|
|
 Re: سيدتي .. أنت تسالين ومحمد الطيب يجيبك (Re: محمد الطيب يوسف)
|
يادكتور محمد
| Quote: سيدتي .. أنت تسالين |
ياخى والله صعبتها معانا بعنوان البوست دا .!
يعنى نحن الرجال ما نسأل ولً شـنو .؟
ياخوى دى فرصة ماتتعوض لما الواحد يلقى ليهو استشارات طبية وملح كمان .!!
انا بعانى من جفاف بسيط بيجينى خاصة فى فصل الشتاء ومشيت لاكثر من اخصائى جلدية
وكلهم قالوا دى حاجة موسمية وماعندها علاج غير انى استعمل مرطب لليد فى فصل الشتاء
واكتر من الخضروات وخاصة الجرجير والرجلة والاتنين مابحبهم!!
عندكـ حل لحالتى دى .؟
| |
 
|
|
|
|
|
|
|
|
Re: سيدتي .. أنت تسالين ومحمد الطيب يجيبك (Re: محمد الطيب يوسف)
|
Quote: لو انت في السودان مرينا لو ممكن
بالنسبة للحنة ياريت تستخدمي حنة السدر لأنها ما بتعمل جفاف غير الحنة العادية
فتك بعافية |
هوي هوي يا ولدي مكلفتني كدي مالك
انا في بلد طيرها عجمي سودان وين
ومن ولدوني ما سمعت بحنه بصفق السدر
دا لو بتقصد صفق شجر النبق المعلوم دا.
اها تعال راجع وهط لي الكلام دا
لانه لو لقيت عندك علاج برسل ليك اماني الامين
وهي بترسله لي في بكين
| |
|
|
|
|
|
|
|
|
|
Re: سيدتي .. أنت تسالين ومحمد الطيب يجيبك (Re: محمد الطيب يوسف)
|
د. نجاة،،
إنتى مشكلة الأكزيما دى ما عالجوها ليكى هناك؟؟
حالتى قلت نستفيد منكم،،،،
(ما شفتى الحصل على فى مرة من ذات المرات..شنو!!
غايتو الحمدلله الموضوع أتحصل)،،،
جنابو الصيدلى،،
مش طلعت جارنا أديييل !!!
لو عندك حل لمشكلة الأكزيما بجيب ليك ناس بالكوم)،،
أمانى و داليا،
جربتوا الوصفة؟؟
منتظرين النتائج،،،
| |
|
|
|
|
|
|
|
|
|
Re: سيدتي .. أنت تسالين ومحمد الطيب يجيبك (Re: محمد الطيب يوسف)
|
اها يا محمد الطيب يا ولدي خالتك دومه سريع سريع بتحصحص المواضيع
اتصلت بالجماعه في الخرطوم قلت ليهم رسلو لي حنه سدر
عشان الحنه العاديه بتجفف لي شعري
و ففوجئت بانهم بعرفوها لكين قالوا ما بتصبغ الشعر الا يخلطوها مع الحنه العاديه لانه السدر نفسه ليس له لون
قالوا لي بس مفعوله متل الشامبو بس
( وتغسل به الجنازه - بالجد دي برضو اول مره اسمع بيها )
| |
|
|
|
|
|
|
|
|
|
Re: سيدتي .. أنت تسالين ومحمد الطيب يجيبك (Re: ممدوح أبارو)
|
Quote: الدومة ازيك
مفروض تخلطي السدر بالحنة العادية وتضيفي ليهم زبادي
ملعقتين حنة سدر + ملعقتين حنة عادية + 3 معالق زبادي
وتعملي بيها ماسك للشعر |
تتبارك يا وليدي ما تتشارك
اها بعد دا جيهتني تب بسويها وبوريك النتيجه
شاكره كثيره
اتعبتك و قومت نفسك
اعفي لي يا ولدي
| |
|
|
|
|
|
|
|
|
|
Re: سيدتي .. أنت تسالين ومحمد الطيب يجيبك (Re: Hala Hassan)
|
محمد الطيب
انجدني والحقني
بحك في وشي بصورة فظيعة..ختيت ليه فازلين التقول بس ختيت ليهو موية نار..الليلة الاحد وعشان امشي لي ديرموتولجي دايرة لي اقل حاجة اسبوع عشان القي حجز...بتصدق الموية بتوجعني..وما قادرة اوقف يدي من وشي بياكلني شديد..
عندي شكلو حساسية من حاجة...
علاج سريييييييييع الكمدة بالرمدة لي بكرة اكيد حاكون اتشلختا شايقي لاني وانا نايمة بما بقدر اتحكم ابعد يدي من وشي...
ــــــــــــــــــــــــــــــــــ
كان جاتني حساسية قبل كدة والدكتور وصف لي ريتن اي,, عندي باقي آثار باقيلك اطفشا بي شنو؟؟
| |
|
|
|
|
|
|
|
|
|
Re: سيدتي .. أنت تسالين ومحمد الطيب يجيبك (Re: محمد عبد الماجد الصايم)
|
دكتور .. ازيك .. كيف حالك ..
ده شنو ده ؟؟
الفطاحله كلهم هنا .. ماما دومة ود نجاة وهاله وشبكة و وجن واواواو
وانا ما جايبه خبر .. شيء شعر وشيء وجه .. وشيء حاجات كتيييييره ..
جنس خيانات .. اصبروا لي عاد ..
اها انا بسمع في كلامكن وبسمع في وصفات دكتوركن وبستفيد منكن ..
بجيكم راجعه ...
| |
|
|
|
|
|
|
|
|
 Re: سيدتي .. أنت تسالين ومحمد الطيب يجيبك (Re: عفاف الصادق بابكر)
|
حبيبتنا عفاف الصادق،،
Quote: الفطاحله كلهم هنا .. ماما دومة ود نجاة وهاله وشبكة و وجن واواواو
وانا ما جايبه خبر .. شيء شعر وشيء وجه .. وشيء حاجات كتيييييره ..
جنس خيانات .. اصبروا لي عاد .. |
غايتو ما قصرتى كلو كلو،،
خاتانا مع الفطاحلة الجد،،
أعز الله مقدارك،،،
غايتو بالنسبة لصاحبنا جنابو الصيدلى دة،
الله يقدرنا الليلة نمشى الإفتتاح،
نشوف الـ موديلز ،،
ونجيب ليكم الأكيدة،،،
ود الصايم،،
كلمو بالله،،،،،
| |
|
|
|
|
|
|
|
|
|
Re: سيدتي .. أنت تسالين ومحمد الطيب يجيبك (Re: Hala Hassan)
|
سارة معليش ياخ والله قايلك في البلد دي هنا معانا
اعملي ماسك بتاع خيار وزبادي لانو حيقلل الحكة
ملعقتين زبادي + نص خيارة اخلطيهم بالحلاط وحتيهم علي الوش لمدة نص ساعة
لكن لازم تستخدمي استيرويد انا بفضل betnovate cream
امسحي بيهو صباح ومساء لمدة اسبوعين
الاثار بجيها بعدين
| |
|
|
|
|
|
|
|
|
|
Re: سيدتي .. أنت تسالين ومحمد الطيب يجيبك (Re: عفاف الصادق بابكر)
|
عفاف
يختي
لقيناك زول سياسة وانتخابات عشان كدا ما كلمناك
دربي وصفات جنابو الصيدلي وما بتجيك عوجة
كلو طبيعي في طبيعي
كان ما نفع ما بضر
Quote: الفطاحله كلهم هنا .. ماما دومة ود نجاة وهاله وشبكة و وجن واواواو
وانا ما جايبه خبر .. شيء شعر وشيء وجه .. وشيء حاجات كتيييييره ..
جنس خيانات .. اصبروا لي عاد ..
|
| |
|
|
|
|
|
|
|
|
|
Re: سيدتي .. أنت تسالين ومحمد الطيب يجيبك (Re: SHIBKA)
|
شيبكة .. كيفنك
| Quote: لقيناك زول سياسة وانتخابات عشان كدا ما كلمناك |
عاد يا شيبكة جني وجن السياسه من زمن المظاهرات وحدف الطوب في عربات الشرطة ..
قلنا نرشح ابوي ونصوت ليهو ونعمل حيكومة برانا ونخلس من وجع القلب ده..
| |
|
|
|
|
|
|
|
|
 Re: سيدتي .. أنت تسالين ومحمد الطيب يجيبك (Re: د.نجاة محمود)
|
| Quote: اها ياود الصايم الوصفه ماشيه معاك كيف لانه عندنا ناس بتعاني من نفس مشكلتك . |
في طور التعامل مع المشكلة!
نشوف الحلقة الجاية البحصل شنو ونديكم النجيضة!
د. نجاة
شرّاب شنو ياخ! ما تلبس قلفزات وخلاس!
عالم تحب الشراريب بشكل عجيب خلاس!
| |
|
|
|
|
|
|
|
|
Re: سيدتي .. أنت تسالين ومحمد الطيب يجيبك (Re: doma)
|
هالة حسن ومحمد الصائم شكرا للتوصية..
ويا هالة اظن الحساسية دي من عدم الجبنة..
د.نجاة شَراب..الضمتين مهمات شديد..لكن فكرة والله..
يا محمد يعني هسه جرستي دي كلها وتقول لي خيار.؟؟؟
عليك الله كشكش لي تاني في جراب الحاوي شوف لي حاجة غير الخيار..حركات الجكس دي ما بتقسم معاي اقعد اقطع في الخيار والصقو في وشي..قلتا ليك دايرة لي علاج الكمددددددددددددة بالررررررررررمدة..تقول لي زبادي وخيار؟؟؟
امبارح الوش محمر وما ارتحتا الا بموية بعد ما غسلتو بموية باردة ومسحتا فازلين...
لكن انا يا محمد حارسل ليك واحد من ناس بيتنا اتوصي لي بي خلطة معتبرة ..
ــــــــــــــــــــــــــــــــــ
يا دومة انشاء الله الزهجة فكت..؟؟
| |
|
|
|
|
|
|
|
|
|
Re: سيدتي .. أنت تسالين ومحمد الطيب يجيبك (Re: doma)
|
كل الناس الحلوين بجاى.
الف مبروك يا مولانا...قصدى جنابو...قصدى دكتور ...على افتتاح المحل.
انا- و الحمد لله- (الان ) ما عندى مشكله ( غير القباحة العادية دى...و دى ما فى ليها حل الا عمليات تجميل). المهم ....قبل فترة (ما ح اقول كم يوم او كم سنة) دخلت التلتينات. و بصراحة بديت اشيل هم من عوامل الجازبية و السن. عاوزه اعرف اعمل شنو عشان احافظ على بشرتى و اخلى موضوع التجاعيد ده يتاخر بقدر الامكان. سمعت ان الواحد لو بدت في التلاتينات...ممكن الامور (شويه كده) ما تتدهور سريع.
انا الان بغسل وشى ب . pearsمرتين فى اليوم.
مره فى الاسبوع بستعمل St. Ives Swiss Apricot Scrub
و بمسح وشى بفازلين...اى حاجه غيرو بتعمل لى حبوب و مشاكل.
و بستعمل صن اسكرين يوميا ..ده
اها توصى بشنو ??
| |
|
|
|
|
|
|
|
|
 Re: سيدتي .. أنت تسالين ومحمد الطيب يجيبك (Re: محمد الطيب يوسف)
|
محمد الطيب :
الصوره خطيره لكن
كانت أمسيه لطيفه برفقة الصديقات من سودانيز,
محمد الطيب سعدنا جدا بحضور الافتتاح في المعمل الأنيق واللي بيعكس ذوق راقي وأناقه عاليه,
حتي في اختيار الملصقات والشعار وده أكيد بيوري منتجاتكم حتكون بنفس المستوي انشاء الله,
وكمان طلعت مناسبنا, والمدام زميله عزيزه 
كل التوفيق ليك,
وانشاءالله المعمل يملأ الافاق بشهرته ونجاحه :)
| |
|
|
|
|
|
|
|
|
|
Re: سيدتي .. أنت تسالين ومحمد الطيب يجيبك (Re: محمد الطيب يوسف)
|
محمد الطيب،
الف مبروك إفتتاح المعمل،
ربنا يجعلوا قدم خير عليك،،
أستعد غايتو للطلبات :-)
فى واحدة بشبه عليها غايتو :D :D :D
يا سرورة،
غايتو وجعتى لينا قلبنا بموضوع الجبنة دة،،
لغاية ما ما قادرين ناكلها
(بنفس مفتوحة و كدة يعنى))،:) :)
و تانى ود الصايم يا تفتيحة،،
الفايدة شنو لما يلبسوا القلفزات و الأصابع تكون حرة طليقة؟؟؟
أولى إنت بئئئئئئئئئئ،،،،
سمارت أنا،
ماشاء الله،
عمر الزهور.. عمر الندى،،
نصيحة جنابو الصيدلى ما بناباها،
لكن خديها منى،،،
keep on smiling
It's a good enough exercise!!
| |
|
|
|
|
|
|
|
|
|
Re: سيدتي .. أنت تسالين ومحمد الطيب يجيبك (Re: محمد الطيب يوسف)
|
Quote: مزمل الخيري اعفص ليك كيف بس
ياخي منور البوست والربوست الجمبو زاتو
اها بالنسبة للحساسية هل هي معاك منذ الولادة بعدين بتخلف قشور بيضاء في راحة اليد
فيها حكة ولا لا وبتختفي في أوقات وبتجي في أوقات؟؟
تعال جاوبني عشان نتفاهم |
اخييييرا حنيت لحالنى يادكتور .؟
بالنسبة للسؤال الفوق دا
فعلا بتعمل قشور بيضاء فى راحة اليد بس بعض مرات كدا بيكون فيها آكولة
وهى دائما بتكون فى فصل الشتاء ..
بالله يدى بتبقى ناشفة كأنى شغال خرسانة .!
| |
|
|
|
|
|
|
|
|
|
Re: سيدتي .. أنت تسالين ومحمد الطيب يجيبك (Re: مزمل خيرى)
|
يا دكتور
مبروكـ الافتتاح ياخ!
ود الزبير دا ما يكون جا لفح حاجات مجانية!
وود أبارو دا جاي من مدني عشان يملّح! عارفو أنا المسيخ دا!
___
عفاف الصادق
الأمـور ماشة كويس .. بعد الاستعمال
ما ظهرت الحبوب بعد الحلاقة بس باقي
مشكلة الحبوب الموجودة من الأول!!
يمكن مع المدة تختفي!!
| |
|
|
|
|
|
|
|
|
|
Re: سيدتي .. أنت تسالين ومحمد الطيب يجيبك (Re: مزمل خيرى)
|
محمد الطيب ...
مبروك الافتتاح ياخ عجبني وسره بالي .
معليش جات متاخره .. بس حزنا على اخونا معتصم رحمه الله ..
Quote: عفاف مرحب بيك
بركة في جيتك دي
الباقي تجينا الليلة في الافتتاح |
ياريت يا اخوي لو كنت معاكم ..
تبعدني عنكم خلجان ومحيطات وعوامل كتيييره ههههههه ..
انشاءالله كان في العمر بقية بنزورك ..
| |
|
|
|
|
|
|
|
|
|
Re: سيدتي .. أنت تسالين ومحمد الطيب يجيبك (Re: عفاف الصادق بابكر)
|
شكرا جنابو على الرد
Quote: سمارت أنا،
ماشاء الله،
عمر الزهور.. عمر الندى،،
نصيحة جنابو الصيدلى ما بناباها،
لكن خديها منى،،،
keep on smiling
It's a good enough exercise |
هالة ...سلامات...
زهور? زهور شنو بعد كده?
الابتسامات دى (بالذات) قالوا بتزيد التجاعيد حول العيون. و الاسوا منها كمان صرة الوش ..خاصة فى الشمس. عشان كده مهم جدا نظارت الشمس .مش عشان العيون بس...عشان البشرة برضو.
so ...STOP smiling
| |
|
|
|
|
|
|
|
|
|
Re: سيدتي .. أنت تسالين ومحمد الطيب يجيبك (Re: محمد الطيب يوسف)
|
سلام يا دكتورمحمد الطيب
تصدق لي يوم الليله ما لقيت زول يلمني في حنه السدر لا زيت اللوز لا الخروع ولا شمع النحل
والشعر اجارك الله بقي يتكسر متل القش الناشف . بعد دا لازماني الباروكه يا ولدي
ومثل ما بقولوا
لا يصلح العطار ما افسده الدهر
انا فات فيني الفوات يا ولدي
بس الله يديني الشهاده والعمل الطيب
| |
|
|
|
|
|
|
|
|
|
Re: سيدتي .. أنت تسالين ومحمد الطيب يجيبك (Re: doma)
|
ماما دوما,
معقوله؟
طلباتك أوامر, بس وريني تصلك كيف؟
لو عارفه طريقة دليفيري اعتبريها وصلتك,
بصراحه شعري اتحسن جدا بعد الزيوت الطبيعيه وشمع النحل,
رجع ناعم وحاسه بيهو بينمو وبيطول,
ال Perfictil خلاهو يطول بصوره ملحوظه,وبقي حي وصحي,
مشيت الكوفير أقص أطرافه تاني, بنات الكوفير قعدوا يشكرّوا لي في شعري لما اتبسطت,
وبقوا يسألوني عملتي شنو, غايتو حكيت ليهم عن البيرفكتيل وقالوا ماشين يشتروهو كلهم :)
شكرا يادكتور :)
| |
|
|
|
|
|
|
| |
مزمل خيرى
salah ismail
سناء عبد السيد
إسحاق بله الأمين
doma
نجاة محمد بابكر
ممدوح أبارو
سارة علي
داليا حافظ
محمد عبد الماجد الصايم
عفاف الصادق بابكر
SHIBKA
smart_ana2001
حافظ حسن ابراهيم
فدياس نجم الدين
محمد إبراهيم علي
وجن
فيس بوك
تويتر
انستقرام
يوتيوب
بنتيريست