|
|
 (ســـيناريوهات) :أبواب الدفع المقدم
|
العدد الأسبوعى لصحيفة السودانى
الجمعة الموافق 23 فبرائر 2007م
قام السيد المدير العام للهيئة القومية للجبايات بالدعوة لإجتماع طارئ وهام لمعاونيه وأركان حربه ومستشاريه وذلك لمناقشة الوضع المالى المتردى الذى آلت إليه الهيئة كما جاء فى دعوته المشار إليها وقد قام السيد المدير بإبتدار المدعويين للإجتماع قائلا:
- يا جماعة طبعاً إنتو عارفين إنى ما قاعد أجتمع بيكم إلا فى (الشديد القوى) والليلة أنا أجتمعت بيكم لأنو فى موضوع هام وخطير عاوز أناقشوا معاكم وعاوزين نشوف ليهو حل
- إن شاء الله خير يا ريس .. أنحنا جاهزين
- أنا عاوز أقول ليكم إنو آخر مراجعة داخليه عملناها أثبتت ووضحت إنو (الهيئة) دى خسرانه – مواصلاً- أيوه الهيئة القومية للجبايات (خسرااانه) !!!
-( أحد المجتمعين مقاطعاً) معقوله يا ريس؟؟ الخسارة دى تجى كيف ؟؟ هو أنحنا قاعديين ندفع حاجة من جيبنا ؟؟ ما كلو من جيب (الشعب) !!
- (فى صرامة) : كيف ما قاعدين نطلع حاجة من جيبنا؟؟ الموظفين القاعدين يمشوا يلمو (الجبايات) ديل والعربات الراكبنها والبنزين الماشه بيهو العربات دى .. دى كلها ما قروش؟؟
- (أحدهم) : كدى يا ريس أشرح لينا المسألة براحة براحة عشان نفهم !!
- دى عاوزه ليها شرح ؟؟ كل يوم من صباح الرحمن الهيئة دى قاعده تجهز ليها 42324 بوكسى هايلوكس بى (سواقو) وتملاهو (بنزين) ويركبو فيهو (تلاته) موظفين وعسكرى (بى سلاحو) ومعاهو (50) طبلة عشان يمشو يجيبو لينا (التحصيل) إبتداء من (ستات الشاى) والناس الفارشين ساكت) مروراً (بالمحلات) والمطاعم والمغالق والصيدليات والكافتيريات إنتهاء بالمصانع وآخر اليوم يجونا فاضيين .. الشايل ليهو (قدرة فول) والشايل ليهو (ميزان) والشايل ليهو (منقد) – مواصلاً- عليكم الله فى خسارة أكتر من دى؟؟
- لكن يا سعادتك تفتكر السبب شنو؟؟
- السبب إنو التجار والناس ديل مما يشوفو (البوكس) بتاع الهيئة يقوموا يقفلوا (المحلات) بتاعتم و(يزوغوا) – مواصلا- أها أقول ليكم حاجة (الشهر) ده نحنا مواهى ما عندنا عشان ما قدرنا نتحصل قروش!!!
- طيب يا ريس هسع المطلوب مننا شنو؟؟ يعنى عاوزنا نعمل شنو ؟؟
- المطلوب إنو نحنا لازم نشوف لينا طريقه (مبتكرة) وفعالة نجبر بيها ونخلى بيها (الناس) دى تدفع وتبطل (الزوغان) عشان أمور الهيئة دى تمشى
- وأنت يا سعادتك بتفتكر الحل شنو؟؟
- هو كان أنا بفتكر حاجه كان ناديتكم ؟؟
تنحنح مستشار المدير العام لشئون الإبتكار وقام بطلب التحدث :
- والله يا ريس فعلاً الموضوع ده خطير وأنحنا لازم نشوف لينا (آلية) فعالة لجمع (الجبايات) دى وأنا بقترح إنو عشان ما نطول الزمن فى الموضوع ده حقو نستفيد من تجارب (الدول) فى الحته دى – مواصلاً- يعنى هسع دوله ذى (الصين) تعدادها 800 مليار و تلتمية مليون (نسمة) عندهم فى (بكين) براها سته مليون (سعد قشرة) وعشرين مليون (سوق ليبيا) وأربعتاشر مليون (ملجه) وتلتين مليون (ست شاى) – مواصلاً- أها ديل قاعدين يشيلو منهم (الجبايات) كيف؟؟؟ ما أكيد بيكون فى (نظام) وآلية (معينه ومبتكرة) وما (بتخرش الميه) !!
- يعنى عاوزنا نعمل شنو ؟؟ نجيب خبراء ؟؟
- خبراء شنو يا ريس النجيبهم ؟؟ نحنا نمشى ذاتنا نشوف (التجربه الصينية) دى على الطبيعة
- والله كلامك برضو يا سعادة المستشار كويس أصلو ما تقول لينا (أربعة شهور) ما سافرنا بره !!!
التجربه الصينية :
فى سرعة (البرق) تم إستخراج (تأشيرات الخروج والدخول) وقطع (التذاكر) لأعضاء الوفد المسافر والبالغ عددهم (120) شخصاً والذى يترأسة السيد المدير العام للهيئة القومية للجبايات شخصياً وقد قامت (كاميرا الأخبار) بالتلفزيون من خلال فريق (تغطية الأخبار) بعقد لقاء سريع فى (صاله كبار الزوار) مع السيد ريئس الوفد المغادر قبل ركوبهم للطائرة أفاد فيه بأنهم ذاهبون إلى مهمة يحسب أن فيها خيراً كثيرا (للمواطنين) – على حد تعبيره – وبسؤال السيد ريئس الوفد عن العدد الكبير لأعضاء الوفد أفاد بأن الوفد يضم فى عضويته مختلف التخصصات مثل أعضاء مستشاريه الهيئة لشئون (المطاعم) وأعضاء من مستشاريه الهيئة لشئون (المغالق) وأعضاء من مستشاريه الهيئة لشئون (ستات الشاى) وأعضاء من مستشاريه الهيئة لشئون (ود عمارى) إلى آخر التخصصات المختلفة .
وجد الوفد ترحيبا حاراً ن المسئولين الصينيين لما يربط البلدين من علاقات صداقة قديمه ومن علاقات أقتصادية وقد قام قام السيد المدير العام للهيئة القومية للجبايات بعقد مؤتمر صحافى فور وصوله (بكين) أوضح فيه الهدف الاساسى من الزيارة ألا وهو الإستفادة من الخبرات (الصينية) فى مجال تحصيل الجبايات والأتاوات وبعد نهاية المؤتمر تم فتح باب الأسئلة حيث قام أحد الصحفيين الصينيين بطرح سؤال على السيد المدير العام للهيئة القومية للجبايات كانت ترجمته كالآتى :
- المعروف أنكن أصبحتم دولة نفطية وأن شركاتنا تقوم بإستخراج النفط لكم ؟ لماذا تأخذون إذن كل هذا العدد الهائل من الجبايات من المواطنين ؟؟ وأين تذهب أموال هذا النفط؟؟
لم يضع السيد المدير العام للهيئة القومية للجبايات حسبانا لهذه السؤال لكنه بعد أن (إتنحنح) و(إرتبك) وما عرف اليقولو رد قائلاً :
- والله يا جماعة قروش (البترول) القاعدين تطلعو لينا فيهو ده حافظنها (للشعب) لليوم الأسود و(الجبايات) دى قاعدين (نأكلو منها) و(نشربو منها) ونعمل ليهو باقى الخدمات من علاج وتعليم وطرق وكهرباء وموية وخلافه ... بس هو شعب (غبيان) وما عارف مصلحتو قاعد يقوم يتزاوغ من (الجبايات) دى قايلا قاعده تدخل علينا !!
لم يفق (الريس) من سؤال الصحفى عن (عائدات البترول) حتى فاجأه صحفى آخر بسؤال لا يقل (خطورة) وقد جاء السؤال بعد ترجمته كالآتى :
- نحنا فى دولة الصين هنا نعرف حاجة واحده بيدفعا (المواطن) إسمها ضريبة يعنى TAX فهل كلمة (جباية) هى ضريبه أم شيئاً آخر ؟؟
- (بعد أن صلح نضارتو وإبتسم إبتسامه ماكرة) : الضريبه يعنى الـ TAX دى عندنا بالحيل لكن يا جماعة لأنو نحنا دوله (نايم) ذى ما إنتو عارفين لقينا إنها براها ما بتعمل حاجة قمنا عملنا رسوم والرسوم دى المواطنين بسموها (جبايات) وهى ما كتيرة يعنى ذى كم وتسعين كده !!
بعد أن إنتهى (المؤتمر الصحفى) ولدهشة (الريس) أعلن أعضاء الوفد الصينى إنابه عن الشعب الصينى تضامنهم التام مع شقيقهم الشعب السودانى ورفض المسؤولون الصينيون إبدأء أى تعاون فى مجال (تحصيل الجباية) وفى
وقد أوضحوا للوفد فى دبلوماسية بأنهم ليست لديهم أى خبرات فى هذا المجال وفى المطار والوفد يغادر عائداً قام أحد السودانيين المقيمين فى الصين والذين كانو فى وداع الوفد بالهمس فى أذن ريئس الوفد قائلاً :
- إنتو الجابكم هنا شنو؟؟ ما كان تمشوا (جمهورية جبايستان) القريبه من هنا دى .. والله ديل أساتذه فى مسأله (الجبايات) دى !!
فى جمهورية جباياستان :
حطت الطائرة فى مطار (جمهورية جباياستان) بعد أن تم إخطار المسؤولين بقدوم الوفد والذى ما أن نزل أفراده من سلم الطائرة حتى وجدوا شخصاً وامامه تربيزه عليها (ختم) ودفاتر (إيصالات) و(ميزان) .
حاول أعضاء الوفد تخطى ذلك الشخص والدخول إلى صالة المطار غير أن (شرطياً) قام بإعادتهم قائلاً لهم ما معناهو :
- أيها الساده عليكم أولا دفع (رسوم) القدوم (الوزنيه) ... ثم شرح لهم نفس الشخص أنه يتوجب على كل قادم أن يقوم بالوقوف على الميزان إذ أن هذا النوع من الرسوم يؤخذ عن طريق وزن (القادم) حيث يتم حساب (الكيلو جرام) بدولار واحد فقط .. وبدأ أعضاء الوفد فى عملية الوزن والدفع .. وقف أحد أعضاء الوفد (منبهرا) من بنوعية (الجباية) يقول وهو يهتز طرباً :
- آآى ده الشغل ده الشغل
بينما رد عليه زميله الذى يقف عن يمينه فى إستياء :
- شغل شنو عليك الله خلينا (الوزن) ده ح ينفض جيوبنا
- جيوبكم ما تتنفض كلن إتنفضت إنتو بس (تاكلو ساااكت) وناسين (السفر)
بعد أن قام جميع أعضاء الوفد بدفع رسوم القدوم (الوزنية) والتى سجلت بعض أرقامها حالات ترقى لوضعها ضمن مجموعة (جينيس) كان عليهم الدخول إلى صالة (الجمارك) عبر باب خشبى وقف خلفه أحد الموظفين وهو يحمل (دفتر إيصالات) وقلم .. الباب طوله حوالى المترين محفور على جنبتيه الوحدات (الطولية) بالبوصة وعلى عارضته مكتوب : (رسوم القدوم الطولية) ... كان على كل قادم من أفراد الوفد الدخول عبر هذا الباب والتوقف لدفع رسوم القدوم (الطولية) والتى تحتسب عن طريق قياس طول (القادم) بحساب (البوصة) بدولار واحد فقط !! الشئ الذى جعل ريئس الوفد يقول لنائبه فى نشوة :
- شوف بالله الحاجات دى فايته علينا كيف والله لمن نرجع (المسافرين) جاهم بلا؟!!!
مع المسؤولين فى جبايستان :
قام الوفد بعقد لقاء فورى مع مسؤولى الهيئة العامة للجباية بجمهورية جبايستان والذين قاموا بتقديم الإعتذار لأعضاء الوفد لما لحق بهم من دفع رسوم وجبايات تجاوز عددها الخمسة وعشرين فقط منذ أن حطت بهم الطائرة وحتى وصولهم إلى أرض المؤتمرات حيث قال ريئس الوفد معتذراً :
- معليش يا جماعة نحنا هنا فى جمهورية جبايستان ما عندنا فى موضوع الجبايات دى يا (يمة أرحمينى) يعنى لا بنعرف (ضيف) وإلا (مواطن) والا (سائح) عشان كده اعذرونا
- نعذر ليكم شنو يا سعادتك ؟؟ والله ده الجابنا ليكم ذاتو !!
- (فى إندهاش) : يعنى كده إنتو مبسوطين وكده؟
- مبسوطين دى شنو؟؟ أنحنا فى قمة الإنبساط .. أحنا ح نطلع منكم بى تجارب (بت كلب) لكن الحقيقة بس أنحنا عندنا مشكلة بسيطه كده جيناكم عشان تساعدونا فى حلها لأنها غلبتنا تب
قام ريئس الوفد بسرد المشكلة التى من أجلها قاموا بزيارة جبايستان والتى تنحصر فى صعوبة تحصيل الجبايات المختلفة من (التجار) وأصحاب المحلات و(ستات الشاى) نسبة لعمليات (الزوغان) المدروسة التى يقومون بها الشئ الذى قام برفع تكلفة (الكشات) مما جعل عمل الهيئة (بالخسارة) .. كان مدير (هيئة الجباية بجمهورية جبايستان) يبتسم وهو يستمع إلى (مشكلة الوفد) حتى إذا ما إنتهى ريئس الوفد من طرح المشكله خاطبه قائلاً :
- إنتو ما سمعتو بى حاجه إسمها (أبواب الدفع المقدم) ؟
- لا والله أنحنا بنعرف الدفع المقدم للموية .. والدفع المقدم للكهرباء .. يعنى الجمرة الخبيثه لكن أبواب الدفع المقدم دى يطرشنا ما سمعنا بيها .. –مواصلا- أها دى كيفنها ؟؟
- طيب أنا أشرح ليكم نظريتا بى بساطه ... ثم مخاطبا ريئس الوفد :
- إنت هسع عندكم كان ما عندك رصيد جمرة كهرباء النور بولع ؟؟
- طبعا لا
- وأكان ما عندك رصيد جمرة مويه .. الموية بتكب ؟؟
- طبعا لا
- أها الأبواب دى كان ما عندك رصيد (جباية) ما بتفتح !!!
- الله لا كسبكم ؟؟... ودى عملتوها كيف ؟؟
- نفس النظرية .. مما الجمرة تكمل الباب القفل بتاعو ينسد (إليكترونيا) وتانى كان ما مشيت إشتريت (جباية) شمشون ما يفتحو ليك!!!
- والأبواب دى بتعملوها هنا ؟؟
- ايوه ولو عاوزين أى كميات منها ممكن نصنعا ليكم ونرسل ليكم مهندسين يركبوها ليكم
- كيفن ما عاوزين عليك أمان الله أنحنا مشكلتنا إتحلت تب
عاد الوفد إلى البلاد وعلى عكس أعضاء الوفود التى تغادر لم يحضر أى من أعضاء الوفد معه أى هدية ولم يقم بشراء أى شئ من أسواق (جمهورية جبايستان) لأنو وببساطه قد قام جميع أفراد الوفد بدفع جميع ما معهم من مصروفات (النثرية والإقامة) فى شكل جبايات متعدده الأشكال والانواع .
- أها يا ريس (المشكلة إتحلت) لكن الأبواب دى نجيبا كيف؟؟ نعمل ليها عطاء فى الصحف؟؟
- أبواب شنو البنعمل ليها عطاءآت كمان؟؟ متين الحكومة دى شفتها بتعمل عطاءآت ؟؟
- كيف يعنى؟؟
- شنو الكيف يعنى ؟؟ هسع (اليخت الرئاسى) ده تمنو 4 مليون دولار عملو ليهو عطاء وجابوهو فى (الجرايد) وإلا بس (أبوابنا) دى النعمل ليها عطاء ؟؟
- تقصد شنو يا ريس ؟؟
- أقصد إنو (الأبواب) دى نعمل ليها (شركة) .. نجيبا نحنا ونشتغل الشغل ده كلو نحنا .. .. نفتح الإعتمادات ونستورد الأبواب ونجيب المهندسين ونركب الأبواب ونشيل تمنا من المواطنين والربح يدخل لينا نحنا !!! يعنى لو الباب كلفنا بى تركيبو ميتين دولار نبيعو للمواكن بى (خمسمية) !!
وجاءت الأبواب :
تفاجأ المواطنون بتحذير فى حجم صفحة كاملة من (الهيئة العامة للجبايات) تحذر فيه أصحاب المحلات التجارية جميعها من (بقالات) وصيدليات ومغالق ومحلات إتصالات ومطاعم وكافتيريات وتركيب عطور وتوابل وأحذية وخلافه ومصانع ومؤسسات واعمال من ضرورة تركيب (أبواب الدفع المقدم) فى ظرف أسبوع من تاريخ الإنذار وكل من لن يلتزم بذلك فسوف يكون عرضة لقفل المحل وتشميعه بالشمع الأحمر .
وفى سبيل تبصير المواطنين بطريقه عمل أبواب الدفع المقدم والفوائد التى سوف يجنيها المواطن صاحب العمل من ذلك تم عمل لقاءآت تنويرية إذاعية وتلفزيونية وعلى صفحات الصحف السيارة
- شوف يا مواطن العملية بسيطه جداً وبتوفر ليكا كتير من الوقت الرايح فى المساسقه وأمشى وتعال ومرات شايلين (الميزان) بتاع الدكان ومرات شايلين (التلاجه) ومرات ما عارف شايلين شنو؟؟ إنت تركب الباب والباب ده موصل بى شاشة عداد يعنى ( جمره خبيثة) أها قول الجبايات المفروض تدفعا فى السنه كلها من رسوم رخصة تجارية وأرباح أعمال ورسوم عرض خارجى ورسوم لافته مضيئة ورسوم دفاع مدنى ورسوم خدمات أمنية وعوائد وباقى (الجبايات) دى كلها قول طلعت ليك مثلاً تلاته مليون وستمية وخمسين ألف جنيه لمن تقسما على عدد أيام السنه الـ 365 ح تلاقى إنك مفروض تدفع فى اليوم عشرة تالاف جنيه يعنى لمن يكون رصيدك فى (جمرة الباب) عشرة تالاف جنيه معناها رصيدك ده بمشيك 24 ساعة بس تقدر تفتح وتقفل فيهم على كيفك لكن بعد الأربعه وعشرين ساعه دى ما تنتهى باب المحل تانى ما بفتح ليكا إلا بعد ما تملأ ليك جمرة تانى بى أقل شئ عشرة تالاف عشان تفتح يوم واحد بس وكان داير تملأ أكتر على كيفك !!! أها بعد كده نحنا وفرنا (كشاتنا) وبكاسينا وموظفينا وعساكرنا و(طبلنا) علينا نشوفكم إنتو بتعملو شنو؟؟ وعاوزين نقول ليكم ما تعملو (شواطين) وتقوموا ما تقفلوا الأبواب بالليل للنهاية عشان تانى يوم تفتحو (ملح) ساكت (الأبواب) لأنو دى مراقبة بى (شبكه كمبيوتر لاسلكية) وفى (كنترول) عليها وأى تلاعب بيظهر لينا وعواقبو وخيمه وطوالى ح نحول (الزول) المخالف لى (نيابة) أبواب الدفع المقدم .. يعنى بالعربى كده تانى زوغان مافى !! ح تدفعو يعنى ح تدفعو !!
خوفاً من العقوبات والتهديدات التى وردت فى التحذير تدافع الجميع على شراء وتركيب أبواب (الدفع المقدم) ذات الشكل الموحد وفى ذات الوقت فقد قامت الهيئة القومية للجبايات بإفتتاح نقاط بيع فى كافة الأسواق وأماكن التجمعات
الطاهر سيد الدكان :
بالأمس حملت (جك الفول) لشراء العشاء للأولاد وإتجهت لدكان (الطاهر) الذى وجدته يجلس أمام دكانه المغلق وهو يمسك بورقة وقلم وأمامه عدد من الزباين وما أن رآنى حتى بادرنى :
- عاوز شنو يا أستاذ ؟
- فول بى ألف جنيه وزيت سمسم بى ألف وكيس عيش وعلبه سجائر ( والطاهر يقوم بكتابه إحتياجاتى على الورقه)
- طيب ديل يا أستاذ خمسة تالاف
بعد أن قمت بإعطاء الطاهر (الخمسة آلاف) قام بجمع (قروش الزبائن الواقفين) التى كان يمسك بها ثم نده على إبنه قائلاً :
- قوم يا ولد أجرى جيب ليك (جمرة باب مقدم) بى خمستاشر ألف بى سرعه خلينا نفتح نمشى الزبائن ديل !!!
|
|
 
|
|
|
|
|
| العنوان |
الكاتب |
Date |
| (ســـيناريوهات) :أبواب الدفع المقدم | الفاتح يوسف جبرا | 02-23-07, 05:50 AM |
| Re: (ســـيناريوهات) :أبواب الدفع المقدم | Abdelmuhsin Said | 02-23-07, 05:59 AM |
| Re: (ســـيناريوهات) :أبواب الدفع المقدم | الفاتح يوسف جبرا | 02-23-07, 09:03 AM |
 Re: (ســـيناريوهات) :أبواب الدفع المقدم | Adel Sameer Tawfiq | 02-23-07, 11:42 AM |
| Re: (ســـيناريوهات) :أبواب الدفع المقدم | Moneim Elhoweris | 02-23-07, 12:55 PM |
| Re: (ســـيناريوهات) :أبواب الدفع المقدم | الفاتح يوسف جبرا | 02-23-07, 01:02 PM |
| Re: (ســـيناريوهات) :أبواب الدفع المقدم | Moneim Elhoweris | 02-23-07, 01:54 PM |
| Re: (ســـيناريوهات) :أبواب الدفع المقدم | محمد الامين احمد | 02-23-07, 02:16 PM |
| Re: (ســـيناريوهات) :أبواب الدفع المقدم | الفاتح يوسف جبرا | 02-23-07, 03:25 PM |
| Re: (ســـيناريوهات) :أبواب الدفع المقدم | Hussein Mallasi | 02-23-07, 04:11 PM |
| Re: (ســـيناريوهات) :أبواب الدفع المقدم | ناذر محمد الخليفة | 02-23-07, 04:16 PM |
| Re: (ســـيناريوهات) :أبواب الدفع المقدم | AmroKamal | 02-23-07, 05:16 PM |
| Re: (ســـيناريوهات) :أبواب الدفع المقدم | الفاتح يوسف جبرا | 02-23-07, 07:52 PM |
| Re: (ســـيناريوهات) :أبواب الدفع المقدم | الفاتح يوسف جبرا | 02-23-07, 07:56 PM |
| Re: (ســـيناريوهات) :أبواب الدفع المقدم | الفاتح يوسف جبرا | 02-23-07, 08:01 PM |
 Re: (ســـيناريوهات) :أبواب الدفع المقدم | مازن عادل عبدالغني | 02-25-07, 10:37 AM |
| Re: (ســـيناريوهات) :أبواب الدفع المقدم | نيازي عبدالله مرحوم احمد | 02-25-07, 02:26 PM |
| Re: (ســـيناريوهات) :أبواب الدفع المقدم | إسماعيل حميم | 02-26-07, 09:29 AM |
| Re: (ســـيناريوهات) :أبواب الدفع المقدم | الفاتح يوسف جبرا | 02-26-07, 03:45 PM |
| Re: (ســـيناريوهات) :أبواب الدفع المقدم | الفاتح يوسف جبرا | 02-26-07, 03:53 PM |
| Re: (ســـيناريوهات) :أبواب الدفع المقدم | الفاتح يوسف جبرا | 02-26-07, 03:56 PM |
| Re: (ســـيناريوهات) :أبواب الدفع المقدم | عبدالأله زمراوي | 02-26-07, 04:13 PM |
|
| |
الفاتح يوسف جبرا
فيس بوك
تويتر
انستقرام
يوتيوب
بنتيريست