|
Re: ناس الزقازيق ... أجدع ناس (4) .. (Re: زهير الزناتي)
|
الف مبروك للابن سلمان معتصم جعفر بنجاحه من رابعة الى خامسة طب بتقدير والاف التبريكات للناجحين فى الشهادة السودانية عهود موسى عيسى محاسن عمر بت زينب التجانى محمد طارق عبدالجليل ابن صفية مساعد
وعقبال لسعاد بت امانى دفع الله الشهادة الثانوية السعودية فى مقبل الايام
| |
|
|
|
|
|
|
Re: ناس الزقازيق ... أجدع ناس (4) .. (Re: عبد الدائم سيد أحمد)
|
رزق الاخ موسي الراجل ... ببنت ... انضمت لاختيها براء وولاء ... والمشاورات جارية لاختيار الاسم ... اها يا جماعة ساعدوا الراجل في الاسم .. والسماية الجمعة البعد الجاية ... ونحن علي راس وفد عالي من الدمام لحضور المناسبة... الف مبروك يا موسي ... وانشاء الله تتربي في عزكم ... ويجعلها من العاملات المنااضلات ... يلا عايزين اقتراحات للاسم .. وابوها جاييكم بعد شوية بالدرب
| |
|
|
|
|
|
|
Re: ناس الزقازيق ... أجدع ناس (4) .. (Re: طارق جبريل)
|
مليون مبروك لعهود ومحاسن ومحمد... وعقبال الدكتوراه..
عمنا موسى الراجل.. مبروك البنيه.. ربنا يسلمها ويحفظها ليكم.. وتتربى في عزكم إن شاء الله..
النضيف.. ما جبت سيره حمار الفيس بوك يعني..
أما عن نفسي.. فليس لي حمار يشغلني عن بت شيخي.. فهي دنياي.. ودا الحاله ما بتعرف عربي..
| |
|
|
|
|
|
|
Re: ناس الزقازيق ... أجدع ناس (4) .. (Re: عبد الدائم سيد أحمد)
|
سلام للجميع اللهم لك الحمد والشكر بسلامه الزوجه بعد عمليه ولاده قيصريه ناجحه ومولوده حلوه ابتهج بمقدمها براءه و ولاء وهى بصحه جيده وربنا يجعلها من المستورات و الباره بوالديها والشكر لكم جميعا الاخوه الاعزاء والدعوه لكم جميعا بتشريفنا الجمعه بعد القادمه انشاء الله
| |
|
|
|
|
|
|
Re: ناس الزقازيق ... أجدع ناس (4) .. (Re: محمد عيد)
|
قصة قصيرة جداً
بحثت مطولاً عن بورد ناس الزقازيق اجدع ناس في الصفحة الاولى ولم أجده سمعت أنيناً وبكاءً
قلبت الصفحة لقيتو في نهاية الصفحة الثانية
ونظر الي بزعل فرفعته إلى بداية الصفحة الاولى في مكانه الطبيعي
| |
|
|
|
|
|
|
Re: ناس الزقازيق ... أجدع ناس (4) .. (Re: محمد عيد)
|
أصبحنا وأصبح الملك لله رب العالمين اللهم نسألك خير هذا اليوم وخير مابعـهده
موسى الراجل الف مبروك المولودة تتربى في عزكم وألف جمد الله على سلامة والدتها ألف مبروك النجاح لسلمان معتصم جعفر ومحمد طارق عبد الجليل إبن صفية مساعد وإن شاء الله دائما أيامكم ملاح وأفراح
| |
|
|
|
|
|
|
Re: ناس الزقازيق ... أجدع ناس (4) .. (Re: زهير الزناتي)
|
Quote: يا الشادي وصلتوا وين في موضوع الحمير .... |
أخانا الزناتي :
.... والحمار ( تقنياً ) عند أخانا محمد بن العيد هو كل ما يشتت إنتباهك وتركيزك عن معاونة سيدة البيت في كل أمور بيتها
وقد إختار الكثير من الزملاء مابين النت والكشاتين وغيرها حميرا تلهيهم عن مساندة ومعاضدة سيدة البيت
وبما أنك ليس منا معشر ( مربي الحمير ) فلا تتطاول وتسأل عن حميرنا فأنت خير معين لسيدة بيتك فما شاء الله
مقشاشتك خضرة ورويانة وفوطك مربوطة ومحزمة
مالك ومال الحمير خلي الحمير لي أسيادها
| |
|
|
|
|
|
|
Re: ناس الزقازيق ... أجدع ناس (4) .. (Re: كمال الشادي)
|
صباح الخير ،،، يا وجوه الخير
يا من إليه ترفع الشكوى يا عالم السر والنجوى يا سريع الحساب يا كريم يا وهاب لك الحمد ذكراً وشكراً ،،،،،
=================================
وتتواصل التبريكات .. محمد طارق عبد الجليل (صفية مساعد) ومولودك يا موسى الراجل , يتربى فى عزك ان شاء الله والدكتور سلمان معتصم جعفر
| |
|
|
|
|
|
|
Re: ناس الزقازيق ... أجدع ناس (4) .. (Re: ميسرة سيد أحمد)
|
سلام وتحية للجميع
أجمل الأماني وأحلى التهاني لأبنائنا الناجحين وانشاء الله ربنا يديم عليكم فرحة النجاح والتفوق ودائما في أعلى المراتب وربنا يخلي ليكم آبهاتكم وامهاتكم الرائعين ديل ويقر أعينهم بكم آمين يارب .....
أخونا موسى الراجل مبروك البنية وانشاء الله تربى في عزكم وربنا يجعلها من الصالحات والناجحات ومبروك عليك ضمنت الجنة ....
| |
|
|
|
|
|
|
Re: ناس الزقازيق ... أجدع ناس (4) .. (Re: عبد القادر بابكر)
|
اجمل التهاني والتبريكات لكل الابناء الناجحين والناجحات والى مزيد من التفوق ان شاء الله
والتهاني موصولة لموسى الراجل بالبنية جعلها الله من الصالحات -------
اها قلتوا لي موضوع الحمير دا شنو ... الحمد لله من اول امس مساء لا حمير ولا غنم طلقيت ساكت يا قول الوالد "حفظه الله ورعاه" حيث تضامنا مع سنيري وصاحبي النضيف غادرتني في حفظ الله ورعايته ست بيتي وملائكتها في اجازة قد تطول وقد تقصر (حسب المصاريف) متوجهين نحو دوحة العرب ... ومنها الى السودان الشقيق .... وانا صابر محتسب ... اتشوي بنار الرياض و "الفراق"
مش ذي ناس .... قال شنو ... قال نفسى في تيمان قال
| |
|
|
|
|
|
|
Re: ناس الزقازيق ... أجدع ناس (4) .. (Re: جلال عثمان)
|
يا جلال ربنا يكتب سلامة بت الشيخ وملائكتها
يا جماعة نفسي ألبس لي شِدة ولا تموت تخلي وأديها مغغغغغغغغة لامن اصابعيني تطقطق وبعداك اتشطف واجي ماشي والموية في الشِدة تقول جلغ جُلغ جُلغ
ياخي الجزمة دي زي القبُر
| |
|
|
|
|
|
|
Re: ناس الزقازيق ... أجدع ناس (4) .. (Re: طارق جبريل)
|
سلام و تحية لأجدع ناس ..
و أطيب التهانئ و التبريكات لأبناء الزقازيقاب من الناجحين و الناجحات و لزملائنا آبائهم و أمهاتهم و عقبال دوام التوفيق و النجاحات و التهنئة موصولة لكل من : عهود موسى عيسى محاسن عمر محمد عمر ـ (زينب التيجانى ) محمد طارق عبد الجليل ـ (صفية مساعد) و تهنئه خاصة للدكتور . سلمان معتصم جعفر بمناسبة النجاح و عقبال الأستاذية ..
و ألف حمداً لله على سلامة المدام و مبارك لكم مقدم الأمورة يا موسى الراجل , و حفظها الله و أخواتها و حفظكم من كل سوء و يربوا فى عزكم ان شاء الله ..
| |
|
|
|
|
|
|
Re: ناس الزقازيق ... أجدع ناس (4) .. (Re: طارق جبريل)
|
يا جبرييلا كيفنك ابوي الله يديك الفي مرادك ... وياناس الداخل بالله واحد شدة سريع لي جبرييلا دا خلو الزول يبل شوقوا .... لكن يا الحبيب الشئ دي مي دايرالا قوز ... غايتو البحر ممكن يجيب الفرق والله يا طارق الواحد قاعد يحس بالامان مع مداخلاتك السمحة ... انا غايتو سأل ربي يرجعني البلد بين يوم وليلة ... ---------- عبدالدائم : ربنا ان شاء الله يحقق امنياتك ... وانت رجل صبور ياخ ولادة التيمان بتقدر عليها . لانو عندي خالى ساكن جاري وعرفت معاه يعني شنو يجوك تيمان في الغربة دي والله خالى دا وشوف عيني "حتى الرضيع" جربوا معاهم غايتو ما ارتاح الا لما تعدوا الاربعة سنوات
| |
|
|
|
|
|
|
Re: ناس الزقازيق ... أجدع ناس (4) .. (Re: طارق جبريل)
|
تموت تخلى ده كان موضة ايام كنا فى الثانوى العام ( المتوسط ) مذكر عندى ولد خالتى معاى فى نفس المدرسة وساكن قريب من السوق الشعبى كلمتو يجيب لى واحد واديتو مقاس رجلى اها ود خالتنا ده بشيل كتبو فى شنطة دبلوماسية ( الزمن داك برضو كان موضة ) جانى فى الفصل الساعة الفتح ليك الشطة الدبلوماسية قدامى انا قايلو داير يدينى دولارات ولا بريد DHL الزول طلع ليك تموت تخلى الفصل كلو قعد يضحك
هسه انت كمان جاي تضحك الناس علينا ... اشطف بالجزمة بنديك العذر ...
| |
|
|
|
|
|
|
Re: ناس الزقازيق ... أجدع ناس (4) .. (Re: عبد الدائم سيد أحمد)
|
Quote: الحبيبين كيفنكم.. جيت مارق من درس العصر في المتوسط (الثانوي العام- الإعداد «للحناكيش»).. شايل كتيباتي في جلدايي ألت بلاستيك ومبسوط أدوني عشرين في الانجليزي.. ماشي اتقدل في الفسحة ألت مربع 12 في الامتداد.. شويتين يا الحبان جن بنيات الفريق اللااااافوق مننا ماشات وينضاحكن.. طالعات من معهد «الأمل» بعد ما كمَلِن حصَصِن.. ماشات يتهامسِن ويتبسمن.. جن مارات من فوقي.. الساعة الشفتة في عيونها وشافت فيني ودنقرت.. ووكتين اتبسمت وقامن كدي الوجنات غتسن.. والضفيري تتلولح من تحت الطرحة وفيها خرابات علي الجُلَلْ ويحيدي حمرا والتاني صفرا.. وعيني دقشت الخرابة المن لاااااقدام وهاجرنو بالكراريس وهو يتمايل من هني لاااا هني علي المنقايات الصغار وشايلاهن زيفي.. والعجب وكتين وقع منها قلم الرصاص ودنقرت شالتو.. وحاتكم يا الحبيبين النار انطلقت فوقي.. ورجليني و«التموت تخلى» بقن يغتسن في التراب ويقومن زي الباخرة في نص البحر وقامت عاصفة وتشوف فيها تغتس وتقوم.. وبقيت كلي انكرش زي الصايدني البُرجُم.. ووكتين وصلن جنب الشارع الساكنة فيهو وبقت تودع في صحباتها.. انا اصلي وِدِر ضومة ضومة.. دخلت الجلدايي بي الكراريس بين محسني والبنطلون.. وختيت ايدي في نصي ووقفت أشوف فيهن.. وأصلي بقيت أرجف كلي زي الصايداني الوٍردي.. وأعاين فيها لامن جرَتْ السلك أليل الباب.. ووكتين جات تقفل الباب رفعت راسها وشافت فيني ودنقرت وسدت الباب.. مع سدة الباب ديك القالت (كَرَب) ديك وأنا قلبي دة بقى يناتل... والكراريس وقعن في عِبِي وبقيت ماني قادر علي المشي.. وأتاريهو قلم الرصاص يا دابي بريتو قبل أمرق وبقى يطاعن فيني من تحت.. والشارع مليان ناس وماني قادر أدخل إيدي أمرقو.. وعلي العلي لابسلي لباس زي البيسووهن النسوان ديلك من باقي دمورية المرتبة.. والخرابة هاجرني في نصي... وأمي رحمها الله سوتلو لستكين من أبو قرش داك.. والعٍُقدة ألت اللستك كبيري وهاجراني في محسني ... وأصلو إن كان لي محل اللستك بقى زي الجدول أليل المويي.. وواحد من الكراريس الدبوس أليلو مرق ومع طعين قلم الرصاص أصلي بقيت ماشي علي الولد الطهروهوا كبيييييييييير وتلقاهو ماسك العراقي لاااقدام منو.. انتو قالولكم كان هاميني.. وحاتكم اشيل واتذكر في الوجنات وأبلع في ريقي.. وصلت البيت... وجري علي الحمام.. أتقولعت ومرقت الكراريس وقلم الرصاص.. إن كان ألقالكم الجسم كله مطعن وكله حبوب.. بالله التقول نمت في الحوش في بورتسودان وكبسني الباعوض.. جيت مارق مفَشِق ولبست العراقي والسروال وقعدت في الطربيزي الكبيري.. وكان عندي امتحان أليل دين.. نان أنا حفظت شي.. وحاتكم بس افتح كتاب الدين كدي أشوف الضفيري ألتا بين السطور.. جبتلي ورقة ألت فلسكاب وبقيت أكتبلها في جواب.. وكانت عا########ي كلمة ((الشامخة)) وبقيت افكر أدخلها في الجواب أليل الريدي دة.. وطوالي كتبت: حبيبتي.. إن مشاعري الشامخة.. و.... وبقيت أهضرب وأفسي في جواب الجن دة.. وأصابعيني ديل وهن يكتبن بالله علي إبرة مكنة الخياطة.. ينزلن ويطلعن.. ربكم رب الخير أصبحت الدنيي وأدونا الامتحان وما أظن جبت فيهو أكتر من 2 من عشرين.. ووكتين جاء العصر دة لامن روحي مرقت.. بس شفتهن جن طالعات وهي معاهن.. مشيت قدامن ورميت الجواب وفِرِد جرية للبيت.. ولي يوم الليلي ماني عارف قرت الجواب ولا لا |
بعد الأرشفة بننزلها في الحوش العام
| |
|
|
|
|
|
|
Re: ناس الزقازيق ... أجدع ناس (4) .. (Re: طارق جبريل)
|
مساكم الله بالخير
التحية لكم جميعا... و لأبو الزوز و ديدو على السؤال... و لحبيب الروح منصور على التلفون.. شوية انشغال في العمل و سفر بين أبو ظبي و السلع...
باركت لي زوبا بالتلفون... و كذلك لي موسى عيسى... باقي لي أبارك... لي محمد طارق عبد الجليل ابن الدكتورة صفية مساعد.... والمولود لي موسى الراجل , يتربى فى عزك ان شاء الله.... والدكتور سلمان معتصم جعفر ابن الريس معتصم...
جاييكم كان الله سهل...بس أصبروا علي شوية...
| |
|
|
|
|
|
|
Re: ناس الزقازيق ... أجدع ناس (4) .. (Re: الرشيد بابكر)
|
أخانا الذي بالسلع.. حمدلله على السلامه.. قلقتنا.. قلنا زوبه جرتك علي هناك.. عملت لينا شنو في فيزت المغرب..
بيجو يا غشيم.. الجواب بيدوهو للبت في يدها.. والا لو ما لقيت طريقه.. تديهو لي واحده من صاحباتها توصلو ليها.. وذلك أضعف الإيمان..
| |
|
|
|
|
|
|
Re: ناس الزقازيق ... أجدع ناس (4) .. (Re: محمد عيد)
|
يا طارق عارف اني معجب بطلحة ده ... ياخي زول كتاب ... وموقفه واضح في كل القضايا لا يلف يا يدور ... كمان زول قصة حياته براها حكاية ... كل مرة استغرب ليه طلحه ده ما شيوعي ... ياخي عليك الله تحياتي ليهو ... طبعاً انا محتار في حكاية انه بولندا وليتوانيا ديل ما بيدو تاشيرة للسودانيين ... وحكومتنا القفة دي ما سالت في الموضوع ... لانها اكيد بيكون عندها يد في المصيبة دي ونحن ما عارفين .... بعدين حكاية جوبا دي خلاص بعد يوم 9 يوليو ده بح ... بعرف ناس كتار سافروا عبر جوبا وهم ممنوعين من السفر من الخرطوم ... علي العموم بقترح حكاية اسمرا الدخول لارتريا بالبطاقة الشخصية لا جوازات ... لا كمبيوترات ... لا تاشيرات ومنها اسبوع سكسكة في اسمرا لمن اراد ....
محمد عيد قصص جميلة ..... والاخيرة دي لا تدعو الا للابتسام رغم اني ضد فكرة القصة القصيرة جداً دي ... شايف فيها نوع من الاستسهال والاستهبال .. بس خليتني اتابع القصص بشكل جدي ويمكن اغير راي منها ...
ود جبارة والله حكاية بولندا دي ممكن يكون سبب الخواجات ديل اصلهم ناس متلككين ...واحتمال يكون حرضهم عادل عبد العاطي هاهاهاهاهاها
| |
|
|
|
|
|
|
Re: ناس الزقازيق ... أجدع ناس (4) .. (Re: زهير الزناتي)
|
Quote: فكرة القصة القصيرة جداً دي ... شايف فيها نوع من الاستسهال والاستهبال .. بس خليتني اتابع القصص بشكل جدي ويمكن اغير راي منها ... |
ابو الزوز ..
انا ما داير اتفلسف عليك ولا أخمك ...
باعتبارك صحفى معترف به من قبل الدولة السودانية ووزارة اعلامها ووزراءها العديدين ...
يعنى ما عندنا طريقة ...
لكن فى صناعة الصحافة هناك ثوابت معروفة واساسية واضحة للعيان ..
مثلا هناك كاتب يتناول موضوعا ما فى مقال طويل لصفحة كاملة او عدة صفحات ..
بينما كاتب آخر يمكن ان يتناول نفس الموضوع فى عمود صحفى محدود الكلمات ...
وثالث يمكن ان يعالج نفس الموضوع فى كاريكاتير ...
ولا يتوقف نجاح المعالجة للموضوع فى شكل التناول ( مقال - عمود او حتى كاريكاتير ... )
لذا فالقصة القصيرة جدا هى ايصال معنى او تناول لموضوع ما بشكل اكثر مباشرة ..
ولها مدارس عديده سواء عربية او غربية ...
| |
|
|
|
|
|
|
Re: ناس الزقازيق ... أجدع ناس (4) .. (Re: محمد عيد)
|
يا اهلى الطيبين مساكم الله بالخيرالعافية. اولا الف مبروك لكل اولادنا وبناتنا الحلوين الناجحين وربنا يخليهم ودايما رافعين راسنا.. مبروك المولودة الجديدة وتتربى فى عزك.. نحن الايام دى مهيصين شديد فى حضرةالمديرة الكبيرة شوش واولادها الحلوين.. ونسة لذيذة واجترار للذكريات الجميلة...سوف نستعين بصديق شاطر لانزال الصور... وراجعين ليكم لو ربنا سهل وامد فى الاجال..
دمتم سالمين
| |
|
|
|
|
|
|
Re: ناس الزقازيق ... أجدع ناس (4) .. (Re: نجاة حوفي)
|
صباح الخير يا وجوه الخير
دعاء تيسير الأمور: "اللهم يامسهل الشديد و يا ملين الحديد و يا منجز الوعيد .... و يا من هو كل يوم في أمرجديد أخرجني من حلق الضيق إلي أوسع الطريق بك أدفع ما لا أطيق و لا حول ولا قوة إلا بالله العلي العظيم ، يارب ضاقت بي السبل فمن لي سواك يفرجها " ... قال رسول الله صلي الله عليه و سلم :"من قالها و علمها للناس أذهب الله كربه و أطال فرحه
| |
|
|
|
|
|
|
Re: ناس الزقازيق ... أجدع ناس (4) .. (Re: كمال الشادي)
|
الناس دي مشت وين ....
امبارح استمتعت بكمال الشادي علي الهواء مباشرة المناسبة شنو ما عرفت ... بس كان في حفلة شغالة في الرياض بيغني فيها الشادي ... ناس حلوة واكيد البيحضروا لي كمال الشادي كلهم ناس حلوين ... اتصلوا علي وسمعت اغاني رهيبة ... والله يا ود الشادي ربنا يديك العمر والصحة ... كنت في اللحظة مع سامي عبد الوهاب الوجيه طرف الجبيل ... اتفقنا انه الشادي ده لو كان اهتم شوية بموهبته دي كان الليلة في عالم تاني ... من فناني الدرجة الاولي في السودان ... وناس فلان وعلان ديلك القابضين الجو اليومين ديل كان قعدوا كنب .... بس كويس من فترة لفترة نستنتع بهذا الفن الجميل .... شكراً يا عفاف وشكراً رحاب وشكراً يا شادي القوم .... انشاء الله يا رشدي ما تكون اتغاتت وما رديت علي التلفون ...
| |
|
|
|
|
|
|
Re: ناس الزقازيق ... أجدع ناس (4) .. (Re: زهير الزناتي)
|
شكرا يا زهير الزناتي على الكلام الحلو ده في حقي انت وسامي عبد الوهاب
الناس الكنت معاهم امبارح والله العظيم ما بعرفهم يا زهير لكن لي فترة طويلة جدا بسمع عنهم وكلهم تقريبا كلموني عشان انضم ليهم
الجمعية السودانية للثقافة والفنون وهم نفس المجموعة التي رتبت لحفل الفنان ابو عركي البخيث في الرياض وم نفس المجموعة الكانت تحتضن مصطفي سيد احمد عند زياراته للرياض
وتضم هذه المجموعة الشاعر نصار الحاج المسجل معنا في البورد والذي اوردت له عفاف بوست كامل في بوست ناس الزقازيق
كانت المجموعة تودع احد افرادها وهو الشاعر عصام الفكي رجل يقول الشعر حتى تقشعر مما تسمع من الطرب الجميل
قبل ذهابي الى مكان الحفل اتصل بي منظم الحفل ليقول لي اننا جهزنا لك مفاجأة احضرنا لك صديق مدثر
يا الله
الرجل انا اعرفه منذ زمن ولكني لم اقدم له نفسي ابدا بأية صفة فنية
والراجل كبر في السن
عندما طلب مني ان اغني ضنين الوعد طلبت ان يجلس بجاوري وامامي مباشرة
وفعلا ( تكلوهو ) لغاية ما وصل عندي وجلس بجواري مباشرة
قصدت ان اغني له شخصيا ضنين الوعد وفاجأني الرجل وانا اغني ضنين الوعد ببكاء جميل رأيت الدمع يلمع من عينيه وفوق خدية بكي الرجل وأطربني بكلمات رائعة من الثناء على غنائي لرائعته ضنين الوعد وعند نهاية الحفل قال لي تعالي في البيت عندي لك مفاجأة عندي لك قصيدة تلحنها وتغنيها انت
لي عودة
| |
|
|
|
|
|
|
Re: ناس الزقازيق ... أجدع ناس (4) .. (Re: كمال الشادي)
|
يا زهير ويا سامي شكرا مرة تانية
Quote: تفقنا انه الشادي ده لو كان اهتم شوية بموهبته دي كان الليلة في عالم تاني ... من فناني الدرجة الاولي في السودان ... وناس فلان وعلان ديلك القابضين الجو اليومين ديل كان قعدوا كنب |
من تأثير غنائي على الناس اعرف مقداري وارجو الا اكون مغرورا لو قلت لك ان هناك مساحة ومقعد شاغر في ساحة الغناء السوداني يمكن لاي شخص أن يملاوه فقط يشترط فيه غير الموافصات الفنية في الصوت والموهبة
ان يكون ملتزما بقضايا وطنه أن يكون مهموما بتطوير نفسه ان يكون محترما في شخصه ان يكون محترما في سلوكه أن يكون محترما لاسرته ولعلاقاته أن لا يكون عضوا في مجتمعات الفن الليلية من قعدات وسكر وخلافه
هذا الشخص في السودان حسب علمي البسيط هو يتجسد في شخص الفنان ابو عركي البخيث فقط هذا الشخص في السودان كان حسب يتجسد في شخص الفنان الراحل مصطفي سيد احمد هذا الشخص في السودان حسب علمي يتجسد في شخص الفنان يوسف الموصلي هذا الشخص في السودان وحسب علمي يحتاج الفن ومجتمع الفن في السودان منه الكثير من الاشخاص
وحيث ان غناء أبوعركي البخيث لا يفهمه كل الناس الا الخاصة وحيث ان غناء مصطفي سيد احمد ليس لكل الناس وحيث ان موسيقى وغناء يوسف الموصلي صعب على العامة هاجر به بعيدا
فإن هذا المكان لا يزال يتسع لأكثر من شخص يحترم قيم المجتمع السوداني الجميلة وتكون عنده الموهبة العالية
ولكن حسب تقديري الشخصي الثمن غالي جدا فهي معركة عمر وانا اخترت معركتي غير الفن
معركة الفن يجب ان تكون مثلما يفعل عركي اليوم
تصور عركي محارب أ ن يغني في اجهزة الاعلام السودانية لاكثر من 17 سنة ويوسف هاجر بفنه الراقي إلى آخر الدنيا
هذه معركة صعبة العوم ضد تيار الركاكة في المجتمع ومحاربة كل القيم السيئة بالكلمات والغناء الراقي وإحتمالات الهجرة والمقاطعات و .. الخ داخل الوطن
ليست المسألة يا زهير مسألة موهبة فقط انا املك الموهبة والحمد لله ولكني غير قادر على مجاراة تيارات الركاكة الحالية في السودان اعرف ان صوتي اجمل واكثر مقدرة من كثيرين في السودان يملكون الملايين التي لن استطيع ان اجمعها حتى في الغربة ولكني أملك قيما لن اتنازل عنها لاكون فنانا مشهورا أو فنانا غنيا يملك الفلوس
يكفيني ما أحسه من طرب وإنتشاء وانا اغني لاناس اعرفهم ويعرفوني يحترموني وأحترمهم يكفيني ان اغني لجمع مثل جمع البارحة
ويكفيني ان اغني لجمع أنت فيه زهير وانت فيه سامي
| |
|
|
|
|
|
|
Re: ناس الزقازيق ... أجدع ناس (4) .. (Re: سامي جمال)
|
جمعتكم مباركة
لم أشأ أن تكون عودتي الى البوست في يوم الجمعة... و ذلك لأنه يوم لي فيه الكثير من الأنشطة الدينية والعائلية... و لكني خشيت أن يمتد غيابي ليوم آخر فيعتبر غيابي هجرا... و ان كان هجر الحبيب يؤلم... فان هجر (الحمار) كذلك يؤلم... و لكن رغم غيابي الذي يعد طويلا بمقياسي أنا... الا أن السؤال عني لم يرقى للمستوى الذي كنت أتوقعه... فقلت (حماري) البي حالي ماهو داري...يا (حماري)... ثم أخذت أبحث عن الأعذار و المبررات لمن نحب... ربما لأنه في نفس الوقت الذي غبت فيه.. غاب آخرون و بأسٍباب ربما تكون مشابهة... أو حتى غير مشابهة... و لكنها كانت وراء غيابهم القسري... و سببت لهم تدهور في حالة المود... أما الذين بشروا بالاتصال من خلال هذا البوست...لم يتصلوا... كنت عايز أقول ليهم أسمع كلامك أسدأك... لكن قلت أحسن منها أقول ليهم الفيكم اتعرفت...
| |
|
|
|
|
|
|
Re: ناس الزقازيق ... أجدع ناس (4) .. (Re: طارق جبريل)
|
صباح ا لخير ،،، يا وجوه الخير
جمعتكم مباركة ،،،،،،،،،
شوية فرفشة -تحليلات محشش-
كثيرون يدخلون غرفة الإنعاش و قليل. يخرجون منها أحياء ... و لهذا سمّوها ( إن ٠٠٠ عاش) أقنعني الصراحة
كثيرون من يحالون إلى التقاعد ...وبذلك يسمى الواحد منهم “ متقاعد
ومن شدة الفراغ والتفكير والحسرة يموت .. لهذا السبب يسمى “ مت ... قاعد" “ كبير يالمحشش الصراحة اقنعني
وما زال المحششون محتارين .!!!!! . . . . هل تقويم الأسنان هجري ولا ميلادي ??
| |
|
|
|
|
|
|
Re: ناس الزقازيق ... أجدع ناس (4) .. (Re: ميسرة سيد أحمد)
|
Quote: هل تقويم الأسنان هجري ولا ميلادي ??
|
يحول السؤال لسلمان معتصم جعفر... و اذا ما جاوب حوله لي جلا... لأني أنا والله محتار في التقويم الذي يتبعه جلا... مره قال لي أنا يوم الأحد الجاي حتلقاني في البوست كل يوم... لحدي يومنا ده ما ظهر... ما عارف الما جاء منو... جلا و لا يو م الأحد... و لا اكون امكن أنا الما جيت...
| |
|
|
|
|
|
|
Re: ناس الزقازيق ... أجدع ناس (4) .. (Re: ميسرة سيد أحمد)
|
Quote: لو قلت لك ان هناك مساحة ومقعد شاغر في ساحة الغناء السوداني يمكن لاي شخص أن يملاوه فقط يشترط فيه غير الموافصات الفنية في الصوت والموهبة
ان يكون ملتزما بقضايا وطنه أن يكون مهموما بتطوير نفسه ان يكون محترما في شخصه ان يكون محترما في سلوكه أن يكون محترما لاسرته ولعلاقاته أن لا يكون عضوا في مجتمعات الفن الليلية من قعدات وسكر وخلافه
هذا الشخص في السودان حسب علمي البسيط هو يتجسد في شخص الفنان ابو عركي البخيث فقط هذا الشخص في السودان كان حسب يتجسد في شخص الفنان الراحل مصطفي سيد احمد هذا الشخص في السودان حسب علمي يتجسد في شخص الفنان يوسف الموصلي هذا الشخص في السودان وحسب علمي يحتاج الفن ومجتمع الفن في السودان منه الكثير من الاشخاص |
آمل ألا يعدي هذا الكلام ويمر مرور الكرام!!!!!!!!!!!!!!!!!!!
ولكني أختلاف مع شقيقي كمال الشادي في عدم نشر موهبته
على الملآ وجعل الناس يتذوقون شئ من الشهد المكنون!!!!
أطلب من الجميع المداخلة والتعليق لأن الشادي ليس ملك نفسه فقط
فهو دره زقازيقية يجب نشر شذاها للجميع
| |
|
|
|
|
|
|
Re: ناس الزقازيق ... أجدع ناس (4) .. (Re: زهير الزناتي)
|
أصبحنا وأصبح الملك لله رب العالمين ربنا آتنا في الدنيا حسنة وفي الآخرة حسنة وقنا عذاب النار ، يا عـزيز يا غـفار وقضى ربك الا تعبدوا إلا اياه وبالوالدين إحسانا اللهم نسألك الرحمة والمغفرة والصحة والعافية لهما اللهم أرزقنا رضاهـم ونعوذ بك من عـقوقهم
| |
|
|
|
|
|
|
Re: ناس الزقازيق ... أجدع ناس (4) .. (Re: ميسرة سيد أحمد)
|
صباحكم زين ودعوات مقبوله وفي ميزان حسناتكم ( ميسره ، احمد اسماعيل) سامى جمال منور والله بس الشغله ما ضلع ولا كيمان بحاول ارسل ليك الراس بس جهز الفلفل الحب وقرن اخضر بس ما تنسى اخونا حسن ابوعلى وناس ود الجعلى يعنى الراس تلته ولا كتلته
| |
|
|
|
|
|
|
Re: ناس الزقازيق ... أجدع ناس (4) .. (Re: محمد عيد)
|
سلامات يا ناس
السلام عليكم جميعاً ....
زهير ...شكراً على الترجمة.
شكراً ميسرة على اختيار طعامة غنا الشادى وشكراً للشادى الفنّان.
Quote: و لكن رغم غيابي الذي يعد طويلا بمقياسي أنا... الا أن السؤال عني لم يرقى للمستوى الذي كنت أتوقعه... فقلت (حماري) البي حالي ماهو داري...يا (حماري)... ثم أخذت أبحث عن الأعذار و المبررات لمن نحب...
|
يا زول السّلع ...سلام وشوق
تعرف الناس ديل كلهم ضاربم تشويش مخليهم (سُكارى وما هم بسُكارى)
تغيب ما تغيب انت معاهم وما معاهم ...
تجى ما تجى انت جيت وما جيت ...
| |
|
|
|
|
|
|
Re: ناس الزقازيق ... أجدع ناس (4) .. (Re: محمد صديق)
|
صبحكم الله بالخير
أولا... شكرا يا ديدو على تلفونك اللذيذ... الذي لا يضاهيه شيء غير قعدتي اليوم مع ست بيتي و أولادي...
يا شادي مبااااااالغة عديل كده... شكر يا ريس على اتحافنا بالغناء الجميل ده...
Quote: يا زول السّلع ...سلام وشوق
تعرف الناس ديل كلهم ضاربم تشويش مخليهم (سُكارى وما هم بسُكارى)
تغيب ما تغيب انت معاهم وما معاهم ...
تجى ما تجى انت جيت وما جيت ... |
يا كوتش سلامات... أشواق بالكوم و الردوم... و الله يا كوتش كلامك صاح... الناس دي جنت و لا شنو ما بعرف... و الله أنا ما بعرف ألوم الناس... لكن تاني من يوم الليلة الومهم ليك جنس لوم... الناس ديل طلعوا أي كلام يا راجل.... و العجب حبيبي...
| |
|
|
|
|
|
|
Re: ناس الزقازيق ... أجدع ناس (4) .. (Re: ميسرة سيد أحمد)
|
ميسرة تتذكر كان في مقولة مصرية مشهورة في فيلم أو في مسلسل ما عارف
الكبير كبير والنص نص نص نص والصغير ما نعرفوش
إنت اثبت إنو الكبير كبير يا باشا
اللمة ما عندك يا ميسرة كيفك سامي والله مشتاقين ليك ما شاء الله عليك يا ميسرة لماتك دائما عامرة ودائما بي ناس حلوين زي سامي الله يديم المحبة ويخلي بيتك دائما عامر يا ريس
| |
|
|
|
|
|
|
Re: ناس الزقازيق ... أجدع ناس (4) .. (Re: ميسرة سيد أحمد)
|
التحيه للعزيز سامي وهو يزين ايام جده ولانه سامي ديدو والريس ماادونا خبر وصولو جده وحرمونا التلاقي لكن رغم ذلك ظل هوانا باقي *الامنيات لاسرته باجازه سعيده على امل لقاءه في المرات الجايه والشكر للريس وعبد الدايم بما يقومون به من تواصل --لكم مودتي
| |
|
|
|
|
|
|
Re: ناس الزقازيق ... أجدع ناس (4) .. (Re: عمر المهدى)
|
انتا آآآآ ود المهدى الكنتاكى ده بينفع مع ناس السكرى ....
والله يا عمر طلعنا من البيت بعد المغرب ومشينا دوار المعارض لعربية سامى ورجعنا لميسرة ذى 10 ونص ومشينا اتعشينا ... والوقت كان متأخر رجع سامى صباح اليوم للدمام وبجينا يوم الاربعاء وابقى خليك جاهز للمة وصور عم جــــــــودة
| |
|
|
|
|
|
|
Re: ناس الزقازيق ... أجدع ناس (4) .. (Re: ميسرة سيد أحمد)
|
تحية لأجدع ناس
وتحية خاصة للأخوان: الريّس ميسرة والأخت منى وأسرتهما الجميلة والنضيف جدا عبد الدائم والأخ الجميل سامي جمال يومين بالرغم من كل الظروف المعاكسة كانا جميلين والتحية لكل جدعان جدة ونشوفكم إن شاء الله خلال أيام كان ربنا سهّل وأمورنا ظبطت مع (الكفيل)
______________
التهنئة لأخونا موسى الراجل بالمولودة
_____________
وكيفك يا كمال الشادي... واله إبداع شديد وإن شاء الله تزول كل الظروف البتمنعك من الغناء بشكل مستمر
______
جلجل يا حبيب... والله أنا قربت أكون هزلول 2011... لكن مااااااااااااااااااا ظبطت
| |
|
|
|
|
|
|
Re: ناس الزقازيق ... أجدع ناس (4) .. (Re: محمد آدم النور)
|
Quote: والتحية لكل جدعان جدة ونشوفكم إن شاء الله خلال أيام كان ربنا سهّل وأمورنا ظبطت مع (الكفيل) |
سمسم لك اجمل التحايا ...
والمعذرة ان لم تسنح لنا الفرصة بلقاك ...
بس النضيف اتلوم .. يعنى وانتو ماشين حراج السيارات كان ممكن يمر على ونتلاقى ....
عموما نحن فى انتظارك هذا الاسبوع بمشيئة المولى ...
Quote: إذن إعتبروني لسع ما جيت |
يا ســـرى والله عاذرنك ...
بس انت خلص موضوع ابييى وبعدين أفضى لينا ..!!
| |
|
|
|
|
|
|
Re: ناس الزقازيق ... أجدع ناس (4) .. (Re: سامي عبد الوهاب إدريس)
|
الحياة الزوجية ليست كرر وأعد وخلاص خلافات الزوجين هي بهارات الحياة الزوجية بالإضافة إلى بعض الشمار الأخضر الطازج ، وبدون هذه الخلافات حتكون الحياة رتيبة لأنها سوف تسير في إتجاه واحد ( كرر وأعد) بلا تغيير ، من المفيد للأزواج السعداء أن يتشاجروا ويختلفوا ، بالمشاجرة تكون العلاقة صحية جدا لأن العلاقة القوية بينهما تعتمد على قدرتهما على إدارة خلافاتهما دون السماح لها بتدمير الحب والإحترام المتبادل ، ولا شك أن تعدد الخلافات يجعل هناك تفاهم بين الزوجين بشرط وجود الحب بينهما لأنه سيجعل كل منهما يقدم بعض التنازلات ولا يتعمد كل منهما إهانة الآخر. وبمرور السنوات بين الزوجين تختفي المشكلات بسبب مشغوليات الحياة وظهور الأبناء في الساحة مما يتطلب نوعا من التعقل وبالتالي وجود مساحة أكبر للتفاهم والقضاء على جميع الخلافات. قلت أشاغل منصور بهذه المداخل عسى ولعله يبين ويبيّن ، زمان عندنا واحد بتاع مشاكل كان سألته الله قال بقولك؟ كنا بنسميه جقو جاب نار اما منصور حيكون سالوه جاب الإبداع
| |
|
|
|
|
|
|
Re: ناس الزقازيق ... أجدع ناس (4) .. (Re: أحمد إسماعيل)
|
التحية و التجلة ليك يا أبوحميد الحياة الزوجية بالنسبة لمنصور كرر و أعد يوم واحد ما قال أنا مختلف مع بت الشيخ أو ست بيني كما يدعي هو أو الزولة الإسمها بت النوبة ديك أيضاً ينطبق كرر و أعد لكثيرون و من غير ذكر أسماء (رش وكل خميس عايز تلفون و مسافة مقدرة حتى يصل بت شيخو و التي هي بدورها تنظره بفارق الصبر وشنو كدا ماعارف و أبو الزوز صاحب المكنسة الشهيرة و تقسيم اليوتي مع ست بينو و الذي هو جوار رش و لا يحتاج للعب ود الشادي الخشن.......وكثيرون هم بيننا) أنا بالنسبة لي برضو كرر و أعد ...لكن في مسألة الإختلاف الإختلاف بتاع يوم الليلة هو نفسو بتاع الإسبوع الفات ياهو نفسو بتاع السنة الفاتت يعني تعدد الخلافات دي ما قاعد تجينا
Quote: إدارة خلافاتهما دون السماح لها بتدمير الحب والإحترام المتبادل |
صحبي خاشي في الكلام دا؟؟؟؟؟؟؟؟
حاجة كدا: رمضان كريم.... غايتو كان ما أخاف الكضب أقول رمضان خش في العضم
| |
|
|
|
|
|
|
Re: ناس الزقازيق ... أجدع ناس (4) .. (Re: أحمد إسماعيل)
|
التحية لأعزائي و إخوتي الطيبين الجدعان حقيقي مشتاق ليكم كتير وربنا يجمعنا بيكم إنشاء الله شكر خاص للريس ميسرة على هذه الهدية الجميلة والله إبداع كبير من أحد عمالقة الزقازيق الأستاذ المرهف كمال الشادي وقد إندهشت عندما سمعت صوت كمال وهو يتغنى للراحل مصطفى وكان أداؤه للأغنية بمنتهى الإبداع والتعمق لم أسمع صوت الشادي منذ أن كنا في الزقازيق حيث كان يتحفنا بأغنيات الكابلي ومحمد ميرغني وغيرهم وكان صوته جميلاً جداً ولكنه الآن صار أجمل وقد تطور كثيراً كما قال الموسيقار الدكتور الموصلي وهو أكثر دراية منا كمستمعين عاديين لانفهم في الأصوات كثيراً إلى الأمام دوماً أخونا كمال الشادي ونتمنى أن نرى ناس الزقازيق دائماً في المقدمة يحققون أعلى النجاحات لكم الشكر جميعاً ونتمنى التوفيق للجميع
| |
|
|
|
|
|
|
Re: ناس الزقازيق ... أجدع ناس (4) .. (Re: محمد صديق)
|
الحبيب عمر هواري كيفك يا غالي والله يديك العافية
Quote: والله إبداع كبير من أحد عمالقة الزقازيق الأستاذ المرهف كمال الشادي وقد إندهشت عندما سمعت صوت كمال وهو يتغنى للراحل مصطفى وكان أداؤه للأغنية بمنتهى الإبداع والتعمق
|
شكرا كتير لي كلامك الجميل في حقي وأتمني أن أكون عند حسن ظن ناس الزقازيق كلهم أول حاجة وبعدين الناس الباقين كلهم حقيقي كلامك أفرحني جدا
إستجابة لاقتراح الاخ الرشيد بابكر ان شاء الله قريب راح أفتح بوست في المنبر العام بتاعنا ( ناس الزقازيق ) وانزل فيهو مجموعة من الاغاني بصوتي انتظرني
| |
|
|
|
|
|
|
Re: ناس الزقازيق ... أجدع ناس (4) .. (Re: طارق جبريل)
|
الحبيب طارق جبريل تسلم يا خي وانشاء الله تشوف البوست في المنبر العام على طلبك قريب ان شاء الله
لكن قبل كل شيء السؤال ليك ولكل الاحباب اعرف لي الزول الانا متصور معاهو ده منو ؟
ودي الصورة الثانية
يا سيدي الراجل ده عم صديق
عرفتو ؟؟؟ صديق منو ؟
شوف يا طارق الراجل ده يستاهل تختو مع العقد الفريد بتاعك الكان معاك في المغرب بقيادة المرحوم الطيب صالح الراجل ده يتساهل تتعرف بيهو يا طارق وكل الناس الهنا
ده صديق مدثر شاعر يا ضنين الوعد في ليلة جميلة لجمعية الثقافة والفنون السودانية بالرياض تمت دعوتي للغناء وتمت دعوة هذا القامة لسماع ضنين الوعد مني
أجلسته بجوار حتى تكون الاغنية له وحده عندما سالت منه دمعتنا خفيفتان لم اصدق ما رأيت
يا أخي رجل رهيف وحساس بدرجة راقية جدا
اسعدني جدا ثناءه الكثير على غنائي
وبعدها مسك المايك ( كمافي الصورة ) وبدأ يحكي بدون حدود وبدون تركيز
من ضمن ما قال
اقسم بالله الكابلي ما غنا أحسن من ضنين الوحد حقتي دي
تعرفوا ( موجهاً كلامه لكل الحضور ) لمن كابلي غنا ضنين الوعد وردي غار جدا وما قدر يقعد
جاني وقالي تكتب لي حاجة أفظع وأقوى من ضنين الوعد
وفعلا كتبت ليهو عاد الحبيب فعادت الي احلى الليالي وكان الكاسب الرئيسي هو الشعب السوداني ليستمتع بمثل هذه الغيرة وهذا التنافس الرائع بين وردي وكابلي
كانت ليلة ولا الف ليلة
لي عودة
| |
|
|
|
|
|
|
Re: ناس الزقازيق ... أجدع ناس (4) .. (Re: كمال الشادي)
|
حكيت للعم صديق مدثر عن الزقازيق وناس الزقازيق وكيف أننا كلنا بنحبو لدرجة ماطبيعية وإن اغنيتو صارت رمز لينا جيل كامل من الشباب كان يتغنى بضنين الوعد ما صدق
راح أحكي ليكم حكاية غريبة حكاية حفلة غنيت فيها ضنين الوعد المكان : الزقازيق - مسرح سينما قصر الثقافة عدد العازفين أكثر من 25 عازف ّ!!! المسرح مليء للاخر عدد السودانين الحضور 3 اشخاص فقط هم ميسرة منى عزه عباس على
والباقين ؟؟
الباقين كلهم كانو مصريين ؟
تتذكر الحفلة دي يا ميسرة ؟
| |
|
|
|
|
|
|
Re: ناس الزقازيق ... أجدع ناس (4) .. (Re: كمال الشادي)
|
Quote: و أبو الزوز صاحب المكنسة الشهيرة و تقسيم اليوتي مع ست بينو
|
يا جلا ياسيد يا جيد حكاية ابو الزوز والمكنسة دي فيها تزوير ياخي ابو الزوز والشنب الكبير أكيد هناك ميار واخوتها تاني البوديه للمكنسة والعدة شنو ، لكن الراجيهو أكثر من المكنسة شايفو بدأ يفتح ليه دفاتر يسجل وقال الحساب ولد مع الابنـاء
| |
|
|
|
|
|
|
Re: ناس الزقازيق ... أجدع ناس (4) .. (Re: أحمد إسماعيل)
|
صديق مدثر/ وردى
الحبيب العائد _________ عاد الحبيب فعادت روحى وعاد شبابى ياشوق مالك ؟ دعنى أما كفاك عذابى؟ لقد شربت دموعى اما سئمت شرابى؟ ***** عاد الحبيب فعادت إلىَّ أحلى الليالى ذكراه يقدح ناراً ووجده فى إشتعال رويته بدموعى وصنته بخلالى وماظفرت بوصل ولاانا عنه لاهى ***** عاد الحبيب فأهدى لكل قلب سلام أهدى العيون بريقاً أهدى الثغور إبتساما فكيف ينسى فؤاداً أهدى إليه الغرام وكيف ينسى محباً أمسى يذوب هياماً ***** زدنى صدوداً فإنى عشقت دنيا عذابى وأرحم سواى فقلبى راهب المحراب إن زادك الحسن تيهاً فاسأل طيور الروابى سلها تجبك بأنى بثثتها كل مابى قد صاغت الوجد لحناً ووقعته ببابى
| |
|
|
|
|
|
|
Re: ناس الزقازيق ... أجدع ناس (4) .. (Re: كمال الشادي)
|
تعرف يا احمد اسماعيل تعجبني فيك براءتك دي ... ما زي اولاد دفعتك موسي عيسي والمدعو جلا ....
يا كمال يا شادي ... سلامات ... برضو اغنية وردي ما زي اغنية الكابلي ... ضنين الوعد من عيون الغناء السوداني والحبيب العائد لا يعرفها سوي القليليين ..
يحكي لي عمك محجوب شريف ... عندما وجدت معه شخص يطلب منه قصيدة لتابين احد اصدقاء محجوب شريف الاقربيين ... اعتذر له بانه لا يعرف يقول القصيدة حسب الطلب وانما تاتي هكذا ... وقال له ان الدوش يظل من اقرب الناس الي نفسه واعز اصدقائه حينما توفي لم يستطيع ان يرثاه ... ولكن حينما توفي علي المك الذي لا تربطه به صلة سوي الهم العام ... نعاه بقصيدة ود باب السنط والدكة والنفاج *** والحوش الوسيع للساكنين افواج *** واللمة التي ربت جنا المحتاج*** والنار الدقش والريكة جنب الصاج *** الشاي باللبن براده لابس تاج *** صينته الدهب كر كش كبابي زجاج*** والسكسك المنضوم*** حول الجبينه نجوم والفنجرية تقوم تقهوج الحجاج**** طق طرق يابن القهوة كيييف ومزااااج*** خلي النعدل الراس ونحصل الترماج وهي من اغاني عقد الجلاد الجميلة وقد لا يعرف الكثيرين بانها قيلت في رثاء الاديب العلامة علي المك ..
ثم ذكر لي بانه لم يستطع ان ينعي فاروق كدودة اقرب اصدقائه وزميل زنازين المعتقلات لفترات طويلة .. واكثر الذين زاملوه في المعتقل .... ولكن حينما توفي عبد الكريم ميرغني الذي ايضاً لا تربطه به علاقة صداقة وانما علاقات العمل العام نعاه بقصيدة :
يابا مع السلامة يا سكة سلامة في الحزن المطير يا كالنخلة هامة قامة واستقامة هيبة مع البساطة اصدق ما يكون راحة ايديك تماماً متل الضفتين ضلك كم ترامى حضناً لليتامى خبزاً للذين هم لا يملكون بنفس البساطة والهمس الحنون ترحل يا حبيبي من باب الحياة لباب المنون روحك كالحمامة بترفرف هناك كم سيرة وسريرا من حولك ضراك والناس الذين خليتم وراك وعيونم حزينة بتبلل ثراك ابواب المدينة بتسلم عليك والشارع يتاوق يتنفس هواك يا حليلك حليلك يا حليل الحكاوي تتونس كانك يوم ما كنت ناوي تجمع لم تفرق بين الناس تساوي نارك ما بتحرق ما بتشد تلاوي ما بتحب تفرق من جيبك تداوي الحلم الجماعي والعدل اجتماعي والروح السماوي والحب الكبير في الزمن المكندك والحزن الاضافي جينا نقول نفرق نجي نلقاه مافي لا سافر مشرق لافتران وغافي وين عمي البطرق جواي القوافي يا كرسيه وسريرو هل ما زلت دافي
يا مرتبتو امكن في مكتبتو قاعد يقرا وزهنو صافي يا تلك الترامس وينو الصوتو هامس كالمترار يساسق يمشي كما الحفيف كم في الذهن عالق ثرثرة المعالق والشاي اللطيف تصطف الكبابي اجمل من صبايا بينات الروابي والضل الوريف احمر زاهي باهي يلفت انتباهي هل سكر زيادة ام سكر خفيف ينده للبنية يديها الحلاوة والخاطر يطيب يدخل جنو منو محبوب الشقاوة يستنى النصيب الدفو والنداوة السنا والعبير كالغزلان هناك في الوادي الخصيب حيث الموية عذبة والغصن الرطيب كم تحت المخدة اكتر من مودة للجنا والغريب عش وعشب اخضر جدول من حليب يابا ابوي يا يابا الشمس البتطلع بلت منو ريقا والنجمة البتسطع فيه تشوف بريقا الندى في حركتو يطفيها الحريقة ننهل من بركتو زي شيخ الطريقة شاييهو وطرقتو والايدي الصديقة يلا نسد فرقتو حب الناس درقتو يا موت لو تركتو مننا قد سرقتو كنا نقول ده وقتو لكنك حقيقة النفاجو فاتح ما بين دين ودين نفحة محمدية دفئاً كالضريح ميضنة كم تلالي جيداً في اليالي مجداً في الاعالي مريم والمسيح قلباً نبضو واصل ما بين جيل جيل ما بين كان وحاصل او ما قد يكون ما بتشوف فواصل الا الذكريات وآلام المفاصل بعضاً من شجون يابا مع السلامة يا سكة سلامة في الحزن المطير
التي لحنها مؤخرا شمت وتغنيها ايضاً فرقة عقد الجلاد .... وذكر بان شقيقته الوحيدة حينما توفت لم يستطع ان ينعاها ولكنه نعي ابن مرتضي الغالي حينما صعقته الكهرباء بقصيدة غير متوفرة لي الآن .. وهي ايضاً من قصائده الجميلة ...
ثم حكي قصة اغنية ... ودي في المرة الجاية
| |
|
|
|
|
|
|
Re: ناس الزقازيق ... أجدع ناس (4) .. (Re: زهير الزناتي)
|
الحبيب زهير الزناتي
كلامك صاح على المقارنة بين ضنين الوعد و عاد الحبيب
الغناء في الاصل مخاطبة للاحساس
في فنان حسا بالقصيدة من نفسو ولحنا وده كابلي مع ضنين الوعد
يبدو لي انها لمن شغلت المثقفين في الوكت داك قام وردي غار حسب كام صديق مدثر شخصيا
يعني الدافع الاساسي لوردي هو الغيرة من كابلي
في الحالة دي ( فنيا) إختلف المعيار
كابلي لحن لانو حب الكلمات وحساهاه ووردي لحن لانو غار من كابلي
مستحيييييييييييييييييييييييل اللحن التاني يطلع احسن من الاول
حتى صديق مدثر قالي انا ما عاجبني كوراك الالات الموسيقية في عاد الحبيب خصوصا آلات النفخ ( ودي وجهة نظر انا اقولها من سنين طويلة ) إنو آلات النفخ تستخدم في التنبيه العام ( العسكري ) وغير العسكري لا يمكن تستخدم في تنبيه الحبيب
رغم عن ذلك انا بعتبر وردي هرم وهرم كبير كمان لو كان وردي ده لبناني والله مصري كان زمان بقى اشهر من ام كلثوم لانه فعلا اعظم من ام كلثوم
ام كلثوم ما عندها غير صوتها الجميل حتى حسن الاختيار عندها تولى اشخاص كثيرين تعليمها له
لكن وردي مدرسة الحان رسمت خارطة الوجدان السوداني
في جية اوبو عركي البخيت الاخيرة للرياض قعدت معاهو قعدة راس انا وهو في حضور شخصين آخرين كانا يستمعان فقط
قلت ليهو اغنية بوعدك يا ذاتي يا اقرب قريبة رسمت وجدان الشعب السوداني في المناسبة دي
يعني اي زول خاطب بيفكر يغازل خطيبتو بيقول ليها كلام ابو عركي البخيت القالو لي عفاف حمد النيل لمن خطبها وهو بوعدك يا ذاتي يا اقرب قريبة
وردي رسم وجدان الشعب السودان لمن نفكر في الاحتفال بالاستقلال مافي شي يعبر عن فرحنا اكتر من اليوم نرفع راية استقلالنا وقيس عليها كل الحان وردي
خروج وعودة
| |
|
|
|
|
|
|
Re: ناس الزقازيق ... أجدع ناس (4) .. (Re: كمال الشادي)
|
طيب علي ذكر وردي اواصل ليك مع حكاوي عمك محجوب شريف .... قال في اواخر ايام نميري جاتو مجموعة من طلاب هندسة الخرطوم وكان عندهم كورال خطير وشهير في الوقت داك ... قال ليهو عايزين لينا اغنية نلحنها تعبر عن الراهن السياسي ... وقالو انهم اشتغلوا القصيدة بتاعت هاشم صديق البيقول في جزء منها .... والخلاص في وحدة يسارك .... مع احترامي ليكم ولهاشم صديق مافي تغيير بيجي الا بوحدة كل الشعب السوداني ... وانا ما بقدر اكتب اغنية حسب الطلب ... واذا ما كتبت حاجة في اي وقت ما عندي مانع اديكم ليها ... مرت ثلاثة شهور علي الكلام ده او اربعة ... وقال لي يوم قاعدين في بيت نسابته آل الجزولي في امدرمان القديمة جنب الشهداء ... وفي نص الونسة قال كمال الجزولي ... امدرمان دي كانت بيوتها كبيرها حدادي مدادي .... عمك طوالي طلع وما استاذن مشي قعد في القبر في الشهداء وكتب واحدة من اجمل الاغاني الوطنية ...
حنبنيهو البنحلم بيهو يوماتى وطن شامخ وطن عاتى وطن خيّر ديمقراطي وطن مالك زمام أمرو ومتوهج لهب جمرو وطن غالى نجومو تلالي فى العالي إرادة سيادة حريّة مكان الفرد تتقدم قيادتنا الجماعيّة مكان السجنِ مستشفى مكان المنفى كليّة مكان الأسرى ورديّة مكان الحسرة أغنيّة مكان الطلقة عصفورة تحلق حول نافورة تمازج شُفّع الروضة حنبنيهو البنحلم بيهو يوماتى وطن للسلم أجنحتو ضدّ الحرب أسلحتو عدد مافوق وما تحتو مدد للأرض محتلة سند للإيدو ملويّة حنبنيهو البنحلم بيهو يوماتى وطن حدّادي مدّادي ما بنبنيهو فرّادي ولا بالضجه فى الرادي ولا الخطب الحماسيّة وطن بالفيهو نتساوى نحلم.. نقرا ..نتداوى مساكن كهربا ومويه تحتنا الظلمة تتهاوى وتطلع شمس مقهورة بخط الشعب ممهورة تخلي الدنيا مبهورة إرادة وحدة شعبيّة
| |
|
|
|
|
|
|
Re: ناس الزقازيق ... أجدع ناس (4) .. (Re: جلال عثمان)
|
Quote: تعرف يا احمد اسماعيل تعجبني فيك براءتك دي ... ما زي اولاد دفعتك موسي عيسي والمدعو جلا ....
|
يا أبو الزوز 00الحقانية والإعتدال بتاع عمك محجوب شريف 000 مش بالله هي مطلبنا عشان كدة المثل بقول (أمشي عدل يحتار فيك عدوك 000 وقشة ماتعتريك)
| |
|
|
|
|
|
|
|