|
|
 Re: يا عشاى.. العشا أب لبن.. عشا البايـتات.. ده رئيس سوداني جديد (Re: منصوري)
|
يا عشاي
العشاا أب لبن
عشا البايتات
............
مرة واحد معمر في كوستي حكى لى قصة
أن كلمة عشاي دي خوفت ليها واحد مصري سايح في السودان
هاكم القصة
...............
بعييد كوستي في اتجاه الجنوب وقريباً من الرنك على النهر.. هناك واحدة مرة ماااكنة كدة طول في عرض خلطة فيها بين الجنوب والشمال دلالة على المصاهرة. المرة عاملة ليها ( كرقة) كدة. اي قطية على ضفاف النيل وتعمل عشاء وكوارع وفول من المغرب لغاية صلاة العشاء.ز يجواا السماكة والحواتة الناس البي شباكهم في البحر يجوا بردانيين من الموية بي شماميرهم وسراويلهم تنقط وتشر موية يجواا يتعشوا عندها ويشربوا شاي اللبن يدفيهم وتاني ينزلوا على بحرهم يصطادوا السمك والتماسيح و( العيست) فرس البحر.. أها قاليك والحديث للرجل المعمر في سوق كوستي قريباً من دكان( عماري الشايقي) للصعوط الجيد.. أها قال كان في واحد راجل مقرش مصري في أوائل الأربعينيات كدة قرر يعمل رحلة من منابع النيل وحتى المصب بقارب مطاطي.. قال لما جاء عند هذه المنطقة العجوز وخيمتها والعشاء ربط قاربو وطلع شم ريحة الأكل.. عندك شاي عندي.. عندك فول عندي... اتبسط.. لكن خلال تجهيز الشاي والفول يرمقها نظرة نظرة.. وهو خايف منها عيونا... حمر وما كنة.. الضرعات برة.. قوة ظاهرة.. فجأة مدت ليهو كباية الشاي في صينية وقالت ليهو
أها هاك أشرب يا عشاي
الفار لعب في عبو.. تما ليهو خوفو وهو يتفرس فيها
عشاي
ماذا تعني هذه العبارة؟؟؟؟
مليون علامة استفهام ربطت في راسو وتخيل إنو هذه المرأة الماكنة بعد أن تديهو كباية الشاي راح تتعشى به هو شخصياً وأنه وقع في فخ سحارية كما يسمع..
المهم المرأة اتلفتت شمال وكانت تعافر عايزة تبزق سفتا وتمصمص
هو انتهز هذه الفرصة
وفلرى.. فللي.. جري.. معط شديد نحو البحر والقارب
والجوع بقا هين في حقو
طالما فيها عشااا وعشاي
|
|
 
|
|
|
|
منصوري
فيس بوك
تويتر
انستقرام
يوتيوب
بنتيريست