بيان: اتحاد الصحافيين السودانيين في اميركا يسحب وساطته بين الجالية السودانية والحركة الشعبية

Quote: الاخ دينق مساك الله بالخير شنو يا خوي قايم بسداري كدي..وبنفس حار للدرجة دي رغم إنك في الايام الفاتت بتشاغلني بالعبار، وأنا كمان قت دينق ده والله زول ظريف.. والآن تجي وتهدنني بالويل والثبور وعظائم الامور شان إني صرت جزء لا يتجزء من الجالية، وتقول لي أنت مصر كمان يا شعيب، هذا خطاب لا يليق بك يا دينق ولا أظنه يليق بي لمجرد إني أمارس حريتي في بلاد العم سام ومافي زول بقول لي "شوف" ولا "من الآن فصاعدا" ومالو يا دينق لو بقيت من الجالية..ترا إتا كتا فيها ومع نفس الناس اللي بتهاجمم وأنا الوكت داك كتا بره..وإنتا جوه..ولا أهاجم ولا خاطبتك وقلت ليك شوف أو من الآن فصاعدا..وفي المرة الفاتت قلت ليك يا دينق خليك ديمقراطي ولو عندك مآخذ علي الجالية حرض العضوية عشان تكون معاك وتعال بالطريق الديمقراطي الجابك قبل كده ونافس الجماعة ديل طالما إنهم جبهة ولا عيون..وبالمناسبة أنا مافي زول في الدنيا دي كلها وظفني في حزب ولا تنظيم سواء أكان غرابي ولا جلابي ولا أي حاجة وشايف نفسي براي تنظيم..بعمل الحاجات بحريتي من ما دخلت الصحافة وقبل كده في عملي الصحفي ده عملت حوار مع الدكتور محمد وقيع الله وهو إسلامي قح ونشرته في الصحف..ومافيش زول في الدنيا دي بقدر يمنعني من محاورة الترابي ونقل أفكاروا كمان وبالمناسبة عندي أصحابي من الاسلاميين .. وإذا كان ده كله ما عجب الناس فالعايز يشتمني يشتم والعايز يقول لي إنقاذي مدسوس يقول والعايز يقول أنا كمان جلابي يقول..واقول ليك حاجة عمري ما وجهت الاساءة لزول ولا شتمت زول ولا رديت علي شتيمات كتيرة في الصحف سواء من حسين خوجلي ولا اي زول.. يا دينق اخوي النفس الحار في الكلام والكتابة ما كويس..وشغلانيةالكتابة دي زي العبار لو شربت كب كب كب بتتكسر في القعدة..وكلما كان تعاطي العبار بشفافية القعدة بتكون احسن..شان كده ياخي ما تتعامل معاي كده ومع الناس البتختلف معهم من الجلابة وغير الجلابة وتقوم تشتمم وتقول ليهم بلطجية وفيهم الدكاترة والمهندسين.يا دينق لو عندك مشكلة مع الجالية أفتح ضدها بوست وأكتب زي ما داير تكتب وأقنع الناس بموضوعية وأكسبنا لصفك إذا كنتا عايز تغير واقع الجالية بدلا من المخاطبة بطريقة "شوف" وأنت مصر" ومن "الان فصاعدا"..أسي يا دينق السودان الماسكاهو الجبهة ده بتحارب بالطريقة دي..وبتخاطب منو كمان..؟ انا المعاك في خندق واحد..وكل الناس الفي الصورة ديل وشايفهم في منتدي الجالية كلهم ناس سودان جديد ومافي واحد فيهم سودان جبهة ولو إنتا شايف أدينا معلومات موثقة بدلا من رمي الناس بالتهم.. عموما أرجو ألا تفرط في العبار فهو من ما يغري بالتناسي

(عدل بواسطة صلاح شعيب on 09-08-2007, 05:55 AM)
(عدل بواسطة صلاح شعيب on 09-08-2007, 06:17 AM)