|
|
|
 Re: ناس الزقازيق ... أجدع ناس .. (Re: معتصم جعفر)
|
سلامات يا ناس
يا الرشيد ..كنت عايز اواصل مع منص
وكلامو الطاعم الجابو ده وختمو بقصيدة
المرحوم عوض حسن احمد...لكن لقيت نفسى
راقد خل زى ما بقول ياسر لورد....
اها انا زاتى تلايت الليل دى ما قادر عليها
يا عيد ما تكمل لى مع منص ده...
طارق الحكى الشحدناك ليو ابيت تقولو ...
بس عشرة الحريق كانت كاربة...
كم مرة عليك الله حاتم صحاك من النوم تلايت الليل
عشان يسدا غلبو؟؟؟
خخخخخخخخخخخخخخخخخخخخخخخخخخخخخخخ
| |
 
|
|
|
|
|
|
|
 Re: ناس الزقازيق ... أجدع ناس .. (Re: معتصم جعفر)
|
بنات الشيخ اللسه ما ادمنو معنا البوست اسمعوا منى وقولوا الاحسن شنو
عند وفاة عزيز علينا عليه رحمة الله كانت زوجته تبكى بحرقه فقدها الجلل ولكن
فجاه تغير الموقف بدخول امراة وبيدها طفله فاجات بها الجميع على انها بنت المرحوم
منها بزواج شرعى000ثارت ثائرة الزوجة الاولى واتهمتها بالكذب وان المرحوم لا يمكن
ان يكون متزوجها لانه بعد عودته من الشغل لا يخرج الا الى النادى فقط وهنا فاجاتها
الثانيه قائله
م النادى ده ذاتو ياهو انا !!!
فيا بنات الشيخ اخير ليكم الزفت ده قدام عيونكم ولا اخير النادى
مع حبى وتقديرى
| |
|
|
|
|
|
|
|
|
|
Re: ناس الزقازيق ... أجدع ناس .. (Re: معتصم جعفر)
|
| Quote: اننى زقازيقى الهوى |
يا ريس ما ياها زاته باب الروح متاكى انسربي...أنا بنزله ليكم تاني...تعال
ناقشة باقي الليل ده مع محمد صديق و منصور..كفاية قبيل حميتني النوم...
باب الروح متاكي إنسربي
صاحيات الحدائق أرعي
قبال منجنيق الخوف يعاود ضربي
قبل الطير وصعلوك النحل منكبي
هشي العافية من تمري المخمر وعبي
وزي ما النيل طبق مركوبو مارق للبحر مدبي
أدخلي في الجسد محمومة بالمرض اليحير طبي
وأفتحي باب ضريحك يدخل الدرويش مغبي
وأدبغي جلدي بقطران مهيج لبي
زي أتر النعال فوق الرمال متربي
كان بهل الجمر منقد سماي شن ذنبي
مادام الشرار وسط الرمال متخبي
لابد من فضيحة النار تولع جنبي
| |
|
|
|
|
|
|
|
|
|
Re: ناس الزقازيق ... أجدع ناس .. (Re: الرشيد بابكر)
|
Quote: فى تكنيك الشعر زى ما حضراتكم عارفين فى حاجة اسمها
ال personification او التشخيص....وهى اكساب الجماد
صفة الحى |
جنابو ومنصور ...
الصور الشــعرية الجميلة التى تحملها دوما كلمات عاطف خيرى
وايضا فى احايين كثيرة نجدها عند حميد والقدال ..
ولو انها تبدو صورا جديده الا انها تحديث وتطوير للصور الواردة
فى الشعر العربى القديم ..
واقصد بذلك الصــور البلاغية التى درسناها فى الثانوى فى كتاب
شخصيا اعتبره أقيم الكتب الاكاديمية التى درستها فى حياتى
وهو كتاب البلاغة - بالطبع كلكم تذكرونه
ورغم ان معظمنا كان يمر عليها كباقى المواد .. بل ان البعض كان يمتعض منها
الا انك اذا حظيت باستاذ مثل النورانى الحاج الفاضلابى او الاستاذ عبد اللطيف
- كما فزنا نحن بذلك فى مدرسة الخرطوم القديمة -
اقول اذا شرح لك تلك المعانى احد هذين الاستاذين الفاضلين ...
لتعلمت من يومك كيفية التهام القصائد دون حفظها ...
ولعرفت متعة البحث والتنقيب فى المعانى غير الظاهرة فى الابيات
ولعلها مناسبة لأحيى هذين الرجلين .. ولا ادرى مكانهما الآن
لأننى ادين لهما بالفضل فى تشكيل جزء كبير من وجدانى ووجدان كثيرين من
زملائى فى تلك المرحلة ..
واذكر عن الاستاذ عبد اللطيف انه حينما كان يشرح احد الدروس فى القواعد
لابد ان يبدأها بقراءة البيت الذى يشرح القاعدة المقصودة من الفية بن مالك
التى كان يحفظها عن ظهر قلب ...
نصيحتى لنا جميعا ان نعود لقراءة كتاب البلاغة من جديد ...
حينها سـتزداد متعتنا ونحن نكتشف الطباق والجناس والتورية
فى أشعار مبدعينا
| |
|
|
|
|
|
|
|
|
|
Re: ناس الزقازيق ... أجدع ناس .. (Re: الرشيد بابكر)
|
عايزين نتونس في شعر خيري لكن خايفين نفسد الأمر بتناول
العامة لأمور الشعر والشعراء ، لكن حقيقه كلام سمح خاصة
القصيدة الأخيرة دي يا الرشيد فيها الكتير من الصور الشعرية
وعايزه قراية كم مرة عشان كل مره تستمتع بحلاوتها ..
وزي ما قال الكوتش احسن زول يشخصن الجمادات ويستنطقها .
وقبيل الناس قالت قصائد خيري إضافة لإنه تدل علي عبقريته
كمان بتظهر لينا عبقرية مصطفي سيد أحمد في التلحين والغناء
ودا باب يحتاج لبوست منفرد في منبرنا القادم (أكجو ليكم لمن
بكري يرفض يأرشف دا ذاتو) وبرضو متابعة وإستمتاع ،
ويا طارق جبريل البوست دا في حاجتين عايزين نختاهم عشان مافي زول
يزعل الكورة والسياسة ولكن يبدو لا فكاك من الإثنين ، وأنا حسع ذاتي
شايف ثقافتكم بقت يسارية وتجيبوا الغناء بتاع ناس اليسار . وتجيبوا
لينا الهواء مع السادة القراء من اليمين والوسط ويمين اليسار ،،
الله يجيب ليكم عبد الحفيظ عباس دي يقعدكم في علبكم ...
| |
|
|
|
|
|
|
|
|
|
Re: ناس الزقازيق ... أجدع ناس .. (Re: الرشيد بابكر)
|
Quote: يا الرشيد نجيب ليكم حكاوي الحبوبات تقولوا لينا قلبتوا البوست محل عرقي
ههههههههههههههههههههههههههههههههههههههههه
نسوي شنو نجن يعني علي قول جلا |
طارق جبريل
سألتك بالذى ركز الارض معبد
وسوى الفاس عليها مقام
سألتك بى حشا الأُمات ودمعاتنا
سألتك بى كبيداتن ودعواتنا
تعال و أحكي زي ما انت عايز...و أقلب البوست زي عايز...
انت محل عرقي دي دلع انداية...
ما تخجل منها ما قبلك زمان قالوها
ونحن التَايَهْ
والاندايَهْ
والزِريعهْ
والعيزومهْ
واتفضلْ ،
ونحن الرايَه مرفُوعه
ونحن الكُلفَه مرفُوعه
ونحن حلفتَ ... مدفوعه
| |
|
|
|
|
|
|
|
|
 Re: ناس الزقازيق ... أجدع ناس .. (Re: الرشيد بابكر)
|
Quote: Quote: ده كلام جميل وعايزين نستمتع بالجميل وليس بـtset + وصور لبنات مع شباب في البحر (صوره مقلوبه وحفاظا على اخواتنا) من المشاكل
ياوليد ....
هي ليست صور بنات مع شباب كما سميتها
بل هي صور لزملاء وزميلات جمعت بينهم صلات اقوي وامتن من ان اعبر عنها هنا
والدليل هذا البوست ... وادعوك لتصفح بعض صفحاته لتكتشف ماهي هذه الصلات
وليد هل تعلم ان اكثر من 50 زميل و زميلة اضافوا لهذه الصلات التي احدثك عنها رابطة الزواج
ومنهم اعضاء هنا ... بجوك براهم بعد شوية
وصورك المقلوبة دي بعدلوها ليك لما تآمن |
جلال عثمان
ياخي يستحيل انسان عاقل يكتب بهذه الطريقة
وحتى كمان رديت في مداخله عن هذا الموضوع
ولن اتصور انه بهذه الطريقة وطبعا لعلمكم
انا عندي مشكله هكر ليها اكثر من اربعة ايام احيانامداخلاتي اعدلها واحيانا اتركها
ومنهم اعضاء هنا ... بجوك براهم بعد شوية
وصورك المقلوبة دي بعدلوها ليك لما تآمن
وفي دي معاك حق
وحبوباتنا علمونا البدق الباب بلقى الجواب
وتاني معزرة للخطا الحصل ويظهر عشان نحن برالمه حاجاتنا بتلاعبوا بيها
| |
|
|
|
|
|
|
|
|
|
Re: ناس الزقازيق ... أجدع ناس .. (Re: وليد عبد اللطيف)
|
الأخ وليد تحياتي ولا ضير يا أخي فيما ورد وأصبح
سبباُ في علاقة بيننا وناس الشعبية ....
بخصوص إشكاليتك هي ليست بهكر بمعناه المعروف
بل هنالك يستخدم حسابك في سودانيز أون لاين لأن الموقع بعد أن تقوم
بإدخال بياناتك ، يسجلها ويحتفظ بها حتي لا تحتاج لإجراء هذه العملية
في كل مرة تدخل فيها الموقع . لذا نصيحتي لك ولكل الأخوة إذا ما كنت
تستخدم جهاز يستخدمه شخص أو أشخاص آخرون فعليك تسجيل خروج قبل مغادرتك
فهذا الشخص يا وليد عثر علي كلمة مرورك في أحد الأجهزة التي استخدمتها
قبل ذلك . عليك بالدخول إلي ملفك وتعديل كلمة مرورك ويستحسن أن تكون
كلمتين أو أكثر بحروف عربية . ولك الشكر
| |
|
|
|
|
|
|
|
|
|
Re: ناس الزقازيق ... أجدع ناس .. (Re: زهير الزناتي)
|
ازيكم00
وليد ازيك انا مهيرتهم اللي كنت بشجعهم عشان نسبق ناس الشعبية
رغبة مني في زيادة التواصل الزقازيقي بينا 000 والحمدلله نجحت الخطة
فعشنا فاليومين الفاتو كل اجواء الزقازيق الرائعة
ومش كدا وبس كمان خلقنا حبل ود جميل بينا وبين ناس الشعبيةالحلوين
ودي احلى الابعاد
وعليك الله عيش معانا اجواء عاطف خيري الجميلة دي 00
ما بين اقابلك وجيت عليك
كان عندي ليك بس تحن عليك والجرح الندي
وخيبة امل ام الشهيد
في الكلمة والوجه الجديد
وكان احتقان نبض الزمن
نومة طفل فوق الوطن
يا صاحية بي الحاصل علي
يا نايمة عن فقري البليد
سميت منافيك الوطن صبحت مناحتك نشيد
| |
|
|
|
|
|
|
|
|
|
Re: ناس الزقازيق ... أجدع ناس .. (Re: وليد عبد اللطيف)
|
Quote: باب الروح متاكي إنسربي
صاحيات الحدائق أرعي
قبال منجنيق الخوف يعاود ضربي
قبل الطير وصعلوك النحل منكبي
هشي العافية من تمري المخمر وعبي
وزي ما النيل طبق مركوبو مارق للبحر مدبي
أدخلي في الجسد محمومة بالمرض اليحير طبي
وأفتحي باب ضريحك يدخل الدرويش مغبي |
كلام يلم الطير الفي السماء
الرشيد ياخوي
نحن خلاص سهر الطلبه مابنقدر عليهو
والمره قالت لي كرهتنا النت وكرّهت ناس الزقازيق بوستيهم زاتو
وانا خايف بكره تقول لي يا انا ياالنت .
__________________
(مبروك الميل 67 ) وزغرتي ياعفاف
وقولي كيه لناس الشعبية وبنفوتهم وبنفوتهم
| |
|
|
|
|
|
|
|
|
|
Re: ناس الزقازيق ... أجدع ناس .. (Re: وليد عبد اللطيف)
|
يا وليد والله خلجتونا وبقينا ما عايزين نفوتكم
عشان ما نحس إننا إنتصرنا علي ناس رائعين زيكم كده ...
يا جماعة حصلوا الريس معتصم وقولوا ليهو الصفحة دي قلبت ليها
ساعة وعشر مداخلات ،، كل مرة نضطر نمشي نفتح صفحة 66 عشان نقرا
مداخلات الريس ...
| |
|
|
|
|
|
|
|
|
|
Re: ناس الزقازيق ... أجدع ناس .. (Re: زهير الزناتي)
|
Quote: الأخ وليد تحياتي ولا ضير يا أخي فيما ورد وأصبح
سبباُ في علاقة بيننا وناس الشعبية ....
بخصوص إشكاليتك هي ليست بهكر بمعناه المعروف
بل هنالك يستخدم حسابك في سودانيز أون لاين لأن الموقع بعد أن تقوم
بإدخال بياناتك ، يسجلها ويحتفظ بها حتي لا تحتاج لإجراء هذه العملية |
طيب اخي زهير الزناتي
وحكاية تغيير الصور دي شنو
وعندي صورة اتغيرت ووجدتها صورة بروفايل ياسر بيناوي
في احدى المداخلات .وحصلت لي اكثر من مره
| |
|
|
|
|
|
|
|
|
|
Re: ناس الزقازيق ... أجدع ناس .. (Re: عفاف علي ميرغني)
|
يا مهيرة الزقازيق (عفاف علي ميرغني)
Quote: وعليك الله عيش معانا اجواء عاطف خيري الجميلة دي 00
ما بين اقابلك وجيت عليك
كان عندي ليك بس تحن عليك والجرح الندي
وخيبة امل ام الشهيد
في الكلمة والوجه الجديد
وكان احتقان نبض الزمن
نومة طفل فوق الوطن
يا صاحية بي الحاصل علي
يا نايمة عن فقري البليد
سميت منافيك الوطن صبحت مناحتك نشيد |
مشكورة اختي عفاف
وهل تعلمي
ان عاطف خيري ممسوس ومسكون ابداع
وكلام الجن بتاعكم دا هو القاعد يساهر بينا
________________________________
اختي عفاف انتي مع ناس ورديةالليل ولا ورديةالنهار
| |
|
|
|
|
|
|
|
|
|
Re: ناس الزقازيق ... أجدع ناس .. (Re: عماد الدين عبدالله)
|
Quote: اخي زهير تحياتي
لقينا ناسنا ناموا( ناس الشعبية )
انا واخوي وليد قلنا نتم السهرة
مع الناس السقد ديل يمكن يكون
فيها رقيص عروس ولا سيرة صباحية
تحياتي واحترامي |
عماد عبد الله
الطلبه ديل اختاهم
ديل بعد يومين بعملوا لينا انيميا من السهر
والناس ديل ضاربين الكشري والخلطة السحرية
| |
|
|
|
|
|
|
|
|
|
Re: ناس الزقازيق ... أجدع ناس .. (Re: وليد عبد اللطيف)
|
يا زهير يا رشيد يا عيد000
كنا في مشوار برة انا وحاج الركز
واستعجلت محمد للعودة للبيت بحجة
وردية الليل الليلة ح تكون عن عاطف خيري
اجي الاقيكم ضربتو الرز بالبن مع ناس الشعبية ونمتو من المغرب؟
يا هدهد المهدود
مين هدهدك نمت
كل الطيور غنت
منك يجيني سكوت
مين هداك للناس
او هد فيك الموت
انا قلبي حلة حنين
والشوق فتحني بيوت
| |
|
|
|
|
|
|
|
|
|
Re: ناس الزقازيق ... أجدع ناس .. (Re: عفاف علي ميرغني)
|
Quote: اجي الاقيكم ضربتو الرز بالبن مع ناس الشعبية ونمتو من المغرب؟
يا هدهد المهدود
مين هدهدك نمت
كل الطيور غنت
منك يجيني سكوت
مين هداك للناس
او هد فيك الموت
انا قلبي حلة حنين
والشوق فتحني بيوت |
والله كلامك السمح ده ياعفاف حقو نلولي بيهو جماعتنا
ناس مابتقدر على السهر من المغرب الناس تدمدم تنوم
| |
|
|
|
|
|
|
|
|
|
Re: ناس الزقازيق ... أجدع ناس .. (Re: عفاف علي ميرغني)
|
| Quote: اجي الاقيكم ضربتو الرز بالبن مع ناس الشعبية ونمتو من المغرب؟ |
الاخت عفاف الرز باللبن يسمنا فيهو
وناسك ديل ما ادونا شي غير السهر
وزي ما قال وليد الناس ديل بجيبوا
لينا انيميا بالسهر
لكم كل الود والحب والتقدير
يا اهل الزقازيق
احب شارع القومية
وعصير المنقة والقصب
طبعا دي ذكريات من الزقازيق
| |
|
|
|
|
|
|
|
|
|
Re: ناس الزقازيق ... أجدع ناس .. (Re: زهير الزناتي)
|
| Quote: مرحب عفاف ... عماد ... وليد ... وكمان شايف جلال جاي من هناااااااااااااك |
يا زهير جلال دا جاي ياتو وردية
والله حيرتونا عندكم خمسة ورديات
في اليوم اهو دا الكلام
شنو ما عندكم اعارة عايزين
لينا راس حربة ولاعب نص
| |
|
|
|
|
|
|
|
|
|
Re: ناس الزقازيق ... أجدع ناس .. (Re: عماد الدين عبدالله)
|
Quote: مبنية مدن الخوف .. من طينة آخر الليل
وأنا فى سقالة الشوف .. قدح البصيرة تقيل
فاتح زريبة الجوف
تمرق تخش الخيل
على كيفا .. كيف معلوف ..ضهر المظنة يشيل
وأنا ظنى ظنيتو .. لا النيل غريق فى النيل
والليل ولا فى بالو ليل
|
والليل ولا في بالو ليل إهداء لناس الليل وضيوفنا من ناس الشعبية
| |
|
|
|
|
|
|
|
|
|
Re: ناس الزقازيق ... أجدع ناس .. (Re: زهير الزناتي)
|
ياولد ياحاوي انت عرفتني كيف
قدر ماحاولت انوم بعد دوام مضني ووشغل مقرف انتهى بعد الحادية عشر مساء
قلنا نجي ندحرج التماسي لقيت ليك ما شاء الله "دشريون مداخلة"
على بال ماخلصناها الواطة صبحت ... والله ياها الانيميا زاتا
الله يمرقني بكرة من جلا
| |
|
|
|
|
|
|
|
|
|
Re: ناس الزقازيق ... أجدع ناس .. (Re: جلال عثمان)
|
Quote:
ساكت يغنوا على القمر
واجعنى فى البحر السكات
وسكتنى فى الوجع البحر
يا بِت صباح الطير .. وين البلد ركّت؟
ما عاد هواك يفتح فى الكتمة شباك النزيف
ريف الجسد ــ صدرك ــ سبلوقة اللبن الحريف
داسينى فيكى نَدُر .. والأنبياء فاتوا
وأنبياء بين بين .. قاعدين فى ضل النار
داسينى فيكى نَدُر
وفى غفلة جوا الكفار .. وطارت حمامة الغار
لاقونى ناشف .. ومـُر
ماذنب جلد الطار ..
لو غنوا بيهو شـُتـُر
ما تخافى الله معاك
.. وكل الملايكة .. سـُمـُر
|
يا ابو الجل دي خبايا المنبر العام تمشي الحضور تلقي كم واحد
زقازيقي حايميين بهناك تجي تعمل ليهم أستفزاز عشان يجوا داخلين
ينورونا ....
Quote: ساكت يغنوا على القمر
واجعنى فى البحر السكات |
شوف المقطع دا جميل كيف حقوا نخلي لي ناس الصباح يجوا يفكفكوا لينا
اجمل حاجة مكتوب علي خلفية أمجاد دوماً ما تقابلني في الخرطوم
ودا ممكن يكون نقاش فلسفي أيهما أجمل القمر أم البحر ، انا شخصياً
إنحاز للبحر والمياه ، يمكن عشان من كسلا وما عندنا نيل ولا بحر
والقاش موسمي ومرتبط دائماً بالكوارث والفيضانات وكدا ،، لكن
لمن أقلب في القنوات القي لي بحر إنشاء الله في فيلم تسجيلي طوالي
بقيف وإتمعن وأسرح كتر ، البحر وزرقته جمال بلا حدود ...
بس ما يجي زول يقول لي حاره الشطة ...
أوعي حبايبنا ناس الشعبية يكونوا مشوا ناموا ، انا شغال معاهم
بخطة اساهر بيهم هنا لغاية الصباح ، عشان لمن يجيوا ناس بوست
الشعبية تكون لياقتهم وقعت ويكوسوا للنوم
| |
|
|
|
|
|
|
|
|
|
Re: ناس الزقازيق ... أجدع ناس .. (Re: زهير الزناتي)
|
| Quote: والليل ولا في بالو ليل إهداء لناس الليل وضيوفنا من ناس الشعبية |
يا زهير نحنا مساهرين معاكم في شان موضوع
الاعارة شوف لينا ثلاثة من ناس ساري الليل
ما جاني خبر ديل ولا نرشح برانا
تهواكم فلوبنا يا ناس الزقازيق
يا اجدع ناس
| |
|
|
|
|
|
|
|
|
|
Re: ناس الزقازيق ... أجدع ناس .. (Re: عماد الدين عبدالله)
|
Quote: يا ابو الجل دي خبايا المنبر العام تمشي الحضور تلقي كم واحد
زقازيقي حايميين بهناك تجي تعمل ليهم أستفزاز عشان يجوا داخلين
ينورونا .... |
البركة في الواي فاي يازهير وحاتك اصلوا ما بعرف اعمل "لوغ اوف"
وطوالي الخرابي ده شغال ... يعني مرات ممكن اكون في ام صفقا عراض وتلقى اسمي في الحضور
انعل ابو التكنولوبيا زاتو ياخ
| |
|
|
|
|
|
|
|
|
|
Re: ناس الزقازيق ... أجدع ناس .. (Re: عماد الدين عبدالله)
|
Quote: ياناس الشعبية 00فتكم بعافية
ويا عماد سلم على بتنا |
يا عفاف والله بتكم ضربت النوم ضرب تمام
في سابع حلمة وطبعا كل يوم نقة مع السهر
| Quote: شايف عماد عبد الله لا زال صامداً في حين أن وليد قد إنسحب تكتكياً .. |
انت يا زهير اكان بتنزل لي في ابداعات مصطفى سيد احمد عاد ننوم كيف
والله الساعة خمسة ونص مفروض اجهز للشفل يعني باقي ساعتين ونص
دا كلام دا يا زهير
Quote: شكيت محنكم على الله
بقيتونا زي راجل المرتين
المساسقة كسرت كرعينا بين الشعبية والزقازيق
الواحد الا يعمل ليه بيت في شارع المطار لتوفيق الاوضاع |
يا جلال انت هسع طلعت لينا من وين
انت يا كا زول الاعارة يا ساري الليل
الناس دي كلها رقدت زهير دا خابزك
كويس وعارفك بتجي ناطي
لكم كل الود والاحترام
بعد كدا ممكن نزوق ناخد لينا رقدة ساعتين كدا
| |
|
|
|
|
|
|
|
|
|
Re: ناس الزقازيق ... أجدع ناس .. (Re: جلال عثمان)
|
أصبحنا و أصبح الملك لله والحمد لله ولا اله الا الله و الله أكبر...اللهم اني أسألك خير ما في هذا
اليوم و خير ما في بعدة و أعوذ بك من شر ما في هذا اليوم وشر ما في بعده...اللهم اني أعوذ من
الفقر وسوء الكبر...اللهم اني أعوذ بك من عذاب في النار وعذاب في القبر...
تحية الى أمي التي علمتني القناعة والى أبي الذي علمني الاعتاد بالنفس...والى زوجتي التي
علمتني العطاء بلا حدود...
| |
|
|
|
|
|
|
|
|
|
Re: ناس الزقازيق ... أجدع ناس .. (Re: زهير الزناتي)
|
بسم الله و الحمد لله
اللهم بك أصبحنا و بك أمسينا
وبك نحيا و بك نموت
و إليك النشور
أصبحنا على فطرة الإسلام
وعلى كلمة الإخلاص
وعلى دين نبينا محمد (ص)
وعلى ملة أبينا إبراهيم حنيفاً مسلماً و ما كان من المشركين
سبحان الله و بحمده
| |
|
|
|
|
|
|
|
|
|
Re: ناس الزقازيق ... أجدع ناس .. (Re: معتصم جعفر)
|
معليش يا الرشيد ما سمعت الأغنية عندي مشكلة في السماعة
قطع شك حمزة سليمان ملحن لا يشق له غبار وله العديد من
الألحان المتميزة ...
يا ريس كدي تاوق في البروفايل علي يدك اليمين .. وشوف
مواعيد المداخلات تلقي روحك مجلي ليك كم مداخلة كده ...
بعدين حكاية الضيف دي ما وقعت لي ،، لكن أياً كان الضيف
هو الضيف ، تعرف مره في الزقازيق جونا جماعة كده من السودان
في بداية السنة ،، وكانوا ضيوف علينا حتي نهاية العام ،،
ودي قصة طويلة الصباح دا مافي مزاج حكاوي ،، وفي زول جنبي
عامل لي إزعاج ...
| |
|
|
|
|
|
|
|
|
|
Re: ناس الزقازيق ... أجدع ناس .. (Re: HAMZA SULIMAN)
|
جينا نمسك وردية النهار الجماعة قافلننا
Quote: زهير صباح الخير...
يعني ما قلت رأيك في الأغنية... |
عزيزي الرشيد صباح الخير زولك دا بتاع كووورة....الغنا أسأل منو جنابو....الشمارات أسأل جلال...
Quote: عندي مشكلة في السماعة
قطع شك حمزة سليمان ملحن لا يشق له غبار وله العديد من
الألحان المتميزة ... |
عارفين و الله يا زهير سماعة الأذن عندك فيها مشكلة....
في البوست بتاع الشعبية واحد عامل حكاوي للمساطيل
قال مسطول مسك ضبانة ثم فكاها قائلاً لها طيري فطارت ...جاب ضبانة تانية قصقص جناحاتها فكاها و قال ليها طيري ما طارت
قال أثبت بالتجربة أن الذبابة عندما تقصقص جناحاتها فإنها لاتسمع يا الرشيد
الجن بداوا كعب الإندراوا
| |
|
|
|
|
|
|
|
|
|
Re: ناس الزقازيق ... أجدع ناس .. (Re: محمد آدم النور)
|
Quote: مشكورين يا ناس الزقازيق يا اجدع ناس
ومشكور صديقى الحبيب الرشيد
و حاول لما تلقى الباب متاكا انسرب تلقى الروح فى الوش على طول |
حمزة الحبيب...أشتاق الى سماع صوتك الشجي العذب...فلقد حرمنا العمل منكم
و لعلي قد انسربت منذ زمن طويل في حنايا الروح...
ان الCD الذي أهديتنيه به كنوز ودرر....سأظل دائما شاكرا لك....أستأذنك
في أن أمتع باغنياته قبيلتي من الزقازيقاب...
| |
|
|
|
|
|
|
|
|
|
Re: ناس الزقازيق ... أجدع ناس .. (Re: الرشيد بابكر)
|
Quote: عزيزي الرشيد صباح الخير زولك دا بتاع كووورة....الغنا أسأل منو جنابو....الشمارات أسأل جلال...
|
منتظر جنابو يجي يسمع ويدينا رأيه وكمان منصور و محمد عيد...و رأي عفاف ده كوم تاني
بس ممكن ترسل سماعة اذن لي زهير عشان يستمتع معانا....
| |
|
|
|
|
|
|
|
|
|
Re: ناس الزقازيق ... أجدع ناس .. (Re: الرشيد بابكر)
|
حكمة:
اطلبو العلم طلباً لا يضر بالعبادة...........و اطلبو العبادة طلباً لا يضر بالعلم
كلمة أخيرة:
تعلم إذا كنت لست بعالم فما العلم إلا عند أهل التعلم
تعلم فإن العلم أزين للفتى من الحلة الحسناء عند التكلم
دا كلام ياسر نجيلة في كتاب الخريج لكلية التجارة في العام 1988 ...
وهو مولود بسنجة وجميع المراحل بمدينة سنجة....في الصفحة الفيها الكلام دا ...
موجود ياسر محمد عبد الرحمن...عصام جلي ...الناير الصافي ...والأخ ياسر نجيلة
الكلام كتبتو لأنو لقيتو غاطس في نافذة الحضور بتاع سودانيزاونلاين... ولا قال ليكم سلام عليكم و مرق مشا....شفت الشمار كيف يا جلال
جاييكم لي كلام الزول المجنون الإسمو عاطف خيري
| |
|
|
|
|
|
|
|
|
|
Re: ناس الزقازيق ... أجدع ناس .. (Re: عبد الحفيظ عباس)
|
بالغت يا عبد الحفيظ
أولاً ألف مرحب....ومنظرين حضورك لينا كم يوم كدا...
و قاعدين نفتش فيك قلنا الزول دا ما يكون مشا بوست تاني
لكن كدي النسألك مالك جاي أغبش كدا...أقول ليك حاجة...عبد الدائم موجود الآن ..
حيقول ليك حاجة ..شنو ؟؟؟ما عارف
بي كدا ناس الشعبية جنّو
| |
|
|
|
|
|
|
|
|
|
Re: ناس الزقازيق ... أجدع ناس .. (Re: محمد آدم النور)
|
أبو عمر
سلامي لك والأسرة
وتبريكاتي بالمولود
وقلت ما ببارك ليك إلا بعدمولودي
والحمد لله رزقنا مولدا بعد ولادة متعسرة وقيصري كمان
وسميناه باسويرد
وتشكراتي على الترحيب
والله أظنك جبت معاك دواء من رحلتك القبل الفاتت كيف عرفتني
طاشي وأغبش
وبي الطريقة دي خوفتنا أخير نقول الحقيقة
فعلا أنا طشيت ومشيت لي حفرة قعدت أحفر فيها لي 3 شهور حقت واحد اسمو محمد عادل عشان كده طلعت أغبش من البحت عشان أطلعلاني لقيت ليك الزول الاسمو محمد عادل هلالابي
فعرقت إني كنت طاشي في زريبة العيش ... ما تحميك
وكان على النضيف المنتظرني أنا بي غبشتي دي جيتو براي
علي الأقل يلقي عندو شي يشيل الغبشة
ولا ما كدي يالتضيف
وياشيخي النضيف من شيل الغبشة ما تقيف
وقول واحدحبة في هذا اليوم ولسه باقي ثلاثة حبات حسب إحصائي الزناتي أربعة حبات أو طلات على الحوش في اليوم تكفي والبلع بالليل والنهار
وتباريني وشيخ النضيف بكرة بقد ليك مركبك النائم فيها دي ولن تستطيع أن تسأله حتى يبدي لك سببا
وإما الفراق
وفراق مؤقت
| |
|
|
|
|
|
|
|
|
|
Re: ناس الزقازيق ... أجدع ناس .. (Re: عبد الحفيظ عباس)
|
عبد الحفيظ أشرقت الأنوار ياخي...حللتم أهلا و نزلتم سهلا...من حسن حظي أن
اليوم هادي عندنا لنراك بالنهار و قبل أن يجئ الليل...
مرحبا بك عضوا فاعلا بالليل أو بالنهار ويقيني انك زينا زول ليل...لأني
عندما التقيتك بالسودان كنت مشغول جدا بالنهار....
| |
|
|
|
|
|
|
|
|
|
Re: ناس الزقازيق ... أجدع ناس .. (Re: الرشيد بابكر)
|
الأخ رشيد القوم
تحياتي لك والأسرة الكريمة
وتشكراتي على الترحيب
والله شوف أنا مع صرفة الحبوب بتاعت دكتور الزناتي
أربعة حبات في اليوم دي مواعيدها موزعة ليل ونهار
وكمان في إضافة عند اللزومودي الحبة الثانية اليوم لانو وجع الشوق لي ناس الزقازيق شديد
وكان الواحد ما بخاف الله في نفسوا كانبلعت الكورس كله
وطبعا عشان ما تبقي قطيعة بالرغن نت أنوا دكتور زهير شكلوا فتاهاأنا قلت لي زهير أنا ما بقرأ مداخلات رشيد القوم لانو عندما حضر الى السودان أنا قمت بزيارتوفي المداخلة ذكر بأنه كا معه محمد المرتضي ولم يشر لنا... لكن مداخلاتك كانت أقوى وتواصل الزقازيق فرض التواصل فأنا مسامحك
مسامحك با حبيبي
مهما فسيت عليا
أنا عارف أنو طيب
قلبك
وكل حسن نية
وأنا عندي نية أزازي بيك
مزازاة العجب بي دفاع الهلال
| |
|
|
|
|
|
|
|
|
|
Re: ناس الزقازيق ... أجدع ناس .. (Re: جلال عثمان)
|
يا حفيظ ناس زهير عملو بيك التيست ، شد حيلك بآآآآآآآ
واعمل بيهم برنامج ... شايلنك لعوزة
يلا انطلق الشوارع فاضية الان ....
شكرا" الرشيد لانك جبت لينا فنان بقامة حمزة سليمان
وتم جميلك وعلم صاحبك تنزيل الاغانى بدل ما مبارى لى عامر سنجراب
وغنمايتو ....
يا جلا كتيب الخريج مهم جدا" انزاله كاملا" هنا ولو ما عندك الوقت
قم بتصوير الكتيب واعطاء النسخة لاى شخص لدية سكانر وممكن بعد كده
نساعدك فى انزال الكتيب ...
| |
|
|
|
|
|
|
|
|
|
Re: ناس الزقازيق ... أجدع ناس .. (Re: عبد الدائم سيد أحمد)
|
| Quote: كتيب الخريج مهم جدا" انزاله كاملا" هنا |
دي طبعاً ما بتحصل....وتلقاها عند الزول الغافل
مرة فرطت في الألبوم بتاع الصور بقيت أغالط نفسي دا أنا و لا زول تاني
شوف يا ود سيد أحمد الشحتفة و الشمار متباريات....ما قلنا ليك عبد الحفيظ جاي أغبش..
وطبعاً عندك كورال ...أها الزول دا يجي خاشي كدا و لاحتعمل ليهو حاجة؟؟؟
شوفو يا جننتكم يا جننتوني
| |
|
|
|
|
|
|
|
|
|
Re: ناس الزقازيق ... أجدع ناس .. (Re: الرشيد بابكر)
|
| Quote: شكرا" الرشيد لانك جبت لينا فنان بقامة حمزة سليمان |
عبدالدائم...رحبوا معي بحمزة سليمان...و ان شاء الله لما تجونا في أبوظبي بنعرفكم
بحمزة...ولما تقابل حمزة في أبوظبي ستجد شخصا أقل ما يوصف به انه انسان...
| |
|
|
|
|
|
|
|
|
|
Re: ناس الزقازيق ... أجدع ناس .. (Re: الرشيد بابكر)
|
يا جلا مقدر حرصك على الكتيب والصور
انا قلت ( قم بتصوير الكتيب )
وسيب الاصل معاك ..
الكورال لحدى ما زوبة ترجع عشان عندها اداء فردى ... جماعى
امنياتنا بدوام الصحة والعافية لوالدة الاخ موسى عيسى
يا زهير ما قلت عندك باقى صور ...
| |
|
|
|
|
|
|
|
|
|
Re: ناس الزقازيق ... أجدع ناس .. (Re: Tabaldina)
|
الرشيد مرحب بأستاذنا حمزة سليمان .. وعليك الله كمين زي دا
تاني ما تعملوا لينا ،، يعني لو قمنا قطعنا ولا قلنا كلمة
كده ولا كده كان حا يكون موقف حرج زي موقف عبد الدائم
لمن شاف صور ناس بيتهم ...
شكراً استاذنا حمزة علي الإبداع وأنت تواصل في طريق الإستنارة
من أهل الفن بموهبة حقيقية .. وشكراً علي الطلة الجميلة ..
في نفاج ناس الزقازيق .....
بمناسبة عودة صالح نقول لأخونا عزام الف مبروك الزواج ...
| |
|
|
|
|
|
|
|
|
|
Re: ناس الزقازيق ... أجدع ناس .. (Re: زهير الزناتي)
|
الله يجازى محنكم يا برايين
الواحد ينوم تالى الليل
فى الصباحات البيض عديل كده
يجى يلقاكم عملتوا ده كلو
ومعاكم حمزة سليمان كمان
انتو عايزين ترفدونا ولا شنو ؟؟
عشان بنترفد ليكم (لق لق لق)
السى دى بتاع حمزة سليمان ده
انت وهو يا الرشيد
عندكم بس يومين عمل
48 ساعة بس
كدى ما القى نسختى
جايانى لغاية عندى
بالدى اتش ال
نحن ناس السمع بالفل اوبشنس
مش تقول سماعة شغالة وسماعة ما شغالة
انا ذاتى مرة شغال , ومرات ما شغال
وبعدين اقول ليك شنو يا انت
بالليل سكرج , وبالصباح حمزة سليمان
جن يجننك زى ما جننت جلا
| |
|
|
|
|
|
|
|
|
|
Re: ناس الزقازيق ... أجدع ناس .. (Re: طارق جبريل)
|
سلامات يا ناس
متاوقة سريعة بسبب المشغوليات
شكرآ الرشيد لانك طاعم بتجيب لينا الحاجات
الطاعمة....
يا صالح منور القبض عزام يقبضك بركة من
صلى وقال يا الله....نحن بنقولا ليكا عديل
ما من ورا حجاب زى بعمل زهير...
| |
|
|
|
|
|
|
|
|
|
Re: ناس الزقازيق ... أجدع ناس .. (Re: زهير الزناتي)
|
عبدالحفيظ عباس ...
كل التحايا والسلامات ...
مرحب بيك وحمدلله على السلامة ...
عقبال طلة الباقين ...
جلا ... كتيب الخريج ده زي ماقال ليك عبدالدائم نزلوا هنا ...
والظاهر ده ميل مجانيين ساي ... شابكنا اجن واتجنن ... وجننوني ...
هاك نظرية المسطول ده ...
مسطول فكر وحس أن العالم فيه أشياء كثيرة غلط فوضع أسئلة ليبرهن على ذلك :
-أنت تركض للأمام لتخفيض وزنك ، ماذا لو ركضت للوراء هل يزيد وزنك ؟
-لماذا الصمغ الشديد الفعالية لا يلتصق بالأنبوب الذي يحتويه ؟
-إذا كان العالم مسرحاً كما يقولون ، فأين يجلس المتفرجون ؟
-إشارة ممنوع المشي على الحشيش المزروع ، كيف وضعت في مكانها ؟
-البطيخ الذي لا يحتوي بذور، كيف تمت زراعته ؟
-نسمع كثيراً عن سرعة الضوء ، طيب كم تبلغ سرعة العتمة ؟
-لماذا لا يصنعون طعام القطط بنكهة الفئران ؟
- اذا كانت الخضروات والفواكهة تفيد في (تإنسان رخيص) نقص الوزن لماذا لك يستفيد منها الفيل؟
9-لماذا يعقمون الإبرة السامة لقتل المحكوم عليهم بالإعدام ؟
10-طيب هذا سؤال أجمل منه:
لماذا كان الطيارون الانتحاريين اليابانيون ( الكاميكاز ) يرتدون خوذة واقية ؟؟؟
11-إذا كان السوبر ماركت يفتح لمدة أربعا وعشرين ساعة في اليوم لمدة عامٍ كامل ، فلماذا وضعت عليه الأبواب والأقفال؟؟
اغنية رشيد القوم بنسمعها بعدين في البيت ...
نحنا ناس الظهر ...
| |
|
|
|
|
|
|
|
|
|
Re: ناس الزقازيق ... أجدع ناس .. (Re: زهير الزناتي)
|
ألف مليون مرحب بسنيرنا المبجل الأستاذ / عبد الحفيظ عباس ..
أسعدنا حضوركم و إنضمامكم لركب سودانيز أون لاين و لأخوتكم الزقازيقاب فحللتم أهلاً و نزلتم سهلاً ..
عبد الحفيظ أستضافنا في شقته في أول أيامنا بالزقازيق و أول من ( ورانا درب الجامعة ) عبر منشية أباظة و المطر و الشبورة ما يدوك الدرب .. و مع ذلك كان المشوار .. كداري ..
أحزنتني جزمتي ـ لا مؤاخذة ـ الجديدة و هي تصارع الطين يومذاك .. وخاصة حينما مررنا بالشارع الذي أسميته فيما بعد ( شارع الجاموسة ) جوار المستشفى و كلية الطب .. و حيث يقف ( بتاع عربية الفول و الطعمية ) و يتحلق حوله عمال الزراعة و خفر الجامعة و هم يعلكون ـ حلوة دي ـ ربطات الخس و يقزقزون بفحول البصل .. أيام ياخي ..
سنيرنا / عبد الحفيظ حاول أن ( يخمنا) من أول يوم ..
و حينما قرأت عليه و من معه رسائل ست الدار بت أحمد وفيها ( البوليس صاقع شيوعية .. شيوعية البوليس فاكر نفسو بنبذ فينا ) قال عبد الحفيظ لمن معه .. البرلوم دة ثوري .. و ( صهينوا ) مني أو ( قطعوا ) العشم فيني مع أنني من ( الأبيض ) !!
و لي عودة لسنيري المبجل ..
| |
|
|
|
|
|
|
|
|
|
Re: ناس الزقازيق ... أجدع ناس .. (Re: عصام دهب)
|
الخالة احسان رحمها الله
- يا طارق يا طارق
- يا حاج انا في الحمام قربت
- واحد صاحبك منتظرك برة
- كويس انا طالع
- اوووووووووه يا مان كيفنك انزل مالك قاعد في العربية
- ياخي امشي البس سريع وتعال
- لبس شنو ياخي هو الاذان فضل ليه ساعتين
- يا طارق جبريل ما تكتر النقة امشي البس ياخ
- ياخي المشوار دة ما ممكن نمشيه بعد الفطور ياخي ما شايف ناس راشد اخوي بطلعوا في البروش في الشارع
- ياخي عليك دينك بطلع عكلتة وامشي البس
مشيت اندرعتلي في بنطلون أليل جينز وتي شيرت جبتو معاي من مصر واتريحتلي بي ريحة
تبخها تحت اباطك بعد دقيقة تلقاهو ابيض زي المضرضرلك سكر فيهو
ركبنا العربية ومشينا العمارات وزلكم وقف في شارع 15 ونزل علي بقالة الحاوي (الكلمة دي في المغرب شينة خلاص)
بقالة الحاوي دي كنت لمن اكون زهجان اجي اتمشى في العمارات واجي جنبها واشوف في علب التونا واتمطق وامشي
واحلم اني شغال وعندي قروش كتار واجي اشتريلي كم علبي منهن
جيت المغرب لقيت التونا ارخص من البرنجي
المهم زولكم خمش ليه حاجة من البقالة في كيس ومشينا حي الرياض
وقفنا العربية فتح الباب ودخل العربية وقال لي خش
لقيت الحوش حوش السرور بلاط يزلق كدي وسِعدِدي ناعمي (نجيلة)
وورد كدي بالجنبات و،شجر ملولو في الحيط
وانا من الله خلقني غير النيمات القدام بيتنا وتلاتة علب نيدو كبار فيهن صباح الخير في حيطنا من تالا ناس عم محمد صالح ما بعرفلي شدر تاني
اها وسط النعمي دي كلها لقيتلي طربيزتا سمحي يالحيل وفيها خمسة صحانة وجنبهن كواري (جمع كورية) صغار كدي من الصيني المزركش
ومناديل قدام كل صحن
- اقعد يا مان
- تقعد فوقك حمى انت نحن وين
- ههههههههههه ياخي روق انت جنك دة اصلك ما بتنساهو
قعدت قدام الصفرة الماهلي دي شويتين جاء راجل كبير كدة الله يديه الصحة وسلم علي:
- ازيك يا طارق رمضان كريم وحمد لله على السلامة
يا ربي دة منو وبيعرفني من وين
- اهلا يا حاج كيفنك وكل سنة وانت طيب
- قالوا لي انت من البركل
- ايوة تحديدا من شبا (البركل شمال)
- وكيف لقيت ناس بيتكم
- والله بخير يا حاج الحمد لله
الراجل قعد يسبح وقام يسقي في الشدر أليلو
شويتين جات داخلة مرة سمحي بالحيل وباين عليها راكزي ومالي مركزها شديد
- ازيك يا ابن الهرمة قالوا لي ما كنت عايز تجي
- ابدا والله بس انا ما كنت عارف نحن ماشين وين
- هسي عرفت انت وين
- ههههههههههههههههه خمنت برضو
- شوف يا ولدي انا ولدت ولد واحد بس لكن هسي بقى عندي اتنين الحمد لله
- يا حاجة دة شرف كبير لي والله
باين عليك اونطجي
المهم من الونسة عرفت انه الزولة السمحة دي شغالة في بنك ابو ظبي الوطني اظنها كانت نائبة المدير
وبقيت اقول في نفسي: يا ربي انا الجابني هني شنو
الناس ديل حتى فطورهم ماهو ياهو كل زول صحن وكوريي قدامو
وهناك في البروش تسمع في كواري الطلس يجلجغن بالحلو مر والليمون المخلوط
وابوي وعم عبد الله يقرشوا في البصل ويلوغدوا في القراريص ويحمدوا ربهم
المهم يا الحبان فطرنا واتونسنا ورجعت لي اهلي بعد اسبوعين عرفت انه الراجل دة ومرتوا مشوا لندن كسفير وزوجته
لمن رجعت الزقازيق تاني وصلت قبل صاحبنا وشايل معاي الشاي والدكوة والويكة
زولك جاء من لندن اتسالمنا وقال لي يا مان الحاجة مرسلة ليك معاي حاجات لازم ترد عليها
لانه مفتكراني حا اغنج بيها:
قميصين وسيوتر برد وكرتونة كيت كات
يمين في نفس اليوم كان في حفلة في الاتحاد لمن مشيت لابسن اسامة خضر لامن شكة فيني وما عرفني
المهم من يومها والزولة دي الله يعلم معتبراني زي ولدها
تضرب لي وتسألني وعن احوالي
لمن رجعت اول مرة وعندي بتي ريم قلت لي محمد صديق لازم امشي ليها
مشيت انا وريم ومحمد صديق لمن شافت بتي سلمت عليها وحضنتها شديد
ودخلت جابت ليها حلاوة ماكنتوش قالت ليها دي حقت براك ابوك دة ولدي يعني انا حبوبتك
رجعت تاني للمغرب والاتصال ما انقطع الى ان جاني ايميل:
bad news
الحاجة غادرتنا اليوم رحمها الله
تلك ايها الاحباب لمن تكن سوى خالتي وامي احسان والدة فردتي حاتم جبارة
رحمها الله
وتقبلها قبولا حسنا
وجعلها الله من اصحاب اليمين
وبنى لها الله قصرا في الجنة
وجعلها الله مع الصديقين والشهداء
واطال الله في عمر عمنا جبارة
| |
|
|
|
|
|
|
|
|
|
Re: ناس الزقازيق ... أجدع ناس .. (Re: عصام دهب)
|
Quote: بسم الله و الحمد لله
اللهم بك أصبحنا و بك أمسينا
وبك نحيا و بك نموت
و إليك النشور
أصبحنا على فطرة الإسلام
وعلى كلمة الإخلاص
وعلى دين نبينا محمد (ص)
وعلى ملة أبينا إبراهيم حنيفاً مسلماً و ما كان من المشركين
سبحان الله و بحمده |
يازقازيقاب
لالالالا للمنشطات
انا عايز اعرف انتو عندكم كم وردية
ياخي جاريتكم بالسهر
لقيت اكثر من مكالمة من المكتب
والشرطه المنزليه بتجر في البطانية
بارينا الكلام السمح لما قربتوا تضيعونا
لكن يظهر بشوف لي حبوب منشطه من نوع (بنجنسون)
________________________
والله كلام الليل ماكلام لما تنوم وانت مفتح
| |
|
|
|
|
|
|
|
|
|
Re: ناس الزقازيق ... أجدع ناس .. (Re: وليد عبد اللطيف)
|
الله ... الله ...
حبيبنا طارق جبريل ...
هنيئا لكما هذه الصداقة الحقة انت وحاتم جبارة ...
وعمق امتنانك الذي تعدي مرحلة الزمالة بالزقازبق ليشمل الاسرة كلها ...
رحم الله والدة حاتم جبارة واسكنها فسيح جناته ...
وهذا هو عمق اواصر العلاقات بين ابناء الزقازيق ...
وقد مثلوا شتي اواصر الروابط الاسرية ...
فكثير منهم تزوج من زميلاته ..
واكثرهم صار نسايب اصدقائة ... محمد المبارك وعصام جلي (يا جلا معلومتي دي صحيحة)
المهم لم تنتهي علاقاتنا بانتهاء الدراسة ...
ولكن امتدت حتي اليوم ...
وهذا البوست يشهد بذلك ...
ومازال العلاقات تزداد بيننا عمقا اكثر من ايام الدراسة ...
وسوف تشمل احفادنا ان شاء الله ...
ياطارق عجبتني الحته دي في وصف حوش ناس حاتم جبارة
لقيت الحوش حوش السرور بلاط يزلق كدي وسِعدِدي ناعمي (نجيلة)
| |
|
|
|
|
|
|
|
|
|
Re: ناس الزقازيق ... أجدع ناس .. (Re: ياسر نجيلة)
|
احلي حاجة الدخول للحوش بالظهر ...
الزمن الميت اسمو ...
يعني نحنا ناس ضهر ساي ...
مابنقدر على الليل او الصباح ...
نحنا بنجي في وقت بكون فيهو ناس الليل والنهار نايمين ...
نشوفكم بكرة ان شاء الله ...
| |
|
|
|
|
|
|
|
|
|
Re: ناس الزقازيق ... أجدع ناس .. (Re: ياسر نجيلة)
|
طارق أجمل ما كتبت في هذا المكان من حيث المعني فالنص
مشحون بالعواطف الإنسانية التي تثير الشجن وتذكرنا بمن
رحلوا من الأحباب ، وكذلك من حيث السرد والوصف والحبكة
حيث لم يسيطر الحوار علي الحكاية ..
| |
|
|
|
|
|
|
|
|
|
Re: ناس الزقازيق ... أجدع ناس .. (Re: زهير الزناتي)
|
اتعرفت على طارق جبريل وحاتم جبارة لما وصلو برالمة
عن طريق الصدفة داخل صالة الاتحاد
الاسم ثم الكلية وبعدين من وين من السودان ...
قلت ليهو انا من الصحافة .. انت من وين قال لى الامتداد
** وين فى الامتداد ... قال لي مربع 3
قلت ليهو عندى عمى ساكن مربع 3 اولادو نصرالدين وفتحى
** لما طارق سمع اسم فتحى اتفاجأ وقعد فى الارض وقال لي لا حولالالا
انت ود عم فتح الرحمن .... اتحاضــنا وشلنا الفاتحة من جديد
فتحى الذى رحل عن دنيانا فى عز الشباب وهو فى السنة الثانية حقوق
اول يوم وانا راجع من امتحان الشهادة السودانية
ومن اليوم داك وانا طارق مرتبطين روحيا ... لو فى اى لمة فى الاتحاد
او اى حفلة ناحية المساكن بفتش ليهم هو وحاتم
رحمه الله والدتنا وخالتنا محاسن واخى فتحى
وتقبلهم قبولا حسنا
وجعلهم الله من اصحاب اليمين
وبنى لهم الله قصرا في الجنة
وجعلهم الله مع الصديقين والشهداء
واطال الله في عمر عمنا جبارة
| |
|
|
|
|
|
|
|
|
|
Re: ناس الزقازيق ... أجدع ناس .. (Re: زهير الزناتي)
|
طارق جبريل شكرا للاستجابة...
تاني شئ...ما شاء الله عليك كاميرتك 20 ميغابيكسل...لأنها تلتقط تفاصيل المكان
بنقاء شديد و دقة متناهية...و ذاكرتك حديدية...عل نسيت حاجة...عربيتم الحمرة
الصورها زهير...
شكرا طارق وواصل ابداعاتك...
ورحم الله والدة حاتم جبارة....
| |
|
|
|
|
|
|
|
|
|
Re: ناس الزقازيق ... أجدع ناس .. (Re: طارق جبريل)
|
يا الله يا عبد الدائم ياخي
......
كنا واقفين جنب دكان ابرهيم في مربع 3
انا وفتحي وصديق حمد وابرهيم الخواض ومامون
اتونسنا كويس لمن جات الساعة 2
فتحي قالينا هوي انا ماشي آخد لي نومة نتقابل العضرية جنب الركن
ومشينت بيوتنا
الساعة خمسة باب بيتنا دقة بي صورة هستيرية
لقيت صديق بيبكي وحفيان
قلت ليه مالك
قال لي فتحي مات يا طارق
بكينا كما لم نبك من قبل
رحم الله فتح الرحمن يا عبد الدائم
كان خبر موته فاجعة في الحلة كلها
| |
|
|
|
|
|
|
|
|
|
Re: ناس الزقازيق ... أجدع ناس .. (Re: طارق جبريل)
|
تعرف يا طارق نفس المشاهد بتاعتك مع حاتم جبارة...هي معاي أنا..مع أسرة عصام جلي
لكن الحكاوي بتاعتك ما بقدر عليها....وموقفك خلى دموعي تجري...
تخيل والد عصام جلي عليه رحمة الله يحتضنك وانت جاي مع عصام جلي وتقعد ليك يومين تلاتة في مدني..
تبل الشوق عند أهلك (أي كانو في كسلا ، مدني الأبيض أي مكان فيهو ريحة الزقازيق) لغاية ما تمشي كسلا
في زول عندو أبوين و أمين؟؟؟ ديل إلا ناس الزقازيق
بالرغم من أنني لا أسوى حاجة في خارطة العم و الوالد عبد الرحمن جلي
إلا أنهم يشملونك برعاية لا توصف و يأتي الوالد جلي وحرمه المصون (والدة عصام جلي) لزيارة خصيصاً لإابنهم محمد آدم في كسلا....
اللهم أرحمهم جميعاً وادخلهم برحمتك الجنة
عليكم الله دي مش حاجة تجنن
| |
|
|
|
|
|
|
|
|
|
Re: ناس الزقازيق ... أجدع ناس .. (Re: محمد صديق)
|
سلامات يا ناس
طارق...فتحت بابآ للحزن كبير...
رحم الله الخالة احسان واسكنها الجنة
بقدر حنيتها وهرولتها الى عمل الخير
كنت عندما ازورهم بعد غياب وانا احضنها
تشتمنى بلهجتها نصغ المصرية وسودانية..
انت فين يا ود يا كلب...فاكر نفسك يعنى
عشان اتجوزت وجبت عيال ..يعنى كبرت علينا
اوعك تانى تغيب كتير...وجايينا كمان من غير
العيال ومراتك؟؟اعمل بيك ايه؟؟روح وانت عامل
زى صاحبك الكلب القاعد فى امريكا...
عندما اتصل بى حاتم وانا برفاعة ناقلآ لى خبر
وفاتها حضرنا انا وخالدة وبكينا بكاء مرآ..
رحم الله الحاجة احسان عبد الحليم واسكنها الجنة
وجعل البركة فى ذريتها والزم عمنا جبارة الصبر
| |
|
|
|
|
|
|
|
|
|
Re: ناس الزقازيق ... أجدع ناس .. (Re: محمد صديق)
|
Quote: طارق جبريل شكرا للاستجابة...
تاني شئ...ما شاء الله عليك كاميرتك 20 ميغابيكسل...لأنها تلتقط تفاصيل المكان
بنقاء شديد و دقة متناهية...و ذاكرتك حديدية...عل نسيت حاجة...عربيتم الحمرة
الصورها زهير...
شكرا طارق وواصل ابداعاتك...
ورحم الله والدة حاتم جبارة.... |
يا الرشيد كانت في الاول عندهم فلسكواجن قعونجة كدة
تعرف يا حبيب
انا بحب الناس الكبار ديل شديد
الله يرحمهم ياخي
يا محمد صديق
في الغربة مرات بتجيك اطياف الناس كدة
وبتلقى نفسك مجبر تكتب عن ناس انت حبيتهم من القلب
| |
|
|
|
|
|
|
|
|
|
Re: ناس الزقازيق ... أجدع ناس .. (Re: محمد صديق)
|
يا تبلدينا اللافندر بقى يجيبوهو فى الشيلة ...
عارف انا دفعتكم روحتها حبتين ذكرنى ليها بالله
هل انت كنت الولد الوحيد ولا فى ناس انا نسيتهم
صالح ، ابتهاج ، خالدة ، فطومة ، بدرية ، اميرة
مع انو الدفعة البعدكم بذكرهم نفر نفر ...
| |
|
|
|
|
|
|
|
|
|
Re: ناس الزقازيق ... أجدع ناس .. (Re: مدثر أبا يزيد)
|
Quote: السى دى بتاع حمزة سليمان ده
انت وهو يا الرشيد
عندكم بس يومين عمل
48 ساعة بس
كدى ما القى نسختى
جايانى لغاية عندى
بالدى اتش ال |
منصور بالايميل ما بينفع؟؟...نرسلهم ليك أغنية لحدي ما نكمل السي دي...على فكره
يوجد 24 أغنية بالسي دي...يعني 24 ايميل...يعني كل يوم ايميل لمدة شهر كده بنكون
خلصنا الأغاني...شو رأيك؟؟؟
| |
|
|
|
|
|
|
|
|
|
Re: ناس الزقازيق ... أجدع ناس .. (Re: مدثر أبا يزيد)
|
يا مدثر أبا يزيد
و الله بالغت...حكاوي زي دي تتجزأ و بالطريقة الصاح
عليك الله كل واحدة في مداخلة منفصلة...أنا هنا بتاع تعليقات لأي حاجة من الزمن الجميل داك
هس نقول شنو في الدفاع الشعبي و لا عادل الجعلي...ولا الشعر المكوجن داك...
لو جاك الرشيد حيقول ليك الله يخرب مطنك ...أو مطنك يخرب....و لأنو انت متابع من زمان و مستمتع...ما أظنك محتاج لي شرح...
وإذا كان بشير معجب بإحدي الحسان معناهو كان مجنون
| |
|
|
|
|
|
|
|
|
|
Re: ناس الزقازيق ... أجدع ناس .. (Re: مدثر أبا يزيد)
|
| Quote: وإذا كان بشير معجب بإحدي الحسان معناهو كان مجنون |
يا جلا بشير كان مخلي الباب متاكى رقراق عشان الحبة تنسرب و ما انسربت...
أبا يزيد ذنبه شنو...يفتح ليهو الباب ضلفتين...
و بعدين خلي الزول في حاله...انت عايزه من أول مباراة يسجل هاترك...ليه
هو أصله مدربه محمد صديق...
قبيل يا جلا قطعنا فيك أنا و موسى عيسى...أعفي لينا عليك الله....
| |
|
|
|
|
|
|
|
|
|
Re: ناس الزقازيق ... أجدع ناس .. (Re: محمد صديق)
|
Quote: انت الاخ عفاف ده منو ما عرفتو
انت يا جلا عرفتو؟ |
و الله يا جنابو يعميني و يطرشني في الزول دا...لكن يمكن مدثر قاصد الزول الكان ساكن معاهم و المقاسم عادل عادل ود الجعلي الغرفة
هس يجي طارق جبريل يقول ههههههههههه....أما جلال بتاع الشمارات خليهو ساكت
ديل ناس مجانين
| |
|
|
|
|
|
|
|
|
|
Re: ناس الزقازيق ... أجدع ناس .. (Re: محمد آدم النور)
|
| Quote: قبيل يا جلا قطعنا فيك أنا و موسى عيسى...أعفي لينا عليك الله.... |
شوف يا الرشيد أنا طالع من رمضان كميات من السماح الآخروي
لكن مشيت كسلا و السماية وحاجات تانية...يعني جاي مفلس
لو دايرين العفو...شوفو يكلفكم كم من الريالات أو الدراهم ...و الحساب في بنك المشرق شارع البلدية ..الخرطوم....غايتو مخارجتكم صعبة...عارفك يا جنابو حا تخش واسطة...لكن أبشنب...كرت الإيه آر تي بتاعو عايز تجديد...دا لو ما خذلني ودي فرصة
قالو علي شقي ومجنون
| |
|
|
|
|
|
|
|
|
|
Re: ناس الزقازيق ... أجدع ناس .. (Re: محمد آدم النور)
|
محمد صديق أبايزيد في سعيه للسوبر هاترك وتحت تدريبك طبعا...لو ختا الريس
ما بتجيهو عوجة تب...تكون في أول الصفحة تجي تلقى الريس دفرك وداك نص الملعب
غايتو لعب خشن زي ده ما شفنا زيو...نحن قلنا موسى عيسى مشغول بي تميراتو ربنا
يحفظهم ليهو...و الريس ميسرة في الاجازة...جينا لقينا لعب الريس ده أصعب معتصم
صعب خلاص...
جلا الحبيب...كم سعر الكيلو بتاع الغفو عندكم...و لا هو بالدستة...أدينا السعر
و رسل رقم الحساب في الماسنجر...حسة لو قلت حسابي في بنك الخرطوم الماشي
يجيك شنو الماشي يجيك شنو...أنا و معاوية مش وقفنا ليك في نص الليل في الشارع
مخاطرين بحياتنا عشان انت تسحب من ATM في بحري...و زهير قال ليك و الله لو شافوك
ناس كسلا يقولو جلا ده انحرف...
| |
|
|
|
|
|
|
|
|
|
Re: ناس الزقازيق ... أجدع ناس .. (Re: الرشيد بابكر)
|
السلام عليكم أيها العزاز
وألف مرحب بأخونا عبد الحفيظ عباس
اللهم رب الناس أذهب البأس أشفي انت الشافي لاشفاء الا شفاؤك
شفاء لايقادر سقما
اللهم داوي أم موسى عيسى بدوائك واشفها بشفائك وأغنها بفضلك
عمن سواك وأبعد عنها كل مايؤذيها
ونعوذبعزة الله وقدرته من شر مانجد ونحاذر
| |
|
|
|
|
|
|
|
|
|
Re: ناس الزقازيق ... أجدع ناس .. (Re: الرشيد بابكر)
|
عليك الله يا طارق جبريل ما حاجة تحير
ناس رائعة زي الراحلة الحاجة إحسان عليها
الرحمة والغفران وعم جبارة الله يديهو العافية
وطول العمر يجيبو زول زي حاتم جبارة دا ...
ياخي دا العيد ما جا قالينا كل سنه وأنتو طيبين
ولا رسالة ، ولا إيميل ، لكن قول ليهو سامع بتلفوناتك
من أمدرمان للخرطوم ايها الوغد ،، وصحي النار تلد الرماد
| |
|
|
|
|
|
|
|
|
|
Re: ناس الزقازيق ... أجدع ناس .. (Re: زهير الزناتي)
|
Quote: يازقازيقاب
لالالالا للمنشطات
انا عايز اعرف انتو عندكم كم وردية
ياخي جاريتكم بالسهر
لقيت اكثر من مكالمة من المكتب
والشرطه المنزليه بتجر في البطانية
بارينا الكلام السمح لما قربتوا تضيعونا
لكن يظهر بشوف لي حبوب منشطه من نوع (بنجنسون) |
محمد ادم النور
ياخي ناس وردية الصباح كسلانين
لا واحد بلعب الون ولا واحد بلعب التو
ولا واحد بعزمك كبوية شاي بقرش
يظهر المصاريف لسه ما وصلت ليهم من السودان
___________________________
ياليل انت عارف اشياء عن غرامي
ياليل انت عارف توهي وهيامي
اما بلغك ياليل
بالله عيرني سماع
احكيك حبي الضاع
وتغير الاوضاع
وبصراحه حبيناكم يالاجداع
| |
|
|
|
|
|
|
| |
زهير الزناتي
محمد صديق
معتصم جعفر
الرشيد بابكر
محمد عيد
وليد عبد اللطيف
عفاف علي ميرغني
عماد الدين عبدالله
جلال عثمان
محمد آدم النور
HAMZA SULIMAN
عبد الحفيظ عباس
عبد الدائم سيد أحمد
منصور عبد الرازق
طارق جبريل
ياسر نجيلة
عصام دهب
سامي عبد الوهاب إدريس
مدثر أبا يزيد
أحمد إسماعيل
فيس بوك
تويتر
انستقرام
يوتيوب
بنتيريست