|
البنات فى الكلاكلة ... طعم تانى وحاجة تانية
|
(1) أ أسد ... ناء نمر ... حاء حصان كأ كلاكلة الطفولة يا شباب والكهولة هى تكبر , وانت تكبر هى تبقى , وانت تفنى هاء هجين اندماج عربى , زنجى شرقى , غربى يا بصاولى يا صعيدى الرطانة حلوة , نوبى كلو ذاب فى كلو خلطة أ أسد , اتحاد مع بعض يلا قولوا (كأ كلاكلة) جبهجى , وشيوعى , سنى اتحادى , امة , بعثى اشتراكى , ومستقل كشة , عرقى يلا نجرى جأ جرى عسكرى الكشات لئيم , زول مفترى (2) test ساون , صوت مغنى عأ عرس يلا نمشى فيو بنات والبنات فى الكلاكلة , طعم تانى وحاجة تانية - يا حليوة لحظة ثانية . - نظرة بس . من عيونكم داير امان النهود يا برتقان من زمان عاشق بناتكم يا كلاكلة والكبار زى الشجر , والشجر فيهو الصمغ والنبق نيم شوارع والبنات قدلات خطاهم فى الشوارع ووووب علينا من شوارعك يا كلاكلة (3) زاء زلابية يلا نمشى (اللفة) شان ناكل زلابية داير اسف - لو سمحتا سفة يا ووووب علينا من صعوط (اللفة) فى قلب الكلاكلة دوختا منك يا (عمارى) ركشة - امشى التركى , فى التركى اسبتالية (4) (قلعة) قالعة على البحر (قبة) تحت القبة شيخ (وحدة) واحدة (صنقعت) انتى الاساس بيت ابوى , يا سوق (3) لحمة , انواع الخضار عيش , جرايد ووووب علينا من اكاذيب الجرايد ووووب علينا من حقايق فى الكلاكلة (5) (قطعية) فيك انا قد قرأيت أ أسد , ميم مشيت (وحدة) حبى الاولانى يا (عواطف) عأ عواطف وين جوابات ناس (عواطف) كلها غلطات فى املاء وخط شين ( اننى قد احبتبو , وانت ذو ما تعرفن , احببك ) (كمبوديا) اوعك ما تجازف ميم مجازف كأ كلاكلة عأ (عواطف) (6) خأ ختام فى الختام يا كلاكلة ليك سلام جيلنا ماشى , جيلنا شطب جيل جديد لبلاب حيطلع جيل مصادم جيل حيطلع فى ثوانى , زى اغانى حاجة تانية وطعم تانى بكرة يهتف فى الكلاكلة ( نحو سودانا الجديد ) جيل مثقف , واعى , فاهم جيل ديمقراطية حرة شعب واحد , اتحاد عربى , زنجى شرقى , غربى اندماج يا كلاكلة ليك سلام عأ عواطف وين جوابات ناس (عواطف) ؟ وين شبابى الراح شمار فى مرقة فى خضم العواصف ؟ أ أسد .
شاهين .
(عدل بواسطة shaheen shaheen on 03-06-2006, 02:05 PM)
|
|
|
|
|
|