|
|
 جامع رمضان ... من فيكم شاد مسجداً لرمضان !!!
|
في حلتنا كنا صغار , رمضان مولع نار , من الزير يجغملك جُغمة موية وشايف ديك حبوبة بتترشرش من العطش والهجير يقلي الحبة ثمانينات القرن المنصرم , رمضان كان من الرمضاء يستعر وكان اسماً على مسمى , عرفنا الصيام في بواكير العمر البيت جميعهم صيام حتى الفاطر بعذر تجده يتناول اكله في حياء وبالدس بعيداً عن اعين الناس مراعياً مشاعر الصائمين ...
في الشارع وضع آخر :
نجمع الطوب , ننظيف الميدان حق الكورة بعد دافوري حار وعلى احد الساحات نشييد مسجدنا الجميل نخلص في وضع الطوب ونرصه رصاً حتى محراب الجامع لا نغفله بل نضع التبروقة المصنوعة من جلد خروف الاضحية بعناية واخلاص قام بها عمنا اسحق ذلك الوقور وجلب لها الملح والقطران وطبقها وفرها مئات المرات حتى جاءت ناعمة ومريحة ومقبولة الرائحة .
لعبنا الكرة , وجمعنا الطوب وشيدنا المسجد للفطور , عُدنا نهض النساء في البيت جميعهن ولكل منهن مهمة تقوم بها المويات تجهزها الصغيرات يصفين الآبري الاحمر ويضعن السكر وهنا افتاء تقول الصغيرة اُمي ان صايمة اعرف كيف انو حلو واللا مر ؟؟؟ ختي ليهو من السكرية دي تلاتة مرات مسحة يدك بعدين اولادك ديل يجوا يتفلسفوا علينا الآبريه مُر والفول ما فيهو ملح عليك الله يمة تعالي انتي ختي السكر وطعمي الفول والسلطة ؟؟؟؟ طيب فايدتكم شنو قايمات عاملات لي زحمة يعني الله يديكن العافية !!! من بكرة مادايرة واحدة تقول لي انا صايمة الصوم دا ما فشخرة وشوفوني انا صايمة الصوم دا تحمل والواحدة تعمل كل شئ كانها ما صايمة ... يمه خلاص انا بملح ليك القراصة واقّطع ليك السلطة وبعمل سلطة الروب بس الطعي عييييييييييم دا اعفيني منو عليك الله اولادك شنافيين ... ينوموا ويصحوا يتفلسفوا اسع هم بيعملوا شنو يعني ...بيمشوا الشغل يابتي من الصباح ويرجعوا شايلين حاجات الفطور ويقيفوا في الفرن واصلو ان كان لى ابوك داك ياها نومة الضهرية دي انتن نايمات هو بيملأ الازيار في الشارع ويحرس الموية الليل كلوا ويصلي بعد التراويح ويدعوا ليكم الليل كلو الله يديهو العافية آميييين الله يديهو العافية ,,, جدكم كان بدعو ليهو هو كتير خلاس لانو كان كل عيد يرسلو ليهوالجلاليب وكل فترة رابطولو ماهية يرسلها ليهو وكان اصلوا ما بيقصر والله يجيبو عندو هنا ويلف بيهو على كل الاهل والمناسبات .
اذن الاذان والبروش اتفرشن وثبتناهم بي الطوب من جهاتهم الاربع وجلسنا نحن الصغار على الاطراف وبدانا نقول عمك حاج محمداول واحد بيجئ وهسع صديق ح يجي ُمترتع عامل صايم كضاب والله ما قاعد يصوم يااخي دا امبارح قال لي ابوي صحاني لي صلاة الصبح بليت ليك وشئ وجليني وانا في الوضوء ابوي فتح الباب ومشى الصلاة في الجامع كالعادة جريت ليك الملاية ورقدت وهاك يانومة نحن ما بنصوم وما داسنها لكن هو كضاب شايف ابوه بيدلعو ليك في الفطور ياولد انت ما تشرب الموية كتير اكل في الاول ... بالله هو الشافع دا صايم ... كيف الولد طالع لى ابوه وبعدين نحن قاعدين ناقشين الفلم وعارفين انو كضااااب نقوم نخوفوا ليك تعال يااخي انت عامل صايم هُسسسس ابوي يسمعكم يعني ؟؟؟ ايوة ايوة ... الصواني فيما بين البروش حوالي ثمانية عشر صينية والحضور يفوق الثلاثون او يزيد عليهم قليلا جيران والمارة في الشارع وضيوف وبعد الآذان وشراب الموية يتنحنح عم اسماعيل ويقول نصلي عم مصطفى يقول يهو اللاكل تركو ليهو الصلاة الامين بتاع الكهرباء يقول الصلاة ملحوقة والونسة تفتح لحدي ما ينسوا انهم كانوا صيام... المهم اكلوا كما ارادوا وعمك ابراهيم قام اتنحنح وقال لي عمي اسماعيل انت ياحاج نسيت لصلاة قوموا صولوا خلونا نسف اهم سفة هنا ينط عمك الطاهر وكامنا هو صبي في العشرينيات يقول ياعم اسماعي الصلاة الصلاة ويغسل ايديهو سرعة ويقيم الصلاة ومع السلام عليكم يلا ياولاد امشو جيبو الشاي والقهوة والصعوت ما يديك الدري اكياس متبادلة كالهدايا وغُلاط بين صعوت الجمهورية دا احسن من الوطنية يااخي دا عطرونو كتير وارد الفاشر دا زيو مافي والسجائر والقهوة والشاي ورمضان انتهى ياحليلو.
رمضان كريم تصوموا وتفطروا على خير .
وربنا يعيده اعوام عديدة علينا وعليكم .
.................................................................................................حجر.
|
|
 
|
|
|
|
الرفاعي عبدالعاطي حجر
فيس بوك
تويتر
انستقرام
يوتيوب
بنتيريست