق فينى
لا عندى جـــــــد ولا زول فى العايلة اسمو زى اسمى
ابوي نكتو من وين ما بعرفو
البركة فى سناء الصباغ السمتنى ديدو ....
كان فى واحدة اسمها بت المنى خير الله ...
المصريين بيقروها بت المناخير .... الله ...
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: عبد الدائم سيد أحمد)
|
اها يا عبد الدائم
هاك الخبر السمح ده
فى اللحظة دى
رزق عزيزنا وحبيبنا , عمر نملوز
بمولود ذكر انضم الى اخويه السابقين
الطيب عمر نملة
وعيسى نور عمر نملة
انضم اليهم اليوم
ياسين عمر نملة
ان شاء الله يا رب يتربى فى عزكم يا نملوز ويا ندى
عمر فى اجازة لمدة اسبوعين , لرعاية المولود والزوجة حسب تقاليد العالم المتحضر
تلفون عمر لمشاركته الفرحة الكبرى
0032493409406
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: عبد الدائم سيد أحمد)
|
كذب المنجمون ولو صدقوا
شبكونا ليك من صباح يوم الأثنين
سوف تمطر بشدة ويا ناس جده جاكم الويل
في المدرسة حذروا الأولاد لو نزلت شكشاكة ساكت في كسلا
مافي زول يجي المدرسة ، ناس البلدية والأمارة على قدم وساق
الدفاع المدني أعلن حالة الطوارئ ، الحجاج أسرعوا في العودة
أنحنا من صلاة الفجر نعاين للسماء ما في اي حاجة ، التحذير لمدة ثلاثة
أيام ، اليلة اليوم الأخير تكون دي كذبة أبريل ياناس جدة!!!!!
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: ميسرة سيد أحمد)
|
سلام يا سادة يا كرام
بالمناسبة يامنصور ثاني يوم للعيد انا وولدي عمر
وخروف الضحية في المكان ذاتو (المسار البرتقالي)
إستلمنا الكرتونة التي إحتوت لحم خروفنا قبل الظهر بشوية
سبحان الله كان نتبارك بلقاكم
بالنسبة للاسماء زمان لو سألت السماها تجد أخبار بالكوم
قد يكون سموك لحاكم أو مفتش أو قاضي أو حكيم أو شيء إرتبط بمناسبة
جميلة مثلا عيد أو زيارة فيها فائدة عظيمة على المجتمع وذلك لأن
العهد فاضل أي فرد يجود بما عنده في نفس الوقت لاينسى الجميل والمعروف
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: أحمد إسماعيل)
|
عارف يا منصور انا زول متصالح مع نفسي خالص .... يعني مبسوط من اي حاجة في حياتي ... وسعيد بيها
ومن ضمن الحاجات دي الإسم .... ياخي مرات يتخيل لي إسمي ده لازم يكون لزول رئيس جمهورية ولا حاجة كبيرة
في البلد دي .... بس عشان الإسم والموسيقي .... زهير الزناتي ....
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: زهير الزناتي)
|
مساكم الله بالخير
أول حاجة نهنيء الدكتور الكبير خالد محي الدين...
كل سنة و انت طيب يا خالد و ان شاء الله السنة الجاية وزير...
و قبلها عندك كلية خالد للعلوم الطبية...
عشان ندخل الأولاد ديل ملح...
وزير في حكومة الزناتي طبعا...
انت كنت قايل شنو...
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: الرشيد بابكر)
|
الصورة دي عشان نسكت الخشامة و أنزل في العوازل كي ...
و لي عثمان الجيلي الشعر ده من غير أي صبغه و الحاجات بتاعت الناس الكبار ديل..عشان تآمن...
و مكاواة لي حاتم جبارة و طارق جبريل و حاج الركز...بالشعر طبعا...
يا فاتن حمامة أقفلوا الحدود أنا ما جاييكم...
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: الرشيد بابكر)
|
Quote: وتقصد بعاميتنا التى تبدو فصيحة , اسامينا , بالله شوفوا كيف تعبوا فيها اهالينا
عشان يلقوها
ولد ده
يمين لا تعبوا لا شافوا التعب
|
هي منو القال ليك...
أنا غايتو أهلي تعبوا تعب شديد في اسمي...
لما ولدوني عملوا قائمة طويلة...
لؤي..هيثم...وائل...مهاب...و زهير..
قاموا قالوا الأسماء دي ما بتشبه الولد ده...
الولد ده صباح خير و وشه وش صالحين...
أحسن حاجه نسميهو على سيدي أبراهيم الرشيد المعروف برشيد القوم...
انت قايل الحكاية سهلة يا منص...
لو كان سموني لؤي كان سميت ولدي الرشيد..
| Quote: البركة فى سناء الصباغ السمتنى ديدو .... |
أنا التصق بي اسم رشا من أيام الكورة...
قام منصور عدل الاسم لي رش...
في الأول كانو الأولاد في الكورة مفتكرني حبشي من الاسم...
بعد التعديل بقيت هندي...
أنا ذاتي متصالح مع نفسي و عاجبني اسمي...
و شايف اسمي ده ينفع يكون اسم الأمين العام للأمم المتحدة...
و لا الرئيس الأمريكي بعد ما آخد الجواز الأمريكي...
و أكون الرئيس الأسود التاني لأمريكا...
بابكر دي بقدرة قادر ممكن نخليها باراك...
الفرق شنو يعني...
و نتسعمل الاسم بتاع منصور...
تبقى رش باراك...
و ده عشان شنو...
عشان أفطس ليكم رئيس جمهورية السودان...
زهير الزناتي...
آخر حاجة و أمشي أنوم...
كنت عايز أهنيء عمر نملوز هنا بالمولود الجديد (يس)...
لكن بعد ما ضربت ليهو تلفون و لقيتو لا متابع و لامستمتع...
قلت مافي داعي...
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: الرشيد بابكر)
|
يا ياسر نجيله الحجة مبروكة
وانشاءالله نترافق في الجايات
الرشيد كل سنة وانت طيب
وعقبال الف شمعة
مبروك الحج يا عصام دهب
وحج مبرور
وذنب مغفور
الزعيم الكبير اوي ابراهيم سليمان
الحج مبروك
ويا داخل هذا الدار
صلي على النبي المختار
حج مبروك وذنب مغفور
نكتب هكذا على
باب بيتكم الكبير في كسلا
وحجة مباركة للجميع
لود دفعتي
وزميلي في قائمة المعتدلين
الدكتور خالد محي الدين الطيب كل سنة وانت طيب
والشكر طبعا موصول لمحمد عيد
الذي يتذكر هذه الاعياد
ويا عثمان الجيلي ونجيلة
يا اخوانا العدد في الليمون ؟؟؟؟؟؟؟؟؟؟؟؟؟؟؟؟؟؟؟
مبروك قدوم الابن يس عمر
جعله الله من ابناء السودان الذين يشار اليهم بالبنان
يا نملوز طبعا ده حيحطم مستقبلا الارقام القياسية
التي ينوي ابوه تسجيلها
وشكرا على المعلومة يا منصور
وعجبتني جدا قصة الخروف والبرادو
والذي منه نحن مستمتعين
رغم انف الحاقدين على بعر خروفكم
في ضهرية برادكم
وكل سنة والجميع بخير
وضحية مباركة
تحية خاصة
لعادل ابراهيم
وموسى عيسى بالسودان الشقيق
واحمد اسماعيل
وجلال
وطبعا
تحية للكمندان
او الكوتش في رواية اخرى
والحديث لا يمكن ان ينتهي دون تحية
ود الزناتي
والريس ميسرة
وديدو
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: مبارك جادين)
|
مساكم الله بالخير
و الله حرام عليكم يا جماعة...
مبارك جادين ده ماسك الحراسة من الصباح...
مافي زول يبدله...مافي رحمة...و لا مافي موضوع...
شكرا يا بركة على التهنئة و ان شاء الله انت و أسرتك بكل خير...
حاجة كل ما تشيل منها تزيد...
دي طبعا معروفة ليكم جميعا و هي الحفرة...
لكن الحاجة الكل ما تعمل ليها رفريش تنزل صفحة دي شنوووووو؟
بتفرج في مباريات دوري نجوم الممتاز السوداني...
كل ما أِشوف السكاكات و الجلافيط...
أقول ديل والله دايرين ليهم أربعة سنوات عشان يسمنو...
و خمس تانية يتعلموا فيهم الكورة...
يعني بعد زي عشرة سنوات كده ممكن نتعادل مع الكاميرون...
زمان ديمبا باري لما اتسجل في الهلال كان ضخم و جسمه مليان..
حسه ما تفرزه من خليفة و من بشه...
بلدنا دي قاعدة تمحق الناس ديل و لا شنو...
الناس دي ماله غايبه الليلة...
حاجة تحير...
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: مبارك جادين)
|
تحية وعيدية لكل الزقازيقاب واسرهم .. ربنا يحقق كل الامنيات..رغم انها متاخرة
حجا مبرورا لكل الحجاج وتهنيئة خاصة للحاج الاستايل ياسر نجيلة ..
ونقول عيد ميلاد سعيد لجادين ود خالد محى الدين ..وعقبال 102 شمعة..
ونبارك كمان لنملوز البيبى الجديد يتربى فى عزك..
شكرا منى وميسرة على الاتصال والعيدية الجميلة فانتم دايما سباقون للخير..
ودمتم جميعا سالمين
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: نجاة حوفي)
|
سلامات يا ناس
Quote: تحية وعيدية لكل الزقازيقاب واسرهم .. ربنا يحقق كل الامنيات..رغم انها متاخرة
حجا مبرورا لكل الحجاج وتهنيئة خاصة للحاج الاستايل ياسر نجيلة ..
ونقول عيد ميلاد سعيد لجادين ود خالد محى الدين ..وعقبال 102 شمعة..
ونبارك كمان لنملوز البيبى الجديد يتربى فى عزك..
|
وانا برضو.
يا نجاة ربنا( يمتعتك) بالصحة والعافية.
يالرشيد الليلة انت وبت الشيخ متفسحين ...عندكم اجازة من المذاكرة؟
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: محمد صديق)
|
لو كان اتقدمتى مداخلة واحدة يا نجاة و قلبتى الصفحة
اكيد حيكون للصفحة 32 طعم اخر ، لكن نقول شنو
الحالة واحدة انتى و الرشيد
عثمان الجيلى ما شايف شغلو ... اتكلنا عليهو فى رفع
البوست جيت لقيتو فى الصفحة التالتة من المنبر ....
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: عبد الدائم سيد أحمد)
|
يا عبد الدائم عثمان الجيلي مش كتر خيره بقي يجب .... كمان عايزه يخلي باله من الصفحة ما تبالغ أنت كمان ...
يا ناس ابو ظبي ما راجين الصور ....
مبارك جادين ياخي ما بالغت معاي حشرتني مع ناس جدة ديل ... اصغر واحد فيهم جا الزقازيق سنة 80
مبروك يسن عمر الإمام يا عمر نملة ... يتربي في عزكم ... وربنا يعين ست البيت علي العزابة ...
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: أحمد إسماعيل)
|
بمناسبة يسن عمر الأمام دى يا ابو الزوز
انا اظنى كتبت موضوع اسامينا وفكرتا
قبل ما اعرف انو نملوز جابو ليهو ولد جديد
عشان كده لمن اتصلت بيهو وعرفت الخبر
حكيت ليهو عن الموضوع والأسامى وكده
ولد عمر الكبير , اسمو الطيب عمر
والتانى كمان ما شاء الله , اسمه عيسى نور (اسم مركب يعنى )
اها التالت ده , لما سماهو يسن , فالقصة عندى مشروع تساؤل كبير
نملوز رجل مرهف الحس , وعنده لمسات صوفية قديمة
ما تزال تؤثر على شخصيته , رغم جنسيته الهولندية , وشعره المجدول
يعنى من ناحية صوفى , ومن الناحية التانية , رود خوليت عديل
اها لو جينا نسقط اغنية فيروز , على عمر نملوز
شفتوا القافية دى كيف ؟؟ شعر ولا ما شعر يا محمد صديق ؟؟
فحا نجهجه ليكم الزولة دى جنس جهجهة , بقصد فيروز طبعا
حتى الرشيد بابكر , فلسفة تسميته , تبدو ذات ابعاد صوفية
ولكن فيروز , للمتابع ابعاد اغنيتها دى بتاعت اسامينا
تحاول ان تسقط ابعادا (لاحقة ) لتسمية تتم خلال اسبوع او اسبوعين من الولادة
وذلك حين تقول ان (عينينا هن اسامينا )
اصحاب العيون الصغيرة , حا يجهجهوا اهاليهم جهجهة السنين
لو حاولوا اتباع هذه النظرية
فعيون المواليد , ممكن تكون اقرب من كونها (مغمضة ) فترة من الوقت
فالحل اذن , اما تأجيل التسمية لغاية ما العيون تقول
او كمان , نسميها او نسميهو , عبد الدائم , لأنو الأسم الزى ده , لا فى عيون حا تقولوا ولا شيتين
ولمن بعدين يسألونا , نقول ليهم ده اسم امام المسجد بتاعنا
وكمان اسم الدلع بتاعو , يا ديدو , يا كمان النضيف
اما اسم زهير , نحنا لا عاوزين تبرير ليهو ولا حاجة
كان داير تدينا تبرير , ورينا قصة الزناتى دى شنو ؟؟
ينوبك ثواب
* نجاة حوفى شخصيا ؟؟؟!!!!!!!
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: منصور عبد الرازق)
|
مساء الخير ،،، يا وجوه الخير
حاولت أكتب عن أسمي لمدة يومين وصباح اليوم رافض البوست يفتح
معصلج يعني لو كنا في المسار البرتقالي كان بعر لينا ،،،،
عمكم سيدأحمد الله يرحمه كان صاحب نظرية يبحث عن الأسماء القوية والجميلة
ويلزقها في أولاده وبناته :
حيث أنه كان راجل يقرض الشعر ويحب الشعر ويحفظ ابيات جميلة كثيرة
سمى أول بنت للوالدة
- غرام
ثم أردفها
- إلهام
وتحول في قراءته للكتب القديمة والفروسية فسمى
- عنتر
وكان أبناء عنتر كُثر حسب روايته ومنهم ميسرة إبن عنتر والقضنفر إبن عنتر
ولكنه مال إلى تسمية
- ميسرة
وعرج على الزعماء العرب فسمى
- أبو مدين
وعرج على السيرة النبوية وسمى
- حذيفه
يعني إسم ميسرة لم يرتبط بالسيدة خديجة إنما ربطه عمكم بصاحب الإسم
ميسرة بن عنتر بن شداد رايكم شنو بالله
لو كان إسمي القضنفر كان ناس ديدو ديل ما بياكلو معانا عيش
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: ميسرة سيد أحمد)
|
انتو ياشباب الدكاترة ديل كمان عندهم عيد ميلاد
والناس كمان بتدخل تبارك ليهم ... زي ما بباركو لينا
يعني حسع ادخل ابارك لولدنا خالد محي الدين
انتو غلطانيين ...
الدكاترة ديل كل يوم عندهم عيد ميلاد ...
في كل يوم يستشفي مريض هو عيد ميلادهم ...
في كل يوم يعملو فيه عملية وينقذو حياة انسان فهو عيد ميلادهم ...
فما بالكم بدكتور رسم البسمة على محي آلاف من الأمهات المحرومين من الولادة ...
ده أكيد كل ثانية في كل يوم هو عيد ميلادو ...
انتو قايلين دكتور خالد محي الدين متخصص شنو ...
ده تخصصو صناعة أيام اعيلاد الميلاد زاتا ...
كم عقيم /ة شفيت على يده ... وكم ولاده متعسرة تمت على يدة ...
وكم طفل ولد بالانابيب على يده ...
اها زول زي ده ... ابارك ليهو عيد ميلادو كيف ...
كدي يامنص ورينا الكلام ده ببقي كيف ....
آآآآآي ممكن نبارك لودنا نملوز شلة العذابة
وبقدوم يسن يكون اكتمل نصابة للانضمام لنادي العذابة ...
يعني لازم 3 أولاد + الأب + الام التي سوف تقلب ولدا بقدوم الثالث ...
حتي تنال شرف عضوية النادي ... الذي سبقنا عليها ولدنا حاج الركز
وحرمة المصون ... عفاف
بالمناسبة الناس ديل وين ....
======================================
بت حوفي شكرا على المباركة
شدو حيلكم فتحت ليكم الطريق بحجة ...
قروشها معقولة ... وخدمات جيدة ....
غايتو ابو الوليدات اداني الضوء الاخدر بالمريع بهناك
انتي معاهو ... ولا ... اول يمشي براهو يكتشف الدرب ...
==================================
معني اسمي بجيكم ليهو راجع بعدين ...
قصدي ياسر
وليس نجيلة 
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: ياسر نجيلة)
|
صبحكم الله بالخير
يا حاج ياسر الوش الأخدر ده كان تقلبو لينا الهلال الأحمر بعد الحج...
نحن ان شاء الله مكنكشين فيك للحج السنة الجاية...
ما كتبته عن خالد أجمل ما قرأته مؤخرا...
و لا شك انه يستحق ذلك وأكثر منه...
أين جلا وجلال...
جلال امكن نلقى ليهو العذر...
و نقول اتعوق في مباراة العيد...
جلا عذره شنو...
زول معيد في كسلا مع الحجاج...
و ما خلى ليهو برش ما شرب فيهو قهوة حسب مصادرنا...
و اشترى ليهو خروف رخيص من السواقي...
و ما كان عندو تغير ستاير و لا عفش...
عذره شنو....
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: محمد صديق)
|
عبد الدايم شك تيلو من ولدوه الشكره هيلو
الخصيم ما بجيلو صوتو بهدي قبيلو
انا ليهم بقول كلام دخلوها وصقيرها حام
عبد الدايم معاهو اخوانو
ضربو البلا فى بكانو
وكت رماهم قنعو قامو
الصف العمر زحامو
هو مستعد لى لطامو
هيييييييييييع
اديك كداااا يا كوتش
ولا اعمل ليك خلف الله حمد .....
قال قضنفر قال
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: عبد الدائم سيد أحمد)
|
سلام أيها القوم
Quote: تحية وعيدية لكل الزقازيقاب واسرهم .. ربنا يحقق كل الامنيات..رغم انها متاخرة
حجا مبرورا لكل الحجاج وتهنيئة خاصة للحاج الاستايل ياسر نجيلة ..
ونقول عيد ميلاد سعيد لجادين ود خالد محى الدين ..وعقبال 102 شمعة..
ونبارك كمان لنملوز البيبى الجديد يتربى فى عزك..
ودمتم جميعا سالمين |
و لا نامت أعين الجبناء
نقابة التاكسي
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: ميسرة سيد أحمد)
|
لزم السرير الابيض بمستشفى الاطباء العم جبريل موسى ادريس القرونى
والد طارق جبريل اثر اصابته بجلطه وهو الان منوم بالعناية المكثفه
نسألكم الدعاء والابتهال لله رب العالمين
ان ينعم عليه بالشفاء العاجل شفاء لا يغادر سقما
اللهم يا شافى يا كافى اشفه شفاء لا يغادر سقما
اللهم يا شافى يا كافى اشفه شفاء لا يغادر سقما
اللهم يا شافى يا كافى اشفه شفاء لا يغادر سقما
تلفون الاخ طارق جبريل بالسودان 0909630220
نقلاً عن الفيس بوك بقلم زميلنا سابقاً كمال الشادي
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: ميسرة سيد أحمد)
|
ديشششششششك !!!!
جلا جاكم , آخر مرة شفناهو كان بيكسر حطب
هو الزول ده قايل خرفان الزمن ده
الرخااااااص ديل
بتاعين السواقى الجنوبية
قايلهم بياكلوا حطب ؟؟؟
بالله شوفوا الزول ده
خرفان الزمن ده , بيركبوا برادو
وبيبعروا كمان
مشتاقين يا زول , لغاية نص مكنة كدة , لكن بطايوق كامل
يكون فى معلومك يا جلا
انت الوحيد الما مطلوب منك تحكى لينا عن اسمك
لو لازم ولابد , نقبل منك تكلمنا عن اسم انتصار
ولا اقول ليك , اسم خالد اخوك كيف ؟؟؟
الريس افحمنا بمداخلته الأسمية الشحمانة
بس اقول ليك حاجة
ميسرة ولد عنترة ما بنعرفه
لكن عنترة بن شداد , آمنا بيهو عدييييييل
يمين ده بيظبط الكرتونة جنس تظبيط , بيخليها شنطة عديييييييل
تحياتنا لى عنترة ياخ
ربنا يبلغ عمنا جبريل الشفاء الكامل والعاجل بأذن الله
وقلوبنا معاكم يا طارق وناصر وطلحة
* الحاج ياسر نجيلة
وردنى عن اسمك , مايلى
قالوا ان الياسر فى الجاهلية
هو الصبى المختص بتوزيع الشراب على القوم المجتمعين
اى ان لكل قوم (ياسر يخدمهم ) ويدير عليهم الكؤؤس المترعة
هسى عليك الله , ده اسم يحجوا بيهو ؟؟؟!!!
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: محمد صديق)
|
اللهم يارب كريم ...يارحمان يارحيم..
نسألك باسمك الاعظم الذي اذا دعيت به اجبت..
يا مغيث يا مغيث ...نسألك بكرمك وجودك واحسانك..ان تشفي عمنا جبريل...
وان تجعلها في موازين حسناته...وترفعه بها في الدرجات العليا..وان تلبسه ثوب العافية
يا ايو الزوز كيف حالك عساك بخير ...طبعا انا ما مسجل غياب بالمعني داك ...الا اني بكون في كثير من الاحيان
مشاهد فقط...زي لاعب الكورة او الكابتن المتقاعد بجلس خارج الميدان وبنظر من بره..فانا الآن بنظر خارج الميدان
وقلنا شوية ندي فرصة للشباب والدماء الحارة...
ملاحظة اخري اما تري انو الكباتن الكبار في البوست غائبين......
وين معتصم الريس الكبير...وين عصام دهب...وين جمال السنوسي...عمر المهدي
بعدين الحوش تاني رجع زي بيت العذابة...اين العنصر النسائي ..
وين الاخت سناء الصباغ...وين الاخت نعمات الجبل,,, وين الاخت زينب التجاني...وكثير من المخضرمين مسجلين غياب ؟؟؟
عثمان الجيلي
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: الرشيد بابكر)
|
اللهم رب الناس أذهب البأس اشفِ أنت الشافي لا شفاء إلا شفاؤك ، شفاء لا يغادر سقما
إني أسألك من عظيم لطفك وكرمك و سترك الجميل أن تشفي العم جبريل و تمده بالصحة و العافية...
===============================
يا منص ...
الحوش ده فيهو 514 اسم
ما لقيت الا اسمي ... تبحث عن معناهو ...
وكمان تبحث في معجم ... ايام الجاهلية ...
صبرا يا منص ...
سوف ابحث عن معني اسمك ...
في معجم العصور الحجرية ...
ديدو ...
بالله قصيدة رطانية خاصة لاخوك ...
نديها لمنص ده ... عشان يآمن ...
*** الحمد لله ما بحث عن معني نجيلة ...
كان عملها " مزة " للبسقيهم ياسر
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: زهير الزناتي)
|
بسم الله الرحمن الرحيم
سلام أيها البشر
| Quote: اللهم اشف والد الاخ طارق واسبغ عليه ثوب الصحة والعافية. |
Quote: يا كوتش ... سلامات ومشتاقين
حتما .. حتما سنلتقى ... |
بيناتنا تلفون خليناها و بقت ما جايبا حقها
لكن إتوقع مني تلفون
لكل الناس التانية مشتااااااااقون ...وكدا
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: الرشيد بابكر)
|
صبحكم الله بالخير
يا عثمان الجيلي المشاركة مطلوبة كلما تسنى ذلك...
و أضعف الايمان المتابعة...
عشان لما يتسنى ليك المشاركة تكون الكتابة سهلة...
حسه شوف زهير ده قاعد يغيب كتير كيف (وش مطنش)...
لكن لما يرجع بيكون متابع كل حاجة حتى بعر البرادو بتاعت منصور...
أنا البرادو دي فوتها ساكت لي منصور...
لكن لو كانت دي زينب التجاني كان ما خليت ليها صفحة ترقد عليها...
و دي مناسبة نرسل تحيات لي زنوبة...
و بالمرة كمان لي ياسمين الشهيرة بي بطة...
الناس ديل انقطعوا مني ليهم زمن أظنهم محاربني...
لكن أنا كان حاربوني ما بحاربهم...
و كنت عايز ألومهم في البوست ده لكن قلت مافي داعي...
بالتلفون أحسن عشان أحرجهم...
أنا عارف مداخلتي دي عاملة زي جلابية الدراويش...
ما بتعرف لونها الأصلي شنو و لا هي مقبلة وين...
أنا مرات كده...بقوم من الصباح ما بعرف شايت وين...
بكون أحول التفكير و التركيز و الموضوع...
و هنا بتجي حوبة الأصحاب...لازم يتسحملوك...
و كمان يقدروا ظروفك و يضربوا ليك تلفون يقولوا ليك مالك...
ان شاء خير شفقتنا عليك...زي ما بيعملوا معاي ناس كتار أحمد الله...
أقوم أشعر بأهمية أنو عندي أصحاب...
و أقول ليهم بعد داك و الله مافي حاجة...
بس الليلة الصباح واحد بنغالي لقاني بضحك و مبتسم قام أداني عين...
خلاني أحول التفكير و الموضوع...
صبحكم الله بالخير...
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: الرشيد بابكر)
|
قولو واحد
قولو إتنين
عتاب عتاب مشفر بي كود إستخباراتي لكل من
...، و ...، و ,,,,
Quote: عشان لما يتسنى ليك المشاركة تكون الكتابة سهلة...
حسه شوف زهير ده قاعد يغيب كتير كيف (وش مطنش)...
لكن لما يرجع بيكون متابع كل حاجة حتى بعر البرادو بتاعت منصور...
أنا البرادو دي فوتها ساكت لي منصور... |
خلو بالكم من الدقداق الجاي دا
Quote: و دي مناسبة نرسل تحيات لي زنوبة...
و بالمرة كمان لي ياسمين الشهيرة بي بطة...
الناس ديل انقطعوا مني ليهم زمن أظنهم محاربني...
لكن أنا كان حاربوني ما بحاربهم...و |
الغريبة كنت مفتكرو عايز مسافة مقدرة
لكن العطالة غيرت مفاهيمو و أصبح يحنن
Quote: و هنا بتجي حوبة الأصحاب...لازم يتسحملوك...
و كمان يقدروا ظروفك و يضربوا ليك تلفون يقولوا ليك مالك...
ان شاء خير شفقتنا عليك...زي ما بيعملوا معاي ناس كتار أحمد الله...
أقوم أشعر بأهمية أنو عندي أصحاب...
و أقول ليهم بعد داك و الله مافي حاجة... |
مش كان من الأفضل يورينا عمل شنو مع الحلاق الباكستاني و لا الهندي داك؟؟؟
Quote: بس الليلة الصباح واحد بنغالي لقاني بضحك و مبتسم قام أداني عين...
خلاني أحول التفكير و الموضوع... |
إذا كان التوقيع الجاي دا توقيع صاحب المداخلة
التوقيع الفوق داك شنو...
| Quote: صبحكم الله بالخير... |
المشكلة يا دوب نزلت العمل وما قادر أجمع!!!
لكن عندي مشكلة و إختلط علي بعر البرادو و بعر الفيل
إنتو قاصدين ياتو بعر؟؟؟
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: محمد آدم النور)
|
Quote: الغريبة كنت مفتكرو عايز مسافة مقدرة
لكن العطالة غيرت مفاهيمو و أصبح يحنن
|
ما اتغيرت مفاهيمي يا شقي الحال انت...
اتغيرت المسافات...
بقت رسالة SMS توصلني أحمد الله...
ما شاء الله تبارك الله و لا حولة و لا قوة الا بالله...
دي عشان العين...
ما تقوموا ترجعوني السلع تاني...
زمان قالوا جدي حاج مهدي أبو حاجة أمونة..كان محوط الأسرة كلها...
و محوط ليك البيوت...
الحرامي يجي للجيران و يفط بيوت آل حاج مهدي ديل...
يدوهم عين تقع في الزول الجمبهم...
حواطه شديده...
حسه الحصل لينا شنو ما بعرف...
تكون الصلاحية بتاعت الحواطة دي انتهت و لا شنو (وش مستغرب)...
الحلاق الهندي بحكي قصتو بعدين آخر الدوام...
من هنا لحدي آخر الدوام ما تشاغلني بالله...
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: ميسرة سيد أحمد)
|
بسم الله ما شاء الله عليكم
خلاص جلا جاكم ؟؟!!
اما انت يا حاج ياسر
فلا فتشت معجم ولا قريت لى قاموس
ياخى الزمن ده , الشمارات تجيك لغااااية عندك
كتبت نفس راس الموضوع على الحيطة بتاعتى فى وش الكتاب
قام واحد صحبى اسمو ياسر
كتبها لى
اعمل ليك شنو انا يعنى ؟؟!!!
* شفتوا كمان موضوع اسامينا
نفتح صفحة فاطمة
يعنى شنو يا ربى
ونحن بنقولا فاطنة لي شنو ؟؟
اسمى ده قالوا لى من اسماء الأفعال
يمين من قمت , لا امى لا ابوى قالوا لى سميناك كده عشان شنو
لو عاوزين تألفوا لى حاجة , اصلو ما عندى مانع
* بكتب اسمك على الحور العتيق
تكتب اسمى ع رمل الطريق
بكرة بتشتى الدنى
بيبقى اسمك يا حبيبى
واسمى بينمحى
(انها قسمة ضيزى )
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: الرشيد بابكر)
|
Quote: بيبقى اسمك يا حبيبى
واسمى بينمحى
(انها قسمة ضيزى ) |
منص ياحبيب ...
كدي شوف القسمة الضيزي الجد ما لعب ...
دي مسادير قيلت من امهات لأولادهم ...
الولد الأول ... امو زعلانه منو لانو مشي البندر ... وبقي مابصرف عليها ...
الولد المزمبع وديما طاب لاب توبو
فى البندر موكر وفوق كتفو جادع توبو
خلاهو الفريق بى نبقو بى لالوبو
بقى تغيان عديل ولبنو فايت روبو
كرب البنطلون خربانه ديك الزايله
ساكن تانى دور ونسى الحويطه المايله
يحول فى الرصيد ومس كول كمان ياداليه
نسوان الفريق قالن فلان ...
الولد الثاني ... وولد جارتها ... قاعد جمب امو ... وصحنهم واحد ...
الولد الركز فى الداره تب ما أتزحزح
واطيهو الجمر طول عمرو ماقال أح
النايحه الحزينه بى طلتو بتفرح
وفاى للعهود فى الجد هو مابمزح
جزاز للفقر وسيفك بسوى التح
أقدل فوق رقابن خلى الحريم تردح
========================
جلا ياولدنا ... كيفنك ...
الرشيد المطر ... وقف تعال ساي ...
محمد صديق ... جيب ود المهدي هنا ....
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: عبد الدائم سيد أحمد)
|
سؤال
إنتو منصور رجع من أوربا و لا لسع!!!!
غايتو زول لمن يكون مشتهي ليهو حاجة و يلقاها
زي البكون خرمان ليهو لي سيجارة برنجي
بس بعد نزول المطرة العصرية ديك
جملة إعتراضية- بالرغم من المطرة وقفت لكن على صاحب المظلو ينتظر إلى حين- إنتهت الجملة الإعتراضية
يعني مثلاً يشدو ليك سلك
و يقول ليك مشاتاااقوون
دي براها بتكون زي أردب طحنية
أما لمن يخشو معاك في مشاريع زي وكالة متخصصة للسفر والحج
معناها... عليك أن تبدأ في تكملة الطابق العاشر في عمارتك
أي زول السنة الجاية ماشي الحج... يسلمنا جوازو من هسة
الأماكن بتاعت الحج محدودة و محجوزة
بالمناسبة
العمارة تحولت بقدرة قادر من الخرطوم لأمدرمان ناحية الفتيحاب
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: محمد آدم النور)
|
اولاً ...صباح الخير بالليل...
اصلو الليل هجع
قامولو ناس...
منهم قام ومنهم ركع..
يا نجيلة جدعة الليل دي كيف معاك...
رشيد القوم طله ذي دي حلوة مش كده..
والله انا خايف كترة الطلات دي بعدين اجيب ليكم ( جلا ) والمعني في نفس الشاعر
تحياتي شديد قوي
عثمان إدارة
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: الرشيد بابكر)
|
| Quote: العمارة تحولت بقدرة قادر من الخرطوم لأمدرمان ناحية الفتيحاب |
انت مالك يا زول عماراتك دي محوله من مكان لي مكان...
خايف من العين و لا شنو...
لو كانت حواطة جدي حاج مهدي لسه صالحة...
كان شملناك معانا و برسوم مقدور عليها...
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: ميسرة سيد أحمد)
|
سلامات يا ناس
وصباحات التفاؤل
قريت كل الفات ...المرور الكتير بتاع (عثمان الجيلى شيخ محمد) يفرح
ويؤكد انو الدورة التانية حتكون مسخنة .
ماعدا مداخلات الريس ميسرة...كل المداخلات تأثرت بجنون المدعو جلا ..ما قدرت
اميز الحقيقى من المُتَخيل؟ حتى مسدار نجيلة الجميل فيهو شى من جنون جلا.
اقول ليكم حاجة انا جاى الحج.
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: محمد صديق)
|
قال الميكانيكي:
يا واقفة بين صبري
وتروس الفرملة
أنا بحكي ريدك للملأ
والجاني من بستم مشاعرك
بلفو طار بحكيبو لليل والخلا
و أنا بعذرك
وأوزن دركسون الصبر
وأضغط كلتش الأمنيات
لو ألحقك
يا الحنتا زي زيت رجوع
أسود من الشقا والدموع
@@@@@@@@@
مش احسن مما اجي فاضي .....
====================
عثمان ياحبيب ..
تعال بالليل ... تعال بالنهار
بس ... تعال ملان ...
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: ياسر نجيلة)
|
المداخلة دي كانت زمان ولم تحظ بتعليقاتكم
الظاهر كان جلا في الحج حينها.
كل أم ولها أسلوب في تدريس أبنائها
اللبنانيه
حبيب البي في ايدك فايف فنجرز ولو ماما أخذت فنجرين كم يتبقى؟
يالله لو عرفت بدي افسحك في مول الفلاجيو
المصرية
فتح مخك معاي لا افتحهولك بالجزمه حمارين + حمارين بساوي كم ياواد....
ماتغلبنيش كفاية أبوك
الفلسطينية..
يابا الله يرضالي عليك معك عشر ريالات
وأجاك واحد واطي وسرق منهم خمسه
كم ظلوا معك؟
والله لو بدرّس قرد كان فهم.. يلعن مخك يا كندره
العراقية
يا ابني ركز شوية وافتح مخك أكو 10 أشخاص إنفجرت بيهم
قنبلة مفخخة.. وماتو أربعة منهم، إشكد يبقون كول شكد يبقى منهم؟؟؟
من نامت عليك طابوكة انت وابوك بيوم واحد
واخلص من هاي العيشة الزفرة
السودانية
أنت يازفت خلى بالك معاى , عندنا عشرين جنيه و جات بتاعت النفايات
و شالت منهم عشرة جنية يكون باقى لينا كم؟ كراكة تخمك انت و المحلية
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: ميسرة سيد أحمد)
|
يا ريس الحاجات دي نزلوها آخر الدوام ياخي...
تخليني أقرقر كده في المكتب ياخي...
انت عايزهم يقولوا السودانيين ديل بتاعين قرقراب...
بعدين المداخلة دي ما شفتها و الا أكيد كنت اتذكرتها...
خايف اتهمك بالزهايمر يجي واحد ناطي يقول لي آآآي نزلها...
قلت أخير اقطعه في حشاي و أقول أنا بقيت ما بشوف...
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: ياسر نجيلة)
|
الريس الجميل التحيات ردووووم
حكاية تخفي بعض نساء الدول ما راكبا لي في راسي
عارفين السودانيين و أبو اليمن أولاد عم
لكن شايفك ما جبت سيرة ناس السعودية وعملت طناش نقول ما بيناتنا
ناس المغرب ما عرب و لا شنو؟؟؟
بلاش ناس المغرب و الدول المجاورة ليهم من ناحية الشرق
ناس الدراهم و السلاطين حسابهم كيف؟؟
بالمناسبة مراجعة الحساب مع البنات كتر على بت الشيخ
و قالت لي إعتبرني أمية و راجع براك لي بناتك
طبعاً إنتصار ما شليقة شلاقة الرشيد
قالت ليها يمة إنتي عليك القرآن حفظينا ليهو
ضحكت تحت تحت
و قلت الزولة دي قاعدة ترسل رسائل بين السطور
كان ما أخاف الكضب أقول قاصدة تقول إنتي الفكي بتاعنا
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: الرشيد بابكر)
|
Quote: بعدين المداخلة دي ما شفتها و الا أكيد كنت اتذكرتها...
خايف اتهمك بالزهايمر يجي واحد ناطي يقول لي آآآي نزلها... |
أنا متأكد نزلتها شوف ناس أبو الزوز
يعملوا ليك سيرش ويحددوا ليك موجودة في الميل رقم ؟
الظاهر الناس كلها كانت في الحج !!!
إنتو حتجونا حجاج متين ، بس ما يكون زي حجة نجيلة
مطالبين بكل العائلة ويكملوا حجتهم في جدة
وإلا لن تُعتمد حجتكم!
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: الرشيد بابكر)
|
فى ناس قالوا رجع
وناس كمان قالوا لا
الاكيدة بتلقاها عند ست بيته
هى غايتو قالت ما لاقياهو
انت عينك للناس قاعدين يكسروا تلج
ايوا تلج , تجى انت تكسر ليهم حطب
انت كسلا دى , تلج الله ده ما فيها ولا شنو ؟؟؟
عثمان الجيلى ؟؟ ده انت ولا مهكر يا زول ؟؟
كان ده ما انت , نشيل باسويردك نديهو للهكر طوالى
اما خاطرة الريس المعادة , فيا حلاتا , ويا حلاة الجابا كمان
السودانيين يسموا اولادهم تور الخلا , وتور شين , وتور الساب
يقولوا ليك السمحة نوارة فريقنا , تسأل من اسمها , تلقاهو ام ابوها
يعنى سموها ام ابوها , لأنهم زايغين من اسمها الحقيقى
تفتش على اسمها , تلقاهو نفيسة ولا خديجة
عليكم الله احلى ام ابوها , ولا نفيسة ؟؟؟
عشان كده , لو قالت لى ولدها ساعة المذاكرة قوم كده كراكة تخمك , انت وابوك
عداها العيب
* يا له من ميكانيكى ياحاج
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: منصور عبد الرازق)
|
لمن انت تكتب اسمى على (الحور العتيق )
واقوم انا ابادلك نفس المشاعر , ولكن على رمل الطريق
اكون بالغت اشد المبالغات زااااتو
علما بانى ما عارف الحور العتيق ده شنو
لكن باين كده والله اعلم , انو حاجة كده , زى استعمال قلم الشينى , غير القابل للمسح
على سبورة الأطفال الصغار
اها , سبورة الأطفال الصغار دى , ياها رمل الطريق زااااتو
تكتب فيها ساااااكت , وترجع تمسح
معظم الأسماء من النوع التانى
ليس من ناحية مبناها او معناها طبعا , ولكن من ناحية احساس الزول بى اسمه
وانا باكد على مفردة احساس دى , غض النظر عن معنى ومبنى الأسم الشايلنو
على فكرة , اعتقادى جازم , بأن حتى الآباء والأمهات
يكونون (تحت ضغط ما ) , عند تسميتهم لمواليدهم
فيما عدا اسماء التعبيد والتحميد , عشان نكون دقيقين ونمرق من جدل يمكن توقعه , فى الحتة دى بالذات
لأن ابنك او بنتك , مهما كان اسمه او اسمها , فهو عابد حامد , بشكل او آخر
يعنى مهند , برضو ياهو عبد الله , وحسام , ياهو زاتو محمد ولا احمد ولا حامد شاكر
لكن بعد ان عبدنا اله الكون , وسجلنا له الحمد والشكر ان بالسر او العلن
فما علاقة مهند وحسام بالسيف فى حياتنا , واعنى حياة صاحب الأسم , او صاحب التسمية كمان
انما هى اسماء سميتموها , لكن لا حسام ولا مهند , تمنوا ان يكونوا سيوفا ذات يوم
لكن , هل يتمنى الأب او الأم لأبنه ان يكون سيفا فى يوم من الأيام ؟؟؟
ام ان الأم تتمنى لأبنتها ان تكون (فاتنة ) او حتى (سهاما ) , عندما سمعت صرخة حياتها الأولى ؟؟؟
رايكم شنو ؟؟؟
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: الرشيد بابكر)
|
سلامات يا ناس
Quote: بعدين المداخلة دي ما شفتها و الا أكيد كنت اتذكرتها...
خايف اتهمك بالزهايمر يجي واحد ناطي يقول لي آآآي نزلها...
قلت أخير اقطعه في حشاي و أقول أنا بقيت ما بشوف... |
صدق انا ذاتى اول مرة اشوفا....
حقيقى جميلة ...والواحد لقى نفسو فطسان من الضحك ..وتواصلت مع
ضحكة قصيدة الميكانيكى.
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: محمد صديق)
|
Quote: علما بانى ما عارف الحور العتيق ده شنو
|
أنا عارفك عااااارفو لكن بتتغاتت ساكت...
قبل ما أجاوبك عن الحور...
انت مالك مع فيروز الأيام دي؟؟
تكلمني من سكات و لاأقوم أضرب تلفون حسه لي ست بيتك...
الحور هو نوع من الأشجار و التي يصل طولها الى ما يزيد عن 40 متر...
يحفر عليه العشاق القلوب و الأسماء و التواريخ..
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: الرشيد بابكر)
|
يعنى تخمينى طلع صاح ؟؟
شفتوا انا زول (خمان ) كيف ؟؟؟
ما قلت ليكم سبورة وقلم شينى غير قابل للمسح
طلعت اكتر من كده , حفر على ساق الأشجار عدييييل
ونحت كمان
لالالالالالالا
الأمر اصعب مما تخيلت كتير
القسمة عندى صارت (اضيز )
زول يحفر وينحت و وزول بس باصابعه يكتب على الرمل
اين العدل فى ذلك
* بسمعها كل يوم الصباح بدرى وانا مودى الأولاد المدرسة
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: الرشيد بابكر)
|
يعنى تخمينى طلع صاح ؟؟
شفتوا انا زول (خمان ) كيف ؟؟؟
ما قلت ليكم سبورة وقلم شينى غير قابل للمسح
طلعت اكتر من كده , حفر على ساق الأشجار عدييييل
ونحت كمان
لالالالالالالا
الأمر اصعب مما تخيلت كتير
القسمة عندى صارت (اضيز )
زول يحفر وينحت و وزول بس باصابعه يكتب على الرمل
اين العدل فى ذلك
* بسمعها كل يوم الصباح بدرى وانا مودى الأولاد المدرسة
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: منصور عبد الرازق)
|
التحية لكم جميعا
وخالص الامنيات للاخوة (الشباب) وكل سنة وهم يرفلون في ثياب الصحة والعافية
ومبروك المولود اخونا عمر نملة
ومبروك وتقبل الله يا نجيلة وكان عشمنا نكون معاك ولكن المنادي لم ينادي
وخالص الدعوات بتمام الشفاء للوالد جبريل ونسأل الله ان يدثره بثوب الصحة ةالعافية
الشديد القوي بس الخلانا لا متابعين ولا مستمتعين ....
والشديد القوي دا كان جلا عرفو بكملوا علينا ساكت
عشان كدة حمدوا في بطنوا ...
لكن شوقنا لا يحده حد ... نقراء لانو الفاتنا كتير
وكان حيين بنتلاقا
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: جلال عثمان)
|
صبحكم الله بالخير
حزنت كثيرا لسقوط عشرون قتيلا في ميدان التحرير...
أفهم أن يسقط هذا العدد أو أكثر منه من أجل الانعتاق من الظلم...
لكن هل يجب أن يسقط كل هذا العدد من أجل ارساء دعائم الثورة..
لعمري انه عدد كبير و سيكون كبيرا حتى و ان سقط قتيل واحد...
مالها مصر تقتل بنوها...
فهم لا ينقصم حبهم لبلدهم..
و هذا الحب لبلدهم يحتم عليهم أن يحبوا بعضهم البعض...
هل ان الشر الذي كان يجثم على صدورهم طوال تلك السنين لم يكن يجثم على صدورهم فحسب...
بل انه كان يجثم على شرور أكبر منه و أشد...
أم أن هناك شر و شيطان أكبر يريد أن يعيد عجلة الزمن الى الوراء....
التحية هذا الصباح للحبيب جلال عثمان...
عودا حميدا يا جلجل...
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: زهير الزناتي)
|
طبعا ولدنا الجزار لما سمع الميكانيكي قال شعر، شالتو الهاشمية
فقال جزار:
يا طاعمة زي كبدة ابل
بالشطة والليمون شفا
أنا بي وراك سبت القطيع
ضل الدريب وعليك حفا
يا كاسرة بي فرار هواك
أضلعي وظروفي المؤسفة
@@@@@@@@@
لا تدخل الحوش ويدك فاضية ...
ان شاء الله تجيب معاك كيس ليمون ...
سامعني ياالزناتي ...
انتو "الزناتي" دي منصور ماشافا ولا شنو ..
غايتو ..قسم ... وحظوظ ...
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: محمد عيد)
|
اما اسم زهير , نحنا لا عاوزين تبرير ليهو ولا حاجة كان داير تدينا تبرير , ورينا قصة الزناتى دى شنو ؟؟ ينوبك ثواب
* وما نحنا زاااااتنا بنفتش عليهو زيك
بقى يجينا يرفع البوست بى مداخلة فاضية كمان
يا كوتش , الزول ده اديهو العين الحمرة
ولو عاوز مساعدة كمان
نحن معاك لغاااية وش الكتاب
يا ربى نقفلوا ليهو ونرتاح ؟؟؟!!!
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: منصور عبد الرازق)
|
سلام كبير اوى لاجدع ناس
معليش عندى ظروف لا متابعة ولا مستمتعة بس مشتاقة ليكم كتير وعارفاكم مشتاقين لى
ما زى ما قال لى ود الزناتى انتى اتنسيتى خلاص
واظنو كان داير يشيل باسويردى كمان
المهم هاكم فاتحتكم
والولدوليهو مبروك
والحجة انشاء الله يسبعا
خالتى جرسة شوية حجت مع ولدها السنة دى قلت ليها انشاء الله تسبعيها
فقالت لى بسرعة ولا اتنيها
المهم يا شباب من قبل رمضان عندى خالتى مريضة ونسبة لعدم انجابها فاحنا عيالها
طلع فى النهاية مرض خبيث وخبيث جدا
نفسيا ما كنت قادرة حتى اتواصل مع ناس بيتنا بس كلو مكتوب ومسطر
ادو معاى ربنا يخفف عليها ويكفيها شر الالم
اما يا حوفى ضربنى بكى وسبقنى اشتكى
انتى الفاتحة لينا ورافعة قزاز
التقول راكبة برادو
بس بقول ليك ما بنخاصمك بس نجارى طبعك يا جميل
لكم الود لو غبت او جيت
بت النوبة
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: زينب التجاني)
|
السادة الزقازيقاب
مساء الخير
وكل عام وانتم بخير
يا جمال فارح
كل سنة وانت طيب
يا جلا طلة حلوة والله العظيم
يا احمد اسماعيل التلغرافات بتاعتك عينة
عمنا جبريل
ربنا يقومك بالسلامة
اسمي
على منو ما عارف لكن عندنا عمنا المرحوم
محي الدين فرج الله كان كل ما يشوفني
يقول لي (المبارك شيخ الظهر شوفني جنيت والله تسدر )
يعني ممكن يكون على المبارك شيخ الظهر
دي قصة اسمي
خالد اخوي على خالد عمي
مرتضى ما عارف على منو؟
المرحوم اخوي بابكر على عمي بابكر
الفاتح ما عارف على منو
وكذلك عبد المنعم
سميت اولادي الاول على
والد زوجتي المرحوم احمد محمد جادين
والثاني على والدي محمد عبدالله جادين
تخريمة بالاسماء
الي اسماء المدن والاماكن
يقال ان الجزيرة ابا بلد
قبيلة الشلك وكانت مقر المك ايام السلطنة الزرقاء
وفي مرة
ارسل حاكم سنار الي المك ان يحضر اليه في سنار
فالمك قال لرسول السللطان انه ابى الذهاب
فاصبح اسمها ابا لعدم ذهاب المك يعني المك ابا
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: الرشيد بابكر)
|
جلال ... جلة ...
زنوبة بت النوبة ...
مبارك جادين ... كدي شوف لينا الزناتي دي من أي صعيد في مصر ...
آل ايه ... آل من كسلا ... ومال جلا ومهند الطاهر من وين ...
يعني انتو مافهمتو مداخلاتو الفاضية دي ... آآآآي ما حركات صعايدة مصريين ساي ...
منص ازيدك ... ولا وقع ليك ...
وعيد سعيد لود فارح ...
خلونا نشوف المكوجي والنجار قالو شنو ...
قال مكوجي:
يا كاوية قلبي قبل قميصي
رشيت لياقتو وانكوى
يا ريتني لو أغسل دواخلي من الهوى
زي عمة بيضا أشرها
صابون هواك غسل النوى
ومشابك عيونك سحبت من عيوني الكري
@@@@@@@@@
قال نجار:
مسمار ودقيتي
في خشب الليالي المحزنة
منشار هواك
قطع الصلات الممكنة
يا أبلكاش وفورمايكة
أو تيك خشب الجنوب
البي الانفصال سلخ قليبي بفارة مصوقرة
@@@@@@@@@
الرشيد ... ياخوي
ست بيتك قاعده تقرأ شعرك ده ...
زمان كنت بعيد منها ... بس قلبها كان تقيل عليك ..
هسع لو استمريت تكتب زي كلامك ده ...
ياهو الماشفناك مشيت الشغل الجديد تاني ... ...
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: ياسر نجيلة)
|
عمر مديد و صحة حديد يا جيمى فارح ...
زبوبة بركة بالشوفة وكل الامنيات و الدعوات الطيبة
ان يمن الله بشفاء خالتك العزيزة ...
يا ود جادين تعرف دنقلا سموها كده ليه .؟
يا نجيلة بتاع البوهية ( النقاش ) قال :
حبيبى فنتاستك وبضرب بهيه بوماستيك ...
وايام ازمة الرغيف فى التمنينيات البنات كان بغنو لبتاع الفرن
ما همانى ما دام حبيبى فــــــــرانى يا ناس ...
وللمــكنيكى
ما بفوتو .... كان تموتو ....
كان تمتو المكنيكى بيه زيتـــــــــــــو .....
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: ياسر نجيلة)
|
يسم الله
الناس الحمر مبروووك عليكم الكاس
بالنسبة لجمال فارح كل سنة و إنت طيب
بس ما عارف هل هو زي عيد مبارك جادين السنة الفاتت أم لا
رغم أن عيد ميلاد ود جادين كان مع العيد و الشربوت
ود خلانا طاشين شبكة و ما حضرنا البارتي معاهو
غايتو نتمنى أن نحتفل معاهو السنة الجاية في ياي
بت النوبة
ألف سلامة لخالتك
و إنشاءالله أجر و عافية و ربنا يشفيها من سقمها و يصبرها عليه
مبارك جادين
يعني لو رزقت بي بنتين
الأولى على إسم أم زوجتك
و التانية على إسم أمك
أو قول ولدين
الأول على إسم جد بت الشيخ
و الثاني على إسم جدك
وهنا ربما يكون الإلتقاء
وهذه متوالية هندسية
وهو المطلوب إثباته
فك الإرتباط دا يااااااخ
Quote: ست بيتك قاعده تقرأ شعرك ده ...
زمان كنت بعيد منها ... بس قلبها كان تقيل عليك ..
هسع لو استمريت تكتب زي كلامك ده ...
ياهو الماشفناك مشيت الشغل الجديد تاني |
يعني حيكون عندو إنعكاك في البطين الأيمن؟؟؟
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: محمد آدم النور)
|
Quote: اما يا حوفى ضربنى بكى وسبقنى اشتكى
انتى الفاتحة لينا ورافعة قزاز
التقول راكبة برادو
بس بقول ليك ما بنخاصمك بس نجارى طبعك يا جميل
|
عودة نهارية بعد زحمة الصباح للترحاب بزوبا...
و ربنا يعافي خالتك و يشفيها من كل داء...
الزول الأداك الموجز ده يا زوبا فاطي سطر...
بيكون أداك ليهو على عجالة لأني بعرفه بيحب التفاصيل...
المهم أنا السبقت و اشتكيت و ليست حوفي...
لك التحية مرة أخرى و عودا حميدا...
Quote: ست بيتك قاعده تقرأ شعرك ده ...
زمان كنت بعيد منها ... بس قلبها كان تقيل عليك ..
هسع لو استمريت تكتب زي كلامك ده ...
ياهو الماشفناك مشيت الشغل الجديد تاني |
يا حااااااااج...
الفتنة نائمة...
أوع تكون مع حجك المستعجل و قروشو الشوية (وش أخدر) تكون نسيت ليك جميرات...
| Quote: يعني حيكون عندو إنعكاك في البطين الأيمن؟؟؟ |
أنا كنت قايل الأيسر ده محل الميرندا...
أتاريهو الأيمن...
و الله الواحد يدخل البوست ده يطلع عالم عديل كده...
أقل حاجه تطلع بيها الهندسة الفراغية بتاعت الزناتي...
| |
|
|
|
|
|
|
|
|
|
Re: ناس الزقازيق ... أجدع ناس (4) .. (Re: الرشيد بابكر)
|
صباح الخير...
وصباح الخير لي كل ناس الحوش...
و ها الصباح... قبل ميسرة ... وعبد الدائم...ورشيد بابكر
صباح الخير وصباح الورد والياسمين...
زينب التجاني ...اشرقت الانوار بي طلتك...
والف والف سلامة لي خالتك ان شاء الله ربنا يكتب ليها عاجل الشفاء..
زهير الزناتي...ممكن تشرح لينا درس في الهندسة الفراغية...
بالله ياناس هلال ومريخ ...دي كورة يتحدثوا عنها...نحن وين والكورة وين...
والله قمة الكورة السودانية ..احسن منها دافواري الاحياء...
مرة اخري الله يسعد صباحكم
عثمان إدارة
| |
|
|
|
|
|
|
| |
عبد الدائم سيد أحمد
محمد صديق
ياسر نجيلة
الرشيد بابكر
Hatim Gubara
ميسرة سيد أحمد
زهير الزناتي
محمد عيد
منصور عبد الرازق
أحمد إسماعيل
نجاة حوفي
محمد آدم النور
جلال عثمان
زينب التجاني
فيس بوك
تويتر
انستقرام
يوتيوب
بنتيريست