|
Re: احب ام درمان وناس ام درمان واحب البحب ناس ام درمان والشواع والظلط والصاح والغلط . . . . (Re: abedalhamied mamoun)
|
محمد حيدر
Quote: لا والله بتكلم جد يا أمانى .. بنات بحري ديل لا يمكن .. ولو بى صدفة تاريخيه سااااى كده تلقى فيهن واحده بس من الملازمين .. |
هههههههههه يازول انت نسيت حبوباتنا في بحري كان بحموهم بباقي موية وضوء الشيخ خوجلي وحمد بعدين ياخوي الناس ديل اقدم من امدرمان انت يظهر ماحكوا ليكم زمان لما شباب امدرمان بيجي بحري يتفرج للحسان ويعبروا الكبري راجعين يمشوا يبكوا ويكتبوا شعر
في ربوع بحري لاقيتو بسم حياني حياتو
والله قلبي على الأسى اتعلم وحين ما أذكرو اتألم
وما بسلاه يا أحباب مهما فؤادي اشقاه
في ربوع بحري لاقيتو بسم حيتو حياني
طالعين كنا في نشوه على البلديه مرينا
ناجينا الطيور في الروض قلنا ليها سامرينا
سامرتنا بالتغريد ووريناها معنى الريد
وقمنا وقالت اطروني وقلنا ليها اطرينا
عبرنا الكبري والكبري وراجعين بقعة أمدرمان
مزجتا دموعي بدموعا والجو كان أمان في أمان
ودعتو ورجعتا براي لا روح لا فكر ولا راي
ووين قلبي التركتو وراي غايب عني ليه زمان وانت فاكر دكتور (عابدين شرف ) دا كان بعالج في منو ومن شنو ولا اغلب المجانيين (رد الله غربتهم ) الحايمين في سوق الشهدا وسوق امدرمان سببهم شنو يازول الجماعة ديل زمان كان بربطوهم ليك في الكبجاب ويعملوا ليهم حجاب ياريت تكون عرفت سر الجمال في بحري (قالوا الصيد ورد في حلة حمد )
------------------------ امدرمان عالم جميل
| |
|
|
|
|
|
|
Re: احب ام درمان وناس ام درمان واحب البحب ناس ام درمان والشواع والظلط والصاح والغلط . . . . (Re: abedalhamied mamoun)
|
دكتور/ عبد الحميد مأمون الكامل سلامات يا خي طولنا طولة شديدة من أيام الرياض ديييييييك ... الله يطراها بالخير
Quote: التاريخ ينفح من حواريك القديمة و الايام تحكى عنك ياام المداين روحى تسافر فى التواريخ القديمة تقاتل فى كررى تحاصر الخرطوم تبيع راس غردون تعود بغايم النصر للمورد ترقص العرضة ثم تودع الافراح بيت المال تغنى عزة الاوطان ماهو عارف قدمو المفارق لم تذل ذكراك كالنيل كالاقمار تهدى خطانا بورة الوصل و ملتقى و جع الرحيل -------------------------------- من على البعد الجغرافى و الانصهار الوجدانى اهمس اليك احبك |
يسلم فمك ... وتسلم يمينك تحياتي من جدة عروس البحرالأحمر قوابيس مودتي
| |
|
|
|
|
|
|
Re: احب ام درمان وناس ام درمان واحب البحب ناس ام درمان والشواع والظلط والصاح والغلط . . . . (Re: خالد حامد الجزولي)
|
Quote: حريف في كورتك (ودا كان زمان) وحريف في كتابتك ودائماً عامل ليك مرًّاقة على قول أماني الأمين |
هههههههههه تعرف ياخالد المشكلة اخواني الكبار معاي في البيت ثقافتهم امدرمانية وغير ذلك لاانكر اني قضيت ايام لاتنسى بهذه البقعة الطيبة بطيبة اهلها وجدت بها كل الاحترام والحب
من اليسار الكابتن وابن المورده المدرب هيثم سلمان (مدرب الفريق القومي للناشئين ) دي اخر زيارة له عندي رمضان الفات اها جبت ليك صورة صاحبك عشان تعرف علاقتنا مع اولاد امدرمان يستحيل الزمن يغيرها اها المرّاقة التحت دي كيف ليكي سلام وتاني سلام وليكي قيام == وتاني قيام ياست الدنيا== يا امدرمان وست الجاه وست الشأن وست النان سلمت == سلمت يا امدرمان (سيد احمد الحردلو)
برضو فرق كبير بينا وبينكم ياخي (بحري سر الهوى ) و(غير بحري ما لي دوا )
---------------------- امدرمان عالم جميل
| |
|
|
|
|
|
|
Re: احب ام درمان وناس ام درمان واحب البحب ناس ام درمان والشواع والظلط والصاح والغلط . . . . (Re: مجدي عوض صديق)
|
وليد عبد اللطيف,, ده كلام ي الورد:
Quote: يازول انت نسيت حبوباتنا في بحري كان بحموهم بباقي موية وضوء الشيخ خوجلي وحمد بعدين ياخوي الناس ديل اقدم من امدرمان انت يظهر ماحكوا ليكم زمان لما شباب امدرمان بيجي بحري يتفرج للحسان ويعبروا الكبري راجعين يمشوا يبكوا ويكتبوا شعر
في ربوع بحري لاقيتو بسم حياني حياتو
والله قلبي على الأسى اتعلم وحين ما أذكرو اتألم
وما بسلاه يا أحباب مهما فؤادي اشقاه
في ربوع بحري لاقيتو بسم حيتو حياني
طالعين كنا في نشوه على البلديه مرينا
ناجينا الطيور في الروض قلنا ليها سامرينا
سامرتنا بالتغريد ووريناها معنى الريد
وقمنا وقالت اطروني وقلنا ليها اطرينا
عبرنا الكبري والكبري وراجعين بقعة أمدرمان
مزجتا دموعي بدموعا والجو كان أمان في أمان
ودعتو ورجعتا براي لا روح لا فكر ولا راي
ووين قلبي التركتو وراي غايب عني ليه زمان وانت فاكر دكتور (عابدين شرف ) دا كان بعالج في منو ومن شنو ولا اغلب المجانيين (رد الله غربتهم ) الحايمين في سوق الشهدا وسوق امدرمان سببهم شنو يازول الجماعة ديل زمان كان بربطوهم ليك في الكبجاب ويعملوا ليهم حجاب ياريت تكون عرفت سر الجمال في بحري (قالوا الصيد ورد في حلة حمد ) |
بس لو خليت "أمدرمان عالم جميل" البتكتبها في النهايه دي
| |
|
|
|
|
|
|
Re: احب ام درمان وناس ام درمان واحب البحب ناس ام درمان والشواع والظلط والصاح والغلط . . . . (Re: Amany Elamin)
|
منال بتاعت بنات الأحفاد:
Quote: عدين بنات بحرى شكلهم اقليميات وما انيقات يعنى بالعربى كده بلديات لكن بنات امدرمان راقيات وانيقات وظريفات وحبوبات |
لوووووووووول ما بسألك والله, غايتو بخليك للقراء, أنا برررررره
ود المشرف:
Quote: لا والله بتكلم جد يا أمانى .. بنات بحري ديل لا يمكن .. ولو بى صدفة تاريخيه سااااى كده تلقى فيهن واحده بس من الملازمين .. |
الغريبه ناس المشرف الأنا بعرفهم, بين توتي والصبابي, الملازمين وأمدرمان علاقة ناس المشرف بيها شنو؟ شكلك مشرّف تقليد
أما عن بنات بحري فالملازمين دي بينهم وبينا بحر الحمد لله
| |
|
|
|
|
|
|
Re: احب ام درمان وناس ام درمان واحب البحب ناس ام درمان والشواع والظلط والصاح والغلط . . . . (Re: Amany Elamin)
|
Quote: يا بنات الناس يا اولاد الناس شنو اولاد ام درمان بمشوا لبحري وبيجوا راجعين يكتبوا الشعر ؟؟؟؟؟؟؟؟؟؟؟؟؟؟؟؟ شعر منو يا اخوانا ؟؟؟؟ ما تخليكم عاقلين شويه ( هو الشعر ده بكتبوه في شنو ؟؟ ومنو ؟؟؟ ) يا ناس ام درمان البجي يناسبكم من اي صقيعه في السودان ولا خلاء ما تدوه بيتكم , وما في واحد يمشي يجيب ليهو واحده من بحري وبعدين يقول ليبنا ( دي القسمه ) يا خي تخلي بنات ام درمان وتقول دي القسمه يا اخي ده الغبا الغبا ..... الغبا |
يا مجدي سيد البوست و وليد داوش بتاع الجرجير ,, قسيمة شنو؟ ناس أمدرمان ديل قالوا ليكم بيجوا بحري يبكوا ويمشوا يقطعوا الكبري يكتبوا شعر, وما جابت ليها قسيمه أصلو !
غايتو ! بس جبنا سيرة بنات بحري جابوا سيرة القسيمه !!
بالله لو سمحتوا شيلوا شعركم وغادي غادي
قال جرجير قال لوووووووول
| |
|
|
|
|
|
|
Re: احب ام درمان وناس ام درمان واحب البحب ناس ام درمان والشواع والظلط والصاح والغلط . . . . (Re: Amany Elamin)
|
أخونا متوكل, كلام شوقي بدري جميل حقيقي, بس "ياهو ده السودان", أمدرمان ما حاله متفرده, ده حال الانسان السوداني الجميل من وين كان :)
الزول زاتو "رفيق السلاح":
Quote: تصدقي وبدون حليفة لمن ابيت خارج امدرمان زي الرايحه لي حاجة بحري جميلة والخرطوم جميلة لكن امدرمان اجمل ناسها ماعايزين واسطةعشان تعرفيهم تخشي شمال تووووووووش |
ما قايلاك أمدرماني والله, وما القصد, بس ناس أمدرمان تامينها حبة مويه, قلنا نشاغلهم شويه ما أكتر,
سلام واحترام,,
| |
|
|
|
|
|
|
Re: احب ام درمان وناس ام درمان واحب البحب ناس ام درمان والشواع والظلط والصاح والغلط . . . . (Re: ismeil abbas)
|
Quote: يا مجدي سيد البوست و وليد داوش بتاع الجرجير ,, |
اماني الامين طبعا الزمن داك انتي لسه صغيرة وخليني احكي قصة الجرجير زمان وعندما ناس بحري عملوا ( قصر الصداقة ) فكروا جنب الكبري يعملوا منتجع سياحي كبير لبحري ولكن في ناس من كرمهم اعترضوا وقالوا اذا عملنا هنا منتجع ناس امدرمان يجيبوا الجرجرير من وين وكيف ياكلوا فولهم وسمكهم اها كتر خير ناس الصبابي ودي تجارة غير مربحة عٍلا عشانهم زرعوها والله يسألني اول مره اشوف ناس بتاكل سمك وفول من غير( جرير ) عشان كدا ضحكنا في قراير وراحة ضمير لان دي بتاعتنا (اكل جرير وراحة ضمير ) و ( برتكان ولحمة ضان )
اماني ياخي اهديك اوعى من ديك هم اعـــــــاديك
اسماعيل عباس ود العباسية الرجل الخلوق عندما نراك نرفع قبعاتنا احتراما ومحبة كيفك ياطيب ولماذا توقفت نفحات اتصالاتك
| |
|
|
|
|
|
|
Re: احب ام درمان وناس ام درمان واحب البحب ناس ام درمان والشواع والظلط والصاح والغلط . . . . (Re: Amany Elamin)
|
دي علشان خاطركم (بحري توثق لامدرمان عاصمة التاريخ والجمال )
Quote: من مذكرات الشاعر عبد المنعم عبد الحي نفتبس تفاصيل كتابة أغنية أنا امدرمان :
( رجعت من فلسطين في شهر مارس 1949 م وأتذكر أول لقاء لي بعد عودتي من فلسطين كان مع الفنان أحمد المصطفى واثناء حديثنا جاءت سيرة أغنية الخرطوم للفنان حسن عطية عندها ذكر لي أحمد المصطفى بانه يريد أغنية لامدرمان مثلما تغنى حسن عطية للخرطوم فقلت له : طيب اديني مهلة أفكر .. وفي نبطشية في القشلاق قعدت أقرأ في وصف أغنية الخرطوم لحسن عطية – الخضره والزهور والحاجات دي .. طيب امدرمان بالنسبة لي أكثر من وطن صغير داخل الوطن الكبير .. انا لما جيت اوصف أمدرمان مالقيت فيها جانب أجمل ولا اخلد من الجانب الوطني فامدرمان صورة مصغرة للوطن الكبير , امسك امدرمان ربع ربع وحارة وحارة تلقى فيها صور من الشعب السوداني كله من الشمال للجنوب تلقى ومن الغرب للشرق تلقى وحتى فيها جوانب بتصور أحقاب تاريخية من تاريخ بلدنا , في الموردة مثلا تلقى حي المواليد وفي السوق الكبير تلقى حي المسالمة الى جانب الأحياء المختلفة وبعدين مافي احداث وطنية عاصرها السودان الا كان لامدرمان وأولادها النصيب الوافر فيها وفي المرة دي ماكنت في الحقيقة محتاج أقلد صورة او شكلا وفي نفس المكان في القشلاق الكتبت فيهو أول أغنية سودانية .. ابتديت اكتب .. أنا امدرمان تأمل في نجوعي أنا السودان تمثل في ربوعي أنا إبن الشمال سكنت قلبي علي إبن الجنوب ضميت ضلوعي وماتوقف القلم في يدي الا بعد ان اكملتها كلها وأذكر انها كانت ثلاثة كوبليهات والثالث منها كان عنيف شوية وضد الإستعمار بشكل مباشر يعني مافيهو رمز ولاحاجة وعشان كده أفتكر حذفه أحمد المصطفى والأغنية كلها ماكان ممكن تذاع في إذاعة أمدرمان في ذلك الوقت .. أنا أمدرمان في جيد الوادي دره أصيلة في معدن وكريمة حرة أنا أمدرمان اذا العادي تجرا أنا حجر افضا في جبينه قرا أنا الصبر المرير في حلقه مره أنا السم النقيع في الجوف أمرا وأنا دار الأمان لفتاتى دارى وأنا الذكرى اذا عزت له الذكرى ثم يضيف الشاعر الكبير فيقول : تاني يوم جاْني أحمد المصطفى في البيت واديتو الكلام وبعد يومين بعد أن قرأها عجبتو وقال لي أنا بمجرد ما أوصل السودان ساقوم بتسجيلها في الإذاعة وأنا متأكد أنه اغنية أنا أمدرمان ستنال إعجاب الجميع .. قلت ليهو : انت شد حيلك في التلحين ,, قال لي : ماتخاف .. وفعلا بعد شهر أو شهرين سمعت من بعض الطلبة اللي وصلوا من الخرطوم قالوا أنهم سمعوا لأحمد المصطفى أغنية جديدة أسمها أنا أمدرمان ولاقت نجاح مامعقول .. الحكاية دي شوقتني اني لازم أسمعها بعدما تلحنت بقت كيف ؟ وبعدين أتذكر أنه الأخ منصور أحمد الشيخ في مرة من المرات قال لي انو بيت الطلبة السودانيين عندهم حفلة سمر بمناسبة وطنية مابتذكرا دلوقتي .. وقال لي نحن نمشي نشارك أخوانا الطلبة باعتبارنا زملاء سابقين ومشيت معاهو الحفل وهناك فوجئت من ضمن برنامج الحفلة طلبة غنوا وطنية منها أنا امدرمان ومافي زول كان عارف أني كتبتها غير الأخ منصور أحمد الشيخ .. وعجبتني الأغنية بعد ما تلحنت والطلبة قابلوها بصورة طيبة وبعدين منصور وقف قدام الطلبة وقال ليهم دي فرصة طيبة عشان أقدم ليكم مؤلف أنا أمدرمان وهو الملازم أول عبد المنعم عبد الحي والزميل السابق .. وقوبلت كلمة منصور بتصفيق شديد خلاني خجلت والكلام غلبني وفعل ما قلت ليهم غير أنا شاكر شعوركم الطيب وقعدت . ويستطرد الشاعر الكبير عبد المنعم عبد الحي ويقول : ذهبت للسودان في الإجازة وقابلت بالطبع أحمد المصطفى وعاتبته عشان ماغني الأغنية كاملة ولكنه قال لي : في الإذاعة رفضوا يوافقوا على الكوبليه الثالث وأضطريت أغنيها ناقصة .
أنا أمدرمان - كلمات عبد المنعم عبد الحي
أنا امدرمان تأمل في نجوعي أنا السودان تمثل في ربوعي أنا إبن الشمال سكنت قلبي علي إبن الجنوب ضميت ضلوعي ****** أنا أمدرمان سئلوا النيلين عني وعن عزمات فتاي عند التجني فخير بنيكا يا سودان مني سئلوا الحادي سئلوا الشادي المغني ****** أنا امدرمان إذا ما قلت أعني فما نيل المطالب بالتمني تجيش النفس بالآمال لكن ولكن هذه لما لا تدعني ***** أنا أمدرمان مضي أمسي بنحسي غداً وفتاي أحطم قيد حبسي وأخرج للملأ في ثوب عرسي وأبسم بعد ما قد طال عبسي وأعلن والفضاء يعلن همس وأهتفت والوري يعرف حسي فيا سودان اذ ما النفس هانت أقدم للفدي روحي بنفسي |
منقول من بوست بحري طراوة (ملك التوثيق عماد عثمان احمد)
| |
|
|
|
|
|
|
Re: احب ام درمان وناس ام درمان واحب البحب ناس ام درمان والشواع والظلط والصاح والغلط . . . . (Re: محمد حيدر المشرف)
|
محمد حيدر ود المشرف:
Quote: مشكلة ناس بحري الوحيده إنهم ما من امدرمان .. يعنى مافيهم شباب من ود أرو .. يعنى بناتم مافيهن بنات ممكن يكونن من الملازمين .. يعنى ما ممكن حفلاتهم تكون فى ابروف .. يعنى زمان ما اكلو ايسكريم فى فاربتر .. يعنى ما لعبوا كوره فى العرضه .. يعنى فطور الجمعه الا يهاجروا عشان يجيبو فيهو سمك من سكى يعنى ما فى عشا عند الجان .. ويعنى ويعنى ويعنى .. |
فشيتني لامن اتكيفتا في اماني بت اللمين
و بركة المرقنك كرعينك يا اماني
البوست دا ما شفتو الا اسة
والا كان بلعتك كلامك كلو
تاني تجي المجلة يا اماني
__________________________
يوم في غربة السجم دي و في عيد من الاعياد
طريت امدر طريت ناسا
كتبتا لي كلمتين عارفها ما كفاية
Quote:
( بطاقة معايدة لأمدرمان)
و قهوة قد شربناها و أياماً و أحلاماً تركناها هناك... في امدرمان ذكراها
أيا امدرمان رغم البين و التبريح اليك تسر ذي النجوى من ذا القلب أصداها و تلك المقلة الحرى فراق الحي ابكاها
و قهوة قد شربناها و حبيبة قد نسيناها هناك في أمدرمان مسواها إيه يا امدرمان لا انس من الايام لا أنس ذكراها حبوي في زواياها عشقي في حناياها خطوي فوق تربتها شوارعها مداخلها مخارجها أزقتها مآقيها قهاويها سواقيها حزنها الغافي غضبها العاتي يوم تهب ثورتها و يوم تحن صبوتها يبرق بسم محياها
ما زلت أذكر لون بشرتها طعم قهوتها سر ضحكتها أغانيها … حكاياها
مرح صبيتها غنج نسوتها طيب سمرتها و همس النيل حين يوشوش الفجر فوق مرساها
تالله .. و والله دوماً ستبقى في شغاف القلب ذكراها و رب الكون يحفظها و يرعاها
سلامي شوقي الطاغي يخط بدمعي الهامي بطاقة عيد تحييها و تغشاها وأرسل فيها كل اخيلتي تغازلها تضاحكها تمازحها تلاعبها من الاحزان تشفاها
تحي طهر قبتها تحلق في روابيها مساجدها كنائسها كباريها سواريها حواريها ملاعبها مدارسها معاهدها تقبل كل أنحاها
تالله .. و والله دوماً ستبقى في شغاف القلب ذكراها و رب الكون يحفظها و يرعاها
|
بجي راجع هنا تاني
كان لقيت فرقة
شكراً ليك يا مجدي
على البوست الجميل دا
| |
|
|
|
|
|
|
Re: احب ام درمان وناس ام درمان واحب البحب ناس ام درمان والشواع والظلط والصاح والغلط . . . . (Re: Mutwali Malik)
|
يا وليد قول بسم الله .. العمود الفى نص الميدان ده كرار ابوعلى قاعد يوزن عليهو الباصات .. ويا زول ما طالبنى حليفه .. باصاتو تدخلك جامعة الخرطوم وبالميت كده توديك الهلال الميدان يبعد عن نادى الهلال أقل من مية متر .. وأكيش زول فينا أهو بمشي التاج .. لى عمك الوسيله العكام .. وبعدين اقول ليك كلام .. أولاد العرضه ديل ابدا ما اتغلبوا فى الميدان ده وأزيدك .. آخر دوره لعبتها كانت فى بحري .. كانت الدعوه من شباب الختميه .. ناس خالد الخبير والتاج بركيه وحمد كمال وهيثم مصطفى وعلى الدبلوك ورضا وابوشايه و أب صره .. الزمن داك أغلبهم كانوا بلعبوا فى الأمير .. والله جهجهناهم ب ( السبيتى ) .. وطقطقناهم زي الماحاصله حاجه والحاله دخلنا الدوره بى تيم مسمنو تيم العايله .. كلنا اولاد أهل , ياخى ده كان فيهو مغتربين فى السعوديه والله غير كرار ابو على والشيخ دونادونى ( بتاع المريخ ) ما فينا زول بقدر يجري .. ياخى لمينا ليك فى ناس بحري ديل جضمناهم تيم تيم لامن عرفو حاجه .. ناس بدرالدين بتاع المريخ داك نسيت اسمو وريتو ليك منظر منظرين قام طفانى .. قربو يودونى الاسبتاليه ايواا بدرالدين بخيت .. يا اخوانا الزول ده كلمو .. ببالغ عديل كده المهم لامن وصلنا الفاينال .. وكان مره تانيه مع اولاد الختميه القلتهم ليك فوق .. والله شالو الكاس بالحكم .. خالد الخبير قلت ليهو ده كلام شنو يا خُبُّو .. قال لى انتو عوره تجو من امدرمان تشيلو كاسنا وتمشو .. يقولو علينا شنو ! كفايه عليكم كاس الهداف ده .. وأشر عليهو , كان شايلو ابن خالى مجدى على احمد طه ( جطِّى ) تقول لى غلبتونا فى الميدان الفيهو عمود فى النص ! يا راجل قول كلام غير ده .. بالغت عديل كده
| |
|
|
|
|
|
|
Re: احب ام درمان وناس ام درمان واحب البحب ناس ام درمان والشواع والظلط والصاح والغلط . . . . (Re: Mutwali Malik)
|
ود حيدر
Quote: كانت الدعوه من شباب الختميه .. ناس خالد الخبير والتاج بركيه وحمد كمال وهيثم مصطفى وعلى الدبلوك ورضا |
يخي انت جيت لعبت مع الحمام الميت في بحري حمد كمال : لاعب الهلال السابف هيثم مصطفى : كابتن فريق الهلال على دبلوك : (حي العرب ) واحرف من مشى على الارض (الان كرش واربعة في اربعة ) رضا : لاعب الامير السابق ومدرب الفريق القومي للناشئين مع هيثم سلمان وكان مرشح ليدرب نادي الهلال تعرف انا كتبت الكلام ده ليه عشان بعدين على دبلوك يقراه واقول ليهو فضحتونا وشمتوا فينا ناس امدرمان ياخي صراحة الكورة في امدرمان لها طعم خاص ماعارف ليه هل عشان نحن بنكون فيها ضيوف ولاشنو وكثيرا ماشاركة مع اولاد امدرمان دوراتهم في الحواري ياخي وصلنا الى الحارة الـ 12 (دورة اسطوانة الخرخار ) واجمل دورة كانت دورة المروحوم (بشير عتيق ) في ابوروف جنب البحر تخيل نهاية الكورة شباب امدرمان بتصرف راقي حلفوا عليىّ انو انا من استلم الكاس تخيل وهذا شعور لم انساه ابدا وياله من كرم اولاد اكارم كورتكم ممتعه ممتعة ممتعة
برضو نرجع نقول ما افضل من بحري
----------------------- امدرمان عالم جميل
| |
|
|
|
|
|
|
Re: احب ام درمان وناس ام درمان واحب البحب ناس ام درمان والشواع والظلط والصاح والغلط . . . . (Re: ombadda)
|
Quote: الجماعة قالو امدرماااااان ما امبدة...علشان كدة خليكم بعيييد |
أخونا أمبده يعني إنت من باريس ؟؟؟؟
Quote: مدرسة الكتيابى الابتدائية بشارع العرضة جوار استاد المريخ..يؤلمنى ان ارى معالم المدرسة العريقة وقد انطمست وصار سورها الجنوبى المطل على شارع العرضة كافتيريات مزدحمة لجامعة الاحفاد وغطت على المدرسة تماما ..فى اوائل الثمانينات كانت مبانى الاحفاد خاوية على عروشها ينعق فيها البوم.. |
و الله دي أهون من مدرسة حي العرب اللي خرجت أجيال و أجيال طبعاً لينا فيها ذكريات لا تنسى الجماعة حولوها لي محلية !!!!!!!!!!!!!!
حي العرب الإبتدائية و عثمان الزبير اللي كان بنادي أولياء أمور الطلبة اللي في سنة و خامسة و الواحد ما بعرف إكتب ليهو كلمتين إقول لي أباءهم لينا اللحم و ليكم العضم و الله إجي العصر إقعد معاهم لغاية أنصاص الليالي لحدي ما إتعلمو و إمتحنو الشهادة و نجحو و حي العرب المتوسطة و المرحوم الأستاذ عبدالعزيز اللي أسس الجمعية الثقافية يوم الثلاثاء من كل أسبوع و جمع التبرعات و بنى فيها مسرح له الرحمة و المغفرة. أم درمان الأصالة و المدينة التي تجمع كل قبائل السودان أم درمان الهلال و المريخ و الموردة أم درمان يوسف الفكي و عمك بين بتاع الباسطة أم درمان مكتبة الحرية و مكتبة الوطنية و مكتبة أم درمان المركزية أم درمان سلامة و باتا و الطوخي و هريدي و كافتيريا فيتال و أستوديو الدار البيضاء و المحطة الأوسطة و ميدان البوستة و ميدان الحرية
ياخي مالكم علينا
| |
|
|
|
|
|
|
Re: احب ام درمان وناس ام درمان واحب البحب ناس ام درمان والشواع والظلط والصاح والغلط . . . . (Re: ombadda)
|
وليد
Quote: لكن بالله تعال فهمنا النظرية بتاعة تسكنو في الحاج يوسف وتدفنو في البحر دي |
كان لازم نكرم من صنعوا تاريخ منطقة بحري بعدين ياخي عادي برضو عندكم مقابر (احمد شرفي ) وساكنين امبده مع احترامي لي ombadda وكمال قال ombadda قالوا امدرمان وليس امبده واحدد ليك ام درمان القديمة اول شيء الاحياء القريبة من السوق الكبير شارع العشرين او السلاح الطبي جنوباً والعرضة غرباً ونهاية حي العرب حتى المسالمة ويحدها مقابر البكري وشمالاً حتى كلية التربية .... يعني الناس الجات بعد الجفاف والتصحر 1984م ما بنحسبهم مع ناس امدرمان
قال الحاج يوسف قال ياخي الفنان زيدان ابراهيم لما رحل من العباسية للحاج يوسف قال يادوب انا بحسب سنين عمري من الوساع والبراح والطراوه
محمد حيدر بجيك بعد نشوف (وليد جرجيره )
------------- امدرمان عالم جميل
| |
|
|
|
|
|
|
Re: احب ام درمان وناس ام درمان واحب البحب ناس ام درمان والشواع والظلط والصاح والغلط . . . . (Re: Mutwali Malik)
|
. الأستاذ مجدى:
لك التحايا العطرة
شكراً كثيرا على البوست الشيق. و فعلاً ياحليل أمدرمان صاحبة المقام الرفيع العامرة بتاريخها الثر والممتلئ بالدرر والنفيس. نشتاق لإمدرمان فى كل الأوقات فى صحونا وفى منامنا والنفس تتوق الى ملامسة ترابها الطاهر. سنعود إليك ولو بعد حين يابلد الأمان يامدينة بقامة وقيمة قارة ممتدة المساحات ومتعددة الأسحان والأديان.
وأستميحك عذراً بأن أرد على الأستاذة أمانى الأمين:
ياسيدتى
أبناء أم درمان لايبخسون المدن الاخرى حقها ولكن يقفون دائماً إجلالاً وإكراماً لمكان صباهم وتقديراً لدور أمدرمان الريادى فى كل المجالات فلا تبخسيها حقها.
ناس أم درمان ياسيدتى يطلبون ان تكسرى الحديدة الرابطانة بيكم دى (كبرى شمبات) إذا كانت تاعباكم فنحن لسنا بحوجة لها. وناس أمدرمان ياسيدتى ناس مأصلين وكرام وعظام يحترمون ويوقرون الكبير والصغير ويكرمون الضيف أيما إكرام . فى امدرمان بلد الامن والامان أمدرمان الامام المهدى والخليفة عبدالله التعايشى والسيد عبد الرحمن المهدى والسيد على وإسماعيل الازهرى والسيد عبدالله خليل والامام الصادق ا لمهدى وكثر هم هامات أمدرمان الذين فاتنى ذكرهم فلهم منا العتبى . وستظل أمدرمان تنجب فى العظام الى قيام الساعة.
اما فى مجال الرياضة فيكفينا الثلاثة العظام الهلال المريخ والموردة بإستاداتهم فهم كبار الرياضة فى بلدنا. وإنشاءالله تكونى بتشجعى فريق العامل أو الإتحاد.
وفى الموسيقى والشعر فنحن الحقيبة نفسها سرور وكرومة ودالبنا وخليل فرح وعبد الرحمن الريح وعتيق والسراج والبروفيسر على المك رحمهم الله جميعاً . ياسيدتى ألم تسمعى مذياع وتلفزيون السودان وهم يبدأون يومهم بهنا أم درمان إذاعة وتلفزيون جمهورية السودان.
عندما يتباهى أبناء أمدرمان بأمدرمانيتهم فهم على حق وإن أبى الغير. عندما تذكر أمدرمان الكلام كمل. انا امدرمان تأمل في نجوعى... انا السودان تمثل في ربوعى انا ابن الشمال سكنته قلبى... علي ابن الجنوب ضميت ضلوعى
والكلام كمل... مع فائق ودى إحترامى للخرطوم بحرى وأهلها الكرام
أشرف الباقر
أم درمان الملازمين وبيت المال وودنوباوى
...
| |
|
|
|
|
|
|
Re: احب ام درمان وناس ام درمان واحب البحب ناس ام درمان والشواع والظلط والصاح والغلط . . . . (Re: أشرف محمد الباقر)
|
Quote: يعني الناس الجات بعد الجفاف والتصحر 1984م ما بنحسبهم مع ناس امدرمان |
امبدة عريقة منذ زمن المهدية..وتتميز عن كل مدن السودان الاخرى بتعدد الاعراق والإثنيات فيها..فامبدة دوما تفتح ذراعيها للوافدين والاتين مهما كثرت أعدادهم وخير مثال من نزحوا اليها ايام الجفاف والتصحر من شمال كردفان واستقروا فى ضواحيها.. وللان صاروا جزءا هاما من تركيبتها الديموغرافية..هناك أعداد مهولة ممن نزحوا ايام الحرب الاهلية من جنوب السودان وجبال النوبة.. معظم هؤلاء -وبعد زوال اسباب نزوحهم- اثروا الاستقرار فى امبدة وصاروا جزء من النسيج الاجتماعى..غير ابناء دارفور وابناء الشمال من كل ذلك نخلص بان امبدة عبارة عن سودان مصغر ففى الحى الواحد تجد فيه الجعلى والشايقى والزغاوى والدينكاوى يعيشون فى تناغم عجيب.. حتى وقت قريب كان هناك اختلاف فى تسمية امبدة ما بين امبدة ام امدرمان الجديدة ..ومالت الكفة لصالح امبدة لتحفظ لامبدة حقها وكيانها المستقل..
من الظلم أن نقول بان امبدة تتبع لامدرمان ..فامدرمان رغم عراقتها الا انها محصورة جدا فى اسر محدودة ..وكثير من سكانها الاصليين هجروها ليسكنوا فى امبدات والثورات..ومع التوسع العمرانى الحيث فان امدرمان بازقتها الضيقة وبيوتها العتيقة لا تتقبل أى زيادة سوى إزالة البيوت القديمة وهذا فيه ضياع تاريخ وارث متواصل..وانسب شىء هى ان تصير امدرمان باحياءها العريقة مثل احياء القاهرة القديمة فى الموسكى وسيدنا الحسين والازبكية..
ناس امدرمان عاشرناهم جيدا منذ الصبا الباكر حيث درست بمدارس امدرمان ابتداء من الابتدائى وحتى الثانوى..ونتفهم عقليتهم تجاه امبدات بل حتى الثورات.. فلا يمكن أن يقبلوا اطلاقا بان تقول امبدة جزء من امدرمان..ولديهم كل الحق فى ذلك ..فامبدة كيان خاص مدينة خاصة لها رونقها وبريقها ..وتطورها الذى يسير بصورة سريعة جدا أذهلت من كان يحتقرها فى سنوات خلت وصار اليوم لا يجد فيها موضع قدم ناهيك من أن يمتلك فيها عقارا..فبعد أن زال التهميش من امبدة فى السناوت القليلة الماضية امتدت الشوارع الاسفلتية تشق شوارعها طولا وعرضا وانارة الشوارع وتحسين خدمات المياه والتعليم حيث انتشرت فيها المدارس الاساس والثانوى.(حتى عهد قريب لم تكن هناك مدارس مرحلة ثانوية)..
الصورة ماخوذة من بوست لعضو المنبر خلف الله عبود..
الصورة لامبدة شارع الردمية
وناس امبدة - يا ابوحسين ودواش-مدعووين لبوست ((امبدة حضارة)) وخليكم من الخضرجية وناس حى الموسكى والازبكية.. فامبدة هى المستقبل...
| |
|
|
|
|
|
|
Re: احب ام درمان وناس ام درمان واحب البحب ناس ام درمان والشواع والظلط والصاح والغلط . . . . (Re: أشرف محمد الباقر)
|
Quote: فى امدرمان بلد الامن والامان أمدرمان الامام المهدى والخليفة عبدالله التعايشى والسيد عبد الرحمن المهدى والسيد على وإسماعيل الازهرى والسيد عبدالله خليل والامام الصادق ا لمهدى وكثر هم هامات أمدرمان الذين فاتنى ذكرهم فلهم منا العتبى . وستظل أمدرمان تنجب فى العظام الى قيام الساعة.
اما فى مجال الرياضة فيكفينا الثلاثة العظام الهلال المريخ والموردة بإستاداتهم فهم كبار الرياضة فى بلدنا. وإنشاءالله تكونى بتشجعى فريق العامل أو الإتحاد.
وفى الموسيقى والشعر فنحن الحقيبة نفسها سرور وكرومة ودالبنا وخليل فرح وعبد الرحمن الريح وعتيق والسراج والبروفيسر على المك رحمهم الله جميعاً . ياسيدتى ألم تسمعى مذياع وتلفزيون السودان وهم يبدأون يومهم بهنا أم درمان إذاعة وتلفزيون جمهورية السودان.
عندما يتباهى أبناء أمدرمان بأمدرمانيتهم فهم على حق وإن أبى الغير. عندما تذكر أمدرمان الكلام كمل.
انا امدرمان تأمل في نجوعى... انا السودان تمثل في ربوعى انا ابن الشمال سكنته قلبى... علي ابن الجنوب ضميت ضلوعى
|
| |
|
|
|
|
|
|
Re: احب ام درمان وناس ام درمان واحب البحب ناس ام درمان والشواع والظلط والصاح والغلط . . . . (Re: waleed dawash)
|
ياولي
Quote: ناس امدرمان عاشرناهم جيدا منذ الصبا الباكر حيث درست بمدارس امدرمان ابتداء من الابتدائى وحتى الثانوى..ونتفهم عقليتهم تجاه امبدات بل حتى الثورات.. فلا يمكن أن يقبلوا اطلاقا بان تقول امبدة جزء من امدرمان.. |
تعرف كلام (امبده ) كلام زول عاقل معروف من زمان اولاد امدرمان المسالمة وحي العرب والملازمين وبيت المال عندهم راي في باقي اولاد امدرمان والعنصرية دي معروفه وللان.انت تقوم تختوا روحكم معاهم كدي حلوا مشكلتكم مع اولاد امدرمان ولماذا هم متبرين منكم .. لكن ماعندكم مشكله تعالوا لينا وبنفتح ليكم احضانا بس كيف ياحلوين تطلونا
Quote: النجيضه امبده دي كوم برااااااااااه... وبعد ماننتهي من الخضرجيه بنناوش ناس الموسكي والازبكيه.( وش صاري وشو) |
هههههههه برضو مرحب بيكم (وش مبتسم ومتضامن معكم للانفصال )
------------------ ياولي ياخي طالبوا بالانفصال نحن بنضمكم احسن من تكونوا مهمشين وبنديكم مكان حيضانا بتاعت الجرجير
| |
|
|
|
|
|
|
Re: احب ام درمان وناس ام درمان واحب البحب ناس ام درمان والشواع والظلط والصاح والغلط . . . . (Re: وليد عبد اللطيف)
|
يا جماعه المسألة بتاعت ديل ناس الثورة ولا امبده دي مسألة جانبية وما عندها علاقة بالموضوع الاساسي
اي زول من شمال ام درمان الي جنوب ام درمان ومن النيل الي نهاية ام درمان غربا ده من اولاد وبنات ام درمان
وما عندنا زول افضل من زول وهو من المجتمع ام درمان ومسألة ثقافة المجتمع في ام درمان ما عندها علاقة بالمكان الانت موجود
فيهو ممكن يكون الواحد موجود في واشنطون لكن من ام درمان وواحد في اليابان بيحملوا نفس الفهم والوعي والثقافة حتى لو تلامست
مع ثقافات أخرى لكن نفس الملامح والشبه والوقفة ذاتها ولفتتو ....
الفهم الوعي سرعة البديهة الثقافة الرقي اللباقة في الكلام الكرم الفن السياسة التعليم
وده كلو جاء من وين ؟
ام درمان خليط من افضل جينات السودان من ابناء وبنات جميع انحاء السودان اجتمعوا في هذا المكان فتخالطت العادات
والتقاليد واثمرت عن وجود ثقافة جديدة تحمل افضل المكونات من انسان السودان .
هذا ما شكل المدينة إذا كل انسان سوداني من الشمال او الجنوب او الشرق او الغرب لديه اصل جيني في ام درمان
عشان كده هي المدينة التي حدث حولها تراضي واتفق سكانها على العيش معا وكانت هي الهوية والاصل في الجنس والعرق
والدين لذا تجد ابناء المسالمة انموذج عالمي في التسامح الديني .
ولو انني احببت ام درمان فكان ذلك السبب لانها النموذج للتصالح الوطني وتقبل الاخر بلا اتفاق
والما عندو محبه ما عنده الحبه : ( الشيخ البرعي رحمه الله )
| |
|
|
|
|
|
|
|