ازيكم يا امهات.. والله انا امس كان off.. لكن مشيت اسجّل محمود في الpreschool.. واستلمته الكتب.. يوم السبت ببدأ أول يوم ليه... ومستعده للبكا (بكاي انا طبعا، لانه محمود بحب الاطفال والمدرسة)..
متابعة للكلام القلته.. عن recovery في الولادة الطبيعية.. طبعا في نظريات كتيرة بين النسوان.. منها استخدام (القرض المغلي مع الشاي) لتطهير الجرح.. والتعجيل بشفاؤه... ودي حاجة جربتها.. ونفعت معاي.. طبعا الام بعد الولادة بتقوم تفتكر انها عايزه سريع جدا ترجع للرشاقة الكانت عليها قبل الحمل.. وبتتخيل انها اول ما تولد بتضعف، وبطنها ترجع طبيعية.. لكن البحصل فعلياً إنه المرأة بتاخد فترة عشان ترجع عادية.. وواحدة من المقولات الكان بقولها لي نادر، إنه التغييرات الحصلت ليك دي أخدت تسعة شهور عشان تحصل.. على الاقل اديها نفس المدة دي عشان ترجع.. رغم انه تسعة شهور فترة طويلة لعودة الامور لطبيعتها.. لكن المقولة الهدف منها عدم الاستعجال.. زميلاتنا السعوديات في الكلية، الواحده بعد تولد بترجع بعد شهرين زي العروس... وما ممكن تقولي دي كانت والدة.. ولما سألتهم عن السر.. كان عندهم حاجتين.. الحاجة الأولى هي نظامهم الغذائي... قالوا لي انهم لحدي ما يكملوا الاربعين، ممنوع الواحده فيهم تاكل كربوهيدرات (خبز، رز، .. ) من اي نوع.. وبقولوا إنها بتنفخ البطن من غير فايدة.. في المقابل بياكل بروتينات لحوم دجاج سمك.. وعمليا أمهاتهم بحشوهم حشو بالاكل.. بياكلوا اكل خرافي.. بس يبعدوا عن الخبز والرز.. وطبعا عصائر.. الحاجه التانية بسموهو المشد الاندونيسي.. وده تأثير الخدم عليهم... الاندونيسيات بعد الولادة الواحده فيهم بتربط بطنها بحزام خاص طوله 20 متر.. لحدي ما ترجع مكانها... الحزام ده بتباع عندنا هنا بي 100 ريال.. طبعا احنا في السودان عندنا الحركة دي، لكن لحدي حسي النسوان بربطوا بالعمة... وهي طبعا ما convenient.. ومزعجه.. لانها ممكن تتفك.. الاندونيسيات ظبطوا الموضوع.. وسهلوا عملية الربط... يبقى السؤال التاريخي، نربط ولا ما نربط!!؟؟ اي طبيبة/طبيب حتسأليها حتقول ليك لأ ما تربطي.. وتقولي ليك ممكن تبدأ بتمارين خفيف وشويه شويه ترجع البطن.. النسوان الكبار حيقولوا ليك ايوه اربطي.. والنصحية لله.. انا شفته الربطوا بطونهم كيف والما ربطوا بطونهم كيف... دحين ورونا رايكم بالله... ده شكل الحزام الاندونيسي ما لقيت صوره اوضح. لكن زي ما باين، بيتم تصنيعه بصورة تجارية، ومشهور جدا هنا في السعودية ودول الخليج...
بالنسبة للتمارين بعد الولادة الطبيعية ممكن سريع جداً تبدا الام.. يعني من تاني يوم ممكن تبدا لو صحتها كويسه وما تعبانه.. او بعد اسبوع.. الولادة القيصرية عايزه ليها اسبوعين لشهر قبل ما تبدا الام اي حاجه.. والرياضة بتكون على اخف ما يمكن.. عشان عضلات جدار المعدة بتكون مفروقة عن بعضها لتفسح مجال لبيبي... الرياضة بتساعد العضلات دي عشان ترجع لوضعها الطبيعي.. اي بروز في البطن بعد داك بكون مزيج من السوائل الزائدة او الدهون... ومعروف انه الواحده لو نقصت وزنها بطنها بتنقص.. يعني ممكن تكون بتعمل sit ups اليوم كله.. لكن بطنها ما ترجع .. ليه، لانه العضلات مشدوده.. بس الدهون موجوده... اكبر واهم واسهل رياضة هي شفط البطن.. لانك ممكن تعمليها في اي مكان.. في رياضات بسيطة، الفيديو ده مثلا ممكن يوريكم امثلة عليها
في ناس بتحصل عندهم ترهل في الجلد بتاع البطن.. للأسف دي ضربة لازم زي ما بقولوا... ومافي ليها طريقة غير الtummy tuck يعني عملية تجميل تشيل الجلد الزائد.. او تلبس مشدات عشان ما يتشوه المنظر الخارجي.. والامور بتمشي .. دي ضريبة الصغيروني الجا دا..
بالمناسبة لإدرار الحليب، السودانيين بعملوا الحلبه... وعليها داااااااك يا السمن.. الحلبه بتساعد في إدرار الحليب وفي نفس الوقت.. بنظف المعدة.. ممكن الواحده تستفيد من الحلبه من غير الدهون المضره دي.. وذلك بإنها تعمل شاي حلبة.. او زي ما كانت والدتي بتعمل لي.. الحلبة مع الحليب.. تغليهم سوا.. وبطلعوا لزيزين جدا... عصير البرتقال الطازج أحسن طريقة لإدرار الحليب من غير مشاكل جانبية.. ودي حاجه برضي كنت لزمن طويل مستمره فيها.. يوميا بشرب كبايتين او تلاته من العصير.. ونفع معاي جداً..
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة