مفاهيم اقصائية ضد المرأة...(طلب مساعدة عاجلة)

Quote: يا بت امي ما اتهجمت وجريت على مكتبتي لقيتها شغااالة لكن الصدق انا ما بتقلي غرضك عندي غرضك ياهو عن شروق دي فعلاً نشرت قبل كدا ورقة عن صورة المرأة في الأمثال السودانية لي قدام والله يعينك يا امي

Quote: الأستاذة حليمة لك التحية الأمثال منهج تربوى متكامل فى مجتمعنا ويساهم فى غرس الكثير من المفاهيم كدى أحاول معاك النعال أم قديد ولا المرة أم وليد وشايفاهو ذكر بصورة مختلفة ----------------------- المرة شاوروها وخالفوها --------------------- الحلة بصل والمرة كرعين ودى إشارة للتبخيس والتنميط ---------------------- إخد بت الرجال ------------- عز القرب قطران وعز الحريم وليان -------------------------------- أم عرقوب تورث الفقر وأم شلاليفا رقاق قوالة --------------------------------------- المرة النقناقة بتقصر العمر ودا من أجل قهر المرأة كى لا تناقش أصلا -------------------------- البنت أفرما بصلة قبال ما تبقى أصلا ------------------------------ البنات زى البصل كان دسوهن بخسرن فى إشارة لأهمية الزواج فى سن صغيرة -------------------------------- كدى بفتش ليك تانى وفى مقولات هى ما أمثال لكين بتقع وقعها زى كان الراجل رجع ما لقاك فى البيت الملائكة بتلعنك وزى المراح الأبيض ما بخلا من نعجة سوداء فى إشارة لان اى مجتمع لا يخلو من إمرأة فاسدة وزى كلام نسوان ساى وعكسو كلمة رجال او كلمة راجل موقف رجولى دى بتذكرنى صديقات لى وكيلات نيابة شافو عسكرى بجر فى راجل كبير فى السن والراجل بقاوم وقفن العسكرى وطلعن البطاقات وسألن الحاصل شنو الراجل قال ليهن حولوتى محكمة بحرى والعسكرى داير اسوقنى بى عربية الخصم وطوالى قالو للعسكرى لازم تشوف ليهو عربية غير عربية الخصم والعسكرى إمتثل الراجل إتكيف جدا وقال ليهن واللة يا بناتى دا موقف رجولى منكن

Quote: يا حليمه عندي ود عمي ما فك الحرف وبيينا موده ومحبه كبيره كل ما يلاقيني بيقول لي انا كتلت فيك يا الما جيتيني راجل!!! يقولها بحسره حقيقه واسي بالغ .