"بعض" النساء .. ونشـوة الأعماق

Quote: صباحكم خير... غايتو بالجد عمر سعد طرح مواضيع جيدة جدا للنقاش خلينى بس انتهى من مؤتمر القمة مع تراجى اخيتى دى وبجيكم راجعة وربما بمؤتمر قمة بين {عوين{ المنبر و {فحوله}!! كدى ياعمر نقرأ التاريخ ونقلب تمرحل حركات التحرر الانسانى بقول تحرر انسانى لانو تحرر المرأة فى نظرى لازم يكون اطاره انسانى وعمقة انسانى ولايمكن ان تتحرر الانسانية من انهزامها الا بنهضة النساء وفق المنظومة البشرية الساعية للعدل الاجتماعى.. من زمن كانت المرأة ماسكة مقاليد الامور ومن يوم اتغشت ومسكت مزارعها والارض للرجل ومن يومها بدأ تقهقرها للوراء وبقت ماقادرة تملك حتى قرار نفسها... وبسأل هل كانن {عوين} زمان هبشن جمرات الوعى؟ والحراك الحصلن ليهن ده نتاج لنضال طويل مشته الحركات النسائية والنسوية فى العالم ومن قبل حركات التحرر عموما وماحركاتنا الا امتداد ليهو، كلامك ده ذكرنى مرة كلام بروفسيرة نمساوية اتوفت ربنا يرحمها بقدر محبتها للناس وكان ياما كان وانا لى سنتين فى النمسا يادوب والبت قدموا ليها دعوة مع زولة من الكمرون نحكى عن مشاكل المرأة فى افريقيا؟ مرة واحدة كدى افريقيا...وكانما افريقيا دى مدينة ولا قرية منسية.. المهم حكينا والكمرونية كان لمن الالمانى يغلبها بتمو فرنسى ولا انجليزى، المرأة والفقر وقلنا انهن مع فقرهن متصالحات مع الواقع قامت البروفسيرة قالت كلام خلانى لسنين طويلة اعيد كتبر من حساباتى ورؤيتى للاشياء واقيف فى كل معنى وكلمة.. {طيب وكت هن مرتاحات ليه عاوزين تغيروا ليهن حياتهن} الفهمتو من كلامها انو التغيير مرات بيكون تمنه غالى وبيكشط كتير من القيم وبحول المجتمع من الروح الجمعية الى الذاتية كما فى اوربا اى غياب البعد الانسانى يعنى لمن لى شهر وشحدت جارتى النمساوية حبة ملح وادتنى باكت كامل فيهو 24 صندوق اندهشت زى دهشتها من شحطتى قدام بابها وبلا احم ولادستور عشان اشحدها ملح، دهشتها فى انو ده ماممكن يحصل فى القرن الحادى والعشرين ودهشتى فى الكمية اللى ادتنى ليها الممكن تدهش ناسنا فى بوردتسودان... التحول من الجمعية للذاتية لانو الحاجات هنا قايمة على المؤسسات وبالتالى عشان نحنا نستفيد من التجارب دى مفروض نراعى ان تكون مؤسساتنا ذات نزعة انسانية وان تكون فيها الروح الجماعية القايمة على العقل الجمعى. بصراحة ماقادرة اراجع الكلام الكتبتو ده لكن خلاصته زمان ماكان فى عولمة وماكان عالمنا قرية صغيرة.. حسع النقة دى الجابها شنو ياعمر يا اخوى؟ وكيفن تغير مسار البوست من نشوة الاعماق لسؤال الاعماق وهزيمتها بتحولات بتحصل كل يوم فى حياتنا بتمر ومابنقيف فيها لانو لو وقفنا بيكون قطر الحياة وصل الواق الواق... بالمناسبة الجندر هو صوت الانسانية فى فهمهما للصراع الاجتماعى الذى يشمل النساء والرجال معا، فهمها ليستقيم امرنا ودربنا فى اتجاه العدالة الاجتماعية والدولة المدنية... معاكم الله انا ماشة وبجيكم بعدين...مع احترامى ومعزتى رأفت.. مستنياك تفتح بوست {العوين}