|
|
 Re: ناس الخرطوم القدامى (Re: قلقو)
|
| Quote: اذن تخرجنا من مدرسة وسطى واحدة زمازالت سيطان استاذ مصرى بتوجعنى لغاية الليلة. |
قلقو ..
هاك ديل و حاول اسعفنى بمن ضاع من الذاكرة من استاذتنا الكرام :
عيسى - قرنى - منزول - الضرير - خضر ( ابو اضان ) - عبد الباسط - سليم - محمد نور - حسن عبد العزيز - احمد محمد الحسن - على مرجان - المصرى - جانو - صديق - الشهلابى - ... الناير .. الدود .. يعقوب
الرحمة لمن مضى... و طول العمر لمن هو باقى
| |
  
|
|
|
|
|
|
|
|
Re: ناس الخرطوم القدامى (Re: حيدر امين)
|
Quote: قلقو ..
هاك ديل و حاول اسعفنى بمن ضاع من الذاكرة من استاذتنا الكرام :
عيسى - قرنى - منزول - الضرير - خضر ( ابو اضان ) - عبد الباسط - سليم - محمد نور - حسن عبد العزيز - احمد محمد الحسن - على مرجان - المصرى - جانو - صديق - الشهلابى - ... الناير .. الدود .. يعقوب
الرحمة لمن مضى... و طول العمر لمن هو باقى |
صديق الزين , زمراوى , عيسى الحلو,
بالله يا قلقو ادينا الاسم الكامل ,,,, صور الخرطوم الاهليه البقت محلات ملابس واحذية واتصالات موجوده ,, فى الطريق
| |
|
|
|
|
|
|
|
|
|
Re: ناس الخرطوم القدامى (Re: حيدر امين)
|
التحية لكل الحبابيب ,,, وتحية خاصة للاعب الفنان والمدفعجي يوسف ابوصلعة.
نحن صغار كنا نمشي نتفرج علي دوري المنازل في الخرطوم الاهلية وكان هنالك
لعيبة كبار في المدرسة ,, ولاأنسي كانت تقدم الدعوي للفرق الكبري للعب مع
فريق المدرسة الاهلية ,,, بشري وبشارة وسليمان والدحيش واولاد العاتي الخخخ.
طبعا يا يوسف نحن اولاد حلة حي جاكسون ود حلتنا واخونا الكبير يوسف مرحوم
ورئيس نادي النيل عمنا جمال عليه رحمة الله . بس نسيتوا عمنا الدود جلاد الطلبة.
في فترة يا يوسف انت وأزهري العمدة عملتوا ارهاب شديد لزغبير والطيب سند بالله
تتذكر تلك الفترة؟.
قلقو أفصح لينا عن اسمك وبيتكم وين ؟ دار الحنان في حلتنا ,, بس نحن درسنا
في الخرطوم الاميرية ايام ناس التاج محجوب وابراهيم عوض عليه رحمة الله,,,
طبعا أجمل ليمون وشعير بيحبوهو اولاد الاهليه كان في كشك عمنا الشفيع,,,
| |
|
|
|
|
|
|
|
|
|
Re: ناس الخرطوم القدامى (Re: سيف الدولة كامل)
|
سيد البوست وضيوفو
سلام
بوست ظريف وفيهو معلومات كثيره
عشان كده قلت أدلى بدلوى على قدر حبة المعلومات العندى...
الأستاذه المعلم ...ماما سعاد إبراهيم أحمد عضوة البورد هى من سكان نمره إتنين الأصليين
وأفتكر والدها المهندس إبراهيم أحمد برضو....زول يصححنى
حى الزهور من الأحياء التى أنشئت فى أواخر الخمسينات
عدد بيوتو ما كبير حوالى ميتين كم وسبعين بيت
وهو بقع ما بين الديم جنوباً ومقابر فاروق وبيوت الحجر شمالاً...
ومن الشرق بفصلو من العمارات مابين شارع 15 وشارع 25......شارع محمد نجيب
اللى هو شارع الصحافه شرق سابقاً
ومن الغرب حبة بيوت من بيوت الديم قبل ما تصل شارع الغالى...
ومساحة بيوتو أصغر من بيوت العمارات وأكبر من بيوت الديم
الناس الإشترو بيوت فى الحى ده غالبيتهم موظفين
والدى الله يرحمو إشترى بيتنا فى حوالى سنة 1960
جيراننا ناس حامد العربى...كان منشد فى إذاعة أمدرمان
ووالد عبدالله عربى العازف...
ناس المهندس المعمارى إبراهيم الأسد جد عضو البورد ود أستاذ معتصم ...
بيتهم كان واحد من بيتين من طابقين فى حى الزهور قبل الأسمنت يكتر
ناس عبد العزيز بحيرى...الله يرحمو وأولادو ناس مصطفى بحيرى...
وأخو بحيرى الكان مدير بنك السودان أفتكر....
ناس عمى عمر الهد الله يرحمو من ناس القضارف....
الفسحه التانيه بعد المركز الصحى فيها ناس مشاوى وناس الليرى
بتذكر زمان قبل نمشى بورتسودان كنا بنمشى نلعب جنب الخرطوم الثانويه بنات...القديمه...
وما كان فى مبانى وعمارات جنبها...كانت فسحه فاضيه....
ولقينا شجرة بطيخ قايمه ...كل يوم نشيل الزمزميات ونمشى فى المساء عشان نسقيها
بعد كبرت البطيخه وحددنا اليوم ال ح نمشى ناكلها فيه...
أخوى وواحد من أولاد الحله قالو ما ماشين...
مشينا برانا ....لقينا دم بطيختنا المنحوره على الأرض...وكانت شكله...
حسى بنو مستشفى إبن سيناء فى الفسحه القداميه
حى الزهور فيها شيوعيين كتار
_______________
يا عمرو...
سلام
لو ما غلطانه فيك وما أفتكر
هل جدك إبراهيم خليل كان أول محافظ للخرطوم...مش؟؟؟...
| |
|
|
|
|
|
|
|
|
|
Re: ناس الخرطوم القدامى (Re: Egbal Elmardi)
|
يا شباب
كيف حالكم
تلقيت اتصال تلفونى من اخى ( الاصغر ) حيدر امين قبل لحظات .. طلب منى نكب فى هذا البوست كل ذكريتنا فى مدينتنا الام الخرطوم .
بكرة الخميس جاهز ليكم ..
بسرعة كدا :
الغالى سيف الدولة.. حوش جدى / يوسف حسين كان من طابقين فى نفس شارع ناس يوسف مرحوم قصاد دكان عمك الزبير .. من هنا سنبدأ.
الحبوب قلقو .. عذبتنا !! دايرين الاسم كامل .. سألت مساء اليوم متوكل مبارك امان ( كولا ) برضو ما عرفك
ماضى ابو العزائم و حيدر امين ... الصور بسرعة لانها ستفتح لنا باب كبير للذكريات
ود ابنعوف .. فاتنى ان اشكرك على هذا البوست فمعذرة يا ابن الاكابر ,, مودتى لك
صلحوا لينا البوست بشوية ( جكس ) .. مع بتنا اقبال المرضى .. انت بت منو فى ناس المرضى .. بنعرفهم كلهم ؟
تصبحوا على خير
ابو صلعة
| |
|
|
|
|
|
|
|
|
|
Re: ناس الخرطوم القدامى (Re: يوسف محمد يوسف)
|
Quote: الناس الإشترو بيوت فى الحى ده غالبيتهم موظفين
والدى الله يرحمو إشترى بيتنا فى حوالى سنة 1960
جيراننا ناس حامد العربى...كان منشد فى إذاعة أمدرمان
ووالد عبدالله عربى العازف...
ناس المهندس المعمارى إبراهيم الأسد جد عضو البورد ود أستاذ معتصم ...
بيتهم كان واحد من بيتين من طابقين فى حى الزهور قبل الأسمنت يكتر
ناس عبد العزيز بحيرى...الله يرحمو وأولادو ناس مصطفى بحيرى...
وأخو بحيرى الكان مدير بنك السودان أفتكر....
ناس عمى عمر الهد الله يرحمو من ناس القضارف....
الفسحه التانيه بعد المركز الصحى فيها ناس مشاوى وناس الليرى |
وناس بهاء الدين و عصام ابوبكر
| |
|
|
|
|
|
|
|
|
|
Re: ناس الخرطوم القدامى (Re: حيدر امين)
|
Quote: يا شباب
كيف حالكم
تلقيت اتصال تلفونى من اخى ( الاصغر ) حيدر امين قبل لحظات .. طلب منى نكب فى هذا البوست كل ذكريتنا فى مدينتنا الام الخرطوم .
بكرة الخميس جاهز ليكم .. |
تمام يا جنابو انا جاهز نص الخميس والجمعه والسبت كامل
| |
|
|
|
|
|
|
|
|
|
Re: ناس الخرطوم القدامى (Re: يوسف محمد يوسف)
|
سلام للجميع
فى الإنتظار يا قلقو .. يبدو انك اصغر مننا نحن العجايز لذلك ذاكرتك ما شاء الله
هل تذكرون اول مدرسة تعليم قيادة سيارات بالسودان
مدرسة عبد الغني الحاج لتعليم قيادة السيارات
اول مرة نشوف عربية بفراملين وكلتشين .. كانت فرجه
بدأت بالمقرن وإنتقلت لنمرة 3 كان متذكر كويس ، ولده محجوب اين هو الان ؟
هل نتذكر الاغاريق السكنوا زمان ..
والتلفزيون الختتو حكومة عبود - ابيض واسود- في قهوة عبده دهب وسط ميدان عبدالمنعم، وشاهدنا فية مقتل الرئيس كندي ..
مظاهرات اكتوبر والشهيد التنقاري ...
أب صلعة يا اخوى هل تتذكر ايام المدرسة كانت المباريات تقام داخل مدرسة الخرطوم الاهلية والقون قدام الحيطة. اتذكر كنا بنتفادى نقيف هناك خلف المرمى الشايت عليه يوسف اب صلعة او احمد جريمة ..كانت كورة مدراس لكن امتع من الفريق القومي الايام دي
الى لقاء ..
| |
|
|
|
|
|
|
|
|
|
Re: ناس الخرطوم القدامى (Re: قلقو)
|
Quote: وعمي الشيخ سيف الدين علي علاقة حميمة بال ماضي وابو الريش ببري ومشيت معهم
أكثر من مرة لبيوتكم ببري وشقيقي الاكبر الفاضل كامل علي صلة كبيرة بأهل بري لانة
مقيم في السودان.واولاد مولانا حسن البداني في الحساب أعمامي لانه أمهم خالة الوالد |
شوف الدنيا دى ضيقه كيف يا سيف الدولة تعرف اولاد المرحوم حسن البدانى ديل اولاد عمى عديل كده وخالى كمان
ولانسبة لماضى وابو الريش اولاد خالهم ( وهم اولاد خالتى )
يعنى المرحومه والدتهم عائشة حبوبتك ؟؟؟ ,,,, عجيبه يا دنيا
| |
|
|
|
|
|
|
|
|
|
Re: ناس الخرطوم القدامى (Re: حيدر امين)
|
العزيز \حيدر امين ,,, تحية ومليون سلام
سبحان الله فعلا الدنيا ضيقة, نعم حاجة
عائشة خالة الوالد, والد عائشة وحبوبة
ابوي من أمه اخوات,,,والله يا حيدر بتربطنا
ببري علاقات وطيدة بدأها أجدادنا من وقت طويل.
مثلا أولاد الطاهر السيد, دكتور محمد ابراهيم الطاهر
وعمر ابراهيم والمرحوم عصام ابراهيم واولاد الدليل
وناس قسومه ديل اصدقاء الفاضل اخوي من الطفولةوعشنا
ايام طيبة معاهم وكنا نلتقي في حوش العمدة كرم الله
في منزل عمنا المرحوم علي الطاهر السيد والد جنابو
شاكر وماهر ودكتور نادر.
فعلا يا حيدر ناس الخرطوم القدام اهل بحق وحقيقة.
مودتي
(عدل بواسطة سيف الدولة كامل on 06-24-2010, 09:08 AM)
| |
|
|
|
|
|
|
|
|
|
Re: ناس الخرطوم القدامى (Re: حيدر امين)
|
العزيز \حير امين ,,, تحية ومليون سلام
سبحان الله فعلا الدنيا ضيقة, نعم حاجة
عائشة خالة الوالد, والد عائشة وحبوبة
ابوي من أمه اخوات,,,والله يا حيدر بتربطنا
ببري علاقات وطيدة بدأها أجدادنا من وقت طويل.
مثلا أولاد الطاهر السيد, دكتور محمد ابراهيم الطاهر
وعمر ابراهيم والمرحوم عصام ابراهيم واولاد الدليل
وناس قسومه ديل اصدقاء الفاضل اخوي من الطفولةوعشنا
ايام طيبة معاهم وكنا نلتقي في حوش العمدة كرم الله
في منزل عمنا المرحوم علي الطاهر السيد والد جنابو
شاكر وماهر ودكتور نادر.
فعلا يا حيدر ناس الخرطوم القدام اهل بحق وحقيقة.
مودتي
| |
|
|
|
|
|
|
|
|
|
Re: ناس الخرطوم القدامى (Re: سيف الدولة كامل)
|
| Quote: قريت سنتين في مدرسة حي عبدالمنعم الابتدائية وبعدها للخرطوم شرق |
احمد ابن عوف لو ما اخاف الكضب تكون اول الفصل بتاعنا في مدرسة حي عبدالمنعم الابتدائية ارجو ذلك 1971م - 1977م
| |
|
|
|
|
|
|
|
|
|
Re: ناس الخرطوم القدامى (Re: Mutwali Malik)
|
جنابو\ يوسف ابوصلعة ,,, مليون تحية واحترام
جدك يوسف حسين علم من اعلام الخرطوم وبيتكم في شارع
صالح باشا وجيرانكم من ناس الخرطوم القدام أولاد عمنا
صديق ركابي واولاد عبد الله الزبير دكتورفريد وأخوانه
وولاد حاج نقد الله ( مطبعة مانكو حاليا) وشيخة المضيفات
بالخطوط الجوية السودانية أختنا العزيزة سعاد رسمي
واولاد النحاس وال الدسوقي والباروني والحكيم وكشة
وشروني والسواحلي وما ننسي زملاء المهنة المرحوم ديدي
ومعتصم محمد عبد الحليم طياري الاسترايك ماسترواللاعب الفنان
جون وسعادة اللواء معاش كمال عمر بابكر واخوه الفاتح خواجه
لاعب الاهلي والفنان جنابو جمال يوسف واولاد الجاك طه واسماعيل
البيلي اولاد المنشاوي واولاد تلب واولاد التهامي وال مامون حسب
الرسول وحبيبنا الوجيه الفاتح يس وحليل ميدان الجيل ,ايام.
وين يا أخوانا دينا بنت قلب الخرطوم ما شافت البوست ده؟
واصل يا جنابو ونحن في انتظارك.
| |
|
|
|
|
|
|
|
|
|
Re: ناس الخرطوم القدامى (Re: سيف الدولة كامل)
|
اخوتى ابناء الخرطوم عموم
انتم هنا تعطرون هذا البوست بعبق المحبة و الالفة و السيرة العطرة التى عرف بها اهلنا فى مدينة الخرطوم.. فانتم امتداد لذاك الزخم الذى ميز اهلها عن غيرهم .. لذلك اجتماعكم هنا هو اعادة لنضم العقد الماسى الفريد لاحيائها ولاهلها و لابنائها و ما عاشوه من حلو ايام تزين تاريخ جياتهم باحلى الذكريات .
مقترحان صغيران اذا سمح لى صاحب البوست :
1. ان يعرف كل منا نفسه بصورة مبسطة للتوثيق ولتسهيل استرجاع الذاكرة .
2. المداخلات تكون مصغرة sandwich عشان نتذكر اكبر قدر من الذكريات .
لضيق الزمن سأبدأ الى حين موافقة اخونا احمد ابنعوف :
الاسم : يوسف محمد يوسف حسين
اللقب : يوسف ابوصلعة
المولد: الخرطوم (3) بعد انتقال الاسرة - لكبرها - من الخرطوم غرب
الدراسة : الاتحاد الاولية - الخرطوم الاهلية الوسطى - الخرطوم الثانوية القديمة - الكلية الحربية
نبذة تاريخية : حياة متكاملة بكل مباهجها و حتى الان فى مدينة الخرطوم و اين ما اكون اعيش نمط حياة الخرطوم .. فانا احبها و لا ارى غيرها
الاقامة الان : المملكة العربية السعودية - جدة ( لانها ثشبه الخرطوم الى حد ما)
للاتصال : 00966540325353
نواصل
| |
|
|
|
|
|
|
|
|
|
Re: ناس الخرطوم القدامى (Re: سيف الدولة كامل)
|
QUOTE
دار الحنان في حلتنا ,, بس نحن درسنافى الخرطوم الأميرية
حبيبنا سيف الدولة والأحباب المتداخلين..
حنان مين يابااللى درسنا فيها ده بس كلام انا كتبتو ليوسف ابوصلعة عشان اغيظ بيه كوفى ..فياسيدى الكريم انا درست الأولية بمدرسة الخرطوم غرب الأولية 1 اياميها كان الناظر هو المرحوم على عباس النعمة وبما انو العبدلله كان بليد فقد اعدت سنة رابعة فى مدرسة حى عبدالمنعم ومنها انتقلت للمرحلة الوسطى .
اما عن منطقة السكن فكنا نسكن الخرطوم 3 (قرب ناس عارف عفان العضو معنا فى هذا البورد)وقرب قسم واشلاق البوليس الجنوبى (ناس عصام عبدالحفيظ الفنان التشكيلى والمصور الرائع بصحيفة اجراس الحرية)وبالقرب من مدرسة الأم وغير بعيدين عن ميدان عبدالمنعم (الأسرة لاحقا) وسينما الوطنية جنوب وميدان الليق ومخازن وزارة الصحة وسوق السجانة ونادى بوهين وجامع انصار السنة,ولم نكن بعيدين عن ميدان الجيل ناس الريح رضوان واحمد المك (الملحن الحالى)والذى كان يلعب كرة القدم كأبدع مايكون واخوانه فوزى وفتحى المك (الملحن المعتزل) كما لم نكن بعيدين عن منطقة الزهور ناس عمر وبابكر عربى والتى تعرفنا ولعبنا معهم كرة القدم بفريق الأمير بالعمارات وكان يلعب معنا الكابتن فوزى التعايشة والمرحوم صلاح حمدالله شقيق الشهيدفاروق حمدالله كما اذكر كان يلعب معنا بالفريق حسن وصلاح ابناء الفنان الرائع المرحوم عثمان حسين وكذلك ابناء محمد توفيق وسيد احمدعبدالهادى وابناء الطاهر المقبول ومحمد نصر عثمان وبشير محمد سعيد رحمهم الله جميعا.
كما لا أنسى كان يلعب معنا (صالح اليهودى) كحارس مرمى ولم نشعر او يشعر هو فى يوم من الأيام بأنه مختلف او غريب عنا فى شيئ وقد سمعت فيما بعد بأنه قد رحل الى اسرائيل آسفا لفراق السودان واصدقاءه بها . وقاتل الله السياسة والسياسيين.
وتطول قائمة الأصدقاء والمعارف والأحباب ولكنها سنة الحياة والبركة فى هذا المنبر الذى جعل التلاقى بيننا ممكنا ولو اسفيريا.
ولنا عودة ان شاء الله .
| |
|
|
|
|
|
|
|
|
|
Re: ناس الخرطوم القدامى (Re: سيف الدولة كامل)
|
العزيز \قلقو,,, سلامات ,,, الحنان اااال.
اكيد دفعتك في الخرطوم غرب 1 المرحوم سيف الدين
بابكر جعفر و محمود واسماعيل زكريا من حي باريس
وسيف الدولة بخيت السيد واولاد تلب واولاد التهامي,
نسيت تذكر ناس فواد نقة كانوا قريبين منكم والمضيفة
ريتاوكمال محمد سعيد ( عمك تنقو) وحلة كوافير برادايس
واولاد خوجلي ابو الجاز الخخخخخخخخ.
نحن يا قلقو الدفعة الوراكم في الخرطوم غرب 1
لكن شقيقي الاكبر الفاضل كامل بيكون عاصركم في المدرسة.
مودتي
| |
|
|
|
|
|
|
|
|
|
Re: ناس الخرطوم القدامى (Re: سيف الدولة كامل)
|
حبيبنا سيف..
نعم بالضبط كدة كان من دفعتنا بالخرطوم غرب ابناء محى الدين تلب وعبدالله التهامى على الزين النحاس ومحمود على ادريس ومعتصم عبدالغفار ويوسف زيدان وصالح محمود اسماعيل واولاد محمد الحاج برى وابنه عبقرى زمانه يسرى وابناء مجذوب البحارى وتطول القائمة ولا ادرى ان كان بوزارة التربية والتعليم ارشيف يحفظ اسماء كل هذه الدفع بكل المدارس واسماء معلميهم..
| |
|
|
|
|
|
|
|
|
|
Re: ناس الخرطوم القدامى (Re: قلقو)
|
شكرا لكل الاخوة والاخوات الذين زاروا البوست وعطروه بقلامهم
وذكرياتهم
ناس البوست موش طلعوا بس بعرفوا بعض من جدود جدودهم، ولكن طلعوا كلهم قرايب عديييل كده
سعادتك يوسف حسين يوسف
من غير استئذان يا حبيب، تتفضل وشكرا لاقتراحك
| Quote: . ان يعرف كل منا نفسه بصورة مبسطة للتوثيق ولتسهيل استرجاع الذاكرة . |
أحمد عوض الكريم ابن عوف سليمان
السكن: الخرطوم اتنين ثم السوق العربي ثم الاغتراب (حاليا في الدمام)
المدارس: مدرسة حي عبدالمنعم الابتدائية، الخرطوم شرق الابتدائية، الخرطوم الاميرية (سنة واحدة فقط)
الخرطوم الجديدة ثم جامعة الخرطوم مدرسة العلوم الادارية 90 - 95
من الاهل في الخرطوم: من ناحية الوالد آل ابن عوف سليمان، آل كمير
من ناحية الوالدة: آل طه محمد ابو زيد او طه بك (الخرطوم غرب) امير طه ومحمود طه وحسين طه (صريف مالية مصر والسودان)
آل جاويش، محمد عباس جاويش واخوالي من الرياضيين عبداللطيف محمد عباس (الملاكمة) وعبدالله زاوية (الباكست)
,وآل ابراهيم سليمان
وقطعا تمتد علاقات النسب والقرابة لكل اهل الخرطوم القدامى
تحياتي
| |
|
|
|
|
|
|
|
|
|
Re: ناس الخرطوم القدامى (Re: أحمد ابن عوف)
|
الاخ متولي مالك
| Quote: احمد ابن عوف لو ما اخاف الكضب تكون اول الفصل بتاعنا في مدرسة حي عبدالمنعم الابتدائية ارجو ذلك 1971م - 1977م |
بالضبط كده، درست سنتين فقط اولى وتانية، 76-78
وما شاء الله على ذاكرتك
هل انت من اسره ابراهيم مالك في الخرطوم (2)؟؟ كنا بنرجع بنفس الشارع الى البيت
البيت الاحمر والبيت الاصفر والبيت الرمادي (آل النفيدي)
ولي سنتين بفكر في مشروع (تخيل سنتين تفكير) بس الغربة هي السبب، مشروعي يا سيدي
انو ارجع المدرسة واطلب الارشيف بتاع المدرسة واحصل على كل اسماء الطلبة في الفصل،
ومع سهولة البحث الالكتروني الزول ممكن تلاقيه في فيس بوك او سودانيز او اي ملف آخر، ونحاول
على الاقل الاتصال مع بعض ومعرفة مصائرنا، دا حيكون اجتماع بعد كم ؟؟ 35 سنة
والبحث عن معلم الفصل استاذ عصام، وتكريمه المهم نعمل حاجة
السنة الفاتت زرت المدرسة، ومعي ابنائي ودخلنا الحوش (يوم جمعة) تصدق وتآمن بالله
ان المدرسة الآن كلها فصولها وحيشانها اصبحت تحت ظلال الاشجار، منظر عجيب عندما تدخل،
الشمس لا تخترق اي مكان داخل المدرسة
معاي في المشروع وللا كيف؟؟
_________________
الاذن يا شباب، ساغيب تلاتة ايام بغرض مامورية عمل، وسنكون متابعين من البعد
| |
|
|
|
|
|
|
|
|
|
Re: ناس الخرطوم القدامى (Re: أحمد ابن عوف)
|
| Quote: للتاريخ ........... والدي محمد عثمان عبدالحليم أو (عثمان عبدالحليم) كما يعرفه اهل الديم والسجانة ...... هو صاحب فكرة قيام نادي جلاس وبمساعدة نفر كريم من اهلنا في الديم والسجانة |
وللتاريخ ايضا يا جنابو عمر عثمان
احنا بالضرورة قرايب، لاننا من جلاس تحديدا
هل لديك علاقة بسفيرنا في الامم المتحدة محمود عبدالحليم؟؟ لانه من جلاس ايضا
تحياتي
| |
|
|
|
|
|
|
|
|
|
Re: ناس الخرطوم القدامى (Re: أحمد ابن عوف)
|
QUOTE،
اولي سنتين بفكر في مشروع (تخيل سنتين تفكير) بس الغربة هي السبب، مشروعي يا سيدي
انو ارجع المدرسة واطلب الارشيف بتاع المدرسة واحصل على كل اسماء الطلبة في الفصل
معقولة دى يا احمد ابنعوف بتفكر سنتين ولسه مانفذت الفكرة؟ويعنى لو ماكنت اول الفصل كنت سويت شنو؟
فى مداخلتى السابقة تسآءلت ان لدى وزارة التربية والتعليم ارشيف يحوى اسماء كل الدفع التى مرت على مدارس السودان ولكننى تراجعت واستدركت بأنو (وزارة التربية والتعليم ذات نفسها وينا؟)
لكننى اثنى اقتراحك فى محاولة ارشفة اسماء طلاب ومعلمى ذلك الوقت الكترونياورحلة الألف ميل تبدأ بخطوة وبطل الكسل واترك التفكير وابدأ التنفيذ.
مع تحياتى .
| |
|
|
|
|
|
|
|
|
|
Re: ناس الخرطوم القدامى (Re: قلقو)
|
الاخ قلقو
تحياتي
الغربة يا حبيب الغربة
Quote: معقولة دى يا احمد ابنعوف بتفكر سنتين ولسه مانفذت الفكرة؟ويعنى لو ماكنت اول الفصل كنت سويت شنو؟
فى مداخلتى السابقة تسآءلت ان لدى وزارة التربية والتعليم ارشيف يحوى اسماء كل الدفع التى مرت على مدارس السودان ولكننى تراجعت واستدركت بأنو (وزارة التربية والتعليم ذات نفسها وينا؟)
لكننى اثنى اقتراحك فى محاولة ارشفة اسماء طلاب ومعلمى ذلك الوقت الكترونياورحلة الألف ميل تبدأ بخطوة وبطل الكسل واترك التفكير وابدأ التنفيذ.
مع تحياتى . |
في السنتين ذهبت اجازة واحدة ولمدة 10 ايام فقط، لكن باذن الله اول اجازة سنبدأ المشروع
واهو الليله لقينا واحد اخونا متولى مالك
تحياتي
| |
|
|
|
|
|
|
|
|
|
Re: ناس الخرطوم القدامى (Re: أحمد ابن عوف)
|
نعم هو عمر ابراهيم الطاهر السيد( ود المحافظ)
وهو من قدامي موظفي بنك السودان,. أخ وصديق عزيز
اخي سيف الدوله كنت اسمع من الوالد انهم اهلنا
والبعد خلانا ما نعرف بعض كويس
وعلي ما اعتقد كانوا يمتلكون منزل رقم واحد ببري
هل هذه المعلومه صحيحه ؟؟
ميدان عبد المنعم كان به جمعية الصداقه السودانيه الصينيه وكانوا مستاجرين منزل
المرحوم الرفاعي جيران المرحوم النفيدي
والدي رحمة الله عليه هو مؤسس الجمعيه
وكنت حينها اقرا الموسيقي هناك والكلام ده
وانا في المدرسة الوسطي .
| |
|
|
|
|
|
|
|
|
|
Re: ناس الخرطوم القدامى (Re: طارق ميرغني)
|
الأخ طارق ميرغنى ..
المرحوم المحافظ ابراهيم الطاهر وهو كان محافظا لمديرية كسلا كآخر وظيفة قبل المعاش وقد سكن الخرطوم 2 قصاد منزل آل ميرغنى محجوب وآل عبدالمجيد القاضى وخلف منزل آل عزالدين السيد وقد كان ابنه المرحوم(عصام ابراهيم الطاهر) من اخلص اصدقاءنا رحمه الله رحمة واسعة.
عودة لأقتراح الأخ احمد ابنعوف بخصوص الأرشفة الألكترونية لدفع المدارس فى ذلك الزمان ..انا اقترح لو كان هناك فى هذا المنبر من يعمل بوزارة التربية والتعليم او كان لديه قريب او صديق فيمكن ان يساعد كثيرا..
مع تحياتى .
| |
|
|
|
|
|
|
|
|
|
Re: ناس الخرطوم القدامى (Re: قلقو)
|
اها يا الاحباء جناكم
و بما انه يبدو حتى الآن اننى أكبركم سنا .. ولو انه يراودنى شكك كبير بان أخونا ( بكرى الصائغ ) بيكون ركب تورماج الدوران و كان بنزل منه بالعكس .. و انا ترماج الدوران ما ركبته بس ركبت بتاع المحطة الوسطى مع حبوبتى ( بت الخولى ) لمن تجى تسوقنى اقعد عندها فى ام درمان / الركابية فى اجازة المدرسة .
نبدأ من الخرطوم غرب كما ذكرت للاخ سيف الدولة كامل – جاب لى عقابى كامل - .. اقول من الخرطوم غرب لان من ناحية تاريخية فبعد عودة الحكم الثنائى للسودان ( 1898 م ) تم اعادة تخطيط الخرطوم و عادة اليها الحياة من جديد بعد عهد الخليفه عبد الله التعايشى ..
هذه مقدمة مهمة عشان انا داير اقول ليكم انا و معظمكم من ابناء الجيل الثالث لابناء الخرطوم كيف :
اجدادنا سكنوا الخرطوم بعد عودة الحكم الثنائى كما قلت حيث كانت مدينة الخرطوم كالاتى :
الخرطوم شمال خط السكة حديد المقرن .. الخرطوم غرب .. منطقة السوق ( وسط ) .. الخرطوم شرق ( حتى المستشفى ) .. الى الشرق من المستشفى كانت الديوم .. ثم المطار .. ثم برى
جنوب خط السكة حديد .. السجانة .. القوز .. الشجرة .. ثم الكلاكلة .. الجريف
ثم بعد كبرت الاسر فى هذه المناطق و خاصة الاسر شمال خط السكة حديد قم الانجليز بتخطيط بعض الاحياء :
الخرطوم (3) .. الخرطوم (2) .. الخرطوم (1) .. ثم الديوم بعد تحويلها من مكانها السابق الى مكانها الحالى .. اتساع احياء برى
فى هذه الاحياء الجديدة كانت بداية الجيل الثانى و هم الذين و لدوا فى الخرطوم القديم و جاءوا لهذه الاحياء و هم على درجة من الوعى و بدأت الحياة تنمو فيها بشكلها المعروف لابناء الخرطوم القديم .. ثم بدأ ميلاد الجيل الثالث ( انتم و نحن ) فى هذه الاحياء
وطبعا وضح ان الجيل الثالث هو اخطر الاجيال نتجة عوامل كثيرة كما سنرى ,,,,,,,,,,,,,,
نتابع
| |
|
|
|
|
|
|
|
|
|
Re: ناس الخرطوم القدامى (Re: قلقو)
|
Quote: أحمد ابنعوف ... بالغت ياخ
الزول ده وصل بري عديل كده.
لسان طلعت: هي قطعة أرض ممتده في النيل قدّام بوابة وزارة التربية (يعني بينها والوزارة شارع النيل). وأصل الإسم إنو (طلعت فريد) أيام كان وزير، كان واقف قدام الوزارة، ويبدو أنو عندو عادة الإشارة باللسان، فأشار على قطعة الأرض بلسانو وقال: الحتة دي (وأشار) تنفع موقع لمنتزه.
تدور الأيام ويقام في (الحتة دي) على ما أظن إسمو المطعم العالمي.
ياخ بس ما قلتو لينا المسابقة دي جائزتها شنو؟ |
بينى وبينك يا ابوالريش المرحوم طلعت فريد قال الحتة دى فيها قعدة تمام
| |
|
|
|
|
|
|
|
|
|
Re: ناس الخرطوم القدامى (Re: أحمد ابن عوف)
|
سلام لاهلنا الرائعين ناس الخرتوم
منكم وفيكم ..
ولدت بالخرطوم تلاته اوائل اوائل الخمسينيات ( لكنى مصر انى اصغر من يوسف أب صلعة ود دفعتى) فى نفس المنزل بشارع عشرة دقايق بين ميدان عبدالمنعم وبين الليق جنب خلوة شيخ محمد بابكر ..
( صرتي ) مدفونة هناك وحينما ولدت حفيدتي بكندا اصريت وشلت ( صرتها ) معاي سافرت بيها ودفنتها فى نفس البيت بالخرطوم تلاته ..
نحن اولاد الخرطوم القديمه... وفى الخرطوم اولاد التعشيقه ( واحد، اتنين ، وتلاته )
شارعنا فيه ناس عمك لاظ والترزي الافرنجي – ترزي الكبارات – عمنا صموئيل جورج وجيرانا ناس القوصي ..
درست بالمدرسة الاهلية الخرطوم الوسطى بعد فترة غربة فى الطفولة بسيطة بالجزيرة ثم امدرمان...
ثم الخرطوم الثانوية القديمة فجامعة الخرطوم – وحتى الداخلية كنت باختار الاوض الفاتحة على كبري الحرية..
حليل سينما جنوب ...........
النجيكم برواقة .. قلقو يا اخوي ما وقع لى الوصف اصلو الكبر حصل
عارف
| |
|
|
|
|
|
|
|
|
|
Re: ناس الخرطوم القدامى (Re: عارف عفان)
|
الأخ د.عارف عفان..
كنا ياصديقى نلعب الدافورى فى الميدان الصغير امام منزل الأثيوبيين و خلف منزل عمنا جورج والد ترزى الكبارات كما تقول صمويل جورج (يبدو لى ان ابناءه هاجروا لكندا) ومعناابن دفعتى بالخرطوم الأهلية والخرطوم القديمةالأخ شريف عفان قبل ان ينتقل لوادى سيدنا.
ان شاء الله سوف اراسلك عبر الماسينجر لمزيد من الشرح وطبعا لظروف معلومة لديك مع تحياتى لك ولأسرتك الكريمة.
| |
|
|
|
|
|
|
|
|
|
Re: ناس الخرطوم القدامى (Re: قلقو)
|
Quote: العزيز \قلقو,,, سلامات ,,, الحنان اااال.
اكيد دفعتك في الخرطوم غرب 1 المرحوم سيف الدين
بابكر جعفر و محمود واسماعيل زكريا من حي باريس
وسيف الدولة بخيت السيد واولاد تلب واولاد التهامي, |
إنا لله وإنا اليه راجعون ,, سيف الدوله بابكر جعفر لا حول ولاقوة الا بالله
خبر شين اول مرة اسمعه ,,, كان دفعتنا وشلتنا ,, هاشم حسن أحمد ( بعيره ) اسامه على عبدالرحمن
منصور الطاهر , عصام كامل , محمد عثمان عبدالمحمود ساتى , عباس الياس على كمير, عزالدين احمد المصطفى
محمد شريف عثمان ( عـفان) والمرحوم مجدى محجوب (اخوان) , مامون النفيدى , احمد محمد المهدى ( ابوالجاز) , محمد عثمان فتح الله , التاج محمد ابراهيم ( وردى ) ومجموعة كبيره الذاكره خلاص
محمد محى الدين تلب ؟؟؟ جيتونا فى اهلنا عديل كده,,,,
قلقو لسه ما عايز اقول منو ؟؟؟؟
(عدل بواسطة حيدر امين on 06-24-2010, 01:48 PM)
(عدل بواسطة حيدر امين on 06-25-2010, 10:39 PM)
| |
|
|
|
|
|
|
|
|
|
Re: ناس الخرطوم القدامى (Re: حيدر امين)
|
حيدر ياصديقى..
انت ماسمعت بالرقابة القبلية؟
بس ياهو ده قلقو ذاتو..
على مااذكر بدفعتنا بالخرطوم غرب الشقيقان بابكر وحسين جعفر من حى باريس والذى توفى فيهم رحمه الله هو بابكر جعفر ولاأدرى ان كنت تقصده هو لأنو اسم سيف الدين بابكر جعفر ده مامر على .
من وصفك لأسماء بعض ابناء دفعتك فى الخرطوم الأهلية يبدو لى انك كنت فى نهر على او عثمان.
اما انا كنت فى نهر ابوبكر دفعة (عمر جمال توفيق _عمر قبضة رحمه الله)وامين عبدالقادر هاشم واشرف محمد زكى الحاج وعصام ابارو وسامى سيد محمد احمد ابن عم الشهيد مجدى محجوب الخ...ذلك العقد النضيد.
مع تحياتى.
| |
|
|
|
|
|
|
|
|
|
Re: ناس الخرطوم القدامى (Re: حيدر امين)
|
Quote: وللتاريخ ايضا يا جنابو عمر عثمان
احنا بالضرورة قرايب، لاننا من جلاس تحديدا
هل لديك علاقة بسفيرنا في الامم المتحدة محمود عبدالحليم؟؟ لانه من جلاس ايضا
تحياتي |
كيف يا احمد ياخي اسم (ابنعوف سليمان) بسمعو كتير عند اهلنا باعتباره من الاهل وكذلك سفيرنا محمود عبدالحليم ...........
| |
|
|
|
|
|
|
|
|
|
Re: ناس الخرطوم القدامى (Re: omer osman)
|
Quote: حيدر ياصديقى..
انت ماسمعت بالرقابة القبلية؟
بس ياهو ده قلقو ذاتو..
على مااذكر بدفعتنا بالخرطوم غرب الشقيقان بابكر وحسين جعفر من حى باريس والذى توفى فيهم رحمه الله هو بابكر جعفر ولاأدرى ان كنت تقصده هو لأنو اسم سيف الدين بابكر جعفر ده مامر على .
من وصفك لأسماء بعض ابناء دفعتك فى الخرطوم الأهلية يبدو لى انك كنت فى نهر على او عثمان.
اما انا كنت فى نهر ابوبكر دفعة (عمر جمال توفيق _عمر قبضة رحمه الله)وامين عبدالقادر هاشم واشرف محمد زكى الحاج وعصام ابارو وسامى سيد محمد احمد ابن عم الشهيد مجدى محجوب الخ...ذلك العقد النضيد. |
مع تحياتى.
الذاكره انتهت صاح لكن سيف الدين بابكر جعفر صحصح ,,
نهر على نعم ,,, وانتو زى ماقلت نا امين عبدالقادر يوسف هاشم ,, واشرف زكى وعصام ابارو طبعا ديل ناسنا بتاعين الكشافة
معاكم فى ابوبكر كان تاج السر الشيخ ارباب ( بوردابى من برى المحس معانا ) صحيح انتو دفعت ماضى ( نهر عمر ) يعنى القدامنا بسنة
اها الفنان يوسف الموصلى كان قدامكم فى ابوبكر
رحم الله عمر قبضة كان فاكهة المدرسة,,
| |
|
|
|
|
|
|
|
|
|
Re: ناس الخرطوم القدامى (Re: حيدر امين)
|
صور من زمن الاهلية,,, يمكن تعرفوهم
ناس الكشافه,,,, فيهم ماضى , حيدر , عصام ابارو , عصام كامل , اشرف زكى , عادل فتحى ,,و و كلهم طلعوهم
عليك رحمة الله نادر على مصطفى
| |
|
|
|
|
|
|
|
|
|
Re: ناس الخرطوم القدامى (Re: حيدر امين)
|
الأخ حيدر..
يبدو لى ات ذاكرتنا الجماعية صارت خربة..
تخيل مع انى كنت فى الكشافة لكن ماقدرت افرز ولا واحد يمكن العبدلله يكون فى الصورة وماأكون عارف نفسى اما عن الصورة الجماعية للطلبة برضو ما قدرت افرز الا استاذ سيد فى اقصى يمين الصورة واستاذ عوض فى اقصى يسارها لكن غالبا الطلبة يكونوا من تهر عمر..
| |
|
|
|
|
|
|
|
|
|
Re: ناس الخرطوم القدامى (Re: قلقو)
|
العزيز \قلقو,,, تحياتي
يسري حاج بري تخرج من كلية الطب جامعة الخرطوم
وتخصص في بريطانيا وهو اشتشاري قد الدنيا وكان
مقيم في بريطانيا. وكذلك حيدر سيداحمد عبد المعطي
عبد الحميد يوسف زيدان مدرس في التدريب المهني,
هاشم بعيرة لسه في قفشاته الظريفة.عاد للسودان بعد غرية طويلة.
الله يرحم حبيبنا عمر قبضة رجل بهجة.
ايضا من دفعتكم شاكر علي الطاهر.
احمد محمد المهدي ( أبو الجاز) درس معانا
الجامعة وهو الان مدرس رياضيات.
يا قلقو هل عاصرت أستاذ محمد بابكر في الخرطوم
غرب 1؟ الان مقيم في نيويورك وهو استاذ دكتور
في جامعة نيويورك,
ممكن نوثق ليك يا قلقو انا اشتغلت معلم أحياء في
الخرطوم الجديدة الثانوية,, يعني في حلتكم من 82\85
حبيبنا طارق ميرغني,, نعم أول بيت في بري المحس هو
بيت ناس الدليل, المرحوم علاء الدين والطاهر ومصطفي
وهم ابناء عمومة لناس الطاهر السيد؟
| |
|
|
|
|
|
|
|
|
|
Re: ناس الخرطوم القدامى (Re: سيف الدولة كامل)
|
وصلتني الرسالة أدناه من الاخت بدور محمد الامين بابكر جعفر
أبوها علم من أعلام الخرطوم والسودان ,,وبكون أدي يوسف ابو صلعة
كرت اصفر. شكرا يا بدور علي الرسالة وأي مشاركة منك مليون مرجب.
السلام عليكم استاذ سيف الدولة
ياخي اولا اشكر الاخ احمد ابنعوف علي هذا البوست البديع ماتتصور مااثاره من شجون وذكريات وعاد بي لايام خوالي ياريت لو ترجع تاني
فقد عشنا احلي سنين العمر في الخرطوم غرب حيث بيت الاسرة الكبير منزل جدنا عليه رحمة الله الرجل البركة صديق ركابي
رغم انه جدي لوالدي رحمه الله بابكر جعفر اصلا كان في نفس المنطقة شارع السيد عبد الرحمن لكن انتقلت الاسرة الي الحي المتميز الخرطوم 3
لكن من اول يوم في الاجازة كنا ننتقل الي غرب حيث نلتقي ابناء وبنات الخالات والخيلان ويالها من اجازات ليتها تعود ويعود ذلك الزمن الجميل
اتذكر كنا نطلع في العصريات نمشي حلويات كرم في شارع الحرية وعمك كيشو في كرسيه علي الشارع ونمشي مع خالنا عبدالقادر فرن الزمزمي
نجيب العيش الحار وكان يخوفنا بقصر الفكي الطاير خلف المخبز عشان يزوغ مننا
جيراننا في الحلة عمك نقدالله واسرته وبيت عبدالله الزبير وناس الفوال ماتيلدا القبطية جيران عيادة يحي جمالا بوسيف
ياسلام علي تلك الايام وياسلام عليكم يا رايعين وشكرا ليكم علي هذا الاثراء
ولنا عودة
تحياتي استاذ سيف لك ولاسرتك الكريمة
بدور محمد الامين بابكر جعفر
مسقط سلطنة عمان
بعدين يا بدور خالك قدورة صاحبنا شديييييد وكان من ظرفاء الخرطوم غرب.
| |
|
|
|
|
|
|
|
|
|
Re: ناس الخرطوم القدامى (Re: سيف الدولة كامل)
|
جنابو \ يوسف أبوصلعة ,,, تحياتي يا زعيم
يا أخوي انت خميسك ده طول , غشيت الليدو ولا شنو؟
تعرف يا يوسف بكري الصايغ سنة 65 كان طالب في جامعة
القاهرة الفرع وفي تلك الفترة هاجر الي المانيا الشرقية
وبيتهم في شارع الاسبتالية بعد شارع الحرية وقبل فرن عبد السيد
وكان بيلعب حارس مرمي لفريق الامير قبل ما يتحد مع فريق حلتكم العروبة
ويكونوا فريق الثورة بقيادة يحيي مرسي وكمال عمر والخال وصلاح ادريس.
وصلتنا رسالة من الاخت بدور حفيدة عمنا صديق ركابي من والدتها ووالدها حبيبكم
الحكم الدولي وود حلتكم عمنا محمد الامين بابكر جعفر, وبتسلم عليكم
جميعا,, وبتشكر حبيبنا أحمد أبنعوف علي البوست الجميل.
| |
|
|
|
|
|
|
|
|
 Re: ناس الخرطوم القدامى (Re: أحمد ابن عوف)
|
***- ومن اشـهر العوائل المعروفة والتي
كانت تسـكن بـمنطقة الخرطوم غرب في اعوام الستينيات:
-----------------------------------------------------------
1- عائلة المرحوم صـموئيل جرجس، واولاده: رودولف، جورج، نبيل، فليب، ادموند، فكتور.
2- عائلة المـرحوم رياض التوم: واولاده: نبيل، وعاطف واخواته،
3- عائلة عبد السيـد ( صاحب مخبز الخرطوم غرب بشارع الاستبالية) وولده جورج،
4- عائلة اندراوس،
5- عائلة برهي،
6- عائلة جادو، وولده اكرم وسميـر،( بجوار سينما الوطنية)،
7- عائلة هنري رياض،
8- عائلة شفيـق،وولده ادوارد،
9- عائلة ساويـرس،
10- الصـحفية امال عباس ( وكانت تدرس بجامعة القاهرة فرع الخرطوم عام 1964)،
11- عائلة القسيـس راضي،راعي الكنيسة الانجيلية،
| |
|
|
|
|
|
|
|
|
|
Re: ناس الخرطوم القدامى (Re: بكري الصايغ)
|
Quote: ولي سنتين بفكر في مشروع (تخيل سنتين تفكير) بس الغربة هي السبب، مشروعي يا سيدي
انو ارجع المدرسة واطلب الارشيف بتاع المدرسة واحصل على كل اسماء الطلبة في الفصل |
معاك في المشروع واقترح صفحة في الفيس بوك
لك التحية والتجلة اخي احمد ابن عوف
اليوم مال بنان الكنانة لايطاوعني وانا الخابر لبناتها والسابر لبنياتها بيراع اصابه ما أراعه فاأراعني بعد 35 عاما ونيف اجد نفسي وانا استرجع ذكريات الطفولة واحد اجمل ملامحها مدرستي حي عبدالمنعم .
لا اخفي مدي سعادتي بالالتقاء باحد زملائي واسترجع معه الكثير من الذكريات الحبيبة الي النفس.
مدرسة حي عبدالمنعم كانت لنا طقوس ومواقيت قبل الذهاب اليها تبداء في الصباح الباكر بعد اخذ مبلغ العشرة قروش او الريا ل من الوالدة عليها الرحمة وميقاتنا ونحن من ابناء السكة حديد يبداء من دكان العم احمد الحجزي لشراء سندوتشات الفول او الطعمية المضاف لها موية الجبنة بمبلغ قرشين او الفريني الذي كانت له شنة ورنة كما يقولون .
او الذهاب الي دكان العم مرغني الحاج سعيد وابنائه الحاج واباذر وشعاره كان الدين مسموح والحرج مرفوع اذا لم يكن للكاش نصيبا.
قبل ان استرسل دعني احني راسي وارفع قبعتي لاساتذة اجلاء كانو لنا نعم القدوة والابوة
- الاستاذ المرحوم / علي عباس النعمة - ناظر المدرسة.
- الاستاذ/ السناري - وكيل المدرسة - وهو من رجال الاعمال الذين يشار لهم بالبنان.
- الاستاذ / فتح الله الحلفاوي - مقيم في الرياض بالسعودية.
- الاستاذ نورالدائم - قاضي بمحاكم الخرطوم .
- الاستاذ / عبدالمنعم الملقب با ابورجيلة نسبة لعرج رجله.
- استاذ عصام وله قصص شهيرة سوف اسردها لاحقا.
نحن ناس مالك بتاعين العلم مابتاعين القروش زي ماقال عمي احمد مالك.
| |
|
|
|
|
|
|
|
|
|
Re: ناس الخرطوم القدامى (Re: سيف الدولة كامل)
|
سلام يا شباب
رجعنا بعد سفره مضنيه
اول تعليق على الصور
الشفع ديل بتاعين الكشافة لابسين الكرفتات احسن من مزيعننا في التلفزيون هذه الايام ههههههههه
وثانيا لازم نبدأ بالضيوف عبر الايميل
الاستاذة بدور
تحياتي ومرحب بيك ضيفه وصاحبة بوست
Quote: السلام عليكم استاذ سيف الدولة
ياخي اولا اشكر الاخ احمد ابنعوف علي هذا البوست البديع ماتتصور مااثاره من شجون وذكريات وعاد بي لايام خوالي ياريت لو ترجع تاني |
صعب ترجع تاني، لكن لا مستحيل
Quote: اتذكر كنا نطلع في العصريات نمشي حلويات كرم في شارع الحرية وعمك كيشو في كرسيه علي الشارع ونمشي مع خالنا عبدالقادر فرن الزمزمي
نجيب العيش الحار وكان يخوفنا بقصر الفكي الطاير خلف المخبز عشان يزوغ مننا |
طيب النحكي ليك يا استاذة بدور عشان تاني ما تخافي لمن تجي جنب قصر الفكي الطائر
هو فعلا اسمه القصر وان كنا في عائلتنا نسميه (القصور) السبب في التسمية ان هذا المبنى قديم
جدا، وكان تاني مبنى طابقين بعد القصر الجمهوري، اها الشوايقة بنزلوا في محطة القطر ويقولوا
داك القصر الجمهوري وداك قصر ابن عوف، من هنا بدأت تسميته بالقصور، عماتي الكبار اتولدوا في هذا البيت
طيب ايه الدخل الفكي وانا متأكد انو جدي ما كان فكي
عندما كانوا يشرعون في البناء، في جانب دائما ينهار، انهار مرتين من غير سبب واضح، الا ان بعض
سكان الخرطوم القدامي والعارفين، دلهم على قبر فكي مدفون هنا، وبالفعل تم استقطاع جزي من ركن البيت
وتم عمل ممر خاص به للشارع بباب خاص. وتم بناء البيت على الوضع الحالي
حقيقة انا زاتو كنت بخاف لمن الوالد يرسلني لزول هناك، موش من الفكي الطاير لكن بخاف انه ينهار فوق راسي ههههههه
هذا المبنى يقع على شارع الطيار حسن
Quote: ياسلام علي تلك الايام وياسلام عليكم يا رايعين وشكرا ليكم علي هذا الاثراء
ولنا عودة |
دائما سنكون في الانتظار
تحياتي
| |
|
|
|
|
|
|
|
|
|
Re: ناس الخرطوم القدامى (Re: أحمد ابن عوف)
|
العزيز متولى مالك
| Quote: نحن ناس مالك بتاعين العلم مابتاعين القروش زي ماقال عمي احمد مالك |
بالله
يا مفتري بتمشي المدرسة بريال في اليوم وتقول لي ما ناس القروش ههههههههههه
تحياتي
استاذ عصام دا هل هو نفسه الدرسنا في اولى؟؟
اما بالنسبة للمشروع واشكرك للدعم والمشاركة
الفيس بوك وقوقل والمنتديات السودانية ح يكون مجال بحث فقط
لكن الخطوة الاولى والاهم في نظري، ان نحصل على ارشيف المدرسة ونعرف الاسماء الثلاثية او الرباعية
في الاول
محتاجين لزول في الخرطوم يقوم بالعملية دي؟؟ عندك زول؟؟
| |
|
|
|
|
|
|
|
|
|
Re: ناس الخرطوم القدامى (Re: أحمد ابن عوف)
|
نواصل في تذكر الاماكن
سردنا الجامعات والمدارس والمكتبات
نروح شوية ونتذكر الحدائق
اماكن الترفيه واستنشاق الهواء العليل للعوائل والحبيبين
اول حاجة ما كنا محتاجين نركب ليها عربات، تطلع من بيتكم تتمشى تهوي وتجي راجع
لا ركشة لا بكشة ولا كشة زاتو
- حدائق مايو بعدين ابريل وهسه ما عارف اسمها شنو
- حديقة المقرن
- غابة السنط (قديما كانت اختبارات الحصول على الرخصة تتم وسط اشجارها)
- ميدان عبدالمنعم ثم حديقة الاسرة
- جناين الصواني التلاتة في نمرة 2 ( الآن من الشمال للجنوب، اشراقة التجاني، المهندس ابراهيم احمد، اوزون)
- شارع النيل بطوله وعرضه، لكن عموما الناس كانت تفضل الجزء الغربي منه (اي يسار القصر)
- حديثا ملاهي ومنتزه المقرن
- حديقة القرشي
- الـ BEACH في بري
وين لقيتوا ليكم مدينة صغيرة فيها
كورنيش
وBEACH
و غابة
وحدائق منجلة
؟؟؟؟؟؟؟؟؟؟؟؟؟؟؟؟؟؟؟؟؟
الا في الخرطوم
انت ومزاجك ومزاج الاطفال والمدام
او ما يقتضيه الحنك مع الحنان ودرجة الصعوبة فيما يطرح من مكنات (الجلاكين وناس القرون الاولى: مكنات دي بتعني
بصريح العبارة الادعاءات الكاذبة للفوز بنصيب قلب البلومه، بعدين مصطلح بلوم دا زاتو اختفى
في زمنا، بنعرف جكس، حمام، بلي..... الخ)
وتستخدم في هذا الصياغ:
اها كيف؟؟
يا زوووول مكنتي ما قسمت معاها ههههههههههه
| |
|
|
|
|
|
|
|
|
|
Re: ناس الخرطوم القدامى (Re: أحمد ابن عوف)
|
( 1 )
مصنع لـويــزو للمشروبات الغازية
بالمنطقة الصناعية -- ص ب 45
جوار مصنع التلج
والدى اشتغل بالمصنع ما يقارب 35 عاما" بالتوزيع
عربات التوزيع الكبيرة ( كحلية ) اللون ماركة فورد ميركورى
ايام طفولتنا وسكنا بديم التعايشة كنت اركب مع الوالد واتفسح
واكاد اعرف جميع اصحاب الدكاكين بالديوم والسجانة .
يوم التلاتاء بيجى الوالد للدكان الملاصق مدرستنا الابتدائية السجانة المزدوجة
( مدرسة النور ) متذكر كل اصحابى يلتفو حولى عشان اشيل قزازة واحدة من الصندوق
واديها ليهم يخمسوها مع بعض ، وبعد داك العندو تسالى ولا ايسكريم بيدينى معاهو
صوت تلاطم القزاز والعربية ماشة امام المدرسة بيخلى كل الطلبة اللفى الحصة يتلفتو
نحوى ، يقولو لي ابوك جا ابوك جا ابوك جا .
| |
|
|
|
|
|
|
|
|
|
Re: ناس الخرطوم القدامى (Re: عبد الدائم سيد أحمد)
|
( 2 )
مدرسة السجانة المزدوجة الابتدائية ( مدرسة استاذ النور )
يا اخوانا المدرسة دى انا عاوز افتح ليها بوست منفصل
استاذ النور حمد النور ( الناظر )
استاذ حسين الحلة الجديدة
استاذ مصطفى عابدون
استاذ محمد واستاذ طه
استاذ بيومى
طابور الصباح - الاناشيد - طلايع مايو - الدورة المدرسية
النتايج الاول عند الله مصور ....
التانى ياكل باسطة بالصوانى ....
الطيش يدقو بالبراطيش .....
اولاد فصلنا
حيدر عبدالوهاب - مامون بشرى - حاتم عثمان الطيب - ابوعبيدة عثمان ادريس - ياسر عبداللطيف
ياسر محمد ابراهيم - احمد على صالح ( قرشى ) - حاتم محمد على - عبدالحميد حسن فرح - عمر الياس
عمر سعد - خدر - النجاشى - ربيع يوسف - عاطف حامد - جمال جبارة جابر - فيصل عبدالوهاب - على الله حاج على - معاوية محمد طه - مزمل فضل الله - اسامة ميرغنى - صلاح فندك .. وايييييك
| |
|
|
|
|
|
|
|
|
|
Re: ناس الخرطوم القدامى (Re: عبد الدائم سيد أحمد)
|
( 3 )
مدارس الخرطوم جنوب ( حديقة القرشى )
** مدرسة الام الثانوية بنات تحولت عام 1978 الى الخرطوم الجديدة الثانوية بنات
** مدرسة الام المتوسطة بنات
** مدرسة الزهور المتوسطة بنات
** مدرسة الخرطوم جنوب ( 1 ) المتوسطة بنات
** مدرسة الخرطوم جنوب ( 2 ) المتوسطة بنات
** مدرسة الاتحاد المتوسطة بنين
** مدرسة الخرطوم جنوب ( 1 ) المتوسطة بنين او كانت تسمى النموذجية
** مدرسة الخرطوم جنوب ( 2 ) المتوسطة بنين
** مدرسة الخرطوم الشعبية الثانوية بنين ( ام الكوارث والمظاهرات )
** مدرسة الخرطوم التجارية بنين / بنات يوجد قسم مسائى
** مدرسة النيلين التجارية بنين / بنات يوجد قسم مسائى
** مدرسة دار النعـــــــــــيم الثانوية بنات ولم ينج احـــد
بجيك لبقية مدارس الخرطوم
بعد حصة الفطــــــــــــــــور
| |
|
|
|
|
|
|
|
|
|
Re: ناس الخرطوم القدامى (Re: أحمد ابن عوف)
|
هوى ياناس الخرتوم انا محسى اولا تانيا من بحرى تالتا من الشعبية بحرى رابعا قريت فى الخرطوم القديمة سنة 73-76 منو منكم من اولاد تلاتة والزمن داك كان عندكم فريق اسمه سلام تلاتة ناس عبد السلام .. يعنى ماجاى ساكى لى كيس ..
اقول ليكم نكتة بمناسبة ساكى لى كيس دى .. قالوا واحد من ناس الخرتوم القدام ماشى فى الشارع وزهجان من الزحمة لاقاهو واحد جاى مهجوم ومطير عيونه وقال ليهو يالخو بالله شارع الجمهورية بى وين؟ صاحبنا زعل شديد واتلفت على الزول وقال ليهو انت جاى من وين؟ اخونا داك قال ليهو انا جاى من (...... ) قام صاحبنا قال ليهو ياخى نحن قاعدين نجيكم فى ( ...... ) بتاعتكم دى؟ جايننا هنا لييييييييييييه ..
اطلبوا من بكرى يسمح بنقل البوست للفترة الجديدة بإرسال ايميل بعنوان الاخ بكرى ..
| |
|
|
|
|
|
|
|
|
|
Re: ناس الخرطوم القدامى (Re: عابدون محمد عابدون)
|
اخي احمد ابن عوف
نعم استاذ عصام هو ذاتو واذكر مرة قام بجلد الفصل كلو في درس العصر نسبة لقيام احد الطلبة باطفاء نور الفصل ولوجود طالبات معانا فاعتبر الموضوع قلة ادب وكان يصر علي ان يعرف من الذي قام بذلك.
| Quote: محتاجين لزول في الخرطوم يقوم بالعملية دي؟؟ عندك زول؟؟ |
اكيد وفي محاولات للاتصال به عبر الماسنجر وهو دفعتنا في حي عبدالمنعم.
| |
|
|
|
|
|
|
| |
يوسف محمد يوسف
حيدر امين
سيف الدولة كامل
Egbal Elmardi
Mutwali Malik
قلقو
أحمد ابن عوف
omer osman
ابراهيم عدلان
ماضي ابو العزائم
عبد الدائم سيد أحمد
عابدون محمد عابدون
فيس بوك
تويتر
انستقرام
يوتيوب
بنتيريست