|
|
 وكر الشيطان .. (صورة)
|
كثير من الناس يعتقد أن الشيطان كائن يتواجد في أمكنة بعينها منها ، على سبيل المثال، الأماكن الخربة
ومقالب الأوساخ ، وبالطبع مقالب الساسة ، وفي الجبال والأماكن النائية وربما الكهوف والبيوت والآبار المهجورة،
حتى جاء في الأخبار أن العالم الألماني غيرهارد روث ، وهو اختصاصي مخ وأعصاب ، إكتشف أن بالدماغ بقعة سوداء
في وسط الجزء الأعلى منه توسوس للإنسان للقيام بأعمال نراها أفعالا شيطانية أسماها (وكر الشيطان) Devil’s Den
إن جاز التعبير،
وتجربة العالم المذكور تتمثل ببساطة في إخضاعه عددا من المجرمين العتاولة لمناظر وأفلام فيديو وحشية وعنيفة فظهر
نشاط في كل أجزاء أدمغة أولئك المجرمين عدا بقعة واحدة لم تتفاعل مع تلك البلاوي رغم أنها البقعة التي تنشط
للعاطفة والحزن وتأنيب الضمير والأسف والمشاعر الإنسانية النبيلة من عينة إنت لو داير بكايا ألف أهلا يا دموع....
وحيث أن البقعة تلك لم تتأثر بالمشاهدات الوحشية تم استنتاج أن تلك البقعة هي الوكر بتاع فلان زاتو Where Evil Lurks
http://www.alarabiya.net/articles/2013/02/08/265107.html
|
|
 
|
|
|
|
|
|
|
 Re: وكر الشيطان .. (صورة) (Re: د.محمد حسن)
|
Quote: كر علينا
مسكوني وما عارفين |
في ناس الشيطان ساكن معاهم بالإيجار وآخرين ملك حر يا دكتور..
عموما وفقا للخبر يا محمد فإن غيرهارد روث (إقترح حلاً لتفادي تولي شخص من المجموعة الثالثة السلطة،
أو لتقليل أثر ذلك من خلال "تنشيط الجانب الروحي" لدى الأطفال منذ نعومة أظفارهم، والتعاون مع أولياء
أمورهم "قبل أن يصبحوا قتلة ولصوصاً ومجرمين").
تنشيط الروح مهم يا دكتور،
مهم ياخ،
يا روحي.. هاجري وفتِّشي..
هاجري هاجري كان تلقي شي ..
| |
|
|
|
|
|
|
|
|
|
Re: وكر الشيطان .. (صورة) (Re: محمد المرتضى حامد)
|
Quote: ووفقا للخبر فإن أخطر أنواع البشر هم أصحاب المجموعة الثالثة التي
(تضم طغاة وديكتاتوريين، يتحلون بألسنة فصيحة وكلام معسول لكنهم "كذابون وسيئو السمعة".
ومن ينتمي لهذه المجموعة لا يُدرك أنه أخطأ كما أنه لا يعتبر نفسه مسئول عن أي إخفاق، علاوة على أن كل
من يصنف على أنه في هذه المجموعة مصاب بجنون العظمة) شايف كيف!! |
تحياتى الأخ محمد المرتضى
غايتو أنا بعرف لى كميه من النوع الثاث دا ..
وبإسم الشعب السودانى .. أعلن تبرعى بدماغمهم بعد إعدامهم للبحث العلمى .. أكيد حيلقى العلماء مجموعه منهم أخطر من المجموعات الثلاثه
| |
|
|
|
|
|
|
|
|
|
Re: وكر الشيطان .. (صورة) (Re: أسامه الكرور)
|
| Quote: غايتو أنا بعرف لى كميه من النوع الثاث دا .. |
عزيزي ميرغني،
بالطبع مساحة البقعة المذكورة (وكر الشيطان) في أدمغة الفئة الثالثة ، إن كان لهم أدمغة،
لها النصيب الأعظم من الخلايا الشيطانية كما أن لها القدح المعلى في سلوكياتهم وقراراتهم وتصرفاتهم..
وفي ظني أن النماذج المشار إليها من المجموعتين الثانية والثالثة تكاد تعلن عن نفسها ونراها في كل يوم
وكل ساعة في حياتنا اليومية ومعرفتهم ما دايرا ليها درس عصر.. فالذين يمارسون العنف اللفظي ويشتمون الناس
ويشهِّرون بهم دون سبب والذين يستحلون أعراض الناس ويستهوون اغتيال الشخصية Character Assassination
لأتفه الأسباب هم والقتلة سواء ، ولاشك أن من لايقبل برأيك ويستخدم العنف اللفظي بالكتابة لأنه لايملك سلطة
عليك ولا سلاحا ماديا يوجهه نحوك فلن يتوانى في استخدام المتاح من السلاح ضدك، إذا ملك تلك السلطة.
إن شاء الله مدفعية ميدان عيار 155 ملم عشان ما يلقوا حتى أجزاءك والتاريخ بعيده وقريبه يحتشد
بالكثير من نماذج الفئة الثالثة.
| |
|
|
|
|
|
|
|
|
|
Re: وكر الشيطان .. (صورة) (Re: Khalid Kodi)
|
أستاذ محمد المرتضى،
يا سلام عليك كتاباتك دائما سلسلة وممتعة في القرأة.
أكتب أكتب ياخي الله يديك العافية.
طبعاً البحث الطبي أو الإكتشاف الذي أجراه العالم الألماني غيرهارد روث
نحن السودانيين نعتبر خارج هذا النطاق.. تعرف لماذا..
لأن الزول بتاعك دا قالوا (قرف) وهاجر هو وجماعته من السودان زمان.
| |
|
|
|
|
|
|
|
|
|
Re: وكر الشيطان .. (صورة) (Re: عزيز عيسى)
|
Quote: نحن السودانيين نعتبر خارج هذا النطاق.. تعرف لماذا..
لأن الزول بتاعك دا قالوا (قرف) وهاجر هو وجماعته من السودان زمان. |
يا عزيز ، بالفعل ، حسب رواية موظف الجوازات ، إنو سأل فلان دا ماشي وين؟
وفلان قال ليهو ياخ خارجنا وما تفوِّت علينا الطياره إنت ما سمعت بالحوار الغلب شيخو ؟
.. لكن لو الأوضاع إتصلحت بجيكم أفقد الحبايب..
| |
|
|
|
|
|
|
|
|
|
Re: وكر الشيطان .. (صورة) (Re: Mahmoud Mustafa Mahmoud)
|
| Quote: أنا أخير ما أنضم ...على قول ود جبرين.... |
هسه يا محمود جايب سيرة الزول دا ليه؟
الزول دا لايتبع أي من المجموعات الثلاث جايب سيرتو ليه؟
معليش يا طارق ، أمسحا لي في وكري..
طبعا يا محمود الوسواس ممكن يكون جن وممكن يكون شخص طبيعي وفقا لسورة الناس..والمهم في الموضوع
أنه يثبت أن الوسواس الخناس المنتمي للجن قاعد جوه المخ ، أما الوسواس الخناس المنتمي للناس
وبرضو من الفئة الثالثة (يعني وسواس وعنده وكر شيطان في آن) فهو يصدق عليه أنه عجوة معطونه في عسل
كما يقول حبينا jini ، يعني ممكن نغني لذلك الشخص بتصرف:
إنت الأبلسه بأكملا يا أخطر انواع البشر..
| |
|
|
|
|
|
|
|
|
|
Re: وكر الشيطان .. (صورة) (Re: محمد المرتضى حامد)
|
Quote: إكتشف أن بالدماغ بقعة سوداء
في وسط الجزء الأعلى منه توسوس للإنسان للقيام بأعمال نراها أفعالا شيطانية أسماها (وكر الشيطان) Devil’s Den |
هههههههها انت عارف يا مرتضى عندنا شدرة عرديب كبييييييييييييرة وعمرها زي 500 سنة وراء حلتنا البردانة الناس قالوا وقت يجوا من الخلاء وقت الدماسات ( المغربية يعني) ببروها بعييييييييييييد لانو فيها شياطين بدقوا القهوة طق تطق طق
في ناس من حلتنا قالوا شافوا تحتها خواجية لابسة ليها برمودة وماسكة سجارتها وتدخن ساااااااااااى وتتلفت يمين وشمال وترمش في عيونها المكحلات ساااااااى ولا بتضحك وما ساعلة في واحد فيهم . الجماعة لما قربوا ليها وشافوها تلبوا من جمالهم وحميرهم وخلوا العنكوليب والتبش على ظهورها وطعنوا تراب .
اوع بس يكون دا شبح العالم بتاعك دا ؟
| |
|
|
|
|
|
|
|
|
|
Re: وكر الشيطان .. (صورة) (Re: الطيب شيقوق)
|
| Quote: الحمد لله نحنا ماعندنا مخ زاتو ... وبهذا يكون فلان صاع! |
عزيزنا خالد،
جرى نقاش بين عدد من الأصحاب هنا حول كينونة الشيطان نفسها وما إذا كان هو طاقة سالبة
ام موجات أم ... إلخ، وعلى أية حال قوقلت المعنى ووجدت الوكر في قاموس المعاني يعني
( عُشُّ الطائر / الذي يبيض فيه ويُفرخ ، سواء أكان ذلك في جبلٍ أَم شجرٍ أم غيرهما .
والجمع : أَوْكُرٌ ، وأَوْكارٌ ، ووُكُورٌ . والوَكْرُ َ ضَرْبٌ من العَدْو كأَنَّه النَّزْو .) وبالتالي يعتبر
الوكر مكان إقامة لكن لايحول ذلك دون التواجد خارجه، فما تطمئن ، كما أن هناك شيطان
للفن والشعر والأول يمكن أن يسكن في ريشه..
أرفع تلفونك..
| |
|
|
|
|
|
|
|
|
|
Re: وكر الشيطان .. (صورة) (Re: الطيب شيقوق)
|
Quote: في ناس من حلتنا قالوا شافوا تحتها خواجية لابسة ليها برمودة وماسكة سجارتها
وتدخن ساااااااااااى وتتلفت يمين وشمال وترمش في عيونها المكحلات ساااااااى ولا بتضحك وما ساعلة في واحد فيهم |
يا شيقا هناك قصص وروايات في هذا الإتجاه لاحصر لها،
كثيرا ما حذَّرنا الأهل بالإبتعاد عن أشجار بعينها سيما (في المغارب)..
ولحظت أن معظم تلك الأشجار كانت من فصيلة السدريات بل كان البعض يتخيل أشكالا
معينة ويقسم بأغلظ الإيمان أنه رأى شبحا أو شيطانا تحت الشجرة وربما يكون
اللاوعي هو مصدر تلك الأخيلة .. أها ، زولك دا ربما كان فرغ لتوه من مشاهدة فيلم
لمارلين مونرو طالما إنو الموضوع جاب ليهو برمودا وسيجاره وترخي الرمش
فوق الرمش وادللي..
ناس حلتكم ما قالوا ليك اللابسه البرمودا دي عندها عضم شيطان؟
| |
|
|
|
|
|
|
|
|
|
Re: وكر الشيطان .. (صورة) (Re: محمد المرتضى حامد)
|
Quote: زولك دا ربما كان فرغ لتوه من مشاهدة فيلم
لمارلين مونرو |
هو كان عندو فكر قدر دا بيحفروا ليهو بير قدام بيتو وعينو للخواجات يتكشحوا بمويتها وبعد داك يدفنوها ليهو دفنة الليزر ما يجيب خبر مكانا ؟ قال مارلين مونرو
| |
|
|
|
|
|
|
| |
محمد المرتضى حامد
د.محمد حسن
أسامه الكرور
Mahmoud Mustafa Mahmoud
Khalid Kodi
عزيز عيسى
الطيب شيقوق
طارق جبريل
فيس بوك
تويتر
انستقرام
يوتيوب
بنتيريست