Re: الغايب كِتِل ، والحَضَر حَضَر لى مِيتُو (Re: عبدالله الشقليني)
ـ ........ الصفحة الثالثة : قالت : ـ أنا بِت عادية ، إنتَ حَبيت فِيني شنو ؟ قلت لها : ـ ما سِمعتي بالشاعر السر دوليب قال شنو؟ قالت : ـ أهَا ...قال شنو ؟ تلعثمت ، فقد توهج عَسل العينين ، وغابت الرؤيا...وقلت لها : ـ أنا كنتَ بقول في شنو ؟ قالت : ـ أنا الكُنتَ بقول مُش إنتَ فقلت : ـ قال الشاعر : اللون الخمري ..والخد الزهري زور يا غرامي ..ولو في منامي قالت : ـ باللــــــــــهِ !! ، أنا ما كُنت قايلاك كمان مُستَهبِل . قلت في نفسي ... الريدة دي بتَكتُل الصفحة الرابعة : قالت : ـ أشرح لي شنو هو اللون الخَمري ؟ أجبرتني أن أفكر ، وترنحت الكلمات وفقدت التركيز ، قالت لي بترصد ماكِر : ـ وبعدين ؟ . قلت لها : ـ وخلاص . أخذت نفساً عميقاً ، ورمقتني بعين فاحِصة وهى تقول لي : ـ رجعنا للإستهبال ! فقلت لها : ـ اللون الخمري هو لون خمري . فقالت لي : ـ وبعدين ؟ فقلت لها : ـ الخمري هو لون عَسلي فاتِح . يعني زي لونِك . قالت : ـ أنا لوني بقولوا أخدَر . قلت لها : ـ دة الصَفار صابِغ خُدرَتا ! . قالت لي : ـ مين البِسكَر فيكم ، الشاعِر ولا إنتَ ؟ الصفحة الخامسة : قلت لها : ـ إنتي والله صَعبة …أنا ما كَنتَ قايلِك كِدة ! قالت لي : ـ كيف ، صغَيرة وما عِندي مُخ ! قلت لها : ـ أبداً أنا ما قلتَ كِدة . قالت كمن تسخر مني : ـ لأ أحسن تقول ! قلت لها : ـ إنتي كل كلمة تغسِّليها وتَمصُريها لَمَن تكورِك . قالت لي : ـ أنا ما جِبتو من عِندي ..دة كَلامك . المَفروض تَفَكِري في أي حاجة ، المُسلمات قابلة لإعادة النظر … ياهو كلامك . قلت لها : ـ نعم ...لكن بدون مُبالغة . قالت لي : ـ أنا سألتك ، وما تغير الكَلام . حِكاية اللون الخَمري دي شنو ؟ ، يا إِنتَ ..يا الشاعِر ، واحِد فيكم بيسكَر ... أوعى تكونو الإتنين ،.. يبقى بيناتنا سلام الله كتير عليك َ. قلت لها : ـ إنتِ ما سمعتي الشعراء يتبعهم ( القاوون ) ؟ قالت لي : ـ القاوون البياكلوهو ! وبدأت تضحك . الصفحة السادسة : قلت لها : ـ معقول الفصاحة دي فصاحة بِت في المرحلة الوسطى ! قالت لي بغضب حلو : ـ بِت ... إنتَ مُصِّر ؟ قلت لها : ـ طيب يا أستاذة ، نرجع للرياضيات ، سَمِعِي لي قوانين المُثلثات كلها قبل المسائل . قالت لي : ـ دة دَرِس ولا زَعل ؟ قلت لها : ـ الإتنين ... استمر الدرس طويلاً ..، وأحسنت الإستيعاب والإختبارات . فجأة بدأت الحديث : ـ شايفاك زي الزعلان ، قِراية سَاكِت ! لو زعلان من كلامِي بسحَبو . قلت لها : ـ البِحِب ما بِزعَل . بدت تتشكل على ملامحها إحساس غريب بالعطف مع السُخرية ، ثم قالت لي : ـ يعني إنتَ بِتحِب ؟ ...مِسكِين ! . الصفحة السابعة : قلت لها : ـ المِسكين سِكين . أفردت هي نظرة مُضيئة وقالت لي : ـ ربنا يساعدَك ...إتمسكن لمن إتمَكن . قلت لها : ـ إنتي بِت... أقصُد مَرَة قاهِر !. ضحكت وقالت لي : ـ كلام الناس الكُبار دة بتجِيبُو مِن وين ؟ فقلت لها : ـ أهو بِقيتي مثقَفة ! . تطلعت هي تنظرني من كل جانِب ، وهي تقول : ـ القَميص دة جِبتُو من وين ؟ قلت لها : ـ الكلام الراي . قالت لي وهي تضحك : ـ هو من ناحية حِلو ..حِلو ، ذوقَك طبعاً ما فيهو شك . قلت لها : ـ النقشة ما بتظهَر من بعيد ، و من قريب شكل تاني . far scale و near scale قالت لي : ـ يلا على الشَرِح ... أوعَ تَكَروِتنِي . الصفحة الثامنة : قالت لي : ـ تَذّكَر صاحباتي العَرفتهم عليك يوم السوق الخَيري . قالوا لي الولد دَة قُمصانُو بِجِيبها من وين ؟. فرددت عليها مدَّعياً الغَضب : ـ ولَد !!! .. وريني ليهِن عَشان أوريهِن { الوَلد الإسمو النَعِيم ود حَمَد } . ديل كمان الما قامن ...... قالت لي : ـ قلتَ شنو ..قلتَ شنو ؟ قلت لها : ـ ما سمِعتي بي ( سُنن البَرامكَة ...) البِغَنيها الفنان خَلف الله حَمد ؟ قالت لي : ـ دة البِجِيبوهو الجَماعَة الهِناك ، والبطَيروا العَكاكيز في السماء ؟ الصفحة التاسعة : قلت لها : ـ يعني بِتعرفي الفنان الشعبي خَلف الله ! قالت لي : ـ طبعاً ! قلت لها : ـ الله.. جينا للنَبَّذ ...طبعاً دي معناها ( إنتَ غَبي ) قالت لي بتهكم : ـ معقول أستَاذي أنا دي يكون غَبي ؟ . أنا أنتحِر طوالي ... سلامتك ، إنت الكلام الغريب دة بتجيبو من وين ؟ قلت لها : ـ المهم وريني البنات الما قامَن .... وقاطعتني وهي تقول : ـ أيوااااااه .. إنتَ طلعتَ بِتاع مَشاكِل ؟ . دي معلومة جَديدة ...وين الأدب والذوق والفنون والتقدم ؟ قلت لها : ـ ما سمِعتِي بالشِعر القومي : بوصيكم عَلى الضيف الهَجوع عَشُو بوصيكُم عَلى الفايت الحُدود واسُو فعلاً صاحباتِك ديل دايرات البِواسيهِن . الصفحة العاشرة : قلت لها : ـ إنتي فتَّانة بالمناسبة !. قالت لي : ـ نَبَذ ولا شُكُر ؟ قلت لها : ـ كلو ... كلو قالت لي : ـ دة كلام زعل ...حراااام ، أنا بهزر ... قلت لها : ـ أنا بحب أكون موضوعي . قالت لي : ـ أها جينا للكلام الكُبار . موضوعي يعني شنو ؟ قلت لها : ـ يعني ممكن يكون معناها حُكُم على شيء ، بغض النَظَر عن ميولنا الشخصية . أو يعني حاجة قريبة من كِدة . قالت لي : ـ أنا مُحتاجة نُص كيلو مُخ ... وضحِكت . أحضرت والدتها لنا الشاي ، ونحن نستذكر ، فقلت لها : ـ بتعرفي تسوي الشاي ؟ فردت عليَّ بغضب ، و قد توهجت بجمال غضبها : ـ إنتَ قايِلني شنو يعني ؟ وعندها تصارعت مع نفسي . أيمكن أن يكون الغضب قد أراني صورة جميلة أخرى لها ؟ ، كأنني أدير ماسة تتكسر الأضواء بألوانها وهي تتحرك . تتراقص أطيافها وأنا أحادثها . وقلت لنفسي : ـ كيف لم يلحظ غيري كل تلك الفتنة المختبئة ؟ حاولت أن أعتذر ، وحاولت تغيير الموضوع . ولم تزل هي غاضبة ، فقلت لهالأخفف وقع تساؤلي : ـ أنا مثلاً... ما بعرف أعمل شاي ! فقاطعتني بغضب : ـ بالله.... إنتَ قايلني شنو ؟ فقلت لنفسي : ـ من يخرجني من هذه الورطة ؟ . أغلق هو الدفتر ، وخبأه . *** مرّ زمان وتقلب الدهر بعجائبه ، ونهض تاريخ جديد . جلس ذات يوم يتذوق طعم الشاي ( المَبَخَّر ) من صُنع يديها . وهي قد أضحت الآن امراة مترفة الأنوثة ، تفوح منها روائح عِطر السودان المتفرِد ، وقد لونتها الدُنيا بصفاء مُشرِق . جلس عندها ، وقال : ـ الشاي المبخَّر دة رهيب ! وردت بتوهُج : ـ حتشرب شاي من الله ما خلقك ما شرِبتُو . وتفتحت شاعرية لم يكن يحسبها في دواخله ، وأنشد في سره : كان شَافَا الشِتا صَفَق الشَجَر ما بِحِتُو الشاي المَبَخَّر لَفَح البَخُور مِن سِتُو الغَايِب كِتِل ، والحَضَر حَضَر لى مِيتُو عبدالله الشقليني 20/11/2004 م (عدل بواسطة عبدالله الشقليني on 02-19-2006, 10:54 PM)

العنوان	الكاتب	Date
الغايب كِتِل ، والحَضَر حَضَر لى مِيتُو	عبدالله الشقليني	02-19-06, 02:21 PM
Re: الغايب كِتِل ، والحَضَر حَضَر لى مِيتُو	عاطف عبدالله	02-19-06, 02:28 PM
Re: الغايب كِتِل ، والحَضَر حَضَر لى مِيتُو	عبدالله الشقليني	02-19-06, 10:09 PM
Re: الغايب كِتِل ، والحَضَر حَضَر لى مِيتُو	عبدالله الشقليني	02-19-06, 10:47 PM
Re: الغايب كِتِل ، والحَضَر حَضَر لى مِيتُو	sari_alail	02-20-06, 01:33 AM
Re: الغايب كِتِل ، والحَضَر حَضَر لى مِيتُو	عبدالله الشقليني	02-21-06, 02:28 PM
Re: الغايب كِتِل ، والحَضَر حَضَر لى مِيتُو	عاطف عبدالله	02-22-06, 05:40 AM
Re: الغايب كِتِل ، والحَضَر حَضَر لى مِيتُو	عبدالله الشقليني	02-22-06, 11:20 AM
Re: الغايب كِتِل ، والحَضَر حَضَر لى مِيتُو	Ishraga Haimoura	02-22-06, 06:02 AM
Re: الغايب كِتِل ، والحَضَر حَضَر لى مِيتُو	عبدالله الشقليني	02-23-06, 05:28 AM
Re: الغايب كِتِل ، والحَضَر حَضَر لى مِيتُو	قرشـــو	02-22-06, 06:15 AM
Re: الغايب كِتِل ، والحَضَر حَضَر لى مِيتُو	عبدالله الشقليني	02-22-06, 11:33 AM
Re: الغايب كِتِل ، والحَضَر حَضَر لى مِيتُو	حافظ عبدالعاطى احمد	02-22-06, 06:48 AM
Re: الغايب كِتِل ، والحَضَر حَضَر لى مِيتُو	عبدالله الشقليني	02-25-06, 10:21 AM
Re: الغايب كِتِل ، والحَضَر حَضَر لى مِيتُو	قرشـــو	02-26-06, 03:41 AM
Re: الغايب كِتِل ، والحَضَر حَضَر لى مِيتُو	عاطف عبدالله	02-27-06, 04:57 AM

[رد على الموضوع]

صفحة 1 „‰ 1: << 1 >>

احدث عناوين سودانيز اون لاين الان

اراء حرة و مقالات	Latest Posts in English Forum
Articles and Views	اخر المواضيع فى المنبر العام
News and Press Releases	اخبار و بيانات

الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة

About Us
Contact Us
About Sudanese Online

اخبار و بيانات
اراء حرة و مقالات
صور سودانيزاونلاين
فيديوهات سودانيزاونلاين
ويكيبيديا سودانيز اون لاين
منتديات سودانيزاونلاين

News and Press Releases
Articles and Views
SudaneseOnline Images
Sudanese Online Videos
Sudanese Online Wikipedia
Sudanese Online Forums

If you're looking to submit News,Video,a Press Release or or Article please feel free to send it to [email protected]