دوما الجميلة بى طلتك وابداعاتك واشراقاتك دوما كل سنة وانت العيد يا نوارة البورد وواحته فى عز الهجير يعلم الله بتردى فينى الروح وبتملينى محنة وبتعبىء الدواخل ريد بمجرد اشوف اسمك اون لاين.. غايتو حوش بكرى ده لو بلمنا بالزيك بس كنا ضمنا الجنة يديك الفى مرادك ويحفظك من كل عين بركة رب العالمين والتصاوير السمحة دى دسيها من ناس كوستاوى ياختى .. لوول .. انا دايره اعرف كوستاوى ده بقلع الحاجات السمحه دى من وين .. الا كان بحوطك بس التحية ليك وعبرك لزوارك الملانين سماحه وبشبهوك براك وكل سنة وانتو طيبين
09-25-2009, 12:40 PM
قيقراوي قيقراوي
تاريخ التسجيل: 02-22-2008
مجموع المشاركات: 10380
Quote: الصلاه فوق وجن بس ناقصنا الشعر لكين عندي فراسه الطفل البيكون صلعه بعدين شعرو ببقي متل شعر محسن خالد ( راجع بوست الوعي اصيل ) صوره وجن دي عملت ليها كوداك يا قيقا ولا شنو ؟ مالها ابت تتسرق
صباح / نهار الخير يا ماما دوما يا ظلامية اسي في موضوع الشعر البغالط قوانين الجاذبية دا و بغالط عمك نيوتن ذات نفسو ، بدل التطمينات الغيبية المريحة دي ما كان تقترحي حلول عملية ناجعة ياخ ؟
سنا يافادي . . اليشوف الوقفة يقول بكرة العيد ! . . و مزيد من القنابير الواعدة الجاذبية ( الارضية ) بمغالطة جليلة . . . و وعداً لينا بألفرح و أنخابٍ شديدة و اقواس قزح
--------------- الود فادي دا كان مفروض اوديهو الحلاق ( وش خجلان ) بوست الوعي . . جميل و نبيل لماكنت متابعو اتمنى الامور ما تكون عكت بغادي ؟ شايف الحركة زايدة بهناك و الكرعين الاسفيرية كترت عليهو..الله يستر من الغبار
شكرا يا قيقا علي صوره احفادي الحلوين ما شاء الله تبارك الله اخر شياكه وقيافه و فادي ح يطلع ممثل خطير .وعوده دي لما تكبر تبقي نجمه و اما وجن ام عجن حجزنها لسامر ود نزار ولدي عارف لي كم ساعه بس القي الكلام بتاع الصوره دي خصيصا لمامه دومه وما اشوف الصور الا اسه حتي قدرت اشوفهم . شاكره كثير عايزه احفظهم عندي يا ريت اقدر لانه قبيل صوره وجن ما قدرت احفظها .
انت قديم خلاص يا ود ملاح انت من زمن جنه الاطفال تقدمه مامه صفيه والجد شعبان . كنت بحب برنامج نفحات الصباح البتقدمه بت المغربي لهن الرحمه بنات المغربي اصوات لا تنسي . يا له من زمان .
09-25-2009, 05:23 PM
doma doma
تاريخ التسجيل: 02-04-2002
مجموع المشاركات: 15970
Quote: صباحك زين يا عمده بحري والمدن المجاوره لا فض فوك يا زول يا دوغررررررررري
كدي قبل ما نقبل على خالتو دومة النشوف عمدة بحري ده بحروك ؟! عجبني ليك طول عمري كنت قايلك من عمد الديم وأعمدة اليسار طلعت ( بحراني ) ساكت اللهم لا إعتراض على حكمك ولا تشمت فينا الأعداء
قالت ايه ؟ دوغررررررري
وطيب اللولوة يخلوها لمنو ؟
قال : ألا وقول الزور .
لو واصلتي في هذا الأسلوب ، الذي لانرضاه ليك فما بعيد يلم فيك كيكي التفكيكي ويوزع الصواميل في البلاد
عليك الله يا كيكي تعال أعمل تفكيك لحالة الردة اللفي المنبر دي قاصد ردة تطبيق الشريعة التي أخذت تنادي بها دومة بعد ان سرت فيها العدوى
09-25-2009, 05:54 PM
doma doma
تاريخ التسجيل: 02-04-2002
مجموع المشاركات: 15970
لووووول ما قصرت معاي يا خرده كلك ذوق والله سماحه الكاسات ديل اصلوا حبوبتك دومه مظيوره دا الخواجه بعد دا فضل بس علبه البرنجي ومعها علبه كبريت ماركه المفتاح
اها يا خرده صوره باللبني من استديو فارتي ( بعد دا حقوا يختوني في متحف التاريخ الطبيعي عينه لسلاله بشريه انقر ضت تتذكروا استديو فارتي دا ؟؟؟ ما اظن ابدا ما كثيره عليك يا خرده صوره حبوبتك دومه بعد جبت لي الورد والواين بس شوف علبه البرنجي ويتم الكيف
انا على غايتو موافق و بالعشرة كمان . . . هو نحن نطول الا انحدثك ، ديل ناس : " براي بجيب الزول انا . . يما الزول انا . . . . الخ " سمعتي بيهن ؟!
اها شوفي محن ابنك و استاذنا محسن خالد دي :
Quote: أيعقل أن تجري الحكاية هكذا مثلاً: ألوووو بابي. (بابي دي يا أستاذ حسبو في حسبة أعياد الميلاد ديك، والحساب ولد، مش قلتو يا نجاة تأصيل للحاجات الكويسة!؟). أهلاً يا مريم بتّي. (بحب هذا الاسم وأماني رينا وسلمى). بتعمل في شنو يا بابي؟ في ساقيتي يا بتّي، أزرع وأقلع وأدّي البلد تيراب. مش مفروض تكوني أجّزتِ من كم يوم! مع ناس عمك في الخرتوم وألا وين؟ يا بابي الزراعة دي ح تموّتك. يااه أنا ما كلّمتك؟ لا ما كلّمتيني، في شنو؟ ما أنا في شهر العسل يا بابي، في بورتسودان. تقولي والله؟ يا سلالالام، إيه المفاجأة الحلوة دي يا مريومة!؟ والعريس منو إن شاء الله؟ يوووه أنا ما كلّمتك؟ شكلي بقيت بنسى كتير يا بابي. العريس ما ود عمو عصام جبر الله. وعمك قشران دا عارف؟ لا يا بابي، برضو عملنا ليه مفاجأة، كانت آخر رحلة بتاعة طيّارة ماشية بورتسودان بقوليك، إنت ما مركّز معاي خالص. والله فعلا ما مركّز، عاد كان أنا مركّز معاك بهنا، وعصام مركّز مع ولدو بهناك، الحكاية دي بتبقى علينا الاتنين؟ (هسّع دا مش ياهو ذاتو أدب اللامعقول!؟ تربِّي وتكبِّر وتعلِّم، وتتعب، ويوم العرس ما يقولوا ليك تعال أعرض في حفلتنا دي!؟).
--------------------
رددي معي : يا ربي لا تفاجئنا لاتفاجعنا . . . ود بانقا دي وين لي بانقا القبة وبانقا المحطة ، كبوشية ، قباتي ، المحمية ، العالياب ( شرق ) . . ركبتي قطر كريمة ؟
09-27-2009, 01:09 AM
قيقراوي قيقراوي
تاريخ التسجيل: 02-22-2008
مجموع المشاركات: 10380
Quote: ماشاء الله البوست نور صور والقيقراوين الصغار وصورة (دوما) و والمناداةبدوما حافي بعد الصور دي ورغم تشكيك عصام جبرالله بقت واجب وطني ومطلب شعبي...
تحياتي للجميع وعيد سعيد يا اماني الامين
والبوست يعلم الله محضور ومميز وخير عيدية ووداع نقدمه لمفردة لماما دوما سابقا
يا كيكي لا تهادن الارهابيين
تمسك بتمييزك الايجابي و حقك بالتجدع بلفظة " ماما " . . يا اخوي افرز مسارك من الجلاكين ديل اول حاجة اولاد خراتيم ساي و ات ياكا زولنا و مهمش ساي بعدين عمر ساي السغير فيهم - ود جبر الله - يلديك . . البلمك معاهم شنو يا زول ؟ قول ماما ساي ياخ مفيش حد واخد منها حاقة !
انا غايتو ما بفوت فرصة ماما دي . . . بيني و بينك دي الام التالتة لي كدا .. امنة بت السيمت (الجابتني انا و اخواني ) . . و التومة بت سليمان ( عمة اخواني ) ( الموضوع دا خيهو سري بيناتنا ما تكلم زول . . سمح ؟ )
شوف جمال اللمّة دي باللاي ؟ . . دي من خيرات البحث عن صور ماما دومة دا العيد الفات . . الخرطوم بحري . . فندق القصر و لا شنو كدا ما عارف ؟ غايتو على الضفة الشرقية للازرق النشوان
--------------------- * شايف في فيديو عقد الجلاد . صاحبك الخير (المساح ) لفق مع الجماعة ؟ ** ياخ ما تفتحوا ليكم انت او اميرة بوست خلونا نتقصى اخبار سفرة البرلوم " محمد عبدالرحمن " المريبة للسودان ؟ جابتو العصفورة ماتقول لي عرفت كيف ؟ . . نديك هنت ؟ زول اول حرفو عثمان النعيم . . انت نسيت انو قريبي ياقريبك و لا شنو ؟
د بانقا دي وين لي بانقا القبة?? يا قيقا بس علول ما تصل القبه دي ادقش البيوت من مطرف عتامنه حداربه رازقيه قطوعه براغيت ولاد ود اب سوار جت عليهم اهلي من هنا لي قندتو .
09-27-2009, 11:22 AM
doma doma
تاريخ التسجيل: 02-04-2002
مجموع المشاركات: 15970
سبحان الله د. بانقا دا الراستا بتاع مهنتنا ( المحاسبة ) . . ربا عديل PhD & ACCA . . اكاديمي و مهنة د. عبد القادر بانقا من النواحي ديك ذاتا . . . يكون القبة قبة جدو ؟
------------------- استغفرتك يا مالك روحي ! دي جيتي بيت البكاء
Quote:
Quote: الناس المرت بي جاي دي تلاتة ارباعا عندها قناعة انك ولد.
انا غايتوا ما من الناس الشاكين فيها متاكده انه دي كتابه انسانه واعيه مثقفه جرئيه مشاغبه دمها خفيف ولو لم تكن محتفظه بخصوصيتها كان بقت متلنا كدا من بيت بكاء لبيت ونسه
تاني مشيتي تكابسي في حفلات الشواء البشري دي ؟ شايفك اتحسستي من عكاز سارة علي المشكنبكة دي ؟ دي مخلّية يا ماما دوما مافي زول بشتغل بكلاما
اها الحل شنو لينا بدل المساسقة من بكاء لي بكاء لونستنا دي ؟ و الله ضحكتيني جنس ضحك في حكاية " من بيت بكاء لبيت ونسه " يديك العافية ياخ
09-28-2009, 10:11 AM
doma doma
تاريخ التسجيل: 02-04-2002
مجموع المشاركات: 15970
Quote: د. عبد القادر بانقا من النواحي ديك ذاتا . . . يكون القبة قبة جدو ؟
انا ما بعرفوا يا قيقا وما اظن من القريه نفسها لكين قطع شك بيكون اهله رازقيه هم اساسا جعليين منتشرين في كل بقاع السودان . اسم بانقا او عبد الرازق بيكون من الرازقيه وجدهم المدفون في بانقا القبه دي اسمه الشيخ صالح ود بانقا . قلت ليك حكايه عصر الفرشات والونسات ما في طريقه حل ليها عشان الواقع تعبان يا قيقا ابوي كان بقول اذا حللت بدار قوم يا اتعلم طنجهم ولا قوم خلهم .
09-28-2009, 10:29 AM
داليا حافظ داليا حافظ
تاريخ التسجيل: 06-06-2008
مجموع المشاركات: 5055
معقول يا داليا يا بتي والله بفرح بيكم لما تنادوني مامه دومه بالله تقوليها لي . شاكره مرورك يا عسل وحلاتها العسوله دي بت منو ؟؟ وكل لحظه وانت اكثر القا يا لطيفه ليكم حبي الاكيد
09-28-2009, 11:03 AM
داليا حافظ داليا حافظ
تاريخ التسجيل: 06-06-2008
مجموع المشاركات: 5055
هوووووووي يا ولد بس الا الدفن دا انا عيني في ترب النصاره السممممممممممممحه ومشجره وبزهورها ونجايلها داير ترميني في احمد شرفي ولا سيدي محجوب الضلها سماها ؟؟؟!!
09-28-2009, 06:46 PM
Kostawi Kostawi
تاريخ التسجيل: 02-04-2002
مجموع المشاركات: 39979
Quote: الموجع إنه مازالت في ناس بترى أن تطبيق الشريعة ممكن بعد تجربة نميري المأساوية وبعد تجربة الكيزان الأكثر سوءآ ومأساوية
علينا ، ليس في الحزب الشيوعي السوداني فقط يا عماد لكن في كل الأحزاب والتنظيمات الديمقراطية أن نبذل جهد مضاعف لنكشف للناس ونزيل الغشاوة عن عيونهم ويستعيدوا مآلات مايسمى بتطبيق الشريغة ليروا ‘الى يمكن أن تساق بلدنا تحت تلك الدعوة الشائهة
اذا كان انت بتحلم بتطبيق الشيوعية بعد تجارب ستالين وثلاثة ايام سود لهاشم العطا ومن قبله تجربة 25 مايو 1969 واحداث الجزيرة ابا وودنوباوي فلماذا لا يحلم الاخر بتطبيق ما يراه مناسبا شريعة اسلامية ام غيره ؟؟!!!
ما تم في عهد السفاح نميري وعهد الجبهة الاسلاموية لا علاقة له بالشريعة الاسلامية السمحة .. فهم انتهازيون ارادوا ركوب جواد المد الاسلامي واستغلال المشاعر الدينية من اجل بلوغ مراميهم الدنيئة والوضيعة وضاعة من يتهم الشريعة زورا وبهتانا وجهلا ...
09-28-2009, 11:13 PM
Kostawi Kostawi
تاريخ التسجيل: 02-04-2002
مجموع المشاركات: 39979
تطبيق الشريعة الاسلامية لاعلاقة له بمفهوم الدولة الدينية اذ ان الدولة الدينية كمصطلح غير مرتبطة بدين محدد اسلامي كان ام مسيحي ام دين وضعي ... بالنسبة لنا في حزب الامة نعتبر ان الدولة في الاسلام دولة مدنية وليست دينية ونقول ان الدولة الدينية انتهت بموت الرسول الاعظم محمد صلى الله عليه وسلم ... الدولة المدنية التي نقول بها تحترم حرية الانسان وتدينه اي كان وهذا موجود بنصوص قطعية من الكتاب والسنة .. ما تم تطبيقه في عهد مايو والجبهة الاسلاموية لا علاقة له بالشريعة الاسلامية اذ هي ليست ملك احد من العالمين بل للناس كافة
09-29-2009, 12:37 PM
قيقراوي قيقراوي
تاريخ التسجيل: 02-22-2008
مجموع المشاركات: 10380
Quote: اذ هي ليست ملك احد من العالمين بل للناس كافة
دا اغرب كلام اسمعه يا ود العمده دا مفهومك انت كمسلم لكين دا ما مفهوم صاحب اي ديانه اخري . انت كيف ح تطبق شريعه اسلاميه علي الناس كافه من غير انهم يكونوا مسلمين غض الانظر عن اي اختلافات بين المسلمين انفسهم ؟؟!!
Quote: لو الفاضلة دومة ادتنا الاذن بنفتح الموضوع دا هنا ..
ولو ما امكن شوف الطريقة المناسبة معاك واخوك جاهز
قيقر انت قايل مستشفى كوستي دي مستشفى نيالا مليانة نيم ولا شنو
الاذن معاك يا ود العمده الا الارشفه اظن في عقاب اليوم دا اخير نرجي الموضوع للربع الجديد وهو موضوع جميل جدا وهدفنا ما يضمن وحده الوطن . بالذات كلام الجمهوريين دا كلام دسم ومليان كعادتهم
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
doma
قيقراوي
Abdelmuhsin Said
عبدالكريم الامين احمد
أبو ساندرا
Kostawi
انعام حيمورة
مجدي عبدالرحيم فضل
داليا حافظ
فيس بوك
تويتر
انستقرام
يوتيوب
بنتيريست