بدر الدين الأمير الأكثر أناقة بين كل البورداب..

Quote: صاحبي الجديد القديم عمر .. ما عافي ليك (حق الصداقة) ياخ جيب سيرتي وقول أنيق واللا أي حاجة إن شاء الله أكون لابس (أم فكو ) زاتو ياخ .. غايتو الصداقة ح أستغلها حتى تقول ليتها ما كانت .. بالجد ، وما دام فتحت موضوع عن بدرالدين ، ورغم أنني أكاد أكون غائب عن الدوحة ، رغم وجودي فيها ، وطولّت من بدرالدين ، لكن ، دعني أستغل بوستك هذا لأقول كلمتي في هذا الشخص ، المدعو (أخوي بدرالدين) بدرالدين يا عمر ليس أنيقاً في ملبسه فحسب الزول ده أنيق وجميل النفس ، زول عندو أمان جواه زول مريح في التعامل معاهو متصالح مع نفسو ومع من حوله بسيط لدرحة السذاجة ذكي لدرجة العبقرية كريم لدرجة البسط التي تجعله ملوماً محسوراً إجتماعي جداً ، وماهر جداً في صنع علاقات مع الجميع وفي زمن قياسي وهذا سبب نجاحه في شركته .. زول واجب ، وزول فزعة ، وزول مليانة ضحاّك لدرجة أن تُصاب بنوبة (ضحكية) مؤذية (وهذه أسأل عنها عماد عبدالله) غيّاث ، يساعد ويخدم دون مَن أو أذى مسالم جداً ، والله لوأديتو كف ما يسألك والله ، والله ، والله ، طوال سنوات معرفتي ببدرالدين هذا والتي جاوزت الخمسة عشر سنة لم أسمعه يوماً يغتاب ، أو ينم .. أو مجرد أن ينوى ضرراً أو شراً بأحد وناّس ،، رويسو الصغيروني ده مليان بلاوي قراّي ومُطّلِع (لامؤاخذة ، حتى الحمام فيهو كتب) !! هو ليس ملاكاً ، و له عيوبه ، وقد درج على الإعلان عن بعضها هنا ولكنها لا تسوى شيئاً مقابل مل يتمتع به من صفات أخرى والله يا عمر ما جبت حاجة من عندي ، وما قلت في الزول ده كل ما يستحقه في زمننا هذا لو قلت كلمة في زول فلابد أنك تحتاجه في شئ ولكنني لا أحتاجه في شئ ، بل هي كلمة حق في حق أخ عزيز.. وصدقني ، بدرالدين نموذج فقط لبعض إخوة وأخوات أعزاء التقيناهم هنا ولو أتيحت الفرصة للحديث عنهم فسأقول عنهم ما يستحقون .. له ، ولك ، ولهم التحية بدرالدين الأمير يا أخوي ، إنت عارفني ما بحب التلج وكسيرو ولكن وجدتني أقول عنك ما قلت حتى يعرف من لم يعرفك (حقاً) شيئاً يسيراً عنك.. ---------- يا عمر ،، يعني الواحد بعد ده إلا يتصور ويغير صورة بروفايلو كل يوم (عشان تآمنوا) .. بمناسبة اللبس دي ،،، مرة في نهاية التسعينات ، نسقنا نحن مجموعه من الفِرد هنا في الدوحة ، وسافرنا إجازة طويلة زي شهرين ونص كده عندنا زول ظريف جداً فردتنا هناك ، دلعناهو بالهدايا ،، وطبعاً هو (دليلنا هناك وكده) المهم كل يوم برنامج (الوكت داك نحن عزابة) والبرامج ألف المهم زي بعد خمسة وأربعين يوم كده مشينا المساء لي صاحبنا ده ، وتيت تيت تيت تيت يلا ياخ أمرق إتأخرنا ،، جا طالع لينا ببنظلون تريينق وفنيلة وسفنجة في شنو ياخ مالك ما جاهز ؟؟ عاين لينا كده ، وقال لينا ، ما طالع معاكم ، ما تجوني تاني ليه يازول في شنو ؟؟ قال لينا ياخ إنت ما بتغسلوا هدومكم ، أنا مباريكم قريب خمسين يوم ما شفت واحد فيكم كرر لبسة .. طبعاً كتلنا بالضحك ، وورث شنط المغتربين الفارات كلها ..