عاصم البنا ، أدهشتني..

Quote: محمد المرتضى حامد اكتر اسم بقرا ليو في سودانيز وبالجد بستمتع بكتاباتك الجميلة والرائعة وعلى قدر إستمتاعي بكتاباتك على قدر ما بتهيب من التداخل في بوستاتك خوفا من ان تاتي مداخلة( شترة) وتبوظ الكلام المنمق الجميل عشان كدة بستمتع بالقراية وامرق لكن في هذا البوست إجتمعت انت وفناني المفضل عاصم البنا لذلك لم استطيع التفرج من غير ما اقول ليك تسلم على هذا الإختيار الجميل ويسلم عاصم على هذا الاداء الرائع ولا داعي لان اطلب منك المزيد من الإمتاع لانك دوما معودنا عليه فانت يا اخي جميل لذلك تأتي لنا بالجميل شكرا لك يا استاذ

حايم من قبيل في الأستوديوهات أفتش لي برواز مقاس كلامك دا ياساميه،
إنتي قايله تاني بشتغل بي زول؟
بعد قريت الكلام دا قلت لل (السكرتيره) عاصم كان اتصل قولي ليهو ما فاضي واعتبر
البوست إتقفل.. لكن بيني وبينك لي هسه بتلفَّت !! يا ربي دا كلام عن هضربتي ؟

شكري على هذا الإطراء يا عزيزة ،
الإبداع يأتي من الفنانين أين كان موقعهم في أطلس الجغرافيا وشخصي يكتفي بالنقل لا أكثر يا سيدتي،
هنالك أشياء ياأختي ساميه لاتصل سقف الإمتاع إلا إذا شاركنا وأشركنا فيها الغير،
هسه مش مرات تكوني بتتفرجي في التلفزيون تقومي فجأة تكوركي لزول تعال ألحق يا (...) شوف دا ،
كرة القدم لانشاهدها فرادى وكذا المسرح والطرفه الجميله إلخ..
(عصفور ) ككل الروائع يستحيل أن أبلغ حد نشوتي واحتفائي بها إذا لم تتسرب لآلاف الآذان وتتوهط في كم قلب كدا،
فوق هذا وذاك أردت - بشكل غريزي - أن أدرك ما إذا كان الآخر يتقبلها على ذات الإرتفاع
ويحلق بها بنفس الأجنحة أم أن بي مغالاة وربما مسٌ من عمل الفنان..
صدقيني ليس ثمة مجاملة لعاصم في هذه الأغنية على وجه التحديد وهو يعلم جيدا مدى
صراحتي وقد واجهته بنقد حاد في بعض أغانيه وربما يبلغ البعض حد السغربة في إستخدامي
مصطلح (أدهشتني) لكنها الكلمة المناسبة لأن عاصم ، خلافا لمجايليه وكثير ممن سبقوه،
قام بعمل جاد وهذا واضح من إجماع المتداخلين هنا ولاشك أنهم لايجتمعون على مجرد مجاملة،
ما يهم أيضا أن عزيزنا عاصم استهل مشروعا ضخما أنفق عليه الكثير من الوقت والجهد والمال
غض النظر عن أيلولة النتائج لكنه آمن بشئ وسينفذه بعون الله وتشجيع أمثالكم..

مودتي واحترامي..