|
|
 كيف تعرف أنك في السودان
|
لو بحثت عن خط (عبور مشاة) أو (أمامك مدرسة) أو(منحنى) في كل (العاصمة) ولم تجده
تبقى أكيد في السودان
· لو أنت في بلد فيهو سنه سابعة وسنة تامنه ابتدائي… تبقى أنت أكيد في السودان
· لو طالعتك إعلانات شركات (مسئول) كبير وهو لا زال (في الخدمة)… تبقى أنت
أكيد في السودان
· لو (لبد) ليك شرطي (مرور) في نهاية شارع اتجاه واحد) وخلاك لمن دخلت وجاك بى
(دفتر إيصالاتو)… تبقى أنت أكيد في السودان
· لو لقيت في بلد ما فيهو (معينات البحث العلمي) وكل يوم الجامعات تناقش(خمسين) رسالة
دكتوراه و(ميتين) رسالة (ماجستير) … تبقى أنت أكيد في السودان
· لو أنت في بلد وزارة الصحة فيهو قالت (الدواء) ده (فاسد) أحظروهو .. وبعد شويه
قالت (ما فاسد) خلوهو .. وبعد شويتين (فاسد) أمنعوهو …. تبقى أنت أكيد في السودان
· لو لقيت في بلد (الصحف) بتتقفل بى (مادة) في القانون معموله للمطاعم …تبقى
أنت أكيد في السودان
· لما تلاقى الترزي كاتب على باب المحل بتاعو آيه بتقول ( وفصلنا كل شئ تفصيلا) صدق الله العظيم …
تبقى أنت أكيد في السودان
· لو لقيت موية المطر بتقعد أسبوعين في الشوارع أكيد أنت في السودان
· لما تخلص من شغلة في مكان وتيجى تركب عربيتك تلاقى (المساحات) مرفوعة عشان تعرف على طول انو في واحد
مسحها ليك وحياخد منك ألف جنيه … تبقى أنت أكيد في السودان
· لو قرأت الصحف في 1987 و في 2016 عن (أنتهاء قطوعات الكهرباء) ولقيت نفس الكلام في صيف 2030 …
تبقى أنت أكيد في السودان
· لو زوجة الوزير مليانة دهب بتتجدع بيه بالعلن في الشارع من غير حساب وأطفالها يملطشوا أولاد الجيران ....
أكيد أنت في السودان
· لو أهم (كبرى) في عاصمة البلد صيانتو عاوزه ليها (سنتين) .. … تبقى أنت أكيد في السودان
· لو بهدلوك في أي مكان واشتكيت للشرطة قالوا دا مش اختصاصنا امشي اشتكي في الثروة الحيوانية أكيد أنت في السودان
· لو لقيت أنو وزارة الداخلية عندها مؤسسات (تعليمية) ووزارة التعليم عندها مؤسسات (صحية) ووزارة الصحة عندها
(شركات إنشائية)… تبقى أنت أكيد ف السودان
· لو دخلت (الوزارة) وأنت مؤجر في (زقلونا) وطلعت وعندك عمارتين في (قاردن سيتى )تبقى أنت أكيد في السودان
· لو اشتعلت في الخدمة المدنية 30 سنه وأدوك معاش شهري يساوى 3 كيلو لحمة أنت أكيد في السودان
· لو توقفت (الحركة) إثناء ساعات (الذروة) واكتشفت أن السبب (كشه) …. تبقى أنت أكيد في السودان
· لو عدمت (التعريفة) وكمان دخلت في (ديون) للإيفاء بنفقات (فراش) قريبك الذي توفي إلى رحمة الله ….
تبقى أنت أكيد في السودان
· لو وجدت أن (ترخيص عربتك) يساوى (ربع) قيمتها …. تبقى أنت أكيد في السودان
· لو تقدم ابنك (المهندس) لشغل وظيفة وكان (الأنترفيو) عن (صلاة الجنازة) تبقى أنت أكيد في السودان
· لو (فجأة) اكتشف (المسئولون) أن (الخريف) على الأبواب …. تبقى أنت أكيد في السودان
· لو عندك (الكلية) اليمين متعطلة وعاوزين يشيلوها ليك قاموا شالوا الشمال السليمة لأنو الدكتور كان ماسك
الأشعة (بالمقلوب) …. تبقى أنت أكيد في السودان
· لو مكث (مرتبك) معك (تلاته ساعات وإطناشر دقيقه) هى الفترة من لحظة استلامه من الصراف إلى حين عودتك للمنزل ….
تبقى أنت أكيد في السودان
· لو فاز فريقك الذي تشجعه على الفريق الخصم في مباراة الذهاب 8/صفر وخسر في مباراة الإياب 12/صفر….
تبقى أنت أكيد في السودان
· لو لقيت لوري التراب وكومر البلدية من سنة 50 شغال بالإضافة للرقشة في نفس الشارع أكيد أنت في السودان
· لو وجدت أن رؤساء (الأحزاب) هم (رؤساء) مدى الحياة …. تبقى أنت أكيد في السودان
· لو وجدت أن نسبة الفقر تزداد بازدياد (معدل النمو تبع الحكومة) …. تبقى أنت أكيد في السودان
· لو كيلو اللحمة غالي جدا في بلد يعتبر من أكبر المنتجين للثروة الحيوانية...... أكيد
أنت في السودان
· لو ضربتك عربية حكومة و مشيت القسم و طلعتا أنت الغلطان أكيد أنت في السودان
· لو لقيت كل الناس وحتى المذيعين والمذيعات بتنطق القاف غين أكيد أنت في السودان
· لو خشيت مؤسسة حكومية ولقيت الموظفين ما في أسناء الدوام أكيد أنت في السودان
· لو دخلت نفس المؤسسة الحكومية الفوق دي الساعة إطناشر ضهر وقالوا ليك الموظفين
لسه في الفطور ...أكيد أنت في السودان
· لو طلعت مستحمي و متريح وماشي عرس و دخلت العرس زي الكنت بتلعب كوره أنت أكيد و أكيد في السودان
· لو ماشي مشوار 10 كيلو متر و وصلتا في 4 ساعات أنت أكيد في السودان
· لو أنت مواطن وجيت تسافر للخارج وطلبوا منك تأشيرة خروج (البلد الوحيد في العالم الذي يفرض تأشيرة خروج
للمواطنين)...أكيد أنت في السودان
· لو لقيت فوضى وزحمة في الشوارع وإشارات المرور ما شغالة و ما في بوليس حركة....أكيد
أنت في السودان
· لو لقيت مطعم قدام دورات مياه أكيد أنت في السودان
· لو جيت من السفر بالطيارة في رحلة استغرقت ساعة ونصف طيران وخرجت من المطار
في تلاتة ساعات ,, أكيد أنت في السودان
· لو مشيت الحوادث و قالو ليك لو عندك رصيد اضرب للدكتور لأنو نايم أنت أكيد في السودان
· لو مشيت لى دكتور في حي الشهداء ولقيت في عيادتو ريحة الحمامات طاقة وما فيها
موية ....أكيد آنت في السودان
· لو مشيت لنفس الدكتور الفوق ده عشان تحجز بعد المغرب ولقيت الحجز بتاعك رقم 95 أكيد
أنت في السودان
· لو مشيت تشتري سمك من الموردة وما شفت السمك لأنو مغطى بالضبان أكيد
أنت في السودان
· لو شغال في السوق و قالو ليك ادفع ضريبة ميزام أكيد أنت في السودان
· لو لقيت أجنبي عاطل عندو صلاحية اكتر منك و الناس كلها تحترمو أنت أكيد في السودان
· لو أعلنوا عن 3000 وظيفة و مشيت تقدم في اليوم الأول و قالو ليك تعال بكرة لأنو لجنة المعاينة ما اكتملت و
جيت تاني يوم و لقيت التقديم قفل أنت أكيد في السودان
· لو لقيت حي ساكن فيهو مسئول كبير و الكهرباء فيهو ما بتقطع أكيد أنت في السودان
· لو محتاج أي حاجة و لقيت اقرب حتة تجيبا منها على بعد 3 كيلو متر أكيد أنت في السودان
· لوقريت الكلام دا وما علقت ولا جنيت وكنت بارد شديد ومستسلم أكيد أنت من السودان
· ولو ما مرت بيك أي حاجة من الفوق دي أكيد أنت ما من السودان
بقلم الكاتب: الفاتح يوسف جبرا
***********************
|
|
 
|
|
|
|
|
| |
فيس بوك
تويتر
انستقرام
يوتيوب
بنتيريست