Tommy Time : لكل الامهات و الامهات (to be)

Quote: حكيتو تجاربكم مع الولاده حتي القيصريه منها لكن مافي زول قال انو اتعرض لمشاكل اثناء او قبل الولاده Toma

pic courtesy of irishhealth.com

بالنسبه لي كان الخيار واضح، الاحتفاظ بالطفل تحت اي ظرف من الظروف، و لكن قررت المعرفه المسبقه، عشان الواحد يجهز نفسه نفسيا و ماديا لاستقبال طفل قد يحتاج رعايه اكتر و بصوره مختلفه اذا طلع عنده داون سيندروم، و زوجي اتفق معي انه ده الاجراء المناسب وحتي اتفقنا ان اتخلي عن وظيفتي للسنوات الاولي لرعايه الطفل اذا كان عنده داون سيندروم

من اصعب اللحظات المريت بيها خلال حملي كله، كانت يوم الاختبار، و بالرغم من ايماني التام بما كتبه الله و الرضاء به، لكن لمن وصلت المستشفي و بدات الدكتوره في انها تشرح لي خياراتي و كان من ضمنها خيار الاجهاض و حا يعملوهو كيف، بدات ابكي مع اني عارفه اني ما حا اختاره ابدا بارادتي، و ما توقفت من البكاء الا لمن وصلت البيت و نمت من فرط الاجهاد
الاطباء الانجليز ديل مرات قاسين حبتين و لكن لسبب، بيحاولو يشرحو ليك من غير عواطف عشان ما تشوش عليك خياراتك، مثلا، واحد من خيارات الاجهاض انهم يدخلو يد طويله للرحم و يبداو في حصد الاطراف واحد واحد، و الي ان يصلو للراس تقوم اليد بتهشيمه حتي يسهل خروجه، و ده كله مفروض تسمعيهو باذن واعيه و قلب صاحي عشان تقرري

الان لمن اقرا انه شخص فقد طفل، بسترجع اللحظات دي و اقول، شوف ده طفل لا شفته لا عشت معاهو لا عندي معاهو ذكريات لا عيوني لاقو عيونه ولا قال لي ماما، و انا حزنت بالقدر ده، فما بالك بالعكس، و والله اجد نفسي ابكي و كانه يوم الاختبار لا شعوريا، حاليا انا ابكي و انا بكتب الكلام ده

المهم، كان انتظار اسبوع عصيب جدا، توقفت فيه حياتي تماما و كل ما اذكره هو المصلايه و سورة ياسين و في ذهني مقولة امي الخالدة المنقولة عن الحديث، يس لما قرأت له
و بالرغم من انه الامر استغرق حوالي تلاته اسابيع من لحظة معرفتي لنتائج الاختبار الاول و حتي نتائج الاختبار التاني، اتفقت و زوجي ان لا نخبر احدا من اسرتينا او الاصدقاء، و كان من اصعب الاشياء الحديث مع امي بذهن مشوش دائما و هي طبعا حست انه في شي، و كنت اؤكد ليها انه مافي حاجه و دي فايده التلفونات مرات، الناس ما بتقدر تشوفك، و بعد ان اجريت الاختبار و رجعت المنزل و نمت و صحيت اتصلت بيها و اخبرتها و بكيت تااااني و طلبت منها ان تدعي لي و تتصدق لي و هداتني و ذكرتني انه امر الله، مهما حصل

المهم، ظهرت النتائج و كانت كويسة، انه نتيجه الاختبار الاول كانت غلط، و بتحصل معمليا في الاختبار ده لاسباب كثيره جدا

و استمر الحمل و الحمدلله بصوره طبيعيه و لكن سعادتة كان مصر يشرف الدنيا و هو في وضع مقلوب، و بيعاين للامام، و كان متوقع حجمه يكون كبير
ده فيلم تاني

-------

بعد الولادة القيصرية حصلت لي مضاعفات لاني لم التزم بنصائح الطبيب بخصوص حركتي، و بصراحة حسيت بملل ما عادي، اليوم كله راقدة في السرير، فانفتح الجرح و صحيت يوم لقيت نفسي عايمه في دم من الجرح الانفتح تاني و طبعا ما حسيت بالالم لكمية البين كيلرز الكنت باخدها و منها مورفين سائل يعطي بالفم، و تااااااااااني دخلوني المستشفي و كالعاده ادوني خمسميه خيار. و ده فيلم تاني باحكيهو ليكم

---------

ما يستفاد من القصه الطويله، لووول، اكيد حا يختلف من زول لزول، ولكن بالنسبه لي:

اولا و اخرا القبول و الرضي التااااام ظاهرا و باطنا بحكم الله و دي ما حاجه ساهله ممارستها

تانيا، الاتفاق مع الزوج في كل التفاصيل الممكنه و لمختلف السيناريوهات، و بالرغم من انه الانسان بيحس انه فقد السيطره تماما، لكن بمناقشه التفاصيل و الاحتمالات، بيحس الانسان انه عنده سيطره و لو بسيطه علي الموقف

ثالثا، اشراك شخص مقرب للاسرة، و لكن باتفاق الزوجين، اذا حس الطرفان انهم بيحتاجو مساعده خارجيه، و حتي لو كانت المساعده دي في شكل جهه تالته تستمع ليهم و بس

رابعا، التقيد بتعليمات الطبيب حرفيا، بخصوص الحركه مثلا بعد العمليه و اثناء الحمل

خامسا، عدم اهمال اي من الاختبارات البتقوم بيها الام اثناء الحمل

سادسا، ان اقرا و اعلم نفسي ما استطعت بخصوص كل ما يخص حملي و عدم الاعتماد علي معلومات الطبيب او الزائره الصحيه فقط، لانه مرات خياراتهم البيدوك ليها بتكون مرتبطه بخلفياتهم و تجاربهم، و دي حاجه ما دائما كويسه و تخلي الانسان يتخذ القرار الصحيح

سابعا، والله فترت، بمشي و اجيكم، لوووووول
I need to do some stuff before Yassin is back fromt he nursery
Xx