Quote: ياكع والله كلامك صاح فى الجزئيه بتاعت المداخلات لكن والله هناك ناس كتار فى الامتداد مواظبين على الدخول كلو يوم عشان يشوفوكم كتبتوا شنو يعنى انت ياكع مابتكتب للعشرين نفر الاعضاء لكن لكل الامتداد وزى ماقلت لى ابو قصى فى ناس عرفتكم من الاجيال الجديده وحصل شغل روحى جميل بينكم وبين الكثير من شباب الامتداد فى جميع المربعات عبر مداخلاتكم وتعليقاتكم وماتمشى بعيد اسألنى انا سنين طويله اطالع هذا البوست واستمتع بكل مايكتب والحمد لله اضفت الكثير من الناس عشان كده اطمنك خالص لو عملت مداخله ومافى زول رد من الاعضاء تأكد ان هناك المئات من ابناء الامتداد يطالعونها فى شغف ده ماكفاية ...واصل بنفس حماسك الذى عهدناه
ياااااا ه يا قرجاج - كلامك ده بخلي الزول - يرجع15 سنه لي وره - ويديك احساس قعداتنا ولمتنا في الامتداد التي افتقدناها وان لا امل للرجعه لها - والحاجه البتكل الزول ستين مرة انك عايش غربه وجع قلب والم - ولمن ترجع بعد السنين الكتار ما تلقي ليك زول بعرفك - ولكن بي كلامك ده ابدا ما حا نقطع عن البوست اللا الشديد القوي - عسي ولعل الغريبه لمن رجعته سنة 2007 السودان - كل الناس كانت بتقول لي - (( ده اخو محمد مورده )) ومحمد مورده ده اخوي الصغير من مواليد 90 - وسنة 90 انا راجل قدر الهجمه !! اتخيل
11-14-2009, 08:19 AM
مجدي عبدالرحيم فضل مجدي عبدالرحيم فضل
تاريخ التسجيل: 03-11-2007
مجموع المشاركات: 8882
أحبابنا في الامتداد تحياتنا ليكم جميعا ولا عتاب بين الأحباب أليس كذلك!!!!!!!
Quote: صديق حمدتو عليك الله تعال احكي لينا عن الزول الكان بجيب الزبادي في العجلة حقتو الزول دة كان مشهور في الامتداد
تحياتي يا دكتور طارق وألف مبروك على الزهرة الفواحة التي تفتحت في حديقة الأخ ناصر.
تصدق يا طارق قبل أسبوع تقريبا كان معي الأخوين مجدي عبد الله (مربع 6) وعصام الرشيد (مربع 5) وتذكرنا عمنا بتاع العجلة الذي كان يزود كل الدكاكين في الامتداد بالزبادي الذي يفوق في طعمه ونكهته جميع مأنتجته وتنتجه مصانع الديري. وكانت لنا طقوس في تناول هذا الزبادي الذي كان يباع في قوالب بلاستيك أو المونيوم صغيرة حيث نقوم بتكسير بعض قطع البسكويت عليه مع إضافة بعض الطحنية ونتناوله مستخدمين "حلاوة حربة" بديلا عن المعلقة وكانت كل هذه الخلطة لا تزيد في تكلفتها عن بضعة قروش لا تتجاوز الخمسة بأي حال من الأحوال.
Quote: صديق حمدتو والله بذكر فيك اليومين ديل ..عارف بكرة في ندوة عن الخفاض الفرعوني مع منظمة كرتاس والدكتورة دي جايبنها من السودان اسمها ليلي ضحوي ...تذكرت ايامكم ورابطة ابناء الامتداد بجامعة الخرطوم
الأخ العزيز عماد عويس - والله يا عماد زي ما بقولوا القلوب شواهد ولي فترة أخطط للإتصال بك حيث كنت أتحدث عنك مع الصديق سعد "سعدون" - في تلك الفترة يا عماد كنا نمتليء بالتفاول والإحساس بالمسئولية تجاه أهلنا وتجاه المجتمع وأعتقد أن ذلك بالظبط ما كانوا يرجونه منا، فهم ضحوا بالكثير مقابل أن يجعلونا نكمل مسيرة التعليم لهذا الحد وكان لا بد لنا من رد الدين. هل تعلم يا عمدة، وأكيد طبعا كنت تعلم، فدوركم في رابطة أبناء الامتداد بجامعة القاهرة كان موازيا لدورنا أن لم يكن متفوقاً عليه، هل تعلم يا عمده أننا كنا ننظم الكورسات الصيفية برسوم رمزية والعائد من هذه الكورسات كنا نصرفه في إعادة تأهيل المدارس التي كنا ننظم فيها الكورسات مثل أعمال طلاء الجير والبوهية وإصلاح الكنب والأدارج وتركيب لمبات الإضاءة المرواح وخلافه.
الأخ عبد الله كع لا تحزن يا عزيزي ولايصيبك الملل فالبوست سيعود لمجده الذهبي إنشاء الله وسنذكر لك في ساعة الشدة أنك كنت الفارس الوحيد الذي لم يسقط من فرسه أبداً
الحبيب أحمد جمعة "جومو" بالله طمنا على الامتداد وفريق الامتداد وبلغ تحياتنا للأخوان عوض عمر وعوض أبنعوف وفؤاد قورتي وميرغني أبقيقة وكل الملتفين حول الفريق وقول ليهم قلوبنا معاكم ودعواتنا ليكم بالنصر والتوفيق.
الأخ عبد الحليم "أبو خالد" تحياتنا لك ولأسرتك - صديقنا وزميل دراستك "عصام الرشيد" يسأل عن أخبارك ويطلب رقم تلفونك!!
عامر تيتاوي وينك يا عزيز!!!!!! نفتقدك بشدة والله. وبالله قول لياسر حنا أهو جبنا سيرة الزبادي بعد شوية بنجيب سيرة الروب لووول !!!!!!!!!!!!!
11-14-2009, 11:00 AM
مجدي عبدالرحيم فضل مجدي عبدالرحيم فضل
تاريخ التسجيل: 03-11-2007
مجموع المشاركات: 8882
وأسهام بسيط لذاك الرجل الذي ملأ الأمتداد بياض وهو علي عجلته وتنام علي جمبها الأيمن ذاك الصندوق الخشبي المستطيل في السرج الوراء هو يدعي العم عبدالحفيظ وكان معمله مجاور لمنزل العم ودالأمين بمربع 13 وله دكان والمنزل كان منزل ناس نادر عمار أحمد لردح من الزمن الجميل بالله ياأبو رهف لا تغيب وغطي لنا هذا الموضوع الشيق وزكريات أهل الأمتداد.
،،،،أبوقصي،،،،
11-14-2009, 01:45 PM
عبدالله كع عبدالله كع
تاريخ التسجيل: 02-12-2008
مجموع المشاركات: 4841
يوم السبت من اتعس ايام الاسبوع - عادة بس السبت ده (ارهب سبت ) يلاقيني - الحمدلله دخلت الصباح لقيت اشرف الباقر موجود باريحتو المعهوده - والزول الرائع سيد سيدنا والاخ المحترم جدا صديق حمدتو - واختنا المتالقه جداجدا ساره كرودي - والحبوبه شبكوته - وعماد عويس الفنان المبدع طارق جبريل - وامنقه حاجه لقيته اليوم في بوستينا 00 اميل عصمت الامتداد الزول الطويل الحريف 00 والحلو قرجاج - ياااااااااااااااااسلام انشالله ما اكون نسيت زول عمل مداخله في اليومين الفاتو - وسقط - ولكن هذا السبت غير ............... ربنا يرجع العقاب ونشوف بوست مشوق - ويجبرك انك تتحكر فيهو - وبرضو يا ابو قصي - عماد محمود عمل حميل !! علي سبيل المثال لا الحصر !!
كدا نشوف الاحد فيهو شنو غير خروج مصر من كاس العالم !!
11-14-2009, 03:34 PM
طارق جبريل طارق جبريل
تاريخ التسجيل: 10-11-2005
مجموع المشاركات: 22556
عشان كدة الواحد بيحبكم وبيحب الامتداد لانكم ما بتخذلوا الزول امتداداب اقحاح يا سلام على الذاكرة القوية لي اخونا صديق يلا يا حبيب املأ المكان فرحا ومحبة
اخونا وليد عبد اللطيف لكن لقيت كبير خلاص ياخي تنقو دة نحن بنتفرج فيه ونحن شفع هههههههههههههههههههه
حباب سيدنا وحباب اشرف وحباب كع وحباب ابو قصي وحباب عويس وحباب قرجاج وحباب ام خالد (عبد الحليم النعيم)
وفي انتظار البقية الجميلة
11-14-2009, 10:23 PM
مجدي عبدالرحيم فضل مجدي عبدالرحيم فضل
تاريخ التسجيل: 03-11-2007
مجموع المشاركات: 8882
حباب سيدنا وحباب اشرف وحباب كع وحباب ابو قصي وحباب عويس وحباب قرجاج وحباب ام خالد (عبد الحليم النعيم)
وفي انتظار البقية الجميلة شفتو ياجماعة طلتكم بتحيى الروح والله العظيم عندما تسجلوا الحضور بتكونوا معنا بارواحكم واجسادكم والزكريات الجميله عصمت عبدالله يارئع دعواتك فى المدينه المنورة لنا ولاهل الامتداد والسودان
احبتى بقلوب راضيه بقضاء الله نترحم على فقيد الامتداد الاخ هاشم محمدأحمد(برنو) والذى حدثت وفاته فجر اليوم شقيق عثمان اشول على شاويش وعباس وانا لله وانا اليه راجعون حضر الى السودان فى اجازة والبر والسلوان لاهلة جيرانه
11-15-2009, 07:47 AM
Ashraf El Bagir Ashraf El Bagir
تاريخ التسجيل: 06-20-2007
مجموع المشاركات: 819
تحياتى احمد جمعة وجميع الأسرة الكريمة وجميع اهل الأمتداد
نترحم علي الفقيد وندعو له بالمغفرة وحسن الثواب ولاهله الصبر وحسن العزاء.
اهلنا الطيبين
هنالك الكثير الذي يمكن تقديمه لخدمة اهل الأمتداد من خلأل هذا الموقع. الحمد لله ابناء الأمتداد منتشرون فى الكثير من البلدان فى الخليج وامريكا واوربا وانا على يقين بانهم على استعداد لخدمة اهلهم فى الأمتداد فى كافة المجالأت هذا بالطبع بالأيضافة لأبناء الأمتداد فى الداخل.
- الأستشارات الطبية - الأدوية المنقذة للحياة - الأدوية النادرة الغير متوفرة فى السودان - الأستشارات الهندسية - العلأج فى الخارج - التعليم والمراجع العلمية - الدعم المالى المباشر ... والكثير
نعم نترحم على الأموات نفرح لأفراح الأمتداد ولكن نزداد فرحا بتخفيف الم مريض بنجاح طالب علم بفرحة طفل يوم العيد بمساعدة الذين نحسبهم أغنياء من التعفف
ولكن السؤال كيف تصل هذه المعلومات الدقيقة الينا وقد تكون فى بعض الأحيان خاصة جدا؟
اقتراحاتكم اخوانى
11-15-2009, 07:53 AM
عبدالله كع عبدالله كع
تاريخ التسجيل: 02-12-2008
مجموع المشاركات: 4841
يا جماعه انا بفتش علي علاج للوالد- لي كم يوم ما حصلتو في السعوديه او في الرياض تحديدا اسمه (dilatrend - 6.25)- وانه غير متوفر في صدليات السودان - والعلاج هذا لضخم القلب
واسالكم الدعاء له بالشفاء
جوالي - 0556457726
11-15-2009, 08:20 AM
Ashraf El Bagir Ashraf El Bagir
تاريخ التسجيل: 06-20-2007
مجموع المشاركات: 819
نسيت اقول ليكم ...يوم الجمعه فى امسية امتداديه شتويه نص نص كده تنسمت تلك النسائم التى تشتم فى رائحتها قرب قدوم فصل الشتاء فانكمشت على نفسى وانا اتخيل تلك الامسيات البارده وتلك الكئابه التى تتملكنى حينها فانا بطبعى لا احب هذا الفصل لانه يثير فى نفسى مزيحا الذكريات الحامضه ويحبسنى داخل المنزل فى وقت مبكر فتخلو شوارع الامتداد من كل شى اصلا هى ماناقصه تفضى اكتر من كده ...لعل عدم ارتياحى لهذا الفصل يعود لسنوات طويله حين قابلت احدالحكماء من الذين اثق فيهم فذكر لى ان الانسان بطبعه يجتر كل ذكرياته المؤلمه فى هذا الفصل وكمان لو كان فيها شاكوش سجمك عديل كده) لان النوم يمكن يجافيك حتى يرحل الشتاء المهم ان العقده اصابتنى منذ ذلك الوقت... تمالكت نفسى وقطعت مسافه ليست بالبعيده حتى وصلت الى مركز تسجيل الانتخابات وكم كانت فرحتى حين عانقت مدرستى الزمان مدرسة الامتداد 4 بعد سنوات طويلة لم تلامس قدماى ارضها ارض الذكريات الغضه فقد كانت هى مركز التسجيل لعدة مربعات فى الامتداد طبعا الان صار اسمها كعب بن زهير اما فى زمن الجاهلية كما يدعون فبل اسلمة الاسلام كانت الامتداد 4 بنين ياسلام ياخ شعور عجيب والله دخلت ليها وكأننى اعانقها لكننى ماوجدتها كما مضى فقد تلاشت الخرطه القديمه وباتت غريبه كغربتى فى المكان لكننى مالبثت ابحث عن ملامحها القديمه او ربما كنت ابحث عن ملامحى انا فى هذا المكان الذى قضيت فيه سنوات طويله لم اجد غير مدرسة البنات المجاوره فطفت حولها وجدتها كما هى وكأننى ارى استاذه امنه ناظرة المدرسة فى ذلك الزمان تمر من امامى ترمقنى بنظرة فيها صرامه نظره ترتعد معها الابدان ............... ونواصل لاحقا فى زول جانى ومنتظرنى بره الواحد اصلو فى البلد مايقدر يتم ليه شى للنهاية باااااااااااى
اللهم ارحم الاخ هاشم محمدأحمد وابني له قصرا في الجنة واجعله من الصديقين والشهداْء انا لله وانا اليه راجعون
يا كع الف سلامة للحاج واجر وعافية ان شاء الله
يا شباب كلام اشرف الباقر دة ما ترموه الواطة يا ريت لو في اي زول في الامتداد عنده حوجة مستعجلة يراسلنا والحمد لله اولاد الامتداد مالين الدنيا خصوصا الحاجات التي لها علاقة بالعلاج والمرض وبتكون مستعجلة دة ايميلي الخاص لاستقبال اي طلبات امتدادة: [email protected]
وايد في ايد تجدع بعيد
11-15-2009, 10:02 PM
مدثر قرجاج مدثر قرجاج
تاريخ التسجيل: 07-21-2009
مجموع المشاركات: 1614
اها الزول الجانى طلع هسه ....المهم امتداد 4 كانت تضج بالكثير من الامتداديون والله التقيت باشخاص يمكن 15 سنه لم التقيهم واتونسنا وجكس الامتداد كان ليه نصيب الاسد فى التسجيل خصوصا انو ناس المؤتمر الوطنى متخصصين فيهم يعنى برسلو واحده بى عربيه تمشى تخش ليها شارع تجيب معاها تسعه وتجى وقد نشط كميه من البنات فى مربع 14 المنضوين تحت شعار المؤتمر الوطنى وماخلو ليهم واحده ماجابوها سجلوها فى ظاهره الاولى من نوعها خصوصا اننا فى المربع ماعندنا ميول تجاه الجماعة الطيبين ديل لكن ماعارف الحصل شنو؟؟ غايتو ياناس الامتداد بصراحه ناس المؤتمر الوطنى شكلهم فازوا بجولة التسجيل وطبعا الوقت مازال مبكر للفوز بالانتخابات طبعا كل التنظيمات حاضره فى غرفة التسجيل ومعاهم مندوب من منظمات المجتمع المدنى وغايتو جنس مقصات يعنى اول ماتسجل وتشيل الديباجه بيقابلوك بره السماسره خصوصا ناس المؤتمر الوطنى وبشيلوا بيناتك ورقم تلفونك عشان السنه الجايه توقع ليهم والله التسجيلات مولعه هنا فى الامتداد يعنى الداير توقيعى ممكن لكن نشوف الاسعار حاتكون كيف شهر4 احتمال الواحد يلقى ضربه حلوة والله بتحصل حاجات غريبه مابتتحكى والبركه فى الشوفه يا امتداد 4 مدرستى التى احبها......ونواصل
11-16-2009, 02:01 AM
AWAD MAHMOUD OSMAN AWAD MAHMOUD OSMAN
تاريخ التسجيل: 06-08-2008
مجموع المشاركات: 370
اللهم أرحم كل من فقد عزيز واللهم أرحم جميع اموات المسلمين
كتب أشرف الباقر
Quote: اهلنا الطيبين
هنالك الكثير الذي يمكن تقديمه لخدمة اهل الأمتداد من خلأل هذا الموقع. الحمد لله ابناء الأمتداد منتشرون فى الكثير من البلدان فى الخليج وامريكا واوربا وانا على يقين بانهم على استعداد لخدمة اهلهم فى الأمتداد فى كافة المجالأت هذا بالطبع بالأيضافة لأبناء الأمتداد فى الداخل.
- الأستشارات الطبية - الأدوية المنقذة للحياة - الأدوية النادرة الغير متوفرة فى السودان - الأستشارات الهندسية - العلأج فى الخارج - التعليم والمراجع العلمية - الدعم المالى المباشر ... والكثير
نعم نترحم على الأموات نفرح لأفراح الأمتداد ولكن نزداد فرحا بتخفيف الم مريض بنجاح طالب علم بفرحة طفل يوم العيد بمساعدة الذين نحسبهم أغنياء من التعفف
كلام مية مية أتمني أن تكون مساحة تواصل لخير الاعمال
11-16-2009, 06:58 AM
عبدالله كع عبدالله كع
تاريخ التسجيل: 02-12-2008
مجموع المشاركات: 4841
سلام يا قوووم - اولا شكرا لكل من دعا للوالد بالشفاء - واخص اخي اشرف الباقر -
ياشباب - ويا شباب لناس الداخل والبردان - مدثر قرجاج والخراخار - احمد حمعه وعماتي - ساره كرودي - ومحاسن ابراهيم نصر ( عماتي دي للتعظيم وليس الا .... ) ما تفهمونا غلط ولكل الشباب المتابعه بوست الامتداد من الداخل اقتراح اشرف الباقر ده في غايه الاهميه - والله العظيم مهم .. يا خوووووووانا في ادويه من الصعب جدا تتوفر في السودان وهي اديه منقذه للحياة - نعم الاعمار بيد الله - لكن قبل ان تعض اصابع الندم - لابد من الاخذ بالاسباب ونجتهد في الحصول علي هذه الاسباب - وعليه علي الاخوان المزكرين اعلا ه وبما انهم هم الاقرب للناس وان يجتهد في البحث الي من يحتاجون لهذه الادويه حتي ولو خارج الامتداد -
اما علي ناس الشتات ( الخارج )
ان يكتبو ارقام جوالاتهم واميلاتهم - الله عايزين نعمل اي حاجه لناس الامتداد
جينا نصابحكم ونمد حبل الشوق بحر كع العزيز أنت التواصل عبر السلك ده مامعاك ولا كيف المهم صديقي كيف أخبار الوالد نسأل الله له العافية والحاجة وكل الأخوان والأخوات عساهم طيبين وناااس مصعب وأحمد والأمورة آية ووالدتهم وكل الأحباب بالرياض إن شاء الله تمام بالله ياكع أدونا أخبار العمدة ود محمود طولنا منو ولكم جميعا التحا النواضر أبناء الحي المتفرد فردا فردا .
،،،،أبوقصي،،،،
11-16-2009, 08:08 AM
وليد عبد اللطيف وليد عبد اللطيف
تاريخ التسجيل: 08-09-2009
مجموع المشاركات: 6733
Quote: ياعبد الحليم عندى حاجات كتبتها فى صفحه لكن نسيت المهم عوضنا الله ...اتهجمت لمن لقيت الصفحات زادت قلت ده اكيد ناس بحرى طراوه عملوا غزو علينا وراسى بدا يودى ويجيب قلت وليد يكون غدر بالامتداد وسلم البوست لى ناس بحرى وسليت سيفى وجيت احارب لكن لقيت وليد براءة وناس بحرى نداوة والامتداد حلاوة فتكم بعافيه
ود قرجاج ضحكتني عشان طلعنا براءه معزوم في بحري حي الدناقله وتعال اشرب المويه من سبيل عمك وماتنسى الباب الاسود الفاتح على الميدان دق عليهو وسلم عليهم وصاحب الدكان الراجل الكبير ماتنسى تشتري منو ظهرتين وانت جاي .. بحري طراوه بحري نداوه بحري حمائم السلام واغمد سيفك ياعنتر ومرحب بك في ديار عبله
-------------------------- ود قرجاج وين حكاويك الجميله ومروه التركية بتسلم عليك وبتسأل منك (تحياتي لكل ناس الحله )
11-16-2009, 12:54 PM
سارة كرودى سارة كرودى
تاريخ التسجيل: 05-06-2009
مجموع المشاركات: 764
يابابكر التوم والله الشعبيه جميله زى الامتداد وعندى فيها اصدقاء مقدرين وفعلا هناك اوجه شبه لكن قلبى مع حى الدناقله اعمل شنو بحب الحى ده شديد عشان كده تعال نقسم الحكاية وليد يربط الامتداد بالشعبيه وخلونى اعقد ليكم الامتداد مع حى الدناقلة ههه
11-17-2009, 01:19 AM
طارق جبريل طارق جبريل
تاريخ التسجيل: 10-11-2005
مجموع المشاركات: 22556
اكيد جهاز الكمبيوتر الخاص بالأخ عبد الحليم مصاب ب computer worm وانا متاكد انه متفاجى بالذى يحصل ولأ يعلم بالأمر
هنالك فرق كبير بين ال computer worm و computer virus
computer virus تصيب وتعطل وتدمر برامج الكمبيوتر وهى تستهدف الكمبيوتر computer worm هى برامج تستهدف الشبكات والمواقع حيث تغرقها بالرسائل والطلبات وتصيبها بالبطئ وفى بعض الأحيان التوقف التام عشان كده بكري وقف حساب عبد الحليم لحين التاكد من نظافة جهازه طبعا جهاز واحد مصاب ب computer worm لأ يوثر ولكن مشكلة computer worm (دودة الكميوتر) تنتشر بسرعة ومن جهاز الى جهاز يعنى بضع مئات من الأجهزة المصابة ممكن تعطل الموقع.
11-17-2009, 07:00 AM
مجدي عبدالرحيم فضل مجدي عبدالرحيم فضل
تاريخ التسجيل: 03-11-2007
مجموع المشاركات: 8882
العزيز أشرف الباقر هذة المقترحات هي عصب الحياة العامه في كل السودان والحي المتفرد جزء منه ولو تفردنا بهذة الأعمال فأنها بجد وتفاني نكون قد أسهمنا في رتق الكثير من الهموم لدي المواطن البسيط وإن شاء الله في ميزان الحسنات ونثمن عليها وبل نعض عليها بالنواجز وكل من يعرف محتاج لأي من الأدوية الغير متوفرة هناك أن يمد البوست أو أي إيميل من الإيميلات وإيميل البوست موجود بطرف الريس طارق ونحن تحت الخدمة في كل من يخدم الحي الذي يجمعنا إجتماعيا وثقافيا ورياضيا.
وثانيا: نشكرك ياهندسة في الإفادة المتخصصة دي ومشكلة حليم وبالأمس تحدث معي وذكرت له الأمر فقلت له يرسل لطارق وهو بدورة يعلم بكري بسرعة ونشكر الريس والمهندس بكري أبوبكر وإن كان سوف نفقد باص حليم في شارع الردمية لوقت معلوم وإن شاء الله من العائدين حليم حامد نعيم وتحية إجلال لهذا الحضور الجميل وإسراء البوست في موسم هذا الحج الأمتداد الذي يطوف ببكة الزكريات واصل مدثر قرجاج في الحكي وتداعي الزكريات ووليد القاسم المشترك بين الشعبية والدرجة المتفردة . وأيضا نتمني وجود محاسن وهي خبيرة إنتخابات وسياسية مخضرمة مع أميرة الحي سارة كرودي بالنسبه لنسرين ياكع خلاص مكة مغلقة لما بعد الحج وبعدها نمارس رحلة البحث عن نسرين جمال . ومطلوب أيضا تواصل بنات الخليفة. وهناك أميرة أيضا وهي شبكة أو شبكوته علي قول كع وهي تواجدها يعطينا أمل باكر وناس الدوحة برضو مطلوب من شبكة ومعاز السر إحضارهم بإمر إمتدادي سامي ونواصل رحلة الحي المتفرد بيننا تكافلياًومن مننا لا يحتاج للآخر وهي سنة الأولين والآخرين فينا مع حبي للجميع وحقا تكفو العين .
،،،،أبوقصي،،،،
11-17-2009, 07:58 AM
وليد عبد اللطيف وليد عبد اللطيف
تاريخ التسجيل: 08-09-2009
مجموع المشاركات: 6733
بابكر التوم حبيبنا ياخي انت مازولنا عديل كده (قريبك يحى عرف في الحي بأخلاقه الجميله وحميده وكرمه وطيب المعشر ) وهذه الصورة بهديها ليك لان سبق واتكلموا عنه في بوست الشعبية ومن طرائفي معه اخر اجازة لي في السودان عملت حادث بالعربية وصاحبك ماقصر وكان هو الضامن وانت عارف اجراءتنا الروتينية
الشاب الخلوق يحى قسم الله
اما كرة القدم عندهم قصة وقصة مالا نهايه
--------------------------------------- ود التوم رجاء ماتنقطع عن بوست الامتداد ولك كامل الود
11-17-2009, 08:05 AM
وليد عبد اللطيف وليد عبد اللطيف
تاريخ التسجيل: 08-09-2009
مجموع المشاركات: 6733
سارة كرودي اوعي تكوني جبتي سيرة الهلال وزعلتي لينا عمر سعادتو والله امس بالصباح كان كويس والساعة خمسة قال خلاص انا بعتزل سودانيز وفتح بوست بذلك . صراحه عمر رجل بمعنى الكلمه ومنه قلائل في هذا المنبر الف تحيه له وياريت الناس تحاول تقنعة بالتعديل عن قراره
11-17-2009, 08:57 AM
وليد عبد اللطيف وليد عبد اللطيف
تاريخ التسجيل: 08-09-2009
مجموع المشاركات: 6733
الاهل الحنان تحية طيبة وكل يوم وانتو طيبين شغلتنا امور الدنيا وبعدنا عن احضانكم المغفرة والرحمة لكل موتانا و موتي المسلمين كل الحب و الترحيب لمن انضموا مؤاخرا ================== ابوخليل
11-17-2009, 10:51 AM
omar arbab omar arbab
تاريخ التسجيل: 09-11-2008
مجموع المشاركات: 1848
إضافة قلم إمتدادي واعد وسبقه رائحة المداد هنا في بيتنا الملك وهو الآن يُزين ساحات المنبر بشبابه العزيز بدرالدين فرو مرحبتين حبابك في دنيا سودانيزأونلاين تعال داخل برجلك اليمين وزي مابيقول طارق إنداح للكل وعطر صفحة مربع 13 ولنا عودة.
طارق
Quote: صباحاتكم ندية يا اهلنا
والله الليلة من اصبحت متذكر اخونا عصام البعيو(مربع 3) اخو مطاعيمو ربنا يطراهم بالخير الاتنين
قول الثلاثة ومعهم هشام وأختهم هويدا .
،،،،أبوقصي،،،،
11-17-2009, 02:49 PM
وليد عبد اللطيف وليد عبد اللطيف
تاريخ التسجيل: 08-09-2009
مجموع المشاركات: 6733
واقفين من اليمين وليد كوبر و الشهيد الهادي جعفر ود الامتداد و وليد بحري حسب طلبك يابابكر التوم وارسلها المانيا للشخص الذي طلبها بابكر التوم وهذا تلفوني 0096657456728
------------------------------------------------ ود جبرين ومجدي الصوره بدون تعليق
11-17-2009, 03:27 PM
مجدي عبدالرحيم فضل مجدي عبدالرحيم فضل
تاريخ التسجيل: 03-11-2007
مجموع المشاركات: 8882
وثانياً: نعرج علي الجديد تعرف يا د. طارق صورة مجدي عبدالله دي لوجاب أسماء الفصل ده يأخد جائزة نوبل للزكريات العتيقه صورة ولافي الأحلام بترجع للمتوسط من العمر الجميل ومجدي عبدالله أجمل من كل الزكريات . ياخي ماتشوف ليهو باصو القديم مع بكري ياد.طارق أحي المطالبه مجدداً.
مزيد من العضوية للحي المتفرد في السايبر المتجدد.
،،،،أبوقصي،،،،
11-18-2009, 09:21 AM
مدثر قرجاج مدثر قرجاج
تاريخ التسجيل: 07-21-2009
مجموع المشاركات: 1614
ياعماد شمت والله حزب قرفنا ده حزب جميل لانو بالجد زهجنا من ناس ديل والغريب ناس الامتداد خاشين معاهم بقوة لمن انا احترتا قلت ياربى ديل هم الاحسن ولاشنو؟........
11-18-2009, 10:18 AM
صديق حمدتو صديق حمدتو
تاريخ التسجيل: 03-19-2006
مجموع المشاركات: 451
يا الله يا مجدي عبد الله ياخ !!!!!ّ والله الصورة دي بالغت فيها عديل كده
بالله دايرين لينا واحد من الشفوت يرقم لينا الصورة دي عشان نتجدع ونجر شريط الذكريات - طبعا مجدي عبد الله وعادل عوض بلال وأنا دفعة واحدة في الإمتداد المتوسطة
يللا يا عادل أظهر وبان وتعال نشط الذاكرة
11-18-2009, 11:34 PM
مجدي عبدالرحيم فضل مجدي عبدالرحيم فضل
تاريخ التسجيل: 03-11-2007
مجموع المشاركات: 8882
ساره كرودي تعرفي قبل ما ادخل سودانيز والناس تكتب عن الامتداد والذكريات وفي يوم من الايام انتي ذكرتي وقعت خالد لولو في الخور والله انا ونادر يوسف ود حلة ناس ربيع بنضحك ضحك شديد وطبعا ناس خالد بيتهم فاتح على الخور مباشرة وقابلته هنا اظن قبل ثمانية سنوات وكان شغل في art وهو الان في الرياض وللاسف ماعندي تلفونه حتى نتذكر ايام زمان
اهديكم صورة اطفالي (اسيل ولجين ) حبوبتهم في الامتداد وجدهم في الامتداد
ونحن من اجمل ايام طفولتنا قضيناه في هذا الحي المتفرد
سارة كرودي (وصيه ليك ) ياخي قولي لود جبرين ومجدي فضل وليد دفعت ناس عمر عثمان وربيع محمد علي وبطلو الحركات (قالوا قدر كمال تنقو )
11-19-2009, 10:04 AM
سارة كرودى سارة كرودى
تاريخ التسجيل: 05-06-2009
مجموع المشاركات: 764
ياريتنا ما رحلنا كمية من الزكريات الحلوة الرحلات المناشط المدرسة صحباتى جيرانا العيد ..
العيد ده كان صحى عيد طعم الفرحة واللمة والجيران تبارك من الصباح وتلقانا نحن وبنات الحلة واقفين نستقبل فى المعيدين ونديها لفة
من بعد الفطور لحدى اذان المغرب ياخى خليتنى ابكى اسع زى الشفع ..
Quote: ساره كرودي تعرفي قبل ما ادخل سودانيز والناس تكتب عن الامتداد والذكريات وفي يوم من الايام انتي ذكرتي وقعت خالد لولو في الخور والله انا ونادر يوسف ود حلة ناس ربيع بنضحك ضحك شديد وطبعا ناس خالد بيتهم فاتح على الخور مباشرة
فى داعى اسى خالد ده علاقتنا بهو حلوة مالك خاربه لينا ...
طيب خلينى اتزكر ليك ربيع صاحبك عمل شنو ...
خالد بيتم جمب الخور وله الخور جمب بيتم زاكر كويس ياوليد
11-19-2009, 11:02 AM
عبدالله كع عبدالله كع
تاريخ التسجيل: 02-12-2008
مجموع المشاركات: 4841
ياسلام علي الزكريات سارة كرودي نحن لتلك الأيام ونتداولها بيننا علها تعود مع تباشير العيد السعيد وطبعا عيد الأضحي المبارك خرفان تجوب أنحاء الحي المتفرد وخرفان تنتظر المصير عند خور العشش وخلف الفروسية أيام ما قبل العيد وحتي أيام العيد الأولي وتجهيز الجلباب الأبيض وشبشب أو مركوب نيالا ،وعمك ود الأمين رحمة الله عليه ويرتدي البشت البني المذهب علي جلبابه ويتؤكأ علي عكازه في طريه للمسجد العتيق ليؤذن ويكبر وبعد الخطبة يتطايب الكل في أحضان حميمية لا تجدها إلا في السودان وبعدها تخرج الخراف وهي تجرجر أذنابها للذبح الفداء وتخرج بل اللحوم بروش تفرش متقابل والصواني بها الفطير والسكسكانية واللقمه بالنعيمية والروب والله ايام فعلا نبكي ونتحسر علي الزمن الجميل ونواصلـــ ،،
،،،،أبوقصي،،،،
11-19-2009, 12:37 PM
وليد عبد اللطيف وليد عبد اللطيف
تاريخ التسجيل: 08-09-2009
مجموع المشاركات: 6733
Quote: ياكع عليك الله شفته العيد بعيد من الامتدااااد ...
انا الليلة دموعى فى طرف عينى ...
ياكع وليد قال لى نادر يوسف ود جيران ناس ربيع
دى ياوليد بالغته فيها ...
اديك معلومة ياوليد نحن كلنا حلة واحدة مربع 9 ...ناس نادر ديل طرف شارعنا...
سارة كرودي والله العيد في الامتداد قصة ودي بحكيها ليكم بعدي
سارة ناس ربيع جيرانهم باليسار حبوش ومن اليمن واحد كدا بس نسيت اسمو جنو قرايه وناس عصام وليد طه البيت الفاتح عليهم وناس نادر يوسف من خلفهم ياخي مره جينا عرس فيصل محمد على (الفنان الهادي حامد) ومساهرين للصباح ومشينا بيتنا عند ناس نادر يوسف يقوم يصحينا ليك مع اذان الصبح ويقول لينا قوموا اشربو الشاي فقلت له : بالغت يانادر انا قلت عندكم في الامتداد فطور العريس بعد الحفله مباشرة ولا شنو مصحينا اسه . بالله كمية من التحايا لمحمد كرودي واجمل صوره لهم شفتها مع معتصم الجمري (ربيع نادر يوسف محمد البربري محمد كرودي وعمر عثمان ومعتصم الجمر وكلهم لابسين جلاليب وطواقي ) قلت له انت كنتو في حوليه ولا شنو بالمناسبة عمر عثمان قال ربيع ضرب عداد ( قروش حفلة ) جمال فرفور يوم زواجكم ههههههههههههههههههههههههههههههههههههههه
االللللللللللللللللللللللللللللللله ياكع والله ماقصرت بتلفون خالد لولو ياخي احييت ايام جميله وتعرف زمان لما اجي الامتداد والونسه هناك والنوم هناك يعني مابمشي بيت ناس جدنا وخالد لولو اليوم موتني من الضحك وطبعا صاحبك رشاقة زمان ديك مافي وفرش فرشه شديده
ود جبرين نحن كبار برضو ياخي انت لما كنت بتجي تغني مع خالك (ابوديه ) نحن كنا شفع وفي اولاد اهلكم دفعتنا حسن نور الدايم عندك شنو تاني
11-19-2009, 12:01 PM
عبدالله كع عبدالله كع
تاريخ التسجيل: 02-12-2008
مجموع المشاركات: 4841
بمناسبة الذكريات الجميلة التي تتحدث عن العيد في الإمتداد فقد حزمت أمري والحمد لله بالسفر للسودان يوم الثلاثاء 7 ذو الحجة للإستمتاع بالعيد السعيد في الامتداد وسط الأهل والأصدقاء وربنا يعيده علينا جميعا باليمن والبركات
يا سلام علي ايام الامتداد والخرفان ويوم العيد تشوف في الخرفان معلقة في الباب الكبير في البيوت والكوانين شغالة قرف وناس تضرب في المرارة وتمشي للجيران تلقى شيتهم طلعت وتقزقز معاهم ويجوا هم لحدي عندك وبرضو يضوقوا شيتكم زمن ياخ
11-19-2009, 01:47 PM
وليد عبد اللطيف وليد عبد اللطيف
تاريخ التسجيل: 08-09-2009
مجموع المشاركات: 6733
نزعلكم شويه لكن زمان يانس الامتداد اول يوم بنضحي في الامتداد وكان لازم نجيب معانا عيشنا من بحري (عيش خطير )
Quote: دون تعليق أنت واقفين فوق الكبري !
مزيد من الأرشيف وليد عبداللطيف
،،،،أبوقصي،،،،
ابوقصي من المحزن والمؤلم في هذه الصورة وانا متذكره للان طبعا كان الدور على المرحوم الهادي جعفر يصورنا حرن وقال انا مابصور الصورة شكلها تمام فقمنا لقينا ليك بتاع اورنيش ماشي مطرف واديناهو الكميرا وشرحنا ليهو وقام لقطنا ليك صورة تحكي لنا عن اروع واطيب انسان عاشرناه وكل ما اشهادها الصورة تجدنى اذداد الم بنوع غريب وهو ليس بكثير عند الله ولكن نبكي على مايحصل في بلادنا كم بيوت تيتمت وبكت على اولادها تم استشهادهم في الجنوب
11-19-2009, 02:14 PM
سارة علي سارة علي
تاريخ التسجيل: 07-08-2008
مجموع المشاركات: 4413
كل سنه وانت طيبين الذه حاجه في واحد من اعياد الضحيه - ابوي جاب ليهو خروف نمروت للدين وفقري والله يا خوانا الخروف من جابوهو البيت يكورك وينطط بالله التقول عارف انو اخر يوم ليهو في الدنيا بكره - نجيب ليهو المويه يدفقه عديل كدا ويعاين لينا عين حقارة - ولي انا بالزات !!؟ نخت ليهو العنكوليب - يدفق فوقو المويه ( ويبعر فيهو ) خروف لا يعرف اداب الطعام ولا حاجه - طبعا ربطناهو مع الغنم حقات الحاجه - قسما بالله وقع في الغنم نطح وحاجات تانيه ( وبرضو قليل الادب ) - والغنيمات - لسان حالهم يقول - ان غدا لناظرهو قريب - نشوف فيك يوم يااا اللئيم ! فجاءة وبدون اي مقدمات - بالعصريه الخروف الملعون ده سكت ورقد زي الميت وفعلا كل البيت صدق انو الخروف مات - ابوي زعل وهاج فني انو انا الكتلته الخروف المجنون ده مهم - سلم بالامر وكلنا وافقين نعاين للخروف - خروفنااتلحس!؟ الخروف العوير ده راقد ليهو 25 دقيقه ولا نفس وثبات عميق !! المهم الحاج قال لي جرو ارميه ونمشي نشوف واحد تاني ........... بالله يا خوانا - اللحظه الاخوكم دخل الزريبه عشان اجر الخروف المستهبل ده قوووووووم يا خروف الجن واديني نطحه في نخرتي - لمن الخروف زاتووووووو اكيف وقال - بااع بصوت اسد - النطحه دي خلتني اكره اي عيد في الدنيا- وبالزات الضحيه - لكن انتقمت ليك منو جنس انتقام الخروف التافه ده :
1- صفقت لعمي وداعه عندما ارديهو ارضا وقطع رقبتو- تصفيقا حااااارا 2- مسكت الراس الخروف مزقته اربااربا - 3- جريت جلده العفن من مربع 8 الي اخر مربع 4 حيث مسجد الامتداد - واي حديده او حجر كبير لابد يمر عليها جلد هذا الخروف اللعين 4-استمعته جدا واني اري اضلعه تتكسر بساطور والدي الحاد 5- ورايته موزع علي 3 كوانين كبيرة ملتهبه - وشيه جمر واخير : ضربته ضرب السنين انتقاما لانفي المكسور - لن انساه ما حييت - ذاك الخروف صاحب اللون الابيض و ( بني علي خفيف ) قرنان ملتويه الي الخلف -
،،،،،، وكل سنه وانتو طيبين - يا وليد خالد- لولوده وحاة النبي تقعد جنبو تنسي اولادك - يا خي الزول ده كارثه ياريت لو كانت الجولات ام كمرة دي موجده في الذمن الحلو - عشان كل الاحداث توثق صورة صوة - وخاصه واقعة الخور -
كلكم سلام - بابان وين انت ؟؟
11-22-2009, 08:40 AM
عبدالله كع عبدالله كع
تاريخ التسجيل: 02-12-2008
مجموع المشاركات: 4841
يا مجدي الاغنيه حلو - وبمناسب العيد السعيد بهديها - اولا لبنات الاخ وليد عبداللطيف و وليداتك وكل اطفال الامتداد وربنا يحفظهم ولي كل شباب وشبات الامتداد -
بعدين العتالة للجدعان هههههههههههههههههه !!
11-22-2009, 09:51 PM
omar arbab omar arbab
تاريخ التسجيل: 09-11-2008
مجموع المشاركات: 1848
رحيل دنيا إن العين لتدمع .. والقلب ليحزن .. إنا لفراقك لمحزنون أيها الوالد والشيخ الجليل الخليفة / بلال محمد عمر
قبل يومين إنتقل الى رحاب الله .. الشيخ الجليل العارف بالله الخليفة/ بلال محمد عمر بعد سنوات عامرة بالعطايا وجليل الأعمال والمكارم، لم ينقطع المصلين عن الزاوية/المسجد التي أقامها ورعاها لأربعين عاما بجوار منزله العامر بإمتداد الدرجة الثالثة مربع12 .. حيث كانت ملاذا للأحباب والضيوف والزوار وعابري السبيل وأصحاب الحاجة وأهل العبادة وحفظة القرآن وأهل الخير والمحسنين، ملتقى للأهل والعشيرة وسكان الحي العريق، والذي كان الوالد الجليل المغفور له بإذن الله أحد أعمدته ومؤسسيه في مطلع الستينات .. أما إسهاماته الوافرة والكبيرة والممتدة كمهندس وخبير في مصلحة مياه الخرطوم فتلك من المآثر الكبيرة، وهي إحدى العلامات البارزة في هذا الحقل الذي أفنى فيه عمره وقدمه له من الفكر والجهد والخبرة الكثير بهدوئه المعتاد وسخائه الوارف وإخلاصه العظيم .. وتلك حياة كاملة رعاها بالصبر والإيمان والتجرد والمسئولية، ولاغرو فتلك تربيته الباذخة ونشأته في رحاب تعاليم الأخيار على نهج الطريقة الختمية .. بهذا الموجز من سيرته العطرة ننعيه لعموم أهله وعشيرته وأسرته الكبيرة في كل مكان وأبنائه ومحبيه وعارفي فضله وتلاميذه في الداخل وخارج السودان، سائلين الله أن ينزل على قبره الطاهر شآبيب رحمته وغفرانه وأن يسكنه عالي الجنان مع الصديقين والشهداء والأكرمين والأبرار .. ولا حول ولا قوة إلا بالله.
سيف اليزل
منقول عن بوست فتحه اخونا سيف اليزل نسال الرحمه للعم بلال عمر والصبر والسلوان لاهلة وعشيرته والجيران بمربع 12 ولابنه الاخ عاطف العم بلال يسكن مربع 12 وكانت له زاويه امام المنزل على الشارع الرئيسى نشهد له بالورع والكرم وهو خليفة وكانت تقام حوليات على مرات فى الاسبوع
11-23-2009, 12:17 PM
سارة كرودى سارة كرودى
تاريخ التسجيل: 05-06-2009
مجموع المشاركات: 764
Quote: يا مجدي الاغنيه حلو - وبمناسب العيد السعيد بهديها - اولا لبنات الاخ وليد عبداللطيف و وليداتك وكل اطفال الامتداد وربنا يحفظهم ولي كل شباب وشبات الامتداد -
عبد الله كع ومجدي فضل انتو بتاعين حركات ولا شنو اغاني شنو يازول البنات ديل بسمعوا من عشة الفلاتية لفرفور صور الجكس دي منزلها عشان تحجزوهم قال اهيدكم اغنية قال
11-23-2009, 03:02 PM
طارق جبريل طارق جبريل
تاريخ التسجيل: 10-11-2005
مجموع المشاركات: 22556
Quote: عبد الله كع ومجدي فضل انتو بتاعين حركات ولا شنو اغاني شنو يازول البنات ديل بسمعوا من عشة الفلاتية لفرفور صور الجكس دي منزلها عشان تحجزوهم قال اهيدكم اغنية قال
وليد الجكس وصل حد مبالغ فيه من ناحية التعداد وكده يعني أربع لكل ولد برضو في فايض يلعب ملحق إلتحاق ودي طبعا من حظ الأجيال القادمة يعني تقعد في الصف حدي ما تصل الشباك ويقولو يوم باكر أحلي يازول أنا أولادي بيسمعوا كل ألوان الأغاني وبذات قصي عندو أغاني غربية حافظه من الأم بي عندي في السيارة علي قول أخوانا هنا وأحمد من ما يركب شغل الغنه وهاك يابشير ورقيص المهم ربنا يحفظهم ويجعل أيامن أخير من أيامنا
،،،،أبوقصي،،،،
11-24-2009, 09:15 AM
مجدي عبدالرحيم فضل مجدي عبدالرحيم فضل
تاريخ التسجيل: 03-11-2007
مجموع المشاركات: 8882
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
سيد محمد احمد سيدنا
عبدالله كع
مجدي عبدالرحيم فضل
صديق حمدتو
طارق جبريل
Ashraf El Bagir
وليد عبد اللطيف
مدثر قرجاج
AWAD MAHMOUD OSMAN
بابكر التوم
عماد شمت
ابراهيم محمد موسي
omar arbab
سارة علي
فيصل محمد خليل
فيس بوك
تويتر
انستقرام
يوتيوب
بنتيريست