مدرسة الحوش الثانوية / لها علينا يد سلفت و دين مستحق

Quote: تطير قمرية من عُشة ... تفتش لسة لي قشة يحش جناحاتها صقر الريح تقع مكتولة بالدهشة صباحاتي الحلم مضبوح صباحاتي الفرح غشُّه مباهجنا انتحر لونها مرابعنا انتهت حفرة حدايقنا اتسقت صُفرة مقابرنا اتملت خضرة نزح دُخرينا لي ينا وفي جوفها السمح خشّ وبين الحوض وود سلفاب صبح جرح الوطن ممشى مذياع الوطن متعوس ساسق من فراق لفراق يرازي الموت عريشة الفُل يشقق في سقفنا الضُل ويسد بي كفوا نور الطاق أيا والي الغُبش والحوش وتر مصبوغ بحزن الدوش مغص مغروس في صوت مقروض (هلال ) من فوق نجيل مرشوش صعب حنضل أساك ينطاق وزي كل الجميل وأصيل في بلد الحُرقة والدقداق تفوت بسراع كأنك ضو شلع في الجو كأنك ضيف كأنك طيف رسم للناس شعر بالساق جدع في الطين بذور سرو طلع في غفلة بالرقراق بين الحوش وودسلفاب كفر ووتر عذاب وسفر غبار وحفر سهام الحرقة من نشاب أسف خلى الشدر هاجر وشاب وشاب قش الجزيرة الشاب بين الحوش وودسلفاب قدم دوزن حرافة تسر وتر ضمّد هوان آلامه بي حرف القصيد الحر بين الحوض وود سلفاب بريق نجمين نقيح جرحين دعش اسمين بذروا النشوة في الأوصال وخلوا الكون وقيصوا كُتر وكان ثمر الحصاد الشوك وتبريح السهام المر ورسم اسمين على نصبين ممددة في فيافي خراب تقع لوزتين في سدر الطين تنقرش في خلا الأحزان على عود الهشاب ريشتين خريف الرازه حتل غيموا ناح محسور على الولدين يغيب والي القلوب الزين ومدفوسه الرفوف والين وود سلفاب تفارق الروح وأرواح الهتش بايرين يمرقوا الناس ديوش وخلوق على دُخري الوطن باكين لا إعلان لا اذعان لا ترتيب لا تغييب لا ترهيب بحرف الدين بلد بعزف صدق نفسوا دليلوا هو اهو في قلبوا ومتوكل بروح ياسين بين الحوش وود سلفاب شليل والليل وعين السدرة بتفتح على القمرة وبكرة صباح بيتمطى ويقوم مرتاح ولد ممراح يسوق الكورة بي قلبوا يحاور بيها في المطرة يدندن بيها بالأقدام ويساسق بيها في الأحراش وينقرش بيها في فوق الراس يخلب بيها لب زهرة ويبشر بيها فوق شجرة تزغرد أموا وتكبّر دقر يا عين يا ( والي الدين ) تخاف العين تجر بسراع تجيبلوا حجاب من الفقرا بين الحوش وود سلفاب ناي الراعي بتبتب شجون نغماتوا وتصبح على الضامرين على البسطا كمنجة تنوح على الوالي تقطع في جنون وترها رقصة زوربا بالكورة وأغاني العزة لي طيبة ولي نورا وللفقرا دموع النخلة بتبدع تكب في الوادي نافورة تطرشق بالحزن عشرة وتتكرفس غصن ليمونة في شوكها تقول محشورة في الوكرة بين الحوش وود سلفاب يقيف فارماس على التلة يأذن لي خلاص الناس ويكبّر صوتوا للحلة يأشّر بي ضراع وعيوا على الطاغية على الكهنة على المافيا على العلة ويصير صوتوا عز الأيام ونور فانوس في قطية وضل ممدود في ضهرية قمح مدروش عشا الأيتام ضمير عاشق هوى الأرحام مسادير تضفر الأحلام عيون مفتوحة لي قدام صبر مشدود على الآلام جدول في اليباس دقاق وزي كل الجميل وأصيل في بلد الحُرقة والدقداق يفوت بسراع تقول زي ضو شلع في الجو تقول زي طيف تقول زي ضيف جدع في الطين بذور سروا مما قمنا كان دخرينا بتسرب ويقع في البير مما صحينا كان لافينا توب سيدّنا كان قابضنا من حلقومنا برضوا مشير مما شفنا كل أحلامنا كان بموت من التخدير مما عرفنا كلوا حريف وزول رائع مصيرو عسير مما وعينا ياما سمعنا ناس بتقول صحيح ما بتدي أصلو حريف صحيح ما بتدي أصلو شريف زرعنا يطول يقيف قندول نحاحي الطير يرك الموت في عيش الريف وبين الحوش وود سلفاب نعيش ونشوف جرعنا الزايدة بالتخدير غيومنا الراحلة دون تفسير كنوزنا الرايحة بالتقصير وؤانا الواقعة بالتكسير وكلو حريف وزول رائع قصادو هدف ويقاوم جرحو ويتحمّل ويتبتب جروح الناس ويتأمّل ويحلم بي وطن أجمل تدوسو المافيا في جرحو وفي حلمو ويتكعبل بين الحوش وود سلفاب زمن ب ابدي زهرة شمسو غير الذلة والتنكيل وطن اورادو موت اقمارو بالتعجيل يقع جدي الخلا الساساق بعد رسم الشعر بالساق وزاد ترنيمو كلو نجيل ويغيب فارماس وود سلفاب وست الجيل بعد خلى القصيد قدره تجمّل كون عذاب الناس بريشة الصحوة والفكرة يقول الناس بفوت الليل وتفتح شمس بكرة على جبل الهموم يطلع مهوّ/ في عذاب الجيل يقبض بالثبات أزميل وينحت بالصبر وطناً هواهو أصيل عذابو نبيل بين الحوش وود سلفاب تتفتح جروح مريم وست الجيل تصير شمساً بتطلع ضاحكة مليون ميل ونجمات في خلا الأحزان تسوق خطوات مسافر ليل مزارع للغبش ميراث ملاعب تخلب الأنفاس مسارح حرة دون حراس وغنوات للبنات والنيل تطير قمرية من عُشه تفتش لسة لي قشة يحش جنحاتها صقر الريح تقع مكتولة بالدهشة صباحاتي الحلم مضبوح صباحاتي الفرح غشُّه .. زوربا : يوناني أشهر الشخصيات السينمائية التي جسدها أنتوني كوين في فيلم ( زوربا اليوناني ) فارماس : الشاعر المغني في مسرحية " نبيتا حبيبتي " وهو يرمز للوعي والثورة