أعتذر للجميع لنشري هذه الصور..

Quote: مجهودات كبيره بذلت في مسألة النظافه ومجهودات أكبر بذلتها هيئة تطوير السلوك الحضري (هيئة تطوير السلوك الحضري) ؟

لا تقل أنها تلك التي كانت لها بوسترات وصور كبييييره للوالي ومعه عميد سابق ؟ يا محمد ياخ إتصلح معانا ياخ..

Quote: لكن للأسف المجتمع محتاج توعيه أكبر وأكبر في مسألة النظافه

أتفق معك وهذا دور فرض عين يقع على عاتق الدولة بالكامل وأي دور لمؤسسات المجتمع المدني في هذا المنحى يندرج
تحت باب النوافل ويظل دورا ثانويا ومساعدا لا أكثر.. لكن يا محمد لازم يكون في آلية لإنفاذ القانون الموجود على كل من يسئ
للبيئة وهذا ما نجده في كل بلد يعنى بالنظافه والتي هي من الإيمان.

Quote: ثقافة رمي الأوساخ في الأماكن المخصصه لسه بعيده عننا شديد برغم الإجتهادات التي بذلت في المدارس والجامعات

هي وين الأماكن (المخصصةلها) دي؟
طبعا يا محمد التعميم مخل ، هناك الكثير من المواطنين في منتهى النظافة والرقي ، أناس بسطاء لكنهم يعرفون
الحقوق والواجبات ومايمليه الضمير ، القلة هي التي تسئ ، أنا معاك ممكن تلاقي زول يسبق إسمه لغم بروف أو حرف الدال إياهو
من أقرب شباك يبصق السفه ( يمكنك تشكيل حرف الفاء بما تريد) غير آبه بأي شئ، في الشارع في كراعك في حوض الزهور ودا غلط،
تخيل أحمد الجابري يقول الزهور بسمت لينا ويقوم واحد ينبسط ويبصق على حوضها سفَّه نص رطل ودعماري فيتدلى اللحن
الصريع (رحم الله الفذ مصطفى سند واعتذاري للقصيدة)..
ياخ معقول بس؟ معقول زول ياكل في الموز ويرمي القشر بوراهو في الظلط؟ هسه لو أبوهو جا وِطا القشره دي !!
مش أقل حاجه كسر في المخروقه؟

Quote: أتمنى برضو عكس الوجه المشرق

كيف يعني يا محمد ، نلعب على نفسنا وعلى الناس؟ مش كفانا لعب؟ ( ما داير أقول "كضب" فقلت "لعب")
صدقني يا أخي زار وفد من دولة خليجية الخرطوم لمؤتمر وحدثني أحد أعضاء الوفد عن تجربته وقال لي السنه دي في عمل مشترك
وسيتم في الخرطوم ولكني اعتذرت وأضاف بأدب : لأني مرتبط بمؤتمر آخر في نفس الموعد بدولة عربية أخرى، قرررربت أقول ليهو
رسالتك وصلت. عشان كدا لازم نشوف مشكلتنا وين ونعالجها ونتوقف عن خداع النفس والآخر.

Quote: لأنو ماينشر من صور قبيحه عن السودان في الإنترنت ينتشر إنتشار واسع ويعكس صوره غير صحيحه عن السودان

أخي محمد ، هل أنت جاد في قولك أننا نعكس صوره (غير صحيحة) عن السودان ؟ يعني الصور دي من داغستان؟

Quote: ياريت الظواهر الذي دي نتناولها بدون صور لو أمكن

يا أخي مسألة إننا نتناول هذه الظواهر بدون صور دي ما عمليه لأن الصور تكفي عن مقالات وعن سؤال عن المصدر وعن وعن ،
وأنا تقتلني العنعنات ، في ناس هنا يا محمد بتاعين سياسه ونقه وأنا ما بعرف السياسه ، أها ديل لامن يشوفوا الصوره وموقعها تاني
كلو كلو ما بيغالطوك سيما أنني لست من ناس الغُلات لأنو الغلات دا ما كويس.. الصور وقعها على النفس كبير يا أبا القاسم ومفعولها
أكبر و وتقوم مقام ال ( Electroconvulsive therapy ) والذي يستخدم لإخراج مرضى الإكتئاب الذين تفشل معهم الحاجات التانيه،
أها ، المسؤولين ديل دايرين (ECT ) يا شيخنا.

أخيرا يا أخي عايز أقول ليك حاجه ، البلد دي بلدنا كلنا وربما تكون هناك فئة تعتقد بأنها تملكت السودان بالتقادم
لأنها حكمته دون رضا أهله وفي غفلة منهم وتريد منا أن نقول أي حاجه تمام وكلو في محلو، الناس ديل ما بيعانوا كما نعاني
نحن وإذا ظللنا نخفي هذه الحقائق سينهار كل شئ وعندما ينهار كل شئ سينهار على رؤوسنا نحن وأما الجماعه إياهم ستجدهم
أول الهاربين إلى الخارج ، هكذا علمنا التاريخ قديمه وحديثه..
حديثه الذي يشفي العليل..

شكرا يا محمد على مشاركتك وأعلم أنك أوردت مداخلتك (الأولى) من منبع زعل وغيرة ولكن الغيره في غير محلها قد تفضي
إلى غرغرينا.

صابحني دايمن مبتسم..



مؤونة عام من النظافة .. وحيث إنك تحب الصور النظيفة الجميلة قلت أجيب ليك شئ يسر النفس








أحد شوارع مدينة مسقط