دمعة على الوطن - ياضل بيوت الهجعة هل؟!!!

مغلوب اغالب دمعتي
وحيران افتش ليك حنين
والليل سهى و سكت الرباب
والكنت شايلو فرح عمر
دسيتو من زمن الشقى
اتلقاهو بي لهفة العذاب
ما كنت قايل السكة يوم
بتهد كتف كل الغنى
تسرق سحابات المنى
ويملا المساحات السراب
والكان جميل بدي الحنان
سافر علي غيم الوعد
واختار مصير الاغتراب
يا ضل بيوت الهجعة هل
صحّت بروق القبلي ريح
ام غافل المطر السحاب؟
يا سور كضب ليل الفجر
واسوق نعاسك ما حلم
بي سوق بساسق زي حراب
شربت من الدم الشرف
لبست جلاليب الترف
وبقت تساوم في الرقاب
شفع بترضع في الوهم
امات صحت مليانا هم
واسياد بتزرع في الرهاب
مين الـ قال انو الشمس
غتاها غربال الدجل
او غطى عتم الليل شهاب؟
ما الفجر مهما الليل يطول
تمتدّ قامتو مع الفجر
ويسد براحات الغياب
والظلم بابو بينقفل
زي كل شر
بنهدّ حيلك يا شجر
والعدل بفتح الف باب
والايدو في نار الوطن
بقبض جمر كل الشقا
وبتمدّ زي شجر الهشاب
ما هزّ فاس...
فرعو اليباس
او داس رقاب صمغو اللحا
واتضارى ضعفو علي التراب



عبدالله وداعه الامين
لندن 19.12.2006