|
|
 Re: اولاد قَلِبَا (Re: Emad Abdulla)
|
النصيحة لى الله نحن ناس اقاليم وناس يمتنعون ...
لكن امدرمان دى حنيييييييييينة وبنحس كاننا منها والله...
الخرطوم دى بحس ليك كانى فى غربة وبتلفت فيها زى المانصيحة ..
اما بحرى دى فخشمى قادرة عليه...
| |
 
|
|
|
|
|
|
|
|
Re: اولاد قَلِبَا (Re: Amira Elsheikh)
|
يوم مشت سيره مدنى
السيره طبعا من قلبه
اها فى واحد فاره كده عمل شكله
قام اخو العروس قام مسك الماكرفون
قال ليهم يا ناس سلام
انحنا ضيوفنا ديل اولاد امدرمان السيره دى من امدرمان
اها العروس دى عروسهم
والفنان فنانهم
والسكر سكرهم
وعاين كده شاف ليك الرب قاعد
وكمان ربهم معاهم .................
| |
|
|
|
|
|
|
|
|
|
Re: اولاد قَلِبَا (Re: Emad Abdulla)
|
| Quote: عندكم شغل غير المكنة المبوشة دي يكون جديد و يرشح كويس ؟؟ |
اي في ...
هلال امدرمان حا يشيل كاس افريقيا السنة دي
قول بِغِم
ووهبة زاتو معاك
| |
|
|
|
|
|
|
|
|
|
Re: اولاد قَلِبَا (Re: وليد محمد المبارك)
|
Quote: وحاتك في الوست كل يوم قادننا بيها قد
كمال سالم
بهاء بكري
محمد حمدي
عمر سعد
عادل سالم
والمصيبة كل يوم واحدج متسيك في قبوله
حتي اسأل بدر الدين الامير وضحية
قال قلبه قال
ده طلع
قفاها...... |
صدق ياولي قلنا نتواضع ونلعب مع ناس هارون ديل ...... اها مرات بتكون لاعب مع تلاتة من الهامش الونسة تروح ليك
طبعا لامن يوقولو ليك في سيك تسال طوالي هارون معاهو منو ؟....... يوم لاعبين صاحبك هارون كان مفرمل بولد اسود
قام قال عشرة قلنا ليهو العب ..... شات الولد عشان ينضرب ويقوم يدك اللعب ...... حتي الان وبعد كم شهر عايزين
نفهمو انو لعبت الفرمالة دي اتلغت من اربعين سنة ماقادر يفهم..... قال نحن اتعلمنا كده ..... قلنا ليهو وين قال في البلد
بجيك راجع تاني عشان اقول ليك بمسك الورق كيف ....
مودتي
| |
|
|
|
|
|
|
|
|
|
Re: اولاد قَلِبَا (Re: بهاء بكري)
|
Quote: حمور و حنك المسغفاتية البيش ..
متور نفسك فوق كم ؟ |
والله حكاية تحير ياعمدة
صحبك بتاع الحلفاية دا بعاني من اثر التهميش
دا مشكلتو انا عارفا .. ياخ اقول ليك حاجة دا لو داير يجيب كهربا بركب 3 مواصلات
وعلى العليهو تلفونو ضاربو فايروس
قوموا لفوا كدا بلا الطابية المقابلة النيل بلا عبدالله خليل
| |
|
|
|
|
|
|
|
|
|
Re: اولاد قَلِبَا (Re: بهاء بكري)
|
| Quote: بجيك راجع تاني عشان اقول ليك بمسك الورق كيف .... |
بهاء بكري
كيفك
يعني صحبك هارون دا لمن يفرمل يا كافي البلا ببلى اسود ولا ديناري كمان
بالجد دي حالة متأخرة مقفلة معاهو من كل النواحي فرمالة بلى ونقطتين
لووووووووووووووووووول
| |
|
|
|
|
|
|
|
|
|
Re: اولاد قَلِبَا (Re: عبدالوهاب علي الحاج)
|
وليد
بين الشعبية والحلفاية في 10 كيلومتر
وبين الشعبية ورئاسة مجلس الوزراء 6 كلم شفت كيف
وبين الحلفاية ومجلس الوزراء 16 كلم بكبري المك نمر ولو بالتاني 27 كلم
ياخ ما تخليني اشتغل معاك رياضيات
يلا يا عمدة بالحتة الفيها الحديدة
| |
|
|
|
|
|
|
|
|
|
Re: اولاد قَلِبَا (Re: عبدالوهاب علي الحاج)
|
Quote: وليد
بين الشعبية والحلفاية في 10 كيلومتر
وبين الشعبية ورئاسة مجلس الوزراء 6 كلم شفت كيف
وبين الحلفاية ومجلس الوزراء 16 كلم بكبري المك نمر ولو بالتاني 27 كلم
ياخ ما تخليني اشتغل معاك رياضيات
يلا يا عمدة بالحتة الفيها الحديدة |
قادر الله
الحلفاية الاسمها حلفاية الملوك هامش
والشعبية المشتقة من الشعب مركز
قرقرقرقرقرقرقرقرقرق
ياخ على الاقل راعي لي بكري ياخ
انت وقوفوك شهرين جقلبته
يقوموا هسع يقطعوا راسك باقي رمضان ده
والدور ده المسلمي ما بحلك
ياخ الشعبية دي بيوتها تتشابه يا وهبة
تتشابه
هي بيوت ولا تيمان؟
هاهاهاهاهاهاهاهاهاهاهاها
هاهاهاهاهاهاهاهاهاهاهاهاها
| |
|
|
|
|
|
|
|
|
|
Re: اولاد قَلِبَا (Re: بهاء بكري)
|
بهاء الكومندان ..
ويييييييييين يا ..
البلد دي تقولوها انتو الجيتو ريحتكم عطرون عطرون و كبيتو التراخيم في ضهر حي العرب .
و بتحلقو لغاية قريب دي ( كورية ) , نظام الاولاد انقوش للفقه المدني ..
.. فارات .
..
أمسك عندك : عمك إبراهيم الدنقلاوي طلبني تقلية بالعصيدة , بتكم ظبطتها ليهو .. بعد عض كويس قلت ليهو اها كيف ؟
قال لي : لا تمام التمام .. ربُنا يفته أليك ( يفتح عليك ) .. هو نسوان أمدرمان ده قير التقلية بيارفو ياملو هاجه ؟ ( غير التقلية بيعرفو يعملو حاجة ) ..
تقول لي قال !
| |
|
|
|
|
|
|
|
|
|
Re: اولاد قَلِبَا (Re: Emad Abdulla)
|
Quote: أمسك عندك : عمك إبراهيم الدنقلاوي طلبني تقلية بالعصيدة , بتكم ظبطتها ليهو .. بعد عض كويس قلت ليهو اها كيف ؟
قال لي : لا تمام التمام .. ربُنا يفته أليك ( يفتح عليك ) .. هو نسوان أمدرمان ده قير التقلية بيارفو ياملو هاجه ؟ ( غير التقلية بيعرفو يعملو حاجة ) .. |
| |
|
|
|
|
|
|
|
|
|
Re: اولاد قَلِبَا (Re: Emad Abdulla)
|
Quote: طيب ما تلعبوهم في بحري !!!
مقطعنهم الكبري ليه ؟
لو قمنا للعد بتخسر |
كابتن وليد المبارك
انت نسيت نحن سفراء هذا المنشط
عشان ناس بحري بمشوا اي مكان وطوالي بدوهم الجنسية
امسك عندك
1- عماد خوجلي
2- قرن شطه
3- الجاك عجب اول كابتن فريق قومي
ياوهبه
وليد المبارك ده صاحبي
وزميل مهنه يعني بالله بشويش عليهو
وامدرمان دي لي فيها ذكريات جميله
(قي ربوع بحري لاقيتو === بسم حياني حيتو )
| |
|
|
|
|
|
|
|
|
|
Re: اولاد قَلِبَا (Re: بهاء بكري)
|
Quote: قام قال عشرة قلنا ليهو العب ..... شات الولد عشان ينضرب ويقوم يدك اللعب ...... حتي الان وبعد كم شهر عايزين
نفهمو انو لعبت الفرمالة دي اتلغت من اربعين سنة ماقادر يفهم..... قال نحن اتعلمنا كده ..... قلنا ليهو وين قال في البلد
|
والله جد جد ما خستكة
أبوي مزاملني وكنت مفرمل
بي ولد سميت 13 والحمد لله
المنافس لعبني واتخارجت بالولد
والله عرفت انه كان في سابق الدهر والاوان
قانون يسمي لعبة الفرمالة وعرفت كده
من والدي والقانون انتهي ببداية الستينات
واخيرا
العايز دمو يروق
ديامة شارع السوق
| |
|
|
|
|
|
|
|
|
|
Re: اولاد قَلِبَا (Re: بخاري عثمان الامين)
|
ويح قلبي الما أنفك خافق
فارق أمدرمان باكي شافق
يا أم قبائل ما فيك منافق
سقى أرضيك صوب الغمام
من فتيح للخور للمغالق
من علايل أبروف للمذالق
قدله يا مولائ حافي حالق
بالطريقة الشاقة الترام
(خليل فرح)
,,,,,,,,,,,,,,,,,,,,,,,,
ملوك امدر الليلة كيف امسيتو
يا ملوك امدر يبقي لينا نسيتو
الخيال لي جسمي وخليلي اسيتو
(ود الرضي)
,,,,,,,,,,,,,,,,,,,,,,,,
ليكي سلام وتاني سلام
وليكي قيام .. وتاني قيام
ياست الدنيا .. يا امدرمان
وست الجاه
وست الشأن
وست النان..
سلمت .. سلمت يا امدرمان
(سيداحمد الحردلو)
’’’’’’’’’’’’’’’’’’’’’’
العيون النوركن بجهرا
غير جمالكن مين الساهرة
يابدور القلعة وجوهرة
(ابو صلاح)
,,,,,,,,,,,,,,,,,,,,,,,
إمتي أرجع لأ مدر واعودا
أشوف نعيم دنيتي وسعودا
(عمر البنا)
,,,,,,,,,,,,,,,,,,,,,,,
واختتم بشعر عبد المنعم عبد الحي ..
ودة اهداء للدناقلة والشوايقة ومن لف لفهم..
أنا أم درمان تأمل في نجومي أنا السودان تمثل في ربوعي
أنا ابن الشمال سكنتو قلبي على ابن الجنوب ضميت ضلوعي
يعني شنو؟؟
اولاد امرمان اولاد قلللللللللللللللبا
ـــــــــــــــــــــــــــــــــــــــــــــــــــــ
فيا جماعة انتو مفروض اصلا ما تقعدوا تبرروا عن امدرمان وعظمتها...لانها ظااااهرة..
بس دي غيرة ساي من ناس الخرطوم لانو لو في شاعر كتب(يا بدور الديم) او (يا ملوك السجانة) ما كان حسوا بهذا النقص...
| |
|
|
|
|
|
|
|
|
|
Re: اولاد قَلِبَا (Re: سارة علي)
|
Quote: قدله يا مولائ حافي حالق
بالطريقة الشاقة الترام
|
سارة اسف شديد لتصحيحك
قدلة يا مولاي
حافي حالق
بالطريق الشاقي الترام
وخليل ( يقال ) كان بوصف مسيرة جنازته
| |
|
|
|
|
|
|
|
|
|
Re: اولاد قَلِبَا (Re: بخاري عثمان الامين)
|
يا بخاري يا اخوي صلح ولا يهمك..
لو قلتا ليك عملتا ليها كوبي وبيست حيبقي دة العذر الاقبح من الذنب..
اما فيما يخص بانو خليل بيوصف مكان جنازته فدي ما عارفاها..
لكن البعرفو بانو قبل ما يموت بي ايام اتصل علي احد اصدقائه(حدباي) وطلب منه ان يصاحبة في جولة لاحياء امدرمان وفعلا مشوا السوق الكبير وامدر درو وابروف وكم حي في امدرمان...فيمكن الظن بتاع انو كان بيوصف جنازته جا من هنا لانو الاحياء الزارها موجودة في نفس القصيدة ..لكن اظن انو مستبعد لانو القصيدة اتقالت قبل زمن من وفاته..وهو عمل الجولة في احياء امدرمان قبل اقل من شهر من وفاته علي حسب ما ذكر..غايتو انا ربطتا القصة كدة...
لمن قال (حافي حالق) هو قصدو هنا وصف امدرمان واحياء امدرمان بانها بقعة طاهرة والله اعلم برضو..
| |
|
|
|
|
|
|
|
|
|
Re: اولاد قَلِبَا (Re: سارة علي)
|
مكنتك بيش يا ساره علي ..
الصحيح ( قدلة يا مولاي حافّي حالق ) ...
ما حافي بمعني حفيان .. حافي بمعني مظبط شنبو و لحيتو و متأنتك صاح و قاعد يقدل .
القدلة ما بتظبط مع منسك العباده و الطواف و و و و .. داك بيكون فيهو الخشوع أظنو ..
القدلة مربوطة بالزول المتكيف و مبسوط و مديها مزاج فووووق .
دي حاجة .. الحاجة التانية بعدين إنه وراوير أمدرمان ناس وليد و تمبس و حمور و باقي البشكة بتاعين الضهاري ديل ما صدقو النقلة من دياجير العصور أم فكو الجو منها .. و لقو نفسهم في شوارع ظلط و اتومبيلات و سينما برمبل ..
قاموا قايلين الحكاية دي بسسسسس ياها " الحِجاز " ..
قلبوا طوالي جلب و بقو دراويش و ماسكاهم أم فريحانه .. و مسمارو ركب مين يقلعو .. مسمارو ركب مين يقلعو .. مسمارو ركب مين يقلعو ..
.....
أولاد قلبا قال .
.. أديك كده .
| |
|
|
|
|
|
|
|
|
|
Re: اولاد قَلِبَا (Re: Emad Abdulla)
|
الخرطوم .... وردي وعثمان حسين واحمد المصطفي وسيد خليفة وحسن عطية ومصطفي سيداحمد وخالد الصحافة وفيصل الصحافة وعماد الكاشف و
محمد اسماعيل .................
الخرطوم ... حامد بريمة وطارق احمد ادم والعوني وكمال عبدالغني وعاطف القوز وابراهومة وسامي عزالدين .........
| |
|
|
|
|
|
|
|
|
|
Re: اولاد قَلِبَا (Re: omer osman)
|
عمر عثمان انت جادي داير تحسب
ياخ فنانك ديل ناديهم في ام درمان
لعيبتك ديل ناديهم في ام درمان
_________________________________________
نعترف انو ريفي ام درمان قدم الكثير للسودان
| |
|
|
|
|
|
|
|
|
|
Re: اولاد قَلِبَا (Re: Emad Abdulla)
|
يا عمدة ليه حاسة انو قصة امدرمان دي متضايق منها لي سبب (خسوسي)..
الموضوع فيه انة..
فضفض فضفض يا اخوي لو ما استحملوك اولاد قلبا ما بتلقي ليك جهة تانية تتحملك
ديل ناس حناااااااااااااااان
وبناتم(الداء والدواء)..
احكي احكي لانو غبينتك دي شكلو كدة وراها
اديك
| |
|
|
|
|
|
|
|
|
|
Re: اولاد قَلِبَا (Re: سارة علي)
|
Quote: يا تامبا
شفت محطات ( القطر) اتلمو فيني |
وروروووك ... ألحقني يا تامبا .... يا ولد ... ده شنو؟ ما ترجل شوية.
في زول ولّع ليك النار؟ ... ما ولّعتها براك.
وحمّور ده ما قال ود الحلفاية ... مالو الليلة شايفو مركب مكنة علي المك؟
يا عُمدة .. أدّي الفارات في حنانم وقول ليهم العاصمة دي (محل الطيارة بتقوم والريس بنوم).
والله نحن أولاد بري لما يجي واحد من المواصلات (مكتّح) طوالي بنعرفو جاي من أم درمان. ياخ الكباري دي جايبة لينا البلاوي كلها.
| |
|
|
|
|
|
|
|
|
|
Re: اولاد قَلِبَا (Re: محمد أبوالعزائم أبوالريش)
|
Quote: أولاد قلبا قال .
.. أديك كده . |
وليد كيف حالك
انت عارف الناس ديل كلهم انا ما زعلان منهم
بس تصدق المزعلنى الزول ابوشنب الاسمه عماد ده
ياريت يوم جانا ساير للثورة بالبدلة
يا ريت لو عملناها..ماكان جاء اتفاصح
اخ اخ اخ اخ اخ اخ اخ اخ اخ,,,
احيييييييييييييييييييييييييييييى عليه...
والله لو لقيت.......... كان اكلتها...
غايتو الما من امدرمان
الترابه فى خشمو،،،،،
| |
|
|
|
|
|
|
|
|
|
Re: اولاد قَلِبَا (Re: وليد عبد اللطيف)
|
قلبها يا وليد مقصود به ..
ام درمان القديمة
او الاحياء القريبة من السوق الكبير
ويمكن تحديدها كالتالي
شارع العشرين او السلاح الطبي جنوباً والعرضة غرباً ونهاية حي العرب حتى المسالمة ويحدها مقابر البكري وشمالاً حتى كلية التربية ....
متذكر زمان لمن نكون ماشين امدرمان من الخرطوم بنسأل صاحب التكسي اول حاجة " بتعرف حي المظاهر ؟ " عشان نعرفو سواق تكسي حافظ البلد ولا جاي قريب ...
سيبك من الناس دي اي زول بسئ لي امدرمان ما عندو وطنية ....
في هذه اللحظة تذكرت دكاكين الطاهر وسوق الشجرة وسوق الملازمين ...... أأأأأأأأأخ.... يا حليلك يا بيت المال ....
يا ريت لو جاء هاشم دبز يتكلم هنا شوية .....
تقديري واعتزازي لكل من يحمل مشاعر طيبة لأمدرمان وسكانها ...لا لمن يسكن فيها أو في ( قلبا ) فقط ..
اسامة
| |
|
|
|
|
|
|
|
|
|
Re: اولاد قَلِبَا (Re: Tabaldina)
|
Quote:
Quote: قال في البلد
بهاء الكومندان ..
ويييييييييين يا ..
البلد دي تقولوها انتو الجيتو ريحتكم عطرون عطرون و كبيتو التراخيم في ضهر حي العرب .
و بتحلقو لغاية قريب دي ( كورية ) , نظام الاولاد انقوش للفقه المدني ..
.. فارات .
..
أمسك عندك : عمك إبراهيم الدنقلاوي طلبني تقلية بالعصيدة , بتكم ظبطتها ليهو .. بعد عض كويس قلت ليهو اها كيف ؟
قال لي : لا تمام التمام .. ربُنا يفته أليك ( يفتح عليك ) .. هو نسوان أمدرمان ده قير التقلية بيارفو ياملو هاجه ؟ ( غير التقلية بيعرفو يعملو حاجة ) ..
يا عمده مشتاقين ؟
نعيد عليك فى الاول
وكل سنه وانت طيب
ما معروفه الظروف يمكن بعده يكون فى رش تقيل ما بعدين ننسى انو عيدنا عليك.
تقول لي |
| |
|
|
|
|
|
|
|
|
|
Re: اولاد قَلِبَا (Re: عمر سعد)
|
Quote:
بعدين انت ذاتك بتشبهنا |
تعرف ياوليد ،،،،
الثورات دى بتشبة الامتداد جغرافيا من ناحية التخطيط (خططها عبود بنفس التاريخ ) ،،،
والعلاقات الاجتماعية لانوا ناس الثورات هم نفسهم سكان احياء امدرمان القديمة وكذلك سكان
الامتداد هم سكان احياء الخرطوم القديمة الديم والسجانة والحلة الجديدة (معظمهم ) لذلك
تجد العلاقات الاجتماعية مميزة وتفاصيل الحياة متشابهة لحد كبير اثناء مرحلة الجامعة كانت
معظم حياتى فى الحارة الثامنة بمعية الاصدقاء ناصر مهدى والصافى مهدى وحسن محمود لو بتعرفهم
واخونا ياسر جاكسون فى التاسعة وصلاح الحبو وعوض نهار فى (11) ونفس التفاصيل بتاعة العشش الحفر
والخور وسوق ام دفسو واخر ال (17) ومحطة شغلبان وزكريات جميلة والناس كلها مبتهجة ومفتحة 
حظكم يازول كلنا اولاد قلبها ...
شكرا للبوست رجعنا لشجن جميل ،،،
دائما بوستاتك قريبة لقلبى أمكن نكون بنتشابة للبئية الواحدة الاتربينا فيها...
جلوس اللساتك وانتظار بنات المدارس ....
وحوامة الحفلات ومواعدة الجكس والمشى الكدارى بين المربعات فى الامتدادوالصحافة وانتو بين الحارات
الابعد من سكن الجكسوية ...
كتر من البوستات دى فيها حاجات جميلة للنفس فى الغربة بالتحديدو متنفس مدهش
| |
|
|
|
|
|
|
|
|
|
Re: اولاد قَلِبَا (Re: بابكر التوم)
|
أُم دُر يا ربوع سوداننــــــا نحييك و انت كـل آمالنـا
في غربـك عروس الرمــــال و في شرقك آية جمــال
و جنوبـك واسع مجال يا حَلاة رُطـبك في الشــــــمال
هكذا امتدت أُمدرمـــان جنوباً و شمالاً شرقاً و غرباً
لتكون قلب هذه الامــــــــــــــــة
أبناء امدرمان لا ينتمون الي قبيلة معينة ... انهم ينتمون الي
وطن باكمله
هناك بقارة من ابناء امدرمان هناك محس دناقلة شايقية
هناك دينكا و شلك هناك هدندوة بني عامر من ابناء امدرمان
هناك الاقباط الهنود الكنائس و الجوامع تتحاضن في إِلفة و محبة
من يستطيع ان ينكر امدرمانية جورج مشرقي و دور مدارس
الارسالية, و دور ست ليزا تلك الانسانة الفاضلة التي فاضت روحها وهي
تنشر العلم في مدرستها العظيمة غرب مستشفي امدرمان
امدرمان هي ذلك الخليط الاثني العجيب الذي شكل قلب السودان
و لي عودة
| |
|
|
|
|
|
|
|
|
|
Re: اولاد قَلِبَا (Re: Hamid Elsawi)
|
لا أنسي برعي المصري
فهو من معالم المدينه
امدرمان مدينة لا تعرف العنصرية
فقد تجاوزتها الي رحاب الوطنية
افتخار ابناء امدرمان لا يعني انهم
يقللون من شأن المدن الاخري فكل مدينة لها
تاريخها الذي يحق لابناءها الافتخار به و افادتنا
به.
سنار مثلاً تاريخ يستحف الافتخار به
مروي, مدني ... الخ
فلنسمع من ابناء هذه المناطق مآثرهم
و المجد للسودان
| |
|
|
|
|
|
|
|
|
|
Re: اولاد قَلِبَا (Re: Hamid Elsawi)
|
وليد صاحبى ,,
تاااااانى جبت سيرة البحر ؟؟؟ ونحن نقول البلد دى قلبها مالووو مالو مالوو؟
اتارى يا وهبه البلد محتاجه لعملية قلب مفتوح ؟؟ دا طبعا
لانو كوجان متواطىء وماعايز يقول عايزة زراعه لقلب جديد ..
طيب خلينا لما نفطر ياخ !!
ام درمان امدرمان ام درمان
انتو درمان دا ما عندو ابو ؟؟؟؟ لوووووووول .
ـــــــــــــــــــ
وهبه وعماد .. ما دايرين اى تعزيز للقوات
واصلوا .. حمور دا اصلو عندو شهادات كدا قاطعه من شبطو ..
فعلا بعد امطار 88 وردى غنى كاااااان اسمها الثورة
كااااان اسمها ام درمان
| |
|
|
|
|
|
|
|
|
|
Re: اولاد قَلِبَا (Re: دينا خالد)
|
| Quote: فعلا بعد امطار 88 وردى غنى كاااااان اسمها الثورة |
دُنّانة
و إنتِ من سنة 88 بتسمعي في وردي!!! 
ماشاء الله تبارك الله
| |
|
|
|
|
|
|
|
|
|
Re: اولاد قَلِبَا (Re: وليد محمد المبارك)
|
وووووووووووهـ علاء الاخر !!! وفى رواية الضلالى
وردى غنى لى ناس على عبد اللطيف بعد ثورة 1924
وغنى يا شعبا لهبك ثوريتك بعد انتفاضة ابريل 1985
والكاشف قال وزنقار عمل انت قايل الكلام دا السر قدور
حاضرو ؟؟؟ ما بيتكلم ساااااى عشان لقاهم كلهم ميتين ! لووووول .
فى حاجه اسمها الاطلاع والطلعات ( وش غامز )
السغافه ياخ !! انت بس اقعد مسطح كدا
معييد فى الحته اياها ؟؟ لو ماشى هناك خلينى افتح ليك بوست دعوات
عليك الله ،، لحددددددى ما تجى راجع ..
ــــــــــــــــــــ
وليد الكلام المسحتو دا كان لى انا مش ؟ لووووووب
طرشق .. غايتو المراه ال ام درمان قلبها دى ما عندها قلب والله !
وجاوب على السؤال درمان دا ابوهو وينو ؟
قلت لى جايين من الدامر والشرام ؟؟؟ وناس امدر ديل جو من تخصيب اليورانيوم ؟؟
ولا نبعوا من الريفيرا والقولدين قييت ؟ بس والله دى شفتنا ساااى ..
| |
|
|
|
|
|
|
|
|
|
Re: اولاد قَلِبَا (Re: دينا خالد)
|
Quote: وليد الكلام المسحتو دا كان لى انا مش ؟ لووووووب
طرشق .. غايتو المراه ال ام درمان قلبها دى ما عندها قلب والله !
وجاوب على السؤال درمان دا ابوهو وينو ؟
قلت لى جايين من الدامر والشرام ؟؟؟ وناس امدر ديل جو من تخصيب اليورانيوم ؟؟
ولا نبعوا من الريفيرا والقولدين قييت ؟ بس والله دى شفتنا ساااى .. |
مرحب صحبتي دينا
يا دينا مالنا بابو درمان او حتى درمان نفسه
الحديث هنا عن ام درمان ( شخصيا ) او عزه كما يدعى
عشان تعرفي نحن ناس غير جندريين متلك
امدرمان جاء من وين دي ما شغتنا
ابوه منو برضو ما شغلتنا
شكلتنا امدرمان براها
بالنسبة للناس الما جايين من تخصيب اليورانيوم نوريك نحن بنصنف الامدرمان كيف يا دراو
هم اربعة درجات
1) امدرماني من اب سعد او المورده القديمة او القرية المواجهة اب روف او من كرري العجيجة وده تاريخه قبل المهدية وامدرمان
2) امدرماني حقيقي اتي جدوده مع المهدية ومنذها ما غادرها
3) امدرماني جاء بعد لمهدية وقبل الاستقلال 1956
4) امدرماني جاء قبل الجفاف والتصحر 1984
اي زول بعد 1984 ده ما حقنا
وقع ليك يا فصيحة
| |
|
|
|
|
|
|
|
|
|
Re: اولاد قَلِبَا (Re: Emad Abdulla)
|
يا عمده
ده ما بوست امدرمان
اول ما تدخلو الرجفة بتحصل
تدبل المداخلة وتمسح مية مرة
____________
عيد سعيد يا حلو
وكل عام وانت بالف خير
| |
|
|
|
|
|
|
|
|
 Re: اولاد قَلِبَا (Re: عبدالوهاب علي الحاج)
|
| Quote: اي زول بعد 1984 ده ما حقنا |
أخوك يا وليد سكن أم در قبل التاريخ الفوق ده تتخيل ... بس ما حبيتو والله
كل عام وإنت والأسرة بخير ياخ
_________
هسى دى بلد يا وليد تفخر تكون ود قلبا
| |
|
|
|
|
|
|
| |
عمر سعد
وليد محمد المبارك
بهاء بكري
عبدالوهاب علي الحاج
حمور زيادة
Emad Abdulla
وليد عبد اللطيف
بخاري عثمان الامين
سارة علي
omer osman
أحمد ابراهيم عثمان
محمد أبوالعزائم أبوالريش
صديق الموج
Osama Mohammed
بابكر التوم
Hamid Elsawi
دينا خالد
ناصر احمد الامين
شول اشوانق دينق
فيس بوك
تويتر
انستقرام
يوتيوب
بنتيريست