ولمن فاتهم الاستماع .....

Quote: جورج تذكر قزاز ( البيجو ) و نحن راجعين من المنصورة ، و الصباح خلاص ديكو صاح ، القزاز كان تماما مغطى بالتلج ، يعطي الاخساس باننا معزولين عن ضجيج الدنيا ، و انت ساعتها أطلقت العنان لشوارد الغنا ، ما خليت الثنائي و لا صلاح مصطفي ( عصفت بي الريح و الموج .....) ، كانت ليلة امتدادا للحفل الانيق و ( سيد خليفة ) يكرمنا ب ( في ربيع الحب كنا نتناجى و نغني ) و الطلب كان من عزيز ، رحل زي الهزار ( اسي دي ازقزقا ليكم زي الترتيب ) لما عرف اننا جايين من هناك ،ود الشفيع زي الابام دي استاذن في الانصراف و الدنيا قبايل عيد ، تاركا موعدا لللقيا في سنار يبدو حتى الآن سراب يبين من وراء زجاج الامال المشروخة . في اخر مساسقتنا للزقازيق شهر واحد سنة ستة و تمانين ن تذكر لما القطر اتعطل و حرن في ( نمرة ستة ) و الدنبا برد يقطع نفس خيل البطاطين و الدنيا لاذت بسكون غريب مزيج من رهبة الصحراء ، النفوس المتعبة و شمس الاصيل الهزيلة ، جانا (أحمد عوض الكريم ) الذي كان مرطبا مع العساكر على طريقنه في الاستنكاح ، و كيف انه بعد تمنع بدأ يدندن ب (حليل زمن الصبا ) بصوت هامس ، ثم أدركه ما يدرك من الزهو فاطلق سراح صوته الرهيب ، و كيف بدأ الناس يرخون المسامع و يستريحون كالخيل عند المنبع ، أذكر جيدا كيف جاء ذلك الرجل الوقور و بدأ يسال ( يا اخوانا الرادي دا وين ، انا سامع الكاشف يغني ) لا تحسب تلك المقدمة بشاير تغيير في مزاجي ، لا يزال 0 التغبيش × ملازمني ، و رغبتي الشديدة في جرك الى ( ايام من عدس ) في أوجها . أجيكم و الحنين فايض بي سيلو الاقيكم قليبي يفش غليلو يفش حزن السين الهد حيلو سنين من غيركم محسوبات خساير ومنو غير الشايقية من يمتكون القدرة علي البكا و التعبير اليمس القلب عن الاحزان . وصلتني ( ذاكرة الجسد ) ، الايام دي رجعت تاني ( للطيب صالح ) و تحديدا ( مريود ) ، مريود ما رواية ، قصيدة جميلة ، أتخيل لي الطيب صالح ( غمت ) فيها شي من حياتو ، لان السرد فيها رهيب و قاسي بعض الشئ ، انت ما ملاحظ انو كتير من الناس حافظين عديل النص دا ، لآ أعني الاحداث انما ( النص ب (ضبانتو) و هذا لآ يتاتى الا لفحول القصايد . النفاد يقولون أن نجيب محفوظ حاول في الثلاثية يروي شي من تجاربو الحقيقية في شخص ( كمال عبد الجواد ) بطل الرواية . و بعدين نخن مالنا ، خليك في النكد . أنا عارف ناس ود الزيناتي احموني هذا التواصل النبيل مع ناس الزقازيق الا بواسطة ، ياخي حتى كيلون يخش و يمرق علي كيفو ، لكن دا ما يمنعني من شكر كل المبدعين ناس عمر المهدي ، ياسر نجيلة ، حاتم جبارة ، كمال الشادي ، عبد الدايم ( الاتنين ) و عمر نملة الكان فردتي ( في ضفير الشعر و الدواحة ) و غيرهم من ناس الزقازيق . و نواصل النكد ، و معليش كان عصرت عليك ، فلطالما ما عصرت علي ، و ما اكتر الاوكات القشيت و فشيت فيها علي أحزانك . يا مسهرني