|
|
 مذيعات التلفزيون بين مطرقة عمتي بت شيخنا وسندان هشام هباني
|
مذيعات التلفزيون بين مطرقة عمتي بت شيخنا وسندان هشام هباني
(إنتو ياولاد..البت دي متل أكني شايفاها في بكان بس والله ماني طاري شفتها وين).. إبتدرتنا عمتي بت شيخنا ونحن جلوس معها متحلقين أمام التلفزيون وكانت قد عادت لتوها من الحج..(يا حبوبه دي ما ياها المذيعه الكنتي دايما تشكري في حنتها وتيبانها السمحه وتقولي أريتها عروس مُحمد ولدي خلاص بس غبتي مننا شهرين ماعرفتيها) ردت إبنة أخي..(يا بت الغبا اليغباكي إنت يعني فيشان أنا كبر قيلاني عميت وللا شنو؟؟؟ ومُحمد ولدي مالو بيمشي يعرس من بره ..السودان كملن فيهو البنات.؟؟ والله ياهو) ياحبوبه والله ياها البت الكانت عاجباكي ذاتها..(يا بت ..إنتي قايلاني ماني عارفاها؟؟ ديك كانت زريقا متل عمك دا (وعمك دا هو أنا) بس ما كانت معصعصي وشيني متله) ..وبالمناسبة فعمتي تحبني جدا وقد درجت على إطلاق إسم دلع لكل فرد من أولاد وبنات العائلة الكبيره وكانت تختار اللقب على ضؤ أكثر مايميز ملامح وشكل كل واحد..لذا كانت عندما تدلعني تقول ( الشي العيفي المعصعص دا) والعيفي تعني ( المكمل الشنا) ..تدخلت محاولا فض الإشتباك (أيوه يا عمتي ياها المذيعه ذاتها)..(بسم الله الرحمن الرحيم..نان القلبها كدي شنو..الخرابه أنا قايلاها لبنانيي وللا مصريي) وأردفت ( والله هي هسع أبيض من اللبنانيات) ..(مالها الوقع عليها شنو؟؟ غيرت لونها متل الحربويي)..( ياحبوبه عادي ماوقع عليها شي..بس إستعملت كريم تقشير وتبييض)..( تكشير؟؟؟كريم تكشير دا كيفنو؟؟ الله خلقني ما سمعبو؟؟ وما لها البخليها تكشر شنو؟؟ هي جابوها تذيع وللا تكشر؟؟) ..(ياحبوبه ماتكشير..تقشير..يعني كريم بمسحوه عشان يقشر الجلد)..( والله يابتي مافي شيتا جلدو بتقشر غير النيمي والحربويي والدبيب.. ..بري...بري...بري.. ينجيني الله من جنس دا)..(يا حبوبه دا عادي وبنات ونسوان كتار بعملوا كدا)..( ليش ..مالن ..الوقع عليهن شنو؟؟؟ لوننا الخلقو الله دا مالو..طول عمرنا يابنيتي حامدين الله وشاكرنو).. تدخلت قائلا (يا عمتي..الدنيا إتغيرت والزمن دا مازي زمنكم..جيلكم وجيل ناس أبوي وأمي كان جيل واثق في نفسو...جيلنا والأجيال البعدو ناس مهزوزين وعندهم عقدة لون)..( عقدة لون يي شنو يا وليدي؟؟)..عقدة لون ياعمتي يعني كل زول ما رضيان بي لونو ..ما رضيان بي خلقة ربو..وبرضو زي ماناس كتيرين ماراضين بي رزقهم القليل..عشان كدا بعض الناس إبتدوا ينسلخوا من جلودهم ومن أخلاقهم..ممكن يعملوا أي حاجه عشان يغيروا ألوانهم..وعشان يغيروا أوضاعهم المعيشيه)..( طيب هسع خلاس متل دي بقت بيضا متل الرتيني كدي لا متين؟؟)..(مادام بتستعمل الكريم باستمرار..حتفضل كدا طوالي) ردت إبنة أخي ..(نان يابتي هسع دي تصرف على أهلها وللا على جلدها؟؟؟؟).. حشرت نفسي في النقاش قائلا( طبعا في الأول تصرف على جلدها وكان فضل شى بتديهو أهلها)..(وبعدين ياعمتي زولتك الشايفاها دي كان وقفت من الكريم والمسوح شهر واحد بترجع تاااااني تبقي زي الأول) ..(تبقي عيفي متلك كدي؟؟؟)..(أيوه يا عمتي..بس بتبقى عيفي أكتر مني..وشها يبقي مبقع ومطرقع زي الركشه العامله حادث)...( لع ياولدي كان كدي أخير لها تمرق من جلدها)..وأردفت ( لكن هسع دي وكتين يعرسها واحد عاجبو بياضها دا ..ويمشي يلقي نفسو إتغشي فيها..السوا كيفنها؟؟؟؟)..( يا بت أمشي سوي لينا شاي) قمت بتوزيع البنيه عندما أحسست أن عمتي بت شيخنا تريد أن ترتاد مجالا لا يرتاده إلا هشــام هباني( ياعمتي حيعرفها كيف ماهو إنتي شايفه وشها ويدينها وكمان كرعينا لونهم لبناني)..(إنت ياعيفي يا معصعص..مالك..سغير ما بتفهم؟؟؟؟)..(شوفي ياعمتي والله سؤالك دا ما بيقدر يجاوب عليهم إلا واحد أخونا إسمه هشـــام هباني)..وإنت مالك ؟؟يعني سعالي دا ما وقعلك؟؟؟ وللا داك راجلا أكبر منك؟؟) لا ياعمتي أنا أكبر منه..بس هو لسانه متبري منه..وكان مسكناه راس الخيط دا بينجضو تب)..(ثم إنتي ماشيه بعيد ليه؟؟لسع الليل في أوله..إتفرجي لغاية السلام الجمهوري..وكان لقيتي أكثر من مذيعتين أو تلاته سودانيات أبقى كضاب..وبعدين حكاية العرس دي..مقدور عليها)..(مقدور عليها كيفن ياوليدي؟؟)..( بسيطه ياعمتي يخطبها ويجيبها في بيتهم ويقول لي أمه ما تخليها تمرق من العتبه لي بره وممنوع أي كريمات تدخل البيت لمدة شهرين...بعد الشهرين كان لونها ما قلب يعرسها وكان لونها إتغير يرجعها بيت أبوها ويادار مادخلك شر..مش ياعمتي كدا أحسن من مايعرسها ويطلقها وتبقي في خشم الناس..طلقوها قوام كدا ليه ..طلقوها قوام كدا ليه؟؟..ويبقي هو في نفقه عده ومؤخر؟؟؟).. (والله ياهو كدي ياوليدي..أحسن)..
مادار أعلاه ليس من صنع خيالي..أوردته هنا دون زيادة أو نقصان ودون تعليق وإن كنت سأعود إلى ذلك لاحقا...وعموما عقدة اللون ليست محصورة في التلفزيون..ولكنها ضريبة أن تكون شخصيه عامه .. يعني في وش المدفع..(القال ليهم تعالوا المولد منو؟؟؟؟)....تحياتي
|
|
 
|
|
|
|
|
| |
nile1
فيس بوك
تويتر
انستقرام
يوتيوب
بنتيريست