حِصَتـِــكـ ..

مابين عذوبتِك ورِقتك
معزوفة اللحن الوتر
مابين سماحتك وروعتك
وطناً موجّع بالسفر
سُمرة ملاحتِك ودِقتك
مزروعه في الغيمات مطر
وما بين نجيكِ وننتظِر
شوقنا المقسّم في الغياب
كَسرَة خواطرك تَنجَبِر
تبرُد سَموُمِك والعذاب
حضنك وطن
تربال موسّم بالشقا
ولون التراب
مابين مسامِك وبِشرَتِك
موسيقي من لون الجروف
أتخيلي زولاً مهاجر في الحِلِم
طالق شراع القبِلة شوف
متسربل الأشواق هِدِم
موجه وعُباب
واتخيلي تقسي الظروف
الضحكه والفرح الضباب
تشهق جروف
متقريفه جية التساب
تنسي الحروف
سطراً مفرهِد ومزدحِم
بي نجمه في قوس الرَجِم
عافيه وشباب
حتي الكلام
إضارا في شجن القليب
هيمان وسارِح في الحبيب
مِندَسِّي في الشهقه اللسان
حيران مكتَف بالنضِم
لا مره يلقاك في كِتاب
لا حِصَتِك يوم تنفهِم
من رِقتِك
سالت عذوبتِك ملتقي
نيلين.مُرُوه.وإنعتاق
في آخِر الروح صبَتِك
زهره ودواخلِي الحبَتِك
فتَحَت مداخلِي وخبّتِك
بي كل عذوبتِك ورِقتِك
أدِّي العيون الوصّتِك
ميلاد خصوبتِك والربيع
صيف الخريف الجاك شِتا
موجِك علي القيفات عِتَا
وزّع مزارات خصّتِك
بي كُل بشاشتِك ورِقتِك
بي كُل ملاحتِك ودِقتِك
باكِر لغاتِك تنسجِم
واقراكِ وافهم حِصتِك



شمبات
15 نوفمبر 2002