ناس الزقازيق ... أجدع ناس ..

Quote: حبيبنا ابو الرشد متعك الله بالصحة والعافية وشاحد ربي يرد غربتك في غربتك ويلمك مع بت الشيخ والعيال .. قول آآآآآآآآآآآآآمين التحية ليك وجيناك تاني بي خشم بيتك عدييل كده ومن غير استئذان .. شن قولك ؟؟؟؟؟؟ والتحية من خلالك لكل الحبايب والأخوان في فرقة الإمتاع والمؤانسة فقد أصبحتم بحق خير انيس وخير جليس وأضفتم لحياتنا معاني وذكريات إفتقدناها زمانا .... لكم جميعا حبي وتقديري .. أخونا البرلوم محمد عيد أو الباكستاني - كما يحلو لنا أن نسميه – اتصلت عليه قبل يومين ولم أعلن له عن اسمي وللحقيقة والتاريخ ودفعا لشبهات الزهايمر عنه فقد عرفني من اول كلمة ماشاء الله عليه بالرغم من طول الفترة ... مش قلت ليكم الراجل باكستاني !!!!! أتابع بامتياز كل ما تجود به علينا من درر وذكريات متعك الله بالعافية ... الزميل والأخ الأستاذ ميسرة سيد احمد إبن الرنك الجميلة الوادعة تلك المدينة الهادئة التي لا تعرف معنى الصخب ما زالت تحتضن بين شوارعها آثار من خطواتي والعزيز من ذكرياتي .. لك التحية أخي وأنت تجود علينا بمدادك الراقي وحكاويك الممتعة ( اللهم لا تجعل الدنيا أكبر همنا ولا مبلغ علمنا ) ... لك تحية خضراء خضرة ( قوز فامي ) الجميلة هل تذكرها يا ترى ؟؟؟؟؟؟ السنجك الرائع الذي ( شلخ حياتنا لا ورا ) أخونا طارق جبريل ... أمتعتنا يازول عديييييل كده ... رحلة بت الخضر أعادت للذاكرة صفحة عزيزة من حياتنا الماضية وطبعا حكاوي القطر من أمتع الحكاوي وبالمناسبة دي أذكر في إحدى رحلاتي بالقطر كنا مسافرين من كريمة للخرطوم والقطر زحمة ومليان مافي حتة تخت فيها رجلك والدنيا ليل وطبعا كالعادة مافي نور والناس راقدين في الممرات منهم المتوسد شنطتو ونايم ومنهم البيتونس مع صاجبو ومنهم السارح مع صوت عجلات القطر .. قامت واحدة من آخر العربية تفج في الناس وسايقة معاها طفل صغير ماشة الحمام والدنيا ظلام شديد ما تشوف يدك .. أها بت الشيخ دي جات جنب جماعة راقدين في الممر وعايزة تعدي واحد من أعمامنا شالته الهاشمية وحب يساعدها عشان تعدي ولدها مسك الولد من يده ورفعه من صلبه عشان يعديه من فوق الناس النايمة .. بعد ما نزل الولد حس بيده تقيلة ومرطبة ولع بطاريتو عشان يشوف الحاصل ... وصاح بأعل صوتو (( الولد خرب علينا داك يالخراب الله يقبحك يالمسنوحة ما تقولي الجنى موسخ .. يوسخ عملك يالشوم ))) وتعال شوف البطاريات اشتغلت شغل جد .. يا جنى كدي ضوي لي هنا .. يا جني جيب البطارية دي جاي شامي لي ريحة هنا .. وساد الهرج والمرج والناس إطاقشت كل واحد عايز يتأكد أنو الولد مر من جنبة بدون خسائر .... ونحن بي هناك ميتين من الضحك .... حكاوي عجيبة .. يظهر انو الولد كتر في البيض بتاع الجماعة .... الله يديك العافية أخونا طارق وزيدنا بالله .. التحية موصولة لأخونا محمد ادم النور جلا الراعي الرسمي لنقابة بت الشيخ الديموقراطية الرجل ذو القلم الذهبي أو فلنكن أكثر واقعية ذو الكيبورد الذهبي فقد خبرناه منذ أيام موقع زقازيقاب حيث كان يطل علينا من حين لآخر ويتحفنا بروائعه وها هو يتواصل عطاءه وإبداعه فله مني التحية والتقدير كما ارجو ان تتقبل عزائي في وفاة عمكم له الرحمة والمغفرة وأسأل الله ان يجعلها آخر الأحزان .. أراها فرصة طيبة لتعزية الأخ عثمان الجيلي الشيخ في وفاة شقيقه سائلا الله له الرحمة والمغفرة وأن يتقبله لديه قبولا حسنا وله حسن العزاء ومرحبا بعودنه مرة أحرى .... حكم والله الضيوف المتاوقين يرحبوا بي ناس البيت ... أخونا برلومنا المدير منصور ما تخاف أنا بقدر ليك على محمد عيد وحأنكت ليهو الصور القديمة وأركبها ليهو في حاجات عجيبة ونرسلها لبت الشيخ مباشرة عشان يآآآآآآآآآمن ...!!!! التحية لكل أفراد فرقة الإمتاع والمؤانسة فردا فردا فكلكم في الخاطر سواء فقط خشيت من الإطالة عليكم ليس إلا .... ابو الرشد خلي الباب فاتح برجع تاني ومعاي صور الديناصورات ..... عبد القادر بابكر الرياض – تلفون 0509835001 [email protected]